Pene 3

Te tau tuuraa no te îraa o te mau tau

Ei Feia Mo‘a i te mau Mahana Hopea nei, e hopoi’a mo‘a ta tatou no te tautururaa i te paturaa i te basileia o te Atua i roto i teie nei tau tuuraa hopea.

No roto mai i te Oraraa o Wilford Woodruff

I te mau taime taa ê i roto i te aamu o te ao nei, ua haamau te Fatu i te mau tau tuuraa evanelia. I roto i te tau tuuraa tata‘itahi, ua heheu mai Oia i Ta’na evanelia na roto mai i te hoê e aore ra e hau atu mau tavini o tei ma‘itihia. O Iosepha Semita te mauhaa a te Fatu o tei haamau i te tau tuuraa hopea nei, o tei piihia i roto i te mau papa‘iraa mo‘a « te tau tuuraa o te îraa o te mau tau » (Ephesia 1:10; PH&PF 128:20).

I te tau mahanahana no te matahiti 1834, ua haere atu o Wilford Woodruff i te hoê pureraa autahu‘araa i Ketelani, Ohio. I taua pureraa ra, ua haamata oia ia taa i te hopearaa o te Ekalesia i roto i teie nei tau tuuraa evanelia. Ua faati‘a oia i muri mai:

« Ua pii te peropheta i te feia ato‘a o tei mau i te Autahu‘araa ia putuputu i roto i te fare haapiiraa iti e vai ra i reira. E fare iti na‘ina‘ i noa, e 4 metera tuea te rahi. Ua nehenehe ra oia i te farii i te taato‘araa o te Autahu‘araa a te Ekalesia a Iesu Mesia i te Feia Mo‘a i te Mau Mahana Hopea Nei e vai ra i te oire no Ketelani… O te reira te taime matamua i ite ai au ia Oliver Cowdery, e i faaroo ai au ia’na ia paraparau; te taime matamua ato‘a i ite ai au ia Brigham Young e ia Heber C. Kimbal, e nau taea‘e Paraita e piti [o Orson e o Parley], e o Orson Hyde e e rave rahi atu â mau taata. Aita e Aposetolo i taua taime ra i roto i te Ekalesia, o Iosepha Semita e o Oliver Cowdery ana‘e ra. I to matou haaputuputuraa, ua pii te peropheta i te mau peresibutero o Iseraela ia faaite i te iteraa papû no ni‘a i teie ohipa. Ua paraparau te feia o ta‘u i faahiti i ni‘a nei, e te tahi ato‘atu feia o ta‘u i ore i faahiti te io‘a, ua faaite ato‘a ia i to ratou mau iteraa papû. I te otiraa ratou i te paraparau, ua parau te peropheta », E te mau taea’e, ua haapuai e ua haapii rahi roa to outou mau iteraa papû ia‘u i teie pô, te hinaaro nei râ vau e parau atu ia outou i mua i te Fatu, e aita to outou ite no ni‘a i te mau hope‘ araa o teie Ekalesia e basileia i hau atu i to te hoê aiû i ni‘a i te turi avae o to’na metua vahine. Aita outou e haro‘aro‘a ra i te reira. « Ua hiti mahuta vau i te reira. Ua parau oia » e pŭpŭ iti na‘ina‘i noa o te Autahu‘araa o ta outou e ite nei i teie pô, tera râ e faaî te Ekalesia i te pae apatoerau e te pae apatoa o te fenua Marite–e faaî oia i te ao taato‘a nei. »¹

Ua horo‘a o Wilford Woodruff i to’na oraraa no te patu i te basileia o te Atua, e ua farii noa oia i te arata‘iraa no ô mai ia Iosepha Semita ra, e tae noa’tu i muri mai i te poheraa o te peropheta. Ua faaite oia no ni‘a i te hoê orama o ta’na i farii e te aparau ra oia ia Iosepha Semita: « Ua ite au ia’na i te pae opani o te hiero i te ra‘i ra. Ua haere mai oia e ua parau mai ia‘u. Ua na ô mai ra ia‘u e eita e nehenehe ia’na ia faaea no te aparau ia‘u no te mea te rû ra oia. Te taata o ta‘u i farerei i muri iho o te Metua Tane Semita ia [Iosepha Semita papa.]; aita o’na i paraparau mai ia‘u no te mea te rû ra oia. Ua farerei au i te afaraa o te tatini o te mau taea‘e o tei mau na i te mau ti‘araa teitei i ni‘a i te fenua nei, e aita roa hoê a‘e o ratou i faaea noa a‘e no te aparau mai ia‘u no te mea te rû ra ratou. Ua maere roa vau. Ua ite faahou â vau i te peropheta i tera e i tera taime e ua noaa ia‘u te hoê taime ia ani atu ia’na i te hoê uiraa.

