Pene 24

Te faaineineraa no te tae–piti–raa mai o Iesu Mesia

A tia‘i noa’i tatou i te ho‘iraa mai o te Faaora no te faatere i ni‘a i te fenua nei, e ti‘a ia tatou ia faaineine ia tatou tata‘itahi, ei utuafare e ei nunaa.

No roto mai i te Oraraa o Wilford Woodruff

I roto i te hoê a‘oraa i te amuiraa rahi i te ava‘e eperera 1950, ua parau o Elder Richard L. Evans no te Tino Ahuru ma Piti Aposetolo: « Te haamana‘o nei au i te hoê parau tei faahitihia i te parauraa a te taata e te peresideni Wilford Woodruff. Ua parau te tahi o te mau taea‘e i to’na ra tau e ua farerei atu ratou ia’na… no te ani atu ia’na eaha te taime i to’na mana‘oraa e tae mai ai te hopea– eaha te taime e ho‘i mai ai te Fatu ? I to‘u mana‘ oraa e ere teie nei mau parau na’na iho, ua riro râ ei faaiteraa i te varua no ta’na pahonoraa: « E ora vau mai te mea râ e no ananahi– tera râ te tanu noa nei â vau i te mau tumu terite! »¹

Noa’tu e ere paha teie nei mau parau te mau parau iho a te peresideni Woodruff, te faaite mai nei râ te reira i to’na mau mana‘o no te Tae–Piti–raa mai o Iesu Mesia. Ua faaite oia: « Aita vau e mana‘o nei e, e nehenehe i te hoê taata ia faaite mai i te hora no te taeraa mai o te Tamaiti a te Taata… Eiaha tatou e imi i te taime e tupu mai ai taua ohipa ra. »² Ua tia‘i râ oia i te ho‘iraa mai o te Faaora no te faatere i ni‘a i te fenua nei. Ma te hoê iteraa papû e ua haamauhia te Ekalesia i te mau mahana hopea nei, ua haapii oia i te Feia Mo‘a ma te rû, ma te ti‘aororaa’tu ia ratou ia faaineine no te Tae–Piti–raa mai o te Faaora. Te na ô ra oia « Te faaite nei te mau tapa‘o atoa i ni‘a i te ra‘i e i ni‘a i te fenua nei i te taeraa mai o te Fatu o Iesu Mesia. » « Ia matara ana‘e to‘u feruriraa, i raro a‘e i te mana o te Varua o te Atua, no te haaro’aro’a i teie nei mau mea te maere nei au e te feruri nei au, eiaha noa no ni‘a i te ao no ni‘a atoa râ ia tatou nei iho, e aita tatou e haape’ape’a e e itoito rahi nei no te faaineineraa ia tatou e to tatou mau utuafare no te mau mea e fatata i te tupu, i te mea e, e mou a‘e te ra‘i e te fenua atoa, e ore roa te hoê iota e te hoê vahi iti o te parau a te Fatu e mou, e hope roa râ i te tupu. »³

Te mau haapiiraa a Wilford Woodruff

Tei roto tatou i te mau mahana hopea, e e ti‘a ia tatou ia ara i te mau tapa‘o no te Tae–Piti–raa mai o te Faaora.

Te parau nei au i te Feia Mo‘a i te mau Mahana Hopea nei, na ni‘a i to‘u ti‘araa peresibutero i Iseraela e to‘u ti‘araa ei aposetolo no te Fatu ra o Iesu Mesia, e te fatata nei tatou i te farii i te tahi o te mau haavaraa faahiahia roa ta te Atua e ninii mai i ni‘a i te ao nei. E hi‘o outou i te mau tapa‘o no te mau tau, te tapa- ‘o no te taeraa mai o te Tamaiti a te Taata. E haamata ratou i te itehia i ni‘a i te ra‘i e i ni‘a i te fenua… Te fatata atu nei tatou i teie nei mau mea. Te mea noa ta te Feia Mo‘a i te mau Mahana Hopea e ti‘a ia rave o te faaea noa ïa ma te hau, te haapa‘o maitai e te paari i mua i te Fatu, ia hi‘o i te mau tapa‘o o te mau tau, e ia vai parau–ti‘a e ia haapa‘o noa; e ia ite outou i teie nei mau tapa‘o, e ite ïa outou e rave rahi mau mea o te ore roa e itehia e outou i teie nei mahana… Tei roto tatou i te tau tuuraa hopea e te îraa o te mau tau. E mahana rahi teie, e tei ni‘a ia tatou te mau mata o te ra‘i, e te mata o te Atua ihoa e o te mau patereareha e o te mau peropheta atoa. Te tia‘i ra ratou ia outou ma te anaanatae rahi, no to outou maitai; e to tatou mau peropheta tei taparahi–pohe–hia e tei taati atu i to ratou iteraa papû i to ratou toto, te amui ra ïa ratou e te mau Atua, ma te ti‘aoro atu no to ratou mau taea‘e. E no reira, ia haapa‘o noa tatou, e ia vaiiho atu tatou te mau ohipa e tupu i roto i te rima o te Atua, e e haapa‘o oia ia tatou mai te mea e rave tatou i ta tatou hopoi‘a.⁴

Te haere mai nei te Fatu ra o Iesu Mesia e faatere i ni‘a i te fenua. E parau paha to te ao e te haamaoro nei oia i to’na taeraa mai e tae noa’tu i te hopea roa o te ao nei. Aita râ ratou i ite i te mau mana- ‘o e te mau haerea a te Fatu. Eita te Fatu e haamaoro i to’na taeraa mai no to ratou ti‘aturi ore, e te faaite mai nei te mau tapa‘o i ni‘a i te ra‘i e i ni‘a i te fenua e ua fatata roa. Ia oteo te oumou rii o te mau tumu suke i te mau nunaa atoa o te fenua nei [a hi‘o Iosepha Semita– Matai‘o 1:38–40], e mai te mea tei ia ratou râ te Varua o te Atua e nehenehe ïa ia ratou ia ite e ia taa i te mau tapa‘o.⁵

E nehenehe ta tatou e haapii mai no ni‘a i te mau tapa‘o no te Tae–Piti–raa mai na roto i te tai‘oraa i te mau papa‘iraa mo‘a.

Mai te mea e hinaaro to te ao e ite eaha te tupu mai, ia tai‘o ïa ratou i te Bibilia, te Buka a Moromona e te Parau Haapiiraa e te mau Parau Fafau; ia tai‘o ratou i [te] mau heheuraa a Ioane Peata. Mai te Atua e ora ra e tupu mau ihoa teie nei mau heheuraa. Eita roa te hoê e ore e tupu. E te haamata nei te rima o te Atua i te itehia i te fenua nei. Ua fatata roa te haavâraa, te tia‘i nei te ati i te mau nunaa o te fenua nei; e ti‘a râ ia tatou ia faaineine no te ti‘a atu i te mau vahi mo‘a a tupu ai te mau haavaraa a te Atua i te fenua nei.⁶

Ua parauhia tatou i roto i te pene 24 no Matai‘o, e ua haapii Iesu, i te hoê taime, i ta’na mau pĭpĭ e rave rahi mau mea no ni‘a i ta’na evanelia, te hiero, te Ati Iuda, to’na tae–piti–raa mai e te hopea o te ao nei; e ua ani atu ratou ia’na– E te Fatu, eaha ïa te tapa‘o no teie nei mau mea ? Ua pahono poto noa te Faaora ia ratou. No te mea ho‘i e ua feruri hohonu rii au i teie nei mau mea ua hinaaro vau i te tai‘o atu ia tatou i te hoê tuhaa o te parau a te Fatu, tei haamaramarama i teie nei tumu parau hau atu i te tatararaa a te Faaora i ta’na ra mau pĭpĭ. Taua tuhaa o te parau a te Fatu o ta‘u e tai‘o atu, o te hoê ïa heheuraa i horo‘ahia i te Feia Mo‘a i te mau Mahana Hopea nei i te 7 no mati 1831.[I muri a‘e i to’na parauraa i teie nei parau, ua tai‘o o Elder Woodruff i te heheuraa tei riro i teie nei te tuhaa 45 no te Parau Haapiiraa e te mau Parau Fafau]…

Te ora nei tatou i te tau hopea, noa’tu e, e parau mau te vai nei e rave rahi mau ohipa rahi e te faufaa o te tupu mai i teie nei mau mahana. Ua papû râ te hoê mea, noa’tu e aita te Fatu i heheu mai i te mahana e te hora e tae mai ai te Tamaiti a te Taata, ua ma‘iti oia i te u‘i, e ua haamata te mau tapa‘o tei tohuhia no te faaite i taua oro‘a rahi ra i te fâ mai i ni‘a i te ra‘i e i ni‘a i te fenua nei, e e tamau noa â ratou e tae noa’tu i to ratou tupuraa. Mai te mea, te hinaaro nei tatou te Feia Mo‘a i te mau Mahana Hopea nei i te tahi mea no te faaara ia tatou, a tai‘o ana‘e i te Bibilia, te Buka a Moromona e te Buka no Te Parau Haapiiraa e te mau Parau Fafau; ua navai te mau mea no te faaitoito e no te haapii ia tatou i roto i te mau mea a te Atua. A faaherehere maite i te mau heheuraa a te Atua e te evanelia a te Mesia e vai nei i roto.⁷

E ite ïa outou e rave rahi mau tohuraa no ni‘a i to’na taeraa mai, mai teie – « E haere oioi mai au », « E haere oioi mai au i roto i te hora i mana‘o–ore–hia e oe », « Tei te pae opani au », « E tae mai au mai te eiâ haru i te po ra », « E tae mai au i te hora itea–ore–hia e outou », e « E ao to te taata e tia’i noa ho‘i i te taime no te taeraa mai o to tatou Fatu e Faaora o Iesu Mesia. » Te parau nei au e na roto i te taatoaraa o te mau papa‘iraa mo‘a–Te Faufaa Tahito e te Faufaa Apî, te Buka a Moromona e te Buka no Te Parau Haapiiraa e te mau Parau Fafau, te faahiti pinepinehia ra te tae–piti–raa mai o te Fatu; e ua fafau anei te Fatu i teie nei mau mea ma te ore e opua i te faatupu i te reira ? Aita, aita oia i na reira, e tupu mau teie nei mau fafauraa.⁸

Ei nunaa fafauhia no te Fatu, e hopoi‘a na tatou i te faaineine i te e‘a no To’na Tae Pitiraa mai.

Te hinaaro nei au i te ani e o vai te tia‘i ra i te tupuraa o teie mau mea, e o vai i ni‘a i te fenua nei e faaineine ra ia ratou iho no te tupuraa o te parau a te Fatu na roto mai i te mau vaha o te mau peropheta, te mau patereareha e te mau aposetolo no na matahiti e ono tauatini ma‘iri a‘enei ? Aita roa e taata ta‘u i ite, [maori râ] te Feia Mo‘a i te mau Mahana Hopea nei, e te mana‘o nei au e aita i afa o tatou tei ite mai tei ti‘a ia tatou, e aita i afa o tatou tei ineine mai tei ti‘a ia tatou no te mau oro‘a rarahi e tae mai i ni‘a i te fenua i teie nei mau mahana hopea nei. O vai ta te Fatu e nehenehe e ti‘aturi no te faaineine no to’na tae–piti–raa mai maori râ to’na Feia Mo‘a ?⁹

E ohipa rahi ta te Fatu i mua ia tatou e te faaineine nei oia i te hoê nunaa no te rave i te reira hou to’na taeraa mai. I teie nei, teie te uiraa e vai nei, e te mau taea‘e e te mau tuahine, ua ineine anei tatou i roto i to tatou aau ? Te ite râ anei tatou i teie nei mau mea ? Te ite râ anei tatou mai te hoê nunaa i tatou mau hopoi‘a i mua i te Fatu ? Ua faati‘a mai te Fatu i te hoê basileia tahu‘a i ô nei i te mau mahana hopea nei no te haamau i ta’na Ekalesia e te basileia, e no te faaineine i te e‘a no te tae–piti–raa mai o te Tamaiti a te Taata, e ua tuu atu te Atua no te ra‘i i roto i te rima o ta’na mau tavini te mau taviri no te basileia, e ua parau atu–« No te mea e faatupuhia te mau mea atoa ta‘u i parau i roto i teie nei mau tavini, no te mea ua horo’ahia te mana no ratou ia taati i ni’a i te ao nei e i te ra’i atoa ho‘i, e tae noa’tu i te mahana e niniihia ai te riri u’ana o te Atua i ni‘a i to te ao nei. » [A hi‘o PH&PF 1:7–9]

Te mana‘o nei au e aita tatou, te mau peresibutero no Iseraela e te Feia Mo‘a i te mau Mahana Hopea nei, e taa nei e rave rahi mau taime i to tatou nei ti‘araa i mua i te Fatu. E mea rahi e te puai ho‘i te ohipa i titauhia ia tatou; te ohipa a te Atua Mana Hope. E hopoi‘a na tatou i te hohora’tu i te evanelia a te Mesia i te mau nunaa atoa o te fenua nei… E hopoi‘a na tatou teie nei mau mea e no te paturaa i te mau hiero i te Teitei roa ra, i reira tatou e nehenehe ai e tomo no te rave i te mau oro‘a no te faaoraraa i to tatou mau taata tei pohe…

… E hea taime to te Fatu ti‘aororaa i te mau nunaa o te fenua nei no te horo’a’tu ia ratou te hanahana tiretiera, te tura, te tahuti ore e te ora mure ore ? Ua ti‘aoro oia ia ratou e ono tauatini matahiti i teie nei, e ua faati‘a mai oia i ta’na mau tavini ma tera taime e tera taime e ua pii i te mau taata o te ao nei ia faaineine ia ratou iho no te mahana rahi o to’na tae–piti–raa mai, tei fatata roa. Te pii nei oia ia ratou i teie nei mahana ma te reo puai, mai ta‘u i parau iho nei i te tahi o to‘u mau taea‘e, te hinaaro nei te Fatu ia ite mai te mea e hinaaro mau ra te Feia Mo‘a i te mau Mahana Hopea nei ia rave i te ohipa i pihai iho ia’na aore râ aita. E mahana teie no te faaotiraa.¹⁰

Hou te Mesia e tae mai ai e ti‘a i te hoê nunaa ia faaineinehia na roto i te haamo‘araa i mua i te Fatu. E ti‘a ia patuhia te mau hiero; e ti‘a ia Ziona ia patuhia; e ti‘a ia vai mai te hoê vahi pe’ape’a ore no te nunaa a te Atua a haavâ ai oia i te fenua, no te mea e tae mai te mau haavâraa a te Atua i ni‘a i te fenua, aita e haperaa no ni‘a i te reira ohipa; ua î te mau heheuraa i te mau fafauraa no ni‘a i te reira ohipa, e mai ta te Fatu i faaite, e ore oia e ma‘iri i te tape‘a i ta’na ra parau.¹¹

Te mana‘o nei au e aita tatou e ite ra i te hohonuraa o teie nei ohipa. E mea fifi ia tatou ia taa i ta tatou hopoi‘a i te Atua, i to te ra‘i, i te feia tei pohe, e i to tatou taata tupu e ora nei.

I teie nei, ia hi‘o ana‘e au i teie nei mau mea, te hi‘o atoa ra vau i te mea e vai nei i mua ia tatou. Te mau pŭpŭ tei haamauhia i roto i teie nei Ekalesia mai te haamataraa, e mau tauturu e e mau faatereraa ana‘e ïa, e ua amui hoê ratou no te faahaereraa i teie nei ohipa rahi. Tei ni‘a iho te mau mata o te mau ra‘i ia tatou. Te tia‘i nei te Tamaiti a te Atua e te mau peropheta e te mau Patereareha atoa tei ora i ni‘a i te fenua nei i ni‘a i teie ohipa rahi–teie faanahonahoraa rahi e faaineine nei no te taeraa mai o te Tamaiti a te Taata.¹²

E ti‘a ia tatou ia faaineine ia tatou tata‘itahi no te Tae–Piti–raa mai o Iesu Mesia.

