សេចក្ដីអំណរនៃការប្រោសលោះមរណជន
ដោយអែលឌើរ រីឆាដ ជី ស្កត
នៃកូរ៉ុមនៃពួកសាវកដប់ពីរនាក់
« លោកនឹងដាក់នៅក្នុងចិត្តនៃកូនចៅនូវសេចក្ដីសន្យាដែលបានធ្វើដល់ពួកឪពុក ហើយចិត្តនៃកូនចៅនឹងបានបង្វែរមករកពួកឪពុករបស់ពួកគេវិញ » ។
ព្រះអម្ចាស់បានលាតត្រដាងដល់ព្យាការី យ៉ូសែប ស្ម៊ីធ នូវគោលលទ្ធិដ៏បំផុសគំនិតដែលទាក់ទងនឹងពិធីការបរិសុទ្ធដ៏ពិសិដ្ឋនៃពិធីបុណ្យជ្រមុជទឹក ។ វិវរណៈបានមក នៅពេលព្រះវិហារគ្រីស្ទានផ្សេងទៀតបានបង្រៀនថា សេចក្ដីស្លាប់ពិតជាសម្រេចជោគវាសនានៃព្រលឹងដ៏អស់កល្បជានិច្ចមែន ។ ពួកគេបានបង្រៀនថា មនុស្សដែលបានជ្រមុជទឹកនឹងត្រូវទទួលបានរង្វាន់ជាសេចក្ដីអំណរដ៏មិនចេះចប់ ខណៈដែលអ្នកផ្សេងទៀតទាំងអស់ជួបនឹងទុក្ខវេទនាដ៏អស់កល្បជានិច្ច ដោយគ្មានសេចក្ដីសង្ឃឹមនៃការប្រោសលោះនោះ ។
វិវរណៈរបស់ព្រះអម្ចាស់ថា តាមរយៈអំណាចបព្វជិតភាពដ៏ត្រឹមត្រូវ ពិធីបុណ្យជ្រមុជទឹកអាចសម្ដែងឡើងជួសឲ្យមរណជនដែលទុកសម្រាប់សេចក្ដីយុត្តិធម៌នៃឃ្លារបស់ទ្រង់ថា ៖ « បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ។1 ពិធីបុណ្យជ្រមុជទឹកជំនួស អាចផ្ដល់ពិធីបរិសុទ្ធដ៏សំខាន់នេះដោយក្ដីមេត្តាករុណាដល់មរណជនទាំងអស់ដែលស័ក្ដិសម ដែលមិនបានទទួលបានវាក្នុងជីវិតរមែងស្លាប់ ។
គោលលទ្ធិដ៏រុងរឿងនេះ គឺជាសាក្សីមួយទៀតនៃលក្ខណៈសម្បត្តិដ៏ឥតខ្ចោះនៃដង្វាយធួនរបស់ព្រះយេស៊ូវគ្រីស្ទ ។ ទ្រង់បានធ្វើឲ្យមានសេចក្ដីសង្គ្រោះដល់ព្រលឹងដែលប្រែចិត្តទាំងអស់ ។ ដង្វាយធួនរបស់ទ្រង់ យកឈ្នះលើសេចក្ដីស្លាប់ ហើយទ្រង់អនុញ្ញាតឲ្យមរណជនដែលស័ក្ដិសមទទួលបានពិធីបរិសុទ្ធជំនួសទាំងអស់នៃសេចក្ដីសង្គ្រោះ ។
នៅក្នុងសំបុត្រមួយ ដែលបានសរសេរជាង 150 ឆ្នាំកន្លងទៅ យ៉ូសែប ស្ម៊ីធ បាននិយាយថា ៖ « ពួកបរិសុទ្ធមានឯកសិទ្ធិទទួលបុណ្យជ្រមុជទឹកសម្រាប់ ... សាច់ញាតិរបស់ពួកគេដែលបានស្លាប់ទៅ ... ដែលបានទទួលដំណឹងល្អជាវិញ្ញាណ ... តាមរយៈ ... អ្នកទាំងឡាយដែលបានចាត់ឲ្យមកផ្សព្វផ្សាយដល់ពួកគេ » ។2 ក្រោយមក លោកបានបន្ថែមថា « ពួកបរិសុទ្ធទាំងឡាយដែលប្រហែសមិនបានធ្វើពិធីការនេះជំនួសសាច់ញាតិដែលស្លាប់របស់ពួកគេ ធ្វើឲ្យប្រថុយប្រថានដល់សេចក្ដីសង្គ្រោះផ្ទាល់របស់ពួកគេ » ។3
