1 ნეფის ძმის, იაკობის სიტყვები, რომელნიც მან უთხრა ნეფის ხალხს:

2 აჰა, ჩემო საყვარელო ძმებო, მე, იაკობი, ვიყავი რა ღვთის მიერ მოწოდებული და მივიღე კურთხევა მისი წმინდა წესის შესაბამისად; და ვიყავი რა, ჩემი ძმის, ნეფის მიერ კურთხეული, რომელსაც თქვენ უყურებთ, როგორც მეფეს ან მფარველს და ვისზეც არის დამოკიდებული თქვენი უსაფრთხოება, აჰა, თქვენ იცით, რომ გითხარით ძალზედ ბევრი რამ.

3 მიუხედავად ამისა, მე კვლავ მოგმართავთ თქვენ, რადგან მსურს თქვენი სულების კეთილდღეობა. დიახ, დიდია ჩემი წუხილი თქვენ მიმართ; და თქვენ იცით, რომ ეს ყოველთვის ასე იყო. რადგან მე მოგიწოდებდით მთელი სიბეჯითით; და გასწავლიდით მამაჩემის სიტყვებს; და მე გეუბნებოდით იმ ყველაფერზე, რაც დაწერილია ქვეყნის დასაბამიდან.

4 და ახლა, აჰა, მე მინდა გესაუბროთ იმაზე, რაც არის ამჟამად და რაც მოხდება; ამიტომ, მე თქვენ წაგიკითხავთ ესაიას სიტყვებს. და ეს არის სიტყვები, რომლებიც ჩემმა ძმამ ისურვა, თქვენთვის მეთქვა. და მე გეუბნებით თქვენთვის, რათა ისწავლოთ და ადიდოთ თქვენი ღმერთის სახელი.

5 და ახლა, სიტყვები, რომლებსაც მე წავიკითხავ, არის ის სიტყვები, რომლებიც ესაიამ თქვა მთელი ისრაელის სახლის შესახებ; ამიტომ, ისინი გეხებათ თქვენც, რადგან თქვენ მიეკუთვნებით ისრაელის სახლს. და არის ბევრი რამ, რაზედაც საუბრობდა ესაია, რაც თქვენ გეხებათ, რადგან მიეკუთვნებით ისრაელის სახლს.

6 და ახლა, აი ეს სიტყვები: ასე ამბობს უფალი ღმერთი: აჰა, მე ხელს გავუწვდი წარმართებს და ხალხს აღვუმართავ ჩემს დროშას; და ისინი მოიყვანენ შენს შვილებს ხელში აყვანილთ და შენს ასულებს – მხრებზე შემომსხდრებს.

7 და მეფენი იქნებიან შენი გამზრდელნი და მათი დედოფლები იქნებიან შენი ძიძები; მოიხრიან ქედს შენ წინაშე პირქვე დამხობით და ალოკავენ შენს ფეხთა მტვერს; და შენ შეიცნობ, რომ მე ვარ უფალი და არ შერცხვებიან ისინი, ვინც მე მელოდებიან.

8 და ახლა მე, იაკობს, მსურს გითხრათ ცოტაოდენი ამ სიტყვების შესახებ. რადგან, აჰა, უფალმა მაჩვენა, რომ ისინი, ვინც იყვნენ იერუსალიმში, საიდანაც წამოვედით, დახოცეს და ტყვედ წაიყვანეს.

9 მიუხედავად ამისა, უფალმა მაჩვენა, რომ ისინი კვლავ დაბრუნდებიან. და მან ასევე მაჩვენა, რომ უფალი ღმერთი, ისრაელის წმინდა, გამოეცხადება მათ ხორციელად; და მას შემდეგ, რაც ის მათ გამოეცხადება, ისინი მას გაამათრახებენ და ჯვარს აცვამენ ანგელოზის სიტყვების მიხედვით, რომელმაც ეს მითხრა.

10 და მას შემდეგ, რაც ისინი გაიქვავებენ გულს და გაიფიცხებენ ქედს ისრაელის წმინდის წინააღმდეგ, აჰა, მათ მოევლინებათ ისრაელის წმინდის სასჯელი. და დადგება დღე, როდესაც ისინი იქნებიან ნაცემნი და დატანჯულნი.

11 ამიტომ, მას შემდეგ, რაც ისინი იქნებიან დევნილნი აქეთ-იქით, ასე ამბობს ანგელოზი: მრავალი დაიტანჯება ხორცით და ერთგულთა ლოცვების გამო უფალი არ დაუშვებს მათ დაღუპვას; ისინი იქნებიან გაფანტულნი, ნაცემნი და შეძულებულნი; მიუხედავად ამისა, უფალი მოწყალე იქნება მათ მიმართ, ვინაიდან როდესაც ისინი შეიცნობენ მათ გამომსყიდველს, კვლავ შეიკრიბებიან ერთად თავიანთი მემკვიდრეობის მიწებზე.

12 და კურთხეულნი არიან წარმართნი, ისინი, რომლებზედაც დაწერა წინასწარმეტყველმა; რადგან, აჰა, თუ ისინი მოინანიებენ და არ იბრძოლებენ სიონის წინააღმდეგ და არ შეუერთდებიან იმ დიდ და ბილწ ეკლესიას, ისინი გადარჩებიან; რადგან უფალი ღმერთი შეასრულებს თავის აღთქმებს, რომლებიც დადო შვილებთან; და ამ მიზნით დაწერა წინასწარმეტყველმა ეს ყველაფერი.

13 ამიტომ, ისინი, ვინც იბრძვიან სიონის და უფლის აღთქმული ხალხის წინააღმდეგ, ალოკავენ მათ ფერხთა მტვერს; და უფლის ხალხი არ შერცხვება. რადგან უფლის ხალხნი არიან ისინი, ვინც მას ელოდებიან; რადგან ისინი აქამდე ელოდებიან მესიის მოსვლას.

14 და აჰა, წინასწარმეტყველის სიტყვების მიხედვით, მესია კვლავ ინებებს მათ დაბრუნებას მეორეჯერ; ამიტომ, ის გამოეცხადება მათ, ძალითა და დიადი დიდებულებით, მათი მტრების გასანადგურებლად, როდესაც დადგება ის დღე, როდესაც ისინი ირწმუნებენ მას; და ის არ გაანადგურებს მათ, ვისაც მისი სწამთ.

15 და ისინი, რომლებსაც არ სწამთ მისი, განადგურებულნი იქნებიან ცეცხლითა და ქარიშხლებით, მიწისძვრებითა და სისხლისღვრით და ჭირით და შიმშილით. და ისინი შეიცნობენ, რომ უფალი არის ღმერთი, ისრაელის წმინდა.

16 ნუთუ ნადავლი წაერთმევა ძლევამოსილს ან გამოეხსნებიან კანონიერად დატყვევებულნი?

17 მაგრამ ასე ამბობს უფალი: დატყვევებულნი ჩამოერთმევიან ძლევამოსილს და საშინელისგან გამოეხსნება ნადავლი; რადგან ძლევამოსილი ღმერთი გამოიხსნის თავის აღთქმულ ხალხს. რამეთუ ასე ამბობს უფალი: მე შევებრძოლები მათ, ვინც შენ გებრძვის.

18 და ვაჭმევ მათ, ვინც შენ გავიწროვებს, მათსავე საკუთარ ხორცს და დათვრებიან საკუთარი სისხლით, ვითარცა ტკბილი ღვინით; და ყველა ხორციელს ეცოდინება, რომ მე, უფალი, ვარ შენი მხსნელი და შენი გამომსყიდველი, ძლევამოსილი იაკობისა.