Pene 13

Te mau buka aamu: « Ua hau atu to ratou faufaa i to te auro »

E mea faufaa roa ta tatou mau buka aamu no tatou tata‘itahi, e e nehenehe ta ratou e afa‘i mai i te mau haamaitairaa i to tatou mau utuafare e te mau u‘i a muri a’e.

No roto mai i te Oraraa o Wilford Woodruff

I te matahiti 1835 ua haamata o Wilford Woodruff i ta’na buka aamu matamua, « ua ti‘aturi au e, e mea maitai ia hi‘o faahou i to tatou oraraa tahito, e ere te reira e haamaitairaa noa no tatou e hopoi‘ a atoa râ ia papa‘i i te hoê aamu ti‘a no ta tatou atoa mau ohipa i rave. » Ua papa‘i oia e, « E no reira vau e tutava ai mai teie atu taime ia papa‘i i te hoê buka aamu no to‘u mau tere, ia nehenehe ia‘u, ia titauhia ana‘e, ia horo‘a i te hoê faaiteraa no ta‘u ti‘aauraa. »¹ Ua papa‘i oia i te hoê buka aamu no na matahiti 63 i muri iho, ma te papa‘i i te papa‘iraa hopea i te 31 no atete 1898, e piti mahana hou oia a pohe ai. Te vaiiho mai nei te mau papa‘iraa no ta’na buka aamu i te hoê buka mau e te tano no ni‘a i to’na iho oraraa, te faaiteraa i to’na here i to’na utuafare, to’na anaanatae i te mau mea na pihai iho ia’na, e to’na itoito i te raveraa i te mau ohipa no te mau mahana atoa, to’na faaroo i roto i te mau tamataraa, to’na iteraa papû e to’na maramarama no ni‘a i te evanelia. Te horo‘a atoa mai nei te mau papa‘iraa i te tahi mau hi‘oraa i roto i te oraraa o te tahi atu mau melo no te Ekalesia i taua taime ra.

Taa ê noa’tu i te papa‘iraa i to’na iho aamu e ta’na taviniraa, ua papa‘i maite atoa o Wilford Woodruff i te hoê buka no te aamu no te Ekalesia. Ua faaite oia: « Ua faaûrûhia vau e ua tura- ‘ihia vau ia papa‘i i te hoê buka aamu e ia papa‘i no ni‘a i te mau ohipa a teie nei Ekalesia mai tei maraa ia‘u. Aita vau i taa eaha te tumu i puai ai to‘u mana‘o no te papa‘i i te hoê buka aamu i te taime a vai apî noa ai te Ekalesia, ua taa râ ia‘u i te tumu no te reira i teie nei. Fatata i te mau taime atoa e faaroo vau i te taea‘e ra Iosepha aore râ te Tino Ahuru ma Piti Aposetolo ia a‘o mai aore râ ia haapii i te mau huru parau tumu atoa e huru ê au mai te hoê i‘a i rapae au i te pape e tae noa’tu ua papa‘i au i te reira. I reira vau e huru maitai ai. E nehenehe ta‘u e papa‘i i te hoê a‘oraa a Iosepha e hoê hebedoma i muri a‘e i te horo‘a–raa–hia ma te papa‘i i te mau reta parau atoa i faahitihia, e i muri a‘e i te papa‘ iraa, eita te mau parau no te a‘oraa e vai faahou mai i roto i to‘u nei feruriraa. E horo‘araa te reira na te Atua ia‘u.²

Ei tuhaa no ta’na tutavaraa no te papa‘i i te aamu o te Ekalesia, ua papa‘i te peresideni Woodruff i te mau haamaramaramaraa faufaa rahi no ni‘a i te mau apooraa ta’na i haere atu. I roto i te hoê apooraa, ua haapii oia i te hoê parau tumu e nehenehe e faaohipahia i te mau buka aamu e i te mau buka mana atoa a te Ekalesia: « I roto i te hoê tahora pape puai eita tatou e tapiti i te haere na roto i te hoê â pape. Eita atoa tatou e tapiti i te faaohipa i te hoê â taime. Ia haere tatou i rapae na roto i taua uputa ra, ua piri ïa te ohipa no teie nei apooraa no tatou e a muri noa’tu. Eita tatou e haamau‘a faahou i te taime no teie nei arui. No reira eita anei i te mea ti‘a ia papa‘i tatou i te hoê buka aamu no ni‘a i ta tatou nei ohipa, ta tatou mau haapiiraa, e te a‘oraa ta tatou i horo‘a i roto i teie nei apooraa ? Oia. »³

