Pene 16

Te faaipoiporaa e te ti‘araa metua: Te faaineineraa i to tatou mau utuafare no te oraraa mure ore

Ma te arata‘ihia e te mau metua parau–ti‘a e te here, e nehenehe te mau utuafare ia hoê no te tauturu i te paturaa i te basileia o te Atua e ia faana‘o i te taatoaraa o te mau haamaitairaa no te ra‘i.

No roto mai i te Oraraa o Wilford Woodruff

Ua faaipoipohia o Wilford Woodruff e Phoebe Whittemore Carter i te 13 no eperera 1837 i Ketelani, Ohio. Na roto i te taato‘ araa o to ratou oraraa amui, ua faaruru raua i te mau tamataraa e rave rahi, no reira ua paari raua i roto i to ratou haapa‘oraa te tahi e te tahi, ta raua mau tamarii, e te basileia o te Atua. Ua tae mai te hoê o taua mau tamataraa ra i te tau to‘eto‘e no te matahiti 1838, e pae ava‘e hou te piiraa o Wilford Woodruff ei Aposetolo. A arata‘i ai te taea‘e Woodruff i te hoê pŭpŭ Feia Mo‘a i te hoê tere e te tahi atu mau melo no te Ekalesia, ua tupuhia ta’na vahine faaipoipo i te ma‘i rahi. Teie ta’na i faati‘a i muri mai:

« I te 23 no novema ua roohia ta‘u vahine faaipoipo, o Phoebe, i te hoê ma‘i mauiui puai i te upoo, tei riro mai i muri iho ei fiva i roto i te roro. Te rahi noa- ’tura to’na ma‘i i te mau mahana atoa a tamau ai matou i to matou tere. E ati rahi no te hoê vahine ia tere na ni‘a i te hoê pereoo hutihia e te mau puaatoro na ni‘a i te mau purumu ofafai, i roto i to’na ma‘i. E mea ma‘i roa atoa ta maua nei tamarii iti i taua taime ra.

I te mau mahana i muri mai, ua ino roa te huru o te tuahine Woodruff, noa’tu e ua nehenehe ia ratou ia faafaaea i roto i to ratou tere e ia imi i te mau vahi faafaaearaa. Te haamana‘o ra te taea‘e Woodruff: « I te 3 no ditema e mea paruparu roa ta‘u vahine. Ua haapa‘o noa vau ia’na i te taatoaraa o te mahana, e i te mahana i muri mai ua ho‘i atu vau i Eaton [te hoê oire tapiri noa] no te tii atu i te tahi mau mea na’na. E au ra te haere pohe atura oia, e i te pô e au ra e ua faaru’e mai to’na varua i to’na tino, e ua pohe oia.

« Ua haaputuputu mai te mau tuahine i pihai iho i to’na tino, ma te heva, a hi‘o no‘ai au ia’na ma te oto. Ua haamata te Varua e te mana o te Atua i te parahi mai i ni‘a iho ia‘u e tae noa’tu, no te taime matamua i roto i to’na ma‘i–raa–hia, ua î to‘u nei aau i te faaroo, noa’tu e, te tarava ra oia i mua ia‘u mai te hoê taata pohe. »

Ma te haapuaihia i roto i to’na faaroo, ua horo‘a o Wilford Woodruff i ta’na vahine te hoê haamaitairaa autahu‘araa. Ua parau oia « Ua tuu vau i to‘u na rima i ni‘a iho ia’na e i te i‘oa o Iesu Mesia, ua pato‘i au i te mana o te pohe e o te haamou, e ua faaue ia ratou ia haere ê atu i rapae au ia’na, e ia tomo mai te varua no te ora i roto i to’na ra tino.

« Ua ho‘i faahou mai to’na varua i roto i to’na tino, e mai taua hora ra ua maitai roa mai oia; e ua ti‘a ia matou paatoa ia arue i te i‘oa o te Atua, e ia ti‘aturi ia’na e ia h aapa‘o i ta’na mau faaueraa.

