Pene 4

Te mana e te toro’a o te Autahu‘araa mo‘a

Ua horo‘a mai te Atua i te autahu‘araa i ni‘a i To’na nunaa ia haamaitaihia e ia faateiteihia ratou.

No roto mai i te Oraraa o Wilford Woodruff

I to’na apîraa ra, ua hinaaro o Wilford Woodruff e imi i te hoê Ekalesia e te vaira i roto te mana faatere mau o te autahu‘araa- e te « mana tei itehia i mua i te ra‘i e i ni‘a i te fenua nei »¹ I roto i te hoê a‘oraa ta’na i horo‘a i te matahiti 1889, ua faati‘a oia e:

« Ua haere au i te Haapiiraa Sabati i to‘u apîraa ra… I roto i taua Haapiiraa Sabati ra ua tai‘o vau i te Faufaa Apî. Ua haapii mai au i tera irava e tera irava, i tera pene e tera pene. Eaha ta te Faufaa Apî i haapii mai ia‘u ? Ua haapii mai te reira ia‘u i te Evanelia no te ora e te faaoraraa; ua haapii mai te reira ia‘u i te hoê Evanelia no te mana i mua i te mau ra‘i e i ni‘a i te fenua nei. Ua haapii mai te reira ia‘u e te vai nei i roto i te faanahonahoraa o te Ekalesia te mau peropheta, te mau Aposetolo, te mau Tia‘i e te mau Orometua, e te mau tautururaa e te mau faatereraa. No te aha ? ‘Ei faaau i te feia mo‘a i te ohipa ra e orometua, ia tupu i te maitai te tino o te Mesia ra: ia riro tatou atoa nei ei taata paari, i te faaroo hoê e te ite hoê i te Tamaiti a te Atua, ia taea te faito ra i te î o te Mesia i te rahi’ [A hi‘o 1 Korinetia 12:28; Ephesia 4:11–13.]

Teie te mau mea o ta‘u i haapii mai e ua faaputapû i to‘u aau. Ua ti‘aturi au i teie nei mau mea; e aita râ â vau i faaroo i to ratou haapii- raa-hia e te hoê orometua no te haapa‘oraa faaroo aore râ no te ra‘i mai i ni‘a i te fenua nei. I to‘u apîraa ra ua haere atu vau i te mau rururaa atoa a te mau haapa‘oraa faaroo atoa e vai ra. I te hoê taime ua haere atu vau i te hoê o taua mau rururaa rahi ra tei faatupuhia i Connecticut, i reira ua amui mai e maha ahuru aore râ e pae ahuru orometua no te mau faaroo huru rau. Ua pure ratou no te tahi faaiteiteraa mai te tau no te Penetote e no te tahi atu mau mea maitai e rave rahi. I teie nei rururaa ua faati‘ahia i te mau taata atoa ia horo‘a mai i to ratou mau mana‘o. E mea apî roa vau i taua taime ra. Ua ti‘a mai au i ni‘a e ua haere atu i te hiti, e ua parau atu i taua mau orometua ra: E to‘u mau hoa e, e faaite mai anei outou ia‘u eaha outou e ore ai e tata‘u no ni‘a i te faaroo o tei horo‘ahia na i te Feia Mo‘a ? E faaite mai anei outou ia‘u no te aha outou e ore ai e tata‘u no ni‘a i taua Evanelia ta Iesu Mesia i haapii, e ta Ta’na mau Aposetolo i haapii ? No te aha outou e ore ai e tata‘u no ni‘a i taua haapa‘oraa ra o te horo‘a ia outou i te mana i mua i te Atua, te mana no te faaora i te ma‘i, ia ite te matapô, ia haere te hapepa, e o te horo‘a ia outou i te Varua Maitai e i taua mau horo‘araa ra e taua mau maitai ra tei faaitehia mai mai te hamani-raa-hia mai o te ao nei ? No te aha outou e ore ai i haapii i te nunaa i taua mau parau tumu ta te mau Patereareha e te mau peropheta tahito i haapii a ahuhia’i ratou e te mau heheuraa a te Atua ? Tei ia ratou ra te mau utuuturaa a te mau melahi; tei ia ratou ra te mau moemoea e te mau orama, te heheuraa tamau no te arata‘i e no te faahaere ia ratou na ni‘a i te e‘a e ti‘a ia ratou ia haere atu.’

« Ua parau mai te peresibutero faatere: ‘E to‘u nei hoa taure‘are‘ a apî, e riro ïa oe e hoê taata maramarama roa, e te hoê taata faufaa rahi roa i ni‘a i te fenua nei, ahiri aita oe i ti‘aturi i taua mau mea maamaa ra. Ua horo‘ahia mai teie nei mau mea i te mau tamarii a te taata nei i te tau pouri o te ao nei e ua horo‘ahia mai ratou no te haamaramarama i te mau tamarii a te taata i taua tau ra, ia nehenehe ia ratou ia ti‘aturi ia Iesu Mesia. I teie nei mahana te ora nei te taata i roto i te anaana o te maramarama hanahana o te evanelia, e aita tatou e hinaaro i taua mau mea ra.’ Ua parau atu vau: ‘A horo‘a mai ïa ia‘u te mau tau pouri o te ao nei; a horo‘a mai ïa ia‘u taua mau tau ra a farii ai te taata i teie nei mau parau tumu.’²

I te 29 no ditema 1833, ua faaroo a‘era o Wilford Woodruff i te evanelia na roto mai i te mau tavini haamana-hia a te Atua. Ua faati‘a mai oia e: « No te taime matamua roa i roto i to‘u oraraa, ua ite au i te hoê peresibutero i roto i te Ekalesia a Iesu Mesia i te Feia Mo‘a i te mau Mahana Hopea nei. O Zera Pulsipher taua taata ra.Ua parau mai oia ia‘u e ua faauruhia oia e te Fatu. Te ta’iri ra oia i te titona i roto i ta’na fare vairaa tauihaa i tae mai ai te reo o te Fatu ia’na e ua parau maira ia’na ia ti‘a i ni‘a e ia haere atu i te tuhaa apatoerau, e ohipa ta te Fatu na’na i reira. Ua haere atu oia e farerei i te taea‘e ra o [Elijah] Cheney, o te faaea ra i paiha‘iho i to’na fare e e melo oia no te Ekalesia. Ua haere avae noa raua e iva ahuru ma ono kilometera i te atea… na roto i te hiona hohonu, e te vahi matamua o tei faauruhia ia raua ia tapae atu o te fare ïa o to‘u taea‘e e o to‘u nei atoa. Ua tomo atu raua i roto i te fare e ua paraparau atu i te vahine faaipoipo a to‘u taea‘e, e ua parau atu ia’na e o vai râ raua, e e aha râ ta raua ohipa. Ua parau atu raua ia’na e ua faauruhia raua ia haere i te tuhaa apatoerau, e aita roa’tu raua i farii noa a‘e i te hoê faaiteraa e ia tape‘a i te hoê vahi e tae noa mai i te taime ua tae mai raua i taua fare ra. I to raua parauraa’tu ia’na no ni‘a i ta raua mau haapiiraa, ua parau maira oia e ta’na tane faaipoipo e to’na tao‘ete tane e nau taata ïa o tei ti‘aturi i taua mau haapiiraa ra, e ua pure noa raua no taua mau haapiiraa e rave rahi mau matahiti i teie nei. Ua faaau ihora ratou i te hoê farereiraa i te fare haapiiraa i to matou nei fare faaapu.

« I te taime ahiahi ua ho‘i mai au i te fare, e ua faaite mai to‘u taoete vahine no teie nei farereiraa. Ua huti na vau i te mau tapu raau roroa mai te hiti no te Roto no Ontario (Tei roto vau i te ohipa hooraa raau), e ua tatara ihora vau i ta‘u mau puaahorofenua, e aita i faaea no te amu i te tahi maa, e ua haere tia’tu vau i te rururaa. Ua ite atura vau e ua î roa te fare e te aua fare i te taata. No te taime matamua roa i roto i to‘u nei oraraa ua faaroo vau i te hoê a‘oraa Evanelia mai tei haapiihia e te mau peresibutero no teie nei Ekalesia. O te mea ïa o ta‘u i ma‘imi noa na mai to‘u apîraa ra. Ua ani manihini au i teie na taata ia haere mai i to‘u fare. Ua rave mai au i te Buka a Moromona e ua ara noa vau i te taatoaraa o taua pô ra no te tai‘o. I te poipoi a‘e ua parau atu vau i te taea‘e Pulsipher e ua hinaaro vau e ia bapetizohia vau. E iteraa papû to‘u no‘u iho e e parau mau taua mau haapiiraa ra. Ua haere atu vau e to‘u tuaana e ua bapetizohia-na taata matamua i roto i taua fenua ra. »³

Ua bapetizo o Elder Pulsipher ia Wilford Woodruff i roto i te hoê anavai iti i te 31 no ditema 1833 e ua haamau ia’na i taua iho mahana ra. E toru mahana i muri iho, ua farii o Wilford Woodruff i te Autahu‘araa a Aarona e ua faatoro‘ahia oia i te toro‘a haapii. Teie te haamataraa no te hoê ohiparaa i roto i te taatoaraa o te oraraa i roto i te taviniraa i te Fatu. I to’na haamana‘oraa i te ohipa i tupu i taua mahana ra, ua parau oia, « I reira iho ta‘u misioni i te haamataraa. »⁴

Te mau haapiiraa a Wilford Woodruff

E rave te Atua i Ta’na mau Ohipa atoa na roto i te mana o te autahu‘araa.

Aita vau e ite nei i te tahi ê atu tumu parau i roto i te Ekalesia tei hau atu i te faufaa rahi no te mau taata o te fenua nei e no tatou nei iho maori râ te Autahu‘araa Mo‘a.⁵

Na roto i te mana o [te] Autahu‘araa, ua faanahonaho te Atua, to tatou Metua Mure Ore, i te mau ao atoa, e ua faaora i te mau ao atoa tei ore â i faaorahia. Ua faatere te taata i ni‘a i te fenua nei na roto i taua iho Autahu‘araa i roto i te mau oro‘a no te Evanelia a te Mesia.⁶

Ua riro te Autahu‘araa Mo‘a ei rave‘a e paraparau ai e e ohipa ai te Atua e te taata i ni‘a i te fenua nei; e te mau ve‘a no te ra‘i mai tei haere mai i te fenua nei no te paraparau i te taata e mau taata ïa o tei mau e o tei faatura i te autahu‘araa a ora‘i ratou i roto i te tino nei; e te mau mea atoa ta te Atua i faatupu no te faaoraraa o te taata nei, mai te taeraa mai o te taata i ni‘a i te fenua nei e tae noa’tu i te faaoraraa o te ao nei, ua ravehia e e ravehia ïa na roto i te autahu‘araa mure ore.⁷

Aita roa‘e te Fatu i faati‘a i te hoê Ekalesia i ni‘a i te fenua nei, mai to’na faanahonahoraa matamua e tae noa mai i teie nei mahana, maori râ ua faanahonahohia taua Ekalesia ra na roto i te heheuraa, ma te mau peropheta e te mau aposetolo, te mau tia‘i, te mau orometua, te mau tauturu e te mau faatere o tei haamaita’ihia e te Autahu‘araa Mo‘a-taua mana ra o tei horo‘ahia mai e te Atua i te taata nei, o tei faati‘a ia’na ia rave i te ohipa i te i‘oa o te Atua; e aita ana‘e teie Autahu‘araa aita roa e mana to te hoê taata, mai te mahana i tupu mai ai te ao nei, no te ohiparaa i roto i te hoê noa‘e o te mau oro‘a no to’na fare mo‘a, e aita atoa e ti- ‘araa to te hoê noa‘e taata i taua Autahu‘araa maori râ ia piihia oia e te Atua mai ia Aarona, ua ite tatou i te reira, o tei piihia na roto i te heheuraa [a hi‘o Hebera 5:4]. No te aha teie nei Autahu‘araa ? No te faatereraa ïa i te mau oro‘a no te Evanelia, te evanelia iho a to tatou Metua i te Ao ra, te Atua mure Ore, te Elohima o te mau Ati Iuda e te Atua o te mau Edene.⁸

Aita to te taata e mana no ô mai i te Atua no te faatere i te mau oro‘a no te oraraa e te faaoraraa i te mau tamarii a te taata [maori râ] na roto i te mana o te Autahu‘araa Mo‘a. Tei te Feia Mo‘a i te mau Mahana Hopea nei te mana no taua Autahu‘araa ra.⁹

E ti‘a i te feia tei mau i te Autahu‘araa ia faaohipa i te autahu‘araa no te taviniraa e te paturaa i te basileia o te Atua, eiaha râ no te paturaa ia ratou iho.

Auê ïa hopoi’a i te mauraa i teie nei Autahu‘araa mure ore, no te ra‘i mai, e o te vai e a muri noa’tu! E e titauhia ia tatou ia faaite i te huru no to tatou faaohiparaa i te reira. E faati‘aauhia te mau Aposetolo, te mau Hitu Ahuru, te mau Tahu‘a Rahi, te mau peresibutero e te mau taata atoa tei mau i te tahi tuhaa o teie nei Autahu‘araa tei horo‘ahia mai ia tatou.¹⁰

E ohipa ta tatou i faautahia i ni‘a i to tatou mau tapono.E ohipa ta Iosepha Semita, ta Brigham Young, ta na Ahuru ma Piti Aposetolo, ta tatou paatoa, e e faahapahia tatou mai te mea eita tatou e rave faaoti i te reira. E ite tatou i te reira ia tae atu tatou i te tahi pae o te paruru… E rave rahi mau taime i roto i to‘u mau feruriraa ua hinaaro vau ia taa maitai i ta‘u hopoi‘a i te Atua, e te hopoi‘a e amohia nei e te mau taata atoa e mau nei i te autahu- ‘araa i roto i teie nei u‘i. Te parau nei râ vau ia outou, e te mau taea‘e, te mana‘o nei au e ua faatumu-rahi-roa-hia to tatou mau aau i ni‘a i te mau mea no teie nei ao. Ei mau taata o te mau nei i te Autahu‘araa Mo‘a, aita tatou e mauruuru nei, mai te au i te mau taata e mau nei i te Autahu‘araa Mo‘a i roto i teie nei u‘i ia na reira, i ta tatou hopoi‘a rahi i te Atua e i te ra‘i teitei, e i to te fenua nei. Te mana‘o nei au e mea atea ê roa tatou i te Fatu.¹¹

Mai te mea …, o tatou o te mau nei i te autahu‘araa mo‘a, e faaohipa tatou i taua autahu‘araa ra no te tahi ê atu tumu i raro a‘e i te ra‘i eiaha râ no te paturaa i te Basileia o te Atua, mai te mea e na reira tatou e mou to tatou mana… Ua tamata e rave rahi mau taata ia na reira-te mau taata e toro‘a teitei i roto i te autahu‘araa, e tae noa’tu i te Aposetoloraa-no te patu ia ratou iho i ni‘a i te mana o te autahu‘araa. E ua haere atu ratou i hea ? E nehenehe ta outou e parau ua amene to ratou mana e to ratou ti‘araa… E feruri ana‘e tatou no ni‘a i teie nei mau mea. Te parau ato‘a nei au ia‘u iho nei. Te parau nei au i teie nei iho mau parau i te mau Aposetolo, te mau Hitu Ahuru e te mau Tahu‘a Rahi. Eita e nehenehe ta outou e faaohipa i te autahu‘araa no te tahi ê atu tumu i raro a‘e i te ra‘i maori râ no te paturaa i te basileia e no te raveraa i te hinaaro o te Atua, e ia tamata outou ia faaohipa te reira no te tahi atu mau tumu e rave ê hi‘atu to outou ra mana.¹²

Ua tai‘o noa na vau ma te anaanatae rahi i taua heheuraa tei horo’ahia’tu ia Iosepha Semita ei pahonoraa i ta’na pure i roto i te Fare Tape‘araa no Liberty [see PH&PF 121:34–46]. Ua feruri noa na vau i taua heheuraa a te Atua i taua taata ra, ma te faafaufaa i te mau faahitiraa i roto i te tahi mau irava parau, e te vai ra te rahiraa o te mau haapiiraa o tei ore â i horo‘ahia mai na roto i te tahi atu heheuraa ta te Atua i horo‘a i te taata nei. Ua horo‘a oia ia Iosepha i te rave‘a no te ite e ua mau oia i te autahu‘araa, e taua autahu‘araa ra mai te au i te haapa‘oraa a te Atua, mai te au i te haapa‘oraa a Melehizedeka, taua autahu‘araa ra o ta te Atua iho i faaohipa no ta’na mau ohipa atoa i te ra‘i e i ni‘a i te fenua, e te vai atoa ra taua mana ra i te taata o tei mau i taua autahu‘araa ra. Tei taua autahu- ‘araa ra te rave‘a no te paraparau i to te ra‘i, te mana no te faatere i te ra‘i, te mana no te rave i te ohipa o te ra‘i, e i te mau vahi atoa e faaohipa te tahi taata i taua mana ra, ua horo‘a te Atua i ta’na mau melahi no te haapa‘o ia’na e ua ravehia ta’na ohipa na roto i te mana e te puai i roto i teie nei ao e i roto i te ao a muri atu; ia faaohipa râ taua taata ra i taua autahu‘araa ra no te tahi ê atu tumu maori râ te paturaa i te basileia o te Atua, o te reira ho‘i te tumu i horo‘ahia mai ai te autahu‘araa, e faananaue atu te mau ra‘i ia ratou iho, e haere ê atu te mana no te autahu‘araa, e e vaihohia oia ia taahi atu i roto i te pouri eiaha râ i roto i te maramarama, o teie ïa te taviri no te taivaraa no te mau taata atoa i roto anei i teie nei u‘i aore râ te tahi atu u‘i.¹³

Ua horo‘ahia te autahu‘araa ia tatou nei, e mai te mea eita tatou e faaohipa ti‘a i te reira, e topa ïa tatou i raro a‘e i te faahaparaa. No reira, a rohi ana‘e i te amoraa i te basileia. Ia haa tatou no te titau i te Varua Mo‘a– e te mana o te evanelia a Iesu Mesia– o tei tuuhia mai i roto i to tatou nei mau rima, e ia na reira ana‘e tatou, e tauturu mai ïa te haamaitairaa a te Atua i ta tatou mau tautooraa.¹⁴

E paturu te Fatu i te taata atoa o tei mau i te hoê tuhaa no te Autahu‘araa, e Tahu‘a anei oia, e peresibutero, e Hitu Ahuru, aore râ e Aposetolo anei, mai te mea e faarahi oia i to’na piiraaa e e rave oia i ta’na ohipa.¹⁵

Ua oaoa roa vau i te hoê taime i te iteraa’tu i te tahi mau Diakono i te faarahiraa i to ratou piiraa… Ua haere atu ratou na roto i to [ratou] oire e ua tapûpû i te mau paehaa raau atoa a te mau vahine ivi i roto i taua oire ra. Te vai nei ta te taea‘e ra [George] Teasdale, te peresideni Tĭtĭ, e toru aore râ e maha haapueraa raau areti i roto i to’na aua, e ua ho‘i atu oia i te hoê pô i te fare e ua ite oia e ua mo‘e te haapueraa vahie. Ua uiui oia ia’na iho eaha ra tei tupu; i to’na ra hi‘oraa’tu na pihai iho ua ite oia e ua tapûpûhia te vahie i roto i to’na fare vairaa vahie. Ua faarahi nehenehe roa ratou i to ratou piiraa na roto i teie ohipa.

Na roto i te tahi mau hi‘oraa, tei roto tatou i teie nei mahana, i te tahi mau huru oraraa taa ê. E ti‘a ia tatou ia ti‘aturi i te Fatu e ia rave i te mea ti‘a. Ua ite au e ua horo‘ahia mai te Autahu‘araa no te faaoraraa i te taata e no te faatereraa i te mau oro‘a no te feia ora e te feia pohe. Ua faaorahia e rave rahi mau ahuru tauasini i roto i te ao varua e to ratou mau huaai e ora nei i te fenua nei e tei mau i te mau taviri no te faaoraraa i to ratou feia pohe. Ua faati‘ahia mai te mau faaora i ni‘a i te mou‘a no Ziona, e te basileia e basileia ïa a te Fatu, mai ta te peropheta Obadia i parau e e riro ratou ei faaora [a hi‘o Obadia 1:21]. Te rave nei teie nunaa i teie nei ohipa i teie nei. Tei pihai iho te Fatu ia outou, e te oaoa nei to outou mau tupuna i roto i te ao varua. No reira, ia haapa‘o tatou a ora‘i tatou i ô nei. Ua ma‘iti te Atua ia tatou ia mau i teie nei Autahu‘araa. Mai roto mai i te… mau milioni taata i ni‘a i te fenua nei ua ma‘iti te Fatu i te tahi nau taata no te mau i teie nei Autahu‘araa; no te faatoro‘a, no te faanahonaho, no te faaara i to te ao nei, no te poro i te evanelia ia ratou. Te ti‘aturi nei au e e haamana‘o to‘u mau taea‘e o tei mau i teie nei Autahu‘araa i te faufaa o te reira …

… Ia tape‘a noa e ia vai haapa‘o noa tatou. Eiaha tatou ia ere i te mauraa i te Autahu‘araa, e i te basileia o te Atua. A haere ana‘e tatou na roto i te pure huna i mua i te Fatu e ia pii i To’na ra i‘oa mo‘a. Tei reira to tatou puai i te vairaa.¹⁶

Mai te mea e tape‘a tatou i ta tatou mau fafauraa e ta tatou mau hopoi‘a, e farii ïa tatou i te mau haamaitairaa no te autahu‘araa i roto i teie nei oraraa e i roto i te oraraa a muri atu.

Ia horo‘a ana‘e te Fatu i te mau horo‘araa i ni‘a i te mau tamarii a te taata ei tu‘atiraa i te Autahu‘araa, e hopoi‘a ïa na ratou o tei farii i taua mau horo‘araa ra no te faaohiparaa i te reira.¹⁷

Ia ohipa ana‘e te hoê aposetolo aore râ te hoê peresideni, te episekopo aore râ te tahi taata tei mau i te autahu‘araa, te faatere ra ïa oia na roto i te mana o te Fatu ra o Iesu Mesia; e mana ïa to taua autahu‘araa ra i reira, e e mana to te mau haamaitairaa atoa ta te hoê tavini a te Atua e horo‘a i ni‘a i te mau tamarii a te taata, i roto i teie nei oraraa e i roto i te oraraa a muri atu. Mai te mea e farii au i te hoê haamaitairaa o te horo‘ahia mai ia‘u e te autahu‘araa mo‘a, aore râ mai te mea e farii au i te hoê haamaitairaa no ô mai i te hoê patereareha ra, e mana ïa to taua mau horo‘araa ra e taua mau haamaitairaa ra e tae roa’tu i roto i te tahi atu ao; e mai te mea e haapa‘o vau i ta‘u mau fafauraa i roto i te taato‘araa o teie nei oraraa, e nehenehe ïa ta‘u e titau i te mau haamaitairaa atoa tei faahitihia i ni‘a iho ia‘u, no te mea taua mana ra i horo‘ahia ia ratou, e mea faataahia ïa e te Atua, e e mea na roto i taua mana ra te mau tamaiti a te Atua Teitei roa ra e faatere ai i te mau oro‘a no te ora e no te faaoraraa i te mau tamarii a te taata nei, e e mana to taua mau oro‘a ra i ni‘a i taua mau taata i muri a‘e i te pohe e i roto atoa i teie nei oraraa. O teie te mau tao‘a rahi mau; e mau tao‘a rahi o te vai noa e a muri noa’tu, e e mana to tatou, na roto i teie nei mau haamaitairaa, o tei horo‘ahia mai e te evanelia, ia farii faahou i to tatou mau tino e ia faaherehere i to tatou huru i roto i te oraraa amuri atu. Oia mau, e nehenehe ta tatou e titau i teie nei haamaitairaa na roto i te autahu‘araa mo‘a.¹⁸

Te feruri pinepine nei au i te mau fafauraa tei ravehia no ni‘a i te autahu‘araa. Te parau nei te Fatu, i roto i te hoê heheuraa no ni‘a i teie nei tumu parau, … « No te mea o tei haapa‘o maitai e ua noaa ho‘i ia ratou teie nei na autahu‘araa e piti o tei parauhia e au, e ua faarahi ho‘i i to ratou mau parau-raa-hia, ua haamo‘ahia ïa ratou e te Varua i te faaapîraa i to ratou ra mau tino… O te mau mea atoa na to‘u Metua ra, e hope roa ïa i te horo’ahia na’na. No reira, o ratou atoa o te farii mai i te autahu‘araa, e farii atoa ïa i teie nei tăpüraa e te fafauraa a to‘u Metua, o te ore e tia ia’na ia ofati, e ore ho‘i atoa e tia ia afai-ê-hia’tu » [A hi‘o PH&PF 84:33–40.] I teie nei, te ui nei au ia‘u iho i te tahi mau taime i te uiraa, Te taa ra anei ia tatou i teie nei mau mea ? Te taa ra anei ia tatou e mai te mea e haapa‘o tatou i te mau ture o te Autahu‘araa e riro tatou ei taata ai‘a e te Atua e e mau taata ai‘a e Iesu Mesia ? Te ite nei au e aita to tatou mau mata i hi‘o, aita to tatou mau tari‘a i faaroo, aita atoa ho‘i i ô i roto i to tatou aau no te hi‘o atu i te hanahana tei faahereherehia no te feia haapa‘o [a hi‘o 1 Korinetia 2:9].¹⁹

Eaha te huru tane e te huru vahine e au ai tatou, o tei piihia no te rave i te tahi tuhaa i roto i te ohipa rahi i te anotau hopea nei ? E ti‘a ia tatou ia riro ei mau tane e ei mau vahine parau-ti‘a no te Atua e no Ta’na Autahu‘araa, e ia vai parau-ti‘a noa ia’na e i te tahi e te tahi. Eita e ti‘a ia tatou ia faati‘a i te mau fare e te mau fenua, te auro e te ario, aore râ te tahi mau tao‘a o te ao nei ia faatea ê ia tatou i te rave tamauraa i te ohipa rahi a te Atua o ta’na i tono mai ia tatou ia rave. E mea teitei ta tatou nei fâ, e mea hanahana to tatou nei hopea e e ore roa e ti‘a ia tatou ia faainoino i to tatou Metua, e i te mau nuu no te ra‘i e tia‘i nei ia tatou. E ore roa e ti‘a ia tatou ia faainoino i te mau rahiraa milioni i roto i te ao varua, o te tia‘i atoa nei ia tatou ma te anaanatae e te pe’ape’a, o tei ore e mana‘ohia e ô i roto i to tatou mau aau. O teie te mau mea rarahi e te puai ta te Atua e titau nei ia tatou. E ore roa e noaa ia tatou te faaoraraa, e ore roa e noaa ia tatou te mau ora mure ore i roto i te basileia o to tatou Atua, mai te mea e te vai nei te tahi mea e nehenehe e faafariu ê atu ia tatou i te parau mau aore râ, i te hereraa i te reira.²⁰

Te mau mana‘o tauturu no te tuatapaparaa e no te haapiiraa

A feruri i teie nei mau mana‘o a tuatapapa‘i outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v-ix.

Eaha te mau mana‘o tei arata‘i ia Wilford Woodruff apî ia imi i te Ekalesia mau ? (A hi‘o i te mau api 37-39). Eaha te auraa e vai ra i rotopu i teie mau mana‘o e te autahu‘araa ?
A hi‘o faahou i te mau api 40-42 e a imi i te mau mea ta te Fatu e faatupu na roto i te mana o te autahu‘araa. Nahea te feia tei mau i te autahu‘araa e haa ai i roto i te ohipa a te Fatu ?
No te aha e mea faufaa rahi roa i te mau tane e te mau vahine ia haapii mai no ni‘a i te autahu‘araa ?
Nahea to te autahu‘araa haamaitairaa i to outou nei oraraa ?
A tai‘o ai outou i te mau haapiiraa a te peresideni Wilford Woodruff no ni‘a i te mau hopoi‘a a te mau taata tei mau i te autahu‘araa, eaha te mau parau tumu papû maitai ta outou i ite ? (A hi‘o i te mau api 42-45).
Mai te au i te parau a te peresideni Woodruff, eaha te mau huru e te mau ohipa o ta te hoê taata tei mau i te autahu‘araa e rave e faatea ê atu ai te mau ra‘i ia’na ? No te aha eita roa e nehenehe i te hoê taata ia faaohipa i te autahu‘araa no to’na iho apî ? (A hi‘o i te mau api 42-45; a hi‘o atoa PH&PF 121:34–40). Nahea te hoê taata tei mau i te autahu‘araa e tia‘i ia ora no te farii i te « mana no te rave i te ohipa a te ra‘i » ? (A hi‘o i te mau api 43-45; a hi‘o atoa PH&PF 121:41–46).
Eaha te auraa no te parau ra ia faarahi i te hoê piiraa i roto i te autahu‘araa ? (A hi‘o i te mau api 44-45). Eaha te mau hi‘oraa ta outou i ite no te mau taea‘e tei faarahi i to ratou piiraa i roto i te autahu‘araa ?
A hi‘o faahou i te tuhaa hopea i roto i te pene (te mau api 45-48). Eaha te mau rave‘a e hopoi mai ai te autahu‘araa i te mau haamaitairaa i roto i teie nei oraraa e i roto i te oraraa amuri atu ?

Te mau papa‘iraa mo‘a: Ioane 15:16; Hebera 5:4–6; Alama 13:1–20; PH&PF 84:17–48; 107:18–20; Te mau Hiro‘a Faaroo 1:5