Na roto i ta’na mau buka aamu, ua horo‘a mai te peresideni Woodruff i te hoê tao‘a e vai noa mai i to’na mau huaai e i te mau melo atoa o te Ekalesia. Ua parau te taata papa‘i i te aamu o te mau taata o Matthias F. Cowley e: « Ua î te oraraa o Wilford Woodruff i te mau mea maere. E oraraa ohie i roto i te reira oia i heheu hua mai ai i to’na aau e ta’na mau opuaraa. Na te haavare ore o ta’na mau parau, to’na haapa‘o maitai i te mau mea ha‘iha‘i atoa, e to’na haapa‘o maitai i te parau i faariro ia’na mai te taata papa‘i aamu maitai roa‘e i roto i te aamu o te Ekalesia. »⁴ Ua papa‘i o Elder B.H. Roberts, te hoê melo no te Hitu Ahuru e te hoê taata papa‘i aamu tuiroo no te Ekalesia, « Ua horo‘a te peresideni Woodruff i te hoê tautururaa hau atu i te faufaa i te Ekalesia. Ua riro ta’na mau Buka Aamu, tei papa‘i tamauhia, ma te maitai, ma te nahonaho e o te vehi–paari–hia… ei tao‘a faito ore no ni‘a i te aamu e te haamaramaramaraa no ni‘a i te haamataraa o te Ekalesia. Ua fana‘o te Ekalesia na roto i teie nei mau buka aamu i te hoê buka ti‘aturihia no ni‘a i te mau a‘oraa e te mau parau a te peropheta no teie nei Tau Tuuraa apî no te Evanelia– o Iosepha Semita– o tei mo‘e roa e a muri noa’tu maori râ ia Wilford Woodruff iho. E parau mau atoa te reira no ni‘a i te mau a‘oraa e te mau parau a Brigham Young, e a te tahi atu mau peresibutero faatere o te Ekalesia; [e] no te mau minuti no te mau rururaa faufaa rahi a te apooraa, te mau faaotiraa, te mau haavaraa, te mau faatureraa, e te mau faaotiraa mana e rave rahi e ere no te taatoaraa, maoti teie nei mau mea e ore ai e nehenehe i te taata papa‘i aamu ia ite i te mau mana‘o ti‘a no ni‘a i te mau mea e rave rahi–no teie nei mau hi‘oraa atoa i riro ai teie nei mau Buka aamu a te peresideni Woodruff ei tao‘a faufaa rahi »⁵

Ua ravehia mai te rahiraa o te mau faahitiraa parau i roto i teie nei pene no roto mai i te mau buka aamu a te peresideni Woodruff no ni‘a i te mau a‘oraa ta’na i horo‘a i roto i te mau pureraa autahu‘araa. Noa’tu e ua a‘o pinepine oia i te mau peresibutero i roto i teie nei mau faahitiraa parau, e mea faufaa rahi râ ta’na mau haapiiraa no te mau melo paatoa o te Ekalesia.

Te mau haapiiraa a Wilford Woodruff

Ia papa‘i ana‘e tatou i te aamu no to tatou oraraa, te faafana‘o nei ïa tatou ia tatou iho, to tatou mau huaai e te Ekalesia.

E hinaarohia te buka e te aamu no teie nei Ekalesia e te basileia ia tae i te hoê mahana. Aita’tu e tau tuuraa no te evanelia i ni‘a i te fenua nei, i riro ai te mau ohipa i tupu ei ohipa anaanatae– roa–hia, mai te tau tuuraa evanelia ta tatou e ora nei …

E parau mau e ua papa‘i o Iosepha Semita i te hoê aamu no to’na iho oraraa e no taua mau mea tei tuatihia’tu i te tahi faito i ni‘a ia’na. Ua pohe oia i teie nei, tera ra ua piahia i teie nei to’na oraraa e to’na iteraa papû i to te ao nei… E feia papa‘i aamu atoa to te peresideni Young tei [papa‘i] i ta’na mau ohipa e to’na oraraa i te mau mahana atoa, e ohipa ti‘a e e ohipa maitai ïa. Tera râ, ua papa‘ihia anei te aamu no te oraraa e te mau auraa o te Atua ia outou e te mau rahiraa tauatini aposetolo e peresibutero e vai nei aore ra e vai mai i roto i te ao atoa i rotopu i te mau nunaa atoa i raro a‘e i te ra‘i ? Aita, aita roa. No reira o outou paatoa te mau peresibutero no Iseraela a papa‘i i to outou aamu e te mau auraa o te Atua ia outou i roto i te taatoaraa o te ao nei no to outou iho maitai e te maitai no to outou huaai, no te maitai no te utuafare no Iseraela, no te maitai o te mau Ati Iuda e te mau Edene, no te maitai no te mau u‘i a muri a‘e.⁶

Te faariro nei paha te tahi mau taata e ere i te mea faufaa rahi ia papa‘i aore râ ia tape‘a mai i te hoê buka no ni‘a i ta tatou ohipa aore râ te ohipa a te Atua, te ti‘aturi nei râ vau e, e mea faufaa rahi te reira. Mai te mea aita, eita ïa te mau peropheta e faauruhia ia a‘o ia tatou ia haapa‘o i teie nei parau tumu. Ua parau mai te Fatu ia tatou e te mau mea ta tatou e haamau i te fenua nei e haamauhia ïa i te ra‘i e te mea ta tatou e papa‘i i te fenua nei e papa‘ihia ïa i te ra‘i, e te mea tei ore i haamauhia aore râ i papa‘ihia i te fenua nei, e ore ïa e haamauhia aore râ e papa‘ihia i te ra‘i [a hi‘o PH&PF 128:7–8] No reira e au ra e, e mea faufaa rahi ia papa‘i tatou i te hoê buka mau e te tano no ni‘a i te mau mea atoa.⁷

E parau paha te tahi pae e te [papa’iraa i te buka aamu] e ohipa pe’ape’a rahi mau ïa. Eita râ e ti‘a ia tatou ia parau i te mau mea atoa o te faatupu mai i te maitai ei mea pe’ape’a. Te faariro nei au i taua tuhaa ra o to‘u oraraa ta‘u i rave no te papa‘i i te mau buka aamu e i te aai, ei taime o tei haamau‘a–maitai–hia.⁸

Mai te mea aita’tu e tumu ê i mana‘ohia [maori râ] te fariiraa i te haamaitairaa no te tai‘o i ta tatou mau buka aamu e no ta tatou mau tamarii ia tai‘o i te reira, e hoona ïa te taime tei ravehia no te papa‘iraa i te reira.⁹

E ti‘a ia tatou ia papa‘i i te mau haamaitairaa a te Atua ia tatou e ta tatou mau ohipa mana i roto i te Ekalesia.

E ti‘a i te taata tata‘itahi ia papa‘i i te hoê aamu poto no to’na oraraa: no ni‘a i to’na mau metua, to’na fanauraa, ta’na haapa‘oraa, i to’na bapetizoraa e na vai i bapetizo ia’na, te taime e te toro‘a i faatoro‘ ahia’i oia e na vai–ia horo‘a i te hoê faaiteraa poto no ta’na mau misioni atoa e ta’na mau ohipa mana i rave e te mau auraa o te Atua e o’na iho. I muri iho ia pohe oia e ua hinaaro te feia papa‘i aai i te nene’i i to’na aamu, te vai nei ïa te tahi haamaramaramaraa e nehenehe ta ratou e faaohipa. E rave rahi paha o te mana‘o ra e e ohipa ha‘umani e te faufaa ore teie, e ere te reira ia‘u nei. ¹⁰

Te a‘o atu nei au ia outou ia papa‘i i ta outou atoa mau haamaitairaa e ia faaherehere i te reira… Te ite nei au i te hinaaro ia faaue atu ia outou e ia papa‘i outou i te mau ohipa mana atoa o to outou nei oraraa. Mai te mea e bapetizo, e haamau, e faatoro‘a aore râ e haamaitai outou i te hoê taata aore râ e haamaitai outou i te feia ma‘i, a papa‘i te aamu no te reira mau ohipa. Ia na reira ana‘e te taata tata‘itahi, e nehenehe ïa i te Ekalesia ia papa‘i i te aamu ti‘a no te reira ohipa… Mai te mea ua iteahia te mana e te mau haamaitairaa a te Atua i te parururaa ia outou i te ati… e ti‘a ïa ia outou ia papa‘i i te reira. A papa‘i i te hoê aamu no te mau auraa o te Atua e outou i te mau mahana atoa. Ua papa’i au i te mau haamaitairaa atoa ta‘u i farii, e eita roa vau e hoo i te reira no te auro.¹¹

Aita anei i navai to tatou faatura i te Atua no te papa‘i i te hoê aamu no taua mau haamaitairaa ra Ta’na i ninii mai i ni‘a ia tatou e ta tatou mau ohipa mana ta tatou i rave na ni‘a i To’na i‘oa i ni‘a i te fenua nei ? Te mana‘o nei au e ti‘a roa ia tatou ia na reira.¹²

Te papa‘i nei te Peresideniraa o te Ekalesia e arata‘i nei ia tatou i teie nei… i te hoê aamu no te mau auraa o te Atua e o te taata e o ratou… o te riro ei ohipa anaanatae no te mau milioni taata o te mau u‘i i mua. E riro anei te reira ei otoheraa na te mau rahiraa tauatini peresibutero e tahu‘a rahi e Aposetolo tei tere haere e rave rahi mau matahiti e tei patu i teie nei Ekalesia e basileia e tei farii i te mau horo‘a a te Varua Maitai ia vai ia ratou te mana no te faaoraraa i te feia ma‘i e no te ti‘avaru ê atu i te mau diabolo, no te faaaraara i te mata o te feia matapô, no te haamatara i te tari‘a o te feia tari‘a turi, no te faahaere i te feia pirio‘i…, e tei faaue i te mau demoni e ua haapa‘o teie mau demoni i ta ratou ra parau, e e melahi tia‘i to ratou no te parururaa ia ratou i te ati e te pohe ? Te parau nei au, e ti‘a anei i te mau peresibutero ia haamaitaihia i teie nei mau mea e ia faariro te reira ei mea faufaa ore no te papa‘ i ? Eita anei te mau peresibutero e papa‘i i te hoê peni tara i te aamu ia tai‘o ta ratou mau tamarii e te mau u‘i i muri atu ? Te parau nei au e, e ti‘a ia ratou ia papa‘i. Te mana‘o nei au e te titau nei te Fatu i te reira i to tatou mau rima e riro te reira ei faufaa ai‘a e te mo‘a e ti‘a ia vaiihohia mai i ta tatou nei mau huaai.¹³

E ti‘a ia tatou ia papa‘i i te hoê buka no te mau mea atoa mai to ratou ra tupuraa.

E nunaa faataahia tatou e te Atua no te faati‘araa i To’na basileia i ni‘a i te fenua nei, no te paturaa ia Ziona, e no te faaineineraa i te e‘a no te taeraa mai o Iesu Mesia. I teie nei, eita anei e ti‘a ia tatou ia papa‘i i te hoê buka aamu, te hoê buka e te aamu no te mau auraa o te Atua e o tatou mai te au i to ratou tupuraa i tera mahana e tera mahana i mua i to tatou nei mau mata ? E ti‘a ia tatou ia na reira.

