ການແນບສະໜິດຢູ່ໃນພຣະເຈົ້າ ແລະ ການສ້ອມແປງຮອຍແຕກລ້າວ

ໂດຍ ແນວ ແອັຟ ແມຣິອອດ

ທີ່ປຶກສາທີສອງໃນຝ່າຍປະທານອົງການຍິງໜຸ່ມສາມັນ

ພຣະຄຣິດມີອຳນາດທີ່ຈະຊ່ວຍເຮົາໃຫ້ມີຄວາມສຳພັນກັບພຣະບິດາ ແລະ ກັບຄົນອື່ນໆ ດ້ວຍຄວາມຮັກໄດ້.

ເຮົາຕ້ອງສືບຕໍ່ໃຫ້ມີຄວາມຮູ້ເຖິງ ແລະ ເຊື່ອຟັງຕໍ່ພຣະບິດາເທິງສະຫວັນ. ຄວາມສຳພັນຂອງເຮົານຳພຣະອົງແມ່ນຊົ່ວນິລັນດອນ. ເຮົາເປັນລູກທີ່ຮັກຂອງພຣະອົງ, ແລະ ສິ່ງນັ້ນຈະບໍ່ປ່ຽນແປງ. ເຮັດແນວໃດ ເຮົາຈຶ່ງຈະຮັບເອົາຄຳເຊື້ອເຊີນຂອງພຣະອົງດ້ວຍຄວາມເຕັມໃຈ ເພື່ອໃຫ້ເຂົ້າໃກ້ຊິດພຣະອົງ ເພື່ອວ່າເຮົາຈະສາມາດຊື່ນຊົມກັບພອນ ທີ່ພຣະອົງປະສົງທີ່ຈະມອບໃຫ້ເຮົາ ໃນຊີວິດນີ້ ແລະ ໃນໂລກທີ່ຈະມາເຖິງ?

ພຣະຜູ້ເປັນເຈົ້າໄດ້ກ່າວກັບຊາວອິດສະຣາເອນ, ໃນສະໄໝບູຮານ ແລະ ພຣະອົງໄດ້ກ່າວກັບເຮົາວ່າ, “ແທ້ຈິງແລ້ວ, ເຮົາຮັກແພງເຈົ້າສະເໝີມາ: