Pene 6

Te haapiiraa e te iteraa na roto i te varua

E hinaaro tatou i te arata‘iraa a te Varua Maitai a haapii mai ai tatou i te evanelia e a haapii atu ai tatou i te reira ia vetahi ê.

No roto mai i te oraraa o Wilford Woodruff

A faaineine ai o Elder Wilford Woodruff ia’na iho no te hoê amuiraa i te ava‘e atopa 1885, ua pure oia ia arata‘ihia oia, ma te ani eaha râ ta’na e ta to’na mau taea‘e e ti‘a ia haapii i te nunaa. Ei pahonoraa i ta’na pure, ua farii oia i te heheuraa i muri nei: « Ia noaa i ta‘u nei mau tavini te Varua Maitai e ia tape‘a ratou i to‘u nei Varua ia ratou ra, e na’na e haapii ia ratou eaha te mea e haapii tamau noa i te nunaa; e a haapii i te nunaa ia tape‘a i to‘u nei Varua ia ratou ra, e e nehenehe ai ia ratou ia taa i te parau a te Fatu ia haapiihia te reira ia ratou. »¹

Ma te hoê iteraa papû paari no ni‘a i teie nei ture, e mea pinepine te peresideni Woodruff i te haamata i ta’na mau a‘oraa i te amuiraa na roto i te faaiteraa i te hoê hinaaro ia haapii na roto i te mana o te Varua Maitai. Ua faahaamana‘o pinepine atoa oia i te Feia Mo‘a no ni‘a i ta ratou hopoi‘a ia faaroo e ia haapii mai na roto i taua iho mana ra. Ua parau oia i te hoê taime, « E feia paatoa ana‘e tatou o te ti‘aturi nei i te Varua o te Fatu, i te heheuraa, i te faaururaa, i ni‘a i te Varua Maitai, ia nehenehe ia tatou ia haapii i te nunaa ia au i to tatou piiraa no te a‘o atu, e mai te mea eita te Fatu e horo‘a mai ia‘u te Varua Mo‘a i teie nei avatea, te fafau atu nei au ia outou paatoa e aita rea parau ta outou e farii no ô mai i te taea‘e o Woodruff. »²

Te mau haapiiraa a Wilford Woodruff

E ti‘a ia tatou ia haapii i te evanelia mai te mea ana‘e e faauruhia tatou e te Varua Maitai.

Eita e nehenehe ia‘u, eita atoa e nehenehe i te hoê noa a’e taata e haapii i te mau tamarii a te taata e e faaitoito ia ratou i roto i te Evanelia a Iesu Mesia mai te peu e aita e Varua Mo‘a, aita e heheuraa, aita e faaururaa a te Atua Manahope. No reira, te hinaaro nei au i te faaroo o te Feia Mo‘a i te mau Mahana Hopea nei, e ta ratou atoa mau pure. Te hinaaro nei au i te Varua o te Atua no te tauturu mai ia‘u, mai te mau taata atoa e tamata nei i te haapii i te nunaa i te mau mea no te basileia o te ra‘i ra.³

To‘u faaroo e aita roa e taata, i roto i teie nei u‘i aore râ i roto i te tahi atu u‘i, e nehenehe e haapii e e faaitoito i te mau taata o te fenua nei ma te ore e faauruhia e te Varua o te Atua. Ei nunaa ua tuuhia tatou i roto i te mau ti‘araa… tei haapii mai, i roto i ta tatou mau faatereraa e ohipa mau atoa, te faufaa rahi no te ite i te rima o te Atua i roto i te mau mea atoa. Te ite nei tatou i teie nei titauraa i teie nei mahana. Te ite nei au e aita to‘u e aravihi no te haapii i te Feia Mo‘a i te mau Mahana Hopea nei e aore râ i to te ao nei mai te peu e aita te Varua o te Atua. Te hinaaro nei au i teie nei mea… e to outou atoa faaroo e ta outou atoa mau pure, ia nehenehe to‘u feruriraa ia arata‘ihia i roto i te hoê feruriraa mana‘o e maitai ai outou. I roto i ta‘u mau a‘oraa i mua i te taata eita roa vau e faati‘a i to‘u nei mana‘o ia pee atu i te hoê noaae e‘a maori râ te e‘a ta te Varua e parau mai ia‘u, e teie te ti- ‘araa ta tatou e ti‘a nei ia farerei tatou i te Feia Mo‘a, aore râ iahaere tatou i mua i te pororaa i te evanelia..⁴

