Pene 1

Te faaho‘i-faahou-raa mai o te evanelia

Na roto i te peropheta Iosepha Semita, ua faaho‘i faahou mai te Fatu i Ta’na evanelia i roto i to’na huru hanahana mau, to’na mana mau, to’na afaro mau, e to’na maramarama mau.

No roto mai i te Oraraa o Wilford Woodruff

I to Wilford Woodruff vai tamariiraa, ua matau oia e to’na utuafare ia Robert Mason, e taata teie tei itehia no to’na mau ti‘aturiraa faaroo taa‘e maitai. Te faati‘a ra te peresideni Woodruff e:

« Te ti‘aturi ra oia e, e mea titauhia ia vai te mau peropheta, te mau aposetolo, te mau moemoea, te mau orama e te mau heheuraa i roto i te Ekalesia a te Mesia, mai tei vai atoa na i tahito ra; e te ti‘aturi atoa ra oia e, e faati‘a te Fatu i te hoê nunaa taata e te hoê Ekalesia, i te mau mahana hopea tei reira ho‘i te mau peropheta, te mau aposetolo e te mau horo‘a atoa, te mau mana, e te mau haamaitairaa, tei vai na ho‘i i te mau anotau atoa o te ao nei… Ua haere pinepine mai oia i te fare o to‘u metua tane i to‘u tamariiraa, e ua haapii mai ia‘u e i to‘u mau taea‘e i taua mau parau tumu ra; e ua ti‘aturi au ia’na.

« E taata pure tamau [oia], e ua farii oia i te mau moemoea e te mau orama, e ua faaite te Fatu ia’na i te mau mea e rave rahi, o te tupu i te mau mahana hopea, na roto i te mau orama..

« E faati‘a’tu vau i te hoê orama, ta’na i faati‘a mai ia‘u. Te taime hopea a ite ai au ia’na, na ô maira oia e: ‘Tei roto vau i ta‘u faaapu i te avatea te rave ra i te ohipa, i faaheitaotohia ai au i te hoê orama. Tei roto vau i te hoê uru raau rahi ua î i te mau tumu raau hotu: Ua po‘ia roa vau, e te haere ra vau na roto i te hoê aroa atea i ropu i te mau tumu raau, ma te imi i te tahi hotu no te amu; aita râ i itehia ia‘u te hoê noa a‘e hotu, e ua oto ihora vau i te mea e, aita i itehia ia‘u te hoê noa a‘e hotu. A hi‘o noa ai au i te uru raau, ma te uiui ia‘u iho e, no te aha râ aita e hotu, haamata a‘era te mau tumu raau i te farara i raro ati ti‘a a‘e ia‘u, aita hoê tumu raau faahou e ti‘a ra i roto i taua uru raau ra; I roto i to‘u maere rahi i te iteraa i taua ohipa ra, ite atura vau i te mau oteo apî i te fauraraa mai na raro mai i te aa o te mau tumu raau o tei farara i raro, e riro mai nei ei mau tumu rii raau tupu pautuutu maitai i mua i to‘u na mata. Ua tupu a‘era ratou i te rahi, ua uaa, e ua horo‘a mai i te maa e î roa a‘era te mau tumu raau i te mau hotu nehenehe aitâ vau i ite a‘e nei, e ua î roa vau i te oaoa i te iteraa i te mau hotu nehenehe e rave rahi. Ua ta‘uma atura vau i ni‘a i te hoê tumu e ua pafa‘i maira i te maa e î roa a‘era to‘u na rima, ma te faahiahia i to ratou nehenehe, e i te taime a tamata ai au i te amu i te reira, ua mo‘e a‘era taua orama ra, e ite a‘era vau ia‘u te ti‘a noa ra i roto i te faaapu, i taua vahi ra i reira vau i te ti‘araa i te haamataraa o te orama.

