សេចក្តីអំណរនៃបព្វជិតភាព

ដោយប្រធាន ឌៀថើរ អេស្វ អុជដូហ្វ

ទីប្រឹក្សាទីពីរនៅក្នុងគណៈប្រធានទីមួយ

ចូរយើងឱបក្រសោប ហើយយល់នូវភាពអស្ចារ្យ និង ឯកសិទ្ធិនៃបព្វជិតភាព ។ ចូរយើងទទួលយក និង ស្រឡាញ់ការទទួលខុសត្រូវ ដែលយើងត្រូវបានសុំឲ្យបំពេញ ។

សេចក្តីអំណរនៃការបើកយន្តហោះ

ជាច្រើនឆ្នាំកន្លងទៅ មិត្តអ្នកបើកយន្ដហោះមួយចំនួន និង ខ្ញុំបានសម្រេចចិត្តបំពេញសុបិនពីកុមារភាព ក្នុងការស្ដារឡើងវិញនូវយន្ដហោះចាស់មួយ ។ យើងបានទិញជាមួយគ្នានូវយន្ដហោះ Piper Cub ចាស់ៗ ឆ្នាំ 1983 ហើយបានចាប់ផ្ដើមស្ដារវាឲ្យមកទម្រង់ដើមវាវិញ ។ គម្រោងនោះ គឺជាកិច្ចការជាទីគាប់ចិត្តរបស់យើង ។ វាមានអត្ថន័យពិសេសសម្រាប់ខ្ញុំ ដោយសារខ្ញុំបានរៀនបើកនៅក្នុងយន្ដហោះស្រដៀងគ្នា នៅពេលខ្ញុំជាយុជនវ័យក្មេង ។

យន្ដហោះនេះ ត្រូវបានបង្កើតឡើងដំបូង មានរយៈពេលតែ 35 ឆ្នាំ បន្ទាប់ពីបងប្អូនប្រុស រ៉ាយ បានធ្វើការហោះហើរដំបូងរបស់ពួកគេដ៏ល្បីល្បាញ ។ គ្រាន់តែគិតអំពីរឿងនោះ វាធ្វើឲ្យខ្ញុំមានអារម្មណ៍ចាស់ណាស់ ។

ម៉ាស៊ីន ពុំមានកន្លែងបញ្ឆេះអេឡិចត្រិចទេ ខណៈដែលអ្នកត្រូវបញ្ឆេះម៉ាស៊ីនមកពីកាប៊ីន យន្ដហោះ នរណាម្នាក់នៅលើដីនឹងចាប់កាន់ស្លាបកង្ហារ ហើយក្រវាត់វាយ៉ាងខ្លាំង រហូតដល់ម៉ាស៊ីននឹងឆេះដោយខ្លួនឯង ។ ការបញ្ឆេះម៉ាស៊ីននីមួយៗ គឺជាគ្រាដ៏រំភើប និង ក្លាហាន ។

ពេលយន្ដហោះឡើងផុតអាកាស វាប្រែជាយន្ដហោះ Piper Cub ដែលពុំមែនជាយន្ដហោះល្បឿនលឿនទេ ។ តាមពិត នៅពេលមានខ្យល់បក់ខ្លាំងមកចំយន្ដហោះ វាហាក់ដូចជាយើងពុំរំកិលសោះ ។ ខ្ញុំចាំអំពីការបើកយន្តហោះជាមួយគ្នានឹងកូនប្រុសពេញវ័យរបស់ខ្ញុំ ហ្គីដូ នៅលើអូតូបាន ប្រទេសអាល្លឺម៉ង់ ហើយប្រាកដណាស់ ឡានដែលបើកនៅខាងក្រោមយើង បើកលឿនជាង ។

ប៉ុន្តែខ្ញុំស្រឡាញ់យន្ដហោះតូចនេះណាស់ ! វាគឺជារបៀបដ៏ឥតខ្ចោះ ដើម្បីមានបទពិសោធន៍ការហោះហើរដ៏ល្អអស្ចារ្យ ។ អ្នកអាចស្ដាប់ឮ ទទួលអារម្មណ៍ ហិតក្លិន ភ្លក់រសជាតិ ហើយមើលឃើញអ្វីៗដែលហោះហើរនៅជុំវិញ ។ បងប្អូនប្រុស រ៉ាយ បានបង្ហាញតាមរបៀបនេះថា ៖ « គ្មាន [ អ្វី ] ដែលស្មើនឹងការរីករាយរបស់អាកាសយានិក ពេលបើកយន្តហោះនៅលើអាកាសដោយស្លាបពណ៌សដ៏ធំនោះទេ » ។ ¹

