បងប្អូនប្រុស យើងមានកិច្ចការត្រូវធ្វើ
ដោយអែលឌើរ ឌី ថត គ្រីស្តូហ្វឺសិន
នៃកូរ៉ុមនៃពួកសាវកដប់ពីរនាក់
ក្នុងនាមជាបុរសនៃបព្វជិតភាព យើងមានតួនាទីសំខាន់ក្នុងសង្គម គេហដ្ឋាន និង ក្នុងសាសនាចក្រ ។
បងប្អូនប្រុស មានការនិយាយ និង សរសេរជាច្រើនក្នុងឆ្នាំថ្មីៗនេះ អំពីបញ្ហារបស់បុរស និង យុវជន ។ ឧទាហរណ៍មានសៀវភៅមួយចំនួនមានចំណងជើងថា Why There Are No Good Men Left ( ហេតុអ្វីក៏គ្មាននៅសល់បុរសល្អ ) ,, The Demise of Guys ( ការបរាជ័យរបស់បុរស ) ,, The End of Men ( ទីបញ្ចប់នៃបុរស ) ,, Why Boys Fail ( ហេតុអ្វីក្មេងប្រុសបរាជ័យ ) ,, និង Manning Up ។ គួរឲ្យចាប់អារម្មណ៍ថា រឿងស្ទើរតែទាំងអស់និពន្ធឡើងដោយស្ត្រី ។ ក្នុងករណីណាក៏ដោយ ប្រធានបទរួមនៃការវិភាគទាំងនេះ គឺថាសព្វថ្ងៃនេះនៅក្នុងសង្គមជាច្រើន បុរស និង ក្មេងប្រុសជាច្រើន ត្រូវបានទទួលសារបន្ទាបបន្ថោក ហើយធ្វើឲ្យមានជម្លោះរវាងគ្នានឹងគ្នាអំពីតួនាទី និង តម្លៃរបស់គេនៅក្នុងសង្គម ។
អ្នកនិពន្ធអត្ថបទ Manning Up បានរៀបរាប់វាបែបនេះថា ៖ « វាស្ទើរតែជាច្បាប់នៃអារ្យធម៌សាកលថា ខណៈដែលយុវនារីក្លាយជាស្ត្រី ដែលធំពេញវ័យ នោះក្មេងប្រុសត្រូវតែប្រឡងឲ្យជាប់តេស្ដមួយ ។ ពួកគេចាំបាច់ត្រូវបង្ហាញនូវភាពក្លាហាន សមត្ថភាពខាងរាងកាយ ឬ ពូកែជំនាញដ៏ពិសេស ។ គោលដៅ គឺដើម្បីបង្ហាញពីសមត្ថភាពរបស់ពួកគេ ជាអ្នកការពារស្ត្រី និង កុមារ នេះតែងតែជាតួនាទីក្នុងសង្គមដ៏សំខាន់របស់ពួកគេ ។ ទោះជាយ៉ាងណា នៅក្នុងសេដ្ឋកិច្ចជឿនលឿនសព្វថ្ងៃនេះ ស្ត្រីមានការរីកចម្រើន នោះតួនាទីរបស់ស្វាមី និង ឪពុកជាអ្នកផ្គត់ផ្គង់គ្រួសារ ឥឡូវគឺជាជម្រើស ហើយគុណសម្បត្តិដែលបុរសចាំបាច់ត្រូវមានដើម្បីធ្វើតួនាទីរបស់ពួកគេ-- ដូចជាភាពរឹងប៉ឹង ការស៊ូទ្រាំ ភាពក្លាហាន ភាពស្មោះត្រង់ ត្រូវបានហួសសម័យ ព្រមទាំងគួរឲ្យខ្មាស់អៀនខ្លះៗផង » ។ 1
កាលដែលយើងគាំទ្រ ក្នុងការស្ងើចសរសើររបស់ពួកគេ ដើម្បីលើកកម្ពស់ឱកាសសម្រាប់ស្ត្រី នោះមានមនុស្សមួយចំនួនដែលប្រមាថដល់បុរស និង ការបរិច្ចាគរបស់គេ ។ ពួកគេហាក់ដូចជាគិតថាជីវិតគឺជាការប្រណាំងប្រជែងរវាងបុរស និង ស្ត្រី --ដែលម្នាក់ត្រូវតែមានប្រៀបលើម្នាក់ទៀត ហើយឥឡូវនេះ គឺជាវេនរបស់ស្ត្រី ។ មានការប្រកែកមួយចំនួនថា អាជីពគឺអ្វីៗទាំងអស់ ហើយអាពាហ៍ពិពាហ៍ និង កូនចៅ គឺជា ឬ គួរតែជាជម្រើសសុទ្ធសាធ --ហេតុដូច្នេះ ហេតុអ្វីក៏យើងត្រូវការបុរស ? 