« A tupu noa’i teie ohipa ia‘u nei (mai ta ta‘u vahine i faaite mai i muri iho) ua faaru‘e mai to’na varua i to’na tino, e ua ite oia i to’na tino te tarava ra i ni‘a i te ro‘i, e te mau tuahine e heva ra. Ua hi‘o atu oia ia ratou e ia‘u e i ta’na aiû, e a hi‘o noa’i oia i te ohipa e tupu ra, ua haere mai ra e piti na taata i roto i te piha… Ua faaite atu te hoê o teie na ve‘a ia’na e e nehenehe ta’na e ma‘iti: e nehenehe ta’na e haere atu e faafaaea i roto i te ao varua, aore râ, e nehenehe ta’na e ho‘i i to’na tino e e tamau i ta’na mau ohipa i ni‘a i te fenua nei mai te mea e haapa‘o oia i te hoê titauraa. Te titauraa o teie ïa: mai te mea e ite o’na e nehenehe ta’na e turu i ta’na tane, e e apee atu ia’na i roto i te mau pe‘ape‘a, te mau tamataraa, te mau ati e te mau mauiui no te oraraa i titauhia i ta’na tane ia faaruru no te maitai o te Evanelia e tae noa’tu i te hopea. I to’na iteraa i te huru o ta’na tane e o ta’na tamarii ua parau ihora oia: E, e na reira vau! »

« I te taime mau a rave ai ta‘u vahine i taua faaotiraa ra ua parahi mai ra te mana no te faaroo i ni‘a iho ia‘u e i to‘u faatahinuraa ia’na, ua tomo atu to’na varua i roto i to’na tino…

« I te po‘ipo‘i no te 6 no ditema, ua parau mai te Varua ia‘u: « A ti‘a i ni‘a e a tamau i to oe haerea! » e na roto i te aroha o te Atua i nehenehe ai i ta‘u vahine ia ti‘a mai e ua oomo i to’na ahu e ua haere i te pereoo, e ua tamau matou i to matou tere ma te oaoa. »¹

Mai ta’na i fafau, ua turu mau te tuahine Woodruff i ta’na tane, e tae noa’tu i te mau taime a titau ai ta’na mau hopoi‘a ei Aposetolo e ia atea ê oia i te utuafare no te mau area taime roa. I te 4 no me 1840, a tavini ai o Elder Woodruff i te hoê misioni i te fenua Peretane, ua haapono oia i te hoê rata ia’na ma te papa‘i e: « Ua ite au e teie te hinaaro o te Atua ia rave oe i te ohipa i roto i ta’na ô vine; no reira, te farii nei au i to’na hinaaro i roto i teie nei mau mea. Aita vau i ohumu aore râ i inoino mai to oe faaru’eraa mai, te ti‘a’i nei râ vau i te mahana e ho‘i mai ai oe i to oe utuafare, i muri a‘e i to oe rave faaotiraa i ta oe misioni na roto i te here e te mata- ‘u i te Atua. Tei pihai iho noa oe ia‘u ia pure au e ia ani au i te parururaa e te mau haamaitairaa i ni‘a iho ia‘u e te mau tamarii, e ani atoa vau i taua mau mea no to‘u hoa here, o tei atea ê atu ia‘u, i te hoê fenua êê no te poro i te îraa o te evanelia a Iesu Mesia. »²

I roto i taua mau taime taa–ê–raa, ua faahiti pinepine te peresideni Woodruff i to’na mihi i to’na utuafare, e ta’na atoa faaotiraa ia haapa‘o i te hinaaro o te Fatu. I te 3 no eperera 1847, ua faaineine oia i te apee atu i te pŭpŭ matamua o te feia mo‘a e tere atu i te faa no Roto Miti. Ua papa‘i oia i roto i ta’na buka aamu: « Aita roa’tu vau i farii a‘enei i teie huru pe‘ape‘a i te mau taime atoa a faaru’e ai au i to‘u utuafare no te haere atu i te hoê misioni mai ta‘u e farii ra i teie nei. Te pure nei au ia turu mai Oia ia‘u ia farerei faahou i to‘u utuafare i roto i teie nei oraraa mai ta’na i na reira i roto i te mau misioni e rave rahi o ta‘u i tavini i roto i te ô vine a te Fatu i te fenua nei. »³ E maha mahana i muri iho ua hi‘o atu to’na utuafare ia’na i te tereraa’tu mai te puhaparaa a te Feia Mo‘a i Winter Quarters, Nebraska. Ua tape‘a oia i te tupu‘ai aivi aita i atea roa i te puhaparaa no te hi‘o atu i to’na utuafare na roto i ta’na mau hi‘o fenua.⁴