ផ្ទុយទៅវិញ នៅដើមឆ្នាំនេះ ខ្ញុំមានឯកសិទ្ធិដើម្បីបើកនៅក្នុងយន្ដហោះចម្បាំង លេខ F-18 ដ៏ទំនើបមួយ ជាមួយនឹងការហោះហើរបង្ហាញរបស់ក្រុមនាវិកសហរដ្ឋ ជាក្រុម Blue Angels ដ៏ល្បីលើពិភពលោក ។ វាហាក់ដូចជាការបើកយន្តហោះពីលើ និង បើកយន្តហោះតាមផ្លូវនៃការចងចាំ ដោយសារកាលពី 50 ឆ្នាំមុន ស្ទើរតែមកដល់ថ្ងៃនេះ ខ្ញុំបានបញ្ចប់ការហ្វឹកហ្វឺន ក្លាយជាអ្នកបើកយន្ដហោះចម្បាំង ។

ប្រាកដណាស់ បទពិសោធន៍ការជិះ F-18 គឺជាភាពខុសប្លែកទាំងស្រុងពីការបើកយន្តហោះក្នុងយន្ដហោះ Piper Cub ។ វាបង្ហាញខ្ញុំនូវថាមពលនៃការបើកយន្តហោះកាន់តែអស្ចារ្យ ។ វាដូចជាការអនុវត្តន៍ច្បាប់នៃឌីណាមិកអាកាសដែលមាន នៅក្នុងរបៀបកាន់តែឥតខ្ចោះ ។ ទោះជាយ៉ាងណា ការហោះហើរជាមួយ Blue Angels ក៏បានរំឭកខ្ញុំភ្លាមផងដែរថា ការធ្វើជាអ្នកបើកយន្ដហោះចម្បាំង គឺសក្ដិសមសម្រាប់យុវជន ។ ដកស្រង់ពាក្យរបស់បងប្អូនប្រុស រ៉ាយ ថ្លែងម្ដងទៀតថា « លើសពីអ្វីៗផ្សេងទៀត អារម្មណ៍ [ នៃការបើកយន្តហោះ ] គឺជាភាពសុខសាន្ដដ៏ឥតខ្ចោះមួយ ដែលលាយឡំនឹងការរំភើបចិត្ត ដែលទាញរំញោចគ្រប់ប្រព័ន្ធប្រសាទយ៉ាងខ្លាំងបំផុត » ។ ² បន្ថែមពីលើនោះ ការបើកយន្តហោះ Blue Angels ផ្ដល់ជារបៀបខុសគ្នាទាំងស្រុងមួយពីការមាន « ពួកទេវតា » នៅព័ទ្ធជុំវិញអ្នក ដើម្បីទ្រអ្នកឡើង ។

បើអ្នកសួរខ្ញុំថាបទពិសោធន៍នៃការបើកយន្តហោះទាំងពីរនេះ មួយណាដែលខ្ញុំចូលចិត្តជាង នោះខ្ញុំមិនប្រាកដថា ខ្ញុំអាចប្រាប់ដល់អ្នកបានទេ ។ ក្នុងរបៀបជាក់ស្ដែងមួយចំនួន និយាយយ៉ាងហោចណាស់ថា វាមានភាពខុសគ្នាខ្លាំងណាស់ ។ ហើយបើម្យ៉ាងទៀត វាក៏ដូចគ្នាណាស់ដែរ ។

ទាំងយន្ដហោះ Piper Cub និងយន្ដហោះ F-18 ខ្ញុំមានអារម្មណ៍ថា រំភើប ស្រស់ស្អាត និង ពេញចិត្តបើក ។ នៅក្នុងយន្ដហោះទាំងពីរនេះ ខ្ញុំអាចយល់ពីអត្ថន័យនៃកំណាព្យដែលថា « [ រអិលចេញ ] ពីទំនាញផែនដី ហើយ [ រាំ ] នៅលើមេឃដោយសំណើចស្លាបពណ៌ទឹកប្រាក់ » ។ ³

