Te oraraa e te tau faatereraa o Wilford Woodruff
Erave‘a maere ta te Atua e rave no te faatupu i Ta’na mau temeio; E tanu oia i To’na taahiraa avae i roto i te miti e e haere ho‘i Oia na ni‘a a‘e i te vero. »1 Tera ïa te omuaraa o te himene au roa a te peresideni Wilford Woodruff, « E rave‘a maere ta te Atua e rave. »
« Mea here roa na’na [te reira himene] », te na reira te peresideni Heber J. Grant, o te tavini ra ei aposetolo i te tau o Wilford Woodruff te peresideni no te Ekalesia. « Ua papû ia’u e, ua himene matou i te reira, haere e piti taime i te ava‘e i roto i ta matou mau apooraa hepetoma i roto i te hiero, e e mea varavara roa ia ma‘iri te hoê ava‘e aita te taea‘e Woodruff e titau ia himenehia te reira himene. Ua ti‘aturi oia i teie ohipa ma to’na aau atoa e to’na varua atoa, e ua rave oia i te ohipa ma te puai atoa ta te Atua i horo‘a ia’na no te faahaere i te reira ohipa i mua. »2
Teie te parau a Matthias F. Cowley o tei tavini atoa i pihai iho i te peresideni Woodruff: « Aita paha e taata i roto i te Ekalesia mai ia Wilford Woodruff tei ite hohonu i te auraa mau o te mau parau ra, ‘E rave‘a maere ta te Atua e rave no te faatupu i Ta’na mau temeio.’ Ua î roa oia i te varua, e ua horo‘a hope roa ho‘i ia’na i roto i te taviniraa i te Atua, no reira, i roto i to’na oraraa taatoa, ua ninii–rahi–hia mai te mau faaiteraa temeio faahiahia no te mau opuaraa a te Atua. Aita roa’tu oia i niu noa a‘e i to’na faaroo i ni‘a i te mau temeio, na te reira râ mau temeio i haapapû mai i te mau mea ta’na i ti‘aturi ma to’na aau atoa, e tei paturu i to’na mau mana‘o i roto i te haapiiraa i te mau papa‘iraa mo‘a. »3
Mai ta te peresideni Grant e te taea‘e Cowley i parau, ua riro te himene au roa a te peresideni Woodruff ei tumu parau tano maitai i ni‘a i to’na oraraa. Ua faaite atoa ho‘i te reira i te tupuraa i te rahi o ta’na i ite i roto i te Ekalesia a Iesu Mesia i te Feia Mo‘a i te mau Mahana Hopea nei. Te na ô faahou ra te himene e:
E te Feia Mo‘a ahoaho na e, a faaitoito;
Te mau ata ta outou e mata‘u nei
Ua î ïa i te aroha, e e parari te reira
No te ninii mai i te mau haamaitairaa i ni‘a i to outou upoo.
E para oioi Ta’na mau opuaraa,
E matara ho‘i i te mau hora atoa;
E mea maramara paha te umoa,
Area te tiare ra, e mea au maite ïa.
Te taata ti‘aturiraa ore ra, e haere‘a overe papû ïa to’na
Ma te taa ore i te ohipa a te Atua;
Te Atua iho to’na auvaha,
E e faaohie oia i te ohipa a te Atua.4
Ua riro o Wilford Woodruff ei taata faufaa roa i roto i te mau ohipa faufaa i roto i te aamu o te Ekalesia i te omuaraa ra, e ua ite maitai oia i te mau ati tei hopoi mai i te mau haamaitairaa i te feia tei haapa‘o maite. Ua ite oia i te teimaha o te hamani–ino–raa e te mamae, area râ, i roto i taua mau ati ra, ua farii atoa oia i te màrû o te arata‘iraa o te rima o te Atua. E ia ite a‘era oia i te iritiraa o te Faaho‘i–faahou–raa mai o te evanelia, ua roaa ia’na te hoê iteraa maramarama no ni‘a i te ohipa a te Atua.
Te tamariiriiraa e te apîraa o Wilford Woodruff: Hoê niu paari tei patuhia i roto i te utuafare
Ua fanauhia o Wilford Woodruff i te 1 no mati 1807, i Farmington, Connecticut, na roto mai ia Aphek Woodruff raua o Beulah Thompson Woodruff. I te 15 o to’na ava‘e ua pohe to’na metua vahine i te ma‘i « méningite ». E toru matahiti i muri mai, ua faaipoipo faahou o Aphek. Na te papa e te mama apî, o Azubah Hart Woodruff, i faaamu ia Wilford e to’na na tuaana e piti. Ua fanau mai o Aphek raua o Azubah e ono tamarii, e maha râ o te reira mau tamarii tei pohe i to ratou tamariiriiraa e aore ra i te aiuraa ra.
Te faaite mai nei te mau papa‘iraa a Wilford Woodruff e, ua paari mai oia mai te tahi atu mau tamaroa o to’na ra tau. Ua haere oia i te haapiiraa e ua rave i te ohipa i roto i te faaapu a te utuafare. Ua rave atoa oia i te ohipa i roto i te fare hahuraa raau a to’na metua tane i to’na apî–roa–raa ra, e ua roaa ia’na te tahi mau iteraa tei tauturu ia’na, i to’na paariraa, ia faatere i te hoê fare hahuraa raau na’na iho. Te hoê o ta’na ohipa arearea au roa, o te tai‘a ïa, e e mea pinepine ratou o to’na na taea‘e ia haere e hî i te nato i roto i te anavai e tahe ra na pihaiiho i te fare hahuraa raau a to’na metua tane.
Ua here roa oia i to’na utuafare, e e faatura rahi to’na i to’na na metua. Ma te faahiahia e te mauruuru rahi, te faaite ra oia no ni‘a i to’na metua tane mai te hoê taata puai o tei tamau « i te rave i te ohipa rahi » e o tei riro « ei taata aroha rahi, te parau ti‘a, te paieti e te parau mau. »5 Te haamana‘o atoa ra oia e ua tauturu te mau haapiiraa evanelia a to’na mama faamu i te arata‘iraa ia’na ia imi i te Ekalesia mau a te Fatu.6
A tupu noa ai oia i te paariraa, ua natihia e rave rahi o to’na mau oaoa rarahi i roto i te oraraa, i ni‘a i to’na na metua e i to’na mau taea‘e e te mau tuahine. Ua tomo mai oia i roto i te Ekalesia i te mahana iho a tomo atoa mai ai to’na tuaana o Azmon. Ua tupu to’na oaoa rahi i te taime a ti‘a ai ia’na ia haapii e ia bapetizo i to’na metua tane e to’na metua vahine faamu e to raua utuafare taatoa. I roto i to’na oraraa i muri a‘e, ua ara maite oia ia ravehia te mau oro‘a hiero no to’na metua vahine, inaha, mai ta’na e parau ra e, e haamaitairaa ti‘a te reira no te faaho‘i i te mau ohipa atoa o to’na oraraa.7
« Te paruru e te maitai o te Atua »
