Pene 23

« Hoê â aau e hoê â mana‘o »

Ia hoê ana‘e tatou i roto i te evanelia, ua ineine ïa tatou i te farii i te mau haamaitairaa rahi roa‘e no te ra‘i.

No roto mai i te Oraraa o Wilford Woodruff

Ua here te peresideni Wilford Woodruff i te autaea‘eraa o te tahi atu mau melo o te Ekalesia. E rave rahi ta’na mau papa‘iraa i roto i ta’na buka aamu e faahiti nei i te mau parau haamauruuru no te « varua hoê e te here »¹ e vai nei i roto i te mau rururaa a te Ekalesia. I muri a‘e i te hoê o taua mau rururaa ra, ua papa‘i oia e ua ti‘a i na taata a‘o e piti ia haere atu no te tahi atu ohipa. Ua fifi raua i te haere ê atu no te mea « aita i nehenehe ia raua ia haere atu i rapae au i te fare, no te mea ua rahi te taata e hinaaro nei e aroha rima’tu ia raua. » No ni‘a i taua iho rururaa, ua papa‘i oia: « I vai na te Varua o te Fatu ia matou nei. Ua vai mai te here e te hoêraa i rotopu i te amuiraa. Ua oaoa vau i te hi‘oraa’tu i te Feia Mo‘a e rave rahi tei hoê i roto i te fafauraa apî e te mea mure ore. »²

Ua ti‘aturi te peresideni Woodruff i te ite atoa i teie nei varua tahoêraa e vai ra i roto i te mau rururaa a te Ekalesia i roto i te mau tuhaa atoa o te oraraa nei. Na roto i ta’na mau a‘oraa e to’na hi‘oraa maitai i te mau mahana atoa, ua faaitoito oia i te Feia Mo‘a ia hoê i roto i to ratou mau utuafare, i roto i ta ratou mau hopoi‘a i roto i te Ekalesia, e i roto i ta ratou mau ohipa i te pae tino. Ua papa‘i o Matthias F. Cowley: « I roto i to’na feruriraa, aita e vahi i roto i te Ekalesia no te mau marôraa, no te mau feââraa, e no te pato‘ iraa. Na te Atua te ohipa– ua nava’i te reira. Te vai nei te mau mana faatere tei ma‘iti–maitai–hia. Ua tuuhia’tu i ni‘a ia ratou te mau hopoi‘a no te basileia. No reira aita oia i haape’ape’a no ni‘a i ta te tahi atu mau taata e faariro ra mai te ereraa i te paari i roto ia ratou. E ere oia i te taata nounou; i to’na feruriraa e ore roa e nehenehe i te mau fifi o te pae moni ia haamarirau i te opuaraa a te Atua; e aita oia i haape’ape’a no ni‘a i te rahiraa o te mau tao‘a o teie nei ao e noaa ia’na. Ua horo‘ahia te hoê parau poro‘i hanahana i to te fenua nei, e ua hinaaro oia i te mau taata atoa ia ite i te faufaa o te reira no te utuafare o te taata nei e ia taa no ni‘a i te mau haamaitairaa no te faaoraraa o te fariihia e te mau taata o tei haapa‘o.

« Aita o Wilford Woodruff e oaoa i te mau taime atoa i roto i te marôraa. E ape oia i te reira, e aita roa’tu oia e tau‘a nei i te auraa e te mau taata e imi nei i te hapa, i te mau faainoraa, e te mau inoinoraa. Aita oia i ite i te faufaa rahi no te reira mau mea. E ere roa’tu i te mea fifi no’na ia farii i te mana‘o o to’na mau taea‘e. Aita roa’tu oia i ani i te mau mea maamaa i roto i ta’na mau aniraa, aita oia i titau i te mau mea no’na iho, e aita roa oia e taiâ mai te mea te vai nei te tahi mea faufaa rahi e ti‘a ia ravehia. Ua riro oia ei hoa haavare ore no te peropheta, e ua vai parau–ti‘a noa oia i to’na mau taea‘e. »³

Te mau haapiiraa a Wilford Woodruff

Te vai nei te hoêraa i rotopu i te mau melo no te Atuaraa e i roto i te basileia tiretiera.

