Pene 2

Iosepha Semita: E peropheta, e hi‘o, e e heheu parau

Ua vai haapa‘o noa o Iosepha Semita, te peropheta o teie tau tuuraa, i te mau heheuraa ta’na i farii no te ra‘i mai, na roto i te faaoti-maite-raa i to’na piiraa i faataa-a‘ena-hia i roto i te ao varua e na roto i te taatiraa i to’na iteraa papû i to’na iho toto.

No roto mai i te Oraraa o Wilford Woodruff

Mai te omuaraa mai ihoa a riro mai ai oia ei melo apî no te Ekalesia a Iesu Mesia i te Feia Mo‘a i te Mau Mahana Hopea Nei, e iteraa papû to Wilford Woodruff no te peropheta ra Iosepha Semita. Ua parau oia: « Ua mauruuru rahi roa vau no te mea e peropheta o Iosepha na mua a‘e au a ite atu ai ia’na. Aita roa to‘u e mana‘o pato‘i ia’na. »¹ I te ava‘e eperera 1834, i te area e maha ava‘e i muri a‘e i to’na bapetizo-raa-hia, ua tere atu te taea‘e Wilford Woodruff i Ketelani, Ohio, i reira oia i te farereiraa no te taime matamua roa i te peropheta Iosepha. Ua faati‘a oia i muri a‘e e:

« E mea huru ê rii to‘u farerei-matamua-raa ia’na. Ua ite au ia’na e to’na taea‘e o Hairamu i ni‘a i te hoê tahua; e tapoo tahito roa to’na, e te pupuhi ra oia i ni‘a i te hoê tapa‘o. Ua farerei maua e ua titau manihini mai oia ia‘u ia haere i to’na fare.

« Ua farii au i te titauraa e ua hi‘ohi‘o maitai au ia’na, ia ite e, eaha ta‘u e nehenehe e haapii mai. A haere atu ai au i to’na ra fare, ua faaite oia e, o te taime matamua ïa teie o ta’na i rave no te faaoaoaraa, e mea maoro i teie nei.

« I muri noa‘e i to maua taeraa i to’na fare, ua haere atu oia i te tahi atu piha e ua afa‘i mai i te hoê iri ruto, e ua na ô mai ra, ‘E te taea‘e Woodruff, te hinaaro nei au ia tauturu oe ia‘u ia faafaufaa i teie iri, ’ i reira ua iriti au i to‘u pereue, ua rave i te ohipa e ua tauturu ia’na, e ua oaoa vau i te na reiraraa… Ua hinaaro oia i te tuu i teie iri ruto i ni‘a i te parahiraa o to’na pereoo.

« O teie ïa to‘u farerei-matamua-raa i te peropheta Iosepha Semita, te Hi‘o rahi o teie tau tuuraa hopea.²

Ia haamana‘o oia i teie ohipa o tei tupu, ua parau te peresideni Woodruff, e inoino paha te tahi mau taata ia ite i te hoê taata faatere o te Ekalesia ia rave i teie mau huru ohipa. Tera râ, na roto i ta’na iho mau hi’oraa ia Iosepha Semita, i roto i te mau vahi taata e i roto i te vahi mo’emo’e, ua haapuai ïa te reira i to’na iteraa papû no ni‘a i te misioni a te peropheta. Mai te omuaraa mai ïa o taua mau mahana ra i Ketelani e tae noa mai i te taparahi-raa-hia o te peropheta 10 matahiti i muri mai, ua tavini noa o Wilford Woodruff ma te haapa‘o i piha‘i iho ia Iosepha Semita, noa’tu e ua taiva te mau hoa e te mau hoa tavini e vai ra i te Ekalesia. Ua parau oia e, « Noa’tu te mau taivaraa o tei tupu, te mau fifi e te mau pe’ape’a o tei fariihia e matou, … aita roa e faahemaraa i tupu ia‘u ia feaa i teie ohipa e aore ra ia feaa e peropheta o Iosepha Semita na te Atua. »³

I te 19 no mati 1897, i te 90raa o to’na matahiti, ua faaharuharu o te peresideni Woodruff i to’na iteraa papû. O oia ia te peresideni matamua o te Ekalesia o tei rave i te reira. I roto i ta’na parau poro‘i poto noa ua faaohipa oia i te rahiraa o te taime no te faaite papû i te misioni a te peropheta Iosepha, ma te faahaamana‘o i te oraraa roa i roto i te taviniraa o to’na hoa e taata faatere atoa ho‘i:

« Te faaite nei au i to‘u iteraa papû e peropheta mau o Iosepha Semita na te Atua, o tei faatoro‘ahia e te Atua no te haamau i te niu o Ta’na Ekalesia e to’na Basileia i te tau tuuraa hopea e te îraa o te mau tau… Ua pûpû te peropheta Iosepha i to’na oraraa no te parau a te Atua e te iteraa papû no Iesu Mesia, e ei taata o tei taparahihia e faakeronohia oia i mua i te aro o te Atua e te Arenio. I roto i te taato‘araa o to’na mau iteraa papû o ta’na i horo’a ia matou, ua ite papûhia te mana o te Atua i roto i te peropheta Iosepha. »⁴

Te mau haapiiraa a Wilford Woodruff

I te vahi taata e i te vahi mo’emo’e, ua riro te peropheta Iosepha Semita ei taata aau here, aroha, haapa‘o, e te parau ti‘a.

Ua ratere au e rave rahi tauasini kilometera na muri iho ia Iosepha Semita. Ua ite au i te huru o to’na aau.⁵

Ua tupu te mana‘o oaoa rahi roa i roto ia‘u i te mau mea o ta‘u i ite no ni‘a i te taea‘e Iosepha, no te mea i roto i te mau ohipa o ta’na i rave i te vahi taata e i te vahi mo’emo’e, ua mau oia i ni‘a ia’na te varua o te Mana Hope, e ua faaite oia i te huru rahi o te hoê varua o ta‘u i ore i ite a‘e nei i roto i te hoê atu taata.⁶

Ua ite oia i te mau mea mure ore e ua mihi rahi to’na aau no te maitai o te utuafare o te taata nei.⁷

E faaamui te taea‘e Iosepha i te taato‘araa o te utuafare taata i roto i te parau tumu no te faaoraraa ahiri e te mau ra oia i te mana no te rave i te reira.⁸

Te tau tuuraa o ta’na i piihia ia arata‘i o te reira ïa te mea hau roaa‘e i te rahi o tei horo‘ahia mai i te taata nei; e ua titauhia te hoê taata mai ia’na ia ti‘a i te upoo o te reira–e taata o tei vai parau ti‘a noa i mua i te Atua e i to’na mau taea‘e; o tei riro ei hi‘o e ei heheu parau, e o tei mau i te faaroo i te Atua o te ore roa e haaparuparu e aore ra e feaa, ua faahaere tamau noa râ oia ia’na iho i mua e ua faaitoito ia vetahi ê ia haere i mua i roto i te ohipa rahi e vai ra i mua ia ratou.⁹

Ua faatoro‘a ateahia o Iosepha Semita no te faati‘a i te ohipa a te Atua i te mau mahana hopea nei.

Ua tape‘a-noa-hia o Iosepha Semita i roto i te ao varua e rave rahi tauasini matahiti, ia fanauhia oia i te tahuti nei i te taime tano, e ia faauruhia oia e te Atua, ia farereihia oia e Ana, e ia faataa e ia faaineinehia oia no te misioni i horo‘ahia i roto i to’na na rima.¹⁰

Ua ma‘itihia o Iosepha Semita e te Fatu na mua i fanauhia ai, mai ia Ieremia. Ua parau te Fatu ia Ieremia– « Aita oe i hamanihia e au i roto i te opu, i ite ai au ia oe; e aita oe i fanau, i faataahia’i oe e au; e ua haapa‘ohia oe e au, ei peropheta na te mau fenua. »[Ieremia 1:5.] Ua faauehia oia ia faara i te mau taata e noho ra i Ierusalema i ta ratou mau peu iino. Ua mana‘o oia e, e hopoi‘a teimaha te reira, ua rave râ oia mai tei faauehia ia’na. No reira te parau nei au mai te reira atoa no Iosepha Semita, ua farii oia i to’na piiraa na mua a‘e i te haamau-raa-hia te ao nei, e ua tae mai oia i te taime i faataahia e te Fatu no te faati‘a i teie ohipa i ni‘a i te fenua nei.¹¹

Ua haapiihia te peropheta Iosepha Semita e te Atua, e Iesu Mesia, e te Varua Maitai, e te mau melahi no te ra‘i mai.

