Pene 22

Te ohipa pae tino e te pae varua, « te hoeraa i roto i te ohipa »

I roto i ta tatou mau tutavaraa no te haapuai i to tatou mau utuafare e te paturaa i te basileia o te Atua i ni‘a i te fenua nei, e ti‘a ia tatou ia rave i te ohipa i te pae tino e te pae varua.

No roto mai i te Oraraa o Wilford Woodruff

I te mau mahana matamua o te Ekalesia, ua a‘o pinepine te mau peropheta e te mau aposetolo i te nunaa ia rave i ta ratou tuhaa no te paturaa i te basileia o te Atua. Ua titau teie nei tutavaraa i te ohipa i te pae varua e te pae tino. Taa ê noa’tu i te mau ohipa mai te pureraa, te tai‘oraa i te mau papa‘iraa mo‘a, e te faaiteraa i te evanelia, ua patu te Feia Mo‘a i te mau fare e te mau oire, ua haamau i te mau fare haapiiraa na te huiraatira, ua tanu e ua faarari i te repo paari, e ua huti mai te ofa‘i ereere na ni‘a mai i te mau mou‘a no te paturaa i te hiero no Roto Miti. I te matahiti 1857, hoê ahuru matahiti i muri a‘e i to te Feia Mo‘a i te mau Mahana Hopea tomoraa’tu i roto i te Faa no Roto Miti, ua parau o Elder Wilford Woodruff: « Mai te mea e haere tatou iho e rave i te ohipa e e patu i te basileia o te Atua, noa’tu eaha te huru o ta tatou ohipa no te paturaa i te basileia, i roto anei i te paturaa i te hoê faataheraa pape, aore râ i roto anei i te paturaa i te hoê hiero, i te pororaa anei i te evanelia, te faapuraa anei i te fenua, aore râ te tahi ohipa ê atu… E ite ïa tatou e, e tauturu te Fatu ia tatou e e turu oia ia tatou, e e horo‘a mai oia i to’na puai, e e tauturu oia ia tatou i roto i te mau mea atoa e ti‘a ia tatou ia rave. »¹

Ua ite o ratou tei matau i te peresideni Woodruff e aita oia i parau vaha noa i te faufaa o te rave–puai–raa i te ohipa–ua faaohipa oia i te parau tumu i roto i to’na oraraa. Taa ê noa’tu i te faarahiraa i to’na mau piiraa i roto i te autahu‘araa, ua itoito oia i roto i ta’na mau ohipa i te pae tino, e tae noa’tu i to’na ru‘auraa. Ua papa‘i te taata papa‘i aamu Feia Mo‘a o Andrew Jenson: « Ua riro to’na itoito i te ohipa ei tuhaa itehia e te mata no to’na huru, e i te iva ahururaa o to’na matahiti, ua aravihi a‘e te hoê o ta’na mau mootua ia’na i te vaere i roto i te aua pota, ua parau oia ma te haehaa: ‘E, teie te taime matamua i roto i to‘u nei oraraa ua aravihi a‘e te hoê o ta‘u mau tamarii i te ohipa vaere.’²

Ua parau te hoê taata tei ora i te tau o te peresideni Woodruff: « E mea au na’na i te rave i te ohipa, eiaha no te ohipa noa, no te mea atoa râ e faaueraa te reira na te Atua. E ere te ohipa ei rave‘a noa na’na no te haere atu i mua i roto i te ao nei, ma te amui atu te mau mea maitai e te fana‘o i to’na iho oraraa e no te mau taata ta’na e faaamu nei; ua riro te ohipa ei haamaitairaa na’na, ei rave- ‘a, ei taime ta’na e faaohipa mai te peu e faati‘a to’na piiraa ia na reira oia… Ua riro te hou i ni‘a i te rae ei faaueraa na te Atua mai te pure; ua faahoho‘a teitei oia i roto i to’na oraraa e na te oraraa kerisetiano ohie e faatupu i te oraraa maitai o te taata i te pae tino, i te pae feruriraa e te pae morare. Ua ti‘aturi maite oia i te maitai morare no te ohipa i te pae tino. Ua here oia e ua oaoa oia i te reira. »³

Te mau haapiiraa a Wilford Woodruff

A patu noa’i tatou i te basileia o te Atua, e rave atoa tatou i ta tatou mau ohipa i te pae tino.