Ua parau atu te Faaora i Ta’na mau Aposetolo i mutaa ihora, e i te mau Aposetolo i to tatou nei tau: « Te parau atu nei au ia outou, ia tahoê; e mai te mea aita outou e riro ei hoê ra e ere ho‘i outou no‘u nei. » [PH&PF 38:27] « O vau e te Metua ra, hoê â ïa » [Ioane 10:30] Te vai nei te hoê parau tumu tei tu‘atihia i teie parau ta‘u e mana‘o nei e e mea faufaa rahi roa no tatou ei nunaa e ei Ekalesia i ô nei i te fenua nei. I te mau amahamaharaa atoa, e te inoinoraa atoa, e te mau marôraa atoa e te pato‘iraa atoa i rotopu i te mau mana i ni‘a i te fenua nei, aore râ tei heheuhia mai e te ra‘i, aita roa’tu vau i faaroo a‘e e ua heheuhia mai i te mau tamarii a te taata nei e te vai nei te hoê amahamaharaa i rotopu i te Atua te Metua, te Atua te Tamaiti e te Atua te Varua Maitai. Ua hoê ratou. Ua hoê noa ratou i te mau taime atoa. E e hoê noa â ratou, mai te matamua mai â e a muri noa’tu. Te ti‘a nei to tatou Metua i te Ao ra i te upoo, o oia te tumu no te ora no te mau tamarii a te taata nei, e o oia tei hamani e tei faaî i te ao nei i te taata e tei horo‘a i te mau ture i te mau nunaa o te fenua nei.⁴

Ua hoê Iesu e te Metua. Ua parau Oia: « I pou mai nei ho‘i au mai te ra‘i mai e haapa‘o i to tei tono mai ia‘u nei hinaaro, eiaha to‘u iho hinaaro. » [Ioane 6:38]. Aita roa‘e teie nei hoêraa i pararî i rotopu i te Metua e te Tamaiti. Te heheuraa matamua tei horo‘ahia ia Iosepha Semita e heheuraa ïa na te Metua e te Tamaiti. Ua vetea te mau ra‘i, e ua fâ atu te Metua, e Ta’na Tamaiti, ia Iosepha, ei pahonoraa i ta’na pure, e ua faatoro atu Oia i to’na rima i ni’a i Ta’na Tamaiti i te na ô raa mai, « O Ta‘u Tamaiti Here Teie; A faaroo Ia’na. » [A hi‘o Iosepha Semita– Te Aamu 1:17]⁵

Te vai nei te hoê basileia tiretiera, te hoê basileia teretetiera, e te hoê basileia tiretia. Te vai nei te hoê hanahana o te mahana, te hanahana no te ava‘e, e te hanahana o te mau fetia; e huru ê ho‘i to te hoê fetia i to te tahi i te anaana, oia atoa te ti‘a–faahou–raa o tei pohe ra [a hi‘o 1 Korinetia 15:41–42]. I roto i te basileia tiretiera o te Atua te vai nei te hoêraa, te vai nei te tahoêraa.⁶

Ei faaauraa, o vai te tia‘i nei i te farii oia ana‘e e ahuru ma ono tâ fenua i roto i te basileia o te Atua, aore râ i te ra‘i, ia tae ana‘e tatou i reira ? Aita roa te hoê e tia‘i nei i te reira, no te mea i roto i taua basileia ra, i te ra‘i aore râ i ni‘a i te fenua nei, e ite ïa tatou i te hoêraa, e te titau nei te Fatu e ia hoê amui tatou, mai te au i te mau parau tumu no ta’na ture tiretiera.⁷

E ti‘a i te mau peropheta ia hoê e te mau melo no te Atuaraa, e e ti‘a i te mau melo paatoa o te Ekalesia ia imi i taua iho hoêraa ra.

Na roto i te tai‘oraa i te aamu o te mau auraa i rotopu i te Atua e te taata nei, i roto i te Bibilia, te Buka a Moromona, e te Parau Haapiiraa e te mau Parau Fafau, e nehenehe ta tatou e ite, e mai te mau mahana mai â o te Metua Adamu, ua faati‘a mai te Fatu i te hoê pupu taata, i roto i te mau tau tuuraa evanelia atoa, e ua tuu atu i ni‘a iho ia ratou Ta’na Autahu‘araa e ua horo’a’tu ia ratou te puai e te mana no te raveraa i Ta’na ohipa i ni‘a i te fenua nei i rotopu i te mau tamarii a te taata nei. E ua mau teie mau taata i te mau parau tumu no te hoêraa e te Atua, e te Tamaiti a te Atua e te Varua Maitai. Ua horo’ahia te Varua Maitai i te Metua Adamu; ua î oia i taua Varua Maitai ra a haamaitai ai oia, i roto i to’na mau mahana hopea, i ta’na mau tamaroa tei riro na ei mau Tahu‘a Rahi e te toe‘a o to’na ra huaai. [a hi‘o PH&PF 107:53–56]