« ‘Ua tuturi ihora vau i ni‘a i te repo, e ua pure atura i te Fatu, e ua ani atura ia’na, na roto i te i‘oa o Iesu Mesia, ia faaite mai oia ia‘u i te auraa o taua orama ra. Na ô maira te Fatu ia‘u e: « Teie te tatararaa o te orama; te mau tumu raau rarahi o te uru raau, o te u‘i taata ïa ta oe e ora na. Aita e Ekalesia na te Mesia, e aore ra, aita e basileia no te Atua i ni‘a i te fenua i roto i to oe u‘i. Aita e hotu no te Ekalesia a te Mesia i ni‘a i te fenua. Aita e taata faatoro‘ahia e te Atua no te faatere i te mau oro‘a o te evanelia o te faaoraraa i ni‘a i te fenua i teie mahana e i teie u‘i. Area râ, i roto i te u‘i i mua nei, o Vau o te Fatu, e faati‘a vau i to‘u basileia e i ta‘u Ekalesia i ni‘a i te fenua, e te mau hotu o te basileia e o te Ekalesia a te Mesia, mai tei vai na i muri a‘e i te mau peropheta, te mau aposetolo e i te Feia Mo‘a i te mau tau tuuraa atoa, e ite faahou-hia ïa te reira i roto i to ratou ra îraa i ni‘a i te fenua. E ora oe no te ite i te reira mahana, e e tape‘a oe i te reira hotu; eita râ oe e amu i te reira i te tahuti nei. »

Te parau faahou ra te peresideni Woodruff e: « Ia hope [ta’na] faati‘araa i te orama e te tatararaa, na ô maira oia ia‘u e,… ’Eita roa’tu vau e amu i teie hotu i te tahuti nei; o oe râ, oia ïa, e e riro oe ei taata itehia i roto i te reira basileia.’ Fariu ê atura oia e haere ê atura. Teie ïa te mau parau hopea o ta’na i parau mai ia‘u i ni‘a i te fenua nei…

« Ua farii oia i teie orama i te matahiti 1800, e ua faati‘a mai oia i te reira ia‘u i te matahiti 1830–i te pu‘e tau faatupuraa raau iho a faati‘ahia ai teie Ekalesia.

« Ua faatupu teie orama, e te tahi atu mau haapiiraa ta’na, i te hoê mana‘o hohonu i roto i to‘u feruriraa, e ua pure tuutuu ore au i te Fatu ia arata‘i mai Oia ia‘u na roto i to’na Varua, e ia faaineine ia‘u no ta’na Ekalesia ia tae mai oia. »

I te tomoraa mai o Wilford Woodruff i roto i te Ekalesia, ua papa‘ i oia i te hoê rata i to’na hoa o Robert Mason. Te parau ra oia e i muri a‘era e, « Ua faaite au ia’na e, ua itehia ia‘u te Ekalesia a te Mesia ta’na i parau mai ia‘u. Ua faaite au ia’na i te faanahonahoraa o te reira, e i te taeraa mai o te Buka a Moromona; e te vai ra i roto i te Ekalesia te mau peropheta, te mau aposetolo, e te mau horo‘a e te mau haamaitairaa atoa, e ua faaitehia mai i te Feia Mo‘a te hotu mau o te basileia e o te Ekalesia a te Mesia, mai ta te Fatu i faaite ia’na i roto i ta’na ra orama. Ua farii oia i ta‘u rata, e ua tai‘o i te reira e rave rahi taime, e ua tape‘a maite i te reira mai ta’na i tape‘a i te hotu i roto i te orama; tera râ, ua paari roa oia, e aita i maoro, pohe atura. Aita oia i ora no te ite i te hoê peresibutero ia rave i te mau oro‘a no te Evanelia i ni‘a ia’na.