Ia hi‘o oia i muri i to’na tau tamariiraa e te taure‘are‘araa, ua ite o Wilford Woodruff i te rima o te Fatu i te parururaa i to’na ora e rave rahi taime. I roto i te hoê parau papa‘i tei parauhia « Pene no te mau Ati », ua faaite oia i te tahi mau ati tei farereihia e ana, ma te faahiahia i te mea e, ua ora mai oia no te faaite mai i te reira mau mea. Teie te tahi hi‘oraa, te faati‘a ra oia i te tahi ohipa tei tupu i ni‘a ia’na i roto i ta ratou faaapu utuafare: « I te onoraa o to‘u matahiti, ua fatata roa vau i te pohe i te hoê puaatoro ino. Te faaamu ra maua o to‘u papa i te animala i te mautini, ua tiahi ê atura te hoê puaatoro ino i ta‘u puaatoro ufa i te mautini ta’na e amu ra. Ua rave a‘era vau i te mautini tei vaiihohia mai, i reira to te puaatoro hororaa mai i ni‘a ia‘u. Ua parau maira to‘u metua tane ia faaru‘e i te mautini e ia horo. Ua horo vau na ni‘a mai i te aivi, ma te tape‘a noa i te mautini, inaha, ua feruri au e, e mea ti‘a i te puaatoro ufa ia amu atoa i ta’na. Ua tamau noa te puaatoro ino i te aua‘u ia‘u. I te taime fatata vau i te roaa ia’na, ua taahi ihora vau i roto i te hoê apoo pou e ua topa vau i raro; ua na ni‘a a‘e te puaatoro ia‘u, no te tapapa i te mautini, e ua patia hu‘ahu‘a roa oia i te mautini i to’na nau tara, e e na reira atoa oia ia‘u ahiri e, aita vau i topa i raro. »8
Ua faati‘a atoa oia i te tahi ati tei tupu i ni‘a ia’na i te 17raa o to’na matahiti: « Te faahoro ra vau i te hoê puaahorofenua ino ta‘u i ore i matau maitai; e te pou maira maua na ni‘a i te hoê aivi ofa‘ifa‘i e te pateitei, hi‘ohi‘o a‘era te puaahorofenua i te repo, ua ou‘a a‘era oia i te hiti i te purumu, e ua horo atura i raro, na roto i te uru ofa‘i, ma te puai hope, e ua haamata i te patu, e ma te tamata i te ta‘ue ia‘u na ni‘a a‘e i to’na afii, i ni‘a i te mau ofa‘i; tera râ, ua mau noa vau i ni‘a i to’na afii, ma te tape‘a papû i to’na na tari‘a, a tia‘i noa ai ia pee au e ia hu‘ahu‘a roa i ni‘a i te mau ofa‘i. I roto i taua parahiraa ra, i ni‘a i to’na a’i, ma te tavaha ore no te arata‘i i te puaahorofenua, maori râ, to’na noa na taria, ua horo vitiviti maira te puaahorofenua na ni‘a mai i te aivi, e û atura i ni‘a i te hoê ofa‘i, e marua iho nei i ni‘a i te repo. Pee atura vau na ni‘a i to’na upoo e na ni‘a a‘e i te mau ofa‘i, [e pae paha e aore ra, e pae e te afa metera i te atea], e topa ti‘a’tura i ni‘a i to‘u na avae, te mea ïa i ora ai au; i te mea e, ahiri au i topa i ni‘a i te tahi atu melo o to‘u tino, ua pohe ïa vau i reiraraa ra; ua perehu ihoa to‘u mau ivi i raro a‘e ia‘u, mai te huru i te mau aeho. E piti fati i ni‘a i to‘u avae aui, ua taa to‘u na fatiraa avae, e ua fatata roa vau i te perehuhia i te puaahorofenua i roto i ta’na tautooraa ia ti‘a faahou i ni‘a. Ua ite mai te taea‘e o to‘u papa, Titus Woodruff, ia‘u i te toparaa, haere mai nei oia e tauturu ia‘u, e amo atura ia‘u i to’na fare. Ua tarava noa vau mai te hora 2 i te avatea e tae roa’tu i te 10 i te pô, ma te rapaau–ore–hia; i reira, ua tae maira to‘u papa, ma te arata‘i atoa mai i te Taote Swift, no Farmington, na muri iho ia’na, e na’na i faaafaro i to‘u mau ivi, ua tima i te reira, e ua amo ia‘u i roto i te pereoo puaahorofenua, e ua tere e va‘u maire i te atea i te reira pô no te ho‘i i ô matou. Mea puai to‘u mauiui. Tera râ, ua aupuru–maitai–hia vau, e e va‘u hepetoma i muri a‘e, te haere nei au na rapae e te turutootoo. »9
Ua paruru–tamau–maite–hia te oraraa o Wilford Woodruff, noa-’tu teie rahiraa ati, tae roa’tu i to’na tau paariraa. I te 41raa o to’na matahiti, ua faaite mai oia i te tahi parau iti poto no ni‘a i te tahi mau fifi rii tei farereihia e ana, ma te faaite i to’na mauruuru i te rima paruru o te Fatu:
« Ua fati to‘u na avae toopiti–e piti fati to ni‘a iho i te tahi–to‘u na rima toopiti, to‘u ivi ouma e e toru ivi aoao, ua taa na fatiraa avae toopiti. Ua paremo vau, ua paari i te to‘eto‘e, ua paapaa i te pape ve‘ave‘a e ua amuhia e te uri tahae– ua faaruru vau i te puai u‘ana o te pape–ua roohia vau e rave rahi mau ma‘i, ua taero i te raau taero puai–ua topa i ni‘a i te hoê haapu‘eraa auri–fatata i te puta i te ofa‘i pupuhi, e ua rau ana‘e atu â te mau ati tei apehia.
« Ua riro teie ei temeio inaha, noa’tu to‘u mau pepe e te mau ivi fatifati, aita roa hoê melo hapepa to‘u, ua ti‘a râ ia‘u ia tamau noa i te rave i te mau ohipa rarahi, te to‘eto‘e e te ratereraa–pinepine au i te ratere e ono ahuru, e va‘u ahuru e i te hoê taime, hoê hanere Kilometera i te atea i te hoê mahana. Ua vai tamau noa te parururaa e te maitai o te Atua i ni‘a iho ia‘u, e ua faahereherehia to‘u oraraa e tae noa mai i teie nei; no taua mau haamaitairaa ra, te hinaaro nei au e faaite i te mauruuru o to‘u aau i to‘u Metua i te Ao ra, ma te pure e ia pûpû i te toe‘a o to‘u oraraa i roto i te Taviniraa ia’na e i te paturaa i To’na basileia. »10
Te imiraa e te iteraa i te Ekalesia mau a te Fatu.
Te taure‘are‘a ra o Wilford Woodruff i tupu ai te hinaaro matamua i roto ia’na ia tavini i te Fatu e ia ite i To’na parau. Ua parau oia e, « I to‘u apî–roa–raa, ua tupu te anaanatae rahi i roto ia‘u no ni‘a i te mau parau no te haapa‘oraa. »11 Tera râ, ua faaoti oia eiaha e amui atu i te hoê noa a‘e Ekalesia. Ua titau râ oia ia imi i te Ekalesia mau a Iesu Mesia. Na roto i te faaururaa o te mau haapiiraa a to’na na metua e a te tahi atu mau hoa to’na e na roto atoa ho‘i i te muhumuhu a te Varua, ua tupu te ti‘aturiraa papû i roto ia’na e, « tei roto te Ekalesia a te Mesia i te medebara–ua faaru‘ehia ho‘i te paieti mau e te ino ore i mua i te aro o te Atua, e ua fatata roa te tauiraa rahi e tae mai. »12 E anaanatae taa‘e to’na i te mau haapiiraa a te hoê taata o Robert Mason te i‘oa, tei tohu e, e ora o Wilford no te amu i te hotu o te evanelia i faaho‘i–faahou–hia mai (a hi‘o i te mau api 1–3 i roto i teie buka).