Ua oaoa o Wilford Woodruff i te iteraa e, e nehenehe to’na utuafare e riro ei mea mure ore. Na teie parau mau i horo‘a ia’na te puai no te faaoromai i te mau fifi o te oraraa. Ua parau oia e, « Ua feruri au e rave rahi mau taime e mai te mea e rave au i te ohipa e tae noa’tu i to‘u paariraa, mai ia Metusela, e na roto i te reira e nehenehe ai ia‘u e to‘u utuafare ia parahi i roto i te hanahana i roto i te mau ao mure ore, e hoona ïa te mau mauiui e te mau oto ta‘u i faaoromai i roto i teie nei ao. »⁵. Ua haamaitai te fafauraa no te hoê utuafare mure ore i to’na huru i ni‘a i te mau melo o to’na utuafare. I roto i te hoê rata i ta’na tamahine ia Blanche, ua papa- ‘i oia: « Te hinaaro paatoa nei tatou i muri a‘e i te poheraa ia ora amui e a muri noa’tu. Te mana‘o nei au e, e ti‘a roa ia tatou, te mau metua e te mau tamarii, ia rave i te mau mea atoa e nehenehe ia tatou no te faaoaoa te tahi i te tahi i roto i to tatou oraraa ia ore tatou ia tatarahapa no te mea aita tatou i na reira. »⁶

Te mau haapiiraa a Wilford Woodruff

E mea rahi a‘e te mau haamaitairaa no te faaipoiporaa e te ti‘araa metua i te mau tao‘a o te ao nei.

Ua faaite mai te Fatu ia tatou e ua haapa‘ohia te faaipoiporaa e te Atua no te taata nei. [a hi‘o PH&PF 49:15]. Te tai‘o nei tatou e i roto i te tahi mau pŭpŭ taata e ere te faanahonahoraa o te faaipoiporaa i te mea farii–roa–hia e te taata. Te parauhia ra e te rahi noa’tu ra teie huru feruriraa i rotopu ia tatou nei. E mea papû roa e te tumu no te reira o te rahiraa ïa o te faufaa e te au ore o te feia apî tane i te rave i ni‘a iho ia ratou te hopoi‘a no te hoê vahine e te hoê utuafare. A faaru’e ai tatou i te oraraa ohie no mutaa iho, te ite nei tatou e te rahi noa’tura teie nei huru a ore ai te mau feia apî tane e ani i te mau feia apî tamahine ia faaipoipo no te mea eita ta ratou e nehenehe e horo‘a i teie nei mau tamahine te hoê mea mai te hoê fare maitai mai ta ratou e fana‘o ra i pihai iho i to ratou mau metua. E riro atoa te huru o te haapiiraa aore râ te paariraa o teie mau tamahine i roto i te mau peu huru ê aore râ i te oraraa moni e faataia i te mau feia apî tane ia faaipoipo… E ti‘a i te feia apî tane e te feia apî tamahine ia haapiihia e aita te oaoaraa i roto i te faaipoiporaa e titau nei i te tao‘a rahi.⁷

Ia anihia te mau tamahine no Ziona e te mau feia apî tane ia faaipoipo ia ratou, eiaha e ui e–« E fare ofa‘i araea nehenehe anei, e puaahorofenua maitai anei e e pereoo maitai anei to teie nei taata ? » e ui râ ratou e–« E taata anei oia no te Atua ? Te vai ra anei te Varua o te Atua ia’na ra ? E Feia Mo‘a anei oia i te mau Mahana Hopea nei ? Te pure râ anei oia ? Ua noaa anei ia’na te Varua no te faati‘a ia’na ia patu i te basileia ? » Mai te mea tei ia’na ra teie mau mea, eiaha ïa e haape’ape’a no te pereoo e te fare ofa‘i araea, a farii ia faaipoipo e a tahoê ia orua mai te au i te ture a te Atua.⁸

E hopoi‘a na te mau feia apî tane [i roto i] Ziona ia faaipoipo i te mau tamahine no Ziona e ia faaineine i te mau farii [te mau tino tahuti] no te mau varua o te mau taata, te mau tamarii a to tatou Metua i te ao ra. Te tia‘i nei ratou i te mau tino, ua faatoro‘ahia ratou no te haere mai i ŏ nei, e e ti‘a ia ratou ia fanauhia i roto i te fenua no Ziona eiaha râ no Babulonia.⁹

