Pene 20

Te ti‘amâraa: Te ma‘itiraa i te ora e aore ra i te pohe

O teie te taime ia ma‘iti tatou i te maitai aore râ i te ino, no te mea na ta tatou mau ohipa e hopoi mai i te mau hopearaa i roto i teie nei oraraa e i roto i te mau oraraa mure ore.

No roto mai i te Oraraa o Wilford Woodruff

Ua faaite te peresideni Wilford Woodruff e, e tae mai te ora « na roto i te toto o Iesu Mesia », e ua haapapû atoa oia e, e tae mai te îraa o te ora « na roto i te haapa‘oraa i te Evanelia. »¹ Ma teie nei iteraa, ua haapii oia e « e ti‘amâraa to tatou paatoa ia ma‘iti i te maitai e ia pato‘i i te ino, aore râ ia ma‘iti i te ino e ia pato‘i i te maitai »² e e « haava te Atua ia [tatou] ia au i te huru o to tatou faaohiparaa i teie nei ti‘amâraa. »³ Ua ti‘aoro oia i te Feia Mo‘a ia rave i te mau faaotiraa parau–ti‘a, ma te faahaamana‘o ia ratou i te huru–ê–raa i rotopu « i te tahi noa nau matahiti poto no te oaoa o te tino » e « te hoê roaraa mure ore no te maramarama, te parau mau, te mau haamaitairaa, e te ite ta te Fatu e ninii i ni‘a i te mau taata atoa o te haapa‘o i ta’na ture. »⁴

Mai ia tatou paatoa, e rave rahi mau taime to te peresideni Woodruff faaohiparaa i te horo‘araa o te ti‘amâraa. Ua tupu te hoê o taua mau taime ra i Herefordshire, i te fenua Peretane, i te utuafare o John Benbow (a hi‘o i te api 99 i roto i teie nei buka). « E taata maitai o John Benbow », te haamana‘o ra te peresideni Woodruff. « E au ra oia mai te hoê fatu Peretane; te taata ona roa‘e, i to‘u mana‘oraa, tei tomo mai i roto i te Ekalesia. Aita vau i mana‘o e ua noaahia hoê ava‘e to’na bapetizo– raa–hia, i haere mai ai oia e ta’na vahine i roto i te hoê piha faafaaearaa, e ua rave paha oia e maha ahuru ma pae minuti no te faaite mai ia‘u e, ua tai‘o oia i roto i te Faufaa Apî nahea te mau taata i te tau o te mau Aposetolo hooraa i te taatoaraa o ta ratou mau tao‘a e ua tuu atu i raro i te avae o te mau Aposetolo [a hi‘o Te Ohipa 4:31–37], e ua parau mai oia e ua ite oia e, e hopoi‘a na’na ia faatupu i taua ture ra e ua hinaaro oia ia rave i te reira. Ua faaroo noa vau ia’na ma te faaoromai e ia oti ta’na parau ua rave paha vau hoê afa hora no te parauraa’tu ia’na te taa–ê–raa i roto i to tatou ti- ‘araa i teie nei mahana e te ti‘araa o te mau Aposetolo i taua tau ra. Ua hinaaro vau e ia ite oia e aita te Atua i tono mai ia‘u i te fenua Peretane no te haapa‘o i ta’na auro, ta’na mau puaahorofenua, ta’na mau puaatoro e ta’na mau fenua; ua tono mai Oia ia‘u i reira no te poro i te Evanelia. Ua parau atu vau ia’na, e farii râ te Fatu i ta’na tusia, e te mau mea maitai atoa ta’na e nehenehe e rave, e ti‘a ïa ia’na ia na reira; e ti‘a ia’na ia tauturu i te feia vêvê, ia tauturu i te nene‘iraa i te Buka a Moromona, e te tahi atu â. »

I to’na faati‘a–faahou–raa i teie nei ohipa tei tupu, ua aparau te peresideni Woodruff no ni‘a i te haamaitairaa rahi o ta’na faaotiraa ia pato‘i ma te au maite i te pûpûraa a te taea‘e Benbow.