បព្វជិតភាពដូចគ្នានៅគ្រប់ទីកន្លែង

ឥឡូវ អ្នកអាចនឹងសួរថា តើបទពិសោធន៍ការបើកយន្តហោះខុសគ្នាទាំងស្រុង ក្នុងយន្ដហោះទាំងពីរនេះ មានទាក់ទងអ្វីនឹងការប្រជុំយើងថ្ងៃនេះ ឬ ទាក់ទងអ្វីនឹងបព្វជិតភាព ដែលយើងមានឯកសិទ្ធិកាន់ ឬ ទាក់ទងអ្វីនឹងការបម្រើបព្វជិតភាព ដែលយើងទាំងអស់គ្នាស្រឡាញ់យ៉ាងខ្លាំងនោះ ?

បងប្អូនប្រុស តើវាមិនពិតទេឬអី ដែលបទពិសោធន៍នៃការបម្រើក្នុងបព្វជិតភាពរបស់យើងម្នាក់ អាចនឹងមានភាពខុសគ្នាខ្លាំង ? យើងអាចនិយាយថា អ្នករាល់គ្នាមួយចំនួនកំពុងបើកយន្ដហោះ F-18 ខណៈដែលអ្នកដទៃកំពុងតែបើកយន្ដហោះ Piper Cubs ។ អ្នកខ្លះរស់នៅក្នុងវួដ និង ស្ដេក ដែលមានតំណែងទាំងអស់ ចាប់តាំងពីជំនួយការ រហូតដល់អ្នកដឹកនាំក្រុមសង្ឃជាន់ខ្ពស់ ទៅដល់លេខាកូរ៉ុមឌីកុន ត្រូវបានបំពេញដោយអ្នកកាន់បព្វជិតភាពសកម្មម្នាក់ ។ អ្នកមានឯកសិទ្ធិដើម្បីចូលរួមនៅក្នុងអង្គការវួដ ដែលមានមនុស្សគ្រប់គ្រាន់ដើម្បីបំពេញការហៅទាំងអស់ ។

អ្នករាល់គ្នាខ្លះទៀត រស់នៅក្នុងតំបន់ជាច្រើននៃពិភពលោក ដែលមានតែសមាជិក និង អ្នកកាន់បព្វជិតភាពក្នុងសាសនាចក្រមួយចំនួនតូចប៉ុណ្ណោះ ។ អ្នកអាចមានអារម្មណ៍ថា ឯកកោ ហើយរែកបន្ទុកដែលមានទម្ងន់នៃតម្រូវការដែលត្រូវធ្វើទាំងអស់ ។ សម្រាប់អ្នក វាអាចនឹងចំណាយពេលចូលរួមផ្ទាល់ខ្លួនយ៉ាងច្រើន ដើម្បីធ្វើឲ្យម៉ាស៊ីនការបម្រើបព្វជិតភាពដំណើរការ ។ ពេលខ្លះ វាហាក់ដូចជា សាខា ឬ វួដរបស់អ្នក ពុំរីកចម្រើនទៅមុខសោះ ។

ទោះជាយ៉ាងណា មិនថាអ្នកមានការទទួលខុសត្រូវអ្វី ឬ ស្ថិតក្នុងស្ថានភាពអ្វីទេ អ្នក និង ខ្ញុំដឹងថា តែងតែមានសេចក្តីអំណរជាពិសេស កើតមានមកពីការបម្រើបព្វជិតភាពដោយការលះបង់ ។

ខ្ញុំតែងតែចូលចិត្តការបើកយន្តហោះ ទោះជានៅក្នុងយន្ដហោះ Piper Cub, យន្ដហោះ F-18, ឬយន្ដហោះដទៃផ្សេងទៀត ។ ខណៈជិះនៅក្នុងយន្ដហោះ Piper Cub ខ្ញុំមិនរអ៊ូរទាំអំពីល្បឿនមិនលឿនរបស់វាទេ ខណៈដែលជិះយន្ដហោះ F-18 ខ្ញុំពុំរអ៊ូរទាំអំពីកម្លាំងទាញនៃការធ្វើសមយុទ្ធលើអាកាសយ៉ាងព្រឺព្រួច ដែលធ្វើឲ្យខ្ញុំមានអារម្មណ៍មិនស្រួល ដោយសារតែរូបកាយចាស់ទ្រុឌទ្រោមរបស់ខ្ញុំទេ ។

