Pene 21
Te faaoromairaa e tae noa’tu i te hopea i te mau tamataraa e te pato‘iraa
Mai te mea e tape’a maite noa tatou e e haapa‘o ho‘i i roto i te mau taime tamataraa, e haapuai ïa te Fatu ia tatou e e faaohipa oia i te ati no te tauturu ia tatou ia faaineine no te hanahana tiretiera.
No roto mai i te Oraraa o Wilford Woodruff
Ua haapii te peresideni Wilford Woodruff e « tei roto tatou i te pe‘ape‘a ore ia rave noa ana‘e tatou i ta tatou hopoi‘a. « Noa’tu eaha te mau tamataraa aore râ te mau ati ta tatou e nehenehe e faaruru, e vai mai ïa te rima o te Atua i ni‘a ia tatou no te turu ia tatou. »1 I to’na haapiiraa i teie nei parau tumu, ua parau ia te peresideni Woodruff mai te au i te mau mea ta’na i ite i roto i to’na oraraa. Ua faaoromai oia i te hamani–ino–raa i te pae faaroo e te pae politita, te ohipa ino a te pupu taata iino, te pato‘iraa i te ohipa misionare, te ma‘i, te pohe o te mau melo no te utuafare e o te mau hoa, e te mau tamataraa i te mau mahana atoa o te oraraa. Ua ti‘a atu râ oia i mua i tera mau ati ma te faaroo eiaha râ ma te hepohepo rahi, ma te ti‘aturi i te mau fafauraa a te Fatu e te imiraa i te puai i roto i to’na iho iteraa papû o te evanelia.
I te ava‘e novema 1835, i te taime a tavini ai o Wilford Woodruff i te hoê misioni i te tuhaa apatoa no te Fenua Marite, ua farii oia e to’na mau hoa ratere i te arata‘iraa a te Fatu i roto i te hoê taime tamataraa. Ua papa‘i oia: « A ratere ai matou i te pô, … ua farara mai te hoê vero mata’i puai e te ua. Ua tae atu matou i te hoê tahora tei maraa mai no te ûa rahi, aita’tura e nehenehe ia matou ia haere atu ma te ore e faa’au i ta matou mau puaahorofenua… Ua opua ihora matou i te faati i te muaraa o te tahora, no te haere atu na roto; i to matou ra na reiraraa, i roto i te pouri e te mata’i e te ûa puai, ua mo‘e matou i roto i te mau uru raau me‘ume‘u, i roto i te ûa, te mata’i, te mau apoo pape e te mau tumu raau tei farara i raro. Ua haere matou fatata e piti ahuru taime na roto i te mau tahora pape… Ua aroha mai râ te Fatu ia matou i roto i to matou mau pe‘ape‘a, no te mea a perehahu noa’i matou i roto i te pouri, ma te ro‘ihia matou iho e ta [matou] mau animala i te ati pohe, ma te haere na pihai iho roa i te mau pari ahoro, ua anapa maira te hoê mori anaana ma te haati ia matou, e ua faaite mai i to matou ati rahi, no te mea tei te hiti matou i te hoê apoo hohonu. Ua vai noa te mori i pihai iho ia matou e tae noa’tu i te taime ua iteahia mai ia matou te hoê fare, e ua ite matou i te purumu ti‘a. »2
Teie ta te peresideni Woodruff i parau no ni‘a i teie nei ohipa i tupu, « Ua haere atura matou i to matou haerea ma te oaoa, noa- ’tu e ua ho‘i mai te pouri e ua tamau noa te ûa. »3 Te faaite mai nei teie faahitiraa i to’na huru i mua i te mau fifi o te oraraa nei. Ua haere noa oia i to’na haerea, ma te oaoa i te mau haamaitairaa a te Atua noa’tu ua vai noa â te tahi mau tamataraa.
Te mau haapiiraa a Wilford Woodruff
Te horo‘a mai nei te mau tamataraa e te pato‘iraa ia tatou te ite e te tauturu mai nei te reira ia tatou ia faaineine no te hanahana tiretiera.