Ua titauhia te Metua Adamu, Enoha, Mose, Noa, Aberahama, Isaaka e Iakoba e te mau patereareha e te mau peropheta tahito ia aparau e te Atua. Tei raro a‘e ratou i te titauraa ia imi i te Fatu, no te mea ia ore ratou e aparau eita ïa e nehenehe ia ratou ia rave i ta ratou hopoi‘a. Ua ti‘aturi ratou i ni‘a i te Fatu no te heheuraa, no te maramarama, e no te arata‘iraa no te farii i te mana no te faaohipa i te mau faaueraa a te Atua. Teie hoêraa ta te Fatu i titau i te mau patereareha e te mau peropheta tahito, e ta Iesu i titau i Ta’na mau Aposetolo, ua titau–atoa–hia ia Iosepha Semita e to’na mau taea‘e. Ua titauhia i te Feia Mo‘a atoa a te Atua mai te hamani– raa–hia o teie nei ao e tae noa mai i teie nei mahana.⁸

Te ite nei au e te ti‘a nei te Peresideniraa o teie nei Ekalesia i rotopu i teie nei nunaa e te Fatu, no te mea o ratou te upoo, e te ite nei au e te heheu nei te Atua i to’na hinaaro ia ratou, e no reira e ti‘a ia tatou i fariu atu ia ratou no te maramarama e te haamaramaramaraa. E ti‘a i te feia faatere o te Ekalesia ia î i te maramarama, i te faaururaa, i te heheuraa e te mana‘o e te hinaaro o te Atua, e mai te mea te faatau nei te feia faatere e ti‘a nei i pihai iho ia ratou, e o tatou atoa nei, i te rave i te mau hopoi‘a, e aita i ineine i te farii i taua maramarama ra, aita râ anei outou e ite ra e ua piri te anavai i te pae i ni‘a. Aita e uira aore râ e rave‘a e nehenehe ai te maramarama ia tahe atu i te mau melo o te Ekalesia.

Te ite nei au e, e hopoi‘a, e ere noa na tatou tei mau i te autahu‘ araa, na teie nunaa atoa râ, ia haere atu ma te haehaa e te faaroo i mua i te Fatu ia nehenehe ia noaa ia tatou te mau haamaitairaa tei ineine no tatou, e e nehenehe e noaa ia tatou te maramarama atoa, te ite, te faaroo, te aravihi e te mana e titauhia no to tatou ora na roto i te haehaa, te haapa‘oraa e te auraroraa i te hinaaro o te Atua. E ti‘a ia tatou ia haapa‘o i te reira ia nehenehe i to tatou mau mana‘o e to tatou mau tino ia riro ei mau mauhaa tano no te fariiraa i te Varua Maitai, ia nehenehe i te Varua o te Atua ia tere noa na roto i te taatoaraa o te tino mai te upoo e tae atu i te avae. I reira, mai te mea te reira ihoa, hoê â ïa to tatou hi‘oraa, hoê â ïa to tatou iteraa, e hoê â ïa to tatou huru, e e hoê tatou no ni‘a i te evanelia e te basileia o te Atua, mai te Metua e te Tamaiti i hoê, e i reira teie nunaa e haamata ai i te ite i te faufaa rahi no te haapa‘oraa i ta ratou mau hopoi‘a e e haere ai tatou i mua e ia rave maite i te ohipa, ia faaohipa maite i ta tatou mau taleni e ia noaa ia tatou te mau haamaitairaa ta te Fatu i faaineine no tatou ia oaoa; tera râ, aita anei tatou e ite e mai te mea e taoto e e faatau e aita te nunaa e haapa‘o i ta ratou mau haamaitairaa, e ia haamata te Varua o te Atua ia haere mai te feia faatere e tae atu i te mau melo o te Ekalesia e eita e maoro roa e apiapi e e piri te reira. ?