« Ua na ô atu ra vau, i teie taime, te hinaaro nei au e ite e, eaha oe e rû noa ai. I roto i te taato‘araa o to‘u oraraa, ua rû noa vau; e te mana‘o nei au eita vau e rû faahou ia tae ana‘e au i te basileia o te ra‘i, mai te peu e e tapae au. »

« Ua parau mai o Iosepha e: « E faaite atu vau ia oe, e te taea‘e Woodruff. Te mau tuuraa tata‘itahi o tei farii i te autahu‘araa i ni‘a i te fenua e o tei haere atu i roto i te basileia tiretiera, e tuhaa ohipa ïa tei faataahia na’na ia rave no te faaineine ia ho‘i i te fenua na muri iho i te Faaora ia haere oia e faatere i te fenua. E taime rahi roa ta te mau tuuraa tata‘itahi no te rave i teie ohipa. Aita râ tatou. O tatou te tuuraa hopea, e mea rahi roa te ohipa e ti‘a ia faaotihia, e e titauhia ia tatou ia rû ia nehenehe ia faaotihia te reira.²

Te mau haapiiraa a Wilford Woodruff

Ua ite te Fatu e ta’na mau peropheta i teie tau tuuraa na mua atu i te hamaniraahia te ao.

Mai te tau o te metua Adamu e tae roa mai i te tau o Iesu, ua vai te hoê hi‘oraa, mea aano anei e aore ra mea iti anei, o te mau taata ato‘a o tei faaurŭhia, i te tau tuuraa rahi e te hopea o te îraa o te mau tau, i reira te Fatu e faatoro ai i to’na rima no te faaineine i te fenua e te nunaa taata no te taeraa mai te Tamaiti a te Taata e no te hoê faatereraa ti‘a.³

Te mana‘o nei au e te ohipa… o tei tupu, mai te taime i faati- ‘ahia ai teie Ekalesia, te faati‘a ra ia i te opuaraa a to tatou Metua i te Ao ra, –taua opuaraa ra o tei faatoro‘ahia mai mua’tu i te faatumuraa o te ao. Aita’tu e tau tuuraa o tei tia‘i maorohia ma te anaanatae rahi e te taato‘araa o te mau peropheta a te Atua e te mau taata faauruhia …

A ite ai oia teie tau na roto i te orama, te faaohipa ra o Isaia i te reo puai mau no te horo‘a i to’na mau mana‘o no ni‘a i te reira. I te hoê taime ua na ô oia e « A himene, e te mau ra‘i e; a oaoa, e te fenua e; e te mau mou‘a, ia puroro roa mai te himene ia outou; ua haamahanahana mai Iehova i to’na ra taata; e to’na taata i roohia e te ati ra, e aroha mai oia ia ratou. « Te parau nei râ Ziona e, Ua faarue mai Iehova ia‘u; e ua ore tau Fatu ua manao mai ia‘u. » « E moe anei te aiû i te metua vahine mau iho; e aitâ tura e ite i te aroha i te tamaiti no to’na iho opu ?, parau maira te Fatu »E » « e na reira te hoê vahine », Ona ra eita ia o Ziona e moehia ia’na. Te parau faahou ra oia « Ua papai haamau vau ia Ziona i nia i tau apu rima, e te vai noa maira to’na mau patu i mua ia‘u nei. » [ A Hi‘o ia Isaia 49:13–16.]