បាទ វាតែងតែមានអ្វីមួយមិនល្អនៅគ្រប់ស្ថានភាព ។ បាទ វាងាយស្រួលដើម្បីរករឿងរអ៊ូរទាំ ។

ប៉ុន្តែបងប្អូនប្រុស យើងគឺជាអ្នកកាន់បព្វជិតភាពបរិសុទ្ធ តាមលំដាប់នៃព្រះរាជបុត្រានៃព្រះ ! យើងម្នាក់ៗមានដៃដាក់លើក្បាលរបស់យើង ហើយយើងបានទទួលបព្វជិតភាពនៃព្រះ ។ យើងត្រូវបានប្រគល់សិទ្ធិអំណាច និង ការទទួលខុសត្រូវ ដើម្បីធ្វើកិច្ចការក្នុងព្រះនាមរបស់ទ្រង់ ក្នុងនាមជាអ្នកបម្រើទ្រង់នៅលើផែនដី ។ ទោះជានៅក្នុងវួដធំ ឬ សាខាតូចមួយក្ដី យើងត្រូវបានហៅឲ្យបម្រើ ប្រសិទ្ធពរ និង ធ្វើកិច្ចការគ្រប់យ៉ាង សម្រាប់សេចក្ដីល្អនៃមនុស្សទាំងអស់ ហើយអ្វីៗគ្រប់យ៉ាងត្រូវបានប្រគល់ឲ្យយើងមើលថែ ។ តើមានអ្វី ដែលរំភើបជាងនេះទៀត ?

ចូរយើងយល់ និង អរគុណ ហើយមានអារម្មណ៍អំណរក្នុងការបម្រើក្នុងបព្វជិតភាព ។

សេចក្ដីអំណរនៃបព្វជិតភាព

ការចូលចិត្តការហោះហើររបស់ខ្ញុំ មានឥទ្ធិពលលើទិសដៅនៃជីវិតរបស់ខ្ញុំទាំងមូល ។ ប៉ុន្តែទោះជាបទពិសោធន៍របស់ខ្ញុំមានភាពខ្លាំងក្លា និង អស្ចារ្យនៅក្នុងតួនាទីជាអ្នកបើកយន្ដហោះ ក៏បទពិសោធន៍ខ្ញុំជាសមាជិកនៃសាសនាចក្រនេះ មានភាពជ្រាលជ្រៅ ប្រកបដោយអំណរ និង ខ្លាំងក្លាជាងនោះទៅទៀត ។ នៅពេលខ្ញុំបានដាក់ខ្លួនខ្ញុំនៅក្នុងការបម្រើក្នុងសាសនាចក្រ ខ្ញុំទទួលអារម្មណ៍ព្រះចេស្ដាដ៏មហិមារបស់ព្រះ ក៏ដូចជាសេចក្តីមេត្តាករុណាដ៏ទន់ភ្លន់របស់ទ្រង់ផងដែរ ។

ក្នុងនាមជាអ្នកបើកយន្ដហោះ ខ្ញុំបានទៅប៉ះនឹងមេឃ ។ ក្នុងនាមជាសមាជិកម្នាក់ក្នុងសាសនាចក្រ ខ្ញុំទទួលអារម្មណ៍ការឱបក្រសោបពីស្ថានសួគ៌ ។

ជួនកាល ខ្ញុំនឹកដល់ការអង្គុយនៅក្នុងកាប៊ីនយន្ដហោះ ។ ប៉ុន្តែការបម្រើជាមួយនឹងបងប្អូនប្រុស និង បងប្អូនស្រីរបស់ខ្ញុំ ក្នុងសាសនាចក្រ បានបំពេញដោយងាយ ។ ការអាចទទួលអារម្មណ៍សុខសាន្ដ និង សេចក្តីអំណរដ៏បំផុសគំនិត ដែលកើតឡើងមកពីការធ្វើជាចំណែកតូចមួយនៃបុព្វហេតុ និង កិច្ចការដ៏អស្ចារ្យនេះ ខ្ញុំនឹងមិនចង់នឹកអ្វីទាំងអស់ក្នុងលោកិយនេះ ។