« Te ohipa matamua o ta‘u i rave, i muri a‘e i te heheu-raa-hia mai te parau haapiiraa no te bapetizoraa no te feia i pohe, ua haere au e ua bapetizo ia‘u no’na. »¹

Te mau haapiiraa a Wilford Woodruff

E mea mure ore e te tauiui ore te evanelia a Iesu Mesia

Ua faaite te Fatu i to’na rima e rave rahi taime i roto i te mau tau tuuraa tata‘itahi, no te faati‘a i To’na basileia i ni‘a i te fenua nei; ua aupuru Oia i te mau taata–te mau varua teitei–tei haere mai e ora i te tahuti nei i tera tau e tera tau. Ua faauru oia i te reira mau taata; ua horo‘a i te mau heheuraa ia ratou; ua faa î ia ratou i te faaururaa, te maramarama, te parau mau, te mau mea no te basileia o te Atua.²

Mai te mea e, e putuputu outou i pihai iho i te metua Adamu, i pihai iho ia Seta, ia Mose, ia Aarona, i te Mesia, e aore ra, i te mau aposetolo, e haapii mai ia ratou paatoa i teie mau parau tumu o tei haapiihia ia tatou; eita roa’tu ratou e taui i te hoê vahi iti noa a‘e. E mea mure ore te huru o teie evanelia, e te tauiui ore ho‘i to’na faito.³.

Hoê ana‘e evanelia i vai na, hoê ana‘e o te haapiihia i te tamarii a te taata nei, aita te reira i taui, eita ho‘i e taui no teie tau e a muri noa’tu. Hoê huru to’na i te mau tau atoa o te ao nei; hoê huru to’na mau oro‘a. Te feia tei ti‘aturi i te evanelia, ua faaroo ratou ia Iesu hou a haere mai ai oia i te tahuti nei, e ua porohia ho‘i te tatarahaparaa i te hara hou to’na ra tau e tae roa mai i teie nei; ua haapa‘o atoa ratou i te bapetizoraa no te matararaa te mau hara e te tuuraa rima no te horo‘a o te Varua Maitai; e ua faanahohia te Ekalesia ma te tuuhia te feia faauruhia i roto ra… Ua titauhia teie mau mea i te mau tau atoa o te ao nei.⁴

I te mau tau atoa e vai te Ekalesia a te Fatu i ni‘a i te fenua nei, e te farii ra taua Ekalesia ra i te Evanelia a te Mesia, e te fana‘o ra ho‘i ratou i te Varua Maitai, te mau horo‘a atoa e te mau maitai atoa i vai na i roto i te Ekalesia a te Atua, e vai atoa ïa i roto i taua Ekalesia ra.⁵

Ua faati‘a Iesu Mesia i Ta’na Ekalesia a Ohipa ai Oia i te tahuti nei, ua topa râ te taata i roto i te taivaraa i muri noa iho i To’na poheraa e To’na Ti‘a-faahou-raa.

Ua hopoi atu Iesu Mesia… i te Evanelia i te Ati Iuda ra, e ua faati‘ a i To’na basileia i rotopu ia ratou, e ua tae mai te reira ma te apitihia i te mau horo‘a atoa, te mau maitai e te mau mana atoa: ua faaorahia te feia ma‘i; ua tiavaruhia te mau diabolo; ua faaitehia te mau horo‘a i rotopu ia ratou. Ua pato‘i râ te mau Ati Iuda Ia’na, e i te hopea ra, ua haapohe ratou Ia’na… Aita Oia i fariihia; e i reira, ia au i te faaueraa, ua afaihia’tu teie Evanelia i te mau Etene ra.⁶

I te faaite-raa-hia te basileia i te mau Etene ra, ua vauvauhia’tu ïa ma te mau aposetolo i roto, e te mau peropheta, e te mau mana faaora, e te mau heheuraa afaro ti‘a no ô mai i te Atua ra, e te mau horo‘a e te mau maitai atoa i ti‘aturihia e te mau Ati Iuda, e o ta ratou i fana‘o i te tau a vai ai ratou i roto i te haapa- ‘o: I te taime a tae atu ai te reira i te mau Etene ra, e mea afaro maitai to’na faanahonahoraa, tera râ, i roto i te roaraa o te tau, ua taui ratou i te mau oro‘a o te basileia o te Atua, e ua topa atoa ratou i roto i te huru o te feia ti‘aturi ore, e ua vai noa ratou e rave rahi tenetere aore e faanahonahoraa mau no te ra‘i i rotopu ia ratou… I roto i te roaraa o te tau, ua rave-ê-hia te mau horo‘a, e te mau maitai, e te mau mana o te basileia o te Atua, e te feia tei faatere na i te Ekalesia a te Atua i tahito ra, ua fatata ïa ratou paatoa i te taparahi-pohe-hia; ua taparahihia ratou i te mea e, ua rohi maite ratou no te tape‘a i te Ekalesia i roto i to’na huru viivii ore, e ua tamata na roto i to ratou puai atoa, ia haamau i te mau parau tumu ta te Atua i heheu mai.⁷