Teie ta te Fatu i parau na roto ia Iosepha Semita: « E te mau mea atoa ta ratou e parau ra ia ûrûhia ra e te Varua Maitai e riro ïa ei parau mo‘a, e riro ïa te hinaaro o te Fatu, e riro ïa te mana- ‘o o te Fatu, e riro ïa te parau a te Fatu, e riro ïa te reo o te Fatu, e te mana ho‘i o te Atua e tae noa’tu i te ora. » [PH&PF 68:4] No te aha teie ? No te mea ua riro te Varua Maitai e hoê no te Atuaraa, e no reira ia parau ana‘e te hoê taata na roto i te Varua Maitai, e riro ïa ei parau a te Fatu. E ti‘a ia tatou ia imi ia noaa teie nei Varua e ia parahi noa oia i pihai iho ia tatou i te mau taime atoa e ia riro ei ture no te heheuraa no tatou.⁵

Te hinaaro nei te mau mana‘o o teie nei nunaa ia faaamu tamaunoa- hia ratou, e e ti‘a ia tatou paatoa ia ti‘aturi i ni‘a i te Varua Maitai e i ni‘a i te Fatu no te faaamu i to tatou mau mana‘o na roto mai i te tumu vai hopea ore o te maramarama o te Atua, no te mea eita roa e nehenehe ia tatou ia noaa mai te maa na roto mai i te tahi ê atu puna no te faaamu i te mana‘o mure ore o te taata nei.⁶

Te vai nei te hoê varua i roto i te taata o te vai noa mai e amuri atu, te hoê varua no ô mai i te Atua ra, e ia ore oia e faaamuhia e taua iho puna ra aore râ mana tei hamani ia’na, eita oia e maha, e e ore roa oia e noaa i te haamahahia.⁷

Mai te mea aita to tatou e Varua Maitai eita e ti‘a ia tatou ia haapii.⁸

A haapii ai tatou i te evanelia, e ti‘a ia tatou ia haamana‘o e te mau parau mau maramarama roa‘e e te ohie roa‘e o te mau parau mau ïa tei hau atu i te maitai.

Te haapii nei te mau heheuraa a Iesu Mesia ia tatou e ua fanauhia te Faaora i roto i te tahuti nei, e ua parau te Metua e aita oia i horo‘a ia’na te îraa i te matamua, ua haere noa râ oia mai te aroha i te aroha e tae noa’tu i te taime oia i farii ai i te îraa e i parauhia ai te Tamaiti a te Atua no te mea aore oia i farii i te îraa i te matamua [ a hi‘o PH&PF 93:12–14]; e ti‘a ia tatou ia na reira atoa ia imi ma to tatou aau atoa ia tupu i te maitai, i te maramarama e te parau mau, e ia tae i te taime e nehenehe ai ia tatou ia farii i te îraa [ a hi‘o PH&PF 93:20].

E rave rahi te mau parau tumu rarahi ta te Fatu i faaherehere no tatou, e te mau parau tumu rahi roa‘e ta’na i faaherehere no tatou o te mau parau tumu hau atu ïa i te ohie e te maramarama. Te mau parau tumu matamua o te evanelia o te arata‘i ia tatou i te ora mure ore o te mau parau tumu ohie roa a’e ïa e ua hau to ratou hanahana aore râ faufaa rahi no tatou. E rave paha te taata i te ohipa no te faatupu i te hoê faaiteiteraa rahi no te taleni, te ite e te aravihi i roto anei i te neneiraa i te mau buka aore râ, i te pororaa anei, e tamata paha ratou i te poro i te mau parau aro e ia hohora i te tahi mea huru ê, te rahi e te maere, e rave paha ratou i te ohipa no teie nei mea ma to ratou puai atoa, na roto i te varua e te puai taata ma te tauturu-ore-hia e te Varua Mo‘a o te Atua e aita te taata i haamaitaihia e aita ta ratou mau pororaa i haamaha rahi i to ratou hiaai. Na te mau mea maramarama maitai roa‘e e te ohie roa‘e e haamaitai rahi nei ia tatou, mai te mea ua haapiihia e te Varua o te Atua, e aita’tu e mea hau atu i te faufaa rahi aore râ i te maitai no tatou. Mai te mea te parahi ra taua Varua ra i pihai iho ia tatou, e mai te mea e vai tamau noa mai oia i pihai iho ia tatou, ma te haamaramarama i to tatou mau mana‘o i te mahana e i te pô–tei ni‘a ïa tatou i te e‘a papû.⁹

