1 და მას შემდეგ, რაც ქრისტე მკვდრეთით აღდგება, ის თქვენ გამოგეცხადებათ, ჩემო შვილნო და საყვარელო ძმებო; და სიტყვები, რომლებსაც ის გეტყვით, იქნება კანონი, რომელიც თქვენ უნდა შეასრულოთ.

2 რადგან, აჰა, მე თქვენ გეუბნებით, რომ დავინახე, როგორ ჩაივლის მრავალი თაობა და იქნება დიდი ომები და დიდი განხეთქილებები ჩემს ხალხთა შორის.

3 და მას შემდეგ, რაც მესია მოვა, ჩემს ხალხს მიეცემა ნიშნები მისი შობის შესახებ და ასევე მის სიკვდილსა და აღდგომაზე. და დიდი და საშინელი იქნება ის დღე ბოროტთათვის, რადგან დაიღუპებიან; და ისინი დაიღუპებიან იმიტომ, რომ აძევებენ წინასწარმეტყველებს და წმინდანებს, ქვებით ქოლავენ და ხოცავენ მათ; ამიტომ, მათ წინააღმდეგ წმინდანთა სისხლის ღაღადი მიწიდან მიაღწევს ღმერთს.

4 ამიტომ, ყოველ ამპარტავანს და სიბოროტის ჩამდენს, ის დღე, რომელიც მოვა, დაწვავს მათ, – ამბობს ცაბაოთ უფალი, რადგან ნამჯასავით იქნებიან.

5 და მათ, რომლებიც კლავენ წინასწარმეტყველებს და წმინდანებს, მიწის უფსკრულები შთანთქავენ, – ამბობს ცაბაოთ უფალი; და მთები დაფარავენ მათ და გრიგალნი წაიღებენ და შენობები დაეცემათ და დაამსხვრევენ მათ და მტვრად დაფქვავენ.

6 და მათ ეწვევათ ჭექა-ქუხილი და ელვა, მიწისძვრები და ყველანაირი ნგრევა, რადგან უფლის რისხვის ცეცხლი აინთება მათზე და იქნებიან ნამჯასავით და ის დღე, რომელიც მოვა, დაწვავს მათ, – ამბობს ცაბაოთ უფალი.

7 ჩემი სულის ტკივილი და ტანჯვა დანაკარგისგან, ჩემი ხალხისგან დახოცილთა გამო! რადგან მე, ნეფიმ, ვიხილე ეს და ლამის შთამნთქა ამან უფლის გარემოცვაში; მაგრამ მე უნდა შევღაღადო ჩემს ღმერთს: სამართლიანია შენი გზები.

8 მაგრამ, აჰა, მართლები, რომლებიც ყურს უგდებენ წინასწარმეტყველთა სიტყვებს და არ ანადგურებენ მათ, არამედ მტკიცედ ელიან ქრისტეს ნიშნების შესრულებას, რომლებიც მოცემულია, ყველა დევნის მიუხედავად, აჰა, ეს ისინი არიან, რომლებიც არ დაიღუპებიან.

9 მაგრამ მათ გამოეცხადება ძე სამართლიანობისა და იგი განკურნავს მათ და ექნებათ მშვიდობა მასთან, სანამ არ ჩაივლის სამი თაობა და მრავალნი მეოთხე თაობიდან არ ჩაივლიან სამართლიანობაში.

10 და როდესაც ეს ყველაფერი ჩაივლის, სწრაფი განადგურება მოევლინება ჩემს ხალხს; ვინაიდან მიუხედავად ჩემი სულის ტკივილისა, მე ეს ვიხილე, ამიტომ ვიცი, რომ ეს ასე იქნება და ისინი ყიდიან თავიანთ თავს არაფრის ფასად, რადგან თავიანთი ამპარტავნობისა და უგუნურობის საზღაურად მოიმკიან განადგურებას; რადგან იმის გამო, რომ უთმობენ ეშმაკს და ირჩევენ ბნელეთის და არა სინათლის საქმეებს, ამიტომ უნდა ჩავიდნენ ჯოჯოხეთში.

11 რადგან უფლის სული ყოველთვის არ მოქმედებს ადამიანზე. და როდესაც სული წყვეტს ადამიანთან ყოფნას, მაშინ მოდის სწრაფი განადგურება და ეს აღონებს ჩემს სულს.