E rave rahi tenetere tei ma‘iri. Rave rahi milioni taata tei fanauhia, tei parahi i ni‘a i te fenua nei, tei pohe e tei haere atu i roto i te ao varua, e, ia au i te iteraa tei roaa ia tatou, aita hoê o ratou i mau i te mana no te haere i rotopu i te taata no te rave i te mau oro‘a o te Evanelia no te ora e te faaoraraa. Eita e ore e, e rave rahi milioni taata maitai, tei haa ia au i te maramarama tei roaa ia ratou…, o tei haere mai i to ratou ra tau, e tei poro i te Evanelia ia au i te maramarama tei roaa ia ratou. Aita râ ratou i mau i te mana no te faatere i te hoê noa a‘e oro‘a o te vai e tae roa’tu i muri atu i te pohe. Aita ratou i mau i te Autahu‘araa mo‘a.⁸

Ua fatata te ao nei i te ere roa i te iteraa i te parau mau, e i te Varua Maitai tei niniihia mai no te arata‘i i te taata i ni‘a i te e‘a o te parau mau… Na roto i te ti‘araa mai tera u‘i e tera u‘i, e i te haamauraa i ta ratou mau ture e ta ratou mau faanahoraa, e tei parau e, ua au te reira i te faanahonahoraa o te faaoraraa, noa’tu to ratou taa‘e te tahi i te tahi, e ua tae roa i te faatupu i te mau Ekalesia e rave rahi, tei taa‘e ho‘i te parau haapiiraa ta te tahi i ta te tahi, na te reira e faaite mai e, te vai ra hoê hape i reira.⁹

I muri a‘e i te mau tenetere e rave rahi o te taivaraa, ua faaho‘i faahou mai te Fatu i te îraa o te evanelia na roto i te peropheta Iosepha Semita.

Ua faaitehia te evanelia i to tatou nei anotau i roto i to’na ra hanahana mau, to’na mana mau, to’na faanahoraa mau, e to’na maramarama mau, mai tei tupu noa na i te mau tau atoa a vai ai te nunaa o te Atua i rotopu i te mau taata nei o ta’na i ite au mai. Taua faanahonahoraa ra e taua evanelia ra, i pohe ai te Mesia, e i haamanii ai te mau aposetolo i to ratou toto no te haapapû i te reira, ua faati‘a-faahou-hia ïa i roto i teie nei u‘i. Mea nahea te reira i te taeraa mai ? Na roto ïa i te utuuturaa a te hoê melahi mo‘a no ô mai i te Atua ra, tei [tau‘aparau] i te taata, e ua faaite atu ia’na i te poiri e tapo‘i nei i te ao, e ua faaite maira ia’na i te poiri ta‘ota- ‘o e haati ra i te mau nunaa, e te mau mea atoa e tupu i roto i teie u‘i, e o te pee atu i tera u‘i e tera u‘i, ma te vitiviti, e tae roa’tu i te ho‘iraa mai te Mesia [a hi‘o Iosepha Semita–Aamu 1:30–49]. Ua haapii te melahi ia Iosepha Semita i taua mau parau tumu ra tei titauhia no te faaoraraa i te ao nei; e ua horo‘a te Fatu i te mau faaueraa ia’na, e ua taati i te autahu‘araa i ni‘a ia’na, e ua horo‘a i te mana ia’na no te rave i te mau oro‘a o te fare no te Fatu. Ua parau Oia ia’na e, aita te evanelia e vai ra i rotopu i te taata nei, e aita ho‘i e faanahonahoraa mau no to’na basileia i roto i te ao nei, e ua faariu ê te taata i ta’na ra faanahonahoraa mau, ua taui i te mau oro‘a e ua ofati i te fafauraa mure ore, e ua farii i te haavare e i te mau mea aore e maitai to roto. Ua faaite atu Oia ia’na e, ua tae i te taime no te haamau i te niu no te faati‘a i te Basileia o te Atua i rotopu i te taata nei no te taime hopea, ei faaineineraa no te mahana hopea.¹⁰