E nehenehe ta tatou e ite i teie nei parau tumu i roto i te Ekalesia e te basileia o te Atua, e e nehenehe ta outou e faahaere atu te reira i roto i te faatereraa o te utuafare… Mai te vine e to’na mau melo, to’na mau amaa, e to’na mau hu‘ahu‘a raau [a hi‘o Ioane 15:1–11]. E hoho‘a maitai teie no te haapiiraa ia tatou i te parau tumu no te parau–ti‘a.

Ia nehenehe ia tatou ia ineine i te raveraa i te hinaaro o te Atua e ia ti‘atu i te hoê ti‘araa no te paturaa i to’na basileia i ni‘a i te fenua nei, e no te faahaereraa i ta’na ra mau opuaraa, e ti‘a ia tatou eiaha noa ia hoê e ia rave mai te aau o te hoê noa taata, e ti‘a atoa râ ia noaa ia tatou te Varua Mo‘a o te Atua e te mana‘o e te hinaaro o te Atua no tatou, e na’na e faatere e e arata‘i ia tatou i roto i to tatou mau haerea e ta tatou mau ohipa atoa ia paruruhia tatou e ia noaa ia tatou te ora.⁹

E faatupu mai te hoêraa i te puai.

Aita vau e mana‘o nei e, ua titauhia te marôraa rahi no te haapapû ia tatou e te hoêraa o te puai ïa, e e mana to te hoê nunaa tei tahoê o te ore roa e noaa i te hoê nunaa i roto i te amahamaha.¹⁰

E ti‘a ia tatou ia hoê e ia ti‘a amui i rotopu i te mau pato‘iraa ta tatou e farerei.¹¹

Aita i faataahia ia noaa i te feia ino te mana no te faatupuraa i te ino i ni‘a iho ia tatou mai te mea e hoê tatou.¹²

E nehenehe ta Babulonia e amahamaha; e nehenehe i te mau nunaa atoa o te fenua nei ia amahamaha mai ta ratou e hinaaro ra; e farii râ ratou i te mau hotu no taua amahamaha ra, e ua farii ratou i te reira i roto i te aai o te ao nei. Ua haamouhia te mau oire e te mau oire, te nunaa e te nunaa, e te mau haavaraa a te Mana Hope i te mau taime atoa ua para ratou i te ino mai te aamu no Sodoma e Gomora, no Babulonia, Nineve, Turia e Sidona, e e rave rahi atu â mau oire e mau fenua tahito. Eita roa te Feia Mo‘a a te Atua e ruperupe ia ore ratou e tahoê.¹³

A tupu noa ai te Ekalesia i te rahi, e a haamau–maite–hia ai te basileia o te Atua, e vai noa mai â te faufaa rahi no te tahoêraa i rotopu i to’na mau melo. E mea titau–roa–hia eiaha noa te hoê tahoêraa parau vaha–noa–hia, ia vai mai râ te hoê ti‘amâraa o te aau e o te varua i roto i te mau peresideni atoa, te mau apooraa, e te mau amaa o te Ekalesia a te Mesia, ia nehenehe ia faaoti i te mau opuaraa a te Atua no te paturaa ia Ziona, aore râ i te titauraa i taua haamaitairaa ra tei riro ei ti‘araa no ratou ia oaoa; no te mea, ia papû outou, e te Feia Mo‘a no te Teitei, e piri te mau ra‘i i ni‘a i te mau upoo o te mau peresideniraa atoa, te mau pupu autahu‘araa, apooraa, e amaa tei amahamaha i roto i te aau, te mana‘o e te ite, e e vai noa ratou mai te reira te huru, e e tape‘ahia te mau haamaitairaa e tae noa’tu ua iriti–ê–hia te ino; no te mea eita roa’tu te Fatu e ninii mai i te mau haamaitairaa rahi roa‘e o te ra‘i, e te autahu‘araa e te mau horo‘araa o te evanelia, [maori râ] i ni‘a i te parau tumu no taua hoêraa ra ta te ture tiretiera a te Atua e titau nei… Na roto i te mau tutavaraa amui ana‘e, a te Feia Mo‘a a te Atua, i roto i teie nei tau tuuraa hopea, e ravehia’i te paturaa o Ziona, e te basileia o te Atua i ni‘a i te fenua nei, e e faaineinehia’i no te hoê amuitahiraa e te basileia o te Atua i te ra‘i; na roto i teie nei raveraa e haere atu ai e e haati ai te mau taatiraa tei faatahoê i te mau nuu o te ra‘i i te feia atoa tei haapa‘o i te mau faaueraa a te Atua.¹⁴

E ti‘a ia tatou ia hoê i roto i ta tatou haapiiraa, i roto i ta tatou tutavaraa i roto i te basileia o te Atua, e i roto i to tatou here te tahi e te tahi.

