Pene 11

Te pureraa ia farii i te mau haamaitairaa no te ra‘i mai

Ia pure ana‘e tatou ma te faaroo, te faaineine ra ïa tatou ia tatou iho ia farii i te mau haamaitairaa ta to tatou Metua i te Ao ra i faaherehere no tatou.

No roto mai i te Oraraa o Wilford Woodruff

I te ava‘e mati 1835, a tavini ai oia i ta’na misioni matamua, ua titauhia ia Wilford Woodruff ia haere atu na roto i te mau anavai pape e te mau vahi vari paruparu i te tuhaa apatoa hitia-o te-râ no te Fenua Marite. No te haere i te tahi atu pae o te vahi vari paruparu, ua tapû oia e to’na hoa i te hoê tumu raau e ua faariro ei vaa. Ua hoe raua ma te pe’ape’a ore fatata 240 kilometera i te atea hou a faaru’e atu ai i te vaa e a haere avae noa’tu ai. Ua haamana‘ o te peresideni Woodruff i muri mai e ua rave raua i te hoê e‘a « o te tapû atu na roto i te mau vahi vari, e tei tapo‘ihia i te rahiraa o te taime e te vari e te pape, i te roaraa e 270 kilometera. Ua haere avae maua e 64 kilometera te atea i te mahana na roto i te vari e te pape tei tae mai i te faito o te turi avae. I te 24 no mati, i muri a‘e i to maua haereraa e 16 kilometera na roto i te vari, ua roohia to‘u turi avae i te hoê mauiui u‘ana. Ua parahi ihora vau i ni‘a i te hoê tapû raau. »

I taua taime ra o to raua tereraa, to’na hoa, o tei rohirohi i te ohipa e o tei faaoti e ho‘i i te fare, ua faaru’e mai ia ia’na i reira a parahi ai oia i ni‘a i te hoê tapû raau i roto i te hoê vahi vari paruparu o tei î i te moo tahae. Ma te mana‘o aueue ore, ua fariu atu Wilford Woodruff i te Fatu. Ua parau oia, « Ua tuturi au i roto i te vari e ua pure, e ua faaora mai te Fatu ia‘u, e ua haere au i to‘u ra haerea ma te oaoa. »¹

I te mau matahiti i muri mai, ua faaite te peresideni Woodruff i to’na faaroo a tere ai oia, e ta’na vahine faaipoipo e te tahi atu mau taata e rave rahi na ni‘a i te pahi no te tavini i te Fenua Peretane. « Ua ratere na matou e toru mahana e e toru ru‘i na roto i te mata’i puai, e ua tura‘ihia matou i muri », ua haamana‘o oia. « I te pae hopea ua ani au i to‘u mau hoa ia haere mai na muri ia‘u i roto i te piha, e ua parau atu vau ia ratou ia pure ia taui te Fatu i te tereraa o te mata’i. Aita to‘u e mata‘uraa ia mo‘e matou; tera râ aita vau i au i te mana‘o ia faaho‘ihia matou i muri i New York no te mea ua hinaaro vau ia tamau i teie nei tere. Ua pûpû matou paatoa i te hoê â pure, te mau tane e te mau vahine; e ia oti matou i te pure ua haere atu matou i ni‘a i te tahua teitei o te pahi e i roto noa i te hoê area iti mai i te hoê minuti, e au ra e, ua rave te hoê taata i te hoê óé e ua tapû i te matai, e mai te mea e taorahia te hoê horoi rairai roa e ore ïa te reira e pee. »²

Te mau haapiiraa a Wilford Woodruff

E ohipa na tatou ia pure ma te faaroo no te tauturu e hinaarohia e tatou.

Te vai nei te hoê a‘oraa a to tatou Faaora e ti‘a i te Feia Mo‘a atoa a te Atua ia haapa‘o, tera râ, te mata‘u nei au, e aita tatou e na reira nei mai tei titauhia ia tatou ia rave, o te pure-noa-raa ïa ma te tuutuu ore [a hi‘o Luka 18:1; PH&PF 88:126]. Te mata‘u nei au, e ei nunaa, aita tatou e navai nei i te pure ma te faroo. E ti‘a ia tatou ia ti‘aoro atu i te Fatu na roto i te pure u‘ana e ia faaite atu to tatou mau hinaaro paatoa ia’na ra. No te mea ia ore oia e paruru e ia faati‘amâ e ia faaora ia tatou, aore roa ïa e mana ê atu e nehenehe. No reira ia hope roa to tatou ti‘aturiraa ia’na. No reira e ti‘a i ta tatou mau pure ia tae atu i roto i te tari‘a o to tatou Metua i te Ao ra i te po’ipo’i e i te pô.³