Eaha te ohipa ta Iosepha Semita i rave i muri a‘e i to’na fariiraa i te autahu‘araa e te mau oro‘a no te reira ? E faaite atu vau ia outou i te ohipa ta’na i rave. Ua rave oia i te ohipa tei ore i ravehia e te mau orometua e te mau haapa‘oraa Keretetiano, e te taatoaraa o te ao nei, i roto i te rahiraa tenetere hoê ahuru e ma hitu, e pae ahuru u‘i, tei ma‘iri e tei pohe–noa’tu e taure‘are‘a [ite ore i te pae no te haapiiraa], ua faaite oia i te evanelia a Iesu Mesia i to te ao nei, i roto i to’na ra îraa, to’na afaroraa e to’na ohieraa, mai tei haapiihia e to’na Fatu e ta’na mau aposetolo; ua faaite oia i te Ekalesia a Iesu Mesia e i te basileia o te Atua, tei maitai roa i roto i to raua faanahonahoraa, mai tei faaauhia e Paulo–e upoo e te avae, e rima, te mau melo atoa o te tino tei maitai roa i mua i te ra‘i e te fenua nei [a hi‘o i te 1 Korinetia 12:12–28]. Nahea i ti‘a ai ia’na, hoê tamaiti [ite ore], ia rave i te mea tei ore i ravehia e te taatoaraa o te ao Keretetiano maramarama, i te roaraa hoê ahuru ma hitu tenetere ? No te mea, tei roto te mana o te Atua ia’na, ua haapiihia oia e te mau taata tei poro atoa na i taua evanelia ra a ora ai ratou i te tahuti nei, e na roto i te reira, ua faati‘a ïa oia i te mea ta te Metua Adamu, Enoha, Mose, Elia, Isaia, Ieremia e o Iesu e ta’na mau aposetolo paatoa i tohu ra.

Te parau maitai ra o Paulo e– « Aore ho‘i au i haamâ i te evanelia o te Mesia ra, no te mea, o te mana ïa o te Atua, ia ora te feia atoa i faaroo ra. » [A hi‘o Roma 1:16.] No reira, e mea ti‘a i te Feia Mo‘a i te mau Mahana Hopea nei ia parau e– »Aore tatou i haamâ i te evanelia a te Mesia. » Aita vau e haamâ ia parau e, e peropheta o Iosepha Semita na te Atua; aita vau e haamâ ia faaite e ua piihia oia e te Atua, e ua haamau oia i te niu o teie Ekalesia e teie basileia i ni‘a i te fenua nei, no te mea, e parau mau te reira, e te tane e aore ra, te vahine tei faauruhia e te Varua Maitai, e ti‘a ïa ia ite e ia haro‘aro‘a i teie mau mea.