… Ma te vaiiho ore i teie nei amaa o ta tatou ohipa, ia papa‘i te taata tata‘itahi o te nehenehe, i te hoê buka aamu e te hoê buka i te mau mea e tupu ra i mua i to tatou mau mata i te mau mahana atoa. E riro ïa te reira ei faufaa ai‘a no ta tatou mau tamarii e ei maitai rahi no te mau u‘i a muri atu ma te horo‘araa’tu ia ratou te hoê aamu mau o te tupuraa e te haereraa i mua o te Ekalesia e te basileia o te Atua i ni‘a i te fenua nei i teie nei tau tuuraa hopea o te evanelia, eiaha râ e vaiiho i to tatou mau enemi ia papa‘i i te hoê aamu hape no te Ekalesia mau a te Mesia.¹⁴

Eita e noaa ia tatou ia feruri no ni‘a i te faufaa rahi o te mau mea e tupu nei mai ta tatou e ite ra, e ite râ tatou i te faufaa rahi o te reira mau mea i muri mai. Te ora nei tatou i roto i te hoê o te mau u‘i hau atu i te faufaa rahi i orahia e te taata i ni‘a i te fenua nei, e e ti‘a ia tatou ia papa‘i i te hoê aamu no taua mau ohipa e tupu ra i mua i to tatou mau mata ei faatupuraa no te mau tohuraa e te mau heheuraa a te Atua. Te vai nei te hoê tirui rahi no te mau heheuraa e tupu ra i to tatou nei anotau, e te hinaaro nei tatou e papa‘i i te hoê buka no ni‘a i teie nei mau ohipa e tupu ra i mua i to tatou mau mata.¹⁵

E ti‘a i te mau tamarii ia haamata vave i te papa‘i i te mau buka aamu.

Te hinaaro nei au e parau i to‘u mau hoa apî e, e haamaitairaa rahi no ratou, e no ta ratou mau tamarii i muri mai ia ratou, mai te mea e papa‘i ratou i te hoê buka aamu i te mau mahana atoa te mau mea e tupu ia ratou e na pihai iho ia ratou. Ia rave mai te mau tamaroa e te mau tamahine atoa i te hoê buka iti na ratou, e ia papa‘i rii i roto i te buka iti i te mau mahana atoa.

E ani râ outou e « Eaha râ ïa ta‘u e papa‘i ? ». A papa‘i i te mau mea atoa e au i te faahereherehia aore râ i te mea maitai atoa e vai nei ia outou; e mai te mea e haamata outou i te reira a vai apî noa ai outou, e mea ohie roa ïa no outou i te taime e riro mai outou ei mau tane e ei mau vahine paari. Auê ïa te au e no outou, e no ta outou mau tamarii, e toru ahuru, e pae ahuru, aore râ e va’u ahuru matahiti mai teie atu taime, ia parahi e ia tai‘o i te mau ohipa tei tupu i pihai iho ia outou i to outou tamarii–rii–raa e to outou apîraa! Eita anei outou e au ia tai‘o i te mea i tupu i to outou mau metua tane, e to outou mau metua vahine, e to outou mau tupuna metua, i to ratou apîraa ra e i roto i to ratou mau oraraa ? E ere râ te fâ no te haapapa‘iraa ia outou i te hoê buka aamu i to outou apîraa, i te haatamauraa râ ia outou ia na reira noa e tae roa’tu i te taime e riro mai ai outou ei mau tane e ei mau vahine, i te taatoaraa o to outou nei oraraa. Ua hinaaro–roa–hia te reira i roto i te u‘i ta tatou e ora nei, no te mea te ora nei outou i roto i te hoê u‘i faufaa rahi ta te mau tamarii a te taata i ite, e e mea hau atu i te faufaa rahi ia haamata vave outou i te papa‘i i te hoê buka aamu e ia pee i tera peu a ora‘i outou, hau atu i ta te tahi atu mau u‘i e rave ra.

