1 და ახლა მე, ნეფი, ვასრულებ თქვენთვის წინასწარმეტყველებას, ჩემო საყვარელო ძმებო. და მე შემიძლია დავწერო მხოლოდ რამდენიმე მოვლენის შესახებ, რომელიც ვიცი, აუცილებლად უნდა ახდეს; და მე შემიძლია დავწერო ჩემი ძმის, იაკობის, მხოლოდ რამოდენიმე სიტყვა.

2 ამიტომ, ის, რაც დავწერე, საკმარისია ჩემთვის, გარდა რამდენიმე სიტყვისა, რომელიც უნდა ვთქვა ქრისტეს მოძღვრების შესახებ; ამიტომ, მე გელაპარაკებით ნათლად, ჩემი წინასწარმეტყველებების სინათლის შესაბამისად.

3 რადგან ჩემი სული ხარობს ნათელში; რადგან ასე აკეთებს უფალი ღმერთი თავის საქმეს ადამიანთა შვილებს შორის. ვინაიდან უფალი ღმერთი გვაძლევს ნათელს გონიერებისთვის; რადგან ესაუბრება ადამიანებს მათი ენის შესაბამისად, მათთვის გასაგებად.

4 ამიტომ, მე მსურს, რომ გახსოვდეთ ის, რაც გელაპარაკეთ იმ წინასწარმეტყველის შესახებ, რომელიც უფალმა დამანახა; რომელიც მონათლავს ღვთის კრავს, რომელიც აიღებს ამა ქვეყნის ცოდვებს.

5 და ახლა, თუ ღვთის კრავი, იყო რა წმინდა, უნდა ყოფილიყო წყლით მონათლული, რათა აღესრულებინა ყოველგვარი სამართალი, მაშინ რამდენად დიდი აუცილებლობაა ჩვენთვის, ვართ რა უწმინდურნი, რომ მოვინათლოთ, დიახ, წყლით!

6 და ახლა, მინდა შეგეკითხოთ, ჩემო საყვარელო ძმებო, როგორ აღასრულა ღვთის კრავმა ყოველგვარი სამართალი წყალში ნათლობით?

7 ნუთუ არ იცით, რომ ის იყო წმინდა? მაგრამ მიუხედავად იმისა, რომ არის წმინდა, ის დაანახებს ადამიანთა შვილებს, რომ ხორციელის თანახმად მამის წინაშე თავს იმდაბლებს და მოწმობს მამისათვის, რომ მორჩილი იქნება მისი მცნებების დაცვაში.

8 ამიტომ, მას შემდეგ, რაც წყალში მოინათლა, სულიწმინდა მოევლინა მასზედ მტრედის სახით.

9 და კვლავ, ეს უჩვენებს ადამიანთა შვილებს ბილიკის სირთულესა და კარიბჭის სივიწროვეს, რომელშიც ისინი უნდა შევიდნენ, უჩვენა რა მათ მაგალითი.

10 და მან უთხრა ადამიანთა შვილებს: გამომყევით. ამიტომ, ჩემო საყვარელო ძმებო, შევძლებთ მივყვეთ იესოს, თუ არ ვიქნებით მზად დავიცვათ მამის მცნებანი?

11 და მამამ უთხრა: მოინანიეთ, მოინანიეთ და მოინათლეთ ჩემი საყვარელი ძის სახელით.

12 და ასევე, ძის ხმამ მომმართა სიტყვებით: მას, ვინც მოინათლება ჩემი სახელით, სულიწმინდას მისცემს მამა, ისევე, როგორც მე; ამიტომ, მომყევით და მიბაძეთ ჩემს ნამოქმედარს, რომელიც იხილეთ.

13 ამიტომ, ჩემო საყვარელო ძმებო, მე ვიცი, რომ თუ მიჰყვებით ძეს გულის მთელი მოწადინებით, იმოქმედებთ ღმერთის წინაშე ყოველგვარი პირმოთნეობისა და თვალთმაქცობის გარეშე, ნამდვილი მოწადინებით და მოინანიებთ ცოდვებს მამისადმი დამოწმებით, რომ მზად ხართ საკუთარ თავზე აიღოთ ქრისტეს სახელი ნათლობით – დიახ, მიჰყვებით თქვენს უფალსა და მხსნელს წყალში, მისი სიტყვებისამებრ, აჰა, მაშინ მიიღებთ სულიწმინდას; დიახ, მაშინ მოდის ცეცხლითა და სულიწმინდით ნათლობა; და მაშინ შეგიძლიათ ილაპარაკოთ ანგელოზების ენით, შესძახოთ ქებანი ისრაელის წმინდას.

