Pene 8

Te taaraa i te parau no te poheraa e no te ti‘a-faahou-raa

Ia pohe ana‘e te feia i herehia e tatou e ia feruri ana‘e tatou i to tatou iho oraraa tahuti nei, e nehenehe ta tatou e ite i te tamahanahanaraa e te haapapûraa i roto i te evanelia a Iesu Mesia tei faaho‘ihia mai e i roto i te parau mau o te ti‘a-faahou-raa.

No roto mai i te Oraraa o Wilford Woodruff

I te omuaraa o te ava‘e atete 1839, ua vaiiho atu o Elder Wilford Woodruff i to’na ra utuafare i Montrose, Iowa, no te pahono atu i te piiraa a te Fatu ia tavini i te hoê misioni i roto i te mau motu Peretane. Ua aroha’tu oia i ta’na ra vahine, Phoebe, e ta’na ana‘e tamarii, e hoê matahiti o Sarah Emma. I taua taime ra, ua hapû o Phoebe ia Wilford tamaiti, o te fanauhia mai i te 22 no mati 1840.

Te tahi nau ava‘e i muri a‘e i to’na faarueraa ia Montrose, tei te pae hiti‘a- o-te- râ o te Fenua Marite o Elder Woodruff, i te pororaa i te evanelia e te faaineineraa no te tere atu i te Fenua Peretane. I to’na faaearaa i reira ua papa‘i oia i roto i ta’na buka aamu e toru na moemoea taa ê e ua ite oia i ta’na ra vahine i roto i taua mau moemoearaa. I muri a‘e i te moemoearaa matamua ua papa‘i oia i teie parau i roto i ta’na buka aamu: « Ua ite au ia Woodruff vahine i roto i te ati rahi i roto i te hoê moemoearaa i Montrose. Aita vau i ite ia Sarah Emma »¹E mea poto atoa te faaiteraa no te piti o te moemoearaa: « Ua moemoeahia vau i roto i te arui e ua paraparau maua o Woodruff vahine e aita vau i ite ia Sarah Emma. »² E mea papû roa’tu te toru o te moemoea: Ua oaoa rahi maua i te tau‘a parauraa te tahi i te tahi, are‘a râ ua ano‘ihia mai ta maua tauahiraa e te oto, no te mea i muri a‘e i to maua aparauraa no ni‘a i ta’na ohipa i te utuafare, ua ani au tei hea o Sarah Emma… Ua parau mai oia, ma te ta’i, ‘Ua pohe oia’. Ua oto maua no te hoê taime, e ua ara mai au… E mea mau anei teie nei moemoea ? E taime maoro roa i muri iho i tae mai ai te haapapûraa.³

I te 14 no tiurai 1840, i te Fenua Peretane, ua papa‘i o Elder Woodruff i te hoê parau i roto i ta’na buka aamu no te faahaamana‘ oraa i te hoê mahana faufaa rahi no to’na utuafare: « E piti matahiti to Sarah Emma i teie nei mahana. Ia faaherehere mai te Fatu i ta‘u vahine e ta‘u mau tamarii i te ma‘i e i te pohe e tae noa- ’tu i to‘u ho‘iraa’tu i te fare. » Mai te hoê taata tei ite i te mau taime atoa i te hinaaro o te Fatu, ua papa‘i faahou atu oia, « E te Fatu, te horo’a’tu nei au ia ratou i roto i to oe na rima; a faaamu, a faaahu e a tamahanahana ia ratou, e ia oe ra te hanahana. »⁴ E toru mahana i muri mai, ua pohe o Sarah Emma iti.

Aita o Elder Woodruff i ite i te parau no te poheraa o ta’na tamahine e tae noa’tu i te 22 no atopa 1840, a tai‘o ai oia i te mau parau apî i roto i te hoê rata tei haaponohia i te hoê o to’na mau taea‘e i roto i te Tino Ahuru ma Piti Aposetolo.⁵ E maha mahana i muri iho ua farii oia i te parau apî na Phoebe, i roto i te hoê rata i te tai‘o mahana no te 18 no tiurai. Ua papa‘i oia i te hoê tuhaa o ta’na rata i roto i ta’na buka aamu:

« E to‘u Wilford here e, eaha ra ïa to oe mau mana‘o ia parau atu vau e i nanahi ra ua piihia vau no te ite mata i te revaraa o ta taua Sarah Emma iti mai teie atu ao ? Oia mau, ua reva ê atu oia. Ua haru atu te rima mou ore o te pohe ia’na mai roto atu i to‘u ra rima… I to‘u hi‘oraa’tu ia’na, ua feruri pinepine au i to‘u mana‘o ia haere atu na muri ia’na. Ua mana‘o vau e eita e nehenehe ia‘u ia ora e aita oia, i te taime ihoa ra e aita to‘u hoa i te fare. Ua haere râ oia. Ua faaho‘i atu te Fatu ia’na i te fare Ia’na ra no te tahi tumu paari.

« E tamataraa te reira no‘u, ua ti‘a râ te Fatu i pihai iho ia‘u na roto i te hoê rave‘a faahiahia. Ua nehenehe ia‘u ia hi‘o e ia ite e ua rave atu Oia ia’na i te fare e e haapa‘o maitai a‘e oia ia’na, no te tahi taime, eiaha ra vau, e tae noa’tu i te taime e haere atu ai au e farerei ia’na. Oia mau, e Wilford, te vai nei ta taua hoê melahi iti i te ra‘i, e te mana‘o nei au ua haere atu to’na varua e farerei ia oe hou teie nei taime.

« E mea fifi roa te oraraa e aita oia… Ua vaiiho mai oia i te hoê apa no to’na papa ia‘u nei hou a pohe ai oia… Ua tuu te mau peresibutero i to ratou rima i ni‘a iho ia’na e ua faatahinu ia’na e rave rahi mau taime, e i te mahana i muri iho ua ma‘ue to’na varua mai teie atu ao i te tahi atu ao ma te aue ore.

« I teie nei mahana, ua haere atu vau e Wilford tamaiti e e rave rahi mau hoa tei apee mai ia maua, i Commerce, [Illinois] no te faaite i to matou nei tapa‘o aroha hopea i ta taua tamahine here no te hi‘oraa e e huna-maitai-hia oia. Aita to’na e fetii tei apee atu ia’na i te menema aore ra no te faatahe i te roimata maori râ to’na mama e Wilford iti… Ua rave noa vau i te hoê haereraa maitai e te oto i te menema o Sarah. Te tarava ra oia ana‘e iho ma te hau. E nehenehe ta‘u e parau ua horo‘a mai te Fatu e ua rave faahou, e ia haamaitaihia te i‘oa o te Fatu [a hi‘o Ioba 1:21]⁶

Taa ê noa’tu te papa‘iraa i te mau mea no roto mai i te rata a Phoebe, mea iti roa ta Elder Woodruff papa‘iraa no ni‘a i te poheraa o ta’na tamahine. Ua parau noa oia e ua faaru’e mai o Sarah Emma « i teie nei oraraa » e eita « oia e ite-faahou-hia i roto i teie nei oraraa. »⁷

I te 91raa o to’na matahiti, ua faaoromai Wilford Woodruff i te pohe o te mau taata e rave rahi i herehia e ana, e tae noa’tu te tahi mau melo no te utuafare e te mau Aposetolo atoa tei tavini i pihai iho ia’na i raro a‘e i te faatereraa a te peropheta ra Iosepha Semita. Ua ite oia i roto i teie nei mau tau ati te tamahanahanaraa i roto i to’na iteraa papû no ni‘a i te evanelia tei faaho‘i-hia-mai e i roto i « te parau mau mure ore » o te ti‘a-faahou- raa.⁸Ua haapii pinepine oia e ua riro te poheraa o te Feia Mo‘a parau-ti‘a i te mau Mahana Hopea nei ei taime fifi e ei taime oaoaraa. Oia mau, i te pae hopea o to’na oraraa ua papa‘i oia i te mau arata‘iraa i muri nei no ni‘a i to’na iho oro‘a hunaraa: « Aita vau e hinaaro i to‘u utuafare aore râ to‘u mau hoa ia oomo i te tahi tapa‘o otoraa no‘u i to‘u hunaraa aore râ i muri iho, no te mea mai te mea e mea parau-ti‘a e e mea haapa‘o maitai au e tae noa’tu i te poheraa eita ïa i te mea faufaa ia heva te tahi taata no‘u. »⁹

Te mau haapiiraa a Wilford Woodruff

I te poheraa e tomo atu te varua o te taata tata‘itahi i roto i te ao varua, i reira te feia parau-ti‘a e oaoa amui ai e e tamau noa’i i te ohipa a te Fatu.