E mea papû roa, e rave rahi mau taime, ua tupu te maereraa i roto i te mana‘o o te mau tane e te mau vahine, eaha te tumu te Atua i tuu mai ai i te mau tane e te mau vahine i roto i te hoê ao mai teie te huru, no teaha oia e vaiiho ai i ta’na mau tamarii ia haere na roto i te oto e te mauiui i ô nei i roto i te tino nei. Ua heheu mai te Fatu ia tatou te tahi mea no ni‘a i teie nei parau tumu, e ua haapii–maitai–roa–hia tatou no ni‘a i te reira ia ite e, e mea titauhia teie nei mea.4
E mea maramarama maitai, e e opuaraa na te Atua ia faati‘a i Ta’na Feia Mo‘a ia tamata hope–roa–hia, ia nehenehe ia ratou ia faaite i to ratou parau–ti‘a–raa e ia ite i te huru o te niu e patu ai ratou.5
A tupu ai ia tatou te hinaaro i te tahi mau taime, ia amuamu ia farerei ana‘e tatou i te haavîraa, te hamani–ino–raa, e te ati, te hinaaro nei au e parau i to‘u mau taea‘e e to‘u mau tuahine e, teie nei mau mea e faufaa ai‘a ïa na te Feia Mo‘a a te Atua… Aita roa’tu vau i tai‘o noa‘e i te parau no te hoê nunaa a te Atua i roto i te hoê noa‘e o te mau tau tuuraa o te evanelia o tei haere na roto i te oraraa, mai ta te feia o te tahi atu mau haapa‘oraa e parau nei, na roto i te hoê oraraa pe‘ape‘a ore ma te farii ore i te mau pato‘iraa huru rau… Ua piihia tatou ia haere na roto i te mau tamataraa e rave rahi mau taime, e aita vau e mana‘o e, e ti‘a ia tatou ia amuamu, no te mea ahani aita to tatou e mau tamataraa eita ïa tatou e au e parahi i roto i te tahi atu ao i pihai iho i te mau peropheta e te mau Aposetolo tei ≥êhia ropu ia ratou e taa ê atura, tei faasataurohia, etc… no te parau a te Atua e te faaiteraa ia Iesu Mesia.6
Eita e nehenehe… i te Feia Mo‘a a te Atua ia fatu ai‘a i te hoê basileia tiretiera ma te ore ratou e tamatahia no te hi‘o e, e haapa‘o tamau noa anei ratou i te mau fafauraa a te Fatu, e aore ra, aita.7
Ua pou… Iesu i raro a‘e i te mau mea atoa ra, ia ti‘a ia’na ia ti‘a atu i nia‘e i te mau mea atoa e ia taa i te mau mea atoa. Aore roa e taata tei pou i raro atu i te Faaora o te ao. Ua fanauhia oia i roto i te hoê fare animala, ua vai oia i roto i te hoê fatene, e ua haere oia mai reira e tae atu i te satauro, ma te mauiui ano‘ihia e te toto i te hoê terono o te aroha; e i roto i te taatoaraa o to’na oraraa i ô nei aore roa e tao‘a no te fenua nei tei riro ei mea maitai ia fana‘ o. Ua ora oia i te taatoaraa o To’na oraraa i roto i te veve, te mamae, te mauiui, te ati, te ohipa, te pure, te hevaraa e te oto e tae noa’tu i to’na poheraa i ni‘a i te satauro. Ua riro noa râ Oia te tamaiti fanau–tahi a te Atua e te Faaora o to te ao nei. E uihia paha te uiraa no te aha te Fatu i faati‘a’i i ta’na Tamaiti ia haere mai i ô nei e ia ora e ia pohe mai ta’na i rave. Ia tae ana‘e tatou i roto i te ao varua, e ia hutihia te paruru i reira paha tatou e taa ai te mau tumu o teie nei mau mea atoa.
I roto i te mau horo‘araa e te mau faanahoraa a te Atua i te taata nei, e au ra ua fanauhia tatou no te farii i te mauiui, te ati, te mau oto e te mau tamataraa; teie ta te Atua i faaoti ia faaruru te taata; e mai te mea e faaohipa ti‘a tatou i teie nei tamataraa, e riro ïa te ohipa ta tatou i rave ei haamaitairaa rahi no tatou, e ia farii ana‘e tatou i te tahuti ore e te ora mure ore, te faateiteiraa, te mau basileia, te mau terona, te mau hau hui arii e te mau mana e te mau haamaitairaa atoa no te îraa o te evanelia a te Mesia, e ite ïa tatou, e e taa ïa tatou e, no teaha tatou i piihia’i ia haere na roto i te hoê aroraa tamau i roto i tau matahiti ta tatou e ora i te tino nei.8
Eaha ïa te mau mea atoa ta tatou e nehenehe e rave aore râ e mauiui, ia faaauhia i te rahiraa o te mau basileia, te mau terono, e te mau hau hui arii ta te Atua i heheu mai ia tatou ?9
I roto i te tama‘i i rotopu i te pouri e te maramarama, e upooti‘a te Fatu e To’na nunaa.
I vai noa na te pato‘iraa i te Atua e Ta’na Mesia, te pato‘iraa i te maramarama e te parau mau mai te haamataraa e tae noa mai i teie nei. Teie te hoê tama‘i tei haamata i te ra‘i, i vai na na roto i te mau taime atoa e e vai noa â e tae noa’tu i te hopea, e tae noa’tu e faatere arii ai Oia o tei ti‘a ia faatere ra, i te mahana e tae mai ai Oia i roto i to’na hanahana i roto i te mau ata o te reva ra no te haava i te mau taata atoa mai te au i te mau ohipa i ravehia i te tino nei.10
I vai noa na te varua no te tama‘i o te itehia ra i teie nei mau mahana i te mau tau atoa a vai mai ai te autahu‘araa i ni‘a i te fenua nei. I vai noa na te hoê tama‘i i rotopu i te maramarama e te pouri, te Atua e te diabolo, te taata mo‘a e te taata hara, te mau parau tumu ti‘a e te mau haapiiraa haavare. Te vai nei i roto ia tatou iho te hoê tama‘i e te mau hiaai o to tatou natura.11
Te vai nei e piti na mana i ni‘a i te fenua nei e i rotopu i te mau nunaa o te fenua – te mana o te Atua e te mana o te diabolo. I roto i to tatou nei aai ua noaa ia tatou te tahi mau ohipa taa ê tei tupu. I te taime e nunaa to te Atua i ni‘a i te fenua nei, noa’tu eaha te tau, ua aro Lucifero, te tamaiti a te poipoi e te mau milioni varua tei hi‘a e tei ti‘avaruhia i rapae au i te ra‘i, i te Atua, i te Mesia, i te ohipa a te Atua, e i te nunaa a te Atua. E aita ratou e taiâ nei i te tama‘iraa i teie nei mahana e i teie nei u‘i. Te mau taime atoa ua opua te Fatu i te rave i te hoê ohipa, ua haa taua mau mana ra i te faataahuri i te reira ohipa.12
Eita tatou e aro i te mau mana ana’e no te pouri, te mau mana ite–ore–hia e te mata o te haati nei ia tatou, e ti‘a atoa râ ia tatou ia aro i te mau mea e rave rahi no te tino nei e no te aro i te mau fifi huru rahi e ti‘a ia tatou ia faaruru atu, e ia rahi teie mau fifi ta tatou e faaruru e rahi atoa ïa to tatou tura‘i–raa–hia ia rave i te ohipa, e ia tutava ma to tatou puai atoa i mua i te Fatu no te haamauraa i te parau–ti‘a e te parau mau e te paturaaa i te ohipa a te Atua, e ia hi‘o e ia faaturahia to’na ra i‘oa i ni‘a i te fenua nei.13
Ua ite te diabolo e, i te taime a horo‘a’i te melahi i [te Buka a Moromona] ia Iosepha Semita, o te niu ïa te reira no te hoê faanahonahoraa o te faataahuri i to’na ra basileia. Te mau ti‘avaruraa e te tahi atu mau mea… ta teie nei nunaa i faaruru, e ere ïa no te mea i riro na ratou ei feia ofati ture– e ere no te mea e mea ino a‘e ratou i te tahi atu mau taata, no te mea râ te haamau ra ratou i te niu no te basileia o te Atua o te tupu, e o te rahi atura, … e o te faaineine i te e‘a no te taeraa mai o te Fatu ra o Iesu Mesia te arii o te mau arii e te Fatu o te mau Fatu, o te haere mai e faatere i ni‘a i te taatoaraa o te fenua, e e ti‘a i te tahi atu mau basileia atoa, e te mau peresideni e te mau tavana, e to ratou mau taata ia ite e, o Iesu te Mesia. E na te ohipa i te mau mahana hopea nei ta tatou e ti‘a atu nei e ruuruu i te mana o te diabolo tei faatere na i rotopu i te mau tamarii a te taata nei… I reira e ere anei i te mea maere, e e riri mai te diabolo, e e faati‘arepu oia i te feia ino ia aro atu i te ohipa o teie nei mau mahana hopea nei. E e faauru te Fatu i Ta’na mau tavini e e horo‘a Oia ia ratou te aravihi no te tape‘a i teie nei basileia i ni‘a i te fenua nei. Tei te upoo Oia. Eita vau e ti‘aturi rahi i teie nei ohipa ahani e ere oia te tumu no te reira– eita te reira e vai noa mai te mea aita Oia no te aroraa i te mana rahi o te aro nei i te reira.14
E ti‘a ia tatou ia ara i ta tatou hopoi’a, e ia pii i te Fatu ma te haehaa, e ia ora i pihai iho Ia’na; e e araara to tatou nei mata, mai te aamu o te tamaiti apî, te tavini no te peropheta tahito o Elisaia, e e ite tatou e, e mea rahi a‘e tatou i te feia e aro mai nei ia tatou [a hi‘o 2 Arii 6:8–17]; e te faarû nei te ohipa pato‘i i te faatupuraa i te mau opuaraa a te Atua. A tuu i to outou ti‘aturiraa i te Atua e a ti‘aturi i Ta’na mau fafauraa, ma te oraraa mai te au i te maramarama e te ite ta outou e mau nei; e e mea maitai te mau mea atoa ia outou o te ora ra aore râ o te pohe ra.15
Te hi‘o mai nei te Fatu ia tatou i roto i te mau taime tamataraa, ma te haapuai ia tatou mai te au i to tatou faaroo, to tatou haehaa e to tatou haapa‘o.
E parau mau roa e ore roa tatou e faaruru hau atu mai ta te Faaora i faaruru, aore râ mai ta’na i faaruru. Ua vai haapa‘o e itoito noa râ Oia i roto i te taatoaraa o To’na oraraa i To’na ra Metua e To’na piiraa ei Faaora no te ao nei. Ua pure rahi Oia e ua oto Oia i mua i te Fatu no te mau hara a to te ao nei. I teie nei mahana tei rotopu Oia ia tatou. O Oia to tatou arai i te Metua.[PH&PF 29:5] Te tia‘i ra Oia ia tatou, e e rave Oia i te mau mea atoa e nehenehe Ia’na no te faaoraraa ia tatou.16
Ua hamani–ino–hia tatou, ua farii tatou i te ati, e ua faaruru atu tatou i te mau tamataraa rahi i roto i to tatou nei oraraa; ua mau râ te Fatu ia tatou na roto i teie nei mau mea atoa.17
Te rahi noa’tura te mau ati e te mau pe‘ape‘a i ni‘a i te fenua nei, e te vai nei te hoê auraa no teie nei mau mea. A haamana‘o i teie, e a feruri i ni‘a i teie nei mau mea. Mai te mea e rave outou i ta outou hopoi’a, e e rave au i ta‘u hopoi’a, e farii ïa tatou i te parururaa, e e haere atu tatou na roto i te mau ati ma te hau e te pe‘ape‘a ore.18
Ua titauhia te ti‘amâraa o te feruriraa, te aau parau–ti‘a, te faaroo i te Atua e te paari o te huru taata ia ora i te oraraa o te hoê Feia Mo‘a i te mau Mahana Hopea nei, i mua i te hoê ao e ore e farii nei ia tatou, e i rotopu i te mau tamataraa e te mau pe‘ape- ‘a e te hamani–ino–raa.19
Ua ineine Daniela i te tomoraa’tu i roto i te ana liona; aita na tamarii ati Iuda e toru[Sadaraka, Meseka, e Abede–nego] i mata‘u i te hope‘a e tia‘i nei ia ratou; ua itoito te mau Aposetolo no te parau mau e aita ratou i mata‘u i te pohe no te parururaa i te parau mau, e no teaha i nehenehe ai i taua mau taata e te tahi atu i roto i te hoê â huru oraraa ia haapa‘o i to ratou iteraa ma te taiâ ? No te mea, na mua roa, tei ia ratou ra te parau mau e ua ite ratou i te reira no ratou iho, e a piti, ua turu te Varua Maitai, te Faaa‘o, ia ratou no te mea e nehenehe i taua mana ra ia tauturu oia ana‘e i roto i te mau ohipa fifi atoa ta te nunaa a te Atua i piihia no te faaruru atu. Mai te reira atoa i teie nei mahana.20
Ua feruri pinepine au e aita vau i ite i teie nei nunaa hau atu i te oaoa i roto i to ratou mau tau no te vêvê rahi, no to ratou ti‘avaru– raa–hia e to ratou mau ati, no te parau a te Atua e te faaiteraa ia Iesu. Ua vai noa te Varua o te Atua ia ratou ra, e i roto i to ratou haehaa e to ratou mau mauiui, ua riro noa te Varua Maitai, te Faaa‘o, ei hoa tamau no ratou, e ua î ratou i te oaoa e te tamahanahanaraa, e ua oaoa ratou i mua i te Fatu no teie nei mau mea atoa. Eita ratou e ite i te reira ahani aita ratou i tamata i te haapa‘o i te mau faaueraa a te Fatu.21
Te vai nei te titauraa ia tatou ia tatarahapa e ia faahaehaa ia tatou iho i mua i te Fatu to tatou Atua, e ia nehenehe ia tatou ia farii e ia oaoa hau atu â i te Varua Mo‘a no te faaineine ia tatou no te mau mea e vai nei i mua ia tatou.22
Te hinaaro nei au e faaite i to‘u iteraa papû i te Feia Mo‘a i te mau Mahana Hopea nei. Te vai nei te Atua i rotopu i teie nei nunaa. Te patu nei Oia i to tatou nei haerea, e e tamau noa oia i te raveraa i te reira mai te mea noa e faaroo tatou i To’na ra reo, e e tamau noa Oia i te horo‘a mai ia tatou te maitai no te ti‘a atu i te mahana no te tamataraa e te pe‘ape‘a. Ua aroha te Fatu i To’na nunaa i te mau tau atoa o te ao nei; e mai ta te Mesia i mauiui, mai ta te mau Aposetolo i mauiui – ua mauiui te tahi o ratou e tae noa’tu i te pohe–no te faaiteraa ia Iesu, ua mauiui atoa te Feia Mo‘a i te mau Mahana Hopea nei, e ua taati atoa te tahi o ratou i to ratou iteraa e te toto o to ratou ra ora. Ua piihia ratou no te haere atu na roto i te mau ati rahi no te maitai o te Evanelia, aita râ tatou i titauhia ia faaoromai hau atu i te mea e ti‘a ia tatou ia faaoromai, e ore roa tatou e farii i te ati a pee noa’i tatou i te mau a‘o no ô mai i te ra‘i ra.23
Ua torohia mai te rima o te Atua no te faaoraraa i teie nei nunaa, e noa’tu te huru pouri o te mau ata, noa’tu te huru o te puai o te hamani inoraa, te faatîtîraa e te pato‘iraa i teie nei ohipa, ua tia‘i noa te Fatu, mai te haamataraa o teie nei ohipa e tae noa mai i teie nei mahana i ni‘a i te maitai o teie nei ohipa, e ua turu oia e ua paruru i te reira, e e tamau noa â oia i te na reira e tae noa’tu i te hopea ra, e tae noa’tu i te taime e ti‘a mai ai o Ziona i ni’a e ia oomo ho‘i i to’na ra mau ahu nehenehe roa e tia‘i, e ia oti te mau ohipa rarahi atoa o te mau mahana hopea nei.24
Te mau mana‘o tauturu no te tuatapaparaa e te haapiiraa
A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.