ថ្ងៃនេះ យើងបានជុំគ្នាជាក្រុមបព្វជិតភាពដ៏ធំ ។ វាគឺជាសេចក្តីអំណរដ៏ពិសិដ្ឋ និង ឯកសិទ្ធិរបស់យើងដើម្បីបម្រើព្រះអម្ចាស់ និង បងប្អូនរបស់យើង ដើម្បីប្ដេជ្ញាចិត្តឲ្យល្អបំផុតក្នុងខ្លួនយើងក្នុងបុព្វហេតុថ្លៃថ្នូរក្នុងការជួយដល់អ្នកដទៃ និង ការស្ថាបនានគរព្រះ ។

យើងដឹង និង យល់ថា បព្វជិតភាព គឺជាព្រះចេស្ដា និង សិទ្ធិអំណាចដ៏អស់កល្បជានិច្ចនៃព្រះ ។ យើងអាចនិយាយដោយងាយនូវនិយមន័យនេះមកពីការចងចាំ ។ ទោះជាយ៉ាងណាក៏ដោយ តើយើងពិតជាយល់ពីសារៈសំខាន់នៃអ្វីដែលយើងកំពុងតែនិយាយឬទេ ? ខ្ញុំសូមនិយាយឡើងវិញថា ៖ បព្វជិតភាព គឺជាព្រះចេស្ដា និង សិទ្ធិអំណាចដ៏អស់កល្បជានិច្ចនៃព្រះ ។

ចូរគិតអំពីវា ។ តាមរយៈបព្វជិតភាព ព្រះបានបង្កើត និង គ្រប់គ្រងស្ថានសួគ៌ និង ផែនដី ។

តាមរយៈអំណាចនេះ ទ្រង់ប្រោសលោះ និង លើកដំកើងកូនចៅរបស់ទ្រង់ « នាំមកនូវ អមតភាព និង ជីវិតដ៏នៅអស់កល្បជានិច្ចមកដល់មនុស្ស » ។ ⁴

ដូចជាអ្វីដែលព្យាការីយ៉ូសែបស្ម៊ីធ បានពន្យល់ថា បព្វជិតភាព គឺជា « បណ្តាញ ដែលព្រះ ដ៏មានមហិទ្ធិឫទ្ធិបានចាប់ផ្តើមបើកសម្តែងសិរីល្អរបស់ទ្រង់ នៅគ្រានៃការបង្កបង្កើតផែនដីនេះពីដំបូង ហើយដែលទ្រង់បានបន្តបើកសម្តែងព្រះអង្គទ្រង់ទៅដល់កូនចៅមនុស្សរហូតដល់ពេលបច្ចុប្បន្ននេះ ហើយតាមរយៈទ្រង់ ទ្រង់នឹងធ្វើឲ្យស្គាល់ពីគោលបំណងរបស់ទ្រង់រហូតដល់ទីបញ្ចប់ » ។ ⁵

ព្រះបិតាដ៏មានគ្រប់ព្រះចេស្ដា នៅស្ថានសួគ៌របស់យើង បានប្រគល់សិទ្ធិអំណាចបព្វជិតភាពដល់យើង-- ជាមនុស្សរមែងស្លាប់ ដែលតាមនិយមន័យ ជាមនុស្សដែលមានកំហុស និង មិនល្អឥតខ្ចោះ ។ ទ្រង់បានប្រទានដល់យើងនូវសិទ្ធិអំណាចដើម្បីធ្វើកិច្ចការក្នុងនាមទ្រង់ សម្រាប់សេចក្ដីសង្គ្រោះនៃកូនចៅរបស់ទ្រង់ ។ ដោយអំណាចដ៏អស្ចារ្យនេះ យើងត្រូវបានអនុញ្ញាតឲ្យផ្សាយដំណឹងល្អ បម្រើពិធីបរិសុទ្ធនៃសេចក្ដីសង្គ្រោះ ជួយស្ថាបនានគរនៃព្រះ នៅលើផែនដី និងប្រធានពរ ហើយបម្រើដល់ក្រុមគ្រួសារ និង បងប្អូនរបស់យើង ។