Te ani nei au i te mau metua no Ziona taatoa ia rave i te mea e nehenehe ia outou no te tura‘i i ta outou mau tamaroa e mau tamahine ia haere na te e‘a o te parau–ti‘a e te parau mau e ia rave i te mau mea atoa no te haamaitai ia ratou iho. Eiaha e vaiiho i to outou aau ia vai i ni‘a i te faufaa ore e te mau mea o te ao nei, e haapii râ i te oaoa i ta outou mau tamarii haapa‘o maitai tei riro e mau haamaitairaa maitai roa‘e e te rahi roa‘e o te mau haamaitairaa.¹⁰

Aita te haamaitairaa ta te Atua i heheu mai ia tatou i roto i te faanahoraa patereareha no te faaipoiporaa – oia ho‘i te taatiraa no te tau e no amuri noa’tu–e haafaufaahia ra mai te au ia na reirahia.¹¹

E ti‘a ia tatou ia haafaufaa i to tatou mau utuafare, e te mau auraa amui e vai nei i roto ia tatou, ma te haamana‘o e mai te mea e haapa‘o tatou e noaa ïa ia tatou te hanahana, te tahuti ore e te ora mure ore, e o teie te horo‘a hau a‘e i te mau horo‘a atoa a te Atua i te taata nei[a hi‘o PH&PF 14:7].¹²

E nehenehe ta te mau tamarii e faaineine ia tavini i roto i te Ekalesia e ia vai haapa‘o noa i te faaroo na roto i te mau haapiiraa e te hi‘oraa maitai a te mau metua.

Aita roa vau i feââ noa‘e no ni‘a i te parau mau e te upooti‘araa hope‘a no teie nei ohipa. Aita to‘u e feââraa i teie nei mahana. Aita to‘u e feââraa no ni‘a i te riroraa o Ziona mai ta te mau peropheta i ite, i roto i to’na hanahana, to’na mana, to’na faatereraa e te puai, ma te mana o te Atua i te vairaa i ni‘a iho ia’na.

I mua i teie mau mea atoa, te uiraa tei puta mai i roto i to‘u feruriraa e tei haaferuri rahi ia‘u, o teie ïa, na vai e rave e e faatere i teie nei basileia ? O vai ta te Fatu e ti‘aturi no te faatae i teie nei basileia i to’na upootiaraa hope‘a e no te faaineine i te reira i roto i te maitai e te hanahana no te taeraa mai o te Tamaiti a te Taata nei ? I ta tatou mau tamaroa e ta tatou mau tamahine… E vai mai te hopoi‘a no teie basileia i ni‘a iho i to ratou mau tapono, ia haere atu to ratou mau metua tane e te mau peresibutero i tera atu pae o te paruru. E mea papû te reira ia‘u nei mai te maramarama o te mahana i roto i te ra‘i. Ia feruri au i te reira, te ui nei au ia‘u iho e, eaha râ te huru o to tatou feia apî tane e to tatou feia apî tamahine? Te rave râ anei tatou te mau metua i ta tatou hopoi‘a no ratou ? Te tamata ra anei ratou i te haamaitai ia ratou e i te faaineine ia ratou no te hope‘a e te ohipa rahi e vai nei i mua ia ratou ?¹³

Aita tatou e ite eaha te e‘a ta tatou mau tamarii e rave. E horo‘a tatou i te hi‘oraa maitai i mua ia ratou, e e tutava tatou i te haapii ia ratou i te mau parau tumu parau–ti‘a; ia tae râ i te mau matahiti ua ite ratou i te haapa‘oraa e ti‘amâraa ïa to ratou e e rave ratou mai to ratou iho hinaaro.¹⁴

I roto i to tatou itoito i te pororaa i te Evanelia i te mau taata no te mau fenua atoa, eiaha roa tatou e haamo‘e i ta tatou mau hopoi‘ a no ni‘a i te haapiiraa i ta tatou iho mau tamarii, ma te ueue i roto ia ratou i to ratou apîraa, te here i te parau mau e te viretu, e te faatura no te mau mea mo‘a, e te horo’araa ia ratou te iteraa no te mau parau tumu no te Evanelia.¹⁵

E tamata tatou i te haapii i ta tatou mau tamarii ia paari ma te a‘o a te Fatu ra[ a hi‘o Ephesia 6:4]. Ia horo‘a tatou i te hi‘oraa maitai i mua ia ratou e ia haapii tatou ia ratou i te mau parau tumu maitai i to ratou apîraa ra. Ua horo‘ahia mai ratou ia tatou e to tatou Metua i te ao ra, o ratou to tatou basileia, o ratou te niu no to tatou faateiteiraa e to tatou hanahana; e mau ohi paari tuiroo ratou [a hi‘o PH&PF 124:61], e e ti‘a ia tatou ia tutava i te haapuai ia ratou i roto i te Fatu e ia haapii ia ratou ia pure e ia faaroo i te Fatu mai te au i to tatou puai, e ia pohe tatou e ia haere tatou e manuïa ratou i teie tuhaa ta ratou e amo nei no te ohipa i te anotau hopea e te basileia o te Atua i ni‘a i te fenua nei.¹⁶

O ratou o te ora nei i raro a‘e i te mea tei parauhia te ture tivira, ua haapiihia ïa i te ture morare – na faaueraa hoê ahuru – ua haapiihia ratou ia ore e haavare, ia ore e tuhi, ia ore e eiâ, e haapotoraa, eiaha e rave i taua mau mea tei faarirohia ei mea ino, te mo‘a ore e te parau–tia ore i roto i te taata. Ia haapii te mau metua i ta ratou mau tamarii i teie nei mau parau tumu i to ratou apîraa ra te haaputapû nei ïa ratou i to ratou mau feruriraa, e ia tae oioi atu te mau tamarii i te matahiti a taa’i ia ratou to ratou iho mana‘o, e mana ia te mau iteraa matamua i ni‘a i ta ratou mau raveraa, e i te taatoaraa o te toearaa o to ratou mau oraraa. No to ratou ite e to ratou haapii– raa–hia, e hiti mahuta te mau tamarii ia faaroo ratou i to ratou mau hoa ia tuhi, e ia faahiti faufaa ore noa i te i‘oa o te Atua, e mai te mea ua haapii ratou i te tuhi e titauhia ïa te tautooraa rahi no te haavî i te mau mea ta ratou i ite i to ratou apîraa ra.¹⁷

E… haamaitairaa rahi no te mau tamarii e te vai nei to ratou mau metua o te pure nei e o te haapii nei ia ratou i te mau parau tumu maitai, e te horo‘a nei i te hoê hi‘oraa maitai i mua ia ratou. Eita e nehenehe i te mau metua ia faahapa ti‘a i te mau tamarii ia rave ana‘e taua mau tamarii ra i te mau mea o ta ratou iho (te mau metua) e rave ra.¹⁸

Mai te mea e horo‘a tatou i te hoê hi‘oraa maitai i mua i ta tatou mau tamarii, e e tamata tatou i te haapii ia ratou mai to ratou apîraa e tae noa’tu i to ratou paariraa; mai te mea e haapii tatou ia ratou ia pure e ia faatura i te Atua Mana Hope; e mai te mea e haapii tatou ia ratou i taua mau parau tumu ra o te turu ia ratou i roto i te mau tamataraa atoa, e ia vai mai te Varua o te Fatu i ni‘a iho ia ratou… eita ïa ratou e faaru’e ohie noa i te e‘a mau. E vai noa mai te mau mea maitai o tei haaputapû ia ratou i roto i to ratou oraraa, e noa’tu te mau haapiiraa huru rau e horo‘ahia ia ratou, e ore roa teie nei mau mea maitai tei haaputapû ia ratou e faaru’e ia ratou.¹⁹

Eita roa te mau metua haapa‘o maitai e faati‘a i te mau pe‘ape‘a no rapae mai ia riro ei mea faufaa a‘e i to ratou mau utuafare.

E mea maoro to‘u ite papûraa e te faatupu puai nei te diabolo i te amahamaharaa i rotopu i te mau metua e te mau tamarii, i te tamataraa i te faauru e te niniiraa i roto i te feruriraa o te mau tamaroa e te mau tamahine o te feia mo‘a taua mau mana‘o viivii o te faataupupu ia ratou ia pee i te hi‘oraa maitai o to ratou mau metua tane e te mau metua vahine…

… Auê ïa te faufaa rahi ia riro tatou ei mau metua tane e ei mau metua vahine haapa‘o maitai, e ia rave maite tatou i te niniiraa i roto i to ratou mau feruriraa apî te taatoaraa o taua mau parau tumu ra o te arata‘i ia ratou i te mea ti‘a e ia faaohipa i roto i to ratou mau oraraa te mau parau tumu no te parau–ti‘a e te parau mau…

… E ohipa faahiahia ia ite e nahea te raveraa e riro mai te mau mana‘o e te here o to tatou mau utuafare ia tatou, o te arata‘i ia ratou i te e‘a e ora ai ratou. Teie te hoê haapiiraa e te ohipa o te ore roa e ti‘a ia haamo‘ehia e te mau metua… E rave rahi mau taime te faariro nei tatou i te imiraa faufaa e ohipa rû o te tura‘i nei i teie mau mea maitai i rapae au i to tatou mau feruriraa, e ere râ te reira i te mea ti‘a. Te taata e feruriraa aano to’na, e o te hi‘o atea atu i te ohipa e vai ra i mua ia tatou, e ite e e taa oia e e hopoi‘a rahi roa te vai ra i ni‘a iho ia’na no to’na iho utuafare, te haapiiraa ihoa râ i ta’na mau tamarii.

Te hinaaro nei tatou e faaora i ta tatou mau tamarii, e ia noaa ia ratou te mau haamaitairaaa atoa o ta te feia haapa‘o maitai e fana‘o ra, ia farii ratou i te mau haamaitairaa a to ratou mau metua tei haapa‘o i te îraa o te evanelia.²⁰

Ia hi‘opo‘a paatoa tatou i to tatou mau utuafare, e ia tamata tatou tata‘itahi i te faatere e i te faaafaro i to’na iho utuafare.²¹

E ti‘a i te mau metua tane tata‘itahi ia faatere i to’na iho utuafare ma te hamani maitai e te parau–ti‘a.

I to‘u apîraa ra e a haere ai au i te haapiiraa, e haere mai te orometua haapii i te fare haapiiraa e te hoê ruru amaa raau e 2 metera e te afa te roa, e te hoê o te mau mea matamua ta matou e farii o te ta’iriraa ïa. E ta’iri–ino–hia matou no te mau mea atoa eita oia e mauruuru. Aita roa’tu te ta’iriraa ta‘u i farii i taua taime ra i tauturu noa‘e ia‘u… E mea maitai a‘e te hamani maitai, te marû e te aau aroha i roto i te mau mea atoa. Te hinaaro nei au e ia niniihia teie nei parau tumu i roto i te feruriraa o to tatou mau feia apî tane, e ia faaohipa ratou i te reira i roto i te mau ohipa atoa ta ratou e rave i roto i te oraraa nei. E ere te faatere hamani–ino–raa i te mea maitai, ia faaohipahia e te mau arii, te mau peresideni, aore râ te mau tavini a te Atua. Mea maitai a‘e te mau parau marû i te mau parau iria. Mai te mea e, te taime a tupu ai te fifi i rotopu ia tatou e te tahi atu taata, e riro tatou ei taata hamani maitai e te au maitai te tahi i te tahi, e ore ïa tatou e roohia i te tahi pe’ape’a rahi.

… Ia haere outou i roto i te hoê utuafare i reira te hoê tane e hamani maitai ai i ta’na vahine e ta’na mau tamarii, e ite ïa outou e, e na reira atoa te vahine e te mau tamarii ia’na. Te farii nei au i te mau parau hororaa no te hamani–ino–raa a te mau tane i ta ratou mau vahine. Aita ratou e haapa‘o nei i ta ratou mau vahine. Aita te mau tane e hamani maitai nei i ta ratou mau vahine. E mea mauiui roa na‘u ia faaroo i te reira. Eita e ti‘a i teie nei mau mea ia vai mai… E ti‘a ia tatou ia aroha te tahi e te tahi, ia hamani maitai te tahi e te tahi, e ia haa no te imiraa i te maitai, te anaanatae e te oaoa o te tahi e te tahi, te feia ihoa râ i roto i to tatou nei iho utuafare.