ព្យាការី អេលីយ៉ា ប្រគល់កូនសោទាំងឡាយសម្រាប់កិច្ចការជំនួសដល់ យ៉ូសែប ស្ម៊ីធ នៅព្រះវិហារបរិសុទ្ធ ក្រុងខឺតឡង់4 ដើម្បីបំពេញសេចក្ដីសន្យារបស់ព្រះអម្ចាស់ថា « លោកនឹងដាក់នៅក្នុងចិត្តនៃកូនចៅនូវសេចក្ដីសន្យាដែលបានធ្វើដល់ពួកឪពុក ហើយចិត្តនៃកូនចៅនឹងបានបង្វែរមករកពួកឪពុករបស់ពួកគេវិញ » ។5
តាមរយៈវិវរណៈបន្ថែមដល់ យ៉ូសែប ស្ម៊ីធ និង ព្យាការីក្រោយមកទៀត មានការយល់ដឹងមួយ និង លក្ខខណ្ឌសម្រាប់កិច្ចការព្រះវិហារបរិសុទ្ធ និង កិច្ចការពង្សប្រវត្តិដែលគាំទ្រកិច្ចការទាំងនោះ ។ ព្យាការីគ្រប់រូប តាំងពីព្យាការី យ៉ូសែប ស្ម៊ីធ បានសង្កត់ធ្ងន់លើតម្រូវការជាបន្ទាន់ដើម្បីផ្ដល់ពិធីបរិសុទ្ធទាំងអស់សម្រាប់ខ្លួនយើង និង បុព្វបុរសយើងដែលបានចែកឋានទៅ ។
កិច្ចការព្រះវិហារបរិសុទ្ធ និង ពង្សប្រវត្តិ គឺជាកិច្ចការមួយដែលបែងចែកជាពីរផ្នែក ។ វាភ្ជាប់រួមគ្នាដូចជាពិធីការបុណ្យជ្រមុជទឹក និង អំណោយទាននៃព្រះវិញ្ញាណបរិសុទ្ធដែរ ។ សមាជិកខ្លះ មិនអាចធ្វើកិច្ចការទាំងពីរបានដោយសារតែសុខភាព ឬ ដោយសារព្រះវិហារបរិសុទ្ធនៅឆ្ងាយ ។
ប្រធាន ហាវើដ ដបុលយូ ហឹនធើរ បានបង្រៀនថា ៖
« យើងត្រូវតែសម្រេចការងារពិធីបរិសុទ្ធបព្វជិតភាពនៅព្រះវិហារបរិសុទ្ធដែលចាំបាច់សម្រាប់ការតម្កើងឡើងរបស់យើងផ្ទាល់ ; បន្ទាប់មកយើងត្រូវធ្វើការងារចាំបាច់សម្រាប់អ្នកដែលមិនមានឱកាសទទួលយកដំណឹងល្អនៅក្នុងជីវិត ។ ការធ្វើកិច្ចការសម្រាប់អ្នកដទៃត្រូវបានសម្រេចតាមជំហានពីរ ៖ ទីមួយ ដោយការស្រាវជ្រាវពង្សប្រវត្តិដើម្បីដឹងថានរណាជាដូនតារបស់យើង ហើយទីពីរ ដោយការធ្វើពិធីបរិសុទ្ធនៅព្រះវិហារបរិសុទ្ធដើម្បីផ្ដល់ឱកាសដូចគ្នាដល់ពួកគាត់ដូចអ្នកនៅរស់ដែរ ។