14 მაგრამ, აჰა, ჩემო საყვარელო ძმებო, ძის ხმამ ასე მომმართა, სიტყვებით: მას შემდეგ, რაც მოინანიებთ ცოდვებს და წყალში ნათლობით დაუმოწმებთ მამას, რომ მზად ხართ დაიცვათ ჩემი მცნებები და მიიღებთ ცეცხლითა და სულიწმინდით ნათლობას და შეძლებთ ახალი ენით ლაპარაკს, დიახ, ანგელოზთა ენითაც ლაპარაკს და თუ ამის შემდეგ თქვენ უარმყოფთ მე, მაშინ თქვენთვის უკეთესი იქნებოდა, რომ არ შეგეცანით.

15 და მე მომესმა მამის ხმა, მეუბნებოდა რა: დიახ, ჩემი საყვარელი ძის სიტყვები არის ჭეშმარიტი და სარწმუნო. გადარჩება ის, რომელიც გაძლებს ბოლომდე.

16 და ახლა, ჩემო საყვარელო ძმებო, აქედან ვიცი, რომ ვერ გადარჩება ადამიანი, თუ არ გაუძლებს ბოლომდე, ცოცხალი ღმერთის ძის მაგალითის მიყოლით.

17 ამიტომ, გააკეთეთ, როგორც გითხარით, რომ მე ვიხილე, რასაც თქვენი უფალი და გამომსყიდველი აკეთებდა; რადგან იმ მიზნით დამანახეს ეს ყველაფერი, რომ იცოდეთ კარიბჭე, რომლითაც უნდა შეხვიდეთ. რადგან კარიბჭე, რომლითაც უნდა შეხვიდეთ, არის მონანიება და წყლით ნათლობა; და შემდეგ მოდის თქვენი ცოდვების მიტევება ცეცხლითა და სულიწმინდით.

18 და შემდეგ აღმოჩნდებით იმ რთულ და ვიწრო ბილიკზე, რომელსაც მარადიული სიცოცხლისაკენ მიჰყავხართ; დიახ, თქვენ შეხვედით კარიბჭით; თქვენ მოიქეცით მამისა და ძის მცნებების მიხედვით და მიიღეთ სულიწმინდა, რომელიც მოწმობს მამისა და ძის შესახებ, რათა აღსრულდეს მის მიერ მოცემული დაპირება, რომ თუ ამ გზას შეუდგებით, თქვენ მიიღებთ.

19 და ახლა, ჩემო საყვარელო ძმებო, მას შემდეგ, რაც თქვენ ამ რთულ და ვიწრო ბილიკს დაადექით, მე მინდა გკითხოთ: ნუთუ ყველაფერი გაკეთდა? აჰა, გეუბნებით: არა; რადგან თქვენ ვერ მოხვიდოდით აქამდე, რომ არა ქრისტეს სიტყვა, მასში ურყევი რწმენა, სრული ნდობა მისი მადლისადმი, რომელსაც აქვს ხსნის ძალა.

20 ამიტომ, თქვენ წინ უნდა მიისწრაფოდეთ, სიმტკიცით ქრისტეში, იმედის სრულყოფილი ნათელით და ღმერთისა და ყოველი ადამიანისადმი სიყვარულით. ამიტომ, თუ თქვენ წინ მიისწრაფით, ქრისტეს სიტყვით ინადიმებთ და გაუძლებთ ბოლომდე, აჰა, ასე ამბობს მამა: თქვენ გექნებათ მარადიული სიცოცხლე.

21 და ახლა, აჰა, ჩემო საყვარელო ძმებო, ეს არის გზა და არ არსებობს ზეცის ქვეშ მიცემული სხვა არანაირი გზა ან სახელი, რომლითაც ადამიანის გადარჩენა შეიძლება ღვთის სასუფეველში და ახლა, აჰა, ეს არის ქრისტეს მოძღვრება, ერთადერთი და ჭეშმარიტი მოძღვრება, მამისა და ძისა და სულიწმინდისა, რომელიც არის ერთი ღმერთი, უსასრულო. ამინ.