E rave rahi matahiti i muri mai, no to’na ti‘aturi e, e nehenehe te tahi atu mau Feia Mo‘a i te mau Mahana Hopea nei e fana‘o atoa i to’na mau iteraa,13 ua parau pinepine te peresideni Wilford Woodruff i te aamu no to’na maimiraa i te parau mau. Te faati‘a ra oia e:
« Aita i itehia ia‘u te hoê haapa‘oraa e te vai ra i roto te mau haapiiraa, te faaroo e aore ra, te peu, e tu‘ati ra i ni‘a i te Evanelia a Iesu Mesia, e aore ra, te mau oro‘a e te mau horo‘a tei haapiihia e te mau Aposetolo. Noa’tu e, te haapii nei te mau orometua i teie mahana e, ua hope te tau e aita e titau–faahou–hia te parau no te faaroo, no te mau horo‘a, no te mau maitai, no te mau temeio e no te mau oro‘a, tei fana‘ohia e te Feia Mo‘a i tahito ra, aita vau i ti‘aturi e parau mau te reira, ua mou râ te reira na roto i te ti‘aturi ore o te mau tamarii a te taata nei. Ua ti‘aturi au e, e faaite–atoa–hia mai taua mau horo‘a ra, taua mau maitai ra, e taua mau temeio ra e te mana, i tera tau e tera tau o te ao nei, ia vai ana‘e te Ekalesia a te Atua i ni‘a i te fenua nei, e e faati‘a–faahou–hia te Ekalesia a te Atua i ni‘a i te fenua nei, e e ora ho‘i au no te ite i te reira. Ua mau roa teie mau parau tumu i roto i to‘u feruriraa na roto i te tai‘oraa i te Faufaa Apî e te Faufaa Tahito, na roto i te pure u‘ana e, e faaite mai te Fatu ia‘u i te mea tano e te mea hape, e e arata‘i oia ia‘u na ni‘a i te e‘a no te faaoraraa, ma te tau‘a ore i te mana‘o o te taata; e na te muhumuhu o te Varua o te Fatu i te roaraa e toru matahiti, i haapii mai ia‘u e, ua ineine roa oia i te faati‘a faahou i Ta’na Ekalesia e To’na basileia i ni‘a i te fenua nei i te anotau hopea nei. »14
« Ua faatumu roa to‘u varua i ni‘a i teie mau mea », o’na teie e parau nei. « I to‘u apîraa, ua pure au i te ao e te pô ia ti‘a ia‘u ia ora no te ite i te hoê peropheta. Ua ineine au no te haere tauasini kilometera i te atea no te hi‘o i te hoê peropheta, e aore ra, i te hoê taata no te haapii mai ia‘u i te mau mea ta‘u i tai‘o i roto i te Bibilia. Aita ta‘u e nehenehe e amui atu i te hoê noa a‘e Ekalesia, no te mea, aita e itehia ra ia‘u te hoê Ekalesia i taua taime ra, o te haapii ra i teie mau parau tumu. E rave rahi taime i te maororaa pô, i te pae pape, i ni‘a i te mou‘a, e i roto i te fare hahuraa raau… to‘u ti‘aororaa i te Atua ia ti‘a ia‘u ia ora no te ite i te hoê peropheta, e aore ra, i te tahi mau taata o te nehenehe e haapii mai ia‘u i te mau mea no ni‘a i te basileia o te Atua mai ta‘u i tai‘o ra. »15
Ua hope te tuatapaparaa a Wilford Woodruff i te 26raa o to’na matahiti. I te 29 no ditema, 1833, ua faaroo oia i te hoê a‘oraa tei vauvauhia mai e Elder Zera Pulsipher, e misionare teie no te Feia Mo‘a i te mau Mahana Hopea nei. I roto i to’na buka aamu, ua papa‘i oia i ta’na pahonoraa i te a‘oraa a Elder Pulsipher:
« Ua haamata oia i te pureraa na roto i te tahi mau parau omuaraa, e i muri iho, ua pure. Ua farii au i te Varua o te Atua o tei faaite mai e, e tavini oia no te Atua. I muri iho, ua hamata a‘era oia i te haapii, e na roto atoa ho‘i i te mana, e ia hope ta’na a‘oraa, ua ite papû ihora vau e, teie te a‘oraa evanelia matamua a tahi nei au a faaroo ai. Ua feruri a‘era vau e, teie mau te mea ta‘u i imi maoro noa na. Aita ta‘u e nehenehe e faaru’e i taua vahi ra ma te faaite ore i te parau mau i mua i te taata. Ua araara a‘era vau i to‘u na mata no te ite, to‘u na taria no te faaroo, to‘u aau no te haro‘aro-‘a, e to‘u mau uputa no te farii ia’na o tei utuutu mai ia matou. »16
Ua titau manihini o Wilford Woodruff ia Elder Pulsipher e i to’na hoa, o Elijah Cheney, ia faaea mai i te utuafare Woodruff. E piti mahana i muri a‘e, na roto i to’na tai‘oraa i te Buka a Moromona e to’na farereiraa i te mau misionare, ua bapetizohia te taea‘e Woodruff, e ua haamauhia ei melo no te Ekalesia a Iesu Mesia i te Feia Mo‘a i te mau Mahana Hopea nei. Ua taui to’na oraraa mai taua mahana mai ra. Na roto i to’na iteraa i te parau mau, ua pûpû oia ia’na iho no te hopoi i te reira ia vetahi ê ra.
« Te hinaaro ia haere e poro i te Evanelia »
No to’na hinaaro papû ia haapa‘o i te mau fafauraa ta’na i rave i te bapetizoraa, ua riro o Wilford Woodruff ei mauhaa papû i roto i te rima o te Fatu, o tei ineine tamau noa i te haapa‘o i To’na hinaaro. I te pae hopea o te matahiti 1834, « ua tupu te hinaaro i roto ia’na ia haere e poro i te Evanelia »,17 e ua tae mai te piiraa ia tavini oia i te pae apatoa–hitia o te râ o te Fenua Marite. Ua ite oia e, e tupu mai te mau tamataraa, e e nehenehe atoa ho‘i to’na ora e fifi i roto i to’na mau ratereraa, tera râ, ua iteahia ia’na te puai i roto i to’na iteraa papû e to’na faaroo. Teie ta’na i parau i muri a‘e ra e: « Ua ite au e, te Evanelia ta te Fatu i heheu mai ia Iosepha Semita ra, e parau mau ïa, e no te faufaa rahi o te reira, ua hinaaro vau ia faaite i te taata tei ore i faaroo a‘e nei i te reira. E no te maitai e te ohie ho‘i o te reira evanelia, mai te huru ra ia‘u e, e nehenehe ta‘u e arata‘i i te taata ia ti‘aturi i te reira. »18
I te haamataraa o Wilford Woodruff i ta’na misioni matamua, e tahu‘a ïa to’na toro‘a i roto i te Autahu‘araa a Aarona. To’na hoa, tei faatoro‘ahia ei peresibutero, ua faaea noa ïa i pihai iho ia’na i roto i te mau tamataraa matamua o te misioni, tera râ, aita i maoro, ua paruparu to’na mana‘o, e ua ho‘i i to’na fare i Keterani, Ohio. Toe noa mai nei oia ana‘e i roto i te hoê fenua matau–ore–hia e ana, ua pure o Wilford no te ani i te tauturu, e ua tamau noa oia i te rave i ta’na mau ohipa misionare, ma te haere na roto i te vari e te mau vahi pape. I te pae hopea, ua tae oia i roto i te oire no Memphis, i Tennessee, « ma te rohirohi e te po‘ia. »19 I roto i ta’na ohipa misionare matamua i tupu i reira, ua paraparau oia i mua i te hoê nahoa rahi. Te parau ra oia e:
« Ua haere au i roto i te hoê hotera na‘ina‘i maitai roa no taua vahi ra, na Josiah Jackson e haapa‘o ra i te reira. Ua parau atura vau ia’na e, e ratere au, e aita ta‘u e moni. Ua ani au ia’na e, e farii anei oia ia faaea vau i reira i taua pô ra. Ua ani mai oia e, eaha ta‘u ohipa. Ua pahono atu vau ia’na e, e orometua haapii Evanelia vau. Ua ata a‘era oia, e ua parau maira e, aita roa’tu vau i hoho‘a i te hoê orometua. Aita vau i faahape ia’na, i te mea e, te mau orometua atoa ta’na i matau, mea na ni‘a ïa ratou i te puaahorofenua nehenehe te haere, e aore ra, na ni‘a i te pereoo puaahorofenua nehenehe, ma te ahuhia i te ahu nehenehe, e e mea aufauhia ratou i te moni maitai, e e mea au a‘e na ratou ia ite i te ao taatoa nei ia pohe, hou a haere ai ratou e piti hanere e tiahapa kilometera i te atea na roto i te vari paruparu no te faaora i te taata.
« Ua hinaaro paha te fatu hotera e arearea rii, no reira, na ô maira oia e, e faati‘a oia ia‘u ia faaea mai, mai te mea e, e haapii au. Ua hinaaro oia ia ite e, e nehenehe mau anei ta‘u e haapii. Te hinaaro nei au e faaite e e taata hauti rii au i taua taime ra, e ua taparu vau ia’na eiaha vau e haapii. Rahi noa’tu ta‘u taparuraa eiaha vau e haapii, rahi–noa–toa’tu to’na hinaaro mau ia haapii au…
« Ua parahi a‘era vau i roto i te hoê piha rahi no te tamaa. Aitâ vau i pa’ia’tura, ua haamata a‘era te piha i te î i te tahi mau taata moni e te hi‘oraa maitai no Memphis, ma te ahuhia i to ratou mau ahu nehenehe, area o vau ra, te taa ra ïa ia outou to‘u huru, i muri a‘e i to‘u ratereraa na roto i te vari paruparu. Ia pa’ia a‘era vau, ua afa‘ihia’tura te amuraa maa i rapae i te piha na ni‘a a‘e i te upoo o te taata. Ua arata‘ihia vau i roto i te hoê peho o te piha, e te hoê pa‘epa‘e e Bibilia, e buka himene e e mori hinu to ni‘a iho, haatihia e ahuru ma piti taata, e te fatu hotera i ropu. Ua tae- ‘ahia e pae hanere taata tei haere mai, eiaha no te faaroo i te hoê a‘oraa Evanelia, no te arearea râ… Eaha to outou mana‘o i teie huru ? I roto i ta outou misioni matamua, aita e apiti, e aore ra, aita e hoa, e ua titauhia ia haapii i te hoê naho‘a taata mai teie te huru ? No‘u nei, ua riro ïa taua taime ra, ei taime faahiahia roa a‘e no to‘u oraraa, noa’tu e, ua hinaaro vau i te tahi hoa.