« សូម្បីយ៉ាងនោះក្ដី មានសមាជិកសាសនាចក្រជាច្រើនដែលមានកម្រិត ក្នុងការទៅព្រះវិហារបរិសុទ្ធ ។ ពួកគេធ្វើអស់ពីលទ្ធភាព តាមដែលអាចធ្វើទៅបាន ។ ពួកគេធ្វើការស្រាវជ្រាវពង្សប្រវត្តិ និង ឲ្យអ្នកផ្សេងធ្វើកិច្ចការពិធីបរិសុទ្ធនៅព្រះវិហារបរិសុទ្ធឲ្យ ។ ម្យ៉ាងវិញទៀត មានសមាជិកខ្លះដែលបានចូលរួមក្នុងកិច្ចការព្រះវិហារបរិសុទ្ធ ប៉ុន្ដែមិនបានធ្វើការស្រាវជ្រាវពង្សប្រវត្តិក្នុងគ្រួសារផ្ទាល់របស់ពួកគេ ។ ទោះបីជាពួកគេធ្វើការបម្រើដ៏ទេវភាពជួយអ្នកដទៃក្ដី ពួកគេបាត់បង់ពរជ័យមួយពេលគេមិនបានរកសាច់ញាតិស្លាប់ផ្ទាល់របស់ពួកគេ ទោះជាពួកគេត្រូវបានណែនាំដ៏ទេវភាពដោយព្យាការីថ្ងៃចុងក្រោយឲ្យធ្វើដូច្នោះក្ដី ... ។
« ខ្ញុំបានដឹងថា អ្នកដែលធ្វើការស្រាវជ្រាវពង្សប្រវត្តិ ហើយបន្ទាប់មកធ្វើកិច្ចការពិធីបរិសុទ្ធនៅព្រះវិហារបរិសុទ្ធសម្រាប់អ្នកមានឈ្មោះដែលបានរកឃើញនោះ នឹងដឹងពីសេចក្ដីអំណរបន្ថែមក្នុងការទទួលបានពរជ័យពាក់កណ្ដាលទាំងពីរ » ។6
ព្រះវរបិតានៅស្ថានសួគ៌សព្វព្រះទ័យឲ្យយើងម្នាក់ៗទទួលបានពរជ័យទាំងពីរផ្នែកនៃកិច្ចការជំនួសដ៏សំខាន់នេះ ។ ទ្រង់បានដឹកនាំអ្នកផ្សេងឲ្យបង្ហាញយើងពីរបៀបដើម្បីធ្វើបាន ។ វាស្ថិតលើអ្នក និង ខ្ញុំទេ ដែលត្រូវទទួលយកពរជ័យទាំងនោះ ។
កិច្ចការអ្វីដែលអ្នកធ្វើនៅក្នុងព្រះវិហារបរិសុទ្ធ គឺជាពេលដែលចំណាយបានល្អ ប៉ុន្ដែការទទួលពិធីបរិសុទ្ធជំនួសសម្រាប់បុព្វបុរសផ្ទាល់របស់អ្នកមួយ នឹងធ្វើឲ្យពេលវេលាក្នុងព្រះវិហារបរិសុទ្ធកាន់តែពិសិដ្ឋ ហើយថែមទាំងទទួលបានពរជ័យដ៏អស្ចារ្យជាងទៀតផង ។ គណៈប្រធានទីមួយបានប្រកាសថា « កាតព្វកិច្ចដ៏សំខាន់បំផុតរបស់យើង គឺត្រូវស្វែងរកបុព្វបុរសផ្ទាល់របស់យើង » ។7
តើអ្នក ដែលជាយុវវ័យ ចង់បានវិធីដ៏ជាក់លាក់មួយដើម្បីលុបបំបាត់ឥទ្ធិពលនៃមារសត្រូវ នៅក្នុងជីវិតរបស់អ្នកទេ ? ការជ្រមុជខ្លួនក្នុងការស្រាវជ្រាវរកបុព្វបុរសរបស់អ្នក រៀបចំឈ្មោះរបស់ពួកគាត់សម្រាប់ពិធិបរិសុទ្ធជំនួសដ៏ពិសិដ្ឋដែលមាននៅក្នុងព្រះវិហារបរិសុទ្ធ ហើយបន្ទាប់មកទៅព្រះវិហារបរិសុទ្ធដើម្បីធ្វើជាអ្នកតំណាងសម្រាប់ពួកគាត់ឲ្យទទួលបានពិធីការបុណ្យជ្រមុជទឹក និង អំណោយទាននៃព្រះវិញ្ញាណបរិសុទ្ធ ។ នៅពេលអ្នកធំឡើង អ្នកនឹងអាចចូលរួមក្នុងការទទួលពិធីបរិសុទ្ធផ្សេងទៀតផងដែរ ។ ខ្ញុំគិតថា គ្មានការការពារពីឥទ្ធិពលនៃមារសត្រូវនៅក្នុងជីវិតរបស់អ្នកណា ដែលអស្ចារ្យជាងនេះទេ ។