Te Parau Haapiiraa

Te oaoa nei au i te mau taime atoa i te hi‘oraa’tu i to‘u mau taata tupu ia farii i te hoê iteraa no te parau mau na roto i te haapa‘ oraa i te evanelia mai tei haapiihia e te mau tavini a te Fatu. Ia haere ana‘e te mau taata i roto i te mau pape o te bapetizoraa e ia farii ana‘e ratou i te tuuraa rima no te horo‘araa i te Varua Maitai, e farii ratou i te hoê â parau mau, i te hoê â maramarama mai ta tatou i farii, e i reira tatou e riro mai ai ei hoê â aau e e hoê â mana‘o, e e pee atu ai tatou i te faaururaa o te Varua Maitai, o te apee nei i Ta’na evanelia. I roto i te pororaa i te evanelia e te faatereraa i te mau oro‘a no te fare o te Fatu, te apee nei te varua no te faaururaa o te Ra‘i i te feia o te faatere ra, e vai noa te reira ia ratou e a muri noa’tu, mai te mea e haapa‘o ratou, i roto i te mau hopoi‘a atoa o te oraraa nei.

Ia faaroo ana‘e au i te mau taea‘e ia aparau no ni‘a i te mau auraa i rotopu i te Atua e teie nei u‘i, te ite nei au e ua hoê to ratou mau mana‘o, e te iteraa papû ta ratou e faaite nei e hoê â iteraa papû; ua hoê ratou i roto i to ratou iteraa papû; ua hoê ratou i te parauraa e e upooti‘a te ohipa a te Fatu to tatou Atua i ni‘a i te taatoaraa o to’na mau enemi.¹⁵

Te vai nei te hoê ohipa taa ê i tu‘atihia i ni‘a i te pororaa o te evanelia: E tono paha outou e hoê tauatini peresibutero e e haapii ratou i te hoê â mau haapiiraa; e e haa paatoa ratou i te paturaa i te hoê â Ekalesia, e hoê ratou; no te mea ua faaitehia’tu ia ratou paatoa to ratou faaroo, ta ratou mau haapiiraa, e te faanahonahoraa o te Ekalesia na roto i te mau heheuraa a te Atua: no reira ratou e hoê ai i te mau parau tumu o te evanelia… Ua riro to tatou amuiraa e to tatou hoêraa o te mana‘o te hoê o te mau ohipa nehenehe roa o te faanahonahoraa o te basileia o te Atua.¹⁶

Te haaraa i roto i te basileia o te Atua

E ti‘a ia tatou ia patu i teie nei basileia na roto i te tahoêraa e te pee maite raa’tu i te mau taata tei faataahi‘a no te arata‘i ia tatou, aita ana‘e e purara tatou; e e rave–ê–hia’tu te mau haamaitairaa a te Atua mai te mea e rave tatou i te tahi ê atu e‘a.¹⁷

