Pene 18

Te ohipa hiero: Te riroraa ei mau faaora i ni‘a i te mou‘a ra i Ziona

Te mau nei tatou i te mau taviri no te faaoraraa i to tatou mau tupuna tei pohe ma te ite ore i te evanelia.

No roto mai i te Oraraa o Wilford Woodruff

Ite ava‘e atopa 1841, i muri noa‘e i to’na ho‘i raa’tu i Nauvoo na te hoê misioni i te fenua Peretane, ua haere atu o Elder Wilford Woodruff i te hoê apooraa i reira to te peropheta Iosepha Semita haapiiraa i te haapiiraa no ni‘a i te faaoraraa i te feia pohe. Teie te taime matamua a faaroo ai Elder Woodruff, e e nehenehe ta te mau melo ora o te Ekalesia e farii i te mau oro‘a faaoraraa no to ratou mau tupuna tei pohe. Ua parau oia: « Ua riro te reira mai te hoê te‘a maramarama mai te terono o te Atua i to matou aau. Ua iriti te reira i te hoê aua aano mai te ao amuri atu i to matou nei mau feruriraa. »¹ Ua parau atoa oia: E au ra ia‘u e te Atua tei heheu mai i taua parau tumu i te taata nei e Atua paari ïa,, te ti‘a e te parau mau, tei mau i te mau tapa‘o maitai atoa e te feruriraa paari e te ite. Ua ite au e taata tamau oia i roto i te here, te aroha, te parau–ti‘a e te haavaraa, e ua hinaaro vau ia rahi atu to‘u here i te Fatu mai mua’tu i roto i to‘u nei oraraa… Ua hinaaro vau i te parau Aleluia a tae mai ai te heheuraa faaiteraa mai ia matou te bapetizoraa no tei pohe. Ua ite au e, e ti‘araa to tatou ia oaoa i te mau haamaitairaa no te ra‘i mai. »²

I to’na faarooraa i teie nei haapiiraa, ua mana‘o ihora o Elder Woodruff i to’na ra metua vahine. « Te mea matamua tei tomo mai i to‘u nei feruriraa », ua parau mai oia, « e metua vahine ïa to‘u i roto i te ao varua. Ua pohe oia i te taime e 14 ava‘e to‘u. Aita roa’tu vau i ite i [to‘u metua vahine]. Ua feruri ihora vau, E mana anei to‘u ia haere e taati to‘u metua vahine i to‘u metua tane ? Te pahonoraa, oia ïa. »³ Ua parau oia i muri iho i te taime a farii ai oia i te pae hopea i te haamaitairaa no te taati to’na metua vahine i to’na ra metua tane: « E tuhaa to’na i te ti‘a–faahou–raa matamua; e ua hoona te reira noa ohipa i ta‘u mau ohipa atoa i roto i to‘u nei oraraa. »⁴ Ua faaite atoa oia i te oaoa ta’na i ite a rave ai oia i te mau oro‘a hiero no te tahi atu mau melo no te utuafare tei pohe: « Ua farii au i te haamaitairaa e te rave‘a no te faaoraraa i roto i te hiero no to tatou Atua te tahi maha tauatini fetii no to‘u metua tane e to‘u metua vahine. Te parau nei au i te reira no te mea o te hoê ïa o ta tatou mau haamaitairaa, te îraa e te hanahana e ore roa outou e ite e tae noa’tu ia matara te paruru. »⁵

A tavini ai oia ei peresideni no te Ekalesia, ua haamo‘a Wilford Woodruff i te hiero no Roto Miti. I taua taime ra ua ti‘aoro oia i te Fatu ia tauturu i te Feia Mo‘a i roto i ta ratou mau tautooraa no te faaora i te feia i pohe: « A faati‘a na oe i te mau ve‘a mo‘a ia haere mai e farerei ia matou i roto i teie nei mau pàpà‘i mo‘a e no te faaite mai ia matou i te ohipa e ti‘a ia matou ia rave no to matou mau taata tei pohe. E, mai ta oe i faauru i te aau o te mau taata e rave rahi tei ore â i tomo atura i roto i te fafauraa e oe no te imiraa i to ratou mau tupuna, e na roto i te reira raveraa ua itea ia ratou te mau tupuna o ta oe mau Feia Mo‘a e rave rahi, te pure nei matou ia oe e ia faarahi oe i teie nei hinaaro i roto i to ratou ouma, ia nehenehe ia ratou na roto i teie nei rave‘a ia tauturu i te faatupuraa i ta oe ohipa. A haamaitai ia ratou, te pure nei matou ia oe, i roto i ta ratou mau ohipa, ia ore ratou e topa i roto i te mau hape i te faaineineraa i ta ratou mau parau tuatapaparaa tupuna, e te ani atoa’tu nei matou ia oe ia iriti atu i mua ia ratou te mau uputa api no te haamaramaramaraa, e a tuu atu i roto i to ratou rima te mau buka no mutaa ihora, ia ti‘a ta ratou mau ohipa e ia hope atoa râ.⁶