« Ua tai‘o vau i te hoê himene, e ua ani au ia ratou ia himene. Aita hoê a‘e taata i himene. Ua parau atu vau ia ratou e, e ere au i te taata aravihi i te himene; tera râ, na roto i te tauturu a te Fatu, e pure au e e haapii atoa vau. Ua tuturi a‘era vau i raro no te pure, e ua tuturi atoa a‘era te mau taata e haati ra ia‘u.Ua pure au i te Fatu ia horo‘a mai i to’na Varua i roto ia‘u, e ia faaite mai ia‘u i te aau o te mau taata. I roto i ta‘u pure, ua fafau atu vau i te Fatu e, e a‘o atu vau i teie nahoa taata i te mea Ta’na e tuu mai i roto ia‘u. Ua ti‘a a‘era vau i ni‘a, e ua paraparau vau ia ratou hoê hora e te afa te maoro, e ua riro taua a‘oraa ta‘u ra ei hoê o te mau a‘oraa nehenehe roa a‘e i roto i to‘u oraraa.
« Ua mahora te oraraa o te nahoa taata i te orama o to‘u feruriaa, e ua faaite au ia ratou i ta ratou mau ohipa iino e te faautuaraa e tae mai i ni‘a ia ratou. Te feia e haati ra ia‘u, ua pi‘o ana‘e ihora i to ratou upoo i raro. E toru minuti i muri a‘e i te hoperaa ta‘u a‘oraa, o vau ana‘e te taata e toe ra i roto i te piha.
« Aita i maoro, ua faaitehia maira ia‘u te hoê ro‘i, i roto i te hoê piha i pihai iho i te tahi piha rahi tei reira te putuputuraa e rave rahi o te mau taata ta‘u i haapii ra. E ua faarooroo vau i ta ratou mau paraparau. Te parau ra te hoê taata e, ua hinaaro oia ia ite e, mea nahea taua tamaiti Momoni ra i te iteraa i to ratou oraraa. Ua aimaro rii ratou no ni‘a i te tahi mau parau haapiiraa. Ua ani te tahi e pii mai ia‘u no te haapapû. Ua parau atura râ te fatu hotera e, ‘eiaha; ua rava’i tatou i tera.’
« I te po‘ipo‘i a‘e, ua tamaa maitai au. Ua parau maira te fatu hotera e, mai te mea e, e haere faahou mai au na ô nei, mea ti‘a ia‘u ia tape‘a i to’na fare, e ia faaea mai te au i te maoro ta‘u e hinaaro. »20
I te ava‘e novema 1836, ua faaoti o Wilford Woodruff i ta’na tau misioni i te pae apatoa–hitia o te râ no te Fenua Marite. Ua papa‘i oia i roto i ta’na buka aamu e, i te matahiti 1835 e 1836, ua ratere oia i te roaraa e 15, 688 kilometera, ua faatupu e 323 putuputuraa, ua faanahonaho e 4 amaa no te Ekalesia, ua bapetizo e 70 taata, e ua haamau e 62, ua rave 11 faatoro‘araa i te autahu‘araa, e ua faaora e 4 taata na roto i te tuuraa rima, e ua faaorahia oia i te rima o te mau pŭpŭ taata iino e ono ra.21 Ua faatoro‘ahia oia ei peresibutero i te ava‘e tiunu 1835 e ei Hitu Ahuru i te ava‘e me 1836.
I te ho‘iraa mai o Elder Woodruff i Keterani, ua ite a‘era oia e, e rave rahi mau melo no te Ekalesia tei taiva, e te pato‘ito‘i ana‘e ra i te peropheta Iosepha Semita. « I te tau no te taivaraa i Keterani », o’na teie e parau nei i muri a‘e, « Ia farerei Iosepha Semita i te hoê taata, mea fifi roa na’na ia ite e, e hoa anei teie e aore ra, e enemi, maori râ, ia heheu mai te Varua o te Atua i te reira ia’na. Te rahiraa o te feia faatere o te aro mai nei ia ia’na. »22
Noa’tu « tei roto roa oia i taua tau pouri ra »,23 ua ti‘aturi tamau noa o Wilford Woodruff i te peropheta, e i to’na atoa hinaaro tuutuu ore ia poro i te evanelia. Ua piihia oia i roto i te Pŭpŭ Matamua no te Hitu Ahuru, e i roto i te reira ti‘araa, ua tamau noa oia i te faaite hua i te parau mau, ma te ratere haere i roto i te mau amuiraa o te reira vahi. Aita â i ti‘ahia i te hoê matahiti to’na parahiraa i Keterani, ua haapa‘o oia i te hoê reo tei faaue ia’na ia rave i te hoê tau misionare rave tamau i te mau Motu no Fox Islands, i rapae noa‘e i te tahatai o te tuhaa fenua no Maine. Te parau ra oia e:
« Ua parau mai te Varua o te Atua ia‘u, ‘A ma‘iti i te hoê hoa no oe, e a haere i Fox Islands.’ Aita to‘u ite no ni‘a ia Fox Islands i hau atu i to‘u ite no ni‘a ia Koloba. Tera râ, ua parau mai te Fatu ia‘u ia haere, e ua haere au. Ua ma‘iti au ia Jonathan H. Hale, e ua haere mai oia na muri iho ia‘u. Ua tiavaru maua i te tahi mau demoni i reira, ua poro maua i te Evanelia, e ua faatupu i te tahi mau temeio… Ua tae au i Fox Islands, e ua rave maitai au i te ohipa i reira. »24 I te taeraa o Elder Woodruff i Fox Islands, ua ite oia i reira, i te « hoê nunaa taata e titau ra i te faanahoraa tahito. » I muri a‘e, te parau ra oia e, « Ei haapoto–noa–raa, te parau nei au e, ua hau i te 100 taata ta‘u i bapetizo i reira. »25
Te tamau–noa–raa i te rave i te ohipa misionare ei aposetolo na te Fatu ra o Iesu Mesia
I te matahiti 1838, te rave ra o Elder Woodruff i ta’na tau misionare i Fox Islands, i tae mai ai te piiraa o tei faaroa faahou i ta’na tau misionare e hope noa’tu to’na oraraa. Te parau ra oia e, « I te 9 no atete, ua tae mai te hoê rata ia‘u nei, no ô mai ia Thomas B. Marsh, te peresideni no te Tino Ahuru Ma Piti Aposetolo, te faaara maira ia‘u e, ua tae mai te hoê heheuraa ia Iosepha Semita, te peropheta, i te faaiteraa e, ua ma‘itihia teie mau taata i muri nei no te parahi i ni‘a i te mau parahiraa o te feia tei topa: John E. Page, John Taylor, Wilford Woodruff e o Willard Richards.
« Te parau atoa ra te peresideni Marsh i roto i ta’na rata e, ‘Ia ite mai oe, e te taea‘e Woodruff, na roto i teie rata e, ua piihia oe ia rave i te parahiraa o te hoê o na Aposetolo Hoê Ahuru Ma Piti, e ua ti‘a ho‘i i te parau a te Fatu, tei horo‘ahia mai nei, ia haere oioi mai oe i Far West nei, e i te 26 no eperera i muri nei, ia vaiiho mai i te Feia Mo‘a i ô nei, e ia reva’tu i te tahi atu mau fenua na ni‘a i te moana.’ »
I muri a‘e ra, te parau ra te peresideni Woodruff e, « Te mau parau i roto i teie rata, ua heheuhia mai te reira ia‘u e rave rahi mau hepetoma na mua’tu, aita râ vau i paraparau noa’tu i te reira i te hoê taata. »26
Teie arata‘iraa « ia reva’tu i te tahi atu mau fenua na ni‘a i te moana » te tu‘ati ra ïa i ni‘a i te faaueraa a te Fatu ia rave te Tino Ahuru Ma Piti i te misioni i Peretane. I muri noa iho i to’na faatoro‘ a–raa–hia ei Aposetolo i te 26 no eperera, 1839, ua reva’tu o Elder Wilford Woodruff i Peretane ei hoê o te « mau ite papû no te i‘oa no te Mesia i roto i te ao paatoa nei » (PH&PF 107:23).
I muri mai, ua rave o Elder Woodruff i te tahi atu mau tau misioni i te fenua Marite e i Peretane. Ua itehia oia ei hoê o te mau misionare faahiahia i roto i te aamu o te Ekalesia. Te vai nei i roto i teie buka, e rave rahi mau aamu no roto mai i te mau ohipa misionare i tupu i ni’a ia’na.