I teie nei ua vai teie Ziona i mua i To’na aro mai mua’tu i te faatumuraa o te ao.⁴

Aita te Fatu i hamani i te fenua na roto i te haapa‘oraa ore; aita oia i rave noa a‘e i te hoê o ta’na ohipa na roto i te haapa‘oraa ore. Ua hamanihia te fenua no te tahi mau opuaraa papû maitai; e hoê o teie mau opuaraa o ta’na ia faaoraraa hopea e te haamauraa i ta’na faatereraa e to’na basileia i ni‘a i te fenua i te mau mahana hopea nei, no te faaineine i te fenua no te faatereraa a te fatu o Iesu Mesia, o oia o tei ti‘a ia faatere ra. Ua tae mai taua tau ra, te vai ra taua tau tuuraa i mua ia tatou, te ora nei tatou i roto i te reira tau.⁵

Aore roa e mea e nehenehe ia tape‘a i te Ekalesia ia tapae i to’na hope‘araa.

Ua tupu noa teie Ekalesia i te rahi. O oia ana‘e te Ekalesia parau tia i te ao paatoa nei. Tei mua to’na aamu i to te ao paatoa. Ua tamau noa oia i te tupu e i te rahi mai te mahana i faati‘ahia ai e tae noa mai i teie nei… ua faataahia oia e te Atua Hanahana Roa ia ti‘a i ni‘a i te fenua ma te puai, te hanahana e te hau, mai ta te mau peropheta a te Atua i ite i roto i to ratou tau e te u‘i. O teie te basileia o ta Daniela i ite, e tamau â oia i te tere e tae noa’tu i te taime e î ai te ao paatoa i te reira [ a hi‘o Daniela 2:34-35, 44–45; PH&PF 65:2].⁶

Te ti‘aturi nei matou e faaineine teie Ekalesia i te e‘a no te taeraa mai te Mesia no te faatere ei arii, e riro mai teie Ekalesia ei basileia o te Atua, o ta te mau keretetiano e pure nei ia tae mai oia; e e haapa‘ohia te hinaaro o te Atua i te fenua nei mai tei te ao atoa ra [ a hi‘o Mataio 6:10].⁷

Aore roa e mana i ni‘a i te aro o teie fenua o te nehenehe e haaparari i teie Ekalesia. No te aha ? No te mea te mau ra te Atua ia’na i roto i To’na rima. O ona te Fatu o te reira, e ua fafau oia na roto i te vaha o te mau peropheta e rave rahi, e vai tamau noa oia.⁸

I to ratou haapoheraa ia Iosepha e o Hairamu aita roa ratou i tinai i te »Momoni », aita ratou i tinai i te faaroo i te Atua, aita ratou i tinai i te ti‘aturi e te aroha, aita ratou i haamou i te mau oro‘a o te fare o te Atua, e te mana o te Autahu‘araa Mo‘a. Ua faataa te Atua i te ao ra i teie mau mea.⁹

Te haere ra te basileia o te Atua i mua; aita ra e haere ra i muri.¹⁰

Tei hea te Feia Mo‘a e aore ra te tahi atu taata o tei ite a‘e nei i teie Ekalesia aore ra basileia i te haereraa i muri ?… Noa’tu te huru o te mau ohipa tei tupu ia tatou, ua haere tamau noa teie basileia i mua e i te rahiraa, i te mau mahana atoa e tae noa mai i teie hora. E haere anei oia i muri ? Eita, e eita roa. Ua papai haamauhia teie Ziona a te Fatu, e to’na nehenehe atoa, to’na mana e te hanahana i nia i te apu rima o te Atua Hanahana, e te vai noa ra oia i mua i to’na aro, ua haamauhia to’na mau faaueraa mana e aore roa e taata e nehenehe ia taui i te reira.¹¹

E aro paha te mau mana atoa o te poiri ia tatou, teie ra e Hoa te Fatu no tatou e e paturu e e horo’a Oia ia tatou te puai no te patu ia Ziona e no te rave i teie ohipa e tae noa’tu i te taeraa mai te Tamaiti a te Taata. No reira, ia tamarŭhia to outou mau aau… E ti‘a roa ia tatou paatoa ia tahoêhia i roto i te tumu o ta tatou i fafau. E ia na reira tatou e upooti‘a ia tatou.¹²