Te mau haapiiraa a Wilford Woodruff

E aroha to te Metua i te Ao ra i Ta’na mau tamarii atoa e e ore oia e faahapa ia ratou tei pohe ma te ore i farii i te rave‘a no te fariiraa i te evanelia.

Mai te mea aita te feia pohe i faaroo i te Evanelia, eita roa ïa te Fatu e tono atu ia ratou i hade no te mea aita ratou i farii i te reira. E Metua te Fatu no te taatoaraa. E aroha to’na no te taatoaraa… E rave rahi milioni taata tei fanauhia i te tino nei, tei ora e tei haere i roto i te menema, tei ore roa i ite i te hoê peropheta i roto i to ratou oraraa; tei ore i ite i te hoê taata tei piihia e te Atua e tei mau i te mana no te faatere i roto i te hoê oro‘a o te Fare o te Fatu. E faahapa anei te Atua ia ratou no te mea aita ratou i farii i te Evanelia ? Eita roa ïa.⁷

E ore te Atua e haapa‘o i te huru o te taata; eita oia e horo‘a i te mau haamaitairaa i te hoê u‘i e eita e horo’a i te reira mau haamaitairaa i te tahi u‘i, e e ti‘a i te utuafare taata atoa, mai te metua Adamu e tae mai i to tatou nei anotau, ia farii i te haamaitairaa, i te tahi vahi, no te faarooraa i te evanelia a te Mesia; e e ore roa ïa te mau u‘i tei haere atu ma te ore i faaroo i taua evanelia ra i to’na îraa, to’na mana e to’na hanahana, e faahapahia e te Atua no to ratou haapa‘o–ore–raa i te reira. Eita atoa oia e faahapa no te pato‘iraa i te hoê ture tei ore roa i itehia aore râ i taahia e ratou; e mai te mea e ora ratou mai te au i te ite ta ratou i farii, ua faati‘ahia ïa ratou e tae noa’tu i teie nei, e e porohia râ ratou i roto i te ao varua.⁸

E riro tatou ei mau faaora i ni‘a i te Mou‘a ra i Ziona a patu ai tatou i te mau hiero e a farii ai tatou i te mau oro‘a faaora no tei pohe.

E rave rahi to tatou mau tupuna, tei roto i teie nei i te ao varua, tei ore roa i ite noa‘e i te hoho‘a mata o te hoê aposetolo, peropheta aore râ te hoê taata faauruhia, e ua tape’ahia ratou i te tape’araa. Te poro ra Iosepha Semita, Heber Kimball, George A. Smith e e rave rahi tauatini mau peresibutero i taua mau varua ra, e e farii ratou i te iteraa papû ta te mau peresibutero e faaite atu; eita râ te mau peresibutero e bapetizo i te feia tei ti‘aturi i reira; aita e bapetizoraa i roto i te ao varua e aita’toa e faaipoiporaa e e horo‘araa ia faaipoipohia.⁹

E ti‘a i te tahi taata aore râ te mau taata e ora râ i te tino nei ia rave i teie nei tuhaa no te ohipa no ratou; no te mea e ohipa rahi atoa ia faaora i te hoê taata pohe tei ore roa‘e i farii i te Evanelia mai te hoê taata ora. E e ti‘araa to te mau taata atoa tei faaru’e mai ma te ite ore i te Evanelia ia tia‘i i te tahi taata i te oraraa nei ia rave i teie nei ohipa no ratou.¹⁰