Tautururaa i te feia mo‘a ia haaputuputu
Te faaitoitohia nei te Feia Mo‘a i te mau Mahana Hopea nei i teie anotau ia patu i te basileia o te Atua i te mau vahi iho e nohohia ra e ratou, na roto ho‘i i te reira, te faaitoito ra ïa ratou i te Ekalesia i te ao atoa nei. I te omuaraa o te Ekalesia, ua faaitoito te mau misionare Feia Mo‘a i te mau Mahana Hopea nei, i te feia faafariu–apî–hia ia reva i te pû faatere o te Ekalesia, i Keterani anei, ohio, e aore ra, i te mataeinaa anei no Jackson, Missouri, e aore ra, i Navu, Illinois, e aore ra, i Salt Lake City, Utaha.
Fatata e piti matahiti i muri a‘e i te maratiri o Iosepha raua o Hairamu Semita, ua faahepohia te Feia Mo‘a ia faaru‘e i to ratou mau nohoraa i Navu, e ua tere ratou e faati‘a i te tahi puhaparaa poto i Winter Quarters, Nebraska. I muri a‘e i ta’na misioni i te fenua Peretane, ua ho‘i mai o Elder Woodruff i te pû no te Ekalesia. I to ratou faaru‘eraa i Winter Quarters, ua tauturu oia i te arata‘iraa i te Feia Mo‘a i roto i to ratou tere o tei matau–maitai– hia: to ratou ratereraa na roto i te mau afaa e te mau mou‘a o te mau hau no te fenua Marite e tapae atu ai i to ratou fenua i fafauhia ra, oia te Afaa no Roto Miti. Tei roto oia i te pŭpŭ matamua o te mau pionie, e na’na i amo i te peresideni Brigham Young, o tei ma‘ihia, i te pae hopea o to ratou tere. Tei reira ho‘i o Elder Woodruff i te taime a ti‘a mai ai te peresideni Young mai ni‘a mai i to’na ro‘i i roto i te pereoo, hi‘ohi‘o a‘era i te fenua i mua ia ratou, e i reira, parau a‘era: « Ua nava’i. Teie te vahi tano. Haere ana‘e. »27
Ua tauturu tamau noa o Elder Woodruff i te Feia Mo‘a ia haaputuputu i roto i to ratou fenua i fafauhia ra. I roto i te hoê o ta’na mau misioni, ua parahi oia e to’na utuafare e piti matahiti e te afa te maoro i Canada e i te pae apatoerau hitia o te râ no te mau hau amui no Marite, i te tautururaa i te mau melo no te Ekalesia ia tere i roto i te Afaa no Roto Miti. Tei roto oia i te pŭpŭ hopea no te reira Feia Mo‘a i tupu mai ai teie ohipa i muri nei i ni‘a ia’na, tei faaite papû mai i to’na aau mahora i te muhumuhu o te Varua:
« Ua ite atura vau i te hoê pahi o tei ineine no te faareva. Ua haere atu vau e farerei i te tapena e ua ani atu ia’na e, ehia rahiraa horopatete ta’na. ‘E toru hanere e pae ahuru.’ ‘E nehenehe anei ta oe e faauta faahou hoê hanere taata ?’ ‘E’ Ua ineine roa vau no te parau ia’na e, te hinaaro nei matou e ta‘uma i ni‘a i te pahi, i taua taime ra, parau maira te varua ia‘u e, ‘Eiaha e ta‘uma i ni‘a i te reira pahi, o oe e ta oe pŭpŭ taatoa.’ Na reira, o vau teie e parau nei. Ua haapii mai au i te hoê mea no ni‘a i taua reo iti ha‘iha‘i ra. Aita vau i ta‘uma i ni‘a te reira pahi, ua tia‘i râ vau ia po‘ipo‘i a‘e. E toru ahuru minuti i muri a‘e i te faarevaraa taua pahi ra, ua ura te pahi i te auahi. Te taamu o taua pahi ra e taura noa ïa e ere râ te fifi auri, e aita ia ratou i tapae. E pô poiri, e aita hoê taata i ora mai. Ahiri e aita vau i faaroo i te faaururaa a taua reo ra i roto ia‘u, tei roto atoa ïa vau, e te taatoa o te pupu. »28
Te ohipa i roto i te afaa no Roto Miti
Ia hope te Feia Mo‘a i te haamau i to ratou oraraa i Roto Miti, ua taui te mau ohipa a Elder Woodruff. Aita oia i tono–faahou– hia e haere e rave i te mau misioni rave tamau i te fenua rapae. Ua faauehia râ oia ia tauturu i te Feia Mo‘a ia tere mai i te pû o te Ekalesia, ia farerei i te feia e haere mai i reira, ia riro ei auvaha ture, ia rave atoa i te ohipa haamaitairaa i te fenua e te tanuraa i te maa, e ia imi i te mau rave‘a no te faatupu i te mau huero e no te faaapu. Pinepine oia i te haere e farerei i te mau nohoraa o te Feia Mo‘a i te mau Mahana Hopea nei i Utaha, i Arizona e i Idaho, ma te haapii i te evanelia e ma te faaitoito i te Feia Mo‘a i roto i ta ratou mau ohipa.
Ua riro o Wilford Woodruff ei taata Papa‘i Aamu Tauturu no te Ekalesia mai te matahiti 1856 e tae atu i te matahiti 1883, e ei taata Papa‘i Aamu no te Ekalesia mai te matahiti 1883 e tae atu i te matahiti 1889, te rahiraa o te taime, i roto ïa i te pu‘e tau a tavini ai oia i roto i te Pŭpŭ no te Tino Ahuru Ma Piti Aposetolo. Noa’tu te rahi o te taime i titauhia ia’na no te rave i teie ohipa, ua faariro oia i te reira ei haamaitairaa, ma te ti‘aturi e, « e vai te aamu o te Ekalesia mai teie tau e a muri noa’tu. »29 Ua riro teie ohipa papa‘ i aamu ta’na ei pu‘oiraa no te ohipa ta’na i haamata mai i te rave i te matahiti 1835, i te taime a haamata ai oia i te papa‘i i te hoê buka aamu–e mau papa‘iraa no ni‘a i to’na iho oraraa, e no ni‘a atoa ho‘i i te aamu o te Ekalesia (a hi‘o i te api 145–47).