2 នៅក្នុងខ្សែភាពយន្ដហូលីវូឌ ទូរទស្សន៍ និង រឿងតាមខ្សែកាបជាច្រើន សូម្បីតែក្នុងការផ្សាយពាណិជ្ជកម្ម បុរសត្រូវបានគេបង្ហាញថា ជាមនុស្សគ្មានសមត្ថភាព ពុំចាស់ទុំ ឬ អត្មានិយម ។ វប្បធម៌នៃការដកហូតនូវតួនាទីរបស់បុរសនេះ គឺមានឥទ្ធិពលអន្តរាយ ។
ឧទាហរណ៍ នៅក្នុងសហរដ្ឋអាមេរិក បានរាយការណ៍ថា ៖ « ឥឡូវ ក្មេងស្រីធ្វើបានល្អជាងក្មេងប្រុសនៅគ្រប់កម្រិត តាំងពីថ្នាក់បឋមរហូតដល់បញ្ចប់ការសិក្សានៅវិទ្យាល័យ ។ ឧទាហរណ៍ នៅថ្នាក់ទី 8 មានក្មេងប្រុសតែ 20 ភាគរយ ដែលពូកែក្នុងការសរសេរ ហើយ 24 ភាគរយពូកែអាន ។ ពិន្ទុប្រលងចូលសាកលវិទ្យាល័យរបស់យុវជន សម្រាប់ពេលនេះ ក្នុងឆ្នាំ 2011 គឺទទួលលទ្ធផលអន់ជាងកាលពី 40 ឆ្នាំមុន ។ ស្របតាមស្ថិតិមកពីមជ្ឈមណ្ឌលអប់រំជាតិ (NCES) មានក្មេងប្រុស 30 ភាគរយច្រើនជាងក្មេងស្រីបានឈប់រៀនទាំងនៅវិទ្យាល័យ និង សាកលវិទ្យាល័យ ... ។ វាត្រូវបានទស្សទាយថា ស្ត្រីនឹងទទួលបានបរិញ្ញាបត្រ 60 %, បរិញ្ញាបត្រអនុបណ្ឌិត 63 % និង បញ្ញាបត្របណ្ឌិត 54 % ក្នុងឆ្នាំ 2016 ។ មានក្មេងប្រុសពីរភាគបីនៅក្នុងការអប់រំជាពិសេសក្រៅកម្មវិធី » ។ 3
បុរស និង ស្ត្រីមួយចំនួន បានទទួលសារអវិជ្ជមានពីសង្គម ជាការដោះសារមួយ ដើម្បីចៀសវាងពីការទទួលខុសត្រូវ ហើយពិតជាពុំរីកចម្រើនសោះ ។ នៅក្នុងការសង្កេតការណ៍មួយ ជារឿយៗ មានភាពត្រឹមត្រូវ ដែលសាស្ត្រាចារ្យសាកលវិទ្យាល័យម្នាក់បានមានប្រសាសន៍ថា « យុវជនមកក្នុងថ្នាក់រៀន ដោយមានពាក់មួក Baseball បញ្ច្រាស ហើយ មាន [ ស្លាក ] ដោះសាររបស់ពួកគេ ថា ‹ កណ្តៀរស៊ីលំហាត់ខ្ញុំអស់ហើយ › ។ ឯយុវនារីវិញ កំពុងតែពិនិត្យមើលកាលវិភាគប្រចាំថ្ងៃពួកគេ ហើយព្យាយាមសុំអនុសាសន៍សម្រាប់សាលាច្បាប់វិញ »។ 4 អ្នកមើលខ្សែភាពយន្ដស្ត្រីភេទម្នាក់ បានបង្ហាញទស្សនៈចំអកថា « តើយើងអាចពឹងផ្អែកលើបុរសយ៉ាងណាទៅ បើយើងមានសំណាង ហើយជ្រើសរើសដើម្បីមានដៃគូរ-- គឺគ្រាន់តែជាដៃគូម្នាក់ប៉ុណ្ណោះ ។ មនុស្សម្នាក់ដែលឈរនៅកន្លែងរបស់គាត់ នោះគាត់គោរពជំហររបស់យើងក្នុងកន្លែងយើងផ្ទាល់ដែរ » ។ 5