12 და როგორც მე ვლაპარაკობდი იუდეველთა დარწმუნებაზე, რომ იესო არის თვით ქრისტე, აუცილებელია, რომ წარმართებიც ასევე დარწმუნდნენ, რომ იესო არის ქრისტე, მარადიული ღმერთი;

13 და რომ ის გამოეცხადება ყველას, ვისაც მისი სწამს, სულიწმინდის ძალით; დიახ, ყველა ერს, ტომს, ენას და ხალხს, მოავლენს დიდ სასწაულებს, ნიშნებს და საოცრებებს ადამიანთა შვილებს შორის მათი რწმენის შესაბამისად.

14 მაგრამ, აჰა, მე გიწინასწარმეტყველებთ უკანასკნელი დღეების შესახებ; იმ დღეებზე, როდესაც უფალი ღმერთი ამ ყველაფერს მოავლენს ადამიანთა შვილებზე.

15 მას შემდეგ, რაც ჩემი შთამომავლობა და ჩემი ძმების შთამომავლობა გადაშენდება ურწმუნოებაში და დამარცხდება წარმართების მიერ; დიახ, მას შემდეგ, რაც უფალი ღმერთი დაბანაკდება მათ გარშემო და შემოარტყამს ალყას და აღმართავს მათ წინააღმდეგ გოდოლებს; და მას შემდეგ, რაც დამცირდებიან მტვერში, ისე, რომ აღარ იქნებიან, მაინც, მართალთა სიტყვები იქნება ჩაწერილი და ერთგულთა ლოცვები იქნება მოსმენილი და არავინ, ვინც გადაშენდება ურწმუნოებაში, არ იქნება დავიწყებული.

16 რადგან ისინი, რომლებიც იქნებიან განადგურებულნი, მიმართავენ მათ მიწიდან და ყრუდ გამოვა მტვრიდან მათი საუბარი და მათი ხმა იქნება, როგორც სულების გამომძახებლის ხმა, რადგან უფალი ღმერთი მისცემს მას ძალას იჩურჩულოს მათ შესახებ, დიახ, ისე, თითქოს მიწიდან; და მათი ნათქვამი ჩურჩულით ამოვა მტვრიდან.

17 რადგან ასე ამბობს უფალი ღმერთი: ისინი ჩაიწერენ იმას, რაც მოხდება მათ შორის და ეს ყველაფერი ჩაიწერება და ჩაიბეჭდება წიგნში; და მათ, რომლებიც გადაშენდნენ ურწმუნოებაში, ეს არ ექნებათ, რადგან ცდილობენ გაანადგურონ ღმერთის საქმენი.

18 ამიტომ, როგორც ისინი, ვინც განადგურდნენ, სწრაფად იქნენ განადგურებულნი; და მრავალნი მათი საშინელნი იქნებიან განიავებულნი ბზესავით. დიახ, ასე ამბობს უფალი ღმერთი: ეს მოხდება უეცრად, მოულოდნელად.

19 და იქნება ასე, რომ ისინი, რომლებიც გადაშენდნენ ურწმუნოებაში, წარმართთა ხელით დამარცხდებიან.

20 და წარმართნი ამაღლებულან თავიანთი თვალის ამპარტავნობით და წაბორძიკდნენ თავიანთი დაბრკოლების ლოდის სიმძიმის გამო, იმდენად, რომ მათ შექმნეს მრავალი ეკლესია; მიუხედავად ამისა, ისინი ამცირებენ ღვთის ძალასა და სასწაულებს და ადიდებენ თავიანთ ქადაგებებში საკუთარ სიბრძნეს და საკუთარ სწავლულობას, რათა მიიღონ სარგებელი, ღარიბი ჩაგრონ და სახე უჩეჩქონ.

21 და შენდება მრავალი ეკლესია, რომელიც ხდება შურის, დაპირისპირებისა და ღვარძლის მიზეზი.

22 და იქ არიან საიდუმლო შეთქმულებები ისე, როგორც ძველად, ეშმაკის შეთქმულებების შესაბამისად, რადგან ის არის ამ ყველაფრის დამაარსებელი; დიახ, მკვლელობისა და ბნელეთის საქმეთა დამაარსებელი; დიახ, და ის მიუძღვება მათ კისერზე სელის ბაწრით იქამდე, სანამ არ შებოჭავს მათ სამუდამოდ თავისი მაგარი თოკებით.