« I teie nei, eaha’tu ra ïa te hope‘a ahani au i rave i te tahi atu e‘a, e ua parau atu, ‘Oia mau, a horo‘a mai to oe fenua e na‘u e haapa‘o i te reira ?’Ua taiva paha ïa oia. Eiaha noa te reira ana‘e, te vai atoa ra ïa te hoê Aposetolo maamaa, o tei riro ei taata tano no te taiva atoa. Ua riro anei râ te reira ei faahemaraa no‘u ? Aita roa. Eita te reira e tupu i te hoê peresibutero tei î i te Varua o te Atua no te ite i te huru–ê–raa i rotopu i te hoê hanere tauatini tara peretane e te hoê tuhaa i roto i te ti‘a–faahou–raa matamua, ma te mana no te mareva ê atu na te mau melahi e te mau atua i to’na faateiteiraa e to’na hanahana e no te ti‘a atu i mua i te aro o te Atua e o te Arenio e a muri e amuri noa’tu.⁵

Te mau haapiiraa a Wilford Woodruff

No te mea ho‘i e ua horo‘a mai te Atua ia tatou te ti‘amâraa, e faahapahia ïa tatou no ta tatou mau ohipa.

Ua horo‘a te Atua i ta’na mau tamarii paatoa no teie nei tau tuuraa evanelia, mai ta’na atoa i horo‘a i ta’na mau tamarii o te mau u‘i na mua’tu, te ti‘amâraa tata‘itahi. Ua riro noa na teie nei ti‘amâraa ei faufaa ai‘a no te taata i raro a‘e i te arata‘iraa e te faatereraa a te Atua. Ua farii [tatou] i te reira i te ra‘i teitei roa ra hou te ao i hamanihia’i, e ua tape‘a e ua paruru te Fatu i te reira i te mau aroraa a Lucifero e o ratou tei piri atu ia’na e tae noa’tu i te ti‘avaru–raa–hia o Lucifero e te hoê i ni‘a i te toru o te mau nuu o te ra‘i. [a hi‘o Te Apokalupo 12:1–9; PH&PF 29:36–37; Mose 4:1–4]. Na roto i teie nei ti‘amâraa i riro ai outou e o vau nei e te taata atoa ei mau taata ti‘aau, no te ti‘aau i te e‘a o ta tatou e pee, te oraraa o ta tatou e ora, te mau ohipa ta tatou e rave i roto i te tino nei.⁶

E tuhaa te reira no te faanahoraa ohipa o te ra‘i ia ore ia faahepo i te tahi taata ia haere i te ra‘i, ia ore e faahepo i te feruriraa, ia vaiiho râ ia’na ia faaoti no’na iho. Ua hohora mai [te Atua] i mua i te taata Ta’na i hamani i te evanelia mure ore, te mau parau tumu no te ora e te faaoraraa, e ua vaiiho ia’na ia ma‘iti no’na iho aore râ ia pato‘i no’na iho, ma te iteraa papû e tei ni‘a ia’na iho te hopoi‘a o te mau hopea o ta’na mau raveraa.⁷

E hopoi mai ta tatou mau faaotiraa ia rave i te maitai aore râ i te ino i te mau hopearaa i roto i teie nei oraraa e i roto i te mau oraraa mure ore.

E farii paatoa te taata i te mea ta ratou i rave. Te mea ta tatou e ueue, te mea maitai aore râ te mea ino anei, e ooti ïa tatou i te hotu o taua mea ra [a hi‘o Galatia 6:7; PH&PF 6:33].⁸

Ua faaue mai te Fatu ia tatou e, e ti‘a roa ia tatou ia haapa‘o i ta’na mau faaueraaa mai te mea [e ti‘a] ia tatou ia farii i te mau haamaitairaa no te haapa‘oraa.⁹

Ia rahi to tatou haapa‘oraa i te mau faaueraa a te Atua, e rahi atoa ïa to tatou ti‘aturiraa e o te Atua to tatou hoa, e te hi‘o noa mai nei Oia ia tatou e o Ta’na Tamaiti o Iesu to tatou auvaha i te Metua ra, e Tei rotopu Oia i teie nei nunaa, e te aro nei Oia no te mau ti‘araa o Ta’na Feia Mo‘a, e e faatea ê Oia i te mau mauhaa tama‘i atoa o te faatanohia’tu i ni‘a ia Ziona.¹⁰

E ti‘a ia tatou ia haaputapû i te feruriraa o to tatou mau tamarii e te mau hopea ino no te raveraa i te hara aore râ te ofatiraa i te hoê o te mau ture a te Atua; e ti‘a ia ratou ia ite e na roto i te raveraa i te hape e farii ïa ratou i te oto e te ati o ta ratou e nehenehe e ape na roto i te raveraa i te ohipa ti‘a, e e nehenehe roa ia ratou ia haapii mai i teie nei ture na roto noa i te haapiiraa eiaha râ ia haapii mai no ni‘a i te oto e te ati na roto i te raveraa i te ohipa hape.¹¹

Aita roa’tu a‘e e apî e hoona ia hara noa’tu vau i roto i teie nei Ekalesia e teie Basileia. Eita e nehenehe ta tatou e hara ma te ore e farii i te faautu‘araa, mai te mea eita tatou e haapa‘o i te a‘o, e ite ïa tatou i te oto.¹²

Te mau taea‘e e te mau tuahine, e mata na i te imi i te Atua; a pii ia’na i roto i ta outou mau vahi mo‘emo‘e, e eiaha e fariu–ê–atu i te parau–ti‘a e te parau mau; aore roa e apî e noaa mai na roto i te raveraa i te reira, e ere râ outou i te mau mea atoa.¹³

Te mau taata o te ore e ora mai te au i te maramarama ta ratou i farii, e farii ïa ratou i te mauiui rahi i te reira iho taime aore râ i muri a‘e; eita ratou e farii i te oaoa e te poupou e te ora mai te taata o te haapa‘o i te mau faaueraa a te Atua e o te tamau noa i te rave i te mea ti‘a. E vai noa te feia ino i roto i te mata‘uraa. Aita e utu‘a maitai no te hoê tane aore râ te hoê vahine ia rave i te hara, aita e maitai e noaa mai. E mea maitai a‘e no tatou ia tavini i te Fatu, no te mea e oaoa rahi to ratou o te tavini i te Fatu i te poipoi, i te avatea e i te pô, te feia moni aore râ te feia vêvê.¹⁴

A ani atu i te mau taata atoa, te mau nunaa, te mau basileia aore râ te u‘i i teie uiraa, e parau mai ratou ia outou e te imi ra ratou i te oaoa, nahea râ ratou i te imiraa i te reira ? A rave i te tuhaa rahi roa‘e o te mau taata ei hi‘oraa, e te huru o ta ratou imiraa i te oaoa ? Na roto i to ratou tavini–oioi–raa i te diabolo, e te taata aore râ te mea hopea o ta te tamarii a te taata e haamori, e te taata ho‘i na’na te ture o ta ratou e hinaaro e haapa‘o, o te ture ïa a te Atua o te ra‘i. E ore ratou e haamori i te Atua eita atoa e faatura i to’na i‘oa, eita atoa e haapa‘o i ta’na mau ture, e faaino râ ratou i to’na i‘oa, tera mahana e tera mahana, e te imi nei, fatata te taatoaraa o te ao nei, i te oaoa na roto i te raveraa i te mau hara, te ofatiraa i te ture a te Atua, e te faainoraa i to’na i‘oa e te pato‘iraa i te puna otahi roa no reira mai te oaoa.

Mai te mea ua taa papû mau tatou e, eita e nehenehe te oaoa e noaa mai ia tatou na roto i te haereraa na ni‘a i te e‘a o te hara e te ofatiraa i te mau ture a te Atua, e ite ïa tatou i te maamaa o te reira, e ite ïa te mau tane e te mau vahine atoa e, no te farii i te oaoa e ti‘a ïa ia tatou ia itoito e ia rave i te mau ohipa no te parau–ti‘a, e ia rave i te hinaaro o to tatou Metua i te Ao ra, no te mea e farii tatou, i to’na ra rima, te taatoaraa o te oaoa, o te haamaitairaa, o te hanahana, o te ora, o te faateiteiraa, e te mau ora mure ore, o ta tatou e farii i teie nei oraraa aore râ i te oraraa mure ore.¹⁵

Ia haapa‘o tatou e ia faa’una’una tatou ia tatou iho i te mau viretu o te evanelia. Aita e faufaa e noaa mai na roto i te raveraa i te ohipa hape. E faatupu mai te haavareraa, te faainoraa, te inuraa ava, te ohumu, e te hunaraa i te Fatu o Iesu Mesia i te oto e te tatarahapa; e haaviivii te reira i te taata tei hamanihia mai te au i te hoho‘a o te Atua; e hopoi mai râ te raveraa i te ohipa ti‘a, te haapa‘oraa i te mau faaueraa a te Atua, te îraa i te aroha e te hamani maitai, i te oaoa e te hau e te Varua Maitai, e te hoê faateiteiraa i roto i te basileia o te Atua.¹⁶

E faautu‘ahia tatou e a muri noa’tu mai te au i te ture ta tatou i ma‘iti i te haapa‘o i roto i to tatou taime poto i ni‘a i te fenua nei.

Eiaha e vare noa, te tahi noa tau mahana te roaraa o to tatou oraraa i ô nei, area i te tahi atu pae o te paruru e ora ïa tatou e a muri noa’tu, e e ora tatou e e vai tatou a vai noa’i te Taata tei Hamani ia tatou, e to tatou hope‘a mure ore tei te huru ïa o to tatou oraraa i to tatou nei oraraa poto i te tino nei.¹⁷

Ia ite mau ana‘e tatou e, to tatou oraraa i mua nei– te oaoaraa a muri a’e, te faateiteiraa e te hanahana, aore râ to tatou oraraa ati a muri a’e, te viivii e te oto, tei te huru ïa o te taime poto ta tatou e faaohipa nei i roto i teie nei oraraa, e nehenehe ta‘u e parau e aita e faufaa no te hoê taata i raro a‘e i te ra‘i ia haamau- ‘a i to’na taime i te raveraa i te ohipa ino… Mai te mea e noaa noa’tu i te hoê taata te mau haamaitairaa no te tahi mau vahi, e ti‘a roa ïa ia’na ia farii mai te reira no ô mai i te Atua ra, no te mea aita to te diabolo e hinaaro i te haamaitai, e e ore oia e haamaitai i te mau tamarii a te taata nei; e haa râ oia no te arata‘i ê atu ia ratou i te mau e‘a no te parau–ti‘a e te parau mau.¹⁸

Ua horo‘a te Atua no te ra‘i, tei hamani i teie nei fenua e tei tuu i ta’na mau tamarii i ni‘a i te tino o te reira, ia ratou i te hoê ture e nehenehe ai ratou ia faateiteihia e ia faaorahia i roto i te hoê basileia hanahana. No te mea ua horo’ahia te hoê ture i te mau basileia atoa ra, e ua faaterehia te mau mea atoa e te ture i te ao taatoa nei. O tei faaterehia e te hoê ture ra ua faaorahia ïa e taua ture ra, e e farii oia i te utu‘a ta te ture i faataa no’na [a hi‘o PH&PF 130:20–21]. Teie te hinaaro o te Atua ia haapa‘o ta’na mau tamarii atoa i te ture teitei roa‘e, e ia farii ratou i te hanahana teitei roa‘e tei faataahia no te mau feia mure ore. Ua horo‘a râ te Atua i ta’na mau tamarii atoa te ti‘amâraa, no te ma- ‘iti i te ture ta ratou e haapa‘o.¹⁹

Aore roa e taata e farii i te hoê hanahana tiretiera maori râ ia haapa‘o oia i te hoê ture tiretiera; aore roa e taata e farii i te hoê hanahana teretetiera maori râ ia haapa‘o oia i te hoê ture teretetiera, e aore roa e taata e farii i te hoê hanahana tiretia maori râ ia haapa‘o oia i te hoê ture tiretia [a hi‘o PH&PF 88:19–33]. Te vai nei te hoê taa–ê–raa rahi i rotopu i te maramarama o te mahana i te avatea e te anaana o te mau feti‘a i te pô, aita râ taua taa–ê–raa ra i rahi a‘e i te taa–ê–raa o te hanahana i roto i te mau tuhaa e rave rahi o te basileia o te Atua.²⁰