E hopoi‘a na‘u ia hoê e te Atua, e mauhaa paruparu ho‘i au i te rima o te Atua. E hopoi‘a na‘u ia titau i te mana i te Atua ra. E ia na reira ana‘e au, e ti‘a ïa i to‘u mau tauturu ia ti‘a mai i pihai iho ia‘u e ia hoê matou. E ti‘a ia tatou ia hoê â aau e hoê â mana‘o i roto i te mau ohipa atoa, i te pae tino e i te pae varua, o te tae mai nei i mua ia tatou i roto i te raveraa i te ohipa i roto i te Ekalesia e te basileia o te Atua. E te mauruuru nei au i te parau e teie te huru mai to‘u pii–raa–hia i teie nei ti‘araa, aore râ mai te faanahonaho– raa–hia o [teie] Peresideniraa o te Ekalesia. Ua hoê atoa mai na Ahuru ma Piti Aposetolo ia matou i ô nei. E hopoi‘a na ratou ia hoê â aau e hoê â mana‘o. Aita e ti‘a ia ratou ia ore ia na reira. Eita e nehenehe ia ratou ia ore ia hoê e ia manuïa i mua i te Atua. E ti‘a ia ratou ia hoê e o matou, e ia hoê matou e o ratou. Te vai ra to ratou mau ti‘araa; te vai ra to ratou ti‘amâraa. Ia parau ana‘e râ te Peresideniraa o te Ekalesia i te hoê o ratou, « Teie te parau a te Fatu », aore râ, « E mea ti‘a teie », e ti‘a ia ratou ia farii i te reira e ia rave i te ohipa na muri ia matou. Te titau nei te ture a te Atua ia tatou ia hoê. E hopoi‘a atoa na te mau Hitu Ahuru ia hoê e na Ahuru ma Piti Aposetolo. Ua piihia te mau Hitu Ahuru e te mau aposetolo ia haere e rave i te ohipa i roto i te ô vine a te Fatu, e e rave amui ratou i te ohipa. O te reira te huru, te mau taea‘e e te mau tuahine, i roto i te mau pŭpŭ atoa i roto i teie nei Ekalesia. Ia vai mai te tahoêraa e ti‘a ai. Ia ore roa ia vai mai te marôraa, te amahamaharaa. Mai te mea te vai ra teie nei mau mea, eita te Fatu e mauruuru, e e haamarirauhia tatou i roto i ta tatou nei ohipa.¹⁸

E nehenehe ta tatou e ite i te mau vahi atoa i ni‘a i te fenua nei te hotu o te amahamaharaa. Ia rahi te amahamaharaa i roto i te mau fenua, te mau pŭpŭ taata, te mau utuafare, aore râ te mau pŭpŭ taata i roto i te mau huru ohipa atoa i raro a‘e i te ra‘i, e iti atoa ïa te mana i roto ia ratou no te faahaere i te mau opuaraa atoa aore râ te parau tumu atoa e nehenehe e mana‘ohia; ia rahi to ratou hoêraa, i roto anei i te faatureraa aore râ i roto i te tahi atu ohipa, e rahi atoa ïa to ratou mana no te faatupu i te mea ta ratou e hinaaro. E nehenehe ta tatou e ite e te rahi noa’tura te. amahamaharaa o te nunaa o te ao i te mau mahana atoa, e te itehia ra i te mau vahi atoa te mau ino na roto mai i teie nei amahamaharaa. Ua piihia tatou no te patu ia Ziona, e eita ta tatou e nehenehe e patu ia ore tatou e hoê; e e ti‘a ia tatou i roto i taua hoêraa ra ia faatupu i te mau faaueraa a te Atua ia tatou; e e ti‘a ia tatou ia faaroo i te parau a te mau taata tei faataahia no te faatere e no te arata‘i i te mau ohipa o te basileia o te Atua …

… Te mau parau tumu o te evanelia a Iesu Mesia o tei heheuhia mai i to tatou nei anotau o te mana ïa o te Atua, ia ora te feia atoa i faaroo ra; te ati Iuda na e te Heleni atoa ho‘i, i teie tau o te ao mai te tahi ê atu tau, e mai te mea e hoê noa tatou i te haapa‘ oraa i te a‘o o ta tatou i farii, e nehenehe ïa ia tatou ia upooti‘a i ni‘a i te mau ino atoa e vai mai i ni‘a i to tatou haerea, ia patu i te Ziona o te Atua, e ia tuu ia tatou iho i ni‘a i te hoê ti‘araa e nehenehe ai tatou ia faaorahia.¹⁹

Te hereraa te tahi i te tahi

A hamani maitai te tahi i te tahi. Eiaha e imi i te hapa ia vetahi ê… A turu te tahi e te tahi.²⁰

Eita e ti‘a ia vai mai te hoê mana‘o nounou i roto i te hoê tuhaa o te hoê utuafare, – « Eita vau e tau‘a atu eaha te mea e tupu mai i tera e tera ohipa mai te mea e hinaaro vau ia noaa ia‘u te mea ta‘u e hinaaro no‘u iho. E mana‘o haapa‘o noa ia’na iho teie, e faatupu te reira i te amahamaha e eita te reira e tu‘ati i te huru mau o te hoê Feia Mo‘a a te Atua. E ti‘a ia tatou ia tutava, tatou tata‘itahi e tatou paatoa, ia tuu atu i rapae au i to tatou aau taua mau mana‘o ino ra, e i reira e ti‘a ai ia tatou i roto i to tatou mau utuafare, ia tutava i te imiraa i te maitai o te taatoaraa o te mau melo o te utuafare.²¹