23 რადგან, აჰა, ჩემო საყვარელო ძმებო, მე გეუბნებით, რომ უფალი ღმერთი არ აკეთებს საქმეს სიბნელეში.

24 ის ისეთს არაფერს აკეთებს, რომ არ იყოს ამა ქვეყნისთვის სასარგებლო, რადგან მას ისე უყვარს ქვეყანა, რომ სიცოცხლესაც შესწირავს, რათა მოიზიდოს ყველა ადამიანი თავისთან. ამიტომ, ის არ უბრძანებს არავის, რომ არ იგემონ მისი ხსნისაგან.

25 აჰა, ნუთუ შეჰღაღადებს ვინმეს სიტყვებით: წადი ჩემგან? აჰა, მე გეუბნებით: არა; არამედ ის ამბობს: მოდით ჩემთან, თქვენ, დედამიწის ყველა კიდენო, იყიდეთ რძე და თაფლი უფულოდ და უსასყიდლოდ.

26 აჰა, ნუთუ უბრძანა მან ვინმეს, რომ წასულიყვნენ სინაგოგებიდან ან სამლოცველო სახლებიდან? აჰა, მე გეუბნებით: არა.

27 ნუთუ უბრძანა მან ვინმეს არ იგემონ მის ხსნისგან? აჰა, მე გეუბნებით: არა; არამედ მან მისცა ეს უსასყიდლოდ ყველა ადამიანს; და ის უბრძანებს თავის ხალხს, დაარწმუნონ ყოველი ადამიანი, რომ მოინანიონ.

28 აჰა, ნუთუ უბრძანებს უფალი ვინმეს, რომ მათ არ უნდა იგემონ მისი სიკეთე? აჰა, მე გეუბნებით: არა; არამედ ყოველ ადამიანს აქვს უპირატესობა, როგორც ერთს, ასევე მეორეს და არავისთვის არ არის აკრძალული.

29 ის ბრძანებს, რომ არ უნდა იყოს სამღვდელოებაში ვერცხლის მოყვარეობა; რადგან, აჰა, სამღვდელოების მზაკვრობა არის მაშინ, როდესაც ადამიანები ქადაგებენ და წარმოადგენენ თავიანთ თავს ამაქვეყნის სინათლედ, რათა იპოვონ სარგებელი და ამა ქვეყნის ქება; მაგრამ ისინი არ ეძებენ სიონის კეთილდღეობას.

30 აჰა, უფალმა ეს აკრძალა; ამიტომ, უფალმა ღმერთმა მოგვცა მცნება, რომ ყოველმა ადამიანმა გულმოწყალება უნდა იქონიოს, გულმოწყალება, რომელიც არის სიყვარული. და გულმოწყალება რომ არ ჰქონოდათ, იქნებოდნენ არარაობანი. ამიტომ, თუ ექნებათ გულმოწყალება, არ დაუშვებენ სიონში მოღვაწის დაღუპვას.

31 რადგან სიონში მოღვაწე იშრომებს სიონისათვის; ვინაიდან თუ ისინი ფულისთვის შრომობენ – დაიღუპებიან.

32 და კვლავ, უფალმა ღმერთმა ბრძანა, რომ ადამიანებმა არ უნდა ჰკლან; რომ არ უნდა იცრუონ; არ უნდა იქურდონ; არ უნდა წარმოთქვან უფლის, თავიანთი ღმერთის, სახელი ამაოდ; რომ არ უნდა შურდეთ; არ უნდა იქონიონ ღვარძლი; არ დაუპირისპირდნენ ერთი მეორეს; რომ არ იმრუშონ და არ ჩაიდინონ არაფერი ამდაგვარი; რადგან ყველა, ვინც ამას ჩაიდენს – დაიღუპება.

33 რადგან არცერთი ეს ურჯულოება არ მოდის უფლისგან; ვინაიდან ის აკეთებს იმას, რაც არის კეთილი ადამიანთა შვილებს შორის და არ აკეთებს არაფერს, გარდა იმისა, რაც ნათელია ადამიანთა შვილებისათვის; და ის მოუხმობს ყველას, მივიდნენ მასთან და იგემონ მისი სიკეთე და არავის არ ეუბნება უარს, ვინც მასთან მიდის – შავსა თუ თეთრს, მონასა თუ თავისუფალს, მამრსა თუ მდედრს; და ახსოვს მას კერპთაყვანისმცემელნიც და ყველა ერთია ღვთისთვის, ორივე – იუდეველიც და წარმართიც.