I roto i ta’na mau tautooraa no te faaetaeta i te Ekalesia, no te tavini i te huiraatira, e no te faaamu i to’na utuafare, ua faaohipa o Wilford Woodruff i te mau arata‘iraa ta’na i apo mai na roto mai i to’na metua tane itoito. Ua parau o Elder Franklin D. Richards, no te Pŭpŭ no te Tino Ahuru Ma Piti Aposetolo e, « ua itehia o Elder Woodruff no ta’na ohipa, to’na itoito, e te rohirohi ore. Noa’tu e, e ere oia i te taata rahi, ua ti‘a râ ia’na ia rave i te mau ohipa o te haaperehu i te hoê taata tino rahi. »30
Ua î te buka aamu o Elder Woodruff i te mau parau no ni‘a i te mau mahana ohipa puai. I te hoê taime, te faati‘a ra oia e, i te 67raa o to’na matahiti, ua ta‘uma oia i ni‘a i te hoê e‘a e 3, 7 metera i te teitei, e ta’na tamaiti o Asahel, no te pafa‘i i te pea. Ua haamata ihora o Asahel i te haamea topa. No to’na tamataraa i te haapa‘o ia Asahel, o Elder Woodruff iho tei topa. Te papa‘i ra oia e: « Ua topa vau i raro, fatata e toru metera i te teitei, i ni‘a i to‘u pa‘ufifi e to‘u aoao atau, e ua pepe maitai au. Aita o Asahel i pepe roa. Ua mauiui au e ua haaparuparu roa vau i te reira pô taatoa. »31 I po‘ipo‘i a‘e, ua papa‘i oia e, « Ua mauiui roa vau e ua haaparuparu roa vau i teie mahana, noa’tu râ i te reira, ua haere au i roto i te faaapu e ua pô i ho‘i mai ai. »32 Teie te parau a Matthias Cowley no ni‘a i teie ohipa o tei tupu: « Mea papû e, e uiui te taata e, eaha te ohipa a te hoê taata teie faito matahiti i ni‘a i te tumu raau. Na mua roa, aita ta Elder Woodruff e hi‘oraa i te matahiti ia ite oia i te hoê mea ta’na e feruri ra e, e mea ti‘a ia ravehia, ma te mana‘o e, e oti ia’na ia rave i te reira. Tei te mau vahi atoa oia… Ua ineine noa oia i te mau taime atoa no te hoê ohipa rû. Mai te mea e, e ite oia i te hoê amaa i ni‘a roa i te tumu apara, o te titauhia ia tope, aita to’na e taime no te feruri, tera oia tei ni‘a i te tumu raau, e e mea fifi roa na’na ia ani i te tahi atu taata ia rave i te hoê ohipa o ta’na iho e nehenehe e rave.33
Te paturaa hiero e te ohipa hiero
Ia parahi maoro te Feia Mo‘a i te hoê vahi, e patu ratou i te hiero. Ua rave ratou i te reira ohipa i Keterani, i Navu, e i te hopea roa, i Roto Miti. Na roto i te raveraa i te reira, te haapa‘o ra ïa ratou i te hoê heheuraa no ô mai i te Fatu ra tei horo‘ahia mai i te peropheta Iosepha Semita ra–e heheuraa tei papa‘ihia e Elder Woodruff i roto i to’na buka aamu:
« Eaha te opuaraa no te haaputuputuraa i te mau Ati Iuda, e aore ra, i te nunaa o te Atua i te mau tau atoa o te oraraa nei ? Te opuaraa tumu, o te paturaa ïa i te Fatu ra, i te hoê fare i reira Oia e heheu mai ai i to’na mau taata, i te mau oro‘a no To’na fare e no te hanahana o To’na basileia, e no te haapii i te taata i te faanahoraa no te faaoraraa. No te mea te vaira te tahi mau oro‘a e te tahi mau parau tumu ia haapiihia e ia faaohipahia ratou, e ti‘a roa ïa ia ravehia i roto i te hoê vahi e aore ra, i roto i te hoê fare tei patuhia no taua tumu ra. Tera te opuaraa a te Atua hou a vai ai te ao nei, e no teie tumu atoa ho‘i i faaue pinepine ai te Atua ia haaputuputu i te mau Ati Iuda, tera râ, ua pato‘i ratou. O te reira atoa te tumu i haaputuputu ai te Atua i te taata i te anotau hopea nei–no te patu i te Fatu ra i te hoê fare no te faaineine ia ratou no te mau oro‘a e te mau oro‘a hiero, te horoiraa e te faatahinuraa, e te vai atu ra. »34
Ua faaitoito pinepine o Elder Woodruff i te Feia Mo‘a ia farii i te mau haamaitairaa e vai ra i roto i te hiero. Te na ô ra oia e: « Te feruri nei au e, te paturaa hiero, o te hoê ïa o te mau ohipa faufaa roa ta te Fatu i titau i te Feia Mo‘a i te mau Mahana Hopea nei i roto i te tau tuuraa no te îraa o te mau tau, ia ti‘a ia tatou ia haere i roto i taua mau hiero ra, e ia faaora, eiaha i te feia ora noa, faaora atoa râ i to tatou mau taata i pohe ra. »35 Ma te itoito rahi, ua faaite oia i te hoê hi‘oraa no ni‘a i te ohipa hiero, ma te hi‘opo‘a maite ia ravehia te ohipa no te rahiraa tauasini o to’na mau hui tupuna.
Mai te tahi atu mau peropheta e rave rahi o to’na ra anotau, ua tohu atoa o Elder Woodruff e, te vai ra te mahana e ti‘a te mau hiero ati a‘e te ao nei.36 Ua oaoa oia i te iteraa i te reira parau tohu i te haamataraa i te tupu, inaha, ua patuhia e ua haamaitaihia e maha hiero i roto i te tuhaa fenua no Utaha, i roto i na matahiti matamua e 46 i muri a‘e i to te Feia Mo‘a taeraa’tu i roto i te Faa no Roto Miti–i roto i te oire no St George, no Logan, no Manti, e no Roto Miti.
Na te peresideni Woodruff i pûpû i te pure haamo‘araa no te hiero no Manti e no Roto Miti. I roto i te parau poro‘i i to te mau melo paatoa no te Ekalesia, ua faaite hua oia e to’na na tauturu i roto i te Peresideniraa Matamua, i te mau haamaitairaa e roaa i te feia e haere atu i te mau oro‘a haamo‘araa hiero, na roto i te varua haamori mau: « E horo‘ahia ia ratou te muhumuhu mărû a te Varua Mo‘a, e e amuihia mai ho‘i i tera taime e tera taime, te mau tao‘a rahi o te Ra‘i ra, e te autahiraa o te mau melahi, no te mea, ua reva te fafauraa a te Fatu, e ore te reira e taui! »37 Ua papa‘i oia i te hoê mea, tei tupu i roto i te haamo‘araa i te hiero no Logan:
« I roto i te haamo‘araa o teie hiero, ua hiti mai te mana‘o i roto ia‘u no ni‘a i te rahiraa hora tei pau ia‘u i roto i te pure i to‘u apîraa, i te ti‘aororaa i te Atua ia vaiiho mai Oia ia‘u ia ora i ni‘a i te fenua nei no te ite i te faati‘araa o te Ekalesia a te Mesia, no te faatupu i te hoê nunaa o te farii i te evanelia tahito ra, e ia titau i te faroo i te taime a horo‘ahia ai te reira i te Feia Mo‘a ra. Ua fafau mai te Fatu ia‘u e, e ora vau no te farerei i te nunaa o te Atua e no te farii i te hoê i‘oa e te hoê vahi… i roto i to’na fare, hoê i‘oa tei hau ê i te i‘oa te mau tamaroa e te mau tamahine, e i‘oa e ore roa e tapû–e–hia. E i teie mahana, te oaoa nei au i te roaaraa te hoê i‘oa e to’na mau taata atoa e i te tautururaa i te haamo‘araa i te tahi atu hiero i to’na ra i‘oa mo‘a. Ia haamaitaihia te Atua e te Arenio e a muri noa’tu. »38
Te taviniraa o Wilford Woodruff ei peresideni no te Ekalesia
I te poheraa o te peresideni John Taylor i te 25 no tiurai, 1887, riro atura te Pŭpŭ no te Tino Ahuru Ma Piti Aposetolo ei tino faatere i te Ekalesia, te peresideni Woodruff te peresideni faatere. I taua taime ra, ua ite a‘era oia i te teimaha o te hopoi‘a no te faatere i te Ekalesia taatoa, no reira, ua papa‘i a‘era te peresideni Woodruff i teie mau mana‘o i muri nei, i roto i to’na buka aamu: « Tei roto vau i te hoê ti‘araa taa‘e roa, te hoê ti‘araa aita roa’tu vau i imi na i roto i to‘u oraraa. Tera râ, na roto i te maitai o te Atua, ua topa mai te reira i ni‘a ia‘u, e te pure nei au i te Atua to‘u Metua i te Ao ra, ia horo‘a mai i te tauturu ia au i ta‘u hopoi‘a. E ti‘araa teitei e te ti‘aau teie no te hoê taata, e ti‘araa ho‘i o te titau i te paari rahi. Aita roa’tu vau i feruri e, e mono mai au i te peresideni Taylor… Tera râ, te tupu nei te reira… Ta‘u noa e nehenehe e parau, maori râ, e mea faahiahia to Oe mau haere‘a, e te Fatu te Atua Manahope e, i te mea e, ua ma‘iti oe i te mea paruparu o teie nei ao no te faatupu i ta oe ohipa i ni‘a i te fenua nei. Faaineine mai oe i to tavini nei, o Wilford, no te ohipa e tia‘i mai nei ia’na i ni‘a i te fenua e ia roaa ia’na te mana no te faaoti i te mau mea atoa ta Oe, te Atua no te Ra‘i, e titau i to’na na rima nei ia rave. Te ani nei au i teie haamaitairaa ia Oe, e ta‘u Metua i te Ao ra, na roto i te i‘oa o Iesu Mesia, te Tamaiti a te Atua ora ra. »39 Ua paturuhia te peresideni Woodruff ei peresideni no te Ekalesia a Iesu Mesia i te Feia Mo‘a i te mau Mahana Hopea nei i te 7 no eperera, 1889. O Oia te maha o te peresideni o te Ekalesia i roto i teie tau tuuraa.