មានសម្រាប់មនុស្សទាំងអស់

នេះគឺជាបព្វជិតភាពដ៏ពិសិដ្ឋដែលយើងកាន់ ។

បព្វជិតភាព ឬ ការទទួលខុសត្រូវណាមួយ នៅក្នុងបព្វជិតភាព ពុំអាចទិញ ឬ បង្គាប់បានទេ ។ ការប្រើអំណាចបព្វជិតភាពនេះ ពុំអាចមានឥទ្ធិពល បញ្ចុះបញ្ចូល ឬ បង្ខំ ដោយតំណែង ទ្រព្យសម្បត្តិ ឬ ឥទ្ធិពលបានទេ ។ វាគឺជាអំណាចខាងវិញ្ញាណដែលធ្វើឡើងតាមច្បាប់ស្ថានសួគ៌ ។ វាមានដើមកំណើតមកពីព្រះវរបិតាសួគ៌ដ៏អស្ចារ្យនៃយើងទាំងអស់គ្នា ។ អំណាចរបស់វាអាចត្រូវបានគ្រប់គ្រង និង ដឹកនាំតែតាមរយៈគោលការណ៍នៃសេចក្ដីសុចរិតតែប៉ុណ្ណោះ ⁶ ប៉ុន្តែដោយសេចក្ដីសុចរិតតែខ្លួនឯងនោះទេ ។

ព្រះគ្រីស្ទ គឺជាប្រភពនៃសិទ្ធិអំណាចបព្វជិតភាពពិតទាំងអស់ និង អំណាចនៅលើផែនដី ។ ⁷ វាគឺជាកិច្ចការទ្រង់ ដែលយើងមានឯកសិទ្ធិជួយ ។ « ហើយគ្មានអ្នកណាអាចជួយក្នុងកិច្ចការនេះបានឡើយ លើកលែងតែអ្នកនោះនឹងបន្ទាបខ្លួន ហើយពោរពេញទៅដោយសេចក្ដីស្រឡាញ់ ដោយមានសេចក្ដីជំនឿ សេចក្ដីសង្ឃឹម និង សេចក្ដីសប្បុរស ដោយសង្កត់ចិត្តក្នុងកិច្ចការគ្រប់យ៉ាង ដែលនឹងផ្ទុកផ្ដាក់ ឲ្យគេថែរក្សា » ។ ⁸

យើងពុំធ្វើដើម្បីទទួលប្រយោជន៍ផ្ទាល់ខ្លួនទេ ប៉ុន្តែយើងព្យាយាមបម្រើ និង លើកស្ទួយដល់អ្នកដទៃ ។ យើងដឹកនាំពុំមែនដោយកម្លាំង ប៉ុន្តែដោយ « ... ការលួងលោម ដោយការអត់ធ្មត់ ការទន់ភ្លន់ និង ការស្លូតបូត និងដោយការស្រឡាញ់ស្មោះត្រង់ប៉ុណ្ណោះ » ។ ⁹

បព្វជិតភាពនៃព្រះដ៏មានមហិឬទ្ធិ មានសម្រាប់បុរសសក្ដិសមគ្រប់ទីកន្លែង-- មិនថាពូជពង្សពួកគេយ៉ាងណា មិនថាស្ថានភាពរបស់ពួកគេក្រខ្សត់ប៉ុណ្ណា មិនថាគេនៅតំបន់ជិតបំផុត ឬ ឆ្ងាយបំផុតនៃលោកិយនេះទេ ។ បព្វជិតភាពគឺមានសម្រាប់ពួកគេ ដោយពុំចាំបាច់មានប្រាក់ទិញ ឬ បង់ថ្លៃអ្វីពីលោកិយនេះឡើយ ។ ដើម្បីពន្យល់ទូលំទូលាយនូវពាក្យរបស់ព្យាការីអេសាយពីបុរាណ ថា អស់អ្នក ដែលស្រេកអើយ ចូរមកឯទីទឹកចុះ ឯអ្នកដែលគ្មានប្រាក់អើយ ចូរមកទិញ ហើយបរិភោគទៅ ! ¹⁰