O te tane te upoo o te utuafare. O oia te patereareha no to’na utuafare… Aita’tu e hoho‘a hau atu i te nehenehe i ni‘a i te fenua nei maori râ te hi‘oraa i te hoê tane i te ti‘araa mai ei upoo no to’na utuafare e i te haapiiraa ia ratou i te mau parau tumu parau–ti‘a e i te horo‘araa ia ratou i te a‘oraa maitai. E faatura teie nei mau tamarii i to ratou metua tane, e e itoito e e oaoa to ratou aau no te hoê metua tane tei riro ei taata parau–ti‘a.²²

E nehenehe te mau haapiiraa e te hi‘oraa o te hoê metua vahine e haamaitai i to’na utuafare i roto i teie nei oraraa e a muri noa’ tu.

Mai tei fariihia e te taatoaraa, te faariro nei tatou i te metua vahine mai te taata o te faaau i te huru o te tamarii. Te ite nei au e rahi a‘e te mana o te metua vahine i ni‘a i to’na huaai i to te tahi atu taata. E te uihia ra te uiraa i te tahi mau taime, « Eaha te taime e haamata ai teie nei haapiiraa ? » Ua parau to tatou mau peropheta, « Ia tomo ana‘e te varua ora no ô mai i te Atua i roto i te tino. » E faufaahia te huru o te metua vahine i taua taime ra i ni‘a i te huaai o to’na opu, e mai te fanauraa o te tamarii, e i roto i te taatoaraa o to’na oraraa, na te mau haapiiraa e te hi‘oraa o te metua vahine e faatere e e arata‘i i te rahiraa o te taime i taua tamarii ra, e e farii oia i te mana o te metua vahine i roto i teie nei oraraa e a muri noa’tu.²³

Tei ni‘a i to outou mau tapono, te mau metua vahine, te vairaa, no te rahiraa o te taime, te hopoi‘a no te faatupu–maite–raa i te mau mana no te pae feruriraa e te pae morare no te u‘i no amuri atu, i roto anei i te aru‘aru’raa, te tamarii–rii–raa, aore râ i te paariraa… Eiaha roa te metua vahine i Iseraela e vaiiho i te hoê mahana ma te ore e haapii i ta’na mau tamarii ia pure. E ti‘a ia outou iho ia pure, e ia haapii i ta outou mau tamarii ia na reira atoa, e e ti‘a ia outou ia haapii ia ratou mai te reira te huru, e ia pohe outou e e mono atu ratou ia outou i te amoraa i te ohipa faahiahia a te Atua, ia niniihia i roto i to ratou mau feruriraa te mau parau tumu o te turu ia ratou i roto i teie nei oraraa e amuri noa’tu. Ua parau pinepine au e na te metua vahine e faaau te feruriraa o te tamarii…

… A faaite mai na ia‘u te hoê metua vahine o te pure nei, tei faaruru i te mau tamataraa o te oraraa nei na roto i te pure, tei ti‘aturi i te Atua no Iseraela i roto i ta’na mau tamataraa e to’na mau fifi, e e pee ta’na mau tamarii i te hoê â e‘a. Eita roa ta’na mau tamarii e haamo‘e i teie nei mau mea ia tae i to ratou taime no te raveraa i te ohipa i roto i te basileia o te Atua.²⁴

Te vai nei te hopoi‘a… a to tatou mau tuahine ia rave no ta ratou mau tane. E ti‘a ia ratou ia faatura i te ti‘araa e te huru oraraa o ta ratou mau tane… E ti‘a i te vahine tata‘itahi ia hamani maitai i ta’na tane. E ti‘a ia’na ia faaitoito i ta’na tane e ia hamani maitai ia’na, i roto i te mau huru atoa o te oraraa. E ia hoê ana‘e te utuafare, e fana‘o ïa ratou i te hoê varua no te ra‘i mai i ŏ nei i te fenua nei. Ia na reirahia e ti‘a ai; no te mea ia faaipoipo ana‘e te hoê tane i roto i teie nei Ekalesia i te hoê vahine, ua titauhia ia’na ia faaea i pihai iho ia’na i te taatoaraa o teie nei oraraa e a muri noa’tu. I te po‘ipo‘i o te ti‘a–faahou–raa matamua e titau oia i taua vahine ra e ta’na mau tamarii i pihai iho ia’na i roto i te hoê faanahonahoraa utuafare, e ia vai noa i roto i taua huru oraraa ra e amuri noa’tu. Auê ïa mana‘o hanahana e !²⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