Ua parauhia o Iosepha Semita i te tahi mau taime ei taata aita i ite i te tai‘o, e taata poiri. E tamaiti oia na te hoê taata faapu, e mea ha‘iha‘i roa te rave‘a no te haapiiraa. Eaha te buka iti o ta’na e mau ra no te heheu i te îraa o te evanelia i to te ao nei ? Aita roa hoê a‘e, maori râ ua haapiihia oia na roto i te utuuturaa a te mau melahi no te ra‘i mai, na te reo o te Atua e na te faaururaa e te mana o te Varua Maitai. Te mau parau tumu o tei heheuhia i to te ao na roto mai ia’na e parau mau ïa mai te terono o te Atua. Ua haamata a‘ena te huru maitai o te reira i te faariihia i ni‘a i te fenua nei, e e haere noa â i te rahiraa e tae noa’tu i te taeraa mai o te Tamaiti a te Taata.¹²

Ua arata‘ihia o Iosepha Semita e te Varua Maitai, e ua utuutuhia oia i reira, ei pahonoraa i ta’na mau pure, na te Metua e te Tamaiti; e ua parau mai te Metua ia’na, « O ta‘u Tamaiti here teie, a faaroo Ia’na.¹³ » [A Hi‘o Te Aamu o Iosepha Semita 1:17.]

Mai te au ta‘u i ite, aita roa vau i tai‘o a‘e nei i roto te tahi vahi, no ni‘a i te hoê â mana o tei faaitehia mai i te mau tamarii a te taata i roto i te tau tuuraa tata‘itahi, o tei faaitehia i te peropheta a te Atua i te faanahonaho-raa-hia teie Ekalesia, i te taime a fâ mai ai te Metua e te Tamaiti i te peropheta Iosepha ei pahonoraa i ta’na pure… E faaururaa faufaa rahi teie, o tei ore roa â i faaitehia na i roto i te tahi atu tau tuuraa o te ao nei, o ta te Atua i horo‘a mai no ni‘a i Ta’na ohipa. No reira, i roto i ta’na faanahonahoraa, ua tauturuhia te peropheta a te Atua na te mau melahi o te ra‘i. O ratou ta’na mau orometua, e te mau mea atoa o ta’na i rave, e te mau mea atoa o ta’na i rave faaoti, mai te haamataraa mai â, mai taua mahana ra e tae roa mai i te taime o to’na taparahi-raa-hia, e heheuraa ana‘e ïa no ô mai ia Iesu Mesia ra.¹⁴

E parau vau ia‘u iho e aita roa vau e ti‘aturi e te vai ra te hoê taata… o tei tahoê piri roa e o tei tapiri i te Atua te Metua, e te Atua te Tamaiti, e te Atua te Varua Maitai, maori râ te peropheta Iosepha Semita. Ua vai te mana no te heheuraa i ni‘a ia’na mai te mahana mai â a piihia ai oia no te farii i te Autahu‘araa e tae noa’tu i to’na taparahi-raa-hia. Ua vai te mana no te faaururaa i ni‘a ia’na i te mau mahana atoa. Ua faaite-maite-hia te reira i roto i te mau heheuraa e vai ra i roto i te buka o te Parau Haapiiraa e te mau Parau Fafau. I te taime e hinaaro ai te Fatu e a‘o ia’na, o Iosepha Semita, na roto i to’na iho vaha, ua a‘o oia ia’na iho; e aita oia e feaa i te horo‘a i te parau a te Fatu, noa’tu e no te a‘o ia’na iho. Ua vai hoê noa ona e te Fatu; ua vai hoê noa e te Varua Maitai; ua vai hoê noa e te mau melahi o te ra‘i.¹⁵