Mai te mea aita ta tatou haapa‘oraa faaroo e arata‘i ra ia tatou ia here i to tatou Atua e to tatou taata tupu e ia rave i te ohipa parau–ti‘a i te mau taata atoa, ua faufaa ore ïa te parau no to tatou haapa‘oraa faaroo. Ua parau te aposetolo:

« Ia parau te hoê taata e, Te hinaaro nei au i te Atua; e aore oia i aroha i tana taea‘e, e haavare oia: o tei ore i aroha i ta’na taea‘e tei hi‘ohia e ana ra, eaha e tia‘i ia’na ia hinaaro i te Atua, tei ore i hi‘ohia e ana ra ? » [1 Ioane 4:20]

E nehenehe ta tatou e faahoho‘a maitai i to tatou hinaaro i to tatou Atua na roto i te oraraa i to tatou haapa‘oraa faaroo. E mea faufaa ore ia faaite i to tatou hinaaro i te Atua a parau noa’i tatou i te parau ino aore râ e rave noa’i tatou i te ohipa ti‘a ore i Ta’na mau tamarii. Te titau etaeta nei te mau fafauraa mo‘a ta tatou i rave e Ona ia rave tatou i te mau hopoi‘a e ti‘a ia tatou ia rave no te tahi e te tahi, e te ohipa rahi a te haapa‘oraa faaroo o te haapiiraa ïa ia tatou nahea ia faaohipa i teie nei mau hopoi‘a no te faatupuraa i te oaoa rahi roa‘e no tatou iho e no to tatou mau taata tupu. Ia haapa‘o–ana‘e–hia te mau titauraa a to tatou nei haapa‘oraa faaroo, aore roa e parau e parauhia aore râ e ohipa e ravehia o te faaino i te hoê taata tupu. Mai te mea e ora te Feia Mo‘a i te mau Mahana Hopea nei mai tei ti‘a ia ratou ia ora, e mai ta to ratou haapa‘oraa faaroo e haapii nei ia ratou ia rave, aore roâ ïa e mana‘o ino i roto i te mau ouma atoa maori râ te aroha e te here no te mau taea‘e e no te mau tuahine. E ore roa ïa e vai mai te ohumu e te parauraa i te parau ino i rotopu ia tatou nei; e vai mai râ te hau e te aroha e te hinaaro maitai i roto i to tatou atoa mau aau e to tatou mau fare faaearaa. E riro ïa tatou te nunaa oaoa roa‘e i ni‘a i te fenua nei, e e vai mai ïa te haamaitairaa e te hau no te ra‘i i ni‘a ia tatou e i ni‘a i ta tatou atoa mau mea.

Mai te mea te vai nei te oaoa ore e te inoinoraa e te mau marôraa e te mau au–ore–raa i rotopu ia tatou, no te mea ïa e, aita tatou e haapa‘o ra i te haapa‘oraa faaroo ta tatou e poro nei. E ere te reira to’na mau hotu. I te vahi e te vai nei teie mau ino te vai nei te hoê hinaaro rahi no te tatarahaparaa …

E peu matarohia e tatou te Feia Mo‘a i te mau Mahana Hopea nei ia amu i te oro‘a i te hoê taime i te hebedoma. Mai te mea e haapa‘ ohia te mau haapiiraa a to tatou Fatu, ei haamana‘oraa ia’na tatou e haapa‘o ai i teie nei oro‘a mo‘a, aita roa’tu ïa e taata tei hara e faati‘ahia ia amu i te oro‘a e tae noa’tu i te taime ua faaafaro oia i to’na oraraa. E faaueraa papû na te Fatu ra o Iesu ia ore te hoê taata ia faati‘ahia ia rave i To’na ra tino e To’na ra toto ma te au ore [a hi‘o 3 Nephi 18:28–32]. Eita e nehenehe ia mana‘o i te tahi faanahoraa maitai atu no te paruru i te tupuraa o te mau mana‘o au ore e te mau hapa i rotopu i te mau taea‘e e te mau tuahine. Mai te mea e rave te Feia Mo‘a i ta ratou hopoi‘a, eita te mau fifi e vai noa mai ma te ore e faaafarohia e tae noa’tu i te mahana o te Fatu ia haaputuputu mai ratou no te amu e no te inu ei haamana‘oraa Ia’na.²²