Ua parau pinepine to tatou peresideni [Brigham Young] ia tatou e, eita e nehenehe ia tatou ia faataa ê te pae tino i te pae varua, e ti‘a râ ia raua toopiti ia rave amui i te ohipa, o te reira ihoa e e ti‘a ia tatou ia rave i te ohipa no te paturaa i te Ekalesia e te basileia o te Atua.⁴

Te mana‘o nei te tahi o te mau taata e, aita ta te Peresideniraa o teie nei Ekalesia e na Ahuru ma Piti Aposetolo e auraa no te mau mea no te pae tino. E, tei roto ïa tatou i te hoê huru ino mai te mea aita tatou e tau‘a nei i te mau mea no te pae tino.⁵

Te patu nei tatou i te basileia mau o te Atua i ni‘a i te fenua nei, e te vai nei ta tatou mau hopoi‘a i te pae tino e ti‘a ia tatou ia rave. Te faaea nei tatou i roto i te mau tino tahuti nei, te amu nei tatou i te maa tahuti, te patu nei tatou i te mau fare tahuti, te faaamu nei tatou i te mau puaatoro tahuti e te sitona tahuti; te aro nei tatou i te mau aihere tahuti, e te mau enemi tahuti i roto i to tatou nei repo, e te horo‘a mai nei teie nei mau mea i te titauraa ia haere atu e rave i te mau hopoi‘a e rave rahi o te hoê natura tahuti e te fifi, e tei roto ïa te reira i ta tatou nei haapa‘oraa.⁶

Eita e nehenehe ta tatou e patu ia Ziona ma te parahi noa i ni‘a i te hoê tapu raau ma te himeneraa i te oaoa mure ore; e ti‘a ia tatou ia faaapu i te fenua, e ia rave i te mau ofa‘i e te mau mauhaa mai roto mai i te mau mou‘a e ia patu i te mau hiero i te Atua Teitei; e ua anihia ia tatou teie nei ohipa tahuti nei e te Atua no te ra‘i, mai ta’na i titau i te Mesia ia pohe no te faaora i te ao nei, aore râ mai ta te Faaora i titau ia Petero, Iakobo e Ioane ia haere e poro i te evanelia i te mau nunaa atoa o te fenua nei. Teie te tau tuuraa rahi i reira te Ziona no te Atua e patuhia’i, e e ti‘a ia tatou te Feia Mo‘a i te mau Mahana Hopea nei ia patu i te reira.⁷

I roto i te mau ohipa tahuti nei, e ti‘a roa ia tatou ia farii poupou i te a‘o a te Fatu e a Ta’na mau tavini.

Mai te haamataraa mai o teie nei ohipa e tae roa mai i teie nei mahana e mea huru paari a‘e te ohipa a te mau tavini a te Atua ia faaineine i te nunaa i roto i to ratou aau ia vaiiho i te Fatu ia faatere e ia hi‘opo‘a ia ratou i roto i ta ratou ohipa e ta ratou mau rave‘a tahuti i te mau mea no to ratou oraraa mure ore …

Te vai nei te tahi mea huru ê no ni‘a i teie ohipa, te mana‘o nei râ vau, penei a‘e, e hopea te reira no te ti‘araa ta tatou e mau nei. Te vai nei te hoê paruru i rotopu i te taata e te mau mea mure ore; ahani e faatea–ê–hia’tu taua paruru ra e ua nehenehe ia tatou ia ite atu i te mau mea mure ore mai to ratou ihoa huru i mua i te Fatu aore ïa e taata e faahemahia e te auro, te ario aore râ te mau mea no teie nei ao, e aore e taata, no teie nei mau mea, o te ore e hinaaro ia vaiiho i te Fatu ia faatere ia ratou. I ô nei râ e ti‘amâraa to tatou, e tei roto tatou i te hoê tau tamataraa, e te vai nei te hoê paruru i rotopu ia tatou e to tatou Metua i te Ao ra e te ao varua; e teie no te hoê ïa opuaraa paari e te au maitai i roto i te Fatu to tatou Atua, ia faaite mai te mea e haapa‘o te mau tamarii a te taata i ta’na ture aore râ aita i roto i te vahi i tuuhia ai ratou i ô nei. E te Feia Mo‘a i te mau Mahana Hopea e, a feruri i teie nei mau mea. Ua hinaaro tatou, ma to tatou atoa mana‘o e to tatou aau, ia arata‘i e ia faatere o Iosepha Semita, te peresideni Young e te mau taata faatere o te nunaa no ni‘a i to tatou mau maitai mure ore; e te mau haamaitairaa tei taatihia i ni‘a iho ia tatou e to ratou ra mana, e haere atu ïa i roto i te ao varua e e vai noa mai i muri a‘e i te pohe, e e mana to ratou i ni‘a i to tatou hopearaa e a muri noa’tu.

Ua taatihia i ni‘a i te mau taata, i te tau o Aberahama, Isaaka et Iakoba, e Iesu e te mau Aposetolo, te mau haamaitairaa, te mau basileia, te mau terono, te mau hau hui arii e te mau mana, e te mau haamaitairaa atoa o te Fafauraa Apî e te mea mure ore. E nehenehe te uiraa e uihia mai, e faufaa anei to teie nei mau haamaitairaa mure ore no tatou ? E mea faufaa ratou, aore râ e ti‘a i te reira ei faufaa ? E mea faufaa e e ti‘a ia ratou ia riro ei mea faufaa. E hoona anei teie nei mau haamaitairaa i ta tatou nei faufaa tahuti, mea iti anei aore râ mea rahi anei ? E mea hoona anei te ora, te ora mure ore no na puaatoro e piti, no te hoê fare, no na hanere ahuru ta fenua, aore râ no te mau mea ta tatou i mau i ô nei i te tino nei ? Mai te mea e hoona te reira e ti‘a ïa ia tatou ia faati‘a i te Fatu ia faatere e ia hi‘opo‘a ia tatou i roto i ta tatou atoa mau ohipa tahuti mai ta tatou e rave nei i roto i ta tatou mau ohipa varua.

Teie â, ia pohe ana‘e te hoê taata eita e nehenehe ia’na ia rave i ta’na mau puaatoro, ta’na mau puaahorofenua, to’na mau fare aore râ to’na mau fenua na muri ia’na; e haere oia i te menema–te vahi faafaaearaa no te mau tino atoa. Aore roa e taata e ape i te reira, te vai nei te ture no te pohe i ni‘a i te mau taata atoa. Ua hope te taata i te pohe ia Adamu, e hope i te faaorahia i te Mesia [a hi‘o 1 Korinetia 15:22].Ua taa paatoa tatou e ua tae te pohe i ni‘a i te mau taata atoa, area râ… aore roa te hoê o tatou i ite eaha te taime no to tatou pohe, noa’tu e ua ite tatou eita e maoro roa hou tatou e piihia’i ia pee atu i te mau u‘i tei na mua’tu ia tatou. Ia feruri ana‘e tatou i teie nei mau mea te mana‘o nei au e, e ti‘a ia tatou paatoa ia vaiiho i te Fatu ia arata‘i ia tatou i roto i te mau ohipa tahuti nei.⁸

Tei roto i te oraraa i te evanelia te haapiiraa pae varua e te haapiiraa pae tino amuihia e te ohipa parau–ti‘a.

Te vai nei te hoê parau paari aore râ parau o ta‘u i faaroo e rave rahi mau taime i roto i to‘u nei oraraa, e ta‘u e mana‘o nei e, e mea faufaa rahi roa, e o te na ô ra, « e mea puai te parau mau e e vai â oia. » Te mana‘o nei au e ua faaitehia te reira i roto i te mau aravihi atoa i reira i te faaohipa–raa–hia te parau mau i te pae tino aore râ i te pae varua; ua faaohipahia anei no te maitai o te mau nunaa aore râ no te mau utuafare aore râ no te mau taata tata‘itahi; ua faaohipahia anei i to te ao aore râ i te Basileia o te Atua.⁹

E parau mau ta‘u e parau nei e tei roto i te paturaa o te Ziona a te Atua i teie nei mau mahana hopea nei, te mau tuhaa atoa o te imiraa faufaa, te pae tino e te pae varua, ta tatou e rave nei. Eita e nehenehe ia tatou ia paraparau no ni‘a i te hoê parau tumu tei au i te ture i mua i te Atua e te taata tei ore i tuuhia i roto i to tatou nei haapa‘oraa. Tei roto i te evanelia a Iesu Mesia ta tatou i farii e ta tatou e poro nei, te taatoaraa o te parau mau e te mau piiraa e te ti‘araa mana o te taata.¹⁰

Eiaha ta tatou mau tamarii ia ore ia haapa‘ohia; e ti‘a ia ratou ia farii i te hoê haapiiraa tano i roto i te mau mea o te pae varua e i te pae tino. Tera te faufaa ai’a maitai roa‘e ta te mau metua e nehenehe e vaiiho atu i ta ratou mau tamarii.¹¹

A rahi ai te hinaaro i te haapii i te mau mea i roto i te mau buka, eiaha râ te ohipa rima ia haapa‘o–ore–hia. E ti‘a te haapiiraa i te feruriraa e te haapiiraa o te tino ia haere amui noa. E ti‘a i te hoê roro aravihi ia amui atu i te hoê rima aravihi. Ia vai hanahana noa te ohipa rima i rotopu ia tatou e ia vai tura noa te reira. Te itehia nei teie peu i rotopu i te feia apî tane o te titau i te tahi noa maa haapiiraa iti e o te mana‘o i muri iho eita ratou e tano no te mau ohipa matini aore râ te tahi atu mau ohipa rima, ia ore ïa te reira peu ia faati‘ahia ia rahi i rotopu ia tatou nei… E ti‘a i te mau taata atoa ia faariro ei te’ote’oraa ia riro ei taata faatupu eiha noa râ ei taata amu. E ti‘a ia haapiihia i ta tatou mau tamarii ia haapa‘o ia ratou iho na roto i ta ratou iho ohipa e to ratou iho aravihi, eiaha noa râ ia rave i te reira, ia tauturu atoa râ i te tururaa i te tahi mau taata, e ia rave i te reira na roto i te ohipa parau–ti‘a o te hoê ïa o te mau rave‘a hau atu i te maitai ta te Atua i horo‘a i Ta’na mau tamarii i ô nei i ni‘a i te fenua nei. Te parau no te haapiiraa tano no te Feia apî no Ziona o te hoê ïa parau tumu hau atu i te faufaa.¹²

I roto i ta tatou imiimiraa faufaa, e ti‘a ia tatou ia haapa‘o i to tatou mau utuafare, ia haapa‘o i te ture no te tuhaa ahuru, ia horo‘a hua i ta tatou mau rave‘a, e ia ape i te tarahu.

No ni‘a i ta tatou mau mea tahuti nei, e ti‘a ia tatou ia haere e rave i te ohipa e ia haapa‘o ia tatou iho.¹³

E no te mau tao‘a rahi e te faufaa, aita vau e hinaaro mai te mea e faahapahia vau no ratou. Te hinaaro nei au ia nava’i ia‘u no te faaahu, no te hoo i te tiaa e no te faaamu i to‘u [utuafare], e ia maitai ratou, e mai te mea e noaa te reira na roto i te parau–ti‘a i mua i te Fatu; e mea hau a‘e râ na‘u ia vai noa vau e o ratou atoa i roto i te vêvê eiaha râ ia faufaahia e ia haamouhia. E mea ataata te mau tao‘a rahi maori râ ia faaohipa tatou i te reira eiaha râ no te haamou ia matou; mai te mea eita e nehenehe ia tatou ia faaohipa i te reira no te hanahana o te Atua e no te paturaa i to’na basileia, e mea maitai a‘e tatou mai te mea aita ratou.¹⁴

Te faariro nei te tahi mau taata i te ture no te tuhaa ahuru mai te hoê tute e te hoê hopoi‘a tei tuuhia i ni‘a iho ia ratou, e no vai râ ? Ta tatou tuhaa ahuru, ta tatou ohipa, e te mau mea atoa ta tatou e rave i roto i te basileia o te Atua, no vai ïa teie nei mau mea atoa ?… Ta tatou tuhaa ahuru, ta tatou tutavaraa, ta tatou mau ohipa e ere ïa no te faateiteiraa o te Mana Hope, no tatou râ… Ia taa ia tatou i te reira, e maitai ïa tatou. Na roto i te aufauraa i ta tatou tuhaa ahuru, na roto i te haapa‘oraa i te mau ture atoa tei horo‘ ahia mai no te faateitei ia tatou e no te haamaitai ia tatou, no to tatou iho ïa maitai tata‘itahi e no te maitai o ta tatou mau tamarii, e ere no te hoê noa‘e maitai o te Fatu, maori râ e mauruuru oia i te haapa‘o–maitai–raa o ta’na mau tamarii e te hinaaro nei oia ia ratou ia haere na ni‘a i te e‘a e arata‘i atu i te faaoraraa e te ora mure ore.¹⁵

E hi‘o noa tatou na pihai iho ia tatou no te haapapû ia tatou iho… e o ratou tei horo‘a rahi no te tautururaa i te ohipa a te Atua ua herehia ïa ratou e te Fatu. Teie te ohipa i tupu i Iseraela tahito ra, e teie te ohipa e tupu nei ia tatou. No ni‘a i te mau horo‘a a te taata iho ua rahi roa te haapa‘o–ore–raa, noa’tu te mau fafauraa faufaa rahi roa tei tu’atihia’tu i ni‘a i te reira. E ti‘a i te Feia Mo‘a ia faahaamana‘ohia i te titauraa e vai nei i ni‘a ia ratou. E ti‘a atoa i ta tatou mau tamarii, ia haapiihia i teie hopoi‘a, ia riro te reira ei peu matauhia e ratou no te haapa‘oraa i teie nei mau mea. E nehenehe ta te mau taata tei haapa‘o maitai i teie nei mau titauraa ia faaite i te oaoa rahi e te mau utu‘a maitai e rave rahi ta ratou i farii na roto i to ratou haapa‘oraa.

E au ra ua riro teie nei ture no te horo‘a–hua–noa–raa ei hoê o te mau paruru ta te Atua i haamau no te faatea–ê–raa’tu i teie nei nunaa te mau hope‘a ino o te noaa mai i muri a‘e i te poieteraa i te faufaa. Ua parau oia ia tatou e Na’na e horo‘a i te mau tao‘a o te fenua; ua faaara râ Oia ia tatou ia ara i te te’ote’o, a riro mai tatou mai te Ati Nephi i tahito ra [a hi‘o PH&PF 38:39]. Ua ite tatou i te ati ta te te’ote’o i faatupu i ni‘a iho ia ratou, e e ti‘a ia tatou ia haapa‘o maitai ia ore te tao‘a rahi ia faatupu i te ati rahi i ni‘a iho ia tatou nei. E rave rahi o te nehenehe e faaoromai i te vêvê e ia vai haehaa noa, e ia ora piri atu i te Fatu, eita râ e maraa ia ratou ia monihia ana‘e ratou. E faateiteihia ratou i roto i te te’ote’o e e riro mai ratou ei taata nounou, e e haamo‘e ratou i to ratou Atua. O ratou râ o te haamana‘o tamau noa i te mau haapiiraa a te Fatu no ni‘a i te fenua e to’na mau nunaa, e o te horo‘a hua i te mau rave‘a ta te Fatu i horo’a’tu ia ratou no te tauturu i te feia vêvê e no te tauturu i te faahaereraa i te ohipa a te Atua i mua, e haavî ïa ratou ia ratou iho e e mea iti roa te mana ta ratou e horo’a’tu ia Satane no te arata‘i ê atu ia ratou.¹⁶

Te ite nei matou i te mana‘o puai no te faaararaa’tu i te Feia Mo‘a i te mau Mahana Hopea nei ia pato‘i i te peu no te faatupuraa i te tarahu e te raveraa i ni‘a iho ia ratou te mau titauraa tei haateiaha ia ratou i te mau tarahu eita e pee ia ratou i te aufau, e o te arata‘i atu i te ereraa i to ratou mau fare e te tahi atu o ta ratou mau faufaa. Ua ite tatou e, e peu teie no teie tau ia faaohipa i te tarahu e tae noa’tu i te hopearaa… E ohipa ino teie e ti‘a ia tatou, ei nunaa, e ei taata tata‘itahi, ia ape maite atu. E ti‘a ia rave–afaro–hia ta tatou mau raveraa, e ia na reirahia, i ni‘a i te parau tumu i te aufauraa i te mea ta tatou e hoo mai nei, e e ti‘a i to tatou mau hinaaro ia vai i roto i te oti‘a o ta tatou mau rave‘a. E ti‘a te hinaaro ia pere e ia rave i te mau ohipa papû ore ia haaviihia… A oaoa i te moni au noa e noaa ra ia outou, ia ore outou e arata‘i–ê–hia’tu e te mau ti‘aturiraa hape e monihia outou. A haamana‘o i te parau paari a te taata paari: « O tei ru râ i te haaputu i ta’na tao‘a ia rahi eita e ore te hara. » [A hi‘o Maseli 28:20]. Ia haapii–atoa–hia ta tatou mau tamarii i te mau peu no te tarani, e eiaha e horo atu i roto i te mau hinaaro e ore e nehenehe ia ratou ia haamaha maori râ na roto i te tarahuraa.¹⁷

I roto i ta tatou mau imiraa atoa, e ti‘a ia tatou ia imi na mua roa i te basileia o te Atua.

Te vai nei te hoê hinaaro rahi o tei faaitehia mai e teie nei nunaa ia monihia, e no te rave i te ohipa no’na iho eiaha râ no te basileia o te Atua. Eaha râ ïa te apî no outou aore râ no‘u nei ia faaea i te pure e ia haere e rave i te ohipa e ia monihia ? Eaha ta te taata nei faufaa, ia roaa ia’na te tao‘a atoa o teie nei ao, ia ere oia i to’na iho ora ? Aita rea faufaa. Eaha ta te taata nei e ore e horo’a ei hoo i to’na iho ora ia tae oia i te tahi atu pae o te paruru ? [A hi‘o Mareko 8:36–37]

Te maere rahi nei au i te iti o te anaanatae e faaitehia mai nei e te mau taata o te fenua no ni‘a ihoa râ i to ratou oraraa i mua nei. Te taata tata‘itahi i ô nei i teie nei mahana o te ora maoro i te tahi atu pae o te paruru mai to to’na Taata i Hamani ia’na – e tae noa- ’tu i te mau tau hopea ore no a muri atu, e te hope‘a mure ore o te mau taata tata‘itahi atoa tei te huru ïa o te faaohipa–raa–hia o nau matahiti poto o te oraraa i te tino nei. Te ani nei au i te i‘oa o te Fatu, eaha te faufaa o te tuirooraa no outou aore râ no‘u nei ? Eaha te auro aore râ te ario, aore râ te mau tao‘a o teie nei ao no te hoê o tatou, maori râ te faati‘araa ia tatou ia noaa i te mea e hinaarohia e tatou no te tamaa, te inu e te oomo, e no te paturaa i te basileia o te Atua. E ia faaea tatou i te pure e ia onoono tatou i te tapapa i te mau tao‘a o te ao nei o te ohipa maamaa e te aoaoa rahi roa‘e ïa.

Ia hi‘o ana‘ehia te huru o te tahi mau taata, e mana‘o paha outou e, e ora ratou i ô nei e a muri noa’tu, e to ratou hope‘a mure ore tei te rahiraa ïa o te tara tei noaa ia ratou. Te ani nei au i te tahi mau taime i te Feia Mo‘a i te mau Mahana Hopea nei, eaha te rahiraa o ta tatou faufaa i to tatou haereraa mai i ô nei ? E hea rahiraa moni ta tatou i afa‘i mai, e no hea mai te reira ?… Aita vau e mana‘o e, o tatou tei fanauhia i ni‘a i te tua o te hoê puaahorofenua aore râ i roto i te hoê pereoo huti, aore râ ua hopoi mai tatou te mau parau faturaa e te mau animala e te mau fare na muri ia tatou, ua fanau tahaa–noa–hia râ tatou mai ia Ioba te huru, e te mana‘o nei au e, e faaru’e tatou i teie nei vahi i roto i to tatou vai–tahaa–noa–raa mai ia’na [a hi‘o Ioba 1:20–21]. I teie nei no ni‘a i te mau tao‘a no teie nei ao eaha to ratou faufaa no tatou e tura‘i ai ratou ia tatou ia ere i to tatou ora no ratou ? Te parau nei au e mea au a‘e na‘u ia vai vêvê noa i te taatoaraa o te mau mahana o to‘u nei orararaa; mai te mea e faahapahia vau e te mau tao‘a rahi e e ere vau i te hanahana ta‘u i ti‘aturi i te farii na roto i te haapa‘oraa i te mau faaueraa a te Atua, te pure nei au i te Atua ia ore roa’tu vau e fatu i teie nei mau tao‘a.

Te mau nei te Atua i roto i to’na na rima te tao‘a o teie nei ao: te auro e te ario, na’na te nana puaatoro e te fenua, e e horo‘a oia i te taata ta’na e horo‘a’tu. I to te Mesia ti‘araa’tu i ni‘a i te mou‘a, ua faaite o Lucifero, te diabolo, ia’na te hanahana atoa o te ao nei e ua hinaaro i te horo’a’tu ia’na mai te mea e tuturi oia i raro no te haamori ia’na [a hi‘o Mataio 4:8–9]. Ua ite anei râ outou e aita roa’tu taua diabolo vêvê ra i fatu noa‘e i te hoê metera tuea fenua i te ao taatoa nei, e aita atoa ho‘i to’na e tino, aore ra e farii ? Te fenua o te taahiraa avae ïa o te Fatu, e mai te mea noa’tu ua fatu tatou iho i te tahi tuhaa e horo‘a mai ïa te Fatu i te reira ia tatou; e ti‘a ia vai parau–ti‘a e ia haapa‘o i ta tatou haapa‘oraa mai te mea râ e hoê ahuru tauatini milioni tara ta tatou e mai te mea aita rea ta tatou. Te ora mure ore o to tatou ïa huru e te mea e ti‘a ia tatou ia riro mai i muri a‘e, e e ti‘a i te reira ia riro ei fâ matamua na tatou noa’tu eaha to tatou huru oraraa e te ti‘araa i roto i te oraraa nei …

… Ua paraparau na vau no ni‘a i te imiraa i te mau tao‘a. Aita vau e imi nei i te hape i roto i te mau tao‘a. Na te Fatu te auro e te ario. Te hinaaro nei tatou [ia patuhia] te mau fare e e ti‘a ia tatou ia faaapu i te fenua. E mea maitai te reira. Aita vau e imi nei i te hapa i te taata e monihia ra. Te ite nei ra vau i te hapa i to tatou hooraa i te basileia o te Atua, to tatou tuhaa matahiapo, te hooraa i te evanelia e te faaereraa ia tatou iho i te ora mure ore no te maitai e te haamaharaa i te hiaai o te tino, te te’ote’o o te oraraa e te mau peu o te ao nei, e te haamauraa i to tatou mau aau i ni‘a i teie nei mau mea.¹⁸

Te faahiti nei au i te mau parau a Iesu Mesia ta’na i parau atu i to’na feia apee: « E mata na râ outou i te imi i te basileia o te Atua, e te parau–ti‘a na’na e amui–atoa–hia mai taua mau mea ra ia outou. » [A hi‘o Mataio 6:33] E parau atu vau ia outou, e te mau taea‘e e te mau tuahine, e nehenehe tatou e tamata i te reira i te mau mahana atoa o to tatou nei oraraa, e nehenehe ta tatou e tamata i te mau e‘a atoa e te mau parau tumu atoa i roto i teie nei ao, eita tatou, te Feia Mo‘a, e nehenehe e ruperupe na roto i te tahi ê atu rave‘a maori râ te imiraa na mua roa i te basileia o te ra‘i e to’na parau–ti‘a; ia rave ana‘e tatou i te reira aita e haamaitairaa, aita e maitai, aita e faateiteiraa, e horo‘araa, e maitai, e hinaaro, aore râ te tahi atu mea ta te hoê taata maitai e hinaaro e mea faufaa, e mea maitai no teie nei e no te tau mure ore, e e horo’ahia’tu râ ia outou.

E rave rahi mau taata tei tamata i te imi i te oaoa ma te ore e imi na mua i te basileia o te ra‘i, … ua ite râ ratou e, e ohipa fifi mau, e na reira atoa tatou mai te mea e tamata tatou ia na reira.¹⁹

E mea teitei ta tatou nei fâ. Te titau nei tatou i te hoê parahiraa i roto i te basileia tiretiera a te Atua, ia noaa te ora mure ore, te horo’a hau a‘e te reira i te mau horo’a atoa a te Atua i te taata nei. E ti‘a i te tura atoa, te hanahana atoa, te faufaa atoa o teie nei ao, ia topa i roto i te faufaa ore i roto i to tatou mau mana‘o ia faaauhia i te hoê faufaa a’ia i mua i te aro o te Atua e te Arenio, e te mau peropheta atoa, te mau aposetolo e te feia mo‘a, e te utuafare o to tatou metua. A pee ê ai te hoê e a mo‘e roa’tu ai, e vai noa mai te tahi e a muri noa’tu.²⁰

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

Eaha ta te peresideni Wilford Woodruff i rave no te pee atu i te mau parau tumu tei hohorahia mai i roto i teie nei pene ? (A hi‘o i te mau api 251-53)
No teaha « eita e nehenehe ta tatou ia faataa ê te pae tino i te pae varua » ? (A hi‘o i te mau api 251-54; a hi‘o atoa PH&PF 29:34–35.) Nahea ta tatou e nehenehe ai e faaohipa i teie nei parau mau i roto i to tatou mau oraraa i te mau mahana atoa ? i roto i ta tatou taviniraa i roto i te Ekalesia ?
Ua ite te peresideni Woodruff e, e rave rahi te mau taata e ore e pee nei i te a‘o a te Fatu no ni‘a i te mau mea no te pae tino nei. No te aha i to outou feruriraa e mai te reira te huru ? (A hi‘o i te mau api 254-55). Eaha te a‘o ta te peresideni o te Ekalesia i teie nei mahana i horo‘a no ni‘a i te mau mea no te pae tino ?
A tai‘o faahou i te piti o te paratarafa i te api 260. Eaha te tahi mau maitai no te ohipa rima ? Eaha to outou mana‘o no te auraa « ia riro ei taata faatupu eiaha noa râ ei taata amu » ?
Eaha te mau faaararaa ta te peresideni Woodruff i horo‘a no ni‘a i te moni ? (A hi‘o i te mau api 257-59). Eaha te a‘o ta’na i horo‘a no ni‘a i te tarahu e te aitarahuraa ? Eaha ta tatou e nehenehe e rave no te tape‘a i te faito maitai ?
Nahea te mau ahururaa e te mau ô e riro ai « ei maitai no tatou tata‘itahi e ei maitai no ta tatou mau tamarii » ? (A hi‘o i te api 257)
Eaha te auraa no outou te haapiiraa a te Faaora i roto i te Mataio 6:33 ? (A hi‘o i te mau api 259-62)
A tai‘o vitiviti i te pene, ma te hi‘o atu i te mau parau tumu ta te mau metua e ti‘a ia haapii atu i ta ratou mau tamarii. Eaha te tahi mau mea taa ê e nehenehe ta te mau metua e rave e ta ratou mau tamarii no te haapii i teie nei mau parau tumu ? Eaha te mau mea i tupu ia outou i te haapiiraa mai e te haapiiraa’tu i teie nei mau parau tumu ?

Te mau papa‘iraa mo‘a: Malaki 3:8–11; Mataio 6:19–21; Iakobo 2:14–26; Iakobo 2:12–19; PH&PF 42:42; 58:26–28

family gardening — « E ti‘a i te mau taata atoa ia faariro ei mea te’ote’o no te riroraa ei taata faatupu eiaha noa râ ei taata amu »

class discussion — « Te parau tumu no te haapiiraa tano no te Feia Api no Ziona o te hoê parau tumu hau atu i te faufaa rahi »

couple managing finances — Te tuhaa Ahuru o te hoê ïa « ture tei horo‘ahia mai no te faateitei e no te haamaitai ia tatou »