Faaite hua i te ohipa a te Fatu i te anotau hopea nei
I roto i ta’na mau parau poro‘i i to te mau melo no te Ekalesia, ua tamau noa te peresideni Woodruff i te faaite hua i te parau no te Faaho‘i–faahou–raa–hia mai te evanelia, e ua na reira noa oia e hope noa’tu to’na ra tau. Area râ, ua itehia te tahi titauraa rû i roto i to’na iteraa papû i roto i na matahiti hopea e iva o to’na oraraa. O Oia te taata ora hopea tei tavini ei Aposetolo i pihai iho ia Iosepha Semita, e ua tupu te hoê hinaaro rû i roto ia’na ia faaite i te hoê iteraa papû maramarama e te vai maite no ni‘a i te peropheta no te Faaho‘i–faahou–raa mai. Hoê matahiti hou to’na poheraa, na ô a‘era oia e:
« E rave rahi mau mea aita vau i maramarama, e te hoê o te reira maori râ ïa, no te aha tei ô nei au i teie matahiti to‘u. Aita vau e maramarama nei e, no te aha vau i paruru–maoro–hia ai, area te tahi mau Aposetolo e te tahi mau peropheta ra, ua rave–ê–hia’tu ïa ratou… O vau ana‘e te taata e ora nei i te tino nei, tei faarii i te mau oro‘a hiero i raro a‘e i te rima o te peropheta Iosepha Semita. O vau ana‘e te taata e ora nei i te tino nei tei parahi na i pihai’ho i te Tino Ahuru Ma Piti, i te taime a faaho‘i ai oia i te basileia o te Atua i roto ia ratou ra, ma te horo‘a atu te faaueraa ia ratou ia haapa‘o i teie basileia. E toru hora to’na ti‘araa i roto i te hoê piha no te vauvau mai i ta’na mau parau hopea ia matou. Mai te huru i te auahi ama to roto i taua piha ra. Te maramarama o to’na hoho‘a mata, e au ïa mai te û puatou te huru; ta’na mau parau, e au ïa i te ho‘araa uira ama ra. Ua tomo roa te reira i roto i te mau melo atoa o to matou tino mai te upoo e tae roa’tu i te manimani avae. Te na ô ra oia e, ‘E te mau taea‘e e, ua taati te Fatu Manahope i ni‘a i to‘u upoo, i te mau Autahu‘araa atoa, i te mau taviri atoa, i te mau mana atoa, i te mau ture atoa no teie nei tau tuuraa hopea no te îraa o te mau tau, e no te paturaa i te basileia o te Atua. Ua taati au i ni‘a i to outou upoo i teie mau ture atoa, te Autahu‘araa, te aposetoloraa, e te mau taviri no te basileia o te Atua, e tena na, ua titauhia outou ia haapaari i to outou tapono e ia faahaere i teie basileia i mua, aita ana‘e, e haamouhia outou.’ Aita e mo‘ehia ia‘u taua mau parau ra–eita roa e mo‘ehia a ora ai au. Ta’na teie mau parau hopea roa a ora ai oia i te tino nei. Aita i maoro i muri iho, ua taparahi–pohe–hia oia, e ua rave–ê–hia’tu i roto i te hanahana ra. »40
I roto i to’na ti‘araa ei peresideni no te Ekalesia, ua titau te peresideni Woodruff i te Feia Mo‘a ia imi e ia haapa‘o i te arata‘iraa a te Varua Maitai, ia haapa‘o i ta ratou mau fafauraa, ia poro i te evanelia i ô ratou iho e i te fenua ĕê, ia riro ei feia parau ti‘a i roto i ta ratou mau hopoi‘a no te tino nei, e ia rave itoito i te ohipa no te hiero e no te aamu utuafare. Ua faahiti faahou oia i te hoê parau ta’na i parau a haa ai oia i roto i te Pŭpŭ no te Tino Ahuru Ma Piti: « Noa’tu te huru o to tatou maitai, e titau tamau noa tatou i te haamaitai ia tatou, e ia maitai roa’tu â tatou. Ua haapa‘o tatou i te tahi ture e te tahi evanelia tei taa ê i ta te tahi atu mau taata e haapa‘o nei, e te hi‘o nei tatou i te tahi basileia taa‘e atu, e no reira, ia teitei atoa a‘e ïa ta tatou titauraa i mua i te Fatu to tatou Atua, e e faatere tatou e e haavî tatou ia tatou iho ia au i te reira, e te pure nei au i to‘u Metua i te Ao ra ia parahi mai to’na Varua i roto ia tatou ia nehenehe ia tatou ia na reira. »41
Papa‘iraa i te parau faaite
Ma te faaitoitohia e te rima arata‘i o te Fatu, ua faatere te peresideni Woodruff i te Feia Mo‘a i te mau Mahana Hopea nei i roto i te hoê o te mau tau arepurepu roa a‘e i roto i teie tau tuuraa. I te pae hopea o te mau matahiti 1880, te tamau noa ra â te Ekalesia i te rave i te faaipoiporaa vahine rau, ei faati‘araa i te faaueraa ta te Fatu i horo‘a i te peropheta Iosepha Semita ra. Tera râ, ua haamana te faatereraa o te mau hau amui no Marite i te tahi mau ture no te pato‘i i te reira peu, ma te faautu‘a etaeta i te feia e ofati i te reira mau ture, tae roa’tu i te haruraa i te mau mea e fatuhia e te Ekalesia e te tapûraa i te tahi mau ti‘araa tivira o te mau melo o te Ekalesia, mai te ti‘araa ma‘iti. Na roto atoa i teie mau faatureraa, ua matara atoa ïa te uputa no te hororaa i mua i te haavaraa i te Feia Mo‘a i te mau Mahana Hopea nei o te tamau noa i te rave i te faaipoiporaa vahine rau. Ua titau te Ekalesia ia haaparari i te reira, aita râ i manuia.
Ua riro teie mau mea atoa ei hopoi‘a teimaha no te peresideni Woodruff. Ua titau oia ia ite i te hinaaro o te Fatu i ni‘a i taua mau mea ra, e ua farii oia i te hoê heheuraa tei titau mai i te Feia Mo‘a i te mau Mahaha Hopea nei ia faaore i te ohipa faaipoiporaa vahine rau. Ma te haapa‘o i te faueraa a te Fatu, ua papa‘i oia i te hoê parau tei parauhia i teie nei, Te Hoê Faaiteraa Mana–e faahitiraa parau faauruhia teie o tei riro ei niu no te ti‘araa o te Ekalesia i ni‘a i te tumu parau no te faaipoiporaa vahine rau. I roto i teie faaiteraa parau i mua i te mau taata atoa, tei papa‘ihia i te 24 no setepa, 1890, ua faaite oia i to’na hinaaro ia auraro i te mau ture fenua. Ua faaite hua atoa oia e, ua faaea atoa te Ekalesia i te haapii i te parau no te faaipoiporaa vahine rau.42 I te 6 no atopa 1890, i roto i te hoê tuhaa pureraa no te amuiraa rahi, ua paturu te Feia Mo‘a i te mau Mahana Hopea nei i te faaiteraa mana a te peropheta, ma te turu amui i te parau e, « e mana to’na, na roto i to’na ti‘araa, ia papa‘i i taua Faaiteraa Mana ra. »43
Faaite faahou i te huru mure ore o te utuafare
E toru ava‘e na mua a‘e a taparahi–pohe–hia ai te peropheta Iosepha Semita, ua hohora mai oia i te hoê a‘oraa i mua i te hoê naho‘a rahi Feia Mo‘a. Ua papa‘i o Elder Wilford Woodruff i te tahi tuhaa o te reira a‘oraa, e te parau ra oia e, ua paraparau mai te peropheta i « te hoê o te mau tumu parau faufaa roa a‘e e te faahiahia ho‘i, aitâ i vauvauhia a‘e nei i mua i te Feia Mo‘a. »44 I roto i teie a‘oraa, ua faaite hua te peropheta i te huru mure ore o te mau utuafare. Ua paraparau oia no ni‘a i te titauraa ia taatihia tatou i to tatou na metua, e ia rave tamau noa i te reira oro‘a taatiraa e hope noa’tu to tatou mau u‘i atoa:
« Te varua teie o Elia, ia faaora tatou i to tatou feia pohepohe e ia nati ia tatou i ni‘a i to tatou mau hui metua tei ni‘a i te ra‘i ra, e ia taati i to tatou feia pohepohe ia ti‘a mai i te ti‘a–faahou–raa matamua, e no te reira, e titau tatou i te mana o Elia no te taati ia ratou o te ora nei i ni‘a i te fenua nei, i ni‘a ia ratou o te parahi ra i te ra‘i ra… Haere ana‘e, e a taati i te fenua nei i ta outou mau tamaiti e ta outou mau tamahine i ni‘a ia outou iho, e outou i ni‘a i to outou mau hui metua i roto i te hanahana mure ore. »45