E nehenehe e parau e, ua haatihia taua taata ra i te mau tohuraa, te mau heheuraa, e te mau ture a te Manahope, e ua titauhia ia haapiihia oia, eiaha na te taata, eiaha atoa na te hinaaro o te taata, ua titau râ oia i te mau melahi na te Atua ia haere mai e haapii ia’na; ua titauhia i te mau heheuraa na te Atua ia haapii ia’na, e ua haapiihia oia e rave rahi matahiti na roto i te orama e te mau heheuraa, e na te mau melahi mo’a tei tonohia mai mai e te Atua mai i te ra’i mai, no te haapii ia’na, e no te arata’i ia’na, e no te faaineine ia’na ia haamau i te niu o teie Ekalesia.

… Aita o Iosepha iho e nehenehe ia taa maitai, maori ua tapo- ‘ihia oia e te mau orama o te ora mure ore, o te faufaa ho‘i o te ohipa o te niu o ta’na i haamau. Na roto e rave rahi mau mea e auhia, i te taime i matara ai to’na feruriraa, ua nehenehe ia’na ia taa maitai i te mau hinaaro o te Atua; e ua vai faati noa teie mau heheuraa ia’na e ua arata‘i noa i to’na mau haere‘a.¹⁶

Noa’tu te mau ati e te mau hamani-ino-raa, ua tape’a maite noa te peropheta Iosepha Semita i to’na iteraa papû.

I to Iosepha faaiteraa i to te ao keretetiano i te mau parau tumu e ua aparau te Atua ia’na, ua faaaraara oia i to ratou mau mana‘o faaino; ua aro oia i te mau peu o ta ratou e mau ra no ô mai i to ratou mau metua o tei ore i ite i te Atua e i to’na mau e‘a, teie mau peu o tei tae mai i to ratou tau na roto mai e rave rahi mau u‘i, o te ore roa e tu‘ati ra i ni‘a i te parau mau no te faaora o te ra‘i ra.¹⁷

Ua faaino te taato‘araa o te ao ia’na–te tahu‘a e te nunaa. Eaha te tumu ? No te mea noa ua riro o Iosepha mai te tahi atu mau peropheta e te mau aposetolo. Ua faati‘a mai oia hoê tau tuuraa o te evanelia a Iesu Mesia, o te farerei ra i te mau peu a te nunaa–e mau peu o tei pou mai mai tera u’i e tera u’i.¹⁸

Ua riro noa to’na oraraa ei oraraa fifi, ua farerei noa oia i te pato‘ iraa na roto mai i te mau vahi atoa, mai roto mai ihoa râ i te mau tahu‘a o taua tau ra; ua faaoroma‘i râ oia i teie mau mea e ua mauruuru rahi roa oia i ta’na mau ohipa e tae roa’tu i te taime ua faaoti oia i to’na iteraa papû i te tino nei, i muri a‘e i to’na rohiraa e nau ahuru ma maha matahiti no te reira. Ua faaruru oia i te mau tamataraa e rave rahi; aita râ oia i haaparuparu noa a‘e aore ra i oto, noa’tu ua ti‘a ia’na ia aro atu i te mau enemi i rapae au e te mau enemi i roto i te Ekalesia. Aore roa ona i haamo‘e noa a‘e i te hanahana o to’na piiraa e te huru mo‘a o teie ohipa; ua parau e ua faaite hua râ oia i mua i te mau nunaa e i roto i te mau huru atoa o te mau mea e tupu ra e– e peropheta oia na te Atua, te hi‘o e te heheu parau o te tau tuuraa hopea.¹⁹

Ua faaite papû te mau feruriraa ato‘a o to’na aau, te mau mana‘ o ato‘a o to’na feruriraa, e te mau mea atoa o tei tupu i roto i to’na oraraa, e ua opua papû oia i te haamau i te parau tumu o te parau mau, e tae noa’tu i te faatutiaraa i to’na oraraa.²⁰