-
A tai’o i te aamu i te mau api 241-43. Eaha ta outou e haapii mai roto mai i teie nei aamu ?
-
E rave rahi mau taata o te ui nei e no teaha te Atua e faati‘a’i i Ta’na mau tamarii « ia haere atu na roto i te oto e te ati » (api 243). Nahea to te peresideni Woodruff pahonoraa i teie nei uiraa ? (A hi‘o i te mau api 243-45)
-
No teaha Iesu i titauhia’i ia mauiui ? (A hi‘o i te api 245; a hi‘o atoa Alama 7:11–12; PH&PF 88:6.) Nahea Oia i te pahonoraa i te pato‘iraa ? (A hi‘o i te mau api 247-49 Nahea tatou ia pee i To’na hi‘oraa ?
-
Ua haapii te peresideni Woodruff e « i vai noa na i te taatoaraa o te taime » te tama‘i i rotopu i te maramarama e te pouri (api 245). Nahea outou e ite ai i teie nei tama‘i i te tamau–noa–raa i teie nei mahana ? Eaha ta tatou e nehenehe e rave no te paruru ia tatou iho e to tatou mau utuafare i roto i teie nei tama‘i ? (A hi‘o i te mau api 246-49)
-
Nahea to outou « tura‘i–raa–hia ia rave i te ohipa » (api 246) ei hope‘a no te mau tamataraa ?
-
A tai‘o i te 2 Te mau Arii 6:8–17. Eaha tei haaputapû ia outou i roto i teie nei aamu ? Eaha ta te peresideni Woodruff i haapii a faahiti ai oia i teie nei aamu ? (A hi‘o i te api 247)
-
Nahea te Fatu e tauturu ai ia tatou ia faaruru atu i to tatou mau tamataraa ? (A hi‘o i te mau api 248-49; a hi‘o atoa Mosia 24:13–16.) Eaha te mea e ti‘a ia tatou ia rave no te faarii i te tamahanahanaraa e te puai ta te Fatu e pupu mai nei ? Nahea to te Fatu tautururaa ia outou ia faaoromai i te mau tamataraa ?
Te mau papa‘iraa mo‘a: 2 Nephi 2:11–24; Alama 36:3; PH&PF 58:2–5; 101:1–5; 121:7-8, 29; 122:5–9
Mai te Feia Mo‘a matamua i te mau Mahana Hopea nei, e farerei paatoa tatou i te mau tamataraa. Ua haapii te peresideni Woodruff e te faati‘a nei te Atua e ia tamatahia Ta’na Feia Mo‘a « ia nehenehe ia ratou ia faaite i to ratou parau–ti‘a e ia ite i te huru o te niu i ni‘a iho ratou e patu ai. »
« Fanauhia i roto i te hoê fare animala, ua vai oia i roto i te hoê fatene, ua haere Iesu Mesia mai reira e tae atu i te satauro, ma te mauiui ano‘ihia e te toto i te hoê terono o te aroha »