នៅក្នុងបេសកកម្ម រ៉ូស្ដូណាដូនុ ប្រទេសរុស្ស៊ី យុវជនម្នាក់ៗត្រូវបានអញ្ជើញឲ្យរៀបចំឈ្មោះចំនួន 2000 ហើយបន្ទាប់មករៀបចំយ៉ាងហោចណាស់ឈ្មោះមួយពីគ្រួសារផ្ទាល់របស់ពួកគេសម្រាប់ពិធីការបរិសុទ្ធនៅព្រះវិហារបរិសុទ្ធ ។ អ្នកទាំងឡាយណាដែលសម្រេចបានគោលដៅនេះ ត្រូវបានអញ្ជើញឲ្យទៅធ្វើដំណើរដ៏វែងមួយទៅព្រះវិហារបរិសុទ្ធ Kyiv ប្រទេសអ៊ុយក្រែនថ្មី ។ យុវជនម្នាក់បានចែកចាយបទពិសោធន៍របស់គាត់ថា ៖ « ខ្ញុំបានចំណាយពេលជាច្រើនលេងហ្គេមកុំព្យូទ័រ ។ នៅពេលខ្ញុំចាប់ផ្ដើមរៀបឈ្មោះ ខ្ញុំគ្មានពេលលេងហ្គេមទៀតទេ ។ ដំបូងខ្ញុំគិតថា ‹ ទេ ! តើវាកើតឡើងដោយរបៀបណា ! › តែនៅពេលគម្រោងនេះចប់ទៅ ខ្ញុំលែងចង់លេងហ្គេមនោះទៀត ។ ... កិច្ចការពង្សប្រវត្តិ គឺជាអ្វីមួយដែលយើងអាចធ្វើនៅលើផែនដីនេះ ហើយវានឹងបន្ដនៅស្ថានសួគ៌ » ។
ពួកបរិសុទ្ធដ៏ស្មោះត្រង់ជាច្រើន បានធ្វើកិច្ចការស្រាវជ្រាវខ្សែស្រឡាយគ្រួសាររបស់គេ ហើយបានប្រើលក្ខណៈពិសេសដែលបានរក្សាទុកក្នុង FamilySearch ដើម្បីធ្វើពិធីបរិសុទ្ធ ដូច្នេះសមាជិកគ្រួសាររបស់ពួកគេផ្ទាល់អាចធ្វើជាអ្នកតំណាងក្នុងពិធីការនោះ ។ គោលបំណងនៃការរក្សាទុកឈ្មោះនេះ គឺដើម្បីទុកពេលវេលាសមរម្យឲ្យបុគ្គលម្នាក់ៗដែលធ្វើពិធីបរិសុទ្ធសម្រាប់បុព្វបុរស និង ខ្សែស្រឡាយគ្រួសារដែលជាប់គ្នាទាំងឡាយ ។ សព្វថ្ងៃនេះ មានឈ្មោះ 12 លាន និង ពិធីបរិសុទ្ធដែលស្របគ្នារាប់លាន ដែលត្រូវបានរក្សាទុក ។ ឈ្មោះជាច្រើនបានដាក់ទុករាប់ឆ្នាំ ។ បុព្វបុរសដែលបានរកឃើញ នឹងអន្ទះសារ ហើយរំភើបយ៉ាងខ្លាំង ពេលឈ្មោះរបស់ពួកគេត្រូវបានអនុញ្ញាតឲ្យមានកិច្ចការពិធីបរិសុទ្ធធ្វើឡើង ។ ទោះយ៉ាងណាក្ដី ពួកគេមិនអាចសប្បាយខ្លាំងទេ ពេលពួកគេត្រូវបន្ដរង់ចាំការធ្វើពិធីបរិសុទ្ធទាំងនោះ ។
យើងសូមលើកទឹកចិត្តអ្នកទាំងអស់គ្នាដែលមានបញ្ជីរក្សាឈ្មោះដ៏ធំមួយដើម្បីចែកចាយ ឲ្យសមាជិកនានានៃគ្រួសារ ឬ វួដ និង ស្ដេកដ៏ធំរបស់អ្នកអាចជួយអ្នកបំពេញកិច្ចការនោះ ។ អ្នកអាចធ្វើវាបាន ដោយចែកក្រដាសដែលមានឈ្មោះអ្នកស្លាប់ ដែលប្រើសម្រាប់ធ្វើពិធីបរិសុទ្ធក្នុងព្រះវិហារបរិសុទ្ធសម្រាប់បុគ្គលនោះ ទៅដល់សមាជិកវួដ និង ស្ដេកដែលចង់ជួយ ឬ ប្រើប្រព័ន្ធកុំព្យូទ័រ FamilySearch ដើម្បីបញ្ចូលឈ្មោះនោះទៅព្រះវិហារបរិសុទ្ធផ្ទាល់តែម្ដង ។ របៀបនេះគឺជាអ្វីដែល Cindy Blevins មកពី Casper រដ្ឋ Wyoming បានប្រើជាយូរមកហើយ ។
បងស្រី Blevins បានជ្រមុជទឹកកាលពីនាងនៅជាយុវវ័យម្នាក់ ហើយជាសមាជិកសាសនាចក្រតែម្នាក់ឯងនៃគ្រួសារនាង ។ នាងបានបញ្ចប់កិច្ចការពង្សប្រវត្តិបានយ៉ាងច្រើន ។ ប៉ុន្ដែមានឈ្មោះច្រើនជាងនេះឆ្ងាយណាស់សម្រាប់នាង និង គ្រួសារផ្ទាល់របស់នាងដើម្បីធ្វើ ។ ជាលទ្ធផល បងស្រី Blevins បានបញ្ជូនឈ្មោះទាំងនោះ ដែលជាញឹកញាប់បានបញ្ចប់ក្នុងរយៈពេលប៉ុន្មានសប្ដាហ៍ប៉ុណ្ណោះទៅព្រះវិហារបរិសុទ្ធ ដែលជាធម្មតានាងរាយការណ៍ទៅព្រះវិហារបរិសុទ្ធមួយដែលជិតផ្ទះនាងបំផុត ។ នាងនិយាយថា នាងចូលចិត្តគិតថា មិត្តភក្ដិ និង អ្នកជិតខាងនៅក្នុងវួដ និង ស្ដេកផ្ទាល់របស់នាងអាចជាអ្នកដែលជួយបំពេញកិច្ចការនោះសម្រាប់បុព្វបុរសរបស់នាង ។ នាងកោតសរសើរចំពោះការជួយរបស់ពួកគេ ។
ភរិយាជាទីស្រឡាញ់របស់ខ្ញុំ Jeanene ចូលចិត្តធ្វើការស្រាវជ្រាវពង្សប្រវត្តិ ។ កាលកូនៗរបស់យើងនៅក្មេង នាង និង មិត្តភក្តិរបស់នាងជួយមើលកូនគ្នាទៅវិញទៅមក ដូច្នេះគាត់អាចមានពេលពីរបីម៉ោងរាល់ពីរបីសប្ដាហ៍ម្ដងដើម្បីធ្វើការស្រាវជ្រាវខ្សែស្រឡាយគ្រួសាររបស់យើង ។ ក្រោយពីកូនពៅយើងបានចេញពីផ្ទះ គាត់បានកត់ត្រានៅក្នុងសៀវភៅកំណត់ហេតុផ្ទាល់របស់គាត់ថា ៖ « ខ្ញុំទើបតែសម្រេចចិត្ត ហើយខ្ញុំចង់ក្រោកឈរ ហើយស្រែកដោយអំណរពីវា ។ បន្ទប់គេងចាស់របស់ Mike បានក្លាយជាបន្ទប់ធ្វើការពង្សប្រវត្តិរបស់ខ្ញុំ ។ វាបំពាក់គ្រឿងល្អៗដើម្បីរៀបចំកំណត់ត្រាពង្សប្រវត្តិ ហើយធ្វើការនោះ ។ ឥឡូវនេះ ជីវិតរបស់ខ្ញុំផ្ដោតលើការស្រាវជ្រាវពង្សប្រវត្តិដ៏សំខាន់ និង ការបញ្ជូនឈ្មោះនោះទៅព្រះវិហារបរិសុទ្ធ ។ ខ្ញុំពិតជារំភើប និង អន្ទះសារណាស់ដើម្បីបន្ដទៀត » ។8