E hopoi’a na tatou ia ti‘a i ni‘a e ia patu i teie nei mau hiero. Te faariro nei au i teie nei tuhaa no ta tatou ohipa mai te hoê misioni e hoê â to’na faufaa e te pororaa i te evanelia i te feia ora; e e faaroo te feia pohe i te reo o te mau tavini a te Atua i roto i te ao varua, e eita e nehenehe ia ratou ia ti‘a mai i ni‘a i te po‘ipo‘i o te ti‘a–faahou–raa [matamua] maori râ ia ravehia te tahi mau oro‘a no ratou na roto i te monoraa i roto i te mau hiero tei patuhia i te i‘oa o te Atua… E ti‘a i te tahi taata ia faaora ia ratou, na roto i te raveraa i taua mau oro‘a no ratou i te tino nei no te mea eita ho‘i e noaa ia ratou ia haapa‘o ia ratou iho i roto i te ao varua, e ia nehenehe teie nei ohipa ia ravehia, e ti‘a ïa ia vai mai ta tatou mau hiero i reira e ravehia’i taua ohipa ra; e te hinaaro nei au e parau atu ia outou, e to‘u mau taea‘e e to‘u mau tuahine, e te titau nei te Atua no te ra‘i ia tatou ia ti‘a i ni‘a e ia patu i teie nei mau hiero, ia faaoioihia te ohipa no te faaoraraa. E farerei mai ta tatou utu‘a maitai ia tatou ia haere atu tatou i tera’tu pae o te paruru…

… Aita vau i maere i te parau a te peresideni [Brigham] Young i te na ô raa e, ua faauruhia oia i te pii i te Feia Mo‘a i te mau Mahana Hopea nei ia faaoioi i te paturaa i teie nei mau hiero. Ua ite oia i te faufaa rahi no te ohipa; i teie nei râ, ua reva’tu oia, na tatou ïa e tamau i te reira, e e haamaitai mai te Atua i ta tatou mau tautooraa e e oaoa tatou i roto i te reira. Teie te hoê faaineineraa titauhia no te tae–piti–raa mai o te Faaora; e ia patu ana‘e tatou i te mau hiero e mana‘ohia ra i teie nei, i reira ïa tatou e haamata ai i te ite i te titauraa no te patu i te tahi atu mau hiero, e mai te au i te itoito o ta tatou mau tutavaraa i roto i teie nei arata‘iraa, e ite ai tatou i te faufaa rahi o te ohipa e ti‘a ia ravehia, e te mau mea i teie nei taime o te hoê noa ïa haamataraa.; Ia tae mai te Faaora, e faataahia hoê tauatini matahiti no teie nei ohipa faaoraraa; e ti‘a mai te mau hiero na ni‘a i te taatoaraa o teie nei fenua no Iosepha–Amerika Apatoerau e Apatoa– e i Europa atoa e te tahi atu mau vahi; e e ti‘a i te mau huaai atoa no Sema, Hama e Iapheta tei ore i farii i te evanelia i te oraraa nei, ia monohia’tu i roto i te mau hiero a te Atua hou a pupu atu ai te Faaora i te basileia i te Metua, ma te parau atu e: « Ua oti te ohipa. »¹¹

Tei mua ia outou… te tahi mau mea no ni‘a i te faaoraraa i to tatou mau taata tei pohe, e te tahi mau mea no ni‘a i te paturaa i te mau hiero. E mau ohipa faufaa rahi teie, e te mau taea‘e e te mau tuahine. E mau ohipa teie ta tatou e rave no te tahi atu mau taata o te ore roa e nehenehe ia ratou ia rave no ratou iho. Teie ta Iesu Mesia i rave a horo’a’i Oia i To’na ra ora no te faaora ia tatou, no te mea aita e nehenehe ia tatou ia faaora ia tatou iho. E mau metua tane e e mau metua vahine e e mau fetii to tatou i roto i te ao varua, e e ohipa ta tatou no te rave no ratou. E anaanatae rahi to‘u na ni‘a i to‘u ti‘araa taata no teie nei ohipa faaoraraa i tei pohe, e to‘u atoa mau taea‘e e te mau tuahine. Teie te hoê ohipa e ti‘a ia tatou ia tamau noa ia au i te mau rave‘a… E ohipa teie na te Feia Mo‘a i te mau Mahana Hopea nei. A rave i te maraa ia outou i te rave i roto i teie nei ohipa, e ia haere ana‘e outou i tera’tu pae o te paruru, e haamaitai mai to outou mau metua tane, te metua vahine, te fetii e to outou mau hoa ia outou no te ohipa ta outou i rave, e no te mea ho‘i ua riro outou ei mauhaa i roto i te rima o te Atua i te imiraa i to ratou ora, e itehia mai ïa outou ei mau Faaora i ni‘a i te Mou‘a ra i Ziona no te faatupuraa i te tohuraa [a hi‘o Obadia 1:21]¹²