ហើយដោយសារតែដង្វាយធួនដ៏អស់កល្ប និង ពុំអាចថ្លែងបាននៃព្រះអង្គសង្គ្រោះរបស់យើង ព្រះយេស៊ូវគ្រីស្ទ បព្វជិតភាពនៃព្រះ អាចមានសម្រាប់អ្នក ទោះជាអ្នកមានកំហុស ឬ មានភាពពុំសក្ដិសមកាលពីអតីតកាលក្ដី ។ តាមរយៈដំណើរការនៃការប្រែចិត្តធ្វើការបន្សុទ្ធ និង ការសម្អាតខាងវិញ្ញាណ នោះអ្នកអាច « ក្រោកឡើង ហើយបញ្ចាំងពន្លឺចេញទៅ ! » ¹¹ ដោយសារតែសេចក្តីស្រឡាញ់អភ័យទោសគ្មានព្រំដែន របស់ព្រះអង្គសង្គ្រោះ និងជាព្រះប្រោសលោះយើង នោះអ្នកអាចបើកភ្នែកមើល បានស្អាតស្អំ និង សក្ដិសម ហើយអភិវឌ្ឍនៅក្នុងសេចក្តីសុចរិត និង សេចក្តីថ្លៃថ្នូរ នៃព្រះរាជបុត្រានៃព្រះ-- ជាអ្នកកាន់បព្វជិតភាពសក្ដិសមដ៏ពិសិដ្ឋបំផុតនៃព្រះដ៏មានមហិទ្ធិឬទ្ធិ ។

ភាពអស្ចារ្យ និង ឯកសិទ្ធិនៃបព្វជិតភាព

ខ្ញុំពិតជាមានអារម្មណ៍សោកស្ដាយចំពោះអ្នកដែលពុំយល់ និង អរគុណចំពោះភាពអស្ចារ្យ និង ឯកសិទ្ធិនៃបព្វជិតភាព ។ ពួកគេគឺដូចជាអ្នកធ្វើដំណើរនៅក្នុងយន្ដហោះ ដែលចំណាយពេលរបស់ពួកគេរអ៊ូរទាំនឹងទំហំនៃកញ្ចប់សណ្ដែកដី ខណៈដែលពួកគេកំពុងតែហោះហើរកាត់អាកាស នៅខ្ពស់ជាងពពក-- ជាអ្វីមួយដែលស្ដេចពីបុរាណនឹងចង់ចំណាយនូវរាល់អ្វីដែលពួកគេមាន ដើម្បីព្យាយាមជិះ និងមានបទពិសោធន៍ជិះយន្ដហោះឲ្យបានម្ដងនោះ !

បងប្អូនប្រុស យើងត្រូវបានប្រទានពរឲ្យក្លាយជាអ្នកទទួលទានដ៏រាបសារនៃសិទ្ធិអំណាច និង អំណាចនៃបព្វជិតភាពដ៏អស្ចារ្យនេះ ។ ចូរយើងងើបភ្នែកឡើង ហើយមើល ទទួលស្គាល់ និង ទទួលយកឱកាសនេះនូវភាពពិតនេះ ។

តាមរយៈការបម្រើបព្វជិតភាពដោយសុចរិត សេចក្តីស្រឡាញ់ និង ការលះបង់ នោះយើងនឹងអាចទទួលពិសោធន៍អត្ថន័យពិតនៃវិវរណៈថា ៖ « នោះយើងក៏នឹងនៅទីនោះដែរ ត្បិតយើងនឹងទៅពីមុខអ្នក ។ ហើយនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើង នៅព័ទ្ធជុំវិញអ្នក ដើម្បីទ្រអ្នកឡើង » ។¹²

ចូរយើងឱបក្រសោប ហើយយល់នូវភាពអស្ចារ្យ និង ឯកសិទ្ធិនៃបព្វជិតភាព ។ ចូរយើងទទួលយក និង ស្រឡាញ់ការទទួលខុសត្រូវ ដែលយើងបានសុំឲ្យបំពេញ-- ការទទួលខុសត្រូវនៅក្នុងផ្ទះ និង អង្គភាពសាសនាចក្ររបស់យើង មិនថាតូចក្ដី ឬធំក្ដី ។ ចូរយើងបន្ដរីកចម្រើននៅក្នុងសេចក្ដីសុចរិត ការលះបង់ និង ការបម្រើបព្វជិតភាព ។ ចូរយើងស្វែងរកសេចក្ដីអំណរក្នុងការបម្រើក្នុងបព្វជិតភាព !

យើងអាចធ្វើបានយ៉ាងល្អ ដោយការអនុវត្តន៍គោលការណ៍នៃចំណេះដឹង ការគោរពប្រតិបត្តិ និង សេចក្ដីជំនឿ ។

នោះមានន័យថា ទីមួយ យើងត្រូវចេះ ហើយធ្វើឲ្យគោលលទ្ធិនៃបព្វជិតភាពដែលមានក្នុងបន្ទូលបើកបង្ហាញរបស់ព្រះជាចំណែកនៃជីវិតរស់នៅរបស់យើង ។ វាសំខាន់ណាស់សម្រាប់យើងដើម្បីយល់ពីសេចក្ដីសញ្ញា និង បទបញ្ញតិ្តដែលបព្វជិតភាពប្រតិបត្តិ ។ ¹³

បន្ទាប់មក ចូរយើងមានប្រាជ្ញា ហើយធ្វើតាមចំណេះដឹងដែលបានទទួលនេះឲ្យខ្ជាប់ខ្ជួន និង ដោយការគោរព ។ នៅពេលយើងគោរពច្បាប់របស់ព្រះ រៀនគ្រប់គ្រងចិត្ត និង រូបកាយយើង ហើយធ្វើឲ្យសកម្មភាពរបស់យើងស្របនឹងគំរូនៃសេចក្ដីសុចរិត ដែលបានបង្រៀនដោយពួកព្យាការី នោះយើងនឹងមានបទពិសោធន៍នៃសេចក្តីអំណរក្នុងការបម្រើបព្វជិតភាព ។

ហើយទីបញ្ចប់ ចូរយើងចាក់សេចក្ដីជំនឿយើងឲ្យជ្រៅទៅលើព្រះអម្ចាស់ ព្រះយេស៊ូវគ្រីស្ទ ។ ចូរយើងលើកដាក់ព្រះនាមទ្រង់មកលើយើង ហើយ ប្ដេជ្ញាចិត្តជារៀងរាល់ថ្ងៃ ដើម្បីដើរនៅលើផ្លូវនៃភាពជាសិស្សម្ដងទៀត ។ ចូរឲ្យកិច្ចការយើងធ្វើឲ្យសេចក្តីជំនឿយើងបានឥតខ្ចោះ ។ ¹⁴ តាមរយៈភាពជាសិស្ស នោះយើងអាចបានឥតខ្ចោះមួយជំហានម្ដងៗ ដោយការបម្រើគ្រួសារយើង បងប្អូនយើង និង ព្រះ ។

នៅពេលយើងបម្រើនៅក្នុងបព្វជិតភាពដោយអស់ពីចិត្ត គំនិត កម្លាំង និង ពលំ របស់យើង នោះយើងទទួលបានការសន្យានៃចំណេះដឹង ភាពសុខសាន្ដ និង អំណោយទានខាងវិញ្ញាណដ៏ខ្ពង់ខ្ពស់ ។ នៅពេលយើងគោរពបព្វជិតភាពដ៏បរិសុទ្ធ នោះព្រះនឹងលើកតម្កើងយើង ហើយយើងនឹង « ឈរដោយឥតទោសនៅចំពោះ [ ទ្រង់ ] នៅថ្ងៃចុងក្រោយបំផុត » ។ ¹⁵

ការអធិស្ឋានរបស់ខ្ញុំគឺសុំឲ្យយើងអាចមានភ្នែកដើម្បីមើល និង ដួងចិត្តដើម្បីដឹងពីភាពអស្ចារ្យ និង សេចក្តីអំណរនៃបព្វជិតភាព នៃព្រះដ៏អស្ចារ្យ និង មហិមារបស់យើងជានិច្ច ក្នុងនាមនៃព្រះយេស៊ូវគ្រីស្ទ អាម៉ែន ។