បងប្អូនប្រុស ពុំអាចមានរឿងដូចនេះក្នុងពួកយើងទេ ។ ក្នុងនាមជាបុរសនៃបព្វជិតភាព យើងមានតួនាទីសំខាន់ក្នុងសង្គម គេហដ្ឋាន និង ក្នុងសាសនាចក្រ ។ ប៉ុន្តែយើងត្រូវតែធ្វើជាបុរសដែលស្ត្រីអាចទុកចិត្ត ដែលកូនៗអាចទុកចិត្ត ហើយដែលព្រះអាចទុកចិត្ត ។ នៅក្នុងសាសនាចក្រ និង នគរព្រះក្នុងជំនាន់ថ្ងៃចុងក្រោយនេះ យើងមិនអាចធ្វើជាក្មេងប្រុស និងបុរស ដែលពុំសកម្មនៅក្នុងការងារទេ ។ យើងមិនអាចធ្វើជាយុវជន ដែលខ្វះការលត់ដំខ្លួន ហើយរស់នៅដើម្បីតែបានកម្សាន្តសប្បាយនោះឡើយ ។ យើងមិនអាចធ្វើជាបុរសពេញវ័យដែលគ្មានគោលដៅក្នុងជីវិតទេ ដែលគ្មានយកចិត្តទុកដាក់អំពីការបង្កើតក្រុមគ្រួសារ ហើយធ្វើការបរិច្ចាគពិតនៅក្នុងពិភពលោកនេះទេ ។ យើងមិនអាចធ្វើជាស្វាមី និង ឪពុកដែលពុំផ្ដល់ការដឹកនាំខាងវិញ្ញាណក្នុងផ្ទះឡើយ ។ យើងមិនអាចធ្វើជាអ្នក ដែលកាន់ និង អនុវត្តបព្វជិតភាពដ៏បរិសុទ្ធ តាមលំដាប់នៃព្រះរាជបុត្រាព្រះ ចំណាយកម្លាំងពួកគេទៅលើរូបអាសគ្រាម ឬ ចំណាយជីវិតពួកគេនៅតាមអ៊ីនធើរណែតឡើយ (ជាការចំអក គឺថា គេធ្វើជារបស់ផង លោកិយ ខណៈដែលពុំធ្វើជាមនុស្សនៅក្នុងលោកិយ ) ។
បងប្អូនប្រុស យើងមានកិច្ចការត្រូវធ្វើ ។
យុវជនទាំងឡាយ អ្នកចាំបាច់ត្រូវរៀនឲ្យពូកែក្នុងសាលារៀន ហើយបន្ដការសិក្សារបស់អ្នកឲ្យខ្ពស់ជាងវិទ្យាល័យ ។ អ្នករាល់គ្នាមួយចំនួន នឹងចង់បន្ដសិក្សានៅសាកលវិទ្យាល័យ និង មានអាជីពក្នុងអាជីវកម្ម កសិកម្ម រដ្ឋាភិបាល ឬ វិជ្ជាជីវៈដទៃទៀត ។ អ្នកមួយចំនួនទៀត នឹងពូកែខាងវិចិត្រសិល្បៈ តន្ត្រី ឬ ការបង្រៀន ។ ឯអ្នកដទៃ ជ្រើសរើសអាជីពជាទាហាន ឬ រៀនខាងជំនួញ ។ អស់ជាច្រើនឆ្នាំកន្លងទៅ ខ្ញុំបានធ្វើកិច្ចការហត្ថកម្មមួយចំនួនក្នុងគម្រោងសាងសង់ និង ជួសជុលផ្ទះរបស់ខ្ញុំឡើងវិញ ហើយខ្ញុំបានសរសើរចំពោះការខិតខំ និង ជំនាញរបស់យុវជនទាំងនេះ ។ មិនថាអ្នកជ្រើសរើសអ្វីនោះទេ វាសំខាន់ដែលអ្នកមានសមត្ថភាព ដើម្បីអ្នកអាចផ្គត់ផ្គង់គ្រួសារ ហើយផ្ដល់ប្រយោជន៍ល្អក្នុងសហគមន៍ និង ប្រទេសរបស់អ្នក ។