E ere i te mea ohie no tatou, ua aro e ua pato‘i noahia tatou mai te haamataraa mai â e tae noa mai i teie mahana; e ti‘a ra ia tatou e to te ao ia tamarû i to tatou mau aau no ni‘a i te « Haapa‘oraa Momoni », no te mea e ore roa oia e mou e tae noa’tu i te haerea mai te Fatu o Iesu Mesia i roto i te mau ata o te reva.¹³

E mou te auro e te ario; e mou atoa te mau fare e te mau fenua; e mou te mau tao‘a atoa o teie ao; te autahu‘araa e ore roa ïa e mou, te faaoraraa e ore roa ïa e mou, te basileia o te Atua e ore roa ia e mou, e te tohuraa e tupu mau â ia te reira.¹⁴

Ua faahereherehia tatou i roto i te ao varua no te patu i te basileia o te Atua i roto i teie tau tuuraa.

Ua faahereherehia tatou i roto i te ao varua e rave rahi tauasini matahiti, no te ti‘a mai i roto i te tahuti nei i te mau mahana hopea, e no te rave i te basileia o te Atua e ia patu i te reira. I to tatou taa maitairaa i teie mau mea, e ei Feia Mo‘a i te Mau Mahana Hopea Nei, eaha ia to tatou mana‘o no ni‘a i te reira ? E tama‘i rahi ta tatou e aro nei. Ua tahoê o Lucifero, te tamaiti a te poipoi, e to’na mau nuu no te aro ia tatou. E mea iti roa tatou, ia faaauhia i te mau taata e parahi ra i ni‘a i te fenua. Ua vai te tahi mau tane e mau vahine i te mau tau ato‘a o te ao nei o tei ma‘iti i te pato‘i i te ino e i te tavini i te Fatu. Ua faarirohia tatou e mea ti‘amâ e ua ma‘itihia tatou ia riro ei nunaa No’na. No reira, ua tae i te taime, e ti‘a ai ia tatou ia ara e ia ti‘a mai ma te ahuhia i te mana o te Atua e te Autahu‘araa Mo‘a, e ti‘a ia tatou ia haapa‘o i teie Autahu‘araa e ia farii i te mau haamaitairaa no roto mai i te reira.¹⁵

Aita roa’tu e nunaa mai teie te huru. Aita roa’tu e ohipa mai teie te huru mai to te Atua hamaniraa i te ao. E parau mau, i vai na te mau taata o tei poro i te evanelia; i roto ra i te îraa o te mau tau ua haamata te Fatu i te faati‘a i to’na basileia. O teie te tau tuuraa hopea. Ua aupuru oia i te mau tane e te mau vahine no te rave i ta’na ohipa, e mai ta‘u i parau pinepine, e rave rahi o tatou o tei faahereherehia i roto i te ao varua mai te faanahonahoraahia mai teie ao e tae roa mai i te tau tuuraa o ta tatou e ora nei.¹⁶

Ua tupu mau te mau heheuraa a te Atua e vai ra i roto i te Bibilia, te Buka a Moromona e te Parau Haapiiraa e te Parau Fafau. Te faatupu nei tatou ia ratou. E a vai ai tatou i ô nei e faaroo ana‘e tatou i te atua, o Elohima, te Atua o te mau Ati Iuda e o te mau Etene ato‘a. Te ti‘aturi nei oia ia tatou e aita i te tahi atu. E ti‘aturi oia i te Feia Mo‘a i Te Mau Mahana Hopea Nei. No te aha ? No te mea aita’tu taata o tei farii i te îraa o te evanelia mure ore; aita’tu e taata tei haamata i te patu i teie basileia. To‘u faaroo e to‘u mana‘o no ni‘a i teie ohipa o teie ia: Ua faataahia tatou hou te ao nei, mai te mau aposetolo i tahito ra, ia haere mai i te tahuti nei e ia amo i te hopoi‘a o teie basileia, e e ti‘a roa ia tatou ia rave aore râ, ia faahapahia. O tera ïa to tatou ti‘araa i teie mahana. Tei ni‘a te mata o te mau nuu o te ao ra ia tatou; te mata o te Atua iho e o ta’na tamaiti o Iesu Mesia e o te taato‘araa o te mau aposetolo e o te mau peropheta o tei taati i to ratou iteraa papû i to ratou toto, te hi‘o maira ia i teie nunaa. Te farerei nei ratou ia outou, te hi‘opo‘a nei ratou i ta outou mau ohipa, no te mea ua ite maitai ratou e to outou fâ o te paturaa ïa i te Basileia, te paturaa ia Ziona, te haamo‘araa ia’na, te haamo‘araa i te fenua e te faaineineraa i to te ao no te taeraa mai o te Tamaiti a te Taata.¹⁷