E rave rahi mau [taata] e ti‘aturi nei e ia pohe te hoê taata o te hopearaa ihoa ïa no’na, e aita e oraraa a muri atu. E nehenehe anei ta te hoê taata e feruriraa to’na e ti‘aturi e ua hamani te Atua no te ra‘i e piti aore râ e toru hanere tauasini milioni varua, e ua horo‘a ia ratou te mau tino [tino tahuti], no te haere noa mai e ora i ni‘a i te fenua nei e i muri a‘e ia haere atu i roto i te pouri aore râ ia haamouhia ? E au ra ia‘u e, eita e nehenehe i te hoê taata e feruriraa to’na ia faatupu i taua huru ti‘aturiraa ra. E faahapa ïa te reira i te feruriraa paari e te feruriraa hohonu.¹⁰

A heva ai i te poheraa o to tatou mau hoa tei reva ê atu, e ti‘a ia‘u ia ti‘aturi e i roto i te mau poheraa atoa te vai nei te hoê fanauraa; e faaru’e mai te varua i te tino pohe ia tatou, e e haere atu teie varua ora i te tahi atu pae o te paruru i roto i taua pŭpŭ taata rahi e te hanahana o te haa atoa ra no te faatupuraa i te mau opuaraa a te Atua, i te faati‘araa e te faaoraraa i te hoê ao tei hi‘a.¹¹

Te vai nei te oaoaraa ia tomo atu ana‘e te varua o te hoê Feia Mo‘a o te Atua Ora i roto i te ao varua e ia farerei atu oia i te Feia mo‘a tei haere na mua’tu.¹²

Te rave nei te tahi i te ohipa i teie atu pae o te paruru e te tahi i te tahi atu ïa pae o te paruru. Mai te mea e faaea mai tatou i ô nei e titauhia ia tatou ia haa i roto i te ohipa no te faaoraraa, e mai te mea e haere tatou i tera’tu pae, e titauhia ia tatou ia tamau noa i ta tatou ohipa e tae noa’tu i te taeraa mai o te Tamaiti a te Taata nei.¹³

Na roto i te Taraehara a Iesu Mesia, e ti‘a-faahou-mai te mau taata atoa, e amui faahou atu to ratou mau varua i to ratou mau tino tahuti ore.

Ua ite tatou e na roto ia Adamu e pohe te taato‘araa, e na roto i te hi‘araa e tae te pohe i ni‘a iho i te taato‘araa o te utuafare o te taata, e i ni‘a ato‘a i te mau manu avae maha o te fenua, te mau i‘a o te miti e te mau manu o te reva e te taato‘araa o te mau ohipa a te Atua, ia vai â teie fenua. E ture teie o te ore roa e tauihia aore ra e faahuru-ê-hia… Ua farii ato‘a te Faaora iho i te pohe; ua pohe oia no te faaora i te ao; ua vai to’na tino i roto i te menema, aita râ oia i ino, e i muri mai e toru mahana ua ti‘a oia mai te menema e ua farii i te tahuti ore. O oia te matamua o te ti‘a-faahou-raa.¹⁴

Ua mauruuru vau, e ua na reira noa vau, no te ti‘a-faahou-raa. Te oaoa nei au no te reira. Ua iritihia te e‘a no te reira e te toto o te Tamaiti a te Atua.¹⁵

Ia tae mai te ti‘a-faahou-raa, e ti‘a mai ia tatou ma te ahuhia e te mau tino tahuti ore; e te mau hamani-ino-raa, te mauiui, te oto, te mamae e te pohe, te mau mea o te oraraa tahuti nei, e mou ïa e a muri noa’tu.¹⁶

E mea faahiahia rahi mau teie parau tumu no te ti‘a-faahou-raa o tei pohe. E mea mahanahana no to‘u varua, ia mana‘o e, i te po‘ipo‘i o te ti‘a-faahou-raa, e ho‘i to‘u varua i roto i taua iho tino ra o ta’na i parahi i ô nei. Ei peresibutero no Iseraela, ua ratere matou na ni‘a e rave rahi tauasini kilometera ma te paruparu e te rohirohi, no te pororaa i te evanelia a Iesu Mesia i te mau tamarii a te mau taata. E oaoa roa vau ia noaa faahou ia‘u to‘u tino i te ti‘a-faahou-raa, te tino o tei haere na roto i te vari paruparu, o tei au i roto i te mau anavai pape e o tei ratere e o tei haa no te paturaa i te basileia o te Atua i ô nei i ni‘a i te fenua.¹⁷

E horo‘a mai te evanelia i te tamahanahana ia pohe ana‘e te hoê o tei herehia.

Ahiri e aita te evanelia a te Mesia, e riro ïa te faataa-ê-raa na roto i te pohe ei hoê o te mau tuhaa mauiui roa a‘e o te farereihia; i te taime râ e noaa ai ia tatou te evanelia e te iteraa i te parau tumu no te ti‘a-faahou-raa, e iriti-ê-hia atu ïa te rahiraa o te mauiui, te oto e te mamae o ta te pohe e faatupu. Ua feruri pinepine noa vau e, ia hi‘o i te hoê tino pohe, e ia hi‘o i taua tino ra ia tarava i roto i te menema e o te tapo‘ihia e te repo, o te hoê ïa o te mau ohipa mauiui mau i ni‘a i teie fenua, aita ana‘e te evanelia e au ïa e te ou‘a atu ra tatou i roto i te pouri. Ia noaa ana‘e râ ia tatou te evanelia, i te taime iho e haamaramaramahia’i te varua o te taata na te faaururaa a te Manahope, e nehenehe ïa ta tatou e parau mai te hoê tei ora i mutaa ihora – « E hade e, tei hea ta oe re ? E te pohe e, tei hea to oe tara ? To te pohe nei tara, o te hara ïa, e te horo’a a te Atua o te ora mure ore ïa, na roto i to tatou ra Fatu o Iesu Mesia. » [A hi‘o 1 Korinetia 15:55–57] E hohora mai te ti‘a-faahou-raa o tei pohe ia’na iho i mua i te mana‘o haamaramaramahia o te taata, e te vai nei te niu no to’na varua ia turu‘i i ni‘a iho. O tera te ti‘araa o te Feia Mo‘a i te mau Mahana Hopea nei i teie nei mahana. Ua ite tatou no tatou iho, aita tatou i roto i te pouri no ni‘a i teie nei parau tumu, ua heheu mai te Atua te reira ia tatou e ua taa ia tatou te parau tumu no te ti‘a-faahou-raa o tei pohe, e na te evanelia e faaite mai ia tatou te ora e te tahuti ore [ a hi‘o 2 Timoteo 1:10].¹⁸

Oia mau e mea fifi roa ia faaru’e i to tatou mau hoa… E natura no tatou ia faaite i to tatou mau mana‘o na roto i te mau roimata ia tanu ana‘e tatou i te mau tino o to tatou mau hoa here, e te vai nei te hoê faito tano e te ti‘a e nehenehe ta tatou e haere atu, te vaira râ te tahi mau peu otoraa e ore roa e tano e te mea ti‘a na te Feia Mo‘a i te mau Mahana Hopea ia rave.¹⁹

No te tahi mau tumu aore râ mau mana‘o ite-ore-hia e au, ua haere atu vau i te mau oro‘a hunaraa e ua haere atu vau i te hiti o te apoo no te mau peropheta e te mau Aposetolo e rave rahi e te Feia Mo‘a e rave rahi tei haa i roto i teie nei Ekalesia i to ratou tau e to ratou u‘i… Aita roa’tu vau i hinaaro ia oto i roto i to‘u varua e a haere atu ai au i te menema o te hoê peropheta, o te hoê Aposetolo, te hoê Feia Mo‘a no te Atua Ora tei tape‘a e tei haapa- ‘o i te parau a te Atua, tei tape‘a e tei haapa‘o i Ta’na mau fafauraa, tei farii i te Evanelia a Iesu Mesia e te mau oro‘a no te evanelia, e te Autahu‘araa Mo‘a. Ua faaoti taua mau tane e taua mau vahine i ta ratou misioni i ni‘a i te fenua nei ma te hanahana, te ohipa, te aroha, e tae noa’tu ua piihia ratou e ho‘i i te fare. Ua pohe ratou i roto i te faaroo, e e farii ratou i te hoê korona hanahana.

O tera to‘u mau mana‘o i te poheraa o te peresideni [Brigham] Young, te taea‘e [Heber C.] Kimball, te taea‘e [John] Taylor, na Ahuru ma Piti Aposetolo, e te mau taata atoa tei farii i te Evanelia a te Mesia e o tei tape‘a e o tei haapa‘o i roto i taua misioni ra. Te vai nei te hoê parau mau mure ore- ta to te ao taatoa e imi- i roto i te oraraa nei. Te vai nei te parau mau mure ore i roto i te pohe. Te vai nei te hoê parau mau mure ore i roto i te ti‘a-faahou-raa, e i roto i te mau haavaraa i mua’tu, e i roto i te mau auraa a te Atua e te mau taata atoa i mua’tu mai te au i te mau ohipa i ravehia i roto i te tino nei; e ia tomo ana‘e te hoê tane aore râ te hoê vahine i roto i te fafauraa e te Fatu, o tei farii i te Evanelia e to’na mau oro‘a, e o tei tape‘a e o tei haapa‘o i roto i to’na tau e to’na u‘i, e o tei piihia no te ho‘i atu i te fare i roto i te ao varua, tei hea ïa te taata tei maramarama i teie nei mau parau tumu o te nehenehe e oto no taua taea‘e aore râ tuahine ?²⁰

Na roto i te Taraehara o Iesu Mesia, te mau tamarii atoa o tei pohe hou a tae ai ratou i te matahiti a taa ai ia ratou to ratou iho mana‘o, e fatu ai‘a ïa ratou i te hanahana tiretiera.

Aita e aiû aore râ e tamarii rii tei pohe hou a tae ai ratou i te matahiti e taa’i ratou i to ratou iho mana‘o o tei ore i faaorahia, e no reira eita ratou e roaa i te mau mauiui no hade… Te faatio nei au i te taata atoa ia imi i roto i te hoê noa‘e buka no te parau mau a te ra‘i i te hoê noa‘e oro‘a tei haamauhia no te faaoraraa i te mau tamarii rii hara ore; aore e faufaa te reira, e te mea ana‘e e nehenehe e itehia; o te ohipa ïa i tupu a rave ai Iesu i te mau tamarii rii i roto i to’na rima e ua haamaitai atu ia ratou, e ohipa tano maitai ïa mai te au i te haapa‘oraa a te Atua. Area râ te pîpîraa i te mau tamarii aore râ te haapiiraa e e haere atu te mau tamarii rii i hade ra noa- ’tu te huru o te mau mea, e haapiiraa ïa na te taata e ere na te Atua, e no reira aore ïa e faufaa e e mea hape roa e e mea au ore roa i mua i te aro o te Atua. Ua nava’i te parau no ni‘a i te mau tamarii rii… Ua faaorahia ratou e te toto o Iesu Mesia.²¹

E mea hara ore te mau tamarii i mua i te Fatu; no ni‘a i to ratou pohe e te tumu o te reira pohe, tei roto ïa i te rima o te Atua, e eita e ti‘a ia tatou ia amuamu i te Fatu aore râ ta’na mau raveraa mai ta Ioba i rave… Te vai nei teie tamahanaraa i tu‘atihia i teie nei parau tumu–e mea hara ore ratou, aita ratou i roto i te hara. Ua farii ratou i te pohe ta te Atua i tuu atu i ni‘a ia Adamu e to’na atoa huaai; area râ ia faaru’e to ratou mau varua i to ratou mau tino e ia haere atu ratou i te ao varua ua hope ïa to ratou mau pe’ape’a e to ratou mau ati… E ti‘a faahou mai ratou mai to ratou mau menema i te po‘ipo‘i o te ti‘a-faahou-raa… ma te ahuhia e te hanahana, te tahuti ore, e te ora mure ore, i roto i te nehenehe mure ore e te itoito, e e horo‘ahia’tu ratou i roto i te rima o to ratou ra mau metua, e e farii ratou ia ratou i roto i te fanahoraa utuafare o te ao tiretiera ra, e e farii to ratou mau metua ia ratou e a muri noa’tu. E ora noa ratou a ora noa’i to ratou Atua. E riro te reira ei puna no te tamahanahanaraa e te faaitoitoraa no te Fei Mo‘a i te mau Mahana Hopea nei e ti‘aturi nei i te ti‘a-faahou-raa.

… E tupu mai paha te uiraa ia‘u nei e ia outou– « No te aha te Fatu i rave atu ai i ta‘u mau tamarii ? » E ere na‘u e pahono, no te mea aita vau i ite; tei roto i te rima o te Fatu, e ua na reira noa mai te poieteraa o te ao nei e tae roa mai i teie nei. Ua ravehia te mau tamarii i roto i to ratou aiûraa, e ua haere atu ratou i te ao varua. Ua haere mai ratou i ô nei no te faatupu i te fâ o to ratou haereraa mai, oia ho‘i, ia ora ratou i roto i te tino nei. Ua haere mai ratou no te farii i te hoê tau tamataraa e te hoê tuhaa ai‘a i te fenua nei; ua noaa ia ratou te hoê tino, aore râ tetene, e e faahereherehia taua tino ra no ratou, e i te po‘ipo‘i o te ti‘a-faahou-raa e amui-faahouhia te mau varua e te mau tino, e mai i ô nei, e ite ïa tatou i te mau tamarii no te mau faito matahiti huru rau i roto i te hoê utuafare, mai te aiû i te ouma o te metua vahine e tae atu i te taata paari, o te reira atoa ïa te huru i roto i te faanahoraa utuafare i roto i te ao tiretiera. E faaho‘i-faahou-hia mai ta tatou mau tamarii ia tatou mai to ratou ihoa huru i te taime a hunahia’i ratou mai te mea e, e tapea tatou, to ratou mau metua, i te faaroo, e e faaite tatou i to tatou ti- ‘amâraa i te noaaraa i te ora mure ore; e mai te mea aita tatou i faaite i to tatou haapa‘oraa e faaherehere-noa-hia ta tatou mau tamarii e e farii ratou i te hanahana tiretiera. Teie to‘u mana‘o no ni‘a i te mau tamarii atoa tei pohe, ua fanauhia anei ratou e Ati Iuda aore râ e Edene, e parau-ti‘a aore râ e mea ino. Ua haere mai ratou mai to ratou ra metua tane mure ore e to ratou ra metua vahine mure ore i fanauhia’i ratou i roto i te ao mure ore, e e faaho‘i-faahou- hia ratou i to ratou ra mau metua mure ore; e te mau metua atoa tei farii i te mau tamarii i ô nei mai te au i te haapa‘oraa a te Atua e a te autahu‘araa mo‘a, noa’tu eaha te tau i ora‘i ratou, e titau ïa ratou i taua mau tamarii ra i te po‘ipo‘i o te ti‘a-faahou-raa, e e horo‘ahia teie mau tamarii ia ratou e e faaunauna te mau tamarii i to ratou faanahoraa utuafare i roto i te ao tiretiera …

… Te parau atu nei au i to tatou mau hoa e heva nei, ua rave-êhia’tu ta outou mau tamarii e aita ta outou e mana i reira, eita e nehenehe ia tatou ia rave i te hoê noa‘e ohipa; aita e faahaparaa e horo’ahia i te mau metua tei rave mai ta ratou e nehenehe e rave. Eita te hoê metua vahine e faahapahia no te mea aita i noaa ia’na i te faaora i ta’na tamarii ma‘i, e e ti‘a ia tatou ia vaiiho teie nei mau mea i roto i te rima o te Atua. Eita e maoro roa e tae noa’tu i te taime e faaho‘ihia mai ratou ia tatou nei…

No ni‘a i te tupuraa, te hananaha aore râ te faateiteiraa o te mau tamarii i roto i te oraraa a muri atu aita te Atua i heheu mai ia‘u no ni‘a i taua parau tumu ra, no ni‘a anei i ta outou mau tamarii, ta‘u iho aore râ ta te tahi atu taata, maori râ ua faaorahia ratou. E te ite nei au e e ti‘a ia tatou ia tuu i to tatou ti‘aturiraa i te Fatu i roto i teie nei mau ati, e ti‘a ia tatou ia turu‘i i ni‘a i to’na rima e ia hi‘o atu ia’na no te tamahanahanaraa e te faaitoitoraa. Eita tatou e heva i raro a‘e i teie nei mau ati mai ia ratou e aore to ratou e ti‘aturiraa; eita tatou e heva i te pohe o ta tatou mau tamarii mai te mea râ e eita tatou e ite faahou ia ratou, no te mea e iteraa rahi to tatou no te reira. Ua haapii maitai te Fatu ia tatou, e ta’na evanelia atoa; ua faaite mai te mau heheuraa a Iesu Mesia e e faaho‘i-faahou-hia mai ratou ia tatou nei i te ti‘a-faahou-raa o te feia parau-ti …

… Te pure nei au i to‘u Metua i te Ao ra ia haamaitai mai oia i te taea‘e e te tuahine Wheeler [te tane e te vahine ua pohe iho nei ta raua na tamaroa e maha e e ono matahiti i te paari] i roto i to ratou ati e ia horo‘a ia raua i to’na Varua Mo‘a, e ia taoto raua i te pô e ia ti‘a mai raua i te po‘ipo‘i e ia mihi raua i ta raua mau tamarii, ia ite raua e tei roto raua iho i te rima o te Fatu e ia ite raua e to raua faataa-ê-raa i ta raua na tamarii rii e ere e a muri noa’tu, e i roto noa râ i te hoê taime iti e faaho‘i-faahou-hia mai ta raua tamarii ia raua ra. E tano teie ia tatou paatoa ia pohe ta tatou mau tamarii. E tuu tatou ia ratou i roto i te menema, e ti‘a faahou mai râ ratou i te po‘ipo‘i o te ti‘a-faahou-raa, e mai te mea ua tape‘a tatou i te parau mau, e farii â tatou ia ratou e e oaoa tatou e o ratou.²²

E ti‘a ia tatou ia ora maitai ia ineine tatou i te farii i te mau haamaitairaa ta te Atua i faaherehere no tatou ia pohe tatou.

Tei te tahi atu pae o te paruru to tatou hope‘araa. Ia pohe ana‘e au e hinaaro vau i te haamaitairaa ia haere i te vahi tei reira te Atua to‘u Metua i te Ao, e i te vahi tei reira Iesu Mesia, te Faaora o te ao nei.²³

E ti‘a ia tatou ia faaohipa maitai i to tatou taime, ta tatou mau taleni e ta tatou mau rave‘a a ora‘i tatou i ni‘a i te fenua nei. Ua ite au e ere teie nei ao to tatou vahi faaearaa hopea. Te ite nei tatou i te faaiteraa o te reira i te mau mahana atoa o to tatou nei oraraa. Ua titauhia tatou ia huna i to tatou mau peropheta, mau aposetolo, mau peresibutero, mau metua tane, mau metua vahine, mau vahine faaipoipo e te mau tamarii, na te reira paatoa e faaite mai ia tatou e, aita ta tatou e fafauraa no te hoê oraraa roa tahuti nei. E ti‘a ia tatou ia haamaitai i to tatou taime i teie nei mahana.²⁴

Te faatae puaihia nei teie nei faaararaa i te feia e ora nei, « Ia parahi ineine noa outou » [Mataio 24:44] E parau teie no tatou paatoa. E no tatou te mau metua e te mau peresibutero no Iseraela ia haa i te ohipa a te Atua, a faati‘ahia’i tatou ia faaea mai, ia ora mai te au i te maramarama e te ite i haamaitaihia’i tatou. No te mea ua faataahia te hoê taime no te mau taata atoa; e e rave ê atu oia e rave rahi mai te au i to’na iho hinaaro. E rave oia te taata ta’na e hinaaro i te rave, e e faaherehere oia te taata ta’na e hinaaro i te faaherehere i roto ia’na no te hoê opuaraa paari.²⁵

Ia hope to tatou haereraa na roto i te mau oto o te oraraa tahuti nei, e a horo‘ahia mai ai i ni‘a ia tatou te oaoa e te hanahana o te basileia tiretiera, i reira ïa tatou e ite ai e ua faaineine te mau ati o te oraraa tahuti nei ia tatou no te reira e ua faati‘a ia tatou ia oaoa i te mau haamaitairaa ta te Atua i faaherehere no te feia parau-ti‘a.²⁶

Ia tatarahapa teie nei nunaa i ta ratou atoa mau hara e ia ara e ia farii i te puai no te haere atu i mua i te Atua e ia faaroohia ta ratou ra mau pure, ia ineine no te paruru i te basileia e ia ore roa e faaru’e i ta ratou mau fafauraa e to ratou mau taea‘e, aore râ ia haavare aore râ ia huna i te evanelia, ia haavî râ i te ao nei ia ineine no te riro ei taata ai‘a e te Mesia i te îraa o te ti‘a-faahou-raa matamua tei faaineinehia no ratou o tei haapa‘o i te mau faaueraa a te Atua, o ta‘u ïa pure.²⁷

Te mau mana‘o tauturu no te tuatapaparaa e te haapiiraa.

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api v-ix.

A tai‘o faahou i te aamu no te poheraa o Sarah Emma Woodruff ( te mau api 82, 84-85). Eaha te mau haapiiraa tei tamahanahana e tei haapuai ia Elder e te tuahine Woodruff ? Eaha te mea ta tatou e nehenehe e haapii mai na roto i teie nei aamu ?
Mai te au i te parau a te peresideni Woodruff, eaha te mau ohipa tei tupu ta tatou e nehenehe e tia‘i i roto i te ao varua ? (A hi‘o i te mau api 85-87). Nahea teie nei iteraa e tauturu ai ia outou ?
A tai‘o ai outou i te a‘oraa a te peresideni Woodruff no ni‘a i te hevaraa i te pohe o te mau taata herehia, eaha te mau parau tumu ta outou e ite nei ? (A hi‘o i te mau api 88-89). Nahea to outou iteraa i te hau a pohe ai te feia ta outou i here ? Nahea tatou e nehenehe ai e tauturu i te tahi atu mau taata e heva nei i te taime poheraa ?
Nahea te Taraehara o Iesu Mesia e tatara ai i te tara o te pohe ? (A hi‘o i te mau api 87-88; a hi‘o atoa 1 Korinetia 15:55–57; Mosia 16:6–9).
Eaha ta outou i haapii mai roto mai i te mau haapiiraa a te peresideni Woodruff no ni‘a i te mau tamarii rii tei pohe ? (A hi‘o i te mau api 90-92).
A tai‘o faahou i te api 83. A tamata i te haamana‘o i te mau melo no te utuafare aore râ te mau hoa e au ra tei ineine ia tae i to ratou taime no te pohe. Eaha ta tatou e nehenehe e haapii mai roto mai i teie nei mau taata ? Mai te au i te parau a te peresideni Woodruff, eaha te mea e ti‘a ia tatou ia faaineine no te oraraa i muri a‘e i te poheraa ? (A hi‘o i te api 87).
Nahea te mau haapiiraa a te peresideni Woodruff i tauturu ai i to outou taaraa i te parau no te poheraa e te ti‘a-faahou-raa ?

Te mau papa‘iraa mo‘a: 1 Korinetia 15; Alama 11:42–45; 28:12; 34:32–41; Moroni 8:12–19; PH&PF 42:45–47; 76:50–70; 138:57

Christ emerging from tomb — Ua faaite papû te peresideni Woodruff e ua riro mau â te Faaora « te matameha‘i o te ti‘a-faahou-raa »

Christ appearing to the five hundred — « Ia noaa ana‘e ia tatou te evanelia e ia ite tatou i te parau tumu no te ti‘a-faahou-raa e rave-ê-hia’tu ïa i te hoê faito rahi te oto e te mauiui tei faatupuhia e te pohe. »

Temple Hill Cemetery — Ma te faaite papû i te Taraehara a te Faaora, ua horo’a te peresideni Woodruff i te tamahanahanaraa i te mau metua ua pohe ta ratou mau tamarii rii.