ថ្មីៗនេះ ខ្ញុំបានមើលខ្សែវីដេអូមួយ ដែលបង្ហាញពីថ្ងៃមួយក្នុងជីវិតរបស់ក្មេងប្រុសអាយុ 14 ឆ្នាំ នៅប្រទេសឥណ្ឌា ឈ្មោះ អាម៉ា ។ គាត់បានក្រោកឡើងពីព្រលឹម ហើយធ្វើការពីរកន្លែង មុនពេល និង បន្ទាប់ពីចេញពីរៀន រយៈពេលប្រាំមួយថ្ងៃកន្លះក្នុងមួយសប្ដាហ៍ ។ ចំណូលរបស់គាត់ជួយផ្គត់ផ្គង់ផ្នែកសំខាន់មួយនៃជីវិតគ្រួសាររបស់គាត់ ។ គាត់បានប្រញាប់មកផ្ទះដោយជិះកង់កញ្ចាស់របស់គាត់ ពីកន្លែងការងារទីពីរពេលយប់ ហើយព្យាយាមរកពេលពីរបីម៉ោងទៀត ដើម្បីធ្វើលំហាត់ មុននឹងគាត់ចូលគេងនៅលើឥដ្ឋ ចន្លោះបងប្អូនគាត់ដែលកំពុងដេក ប្រហែលជាម៉ោង 11:00 យប់ ។ ទោះជាខ្ញុំពុំដែលធ្លាប់ជួបគាត់ ក៏ខ្ញុំមានមោទនភាពចំពោះគាត់ នូវភាពឧស្សាហ៍ និង ភាពក្លាហានរបស់គាត់ ។ គាត់កំពុងខិតខំអស់ពីសមត្ថភាពដែលគាត់មាន ជាមួយនឹងធនធាន និង ឱកាសមានកម្រិតរបស់គាត់ ហើយគាត់កំពុងតែប្រទានពរដល់គ្រួសារគាត់ ។
បុរសពេញវ័យទាំងឡាយ មានដូចជា-- ឪពុក មនុស្សពេញវ័យនៅលីវ អ្នកដឹកនាំ គ្រូបង្រៀនតាមផ្ទះ-- ចូរធ្វើជាគំរូសក្ដិសម ហើយជួយដល់ក្មេងប្រុសជំនាន់ដែលកំពុងពេញវ័យ ឲ្យប្រែក្លាយជាបុរស ។ សូមបង្រៀនពួកគេនូវជំនាញសង្គម និង ជំនាញដទៃទៀត ៖ របៀបដើម្បីចូលរួមក្នុងការសន្ទនា របៀបដើម្បីស្គាល់ និង ប្រាស្រ័យទាក់ទងអ្នកដទៃ របៀបដើម្បីនិយាយ និងយល់ពីស្ត្រី និង យុវនារី របៀបដើម្បីបម្រើ របៀបដើម្បីច្នៃប្រឌិតយ៉ាងសកម្ម និង រីករាយ របៀបដើម្បីស្វែងរកល្បែងកំសាន្ដដោយពុំមានការញៀន របៀបដើម្បីកែកំហុស និង ធ្វើការជ្រើសរើសឲ្យបានល្អប្រសើរ ។
ហេតុដូច្នេះ ចំពោះអស់អ្នកដែលកំពុងស្ដាប់ នៅកន្លែងណាដែលសារលិខិតនេះអាចឮទៅដល់អ្នក ខ្ញុំសូមនិយាយដូចជាព្រះយេហូវ៉ាមានបន្ទូលទៅកាន់យ៉ូស្វេថា « ចូរឲ្យមានកម្លាំង និង ចិត្តក្លាហានចុះ » (យ៉ូស្វេ 1:6) ។ សូមមានចិត្តក្លាហាន ហើយត្រៀមខ្លួនឲ្យល្អបំផុត តាមដែលអ្នកអាចធ្វើបាន មិនថាស្ថានភាពរបស់អ្នកយ៉ាងណានោះទេ ។ ចូររៀបចំខ្លួនដើម្បីធ្វើជាស្វាមី និង ជាឪពុកល្អ ចូររៀបចំខ្លួនសម្រាប់ធ្វើជាពលរដ្ឋល្អ និង មានប្រយោជន៍ ចូររៀបចំខ្លួនដើម្បីបម្រើព្រះអម្ចាស់ ដែលអ្នកកាន់បព្វជិតភាពទ្រង់ ។ មិនថាអ្នកនៅកន្លែងណាទេ ព្រះវរបិតាសួគ៌អ្នក គិតអំពីអ្នក អ្នកពុំនៅឯកកោឡើយ អ្នកមានបព្វជិតភាព និង អំណោយទាននៃព្រះវិញ្ញាណបរិសុទ្ធ ។
មានកន្លែងជាច្រើនដែលត្រូវការអ្នក កន្លែងដ៏សំខាន់បំផុតមួយ គឺកូរ៉ុមបព្វជិតភាពរបស់អ្នក ។ យើងត្រូវការកូរ៉ុម ដែលផ្ដល់នូវការចិញ្ចឹមបីបាច់ខាងវិញ្ញាណ ដល់សមាជិកនៅថ្ងៃអាទិត្យ ហើយក៏បម្រើផងដែរ ។ យើងត្រូវការអ្នកដឹកនាំកូរ៉ុម ដែលផ្ដោតទៅលើការធ្វើកិច្ចការរបស់ព្រះអម្ចាស់ និង គាំទ្រដល់សមាជិកកូរ៉ុម និង គ្រួសាររបស់គេ ។