Ei Feia Mo‘a i te mau Mahana Hopea nei, e ohipa rahi ta tatou no te rave.

Ua tae mai… o Iosepha Semita ei faatiaraa i te tohuraa, ua rave faaoti oia i te mea i titauhia ia’na, ua haamau oia i te niu o te ohipa, ua farii oia i te mau taviri no te autahu‘araa e te aposetoloraa, e te mau horo’araa atoa e te maitai atoa i roto i te faanahonahoraa o te Ekalesia i titauhia no te faahaere te ohipa i mua. Ua piihia tatou ia patu i ni‘a i te niu o ta’na i haamau.¹⁸

Ahani e e nehenehe ta tatou e iriti i te orama o to tatou nei mau feruriraa e ia faahaere atu i roto i te oraraa i mua e ia ite i teie nei basileia e te mea e titauhia ia faaoti, e te mea o ta tatou e ti‘a ia rave, te aroraa e ti‘a ia tatou ia faaruru, e ite papû tatou e, e ohipa rahi tei mua ia tatou.¹⁹

To tatou piiraa taa ê o te paturaa ïa ia Ziona, e te faaineineraa i te nunaa ia ti‘a mai i roto i te mau vahi mo‘a a niniihia mai ai te mau haavaraa a te Fatu i ni‘a i te feia ino.²⁰

E mana‘o e e hinaaro no te Atua ia ite hope roa te Feia Mo‘a i te mau Mahana Hopea nei no ratou iho e te ti‘a nei ratou i rotopu i te tau tuuraa rahi hopea a te Atua na te taata; e e ti‘a atoa ia ratou ia ite hope roa i te mau hopoi’a tei tuuhia i ni‘a iho ia ratou ei feia ohipa i roto i taua tau tuuraa ra. Eita roa e ti‘a ia ratou ia haamo’e e eita roa e noaa i te mau mana no te pouri tei amuihia ia faafaufaa ore i te mau opuaraa a te Atua no ni‘a i te ohipa Ta’ na i haamata i te rave, i te tau e te u‘i ta tatou e ora nei. E ti‘a i te Feia Mo‘a i te mau Mahana Hopea nei ia ora i mua i te Fatu i te hoê oraraa no te ite i te ti‘araa ta tatou e mau nei, e te mau hopoi’a tei titauhia ia tatou; no te mea te titau nei te Fatu ia tatou i te tahi mau mea i to tatou nei tau e te u‘i, mai Ta’na i titau i To’na ra nunaa i te mau tau atoa, a horo’a’i Oia ia ratou i te îraa o te Evanelia mure ore, e te mana e te ti‘araa o te Autahu‘araa Mo‘a …

O te hinaaro atoa o te Atua ia aufau tatou i ta tatou mau tuhaa ahuru e ta tatou mau ô; E hinaaro No’na ia haapa‘o tatou i te Parau Paari; E hinaaro No’na ia haapa‘o tatou i te mau faaueraa, e ia haapii tatou i te reira ia vetahi ê. E faautu‘ahia tatou no te mau mea atoa ia ore tatou e manuia i te rave i te mea i ti‘a ia tatou ia rave, e te mau mea atoa ta tatou e rave. Ia hoê â to tatou au e hoê â to tatou mana‘o e tia‘i, e ia ore tatou e faati‘a i te tahi mea no te natura tino aore râ, te natura varua ia faataa ê ia tatou i te aroha o te Atua e o te taata.