Te hinaaro nei au e parau e mai to‘u matauraa mai i teie nei Ekalesia, ua ite au i te mau taata tei ti‘a mai mai tera taime e i tera taime e tei tamata ia riro ei mau tavini na te Atua. Ua tamata ratou i te tatara i te mau mea ta ratou i ore i ite no te faariro ia ratou ei feia maramarama a‘e. Ua rahi roa teie nei huru ohipa i teie nei tau. Te vai nei te hoê o te mau peresibutero faatere o te Ekalesia tei haere atu i mua i te taata e tei tamata i te poro i te tahi mau parau tumu. Ua faaroo o Iosepha i te reira e ua hinaaro oia ia hohora mai taua taata ra ia’na te haapiiraa na roto i te papa‘iraa. Ua papa‘i oia e ia oti te reira ua tai‘o atu i te reira i te peropheta. Ua ani oia ia Iosepha eaha to’na mana‘o no ni‘a i te reira. « No te aha ho‘i, parau atura Iosepha, e faanahonahoraa nehenehe roa, hoê noa râ hape ta‘u i ite– » « Eaha taua hape ra, e te taea‘e Iosepha ? » Parau atura Iosepha– « E ere i te parau mau ». No reira te parau atu nei au, i te mau taime atoa, e tamata te tahi taata, i to’na mana‘oraa e mea maramarama a‘e oia, i te haapii i te tahi mea e aita i roto i te Parau Haapiiraa e te mau Parau Fafau e te mau buka a te Ekalesia, e ere ïa i te parau mau …

… A poro i te parau mau mai ta outou i taa. Eiaha e imi i te mau mea aita outou i ite, no te mea aita e maitai i reira no te taata. Mai te mea e faaroo outou i te haapiiraa haavare e arata‘i-ê-hia ïa outou e te mau varua haavare. A haamana‘o e a haapa‘o i teie parau, e maitai ïa outou i reira. A tape‘a noa i te mau e‘a no te parau mau, e maitai ïa outou.¹⁰

Ia haaputuputu tatou no te haapii i te evanelia, e hinaaro tatou i te Varua mai te orometua haapii e hinaaro atoa ra.

Te ti‘aturi nei au e, e parahi mai te Varua o te Atua eiaha noa i roto i te feia e a‘o e e haapii ra …, i roto atoa râ ia ratou o te parahi e te faaroo ra.¹¹

E hinaaro paatoa tatou i te faaururaa a te Manahope …, ia poro ana‘e tatou aore râ ia faaroo ana‘e tatou.¹²

Te parau nei au i to‘u mau taea‘e e i to‘u mau tuahine, e tamata na tatou i te faaineine i to tatou mau feruriraa e to tatou mau aau na roto i te pure i mua i te Fatu, ia noaa ia tatou te maramarama o te Varua e titauhia e te mana o te Varua Maitai, ia ite e ia faahereherehia tatou i ni‘a i te e‘a o te ora, e ia farii ana‘e tatou i te mau haapiiraa e te mau a‘oraa a te mau tavini a te Atua, ia ineine tatou i te tape‘a maite i te reira i roto i to tatou mau aau e ia faaohipa i te reira i roto i to tatou nei oraraa.¹³

Mai te mea tei ia tatou taua tuhaa ra o te Varua o te Atua o tei riro ei haamaitairaa no tatou ia oaoa, e ia faarahi tatou i to tatou nei piiraa, e farii ïa tatou i taua iteraa ra o ta tatou e ti‘a ia farii i roto ia tatou i te mau taime atoa e hohorahia mai ai te hoê haapiiraa apî aore râ ia tatara hope-roa-hia te hoê haapiiraa tahito. Na roto i teie nei e‘a e fana‘o ai tatou i te pororaa a to tatou mau taea‘e e e nehenehe ai ia tatou ia faaherehere i te mau parau tumu no te ora mure ore.¹⁴

Te ti‘aturi nei e te pure nei au e a haaputuputu amui ai tatou e nehenehe ia tatou ia oaoa i te Varua o te Atua e ia hoê to tatou mau aau mai te aau o te hoê noa taata; ia pûpûhia ta tatou mau pure i mua i te Fatu, ia vai mai Ta’na mau haamaitairaa i ni‘a ia tatou e ia a‘o mai te mau taata ia tatou na roto i te faaururaa a te Varua Maitai e te mana o te Atua.¹⁵

E ti‘a ia tatou ia horo‘a [i te orometua haapii] to tatou haapa- ‘o-maitai-raa, ta tatou mau pure e te faaroo, e ia na reira tatou e farii ïa tatou, na roto i te pu‘eraa o te maitai ra o to’na aau, taua mau mea o te haamaitai ia tatou.¹⁶

Ia ti‘a ana‘e te hoê o te Peresideniraa o teie nei Ekalesia, aore râ te hoê o te Tino Ahuru ma Piti Aposetolo, aore râ te hoê o te mau peresibutero no te paraparau, e hi‘o teie nei nunaa ia ratou e e tia‘i ratou ia oaoa i te Varua Mo‘a no te parau mai i te tahi mea o te faaitoito ia ratou; e te tia‘i amui nei te nunaa i te reira. E parau ïa vau e i te tahi pae, te tia‘i nei te Peresideniraa, na Ahuru ma Piti Aposetolo, e te mau peresibutero… ia noaa [atoa] i te nunaa te Varua o te Fatu ia nehenehe ia ratou ia taa, e ua titau-atoa-hia te reira, ia nehenehe ia ratou ia taa i te mea e parauhia ra ia ratou mai tei titauhia i te mau taea‘e o te a‘o nei no te haapii i te haapiiraa, te parau tumu, te parau mau e te mau heheuraa a Iesu Mesia.

Ia oraora e ia maramarama te mau mana‘o o te nunaa e te mana o te Atua e te horo‘araa a te Varua Maitai, e nehenehe ta ratou e oaoa e e faaherehere i te mau parau tumu no te parau mau mure ore e te mau heheuraa ta te Atua i horo‘a mai… i reira ratou e faaineinehia’i no te oaoa i taua mau haamaitairaa tei niniihia i ni‘a iho ia ratou. O outou atoa tei ite i teie nei haamaitairaa, e te mana‘o nei e ua oaoa te Feia Mo‘a i teie nei haamaitairaa i te tahi taime, ua maere outou i te tahi taime no to outou oraraa e te vai nei teie huru-ê-raa i roto i to ratou mau mana‘ o. Ua ite au e teie te huru ia‘u nei e te mana‘o nei au e mai te reira atoa ia vetahi ê.

I vai na te tahi mau taime a matara ai te mau mata o to‘u nei mana‘o no te taa i te parau a te Atua e te mau haapiiraa a to’na mau tavini.–Ua matara te mata o to‘u nei feruriraa e ua faaorahia e te mana o te Atua e te horo‘araa a te Varua Maitai. E ia parahi au i ô nei e ia faaroo vau i te Peresideniraa, e te mau tavini a te Atua i te haapiiraa i te parau tumu no te parau-ti‘araa, e te parau a te Atua ia tatou nei, ua ite au i te puai, te mana e te faufaa rahi no teie nei mau parau mau mure ore ta ratou i hohora mai i to tatou nei mau feruriraa, e i te tahi atu mau taime ua haapiihia’tu taua iho mau parau mau ra, aita râ ratou i faaea mai e aore i faatupu i te hoê â huru i roto i to‘u nei feruriraa.

… Te faariro nei au i te reira ei mea faufaa rahi e ia haa tatou ia noaa taua Varua ra, ia rahi te reira i ni‘a ia tatou e ia afa‘i tatou i te reira na muri iho ia tatou e ia faaroo ana‘e tatou i te haapiiraa, ua ineine ïa to tatou mau feruriraa i te farii i te reira …

Te parau nei au i teie nei e no te mea ho‘i e e rave rahi o tatou tei farii i te evanelia e tei amui atu i te Feia Mo‘a a te Atua, e mea faufaa rahi ïa ia haa tatou i teie nei mahana, e ia ora tatou i raro a‘e i te mana o taua Varua ra e ia tamau noa te reira i te tupu i te rahi e i te faatere ia tatou i roto i ta tatou mau ohipa i rotopu i te mau tamarii a te taata–I teie nei ia farii te hoê taata i te Varua Mo‘a e ia faaroo oia i te mau parau mau maramarama e te ohie no te ora, e mea hau atu ratou i te faufaa i te tahi ê atu mau mea, e ua ineine oia i te faatusia i te mau mea atoa no te tino nei no te haapapû i to’na iho ora, ia haapourihia râ te mau feruriraa o te mau taata, e ere ratou i te Varua Mo‘a e te faufaa no taua evanelia ra, e eita ratou e ite i te haamaitairaa e te hanahana no te amuiraa’tu i te Feia Mo‘a a te Atua …, eita atoa ratou e tape‘a i ta ratou fafauraa i to ratou Metua i te ao ra, eita atoa ratou e faahanahana i to’na i‘oa i ni‘a i te fenua nei aore râ e faafaufaa i to ratou auraa e te feia tei mau i te autahu‘araa mo‘a, e no reira e haere atu ratou i roto i te pouri… Te maere e te mana‘ona‘o nei tatou ia haamaramaramahia tatou e te Varua o te Atua e te mau heheuraa ta’na i horo‘a mai ia tatou, e ia ara tatou i te mana‘o no te faufaa rahi o teie nei mau mea e i reira ïa tatou e ite ai i to ratou mana e ta ratou ohipa i ni‘a iho ia tatou, eiaha noa no te faaineineraa i to tatou mau mana‘o ia haere atu i roto i te ao varua, no te faaineine râ ia tatou ia farerei i to tatou Metua i te ao ra.¹⁷

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api v-ix.

A tai‘o i te mau faahitiraa parau a te peresideni Woodruff i roto i na paratarafa matamua e piti o teie nei pene (api 62). Eaha te mau haapiiraa ta teie nei mau faahitiraa parau e faaite mai nei no ni‘a ia’na ? Eaha te mau haapiiraa ta ratou i horo‘a mai no ni‘a i te haapiiraa e te iteraa ?
Eaha ta outou i haapii mai roto mai i te mau parau a te peresideni Woodruff no ni‘a i te haapiiraa na roto i te mana o te Varua ? (A hi‘o i te mau api 62, 65; a hi‘o atoa 2 Nephi 33:1–2.) Nahea ta tatou e nehenehe e faaineine no te farii i te arata‘iraa a te Varua Maitai ia haapii ana‘e tatou ?
Eaha te mau ohipa i tupu ia outou na roto i te haapiiraa atu e te haapiiraa mai na roto i te Varua ?
A tai‘o faahou i te tuhaa o te haamata i te api 66. No te aha e mea fifi roa ia feruri i te mau mea aita tatou i ite i te auraa ? No te aha tatou e faaitoito-rahi-hia ai e te mau parau mau maramarama e te ohie ?
Eaha te tahi o te mau ohipa a te feia e haapii ra ? (A hi‘o i te mau api 67-70). Nahea e nehenehe ai e noaa ia tatou te maitai rahi a‘e na roto mai i te hoê haapiiraa aore râ te hoê a‘oraa evanelia ? A feruri aore râ a aparau i te mau rave‘a e nehenehe ia outou ia haapiihia e te Varua.
A tai‘o faahou i te paratarafa matamua i te api 98. I roto i te mau ohipa tei tupu i ni’a ia outou i te haapiiraa i te evanelia, nahea outou i fana‘o ai i te « haapa‘o-maitai-raa, te mau pure e te faaroo » a te mau taata ta outou i haapii ?
Nahea ta te mau parau tumu i roto i teie nei pene e nehenehe ai e tauturu ia outou i roto i ta outou tuatapaparaa i teie nei buka ? (A hi‘o atoa i te mau api v-ix). Nahea teie nei mau parau tumu e tano ai a tuatapapa ai e a haapii ai outou i te evanelia i roto i to outou utuafare ?

Te mau papa‘iraa mo‘a: Hebera 4:2; 2 Petero 1:21; 2 Nephi 31:3; Alama 17:2–3; PH&PF 11:18–21; 42:14; 50:13–22; 52:9; 100:5–8

Mary learning at Jesus’ feet — Ei orometua haapii evanelia, e ti‘a ia tatou ia imi i te Varua ia nehenehe ia tatou ia pee atu i te hoho‘a o Iesu. Ia putuputu ana‘e tatou no te haapii i te evanelia, e ti‘a ia tatou ia ara e ia haapa‘o maitai, mai ia Maria a parahi ai oia i te pae avae o Iesu i te faarooraa i ta’na parau » (a hi‘o Luka 10:38–42).

Gospel Doctrine class — « E hinaaro paatoa tatou i te faaururaa a te Manahope … a poro ai tatou aore râ a faaroo ai tatou. »