Ua heheu mai te Fatu ia tatou te ture tiretiera, oia ho‘i, ua horo‘ a oia ia tatou te îraa o te evanelia a Iesu Mesia, e ua horo‘a ia tatou te iteraa no ni‘a i te mau parau tumu o te ora mure ore…

Mai te mea ua ti‘a ia tatou ia haere atu i roto i te ao tiretiera e e arata‘ihia ïa tatou e te varua e parahi ra i reira, e e vai tamau noa mai taua mau parau tumu e ti‘a ia tatou ia faaterehia. E ti‘a ia tatou ia farii i te hoê â varua e hoê â mau parau tumu i roto i teie nei ao, e e ti‘a ia tatou ia haapa‘o i te hoê ture tiretiera i ô nei, e ia hoê tatou i ni‘a i te parau tumu e tahoê nei i te nunaa o te Atua e parahi nei i mua i to’na ra aro, ia nehenehe ia tatou ia farii i te hoê â hanahana ta ratou e oaoa ra.

Teie te mau parau tumu e haapiihia ia tatou mai tera mahana i tera mahana, e e ti‘a ia tatou ia faaohipa i te reira, e e ti‘a ia tatou ia vaiiho i te hiti to tatou mana‘o haapa‘o noa ia tatou iho e te mau parau tumu hape atoa.²¹

E haamaitaihia te mau taata o te rave i te ohipa ti‘a, e e oto e e tarahapa mau te mau taata o te rave i te hoê e‘a no te aroraa’tu i te Atua aore râ i ta’na ohipa i roto anei teie u‘i aore râ i roto i te tahi atu u‘i… Mai te mea e rave te hoê taata i te ohipa ti‘a, e e itoito oia i te faaiteraa i te parau no Iesu Mesia, e e haapa‘o oia i te evanelia e e haapa‘o i ta’na mau fafauraa, e ia haere atu oia i tera’tu pae o te paruru e haere ti‘a’tu ïa oia i mua i te aro o te Atua e te Arenio; no to’na haapa‘oraa i te ture tiretiera e tomo atu ïa oia i roto i te hanahana tiretiera, e e paruruhia oia e taua ture ra, e e tomo atu oia i roto i taua hanahana na roto i te mau u‘i atoa o te mau tau. E maitai to te taata i raro a‘e i te ra‘i o te haapa‘o e o te tape‘a i te ture a te Atua i roto i na mahana rii o ta’na e ora i te tino nei.²²

E ti‘a ia tatou ia imi i roto i to tatou iho mau aau, e ia faaoti i tera iho taime e, e rave tatou i te ohipa no te parau–ti‘a, e e faatura tatou i to tatou Metua i te Ao ra, e e rave tatou i ta tatou hopoi’a i te Atua e i te taata, e e farii e e amui atu e e patu tatou i te basileia o te Atua, e i reira tatou e taa ai e mai te mea e hinaaro tatou ia noaa te oaoa e te haamauruururaa i te varua mure ore i roto i te îraa o te hanahana e ti‘a ïa i te taata ia haapa‘o i te ture tiretiera e ia faaanaanahia e te hoê tuhaa o te Varua tiretiera o te Atua; e e taa atoa ia tatou e na te raveraa i te hara, te ofatiraa i te ture a te Atua e te faainoraa i to’na i‘oa e hopoi mai i te oto e te ati e e hopoi atoa mai i te pohe i te pae tino e te pae varua. Mai te mea e haere tatou na te mau e‘a no te parau–ti‘a ore, e faaoto ïa tatou i te Varua Mo‘a e e faaoto tatou i to tatou mau taea‘e, e e hamani ino tatou ia tatou iho.²³