Ua parau te Fatu ia Iosepha e tamata oia ia’na no te ite e haapa‘o noa anei oia i ta’na fafauraa aore râ aita, e tae noa’tu i te poheraa. Ua tamata-mau-â-hia oia; e, noa’tu e ua pato‘i te ao taato‘ a ia’na, e ua titauhia ia’na ia ape i te mau haavareraa a te mau hoa haavare, noa’tu ua riro to’na oraraa taato‘a ei tahua no te fifi, te hepohepo e te mana‘ona‘oraa, tera râ i roto i to’na mau ati atoa, to’na mau tape‘a-raa-hia i te fare auri, e i mua i te mau peu tahae e te ha‘iriiri o ta’na i farii, ua vai parau-ti‘a-noa oia i mua i to’na Atua e i to’na mau hoa.²¹

No to’na ite i te hopearaa o te Ekalesia, ua faaineine te peropheta Iosepha Semita i te Tino Ahuru Ma Piti Aposetolo e ua horo‘a ia ratou te mana no te faahaere i te ohipa a te Fatu i mua.

Ua faati‘ahia te Ekalesia i te 6 no eperera 1830, e ono ana‘e melo, tera râ e faaroo to Iosepha Semita e riro mai teie basileia o te haamata ra, mai te hoê huero tinapi, ei Ekalesia e ei basileia rahi i ni‘a i te fenua nei.²²

Ua riro o Iosepha Semita, mai ta’na i faaite u’ana, ei peropheta na te Atua, ei hi‘o e ei heheu parau. Ua haamau oia i te niu o teie Ekalesia e basileia, e ua ora maoro oia ia nehenehe ia’na ia horo‘a atu i te mau taviri o te basileia i te mau peresibutero o Iseraela, te ahuru ma piti aposetolo. I te tau to‘eto‘e hopea o to’na oraraa, ua faaea oia e nau toru aore râ e maha ava‘e i piha- ‘i iho i te tino ahuru ma piti aposetolo, no te haapii ia ratou. E ere e tau hora noa o ta’na i faaohipa no te haapiiraa ia ratou i te mau oro‘a o te evanelia, e rave rahi râ mau mahana, mau hepetoma, e mau ava‘e o ta’na i rave no te haapiiraa i te reira ia ratou e te tahi atu â mau tuhaa o te ohipa no te basileia o te Atua.²³

I te tahi taime, na mua a‘e i to’na poheraa, ua faauruhia te peropheta Iosepha e te Fatu ia faaoioi i to’na revaraa mai teie oraraa atu. Ua faaitehia mai te reira na roto e rave rahi mau mea; i roto ihoa râ i te mana‘o hepohepo o tei iteahia i te horo‘araa i ni‘a i te tino ahuru ma piti te taato‘araa o te mau taviri e te mana o te Autahu‘araa Mo‘a o ta’na i farii. Ua faaite oia i te vahi mo‘emo‘ e e i te vahi taata e, e mau taata aravihi maitai ratou o tei mau i te mau mauhaa, e ua faauta oia i ni‘a i te tapono o te tino ahuru ma piti aposetolo te hopoi‘a no te basileia o te Atua.

O vau, o Wilford Woodruff, ei taata hopea o te ora nei i te tahuti nei e o tei ite i te tupuraa o taua ohipa ra, te mana‘o nei au e, e hopoi‘a ta‘u i te Ekalesia a Iesu Mesia i te Feia Mo‘a i te Mau Mahana Hopea Nei, e i te Utuafare o Iseraela, e i to te ao ato‘a, ia faaite i teie iteraa papû hopea i to te mau nunaa ato‘a, e i te tau to‘eto‘e o te matahiti 1843-4, ua pii te peropheta Iosepha Semita i te ahuru ma piti Aposetolo ia haaputuputu mai i te Oire no Navu, e i roto i te roaraa e rave rahi mau mahana, ua horo‘a oia ia matou to matou oro‘a hiero, e ua haapii ia matou i taua mau parau tumu hanahana ra o ta te Atua i heheu mai ia’na. E i te hoê taime, ua ti‘a oia i ropu ia matou e au ra e toru hora te maoro, no te faaite ia matou te tau tuuraa hopea e te rahi ho‘i o ta te Atua i pûpû mai i roto i to’na rima no te faaohipa i ni‘a i te fenua i teie mau mahana hopea nei. Ua î roa te piha i te maramarama mai te auahi ama ra; ua faaahuhia te peropheta i te mana o te Atua, e ua anaana e ua maramarama roa to’na aro, e ua faaoti oia i taua pororaa ra, o te-ore-roa-e- aramoinahia i teie ao e tae noa’tu i te ao mure ore, na roto i te reo i muri nei:

« E te mau taea‘e e, ua oto rahi to‘u aau e te mata‘u e e rave-êhia’tu paha vau mai te fenua atu nei e te mau taviri atoa o te basileia o te Atua o te vai nei i ni‘a ia‘u, ma te ore e haamau te reira i ni‘a i te upoo o te tahi atu mau taata. Ua taati te Atua i ni‘a i to‘u upoo te taato‘araa o te mau taviri no te basileia o te Atua o te titauhia no te faanahonaho e no te faati‘a i te Ekalesia, o Ziona, e te basileia o te Atua i ni‘a i te fenua nei, e no te faaineine i te Feia Mo‘a no te taeraa mai te Tamaiti a te Taata. I teie nei râ, e te mau taea‘e, te haamauruuru nei au i te Atua no te mea ua ora vau no te ite i te mahana i nehenehe au e horo‘a atu ia outou to outou mau oro‘a hiero, e ua taati au i teie nei, i ni‘a i to outou upoo, te taato‘araa o te mau mana o te mau autahu‘araa a Aarona e a Melehisedeka e te aposetoloraa e te taato‘araa o te mau taviri e te mau mana e titauhia, o ta te Atua i taati i ni‘a ia‘u; e te faauta atu nei au i teie nei te taato‘araa o te ohipa, te hopoi‘a e te utuuturaa o teie Ekalesia e basileia o te Atua i ni‘a i to outou mau tapono, e te faaue atu nei au ia outou na roto i te i‘oa o te Fatu o Iesu Mesia ia faaetaeta i to outou mau tapono, e ia amo i teie Ekalesia e basileia a te Atua i mua i te ra‘i ra e te fenua, e i mua i te Atua, te mau melahi e te mau taata; e ia ore outou ia na reira e faahapahia ïa outou.

Ua ura taua ihoa Varua ra tei faaî i te piha i taua taime ra i roto i to‘u ouma a papa‘i ai au i teie iteraa papû.²⁴

Ua taati te peropheta Iosepha Semita i to’na iteraa papû i to’na ra toto.

Ua ora o Iosepha Semita e tae noa’tu i te taime ua horo‘a oia i to’na iteraa i to te ao, e i te taime a taati ai oia i te taato‘araa o te mau taviri, te mau mana e te mau haamaitairaa i ni‘a i te upoo o Brigham Young e to’na mau taea‘e; i te taime a haamau ai oia i teie nei mau taviri i ni’a i te fenua nei ia ore ratou e iriti-faahouhia e a muri noa’tu; ia rave oia i te reira, e ia faahaere mai i taua buka ra, taua buka no te heheuraa, te poro’iraa o te faataa i te hopea o teie nei u‘i taatoa- te Ati Iuda, te Edene, Ziona e Babulonia, te mau nunaa atoa o te fenua nei, ua taati oia i taua iteraa papû i to’na ra toto i roto i te Fare Tapearaa no Karateti, i reira to’na ora e te ora a to’na ra taea‘e Hairamu i ravehia’i e te rima o te mau taata ino e te atua ore.²⁵

E tia ia‘u ia parau e ua maere au i taua taime ra no te aha te peropheta e to’na ra taea‘e Hairamu i faatiahia’i ia rave-ê-hia’tu mai rotopu atu ia matou. Ua faatoro‘ahia râ o Iosepha Semita, na roto i te faaueraaa a te Atua e na roto i te mana e te mau heheuraa no te ra‘i e ua haamau i te niu o teie nei tau tuuraa faahiahia e te îraa o te mau tau. Ua faahaerehia mai oia i roto i te ao nei e ua faatoro‘ahia no te faanahonaho i teie nei Ekalesia a te Mesia no te taime hopea i ni‘a i teie nei fenua, no te faaineine i te reira no te taeraa mai o te Tamaiti a te Taata nei. I muri a‘e i to’na poheraa, i roto i to‘u nei feruriraa, ua papû ia‘u e, ua faatoro‘ahia oia ia pohe-ia haamanii i to’na ra toto ei iteraa papû i to teie nei tau tuuraa evanelia.²⁶