Ua haamaitaihia tatou e te mana e te ti‘araa, ma te mau i te Autahu‘araa Mo‘a na roto i te faaueraa a te Atua, ia ti‘a i ni‘a i te fenua nei e ia faaora i te feia ora e te feia pohe atoa. E mai te mea aita tatou e na reira, e faahapahia ïa e e tapu–ê–hia ïa tatou i ni‘a i te fenua nei, e e faati‘a mai te Atua no Iseraela i te hoê nunaa o te rave i te reira ohipa faaoraraa.¹³

E te mau taea‘e e te mau tuahine, a feruri hohonu e a farii i teie nei mau mea i roto i to outou aau. A imi i ta outou mau parau tuatapaparaa e a faaî atu i te reira ma te parau–ti‘a i mua i te Fatu, e a faaohipa i teie nei parau tumu, e e haamaitai mai te Atua ia tatou, e e haamaitai mai te feia tei faaorahia ia tatou i te mau mahana i mua nei. Te pure nei au i te Atua e ia araara to tatou mata mai te hoê nunaa no te hi‘o, ia matara to tatou tari‘a no te faaroo, e ia matara to tatou aau no te taa i te ohipa puai e te faahiahia e vai nei i ni‘a i to tatou nei mau tapono e ta te Atua no te ra‘i e titau nei ia tatou. E mea faahiahia e te hanahana teie nei mau parau tumu ta te Atua i heheu mai ia tatou no ni‘a i te faaoraraa i to tatou feia tei pohe.¹⁴

Te tia‘i nei te feia pohe ma te pe’ape’a rahi e ia farii tatou i te mau oro‘a no ratou, e te hi‘o nei te Atua iho i te ohipa hiero ma te anaanatae rahi.

E ohipa rahi ta tatou e vai nei i mua ia tatou no te faaoraraa i to tatou mau taata tei pohe. Te hi‘o–maite–hia ra te e‘a ta tatou e rave nei e to te ra‘i atoa.¹⁵

Te ti‘aturi nei to tatou mau tupuna ia tatou no te rave i teie nei ohipa. Te hi‘o nei ratou ia tatou ma te pe‘ape‘a rahi, e te hinaaro nei ratou e ia faaoti tatou i teie nei mau hiero e ia rave tatou i te tahi mau oro‘a no ratou, ia nehenehe ia ratou ia ti‘a mai i ni‘a i te po‘ipo‘i o te ti‘a–faahou–raa e ia oaoa atoa i te mau haamaitairaa ta tatou e oaoa nei.¹⁶

« O ratou atoa o tei pohe ma te ite ore i teie Evanelia, o tei farii râ i te reira ahiri ratou i faati‘ahia ia ora noa, e riro ïa ei feia ai‘a no te basileia tiretiera o te Atua; oia atoa, o ratou atoa o te pohe mai teie atu taime ma te ite ore i te reira, o tei ti‘a râ ia farii i te reira ma to ratou aau atoa, e riro ïa ratou ei feia ai‘a no te reira basileia. E Na‘u, na te Fatu, e haava i te mau taata atoa mai te au i ta ratou ra mau ohipa, e mai te au ho‘i i te hinaaro o to ratou ra mau aau. » [PH&PF 137:7–9]. E mea na reira atoa e to tatou mau tupuna. E mea iti roa, aore râ aita roa‘e hoê, o te ore e farii i te Evanelia… E e farii te mau tupuna o teie nei nunaa i te Evanelia.¹⁷

Ua parau te peresideni Young ia tatou, e parau mau roa te reira, mai te mea e ti‘a i te feia pohe ia parau mai ma te reo puai mai hoê ahuru tauatini patiri, ma te pii atu i te mau tavini a te Atua ia ti‘a i ni‘a no te patu i te mau hiero, ma te faarahiraa i to ratou piiraa e te faaoraraa i ta ratou mau taata tei pohe.¹⁸

Ahiri ua ite e ua taa [tatou] i te mana‘o o te peropheta Iosepha Semita, e te mana‘o o to’na mau taea‘e i amui atu ia’na, e te mau mana‘o o te mau milioni taata tei tape’ahia i roto i to ratou tape’araa i roto i te ao varua, e ore ïa tatou e rohirohi… E haa ïa tatou no te faaoraraa i to tatou mau taata tei pohe.¹⁹

Tei ni‘a iho te mata o te ra‘i ia tatou; te hi‘o noa ra te mata o te Atua iho, te mata o te mau peropheta e te mau Aposetolo atoa i roto i te ao varua, ia tatou, ma te hi‘o atu i teie nei Autahu‘araa, no te hi‘o eaha ta ratou e rave ra, e eaha ta ratou e rave nei. E ua hau atu te reira i te faufaa rahi i te mea ta tatou e ite ra e e taa ra. Ia araara to tatou mata i te faufaa rahi o te mau oro‘a o te Fare o te Atua e ia rave tatou i ta tatou hopoi’a ia nehenehe ia tatou ia faati‘ahia.²⁰.