Ua faaitehia mai te e‘a no te ora e mai te mea eita tatou e haere na ni‘a i taua e‘a ra, aita’tu ïa e mea maori râ te pohe o te hi‘o mata mai ia tatou. A faaea na tatou e a feruri na maa taime iti–ia hi‘o tatou mai te mea e mea maitai a‘e no tatou ia farii i te ora aore râ i te pohe… Ua faaroo outou i te mau parau mau maramarama, tei faaitehia mai e te mana o te Varua Maitai, e te iteraa papû o Iesu Mesia, e teie nei te taime no outou ia faaoti o vai ta outou e tavini.²⁴

Ta outou mau haamaitairaa a muri atu, to outou faateiteiraa e to outou hanahana a muri atu, te mau ao hopea ore, tei te huru ïa o te e‘a ta outou e pee nei i ô nei. Mea ateatea maitai te e‘a i mua ia outou e arata‘i ra i te ora mure ore… Tei ia outou noa i te haereraa’tu teie nei na ni‘a i taua e‘a ra.²⁵

Ua tuu mai te Atua i te ora ia noaa ia tatou, na roto i te horo‘araa mai i te mau ture ohie no te haerea e te horo‘araa mai ia tatou te puai no te rave faaotiraa i te reira.

Te vai nei i mua ia tatou te ora, te ora mure ore e te hoê tuhaa i roto i te ti‘a–faahou–raa matamua; oia mau, te taatoaraa o te mau haamaitairaa ta te Atua i fafau i te mau taata tei ora i te tino nei, ua horo‘ahia mai ia outou na e e noaa ia outou mai te mea e rave outou i ta outou hopoi’a.²⁶

Tei te Feia Mo‘a i te mau Mahana Hopea nei te mau faaitoitoraa atoa; e mea papû e te titau mai ra to ratou haerea ia ratou.²⁷

Hoê ana‘e râ purumu ti‘a, e purumu afaro râ; e mea ohie e e mea maramarama roa te mau parau tumu e te mau ture e faatere nei ia outou i ni‘a i taua e‘a ra. Teie te e‘a ta tatou e haere atu, e te mana‘ o nei au e, ua haamaitai–rahi–hia tatou no te iteraa i te e‘a mau.²⁸

I teie nei, noa’tu eaha ta te Fatu e titau ia tatou, eita oia e titau mai i te tahi mea ia tatou e ore roa e maraa ia tatou i te rave. E nehenehe ta tatou e haapa‘o i ta’na mau faaueraa mai te au i te ti‘araa ta tatou e ti‘a nei e te mau rave‘a te vai nei ia tatou. Noa’tu te huru vêvê o te hoê tane aore râ, te hoê vahine e nehenehe ta raua e haapa‘o i te evanelia; e nehenehe ta raua e haere i mua e ia bapetizohia ia matara ta raua mau hara, e mai te mea e haapa‘o raua i te mau faaueraa a te Fatu e tuu atu ïa oia i roto i to raua rima te mana e te mau rave‘a no te faatupu i tei titauhia ia raua.²⁹

Te pure nei au ia tamau noa tatou i taua e‘a ra e ia tae tatou i te tahi atu pae o te paruru e oaoa ïa tatou i ta tatou nei buka aamu. E ite ïa tatou i to tatou aamu e ta tatou buka aamu i reira i roto i te vairaa buka rahi o te basileia tiretiera a to tatou Atua, e e ite ïa tatou i te mea ta tatou i rave na i roto i teie nei oraraa. Mai te mea ua rave tatou i te tahi mea hape e oto ïa tatou no te reira. E ti‘a ia tatou ia tatarahapa i te ohipa hape e ia tamata ia riro ei mea maitai a‘e. Te pure nei au e ia vai mai te Varua o te Atua ia tatou no te arata‘i e no te faatere ia tatou i roto i ta tatou mau tutavaraa e tae noa’tu i te taime ua oti ta tatou ohipa i ô nei, e ia pohe ana‘e tatou ia nehenehe ia tatou ia faariihia i roto i te Basileia o te Atua. E oaoa ïa tatou ia rave tatou i te ohipa ti‘a; te vai nei te hanahana i mua i te mau tamaroa e te mau tamahine a Adamu aore i hi‘ohia e te mata ra, aore i faaroohia e te tari‘a ra, aore ho‘i i ô i roto i te aau o te mau tamarii a te taata ra. Ua hunahia te reira i to tatou mata i teie nei mahana, e e ore roa e haamatarahia mai ia tatou e tae noa’tu i te taime e tomo atu ai tatou i mua i te aro o te Atua e te Arenio.³⁰