E mau tamarii outou no Ziona, e ua piihia to outou mau metua e te Atua no te patu i te Ekalesia a te Mesia e te Basileia o te Atua i ni‘a i te fenua nei i teie mau mahana hopea nei, e fatata to outou mau metua i te pohe, e e mono outou ia ratou. E riro outou ei mau metua tane ei mau metua vahine e [outou] te mau tamaroa iti… e riro mai outou ei mau peropheta, ei mau aposetolo ei mau peresibutero, e tere haere outou e e poro outou i te evanelia e e ora outou no te farii i te parau a te Fatu. I reira e mea titau–roa–hia ïa e ia papa‘i outou i te hoê buka aamu e ia papa‘i i te hoê aamu no te mau auraa o te Fatu e o outou…

… Te oaoa rahi roa nei au e to‘u utuafare i teie nei ia parahi e ia tai‘o i te hoê aamu no ni‘a i to matou mau tere, te mau vahi i haerehia e matou, e te mau mea ta matou i rave, e te mau auraa o te Atua e o matou, e te mau taime maitai e rave rahi i pihai iho i to matou mau hoa. E nehenehe ta‘u e tai‘o i roto i ta‘u mau buka aamu i te mau haapiiraa maitai ta‘u i faaroo e rave rahi mau matahiti i teie nei i pihai iho i te mau peresideni Iosepha Semita, Brigham Young, Heber C. Kimball, na Tino Ahuru ma Piti Aposetolo, e rave rahi atu mau peresibutero maitai, e te mau taime maitai ta matou i oaoa amui. Mai te mea e haamata to‘u mau hoa apî i te rave i te reira e ia tamau noa, e riro mai ïa te reira ei faufaa hau atu i te auro na ratou i te hoê mahana i muri ra.¹⁶

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

No te aha te mau buka aamu a te peresideni Woodruff i riro ai ei mea faufaa no te Ekalesia ? (A hi‘o i te mau api 139, 141). Eaha te parau a te peresideni Woodruff i te feia e mana‘o nei e ore ta ratou mau buka aamu e faatupu i te hoê huru–ê–raa i roto i te tahi ê atu taata ?
Eaha te tahi o te mau mea tei tupu i roto i te Ekalesia i roto i to outou nei oraraa ? Nahea ta outou buka aamu no ni‘a i teie nei mau mea i tupu e tauturu ai i ta outou mau tamarii e ta outou mau mootua ?
A tai‘o faahou i te paratarafa matamua i te api 141. Nahea te faahitiraa parau a te peresideni Woodruff i roto i teie nei paratarafa e tano ai i ni‘a i te parau no te papa‘iraa i te buka aamu ? A feruri hohonu i te ohipa e tupu ia mo’e ana‘e te mau ohipa faufaa rahi tei tupu i teie nei u‘i e i te mau u‘i a muri atu.
A hi‘o i te pene, ma te imi i te mau huru haamaramaramaraa e ti‘a ia tatou ia tuu atu i roto i ta tatou mau buka aamu. Nahea teie nei mau huru buka aamu e haamaitai ai ia tatou tata‘itahi ? Eaha te mau rave‘a e haamatai ai teie nei mau buka i to tatou mau utuafare ?
Eaha ta outou e hinaaro ia ite no ni‘a i te oraraa o to outou mau tupuna ? Eaha ta teie e faaite mai nei ia outou no ni‘a i te mea e ti‘a ia outou ia papa‘i i roto i ta outou buka aamu ?
No te aha e mea faufaa rahi ia papa‘i no ni‘a i te mau mea i muri noa iho i to ratou tupuraa ? (A hi‘o i te api 144). Eaha ta tatou e nehenehe e rave no te faataa i te taime no te papa‘iraa i te buka aamu ?
A huri atu i te mau api 144-147 e a tai‘o faahou i te a‘oraa a te peresideni Woodruff i te mau tamarii e te Feia Apî. Nahea e nehenehe ai i te mau metua e te mau papa ruau e te mau mama ruau ia faaite i teie nei mau mana‘o i ta ratou mau tamarii e ta ratou mau mootua ? Nahea ta ratou e nehenehe ai e faaohipa i teie nei mau mana‘o i roto i te hoê pureraa pô utuafare aore râ apooraa utuafare ?

Te mau papa‘iraa mo‘a: 1 Nephi 1:1; Omoni 1:17; Mosia 1:1–6; Alama 37:1–9; Mose 6:5–6