No na ahuru matahiti e rave rahi i muri mai, ua ite te Feia Mo‘a i te mau Mahana Hopea nei e, e mea ti‘a ia vai « te hoê ave fifi tu- ‘atiraa mai te reira te huru e aore ra, mai te tahi huru i ropu i te mau metua e te mau tamarii » (PH&PF 128:18). Area râ, aita i hope roa ta ratou faanahoraa i te haamauhia; te na ô ra te peresideni Woodruff e, aita te peropheta Iosepha i ora maoro no te « horo‘a mai â i te tahi mau parau no ni‘a i teie mau mea. »46 Mai te au i « te maramarama e te ite tei noaa ia [ratou] »,47 pinepine ratou i te taati, e aore ra, i te « faatavai » ia ratou iho i ni‘a ia Iosepha Semita, ia Brigham Young, e aore ra, i ni‘a i te tahi atu feia faatere o te Ekalesia i to ratou ra tau, aita râ i taati ia ratou i ni‘a i to ratou iho mau metua tane e to ratou mau metua vahine. Ei peresideni no te Ekalesia, teie te parau a te peresideni Woodruff no ni‘a i taua raveraa ra: « Aita tatou i rave hope roa i teie mau arata‘iraa no te faati‘araa i te mau heheuraa a te Atua ia tatou nei, i roto i te parau no te taatiraa i te aau o te mau metua i te tamarii, e te aau o te tamarii i te mau metua. Aita vau i oaoa roa, na reira atoa te peresideni [John] Taylor, na reira atoa te mau taata atoa i te tau o te peropheta Iosepha tei amui atu i roto i te oro‘a no te faatavairaa i roto i te mau hiero o to tatou Atua. Ua feruri matou e, te vai atura â te tahi mau mea o te ti‘a ia heheuhia mai no ni‘a i teie nei tumu parau, taa‘e atu i te mau mea tei faariihia e matou. »48
Ua tae mai taua heheuraa i te peresideni Woodruff i te 5 no eperera 1894.49 E toru mahana i muri iho, i roto i te hoê a‘oraa i roto i te amuiraa rahi, ua faaite oia i te parau no te reira heheuraa: « I to‘u haereraa i mua i te Fatu no te ite e, ei ni‘a vau ia vai e faatavai ai …, na ô maira te Varua o te Atua ia‘u e, ‘Aita anei to oe e metua tane, tei fanau mai ia oe ?’ ‘Oia, te vai ra.’ ‘No te aha ïa aita oe e faatura ia’na ? No te aha aita oe e faatavai ia oe i ni‘a ia’na ?’ Na ô atura vau e, ‘Na reira, ua ti‘a te reira.’ I reira, ua faatavaihia vau i ni‘a i to‘u metua tane, e ua taatihia ho‘i to‘u metua tane i ni‘a i to’na metua tane, e na reira’tu e haere roa’tu i muri; e te ohipa ta‘u e hinaaro i te mau taata faatere atoa o te hiero, ia hi‘o ia ravehia mai teie atu taime e a muri noa’tu, maori râ, ia horo‘a mai te Fatu Manahope i te tahi atu faaueraa, o te tura‘iraa ïa i te mau taata atoa ia faatavaihia e to ratou metua tane… Tera te hinaaro o te Atua i to’na mau taata. Te hinaaro nei au i te mau taata atoa e faatere nei i teie mau hiero i roto i teie mau mou‘a no Iseraela, ia haamana‘o tamau noa i te reira. Eaha ta‘u ohipa no te iritiraa i te mau ti‘araa o te reni o te taata ? Eaha te ti‘araa o te taata no te rave i te reira ? Aita; Te parau nei au e, a faatavai i te mau taata atoa i ni‘a i to ratou metua tane; te rave ra ïa outou i te mea ta te Atua i parau ra, a parau ai oia e, e tono mai Oia ia Elia te peropheta i te mau mahana hopea ra [a hi‘o Malaki 4:5–6]…
« Te hinaaro nei matou i te Feia Mo‘a i te mau Mahana Hopea nei mai teie atu taime, ia faatoro i to ratou tuatapaparaa tupuna i te atearaa e tae‘ahia ia ratou, e ia taatihia ratou i to ratou mau metua tane e to ratou mau metua vahine. A taati i te mau tamarii i ni‘a i to ratou mau metua, e a faatoro i te reira reni i te atearaa e roaa ia outou…
« E te mau taea‘e e te mau tuahine, a tuu i teie mau mea i roto i te pàpà o te aau. A tamau noa ana‘e tatou i te faaî i ta tatou mau parau, faaî maite i te reira ma te parau ti‘a i mua i te aro o te Fatu, e a faaohipa ana‘e tatou i teie arata‘iraa, i reira tatou e farii ai i te mau haamaitairaa a te Atua, e e haamaitai mai te feia i faaorahia ia tatou i te mau mahana a muri a‘e. Te pure nei au i te Atua ia faaaraarahia to tatou mau mata no te ite, to tatou taria no te faaroo, e to tatou aau no te haro‘aro‘a i te ohipa rahi e te puai e vai nei i ni‘a i to tatou tapono, e ta te Atua no te ra‘i ho‘i e titau mai nei ia tatou. »50
« Te pure nei matou no Oe »
I te 1 no mati 1897, ua î roa te Fare Menemene i Roto Miti i te Feia Mo‘a i te mau Mahana Hopea nei no te faahanahana i te 90raa o te mahana fanauraa o te peresideni Wilford Woodruff. I reira ua faaroo ratou i te hoê himene apî: « Te Pure nei Matou no Oe. » Ua faaau o Evan Stephens i te pehe i ni‘a i te hoê himene tahito, e ua papa‘i oia i te mau parau apî no te faahanahana i te peropheta here o te Ekalesia:
Te pure nei matou no oe, e to matou peropheta here,
Ia tamahanahana mai e ia haapoupou mai te Atua ia oe;
A haami‘omi‘o ai te tau i to oe iri,
Ia anaana noa râ ta oe lamepa i roto ia oe mai teie nei â
Ia anaana noa râ ta oe lamepa i roto ia oe mai teie nei â
Te pure nei matou no oe ma to matou aau atoa,
Ia roaa te puai ia oe no te rave i ta oe tuhaa,
No te arata‘i e no te a‘o ia matou i tera mahana e tera mahana,
No te turama i te lamepa mo‘a i ni‘a i to matou haere‘a,
No te turama i te lamepa mo‘a i ni‘a i to matou haere‘a.
Te pure nei matou no oe ma te here rahi;
E a faaroohia ai te pure a te mau tamarii i ni‘a ra,
Ia haamaitaihia oe, e e horo‘a mai te Atua
I te mau mea ti‘a e te maitai roa a ora ai oe,
I te mau mea ti‘a e te maitai roa a ora ai oe.51
Ahuru ma va‘u ava‘e i muri mai, i te 2 no setepa 1898, ua pohe te peresideni Wilford Woodruff, amui atu ai oia i pihai iho i to’na mau hoa Feia Mo‘a o tei na mua’tu ia’na. I to’na oro‘a hunaraa, o tei tupu i roto i te Fare Menemene i Roto Miti, « ua tapo‘i mai te varua hau… i taua vahi ra, e ua ô roa i roto i te mau taata atoa, e ua vai noa mai no te tamărû i te aau o te taatoaraa. » Ua napehia te rotoraa o te Fare Menemene « i te tapo‘i uouo », e « te rahi e te unauna » o te mau tiare e te mau rŭrŭ titona e te outa. « I na pae e piti o te hamonia, ua papa‘ihia teie mau numera 1847 e te vai atoa ra te tahi mau pupâ tiare o taua tau ra », o te faahaamana‘o ra i te tomoraa mai te mau pionie i roto i te Faa no Roto Miti i te ava‘e tiurai 1847. I ni‘a a‘e i te hoê hoho‘a rahi o te peresideni Woodruff, ua turamahia teie parau « Pohe noa â oia, te parau noa maira ïa », ei faahanahanaraa i te hoê peropheta na te Atua, inaha, e tamau noa ta’na mau haapiiraa e to’na hi‘oraa i te faauru i te Feia Mo‘a i te mau Mahana Hopea nei i roto i ta ratou mau tautooraa no te tauturu i te patu i te basileia o te Atua.52
I te matahiti 1839, o Elder Wilford Woodruff (i mua roa), Elder Brigham Young (i muri), e te tahi atu mau melo no te Pŭpŭ no te Tino Ahuru Ma Piti Aposetolo, tei faaru‘e ana‘e i to ratou utuafare no te haere e poro i te evanelia i Peretane.
Ua ora o Elder Wilford Woodruff e to’na utuafare i roto i teie fare i Navu, Illinois.
Te hiero no Manti i Utaha, tei haamo‘ahia e te peresideni Wilford Woodruff i te matahiti 1888.
Te peresideni Wilford Woodruff, i ropu, e to’na na tauturu i roto i te Peresideniraa Matamua: Te peresideni George Q. Cannon, i te pae aui, e te peresideni Joseph F. Smith, i te pae atau.