Aore roa e tane aore râ e vahine tei ora na i te fenua nei e tei haapa‘o i te mau faaueraa a te Atua e haamâ, aore râ e oto, ia haere ana‘e ratou i mua i te aro o te Atua.³¹

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

A tai‘o faahou i te aamu i te mau api 229-31. Eaha te mau parau tumu tei arata‘i i te faaotiraa a Elder Woodruff i ta’na pahonoraa i te taea‘e Benbow ?
A tai‘o i te taatoaraa o te piti o te paratarafa i te api 231. No teaha e ere i te natura o te Atua « ia faahepo i te taata ia haere i te ra‘i » aore râ ia « faahepo i te mana‘o » ? Eaha ta to tatou Metua i te Ao ra e rave nei no te faaitoitoraa ia tatou ia ma‘iti i te e‘a e arata‘i ti‘atu i te ora mure ore ?
Ua parau te peresideni Woodruff, « E farii paatoa te taata i te mea ta ratou i rave 231-32. Eaha te auraa no teie parau no outou ? Nahea teie nei faahitiraa parau e faahuru ê ai i te mau faaotiraa ta tatou e rave ?
Mai te au i te peresideni Woodruff, eaha te tahi mau haamaitairaa e tae mai i roto i teie nei oraraa ia haapa‘o ana‘e tatou i te mau faaueraa ? Eaha te tahi mau hope‘a e tae mai i roto i teie nei oraraa ia ma‘iti ana‘e tatou ia ore e haapa‘o i te mau faaueraa ? (A hi‘o i te mau api 233-35).
A tai‘o faahou i te mau paratarafa maha e te pae i te api 233. Eaha te mau hope‘a o te hara ?
Nahea ta tatou mau faaotiraa i te mau mahana atoa e hauti ai i ni‘a i ta tatou fâ mure ore ? (A hi‘o i te mau api 235-37). No teaha e mea faufaa ia haamana‘o e, e mea poto roa teie nei oraraa ia faaauhia i te mau tau mure ore ?
Eaha ïa ta outou e parau atu i te hoê melo o te utuafare aore râ hoa o te imi nei i te oaoa ma te haapa‘o ore i te mau faaueraa ? Eaha te mau ohipa tei tupu ta outou e nehenehe e faaite atu no te tauturu i taua taata ra ?
I to outou feruriraa no teaha te mau taata e mana‘o ai e, eita te ora e noa ia ratou ? A tuatapapa ai outou i te mau haapiiraa a te peresideni Woodruff i te mau api 237-38. eaha i to outou feruriraa te mau faahitiraa parau o te faaitoito ihoa râ i te mau taata e mana‘o nei i te reira feruriraa ?
Eaha ta te mau metua e nehenehe e rave no te faatura i te ti- ‘amâraa a to ratou mau tamarii ma te tamau noa râ i te tauturu i ta ratou mau tamarii ia rave i te mau faaotiraa parau–ti‘a ?

Te mau papa‘iraa mo‘a: Iosua 24:15; Isaia 64:4; Kolosa 3:24–25; 1 Nephi 3:7; 2 Nephi 2:25–30; Alama 7:14–25; 41:10; Helamana 14:30–31; PH&PF 130:20–21

farmhouse owned by John Benbow — Hoho‘a no te fare i fatuhia e John Benbow

woman — « O ratou o te tavini i te Fatu i te poipoi, i te avatea e i te pô e oaoa ïa ratou, e feia moni anei aore râ e feia vêvê anei ratou. »

man — « O ratou o te tavini i te Fatu i te poipoi, i te avatea e i te pô e oaoa ïa ratou, e feia moni anei aore râ e feia vêvê anei ratou. »