Ia farerei ana‘e tatou i to tatou mau tupuna i te ao varua, e riro ïa ei taime no te oaoaraa aore râ no te tatarahaparaa, tei te huru ïa o te ohipa ta tatou i rave no ratou i ô nei.

E mana to tatou no te… faaoraraa i to tatou mau taata tei pohe. E rave rahi o outou tei rave i teie nei ohipa, e te ti‘aturi nei au e, e tamau paatoa outou a vai noa’i to outou mau taata tei pohe no te faaora. Eiaha roa e faaea i taua ohipa ra a vai noa’i ia outou te mana no te tomo atu i roto i te hiero… Ua faaora vau i te tahi tauatini i reira. Ua rave au i te mau bapetizoraa, te mau faatoro‘araa, te mau horo‘iraa e te faatahinuraa, te mau oro‘a e te mau taatiraa no ratou, hoê â mau oro‘a mai te mea ra te ti‘a nei ratou i te tino nei. E haere au e farerei atu ia ratou i te tahi atu pae o te paruru. E haere outou e farerei i to outou mau fetii.²¹

Ia vaiiho ana‘e au i to‘u tino i roto i te menema e ia haere to‘u varua i te ao varua, e oaoa ïa vau e e farii au i te hanahana e ratou i te po‘ipo‘i no te ti‘a–faahou–raa. no te mea ua farii ratou i teie nei mau parau tumu. « E mea maitai’ e parau mai paha outou, « e mai te mea eita teie nei feia ta oe i bapetizo e farii i te Evanelia ? » E hape ïa na ratou e ere na‘u. Teie te hoê hopoi’a e vai nei i ni‘a ia Iseraela taatoa, e ia rave ratou i teie nei ohipa, ia vai noa â ta ratou rave‘a i o nei i ni‘a i te fenua.²²

Eaha ïa to‘u mana‘o, i muri a‘e i to‘u ora roa mai ta‘u i ora, e te mau haamaitairaa ta‘u i farii no te haere i roto i teie nei mau hiero, ia haere ana‘e au i te ao varua ma te oreraa i rave i teie nei ohipa ? E farerei au i te mau fetii o to‘u metua tane, e farerei au i te mau fetii o to‘u metua vahine, e farerei au i to‘u mau tupuna, e ua tape’ahia ratou i roto i te vahi tape’araa; ua mau vau i te mau taviri no to ratou faaoraraa, e aita â vau i rave i te tahi ohipa no ratou; eaha râ ïa to‘u mau mana‘o, aore râ eaha râ ïa to ratou mau mana‘o no‘u ?²³

Aita vau e hinaaro ia haere atu i roto i te ao varua e ia farerei i to‘u mau tupuna tei ore roa i faaroo i te Evanelia i to ratou ra tau e to ratou u‘i, e ia parau mai ratou ia‘u e, « Tei roto i to oe rima te mana no te haere e faaora ia‘u e aita roa oe i rave i te reira. » Aita vau e hinaaro e ite i teie huru ohipa. Aita vau e hinaaro i te Feia Mo‘a i te mau Mahana Hopea nei ia ite i te reira. Te mana‘o nei au e, e mea maitai te ohipa ta tatou e rave nei. E maha ta tatou mau hiero tei faati‘ahia i roto i teie nei mau faa no te mau mou‘a [i te matahiti 1897], e e mea faaohipa–maitai–hia ratou e te Feia Mo‘a i te mau Mahana Hopea nei. Te hinaaro ra matou ia tamau noa i te reira e tae no‘atu ua faaora tatou i te mau taata atoa e noaa ia tatou i te faaora. Mai te mea e faaohipa tatou i teie nei parau tumu, e farii ïa tatou i te haamaitairaa no te reira. E e vai mai te reira ia tatou i te po‘ipo‘i o te ti‘a–faahou–raa ia ti‘a mai to tatou mau metua tane e metua vahine e to tatou mau tupuna i ni‘a e tatou atoa no te mea ua faaora tatou ia ratou.²⁴