ចូរគិតអំពីកិច្ចការអ្នកផ្សពផ្សាយសាសនា ។ យុវជនអើយ ! អ្នកមិនត្រូវចំណាយពេលឥតប្រយោជន៍ទេ ។ អ្នកពុំអាចរង់ចាំដល់អ្នកអាយុ 17 ឬ 18 ឆ្នាំទើបគិតអំពីការរៀបចំខ្លួននោះទេ ។ កូរ៉ុមបព្វជិតភាព អាចជួយដល់សមាជិកពួកគេឲ្យយល់ពីពាក្យសម្បថ និង សេចក្ដីសញ្ញានៃបព្វជិតភាព ហើយត្រៀមខ្លួនជាស្រេចសម្រាប់ការតែងតាំងជាអែលឌើរ ពួកគេអាចជួយពួកគាត់ឲ្យយល់ និង រៀបចំខ្លួនសម្រាប់ពិធីបរិសុទ្ធនៃព្រះវិហារបរិសុទ្ធ ហើយជួយពួកគេត្រៀមខ្លួនជាស្រេចសម្រាប់បេសកកម្មដែលជោគជ័យ ។ កូរ៉ុមបព្វជិតភាពមិលគីស្សាដែក និងសមាគមសង្គ្រោះ អាចជួយឪពុកម្ដាយរៀបចំអ្នកផ្សព្វផ្សាយសាសនា ដែលចេះនៅក្នុងព្រះគម្ពីរមរមន ហើយដែលនឹងទៅក្នុងតំបន់បេសកកម្មដោយមានការប្ដេជ្ញាចិត្តទាំងស្រុង ។ ហើយនៅក្នុងវួដ និង សាខានីមួយៗ កូរ៉ុមដូចគ្នាទាំងនេះ អាចដឹកនាំដោយការសហការដ៏មានប្រសិទ្ធភាពជាមួយនឹងអ្នកផ្សព្វផ្សាយសាសនាពេញម៉ោង ដែលកំពុងបម្រើនៅទីនោះ ។
កិច្ចការដែលទាក់ទង ដែលជាការទទួលខុសត្រូវដ៏សំខាន់មួយនៃបព្វជិតភាព គឺការហៅរបស់ព្រះអង្គសង្គ្រោះ ដែលបានរំឭកដោយប្រធាន ថូម៉ាស អេស. ម៉នសុន ដើម្បីជួយសង្គ្រោះដល់អ្នកទាំងឡាយដែលឃ្លាតឆ្ងាយពីដំណឹងល្អ ឬដែលមានការអាក់អន់ចិត្តដោយមូលហេតុណាមួយ ។ យើងមានជោគជ័យយ៉ាងល្អនៅក្នុងកិច្ចខិតខំនេះ រួមទាំងកិច្ចការដ៏អស្ចារ្យដោយក្រុមយុវជន ។ កូរ៉ុមបព្វជិតភាពអើរ៉ុន នៅវួដអេស្ប៉ាញ រ៉ូ ហ្គ្រានដេ ក្នុងទីក្រុង អាល់ប៊ើឃើរគី នូវ ម៉ិកស៊ីកូ បានប្រឹក្សាជាមួយគ្នាអំពីមនុស្សដែលពួកគេអាចនាំត្រឡប់មកវិញ ហើយពួកគេជាក្រុមបានទៅសួរសុខទុក្ខអ្នកទាំងនោះម្ដងម្នាក់ៗ ។ មានយុវជនម្នាក់និយាយថា « នៅពេលពួកគេមកដល់មាត់ទ្វាររបស់ខ្ញុំ ខ្ញុំដឹងថា វាសំខាន់ » ហើយម្នាក់ទៀត បានជឿថា « ខ្ញុំមានអារម្មណ៍សប្បាយចិត្ត ដែលពិតជាមានមនុស្ស ដែលចង់ឲ្យខ្ញុំទៅព្រះវិហារ វាធ្វើឲ្យខ្ញុំ ចង់ទៅព្រះវិហារឥឡូវនេះ » ។ នៅពេលសមាជិកកូរ៉ុម បានអញ្ជើញយុវជនម្នាក់ឲ្យត្រឡប់មកវិញ នោះពួកគេបានសុំឲ្យគាត់ទៅជាមួយពួកគេពេលសួរសុខទុក្ខបន្ទាប់ទៀត រួចគាត់គ៏យល់ព្រមធ្វើ ។ ពួកគេពុំគ្រាន់តែអញ្ជើញគាត់ឲ្យទៅព្រះវិហារទេ ប៉ុន្តែ ពួកគេបានធ្វើឲ្យគាត់ជាចំណែកមួយនៃកូរ៉ុមភ្លាមៗ ។