Te ora nei tatou i roto i te hoê tau faufaa rahi. Te tae mai ra te mau tohuraa no ni‘a i to tatou nei tau i ni‘a iho ia tatou; ua ineine anei tatou i te farii i te reira ?¹³

Ua faaau te Faaora… i te basileia o te Atua i na paretenia hoê ahuru, tei rave i ta ratou mau lamepa e haere atura ia farerei i te tane faaipoipo apî ra[a hi‘o Mataio 25:1]. « E feia paari e toopae, e maamaa ho‘i e toopae. O te feia maamaa ra, i hopoi atura i ta ratou mau lamepa, aita râ i hopoi atoa i te mori: area te feia paari ra, ua hopoi i ta ratou mau lamepa ma te mori atoa i roto i ta ratou mau farii. Te maoro ra râ taua tane faaipoipo apî ra, ti‘aruhe paatoa ihora ratou e ma‘iri ihora te taoto. E tae a‘era i te tuiraa po ra, o te pii maira, Inaha, te haere mai nei te tane faaipoipo apî nei, e haere outou ia farerei atu ia’na. Ua ti‘a a‘era te mau paretenia atoa ra i ni’a, ua faanehenehe ihora i ta ratou mau lamepa. Ua parau atura te feia maamaa ra i te feia paari, Ho mai i te tahi vahi i ta outou mori na; te pohe nei ho‘i ta matou mau lamepa. Ua parau maira râ te feia paari, na ô maira, Eiaha, o te ore ho‘i o te navai ia opere na tatou atoa; e haere râ outou i te feia hoo ra e hoo atu ai i ta outou iho. E te haere atura ratou e hoo ra, tae maira taua tane faaipoipo apî ra, e te feia i ineine ra, haere atura ïa e oia atoa i roto i te oro’a faaipoiporaa, e opanihia ihora te uputa. E muri a‘era, ua haere maira te tahi pae paretenia ra, ua na ô maira, E te Fatu, e te Fatu, a iriti a‘e na ia matou. Ua parau atura râ oia, na ô atura, Aore au i ite ia outou, oia mau ta‘u e parau atu ia outou na. » [Mataio 25:2–12]. I teie nei, o ratou e mori i roto i ta ratou mau lamepa, e mau taata ïa e ora ra i ta ratou haapa‘oraa faaroo, e aufau ra i ta ratou tuhaa ahuru, e aufau ra i ta ratou mau tarahu, e haapa‘o ra i te mau faaueraa a te Atua, e o te ore ra e tuhi i to’na ra i‘oa; e mau tane e e mau vahine e haere ra i roto i te maramarama o te Fatu; e mau tane e e mau vahine o te ore roa e hoo i to ratou tuhaa matahiapo no te maa aore râ no te tahi rii auro aore râ ario, teie te feia o te itoito i te faaiteraa i te parau no Iesu.

Teie to‘u mau mana‘o i teie nei mahana. Te hinaaro nei au i te faaara i to‘u mau taea‘e e to‘u mau tuahine, te Feia Mo‘a i te mau Mahana Hopea nei, ia ora i ta ratou haapa‘oraa faaroo, ia faaineine ia ratou, no te mea mai te Fatu e ora nei e tupu mau ïa ta’na parau. Tei pihai iho roa te taeraa mai o Iesu i te opani… Eita e nehenehe i te taata parau–ti‘a ia faaora i te taata ino. E ti‘a ia tatou ia ora i to tatou iho parau–ti‘a, oia ho‘i, te haapa‘oraa i te mau faaueraa a te Atua.¹⁴