Te ti‘aoro nei au i te Feia Mo‘a atoa, e ia haapa‘o amui tatou i te mau parau a to tatou Fatu mai tei papa‘ihia i roto i te mau irava 12, 13, 14 [no te pene 15] a Ioane– mai te mea e aroha tatou te tahi i te tahi mai te Mesia i aroha ia tatou, e nehenehe ïa ta tatou e faaafaro i te mau fifi atoa e tupu mai i rotopu ia tatou, ia faaore te hapa a vetahi ê, ia î i te aroha, e riro ïa te maramarama, te here, te oaoa, te hoêraa, te hau e te autaea‘eraa e rave‘a no te faatupu i te hau i to tatou nei anotau, o tei hau roa’tu ïa i te maitai i mua i te aro o te Atua, te mau melahi e te mau taata, eiaha râ i te imiraa i te pe’ape’a i roto i te mau hapa a to tatou mau taea‘e.²³

E ti‘a ia tatou ia hoê â aau e ia hoê â mana‘o, e ia ore e faati‘a i te hoê noa‘e mea no te pae tino aore râ no te pae varua ia faataa ê ia tatou i te aroha o te Atua e o te taata.²⁴

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

A tai‘o faahou i te paratarafa matamua i te api 265. Eaha te mau ohipa tei tupu mai te reira te huru i roto i to outou nei oraraa ?
Nahea to te Metua i te Ao ra, Iesu Mesia e te Varua Mo‘a « hoê » raa ? (A hi‘o i te mau api 266-67)
Eaha te mau rave‘a e hoê ai te mau peropheta e te mau melo no te Atuaraa ? (A hi‘o i te mau api 267-69). Nahea e nehenehe ai ia tatou paatoa ia faatupu i taua huru hoêraa ra ? (A hi‘o i te mau api 269-70.)
A tai‘o faahou i te mau api 268-70, ma te hi‘o atu i te mau mana‘ o o te peresideni Woodruff no ni‘a i te fenua e 16 tâ, te hoê anavai e te hoê ô vine. Eaha ta tatou e nehenehe e haapii mai roto mai i teie nei mau faaauraa ?
A tai‘o i te paratarafa matamua i te api 272. Eaha te mau ohipa i tupu tei faaite mai ia outou e « te hoêraa o te puai ïa » ?
A feruri na aore râ a aparau no ni‘a i te mau huru oraraa, te mau tapa‘o, te mau mea anaanataehia, te mau taleni e te mau hopoi‘a o te mau melo i roto i ta outou paroita, amaa, aore râ utuafare. I to outou feruriraa nahea taua mau huru taata e nehenehe ai e hoê no te rave i te maitai ?
Eaha te tahi mau haamaitairaa ta tatou e farii nei ia hoê tatou no te maitai i roto i to tatou mau utuafare ? i roto i ta tatou mau pŭpŭ i roto i te Ekalesia ? Eaha te tahi mau hotu no te amahamaharaa i roto i te utuafare e i roto i te Ekalesia ?
Eaha te tahi mau rave‘a ta te Ekalesia e horo‘a nei no te tauturu ia tatou ia hoê i roto i te haapiiraa ta tatou e haapii nei ?
No teaha eita e nehenehe ia parau e te here nei tatou i te Atua e te au ore nei râ tatou i to tatou nei taea‘e ? (A hi‘o i te api 273).
A tuatapapa i te taatoaraa o te piti o te paratarafa i te api 274-75 ? Nahea te oro‘a e tauturu ai ia tatou ia vai hoê ?

Te mau papa‘iraa mo‘a: Salamo 133:1; Mosia 18:21; 3 Nephi 11:28–29

grape vines — No te haapapûraa i te hinaaro no te hoêraa, ua faaau te peresideni Wilford Woodruff te faatereraa o te Ekalesia e te utuafare i « te ô vine e to’na mau melo, to’na mau amaa raau e to’na mau hu‘ahu‘a raau. »

First Presidency in 1894 — Te peresideniraa Matamua i te matahiti 1894 Mai te aui i te atau, te peresideni George Q. Cannon, Tauturu Matamua; te peresideni Wilford Woodruff; e te peresideni Joseph F. Smith, Tauturu Piti.