… Ua ora oia e hope noa’tu te mau taviri atoa, te mau oro‘a e te mau ture atoa, i te fariihia e a’na, tei horo‘ahia i te taata i ni‘a i te fenua nei, mai te Metua Adamu e tae roa mai i teie nei tau tuuraa. Ua farii oia i te mau mana e te mau taviri, i raro a‘e i te rima o Mose, no te haaputuputuraa o te utuafare o Iseraela i te mau mahana hopea nei; ua farii oia i raro a‘e i te rima o [Elia] i te mau taviri no te taatiraa i te aau o te mau metua i te mau tamarii e i te aau o te mau tamarii i te mau metua; ua farii oia i raro a‘e i te rima o Petero, Iakobo e o Ioane i te aposetoloraa, e i te mau mea atoa no te reira; ua farii oia i raro a‘e i te rima o Moroni, i te mau taviri atoa e te mau mana i titauhia e te raau a Iosepha i roto i te rima o Epheraima; ua farii oia i raro a‘e i te rima o Ioane Bapetizo i te Autahu‘araa a Aarona, e to’na mau taviri e te mau mana atoa; e te mau taviri e te mau mana atoa no teie tau tuuraa, e aore au e haamâ ia parau e, e peropheta oia na te Atua.¹¹

Aita o Iosepha Semita i ora mai ia Adamu, fatata hoê tauasini matahiti te maoro, ua ora noa râ oia e toru ahuru ma va‘u matahiti. Ua hopoi mai oia i te mau parau no te raau a Iosepha i roto i te rima o Epheraima–te aamu no te nunaa tahito o teie fenua. Na roto i te mana o te Atua ua huri oia i te reira, e ua haapararehia i roto i te mau reo e rave rahi. Taa‘e noa’tu te reira, ua faanahonaho oia i te Ekalesia a Iesu Mesia i te Feia Mo‘a i te mau Mahana Hopea nei i ni‘a i te niu o te mau aposetolo e te mau peropheta, te Mesia ra o Iesu iho te ofa‘i tihi [a hi‘o Ephesia 2:20]. Ua faatoro‘ahia te mau tane i te Autahu‘araa e ua tonohia, mai roto atu i te mau ohipa atoa o te oraraa nei, no te hopoi i te reira Evanelia i to te ao nei. Ua faaara te Atua ia Iosepha Semita e, ua piihia oia no te tope i te ô vine hoê a‘e taime toe hou te taeraa mai o te Tamaiti a te Taata nei [a hi‘o PH&PF 24:19]. Mai taua taime ra, e rave rahi tauasini peresibutero no Iseraela tei tonohia na te ao nei no te poro i te Evanelia… E ti‘a i te taata tata‘itahi ia tai‘o i te mau heheuraa i roto i te Buka no Te Parau Haapiiraa e te mau Parau Fafau, tei horo‘ ahia ia’na i roto i te tau poto o ta’na i ora i te tahuti nei. O te hoê te reira o te mau parau rahi a‘e ta te hoê taata i horo‘a mai i te fetii taata nei. E ere râ i te reira ana‘e, ua faanaho atoa râ oia i te mau oro‘a hiero e te tahi atu â mau ohipa e rave rahi. O vai te ti‘a ia parau e, ua rave oia i te ohipa hau atu i ta Iosepha Semita i rave, i roto i te area poto o ta’na i ora i te tahuti nei ? Ua farii au i to‘u mau oro‘a hiero mai raroa‘e mai i to’na na rima. Ua faahaere mai oia i teie mau oro‘a atoa tei horo‘ahia i te Feia Mo‘a i te mau Mahana Hopea nei. E nehenehe e parau e, e mea maere mau e te umere ho‘i te rahiraa ohipa tei ravehia e a’na.¹²

Tei ia tatou te haamaitairaa i teie nei no te haere i roto i te maramarama o te evanelia tei faaho‘ihia mai.

Te faariro nei au e, te feia o ta te Fatu i heheu i te evanelia a Iesu Mesia, e o ta’na i horo’a te autahu’araa mo‘a e te mana no te faatere i te mau oro‘a o to’na ra fare, e feia haamaitaihia ïa e a’na… Te feruri nei au e, mai te reira atoa ïa tatou i teie mahana; ua farii tatou i te haamaitairaa ia haere na roto i te maramarama, ua farii tatou i te haamaitairaa o te haro‘aro‘araa e te iteraa i te parau mau, te iteraa i te haere‘a e ora ai e e faateiteihia ai i mua i te aro o to tatou Metua e to tatou Atua. Tei roto tatou i te hoê ti‘araa e nehenehe ia tatou ia ite i to’na feruriraa e to’na hinaaro, na roto i ta’na mau tavini te mau peropheta. Ua horo‘a mai te Fatu ia tatou nei, te mau orometua e te mau taata faauruhia, te mau taata tei faauruhia e te Varua e te mana o te Atua; ua faaahu ia ratou i te parau mau e ua faaî ia ratou i te paari no te haapii ia tatou i te mau tau atoa i te haere‘a ta tatou e haere. E haamaitairaa rahi mau te reira.¹³