ឧបសគ្គមួយទៀត ដែលលើកកម្ពស់ដល់កិច្ចការបព្វជិតភាព គឺកិច្ចការពង្សប្រវត្តិ និង ព្រះវិហារបរិសុទ្ធ ។ សូមរកមើលសំបុត្រគណៈប្រធានទីមួយ ដែលមកដល់ក្នុងពេលខ្លីខាងមុខ ដែលនឹងផ្ដល់នូវកំណែថ្មីនៃការបន្ដការហៅ និង ខ្ពស់ជាងនៃចំណែកដ៏សំខាន់នេះ ក្នុងកិច្ចការដែលយើងត្រូវធ្វើ ។
កូរ៉ុមរបស់យើងក៏បង្កើតភាតរភាពគាំទ្រគ្នាទៅវិញទៅមកផងដែរ ។ ប្រធាន ហ្គរដុន ប៊ី ហ៊ិងគ្លី បានមានប្រសាសន៍ថា ៖ « បងប្អូនប្រុស វាគឺជាថ្ងៃដ៏អស្ចារ្យ -- វានឹងជាថ្ងៃមួយនៃការបំពេញតាមគោលបំណងរបស់ព្រះអម្ចាស់-- នៅពេលកូរ៉ុមបព្វជិតភាពរបស់យើង ក្លាយជាយុថ្កានៃកម្លាំងចំពោះបុរសគ្រប់រូបដែលជារបស់ផងកូរ៉ុមបព្វជិតភាព នៅពេលបុរសម្នាក់ៗ អាចនិយាយដោយត្រឹមត្រូវថា ‹ ខ្ញុំជាសមាជិកម្នាក់នៃកូរ៉ុមបព្វជិតភាព នៃសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ។ ខ្ញុំឈរត្រៀមខ្លួនជាស្រេចដើម្បីជួយដល់បងប្អូនប្រុសខ្ញុំគ្រប់តម្រូវការរបស់ពួកគេ ដូចជាខ្ញុំមានទំនុកចិត្តថា ពួកគេបានឈរត្រៀមខ្លួនជាស្រេចដើម្បីជួយខ្ញុំគ្រប់តម្រូវការខ្ញុំដែរ ... ។ ពេលធ្វើការជាមួយគ្នា យើងអាចឈរដោយគ្មានភាពអៀនខ្មាស់ និង ដោយគ្មានភ័យខ្លាច ទប់ទល់រាល់ខ្យល់របស់មារសត្រូវ ដែលនឹងបក់បោកមកលើយើង មិនថាជាសេដ្ឋកិច្ច សង្គម ឬ ខាងវិញ្ញាណនោះទេ ›» ។ 6
មិនថាយើងខិតខំខ្លាំងប៉ុណ្ណាទេ រឿងជាច្រើនពុំដំណើរការ ដូចជាយើងបានរៀបចំផែនការនោះជានិច្ចនោះទេ ហើយជាពិសេស « ខ្យល់របស់មារសត្រូវ » ដែលមកចូលក្នុងជីវិតរបស់បុរស គឺជាការគ្មានការងារ ។ កូនសៀវភៅសុខុមាលភាពសាសនាចក្រកាលពីមុនបានថ្លែងថា ៖ « បុរសដែលគ្មានការងារ គឺជាកង្វល់ជាពិសេសរបស់សាសនាចក្រ ដោយសារវានឹងដកហូតនូវមរតករបស់គាត់ គាត់ស្ថិតនៅក្នុងការសាកល្បងដូចជាយ៉ូបបានមាន-- សម្រាប់សេចក្ដីសុចរិតរបស់គាត់ ។ នៅពេលភាពមិនអនុគ្រោះ ចេះតែបន្ដបន្លាយពេលទៅជារាប់សប្ដាហ៍ និង រាប់ខែ ហើយរហូតដល់រាប់ឆ្នាំ នោះការឈឺចាប់មានកាន់តែខ្លាំងឡើងៗ ... ។ សាសនាចក្រពុំអាចសង្ឃឹមថា ជួយសង្គ្រោះមនុស្សម្នាក់នៅថ្ងៃអាទិត្យបានទេ បើអំឡុងសប្ដាហ៍យើងមើលឃើញថាគាត់ឆ្លងកាត់នូវការសាកល្បងធ្ងន់ធ្ងរ ហើយគាត់មិនអាចធ្វើអ្វីបានសោះនោះ » ។7