Eaha tei haaputapû ia outou no ni‘a i te auraa i rotopu ia Wilford e ia Phoebe Woodruff ? (A hi‘o i te mau api 179-81).
A tai‘o faahou i te a‘oraa a te peresideni Woodruff i ta’na tamahine o Blanche (api 181). A feruri aore râ a aparau no ni‘a i te mau mea papû e nehenehe ia outou ia rave no te tautururaa i te mau melo no to outou utuafare ia oaoa.
Eaha te mea i haaputapû ia outou a tai‘o ai outou i te a‘oraa a te peresideni Woodruff i te feia apî no ni‘a i te faaipoiporaa e te ti‘araa metua ? (A hi‘o i te api 182). Nahea teie nei a‘oraa e tano ai i te oraraa o te mau melo atoa o te Ekalesia ?
A tai‘o i na paratarafa hopea e toru i roto i te tuhaa matamua no te mau haapiiraa (te mau api 183-84). Nahea te « mau mea faufaa ore e te mau ohipa o te ao nei » e faatea ê ai ia tatou i te mau oaoa no te utuafare ? Nahea ta tatou e nehenehe ai e pato‘ i i taua mau huru ohipa ra ? Nahea ta tatou e nehenehe ai e faaite i te mau melo o te utuafare e te haafaufaa nei tatou i to tatou auraa e o ratou ?
A tai‘o i te taatoaraa o te paratarafa matamua i te api 185. I to outou mana‘oraa eaha te auraa o te parau ia « haapii i ta tatou mau tamarii ia paari ma te a‘o a te Fatu ra » ? Eaha te tahi mau mea ta outou i rave no te faatupuraa i te reira ?
A tai‘o faahou i te taatoaraa o te mau paratarafa toru e te maha i te api 185. Nahea ta te mau metua e nehenehe ai e tauturu i ta ratou mau tamarii ia noaa te hinaaro i te tavini i roto i te Ekalesia ?
A tai‘o ai outou i te a‘oraa a te peresideni Woodruff no ni‘a i te haapiiraa i te mau tamarii, eaha te mau parau tumu taa ê ta outou i ite ? (A hi‘o i te mau api 185-86).
A tai‘o faahou i te tuhaa e haamata i te api 186. Eaha ta te mau metua e nehenehe e rave no te faariroraa i te mau auraa utuafare ei ohipa matamua roa ?
Eaha te mau parau tumu ta te mau metua e nehenehe e haapii mai na roto i te mau mea ta Wilford Woodruff i ite i to’na apîraa e to’na orometua haapii ? (A hi’o i te api 186).
Eaha ta te peresideni Woodruff i parau no ni‘a i te mana o te mau tane e te mau metua tane ? (A hi‘o i te mau api 186-88). Eaha ta’na i parau no ni‘a i te mana o te mau vahine e te mau metua vahine ? (A hi‘o i te mau api 188-89). Nahea te mau tane e te mau vahine e nehenehe ai e tauturu te tahi e te tahi i roto i ta ratou mau hopoi‘a ?
Nahea te mau haapiiraa i roto i teie nei pene e tano atoa ai i te mau papa ruau e te mau mama ruau ? Eaha te mau ohipa i tupu tei faaite mai e nahea te mau papa ruau e te mau mama ruau e haamaitai ai i ta ratou mau mootua ?
Eaha te mau hi‘oraa ta outou i ite no te mau metua e te mau metua ruau tei rave i ta ratou mau hopoi‘a no to ratou mau utuafare ?

Te mau papa‘iraa mo‘a: Enosa 1:1; Mosia 4:14–15; Alama 56:45–48; PH&PF 68:25–31; 93:38–40

four generations in President Woodruff’s family — E maha u‘i i roto i te utuafare o te peresideni Woodruff. Mai te aui i te atau mai te aui i ni‘a: te tamaiti Wilford Woodruff, tamaiti, te mootua tamaroa Wilford S. Woodruff, te hinarere tamaroa Charles W. Woodruff, e te peresideni Wilford Woodruff.

family home evening — « E tamata na tatou i te haapii i ta tatou mau tamarii ia paari ma te a‘o a te Fatu ra »