Ia feruri ana‘e au… i te huru o te taata nei, e ia feruri ana‘e au i to tatou taa‘eraa i te tahi atu mau rahiraa taata, te mana‘o nei au e, e mea ti‘a ia tatou ia haamauruuru i to tatou Taata haamaitai rahi. Ehia rahiraa milioni taata e putuputu nei i roto i te mau fare rau, i te mau fare pureraa katorika, te mau Ekalesia, e te mau fare pure, no te haamori i te Atua, tera râ, te vai ra anei te hoê o te reira rahiraa amuiraa tei haro‘aro‘a i te parau mau, mai te tahi mau peresibutero no te Feia Mo‘a i te mau Mahana Hopea nei tei piihia no te poro i te mau taata o te fenua nei ? Ua roaa anei ia ratou te haro‘aro‘araa i te mau parau tumu o te reira evanelia, te reira faanahonahoraa no te faaoraraa, te evanelia a Iesu Mesia, ia nehenehe ia ratou ia hoê ?

E tena na, eita e nehenehe i te Atua ia faariro i te taata ei hoê mai te mea e, ua rau te huru o to ratou faaroo, e te rauraa o ta ratou mau haapiiraa, tei taa‘e ta te tahi i ta te tahi, mai te vai nei i te ao nei, tera râ, e nunaa haamaitaihia tatou; te mau nei tatou i te mau parau tumu no te amuiraa e te tahoêraa, e na roto i te hapa‘oraa e taamu ia te reira ia tatou te tahi e te tahi e e faariro ia tatou ei hoê.

Na te reira parau tumu i haamaitai e i faati‘amâ i te Feia Mo‘a i te mau Mahana Hopea nei. Ua faaora-papû-hia tatou i te mau arepurepuraa e te mau haafifiraa, te mau haapiiraa hape, te pouri, te hape e te ti‘aturiraa hape tei haapoiri i to tatou feruriraa e tae roa’tu i te taime a faaitehia mai ai i te tamarii a te taata nei e, tei roto ratou i te poiri, inaha, to tatou te reira huru i mutaa ra; hou a tae mai ai te maramarama, e rave rahi o tatou tei nee haere noa na roto i te poiri. Penei a‘e e feia aau parau-ti‘a paha tatou, ua î atoa paha tatou i te mau mana‘o maitai roa e te mo‘a ho‘i, noa’tu râ i te reira, e au te ao nei mai te matapo te huru i te perehahu-noa-raa i te pae fare [a hi‘o Isaia 59:9–11], tae roa’tu i te taime a heheuhia mai ai te îraa o te evanelia. Inaha, aita to tatou e Aposetolo, aita e peropheta, aita e taata faauruhia i roto ia tatou no te ti‘a mai e no te parau mai ia tatou i te ohipa ta tatou e rave e ora ai tatou, e ua titauhia ia tatou ia faaruru i taua mau arepurepuraa ra, taua mau ati ra e taua poiri ra ta te tamarii a te taata nei e farerei nei a ora ai ratou i roto i te mau haapiiraa hape, te mau peu hape, e te mau orometua hape…

Ua ti‘amâ tatou i teie nei mau mea, ua iriti-ê-hia te ata poiri, e ua haamata faahou te maramarama o te parau mau mure ore i te anaana i roto i to tatou aau…