… E ti‘a ia tatou ia hoê e ia imi i te maitai o te tahi e te tahi. E ti‘a ia tatou ia haapii i te mau ture o te Evanelia a te Mesia i ta tatou mau tamaroa e ta tatou mau tamahine, e i to te ao atoa, e ia faaineine ia tatou iho no te mau ohipa e tupu tei parauhia i roto i te mau heheuraa ta te Fatu i horo’a mai ia tatou. Ua haamata a‘ena oia i Ta’na ohipa, Ta’na ohipa maere e te umerehia, i rotopu i te mau taata o te fenua nei, tei faahitihia e Isaia [ a hi‘o Isaia 29:14]. E ore roa Oia e tatara i To’na rima e tae noa’tu ua hope Ta’na mau opuaraa.²¹

E ohipa rahi ta tatou i mua ia tatou, e e titau te reira i te taato‘ araa o ta tatou mau tutavaraa e to tatou mau taleni e to tatou aravihi no te raveraa i te reira. E ti‘a ia tatou ia imi i te Varua o te Atua no te tautururaa ia tatou; no te mea ia ore teie nei Varua e mea iti roa ïa te mea ta tatou e nehenehe e rave.²²

Te parau nei au ia outou e ia hi‘o outou na pihai iho ia outou e ia ite outou i te huru o te ao nei i te hoê pae e te mea e ti‘a ia tatou ia rave i te tahi atu pae, e te mea e ti‘a i te basileia o te Atua ia rave no te faatupu i ta’na fâ e te mau heheuraa a Iesu Mesia, ta tatou fâ tumu o te paturaa ïa e te faahaereraa i te basileia o te Atua i mua …

… E ti‘a ia tatou ia imi ia patu i te basileia, e ia titau eiaha noa i te mau haamaitairaa no tatou iho, ia imi atoa râ ia riro ei feia faaora taata i ni‘a i te mou‘a no Ziona, e ia tamata i te rave i te mau mea maitai atoa e noaa ia tatou i te rave, ma te tutava i te faahaere i te tumu e te maitai o Ziona i roto i te mau tuhaa atoa i reira tatou i piihia ai no te rave i te ohipa.

Na roto i te raveraa i teie nei e‘a e manuïa ïa tatou, e e vai noa te hau i roto i to tatou mau mana‘o e mai ta te Fatu i parau, aore roa e mea e tape‘ahia i te taata atoa o te imi i te parau-ti‘a e te mau haamaitairaa no te basileia o te Atua …

… Te vai nei e rave rahi mau mea o te fatata i te tupu, te mau tauiraa rahi e rave rahi o te tupu i te fenua nei, e te tupu nei te basileia i te rahi; e te a‘o nei au i te Feia Mo‘a atoa i te mau Mahana Hopea nei o te faaroo nei i to‘u reo i teie nei mahana ia tuatapapa maitai i to outou nei ti‘araa, e ia imi i to outou mau aau e ia hi‘o mai te mea tei te pae tatou o te Fatu to tatou Atua, e ia tupu tamau noa tatou i te rahi i roto i te faaroo, i roto i te ti‘aturiraa, i roto i te parau-ti‘a, e i roto i te mau ture viivii ore atoa tei titauhia ia tatou ia noaa no te tururaa ia tatou i roto i te mau tamataraa atoa e nehenehe tatou e piihia ia haere atu na roto no te faaite e, e mau hoa tatou no te Atua, te faaea ra anei tatou i roto i te fafauraa aore râ, aita; e tamatahia tatou mai teie atu taime e tae noa’tu i te taeraa mai o te Mesia aore râ, a ora noa’i tatou i te fenua nei.²³

Aita e mata‘uraa mai te mea e haapa‘o te Feia Mo‘a i te mau Mahana Hopea nei i te mau fafauraa ta ratou i rave e to ratou Atua e ia faaohipa papû maitai ratou i te mau ture Ta’na i parau ia tatou no te faatere ia tatou i te paturaa i Ta’na Ziona.