នៅខែមេសា ឆ្នាំ 2009 អតីតទីប្រឹក្សាគណៈប៊ីស្សពជាអធិបតី រីឆាឌ ស៊ី អែជ្ជលី បានប្រាប់រឿងអំពីកូរ៉ុមគំរូមួយ ដែលបានចាត់វិធានការណ៍ជួយដល់បងប្អូនសមាជិកដែលបាត់បង់ការងាររបស់គាត់ថា ៖
« Phil’s Auto ( មេកានិកយាន្ដយន្ដរបស់ ភីល ) នៃ សេនធើរវីល រដ្ឋយូថាហ៍ គឺជាសក្ខីបទមួយអំពីអ្វីដែលថ្នាក់ដឹកនាំបព្វជិតភាព និង កូរ៉ុមមួយ អាចសម្រេចបាន ។ ភីល គឺជាសមាជិកម្នាក់នៃកូរ៉ុមអែលឌើរ ហើយបានធ្វើការជាជាងមេកានិចនៅក្នុងហាងជួសជុលរថយន្តក្នុងស្រុកមួយ ។ ជាអកុសល ហាងជួសជុលដែល ភីល បានធ្វើការជួបប្រទះនឹងបញ្ហាសេដ្ឋកិច្ច ហើយត្រូវបញ្ឈប់ ភីល ពីការងារ ។ គាត់តក់ស្លុតដោយសារព្រឹត្តការណ៍នេះ ។
« ពេលឮថា ភីល បានបាត់បង់ការងារ នោះប៊ីស្សពរបស់គាត់ លីអន អូលសុន និងគណៈប្រធានកូរ៉ុមអែលឌើររបស់គាត់បានពិចារណាប្រកបដោយការអធិស្ឋានរកវិធីដែលពួកគេអាចជួយ ភីល បានរួចផុតពីការសាកល្បងនេះ ។ លើសពីនោះ គាត់គឺជាសមាជិកម្នាក់ក្នុងកូរ៉ូម ជាបងប្អូនប្រុសម្នាក់ ហើយគាត់ត្រូវការជំនួយ ។ ពួកគេបានសន្និដ្ឋានថា ភីល មានជំនាញដើម្បីធ្វើអាជីវកម្មផ្ទាល់ខ្លួនរបស់គាត់ ។ សមាជិកក្នុងកូរ៉ុមម្នាក់ បានផ្ដល់សំណើរថា គាត់មានជង្រុកស្រូវចាស់មួយ ដែលប្រហែលជាអាចប្រើធ្វើជាហាងជួសជុលបាន ។ សមាជិកកូរ៉ុមផ្សេងទៀត អាចជួយប្រមូលរាល់ឧបករណ៍ដែលត្រូវការ និង សម្ភារទាំងឡាយដើម្បីផ្គត់ផ្គង់ដល់ហាងថ្មី ។ ស្ទើរតែមនុស្សគ្រប់គ្នាក្នុងកូរ៉ុមអាចជួយ ដែលយ៉ាងហោចណាស់ជួយសម្អាតជង្រុកស្រូវចាស់នោះ ។
« ពួកគេបានចែកចាយគំនិតរបស់គេជាមួយ ភីល បន្ទាប់មកពួកគេបានចែកចាយផែនការពួកគេជាមួយនឹងសមាជិកក្នុងកូរ៉ុមពួកគេ ។ ជង្រុកស្រូវត្រូវបានសម្អាត និង កែលំអរថ្មី ឧបករណ៍បានប្រមូលមកហើយ ហើយអ្វីៗទាំងអស់បានរៀបចំតាមលំដាប់លំដោយ ។ ហាងជួសជុលរថយន្ដរបស់ ភីល ត្រូវបានធ្វើដោយជោគជ័យ ហើយទីបំផុត បានផ្លាស់ទៅរកកន្លែងល្អប្រសើរ និង អចិន្ត្រៃយ៍មួយ -- អ្វីៗទាំងអស់នេះ ដោយសារតែបងប្អូនក្នុងកូរ៉ុមគាត់ បានផ្ដល់ជំនួយក្នុងគ្រាមានវិបត្តិ » ។ 8