Te parau nei au e, ua riro teie ei hoê o te mau haamaitairaa rahi roa a‘e ta te Atua i horo‘a mai i te tamarii a te taata nei, ia faaitehia te parau mau ia ratou…

Tei hea te tane e aore ra te vahine tei ore i taa i te hoê noa a‘e mea no ni‘a i te Atua e aore ra, no ni‘a i te ao a muri a‘e, tae roa’tu i te taime a heheu mai ai Iosepha Semita i te îraa o te evanelia ? E nehenehe ta‘u e tai‘o i taua mau mea ra i roto i te Bibilia ta tatou e ti‘aturi nei, e e farii nei i teie nei, tera râ, ua haatihia vau i te mau peu tahito o te ao nei, e ta‘u e ore e maramara nei.

I teie nei, te haapiihia nei tatou, i tera taime e tera taime, i te mau parau tumu ti‘a o te evanelia a Iesu Mesia, i te faanahonahoraa no te faaoraraa–te huru oraraa e roaa ai ia tatou te fariiraa a to tatou Metua i te Ao ra. E ere anei te reira i te hoê haamaitairaa i ni‘a a‘e i te mau haamaitairaa atoa ? Ahiri teie mau taata e taa nei i to ratou mau haamaitairaa, eita roa’tu ratou e farerei i te hoê taime pe‘ape‘a. Ahiri teie mau taata e taa nei i to ratou ti‘araa e i to ratou auraa mau i te Atua, e roaa ïa te oaoa rahi ia ratou, e i reira ratou e ite ai e, e taata aroha to tatou Metua i te ao ra, e ua ninii mai oia i te mau haamaitairaa rarahi e te hanahana i ni‘a ia tatou.¹⁴

Te haamaitai nei au i te Atua, o vau e ora nei i teie anotau o te ao nei, e i faaroo to‘u na taria i te haruru o te îraa o te evanelia a te Mesia.¹⁵

Te mau mana‘o tauturu no te tuatapaparaa e te haapiiraa

A feruri i ni‘a i teie mau mana‘o a tuatapapa ai outou i teie pene, e aore ra, a faaineine ai outou i te haapii. No te tahi mau tauturu, a hi‘o i te mau api v-ix.

A hi‘o faahou i te aamu i ni‘a i te mau api 1-3. Eaha tei ere i roto i te oraraa o Robert Mason ? Eaha ta teie aamu e haapii nei no ni‘a i te Taivaraa Rahi e te Faaho‘i-faahou-raa mai o te evanelia ?
A tuatapapa i te mau api 3-5, ma te imi i te mau tapa‘o no te Ekalesia mau a te Fatu. No te aha e mea faufaa ia haamauhia te Ekalesia ia au i te hoê noa iho hoho‘a ?
I roto i te mana‘o o te peresideni Woodruff, eaha te tumu i tupu ai te Taivaraa Rahi ? Eaha te tahi mau mea ta te Taivaraa Rahi i horo‘a mai ? (A hi‘o i te mau api 4-5) Nahea ia ite i te reira mau mea i teie mahana ?
A tuatapapa i te mau api 5-8, ma te imi i te tahi mau mea tei ravehia e te peropheta Iosepha Semita no te Faaho‘i mai i te evanelia. Nahea te reira mau mea ta’na i rave i te faauru i to outou oraraa ?
A tai‘o i te faahitiraa parau tei haamata i raro i te api 6. Nahea tatou ia faaite e, aore tatou i haamâ i te evanelia a Iesu Mesia tei faaho‘ihia mai ?
A hi‘o na i teie na ta‘o, Poiri e maramarama, i ni‘a i te mau api 8-10. Eaha te mea ta outou i apo mai i roto i ta te peresideni Woodruff faaohiparaa i teie na ta‘o ? Eaha te ere i roto i to outou oraraa mai te mea e, aita outou i haapa‘o i te evanelia tei faaho‘ihia mai ?

Te mau papa‘iraa mo‘a: Isaia 29:10–14; Amosa 8:11–12; Moromona 1:13–14; PH&PF 128:19–21