Mai te mea râ ua haamo’e tatou i ta tatou mau fafauraa e e faatea ê atu i taua mau fafauraa ra e ia faafaufaa ore tatou i te mau haapiiraa Ta’na i horo’a mai ia tatou, e mea papû roa ïa, e te Feia Mo‘a i te mau Mahana Hopea nei, tei roto to tatou ti‘araa i te ati. E ore roa te mau opuaraa a te Atua e tape‘ahia; e ta’irihia râ tatou e te feia o te tamau noa i te haamo’e i te mau fafauraa e pato‘ihia ratou e e faaerehia ratou i te mau tuhaa atoa o te mau haamaitairaa tei fafauhia ia Ziona.²⁴

Tei piha‘i iho te Fatu i teie nei nunaa, area râ ei Feia Mo‘a i te mau Mahana Hopea nei, aita vau e mana‘o nei e te faafaufaa noa nei tatou i ta tatou mau haamaitairaa. Ua piihia tatou no te rave i te hoê ohipa; ua tuu te Fatu i teie nei ohipa i roto i to tatou nei rima, e e faautu‘ahia tatou i mua i te ra‘i e te fenua no te faaohiparaa i te mau taleni-te maramarama e te parau mau, tei tuuhia’tu i roto i to tatou mau rima.²⁵

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tautururaa, a hi‘o i te mau api v-ix.

A tai‘o faahou i te mau api 25-26. Nahea te tohuraa a Iosepha Semita i faatupuhia’i ? Eaha ta tatou e nehenehe e haapii mai na roto mai i te orama a te peresideni Woodruff ?
No te aha te mau peropheta i tia‘i ai i teie nei tau tuuraa ? No te aha e mea faufaa no tatou ia taa e « te ora ra tatou i roto i te tau tuuraa hopea ?(SA hi‘o i te mau api 26-27.)
Eaha te auraa ia faaite ana‘e tatou e, e melo tatou no « te Ekalesia parau ti‘a ana‘e e te mea ora i ni‘a i te ao paatoa nei » ? (api 27; a hi‘o atoa PH&PF 1:30). Nahea tatou ia faaite ma te haehaa teie nei parau mau ia vetahi ê ?
Eaha te mea i haaputapû ia outou a tuatapapa ai outou i te mau haapiiraa a te peresideni Woodruff no ni‘a i te hopearaa o te Ekalesia ? (A hi‘o i te mau api 27-30.)
A hi‘o i te mau api 28-30 ma te imi i te mau mea o te mou e te mau mea o te vai noa e amuri noa’tu. Eaha te mau taa-ê-raa i roto i te mau mea e mou e te mau mea e vai noa mai ?
A tai‘o i te mau haapiiraa a te peresideni Woodruff no ni‘a i to tatou « faaherehere-raa-hia i roto i te ao varua » no te fanau mai i roto i tei nei tau tuuraa (te mau api 30-31). Eaha to outou mau mana‘o a feruri ai outou i teie nei mau faahitiraa parau?
A hi‘o i te hoho‘a i te api 32. Eaha te ohipa a teie nei hoho‘a e te paturaa o te basileia o te Atua ? Mai te au i te peresideni Woodruff, eaha te tahi o ta tatou mau ohipa a tauturu ai tatou i te paturaa i te basileia o te Atua ? (A hi‘o i te mau api 31-34.)
A tai‘o i te paratarafa hopea i te api 34. Eaha te mau haamaitairaa ta tatou i farii i roto i teie nei tau tuuraa ? I to outou mana‘o eaha te auraa o te parau « faafaufaa i ta tatou mau haamaitairaa » ?

Te mau papa‘iraa mo‘a: PH&PF 6:32–34; 64:33–34; 121:26–32; 138:53–56

Ei melo no te Tino Ahuru ma Piti Aposetolo, ua haa itoito o Elder Wilford Woodruff i te tautururaa ia haamau i te Ekalesia a Iesu Mesia i roto i te tau tuuraa o te mau tau atoa..

Daniel interpreting dreams — « E tamau noa teie Ekalesia i te tupu… Teie te basileia ta Daniela i ite, e e tamau noa oia i te ohuraa e tae noa’tu e faaî oia i te taatoaraa o te fenua »

family praying together — « Ta tatou piiraa taa ê o te paturaa ïa ia Ziona, e te faaineineraa i te nunaa ia t’ia i te mau vahi mo‘a »