ប្រាកដណាស់ ដូចជាអ្វីដែលព្យាការីបានរំឭកដដែលៗជាច្រើនឆ្នាំកន្លងទៅថា « អ្វីដែលសំខាន់បំផុតនៅក្នុងកិច្ចការរបស់ព្រះអម្ចាស់ ដែលអ្នកធ្លាប់ធ្វើ គឺស្ថិតនៅក្នុងរង្វង់ជញ្ជាំងនៃគេហដ្ឋានរបស់អ្នកផ្ទាល់ » ។ 9 យើងមានអ្វីជាច្រើនត្រូវធ្វើ ដើម្បីពង្រឹងដល់អាពាហ៍ពិពាហ៍នៅក្នុងសង្គម ដែលគេកំពុងគិតថាវាមិនសំខាន់ ហើយបានបដិសេធគោលបំណងរបស់វា ។ យើងមានអ្វីជាច្រើនត្រូវបង្រៀនដល់កូនៗរបស់យើង « ឲ្យអធិស្ឋាន និង ឲ្យដើរដោយទៀងត្រង់ នៅចំពោះព្រះអម្ចាស់ » (គ. និង ស. 68:28 ) ។ កិច្ចការរបស់យើងគឺគ្មានអ្វីក្រៅពីជួយដល់កូនៗរបស់យើងឲ្យមានបទពិសោធន៍នៃការផ្លាស់ប្ដូរដួងចិត្ត ឬ ការប្រែចិត្តជឿដ៏ធំចំពោះព្រះអម្ចាស់ ដែលបាននិយាយយ៉ាងច្បាស់នៅក្នុងព្រះគម្ពីរមរមរននោះទេ ( សូមមើល ម៉ូសាយ 5:1–12 និង អាលម៉ា 26 ) ។ ជាមួយគ្នានឹងសមាគមសង្គ្រោះ កូរ៉ុមបព្វជិតភាពអាចស្ថាបនាឪពុកម្ដាយ និង អាពាហ៍ពិពាហ៍ ហើយកូរ៉ុម អាចផ្ដល់ពរជ័យនៃបព្វជិតភាពដល់គ្រួសារដែលមានឪពុក ឬ ម្ដាយទោល ។
ពិតណាស់ បងប្អូនប្រុស យើងមានកិច្ចការត្រូវធ្វើ ។ អរគុណអ្នកចំពោះការពលិកម្មដែលអ្នកបានធ្វើ និង សេចក្ដីល្អដែលអ្នកអ្នកបានធ្វើ ។ សូមបន្ដធ្វើវា នោះព្រះអម្ចាស់នឹងជួយអ្នក ។ ជួនកាល អ្នកអាចពុំដឹងថាត្រូវធ្វើអ្វី ឬ ត្រូវនិយាយអ្វីនោះទេ-- តែសូមដើរឆ្ពោះទៅមុខ ។ សូមចាប់ផ្ដើមធ្វើសកម្មភាព នោះព្រះអម្ចាស់នឹងធានាថា « ទ្វារដ៏មានផលប្រយោជន៍នឹងត្រូវបានបើកចំហរដល់ [ អ្នក ] » (គ. និង ស. 118: 3 ) ។ សូមចាប់ផ្ដើមនិយាយ ហើយទ្រង់សន្យាថា « អ្នកនឹងមិនត្រូវខ្មាស់នៅចំពោះមនុស្សលោកឡើយ ត្បិតសេចក្ដីដែលអ្នកត្រូវនិយាយ នោះនឹងបានប្រទានដល់អ្នក នៅម៉ោងនោះ គឺនៅវេលានោះឯង » (គ. និង ស. 100: 5--6 ) ។ វាជាការពិតដែលយើងមានភាពពុំល្អឥតខ្ចោះ ហើយជាមនុស្សធម្មតាក្នុងរៀបជាច្រើន ប៉ុន្តែយើងមានលោកចៅហ្វាយឥតខ្ចោះមួយអង្គ ដែលបាននាំឲ្យមានដង្វាយធួនដ៏ឥតខ្ចោះមួយមក ហើយយើងត្រូវបានហៅដោយព្រះគុណ និង បព្វជិតភាពរបស់ទ្រង់ ។ នៅពេលយើងប្រែចិត្ត ហើយសម្អាតព្រលឹងយើង នោះយើងត្រូវបានសន្យាថា យើងនឹងត្រូវបានបង្រៀន ហើយ ប្រទានឲ្យនូវអំណាចមកពីស្ថានខ្ពស់ ( សូមមើល គ. និង ស. 43:16) ។
សាសនាចក្រ និង ពិភពលោក និង ស្ត្រី កំពុងស្រាវជ្រាវរកបុរស បុរសដ៏ពិត ដែលអភិវឌ្ឍសមត្ថភាព និង ទេពកោសល្យ ដែលមានឆន្ទៈធ្វើការ និង ការលះបង់ ដែលជួយអ្នកដទៃឲ្យទទួលបានសុភមង្គល និង សេចក្ដីសង្គ្រោះ ។ ពួកគេកំពុងយំថា « ចូរក្រោកឡើង ឱបុរសនៃព្រះអើយ ! » 10 ព្រះជួយយើងឲ្យធ្វើវា នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។