Ua faanahohia te parabole no te mau paretenia hoê ahuru no te faahoho‘araa i te tae–piti–raa mai o te Tamaiti a te taata, te taeraa mai o te tane faaipoipo no te farerei i te vahine faaipoipo, te Ekalesia, te vahine a te Arenio, i te mau mahana hopea; e te ti‘aturi nei au e ua tano te Faaora i te parau e, no ni‘a i te mau melo o te Ekalesia, e e mea paari toopae e e mea maamaa toopae; no te mea ia haere ana‘e mai te Fatu no te ra‘i i roto i te mana e te hanahana rahi no te haava i te mau ohipa i ravehia ra e te taata tata‘itahi i te tino pohe noa nei, e mai te mea e ite oia i te afaraa o te mau taata e parau nei e melo ratou no teie nei Ekalesia tei ineine no te ora, e e rave rahi atoa o te tia‘i nei ia haavahia mai te au i te e‘a e peehia ra e te mau taata e rave rahi.¹⁵

Teie te parau a te Atua ia‘u nei e ua tae te taime no Ziona ia ti‘a i ni’a e ia anaana mai, e te faaiteraa o te Varua o te Atua ia‘u nei e teie nei basileia taatoa, teie basileia rahi tahu‘a… tei mau i te autahu‘ araa, ua faatupu mau ïa i te hoê tuhaa o te parabole no na paretenia tino ahuru. Eaha ïa te reira ? No te mea, a maoro ai te Tane Faaipoipo apî ra ua ti‘aruhe paatoa tatou e ua ma‘iri i te taoto; ua ti‘aruhe e ua taoto tatou ei Ekalesia e ei basileia, e te parau a te Fatu ia‘u nei e ua navai to tatou taoto–maoro–raa; e tei ia tatou ra te rave‘a i teie nei no te ti‘a mai i ni‘a no te faaineine i ta tatou mau lamepa e ia tuu atu te mori i roto i ta tatou mau farii. Teie te parau a te Fatu ia‘u nei.¹⁶

Teie te uiraa i teie nei, nahea ta tatou e nehenehe ia tape’a i te mori i roto i ta tatou mau lamepa ? Na roto i te haapa‘oraa i te mau faaueraa a te Atua, te haamana‘oraa i ta tatou mau pure, te raveraa mai ta te mau heheuraa a Iesu Mesia i parau mai ia tatou, e te tautururaa na roto i te tahi ê atu rave‘a i te paturaa ia Ziona. Ia haa ana‘e tatou no te basileia o te Atua, e e mori ïa ta tatou i roto i ta tatou mau lamepa, e anaana noa to tatou nei mori e e ite tatou i te faaiteraa a te Varua o te Atua. I te tahi atu pae, mai te mea e faatumu tatou i to tatou aau i ni‘a i te mau mea no teie nei ao e e titau tatou i te mau faaturaraa o te taata, e haere noa ïa tatou i roto i te pouri eiaha râ i roto i te maramarama. Mai te mea e haafaufaa ore tatou i to tatou autahu‘araa, e te ohipa a teie nei autahu‘araa, te paturaa i te basileia o te Atua, te paturaa i te mau hiero, te faaoraraa i to tatou mau taata tei pohe, e te faahaereraa i te ohipa rahi i faatoro‘ahia’i tatou e te Atua no Iseraela–mai te mea eita tatou e ite e, e mea faufaa a‘e teie nei mau mea no tatou i te mau mea no te ao nei, aita ïa ta tatou e mori i roto i ta tatou mau lamepa, aita e maramarama, e eita tatou e tae atu i te tamaaraa no te faaipoiporaa o te Arenio.¹⁷

O vai te ineine no te taeraa mai o te Mesia ? [O ratou] o te oaoa nei i te Varua Maitai e te ora nei i raro a‘e i te faaururaa a te Mana Hope, o te parahi nei i roto ia Iesu Mesia e o te faahotu nei no te tura e te hanahana o te Atua. E ore roa te tahi ê atu nunaa e na reira.¹⁸

Te pure nei au ia nehenehe ia tatou ia ora ia ore tatou ia parahi i rotopu i te mau paretenia maamaa, ia taa tatou i te mau tapa‘o no te mau tau, ia rave i ta tatou hopoi‘a, ia tape‘a i to tatou huru parau–ti‘a, ia haavî i te ao, e ia ineine no te farii i to tatou Faaora ia tae mai oia, ma te oaoa eiaha râ ma te oto e te haamâ.¹⁹

A ti‘aturi i te Atua. A rave i ta outou hopoi‘a. A haamana‘o i ta outou mau pure. Ia noaa te faaroo i te Fatu, e a tape‘a e a patu ia Ziona. E maitai ïa te mau mea atoa. E haere mai te Fatu e farerei i to’na mau taata, o te haapotohia ta’na ra ohipa i roto i te parau–ti‘a, oi ore roa te taatoa e faaorahia. [a hi‘o PH&PF 84:97; Mataio 24:22] Te parau atu nei au ia outou, a hi’o maite i te mau tapa‘o o te tau, e a faaineine ia outou iho no te mau mea e tupu mai.²⁰

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

A tai‘o faahou i te paratarafa matamua i te api 277-78. Eaha te mau haapiiraa ta outou i haapii mai roto mai i te faahitiraa ta Elder Evans i parau no roto mai i te peresideni Woodruff ?
Nahea e nehenehe ai ia tatou ia haapii no ni‘a i te mau tapa‘o no te Tae–piti–raa mai o te Faaora ? (A hi‘o i te mau api 279-80.)
Eaha te mau tumu no te mau tapa‘o no te Tae–piti–raa mai ? (A hi‘o i te mau api 279-80); a hi‘o atoa PH&PF 45:34–39.) Eaha te haapapûraa ta outou e ite nei e, te tupu nei te tahi o teie nei mau tapa‘o ? Nahea ta tatou e nehenehe ai e faaea noa « ma te hau, ma te haapa‘o maitai e te paari i mua i te Fatu » noa’tu e te vai nei te ati i roto i te tahi o teie nei mau tapa‘o ?
A tai‘o faahou i te mau haapiiraa a te peresideni Woodruff no ni‘a i te ohipa a te Ekalesia i te faaineineraa i te e‘a no te Tae–piti–raa mai (te mau api 280-82). Nahea tatou e tauturu ai i teie nei ohipa ?
No teaha e ti‘a‘i ia tatou ia haape’ape’a no to tatou iho faaineineraa eiaha râ i te taime ti‘a o te Tae–piti–raa mai ? Nahea ta tatou e nehenehe e tauturu i to tatou mau utuafare ia faaineine ? Nahea ta tatou e nehenehe e « ti‘a atu i te mau vahi mo‘a a itehia’i te mau haavaraa a te Atua i ni‘a i te fenua nei ? » (api 280-81)
I roto i te parabole no na paretenia tino ahuru, o vai tei faahoho‘ ahia i te mau paretenia paari e i te mau paretenia maamaa ? i te taata faaipoipo apî ? i te vahine faaipoipo apî ? Eaha te mea i faahoho‘ahia i te oro‘a faaipoiporaa ? i te mori i roto i te mau lamepa ? A faaineine ai tatou no te Tae–piti–raa mai, eaha ta tatou e nehenehe e rave no te « tape’a i te mori i roto i ta tatou mau lamepa » ? (A hi‘o i te mau api 282-283, 286; a hi‘o atoa PH&PF 45:56–57.)

Te mau papa‘iraa mo‘a: PH&PF 45:15–75; Iosepha Semita – Mataio 1:21–55

Second Coming of Christ — « Te haere mai nei te Fatu ra o Iesu Mesia no te faatere i ni‘a i te fenua nei… E ore te Fatu e haamaoro i to’na taeraa mai. »

virgin with oil lamp — « Ia haa ana‘e tatou no te basileia o te Atua, e mori ïa ta tatou i roto i ta tatou mau lamepa, e anaana to tatou maramarama, e e ite tatou i te faaiteraa a te Varua o te Atua. »