Aita te mau taata o te fenua nei e ite ra i te hopea e te maitai o te pure. Te faaroo nei e te pahono nei te Fatu i te mau pure a te mau tane, te mau vahine e te mau tamarii. Ua hau atu te mana o te pure, e mana rahi mau, no te faahaere mai i te mau haamaitairaa a te Atua, i to te tahi ê atu mea.⁴

Ia ti‘a ana‘e to te ao no te aro i te basileia o te Atua i teie nei anotau hopea, e ti‘a anei i te Feia Mo‘a ia mata‘u ?… Eita e ti‘a ia tatou ia mata‘u. Te vai nei te hoê mea e ti‘a ia tatou ia rave, o te pureraa ïa i te Atua. Ua na reira te mau taata parau-ti‘a atoa; o Iesu iho te Faaora, te Tamaiti Fanau Tahi a te Metua i te tino nei, ua pure oia mai te umete mai â e tae atu i te satauro, i roto i te taatoaraa o to’na oraraa; i te mau mahana atoa ua ti‘a ia’na ia ti- ‘aoro i to’na ra Metua no te horo’a’tu ia’na te puai no te turu ia’na i roto i to’na taime ati e ia nehenehe ia’na ia inu i te au’a maramara e te oriorio. Oia atoa e ta’na mau pīpī.⁵

Te mau mea atoa ua titauhia ia tatou ia farii e ia oaoa, e hopoi’a ïa na tatou i te ani atu i te Atua no te reira. E ti‘a ia tatou ia haere atu i mua Ia’na i roto i te mau vahi mo‘emo‘e e ia faaite atu i to tatou mau hinaaro, ia faaroohia ta tatou mau pure e ia pahonohia i ni‘a i to tatou mau upoo. Tei reira to tatou puai. Tei te Atua ra to tatou ti‘aturiraa, eiha râ i te taata nei.⁶

E hopoi’a na te feia mo‘a atoa a te Atua… ia faatae i ta’na mau pure i te tari‘a o te Fatu no Sabaota ra i te po’ipo’i e te pô i te tau mau, i roto i te utuafare e i te mau vahi mo‘emo‘e, ia nehenehe i te Fatu ia turu i to’na nunaa, ia patŭ ia Ziona e ia faatupu i ta’na mau fafauraa…

… Mea rahi a‘e to‘u faaroo i roto i te pure i mua i te Fatu i te tahi ê atu parau tumu i ni‘a i te fenua nei. Mai te mea aita to tatou e faaroo i roto i te pureraa i te Atua, aita atoa ïa to tatou e faaroo ia’na aore râ i te evanelia. E ti‘a ia tatou ia pure i te Fatu, ma te ani atu ia’na i te mea e hinaarohia ra e tatou. Ia haere tamau atu te mau pure a teie nei nunaa i mua i te Fatu i te tau mau ra, e e ore ïa te Fatu e fariu ê atu ia ratou, e faaroohia e e pahonohia râ ratou, e e ti‘a mai e e unauna mai te basileia e te Ziona a te Atua, e e oomo mai oia i to’na ra mau ahu nehenehe e e ahuhia oia e te hanahana o to’na ra Atua, e e faatupu oia i te fâ no to’na haamau- raa-hia i ô nei i ni’a i te fenua nei [a hi‘o PH&PF 82:14].⁷

E ti‘a ia tatou ei hoê nunaa, ia ti‘a i ni‘a, ma te faaroo e te mana, i mua i te Atua e ia faaite i to tatou mau hinaaro, e ia vaiiho i to tatou hopearaa i roto i To’na ra rima. Mai te reira ihoa ho‘i. E e vai noa oia i reira.⁸

E ti‘a ia tatou ia pure ia nehenehe ia tatou ia taa i te hinaaro o te Fatu e ia farii i Ta’na ra arata‘iraa.