កំណត់ហេតុដដែលនោះនៃកន្លែងផ្សេងទៀតសរសេរថា ៖ « ... អព្ភូតហេតុសម្រាប់ខ្ញុំបានកើតឡើង នៅក្នុងការិយាល័យពង្សប្រវត្តិរបស់ Mel Olsen ដែលបានបង្ហាញដល់ខ្ញុំនូវក្រដាសមួយនៃតារាងពង្សប្រវត្តិដែលស្គាល់ទាំងអស់របស់ខ្ញុំ ដែលយកចេញពីបច្ចុប្បន្នភាពក្នុង កំណត់ត្រាកុំព្យូទ័រ Ancestral Fileដែលបានផ្ញើទៅសង្គមពង្សប្រវត្តិមួយ ។ តារាងនោះ ភាគច្រើនចេញពីកំណត់ត្រាដែលហៅថា កម្មវិធីពង្សប្រវត្តិបួនជំនាន់របស់សាសនាចក្រ ដែលមានជាច្រើនឆ្នាំកន្លងទៅហើយ ។ ខ្ញុំបានមានគំនិតជាច្រើននៃកិច្ចការដ៏ធំដែលខ្ញុំត្រូវធ្វើ ដើម្បីប្រមូលកំណត់ត្រាស្រាវជ្រាវរបស់បុព្វបុរសរបស់ខ្ញុំទាំងអស់ពីរចនាសម្ព័ន្ធគ្រួសារដើម្បីដាក់វាទាំងអស់នៅក្នុងកុំព្យូទ័រសម្រាប់ការចែក Ancestral File តាមកុំព្យូទ័រដ៏ធំជាលើកដំបូង ។ ហើយទីនោះ វាទាំងអស់គឺស្អាត រៀបចំបានល្អ ហើយបោះពុម្ពចេញ និង ដាក់លើតុពីមុខខ្ញុំ ។ ខ្ញុំពិតជារំភើបណាស់ ហើយមានអំណរ ដែលធ្វើឲ្យខ្ញុំអង្គុយទីនោះរំភើប ហើយបន្ទាប់មកចាប់ផ្ដើមយំ ដោយសារក្ដីសប្បាយ ... ។ សម្រាប់បុគ្គលម្នាក់ដែលបានស្រាវជ្រាវមិនឈប់ឈរ យ៉ាងព្យាយាមរយៈពេលសាមសិបឆ្នាំ ដោយដាក់កំណត់ត្រាទាំងអស់នេះទៅក្នុងកុំព្យូទ័រគឺពិតជាការរីករាយខ្លាំងណាស់ ។ ហើយនៅពេលខ្ញុំគិតពីមនុស្សរាប់រយពាន់នាក់ ដែលឥឡូវនេះ ឬ ឆាប់ៗនេះនឹងត្រូវដាក់ក្នុងកុំព្យូទ័រមានចំនួនក្រុមដ៏ច្រើន និង ឌីសស្រាវជ្រាវឯកជន ។ ... ខ្ញុំពិតជារំភើប ។ វាពិតជាកិច្ចការរបស់ព្រះអម្ចាស់មែន ហើយទ្រង់កំពុងដឹកនាំកិច្ចការនេះ » ។9
ខ្ញុំមានបទពិសោធន៍គ្រប់គ្រាន់នៃកិច្ចការដ៏វិសេសនេះដើម្បីដឹងថា កូនសោដែលត្រូវបាន អេលីយ៉ា ស្ដារឡើងវិញដល់ យ៉ូសែប ស្ម៊ីធនោះ ធ្វើឲ្យចំណងដួងចិត្តរបស់យើងចងភ្ជាប់គ្នា ជាមួយនឹងបុព្វបុរសរបស់យើងដែលកំពុងរង់ចាំជំនួយពីយើង ។ តាមរយៈការខិតខំរបស់យើងនៅក្នុងព្រះវិហារដ៏បរិសុទ្ធនៅលើផែនដីនេះ ដោយប្រើប្រាស់សិទ្ធិអំណាចដែលតែងតាំងដោយព្រះអង្គសង្រ្គោះ នោះបុព្វបុរសរបស់យើងនឹងទទួលបានពិធីបរិសុទ្ធសង្គ្រោះដែលអនុញ្ញាតឲ្យពួកគេរីករាយនឹងសុភមង្គលដ៏អស់កល្បជានិច្ច ។
កាលពីអតីតកាល ដោយបានជម្រុញដោយការជឿស៊ប់ខ្លាំងនៃការញែកចេញនៃកិច្ចការនេះ បុគ្គលគ្រប់រូបបានប្រឈមមុខដោយស្មោះត្រង់នឹងឧបសគ្គមួយដែលមើលទៅដូចជាកំពុងព្យាយាមច្រូតកាត់ផលទាំងអស់នៅក្នុងរដ្ឋ Nebraska ដោយខ្លួនអ្នកផ្ទាល់ ។ ឥឡូវនេះ ម៉ាស៊ីនច្រូតកាត់ដ៏ខ្លាំងជាច្រើន កំពុងធ្វើការ ។ ដោយរួមគ្នា យើងអាចនឹងសម្រេចបានកិច្ចការដែលតម្រូវឲ្យយើងធ្វើបាន ។
ខ្ញុំសូមថ្លែងទីបន្ទាល់ថា ព្រះវិញ្ញាណរបស់អេលីយ៉ាកំពុងមានឥទ្ធិពលលើកូនចៅព្រះវរបិតាជាច្រើនទូទាំងពិភពលោក ដែលបណ្ដាលឲ្យកិច្ចការសម្រាប់អ្នកស្លាប់លឿនទៅមុខក្នុងសន្ទុះមួយដ៏ខ្លាំងក្លា ។
ប៉ុន្ដែ ចុះអ្នកវិញ ? តើអ្នកមានអធិស្ឋានអំពីកិច្ចការរបស់បុព្វបុរសផ្ទាល់របស់អ្នកទេ ? សូមដាក់រឿងទាំងឡាយ ដែលមិនសូវមានប្រយោជន៍នៅក្នុងជីវិតអ្នកមួយឡែកសិន ។ សូមសម្រេចធ្វើអ្វីមួយដែលនឹងមានលទ្ធផលអស់កល្បជានិច្ច ។ ប្រហែលអ្នកត្រូវបានបំផុសគំនិតឲ្យស្វែងរកបុព្វបុរសទាំងឡាយ ប៉ុន្ដែអាចមានអារម្មណ៍ថា អ្នកមិនមែនជាអ្នកជំនាញខាងពង្សប្រវតិ្តម្នាក់ទេ ។ តើអ្នកអាចឃើញថា អ្នកមិនចាំបាច់ជាអ្នកជំនាញនោះទេ ? កិច្ចការនេះ ចាប់ផ្ដើមក្ដីស្រឡាញ់ និង បំណងប្រាថ្នាដ៏ស្មោះត្រង់មួយដើម្បីជួយដល់មរណជនទាំងឡាយដែលមិនអាចជួយខ្លួនគេបាន ។ សូមរៀនដោយការសង្កេត ។ នឹងមាននរណាម្នាក់ក្បែរអ្នក ដែលអាចជួយអ្នកឲ្យទទួលបានជោគជ័យ ។
កិច្ចការនេះ គឺជាកិច្ចការខាងវិញ្ញាណ ជាការខិតខំដ៏មហិមាមួយនៃការសហការពីមនុស្សទាំងសងខាងនៃវាំងនន ដែលជំនួយនឹងត្រូវបានផ្ដល់ពីទាំងពីរទិស ។ មិនថាអ្នកនៅទីណាក្នុងពិភពលោកនេះទេ ដោយការអធិស្ឋាន សេចក្ដីជំនឿ ការតាំងចិត្ត ការព្យាយាម និង ពលិកម្មខ្លះ អ្នកអាចផ្ដល់ការរួមចំណែកមួយដ៏ខ្លាំងក្លា ។ សូមចាប់ផ្ដើមឥឡូវ ។ ខ្ញុំសូមសន្យានឹងអ្នកថា ព្រះអម្ចាស់នឹងជួយអ្នកឲ្យរកឃើញផ្លូវមួយ ។ ហើយវានឹងធ្វើឲ្យអ្នកមានអារម្មណ៍ថាអស្ចារ្យ ។ នៅក្នុងព្រះនាមនៃព្រះយស៊ូវគ្រីស្ទ ។ អាម៉ែន ។