Ia ore ana‘e tatou e rave i tei titauhia ia tatou i roto i teie nei ohipa, tei raro a‘e ïa tatou i te faahaparaa. Mai te mea e haapa‘o tatou i teie ohipa, i reira, ia haere ana‘e tatou e farerei i to tatou mau hoa i roto i te basileia tiretiera, e parau mai ïa ratou, « Ua riro outou to matou mau faaora, no te mea e mana to outou i te raveraa i te reira. Ua haapa‘o outou i teie nei mau oro‘a ta te Atua i titau. »²⁵

Ua piihia tatou ei mau Faaora i ni‘a i te Mou‘a ra i Ziona a vai noa’i te basileia o te Fatu i ni‘a i te fenua nei. E mau parau tumu hanahana teie. Ia faaorahia tatou iho, e ia faaora i to tatou mau taata tupu, auê ïa parau tumu hanahana e! Eaha te auro e te piru, eaha te mau tao‘a rahi no teie nei ao ? E mou ratou na roto i te faaohiparaa. E pohe tatou e e faaru’e tatou ia ratou. Mai te mea râ e ora mure ore to tatou, e ua tape’a tatou i te faaroo e ua upooti‘ a tatou i ni‘a i te ao, e oaoa ïa tatou ia haere atu tatou i tera’tu pae o te paruru. E oaoa vau i roto i teie mau mea atoa. Aita roa e parau tumu ta te Fatu i heheu mai o ta‘u i oaoa rahi a‘e maori râ te parau tumu no te faaoraraa i to tatou mau taata tei pohe; e e parahi tatou e to tatou mau metua tane, to tatou mau metua vahine, ta tatou mau vahine e ta tatou mau tamarii i roto i te faanahonahoraa utuafare, i te po‘ipo‘i no te ti‘a–faahou–raa matamua e i roto i te Basileia Tiretiera. E mau parau tumu faahiahia teie. Ua hoona te mau tusia atoa no teie mau mea.²⁶

Te mau mana‘o tauturu no te tuatapaparaa e te haapiiraa

A feruri hohonu i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu â tautururaa, a hi‘o atu i te mau api v-ix.

Eaha te huru o Wilford Woodruff i to’na faaroo–matamua–raa i te haapiiraa no te faaoraraa i te feia i pohe ? Eaha to’na mana‘o matamua ? (A hi‘o i te api 208-209). Eaha ta tatou e nehenehe e haapii mai roto mai i teie nei mau pahonoraa ?
Ua parau te peresideni Woodruff e, e mea faufaa rahi te ohipa hiero no te feia pohe mai te ohipa misionare no te feia ora (api 210). A feruri aore râ a aparau i te auraa no teie faahitiraa parau. Eaha te mau mea i tupu tei faaite mai ia outou te tuatiraa i roto i te ohipa hiero e te ohipa misionare ?
Ua parau te peresideni Woodruff e ia farii ana‘e tatou i te mau oro‘a no tei pohe, te rave nei ïa tatou i te hoê ohipa e « ore e nehenehe ia vetahi ê ia rave no ratou iho » (mau api 210-11). Nahea teie iteraa e tauturu ai i to outou mau mana‘o no ni‘a i te ohipa hiero ?
A tai‘o faahou i te tuhaa e haamata i te api 212. Mai te au i te peresideni Woodruff, eaha te mana‘o o to tatou mau tupuna no ni‘a i te ohipa hiero ? Eaha to te Atua te Metua hi‘oraa i teie nei ohipa ? Eaha to outou mana‘o a tai‘o ai outou i teie nei mau faahitiraa parau ?
A tai‘o faahou i te tuhaa hopea no te pene, ma te haamata i te 214. A feruri i to outou mana‘o ia farerei outou i to outou mau tupuna i roto i te ao varua.
Nahea e nehenehe ai ia outou ia faataa i te tahi taime no te ohipa hiero e te ohipa aamu utuafare ? Eaha te mau rave‘a ta te Ekalesia e horo’a mai nei no te arata‘i e no te tauturu ia outou ?
Nahea te raveraa i te ohipa hiero e te aamu utuafare e haapuai ai i to tatou mau utuafare ? Eaha ta tatou e nehenehe e rave no te tauturu i te feia apî o te Ekalesia ia ite i te oaoa i roto i ta ratou hopoi’a no te faaoraraa i tei pohe ?

Te mau papa‘iraa mo‘a: 1 Korinetia 15:29; PH&PF 128; 138