Te mana‘o nei au e e ti‘a ia tatou ia faateitei i to tatou aau na roto i te pureraa i te Atua to tatou Metua i te Ao ra no Ta’na mau maitai, e ia arata‘i e ia faatere Oia ia tatou na roto i te faaururaa a te Varua Maitai, ia haamaramaramahia to tatou mau feruriraa e ia mahora to tatou haro‘aro‘araa no te taa i To’na mana‘o e to’na hinaaro no To’na nunaa.⁹

Ia feââ ana‘e outou no ni‘a i te tahi hopoi’a aore râ ohipa e ti‘a ia outou ia rave, eiaha roa e rave i te tahi mea e tae noa’tu i te taime e rave ai outou i te ohipa na roto i te pure e ia farii outou i te Varua Mo‘a. I te mau vahi atoa ta te Varua e faaue ia outou ia haere aore râ ia rave, mea ti‘a ïa; e ia pee atu outou i ta’na mau faaueraa, e maitai mai ïa outou.

E tonohia tatou i te mau vahi e rave rahi i roto i ta tatou ohipa i roto i te taviniraa i rotopu i te mau nunaa o te fenua nei, i reira paha tatou e ite ai e e mea ti‘a te tahi o teie mau raveraa; mai te mea râ, aita tatou i ite, e mea maitai a‘e ïa tatou ia haere atu i mua i te Fatu, e ia ani ma te faaroo ia arata‘ihia tatou i ni‘a i te e‘a o te ora.¹⁰

Ia haa maite e ia pure tatou i te Fatu no te paari i te mau mahana atoa, ia nehenehe ia tatou ia noaa te mana no te upooti‘a e no te haavî.¹¹

E hopoi’a mo‘a ta te mau metua i te haapiiraa i ta ratou mau tamarii ia pure e ia haapapû e te pure amui nei te utuafare.

Te mana‘o e te hinaaro o te Atua no te mau tane e te mau vahine tata‘itahi atoa o tei tomo i roto i te fafauraa no te faaipoiporaa, e o tei farii i te mau tamaroa e te mau tamahine tei horo’ahia’tu ia ratou, o te haapiiraa ïa ia ratou ia pure mai te taime ihoa ua navai to ratou paari.

E ohipa na te Feia Mo‘a i te mau Mahana Hopea nei ia haapii i ta ratou mau tamarii ia pure i to ratou apîraa ra; ia haapii ia ratou ia taa i te parau e te mau maitai o te pure, ia nehenehe ia ratou ia pure no to ratou mau metua e te mau mea atoa tei hinaarohia. Mai te mea e haamata outou i teie nei huru i te mau tamarii, e ia haapii outou ia ratou i roto i te mata‘uraa i te Fatu, e ore ïa ratou e faaru’e i taua e‘a ra. Eita e ti‘a i te upoo o te utuafare ia rave oia o’na ana‘e i te taatoaraa o te mau pure, e ti‘a râ ia’na ia pii i te mau melo o to’na utuafare ia pure, e ia ani i te haamaitairaa i te taime tamaaraa.¹²

Ia ora ana‘e tatou i te evanelia, e pahonohia mai ïa ta tatou mau pure e te mau haamaitairaa i ni‘a iho i to tatou mau upoo.

E ti‘a ia tatou ei nunaa ia vai haehaa, ia pure, ia auraro i te mau mana e vai nei ia nehenehe ia tatou ia farii i te mau haamaitairaa a to tatou Metua i te Ao ra i fafauhia mai.¹³

E ti‘a ia tatou ia ora na roto i taua e‘a e taua huru ra ia nehenehe ia tatou ia haere atu i mua i te Fatu e ia ani atu i taua mau haamaitairaa ra, na roto i te faaroo e te mana, o ta tatou e hinaaro no te patururaa ia tatou ia faatupu i te mau opuaraa a te Atua… E titauhia te reira no to tatou haereraa i mua.¹⁴

Te opua nei te Atua i te horo‘a i To’na Feia Mo‘a i te mau mea maitai o te fenua nei, mai te mau haamaitairaa atoa o te ra‘i, a roaa’i ia tatou i te faaohipa maitai ia ratou…

… E rave rahi o outou tei haapii nahea ia pure; e aita i manuïa i muri iho i te faahaere i ta outou mau pure i te tari‘a o te Atua Sabaota ra; e e faaroo Oia ia outou… E nehenehe te mau haamaitairaa no te ra‘i e noaahia e e faaterehia na roto ana‘e râ i te mau parau tumu no te parau-ti‘a.¹⁵