Ua tape‘a noa o Iosepha, ua haapa‘o e ua itoito i roto i te iteraa o Iesu e tae noa’tu i te mahana o to’na poheraa.²⁷

Ua faaite oia i to’na iteraa papû, ua papa‘i te reira i roto i te buka, e ua taati i te reira i to’na ra toto e ua horo’a i to’na iho ora, e te vai mana noa ra â taua iteraa ra i teie nei mahana i ni‘a i to te ao atoa nei, e e vai noa mai â e tae noa’tu i te hopea.²⁸

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v-ix.

Eaha te mea taa ê i roto i te omuaraa a Wilford Woodruff no ni‘a ia Iosepha Semita ?(A hi‘o i te mau api 13-14.) Eaha ta teie nei faatiaraa e haapii mai nei no ni‘a i te peropheta ra Iosepha Semita ?
A huri atu i te mau api 14-15, e a hi‘opo’a faahou i te tuhaa no ni‘a i te huru o Iosepha Semita. No te aha i riro ai ei tautururaa te iteraa i te huru o Iosepha Semita i roto i te vahi mo’emo’e e te vahi taata ? Nahea to tatou huru oraraa i te vahi mo’emo’e e tauturu ai i to tatou aravihi i te haapii e i te arata‘i ?
Eaha tei haaputapû ia outou no ni‘a i te rave‘a o ta Iosepha Semita i rave no te haapii i te îraa o te evanelia ? (A hi‘o i te mau api 15-17).
Nahea to te peropheta Iosepha pahonoraa’tu i mua i te tamataraa ? (A hi‘o i te api 18). Nahea ta tatou e nehenehe ai e fana‘o na roto i to’na hoho‘a ?
No te aha te peropheta Iosepha Semita i horo‘a ai i te mau taviri no te basileia i na Ahuru ma Piti Aposetolo ? (A hi‘o i te mau api 18-21). No te aha e mea faufaa roa no tatou ia ite e ua tupu ihoa te reira ?
A tai‘o faahou i te mau parau a te peresideni Woodruff no ni‘a i te poheraa o Iosepha Semita (api 21). Eaha to outou mau mana‘o a feruri ai outou i te tusia ta Iosepha e Hairamu Semita i rave ?
Eaha te mea i haaputapû ia outou a tai‘o ai outou i te mau parau a te peresideni Woodruff no ni‘a i te peropheta ra Iosepha Semita ?
No te aha e mea faufaa rahi roa ia farii i te hoê iteraa papû no ni‘a i te peropheta ra Iosepha Semita ? Eaha ta tatou e nehenehe e rave no te haapaari i to tatou iteraa papû no ni‘a i te peropheta ?

Te mau papa‘iraa mo‘a: 2 Nephi 3:6–15; PH&PF 5:10; 135; Te Aamu o Iosepha Semita

Prophet Joseph Smith — Ua parau te peresideni Woodruff no ni‘a i te peropheta Iosepha, « I roto i ta’na ohipa i mua i te taata e i i to’na iho utuafare ua afai oia na muri ia’na te Varua o te Atua Mana Hope, e ua faaite oia i te hoê maitai-rahi-raa o te aau tei ore roa e itehia e au i roto i te tahi atu taata »

stained glass — Ua « utuutuhia o Iosepha Semita, ei pahonoraa i ta’na mau pure, e te Metua e te Tamaiti »

Joseph Smith teaching — Tei reira o Elder Wilford Woodruff i te taime a horo’a’i te peropheta ra Iosepha Semita i te mau taviri no te basileia i te Tino Ahuru ma Piti Aposetolo ra.