Aita to tatou e taime no te haamau‘a no te faaineine ia tatou iho no te mau mea o te tae mai i te fenua nei; e o vai te hinaaro ra ia ere i to’na korona, to’na hanahana, e te ti‘aturiraa no te mau ora mure ore o ta’na i farii i mutaa ihora a farii ai oia i te evanelia a Iesu Mesia ? Aita roa ïa e taata a‘e o tei farii i te tahi tuhaa o te Varua o te Atua. E ti‘a ana‘e tatou i ni‘a e ia faarahi tatou i to tatou piiraa, e ia haa i mua i te Atua e tae no‘atu i te taime e nehenehe ai tatou ia farii i te Varua Mo‘a, e tae noa’tu i te taime e vahi ai ta tatou mau pure i te paruru no te oraraa a muri atu e ia tae i te tari‘a o te Atua Sabaota ra e ia pahonohia mai na roto i te mau haamaitairaa i ni‘a i to tatou nei mau upoo.¹⁶

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa‘i outou i te pene aore râ a faaineine ai outou i te haapii. No te tahi atu tautururaa, a hi‘o i te mau api v-ix.

A tai‘o faahou i te mau aamu i te mau api 119-21. A feruri aore râ a aparau i te mau rave‘a taaê e nehenehe ia Elder Woodruff i te pahono atu i te mau hi‘oraa atoa. Eaha ta tatou e nehenehe e haapii mai na roto i ta’na mau pahonoraa ?
Eaha tei haaputapû ia outou a tai‘o ai outou i te mau haapiiraa a te peresideni Woodruff no ni‘a i ta tatou hopoi’a ia pure ? (A hi‘o i te mau api 121-122). Eaha te auraa no outou ia pure ma te faaroo ? No te aha e ti‘a’i ia tatou ia pure no te farii i te mau haamaitairaa e hinaarohia ra e tatou ? Eaha te tahi atu mau tumu no te pure ?
A tai‘o i te taatoaraa o te paratarafa toru i te api 121. No te aha te Faaora i hinaaro ai ia pure ? Eaha ta tatou e nehenehe e haapii mai na roto i Ta’na mau pure ? (A hi‘o Mataio 26:39; Ioane 11:41; 3 Nephi 13:9–13.)
Nahea te pure e nehenehe ai e tauturu ia tatou i te taime e rave ai tatou i te mau faaotiraa aore râ e mau uiraa ta tatou no ni‘a i ta tatou mau hopoi’a ? (A hi‘o i te api 121).
Eaha te tahi mau rave‘a i pahono mai ai to tatou Metua i te ao ra i ta outou mau pure ? Eaha ia to tatou huru mai te mea e mea huru ê te pahonoraa i te pure i te pahonoraa o ta tatou i ti‘aturi i te farii ?
Eaha te haapapûraa ta te peresideni Woodruff i horo‘a i te mau metua o te haapii i ta ratou mau tamarii ia pure ? (A hi‘o i te api 123). Eaha te tahi o te mau parau tumu no te pure e ti‘a i te mau metua ia haapii atu i ta ratou mau tamarii ? Nahea te mau metua e nehenehe ai e tauturu i ta ratou mau tamarii ia faariro i te pure ei tuhaa no to ratou oraraa ?
No te aha e mea faufaa rahi roa i roto i te mau pure utuafare ia farii te mau melo atoa o te utuafare te taime no te pure ? (A hi‘o i te api 123). Nahea te pure i haapuai ai i to outou utuafare ?
A tuatapapa i te tuhaa hopea no te pene (te mau api 123-24), ma te imi i te mau maitai ta te peresideni Woodruff i parau e ti‘a roa ia noaa ia tatou. No te aha i titauhia ai teie nei mau maitai ia pure ana‘e e ia imi ana‘e tatou i te mau pahonoraa i ta tatou mau pure ?

Te mau papa‘iraa mo‘a: Mataio 7:7; Iakobo 1:5–6; 5:16; 2 Nephi 32:8–9; Alama 33:3–11; 34:17–28; 37:36–37; 3 Nephi 18:19–21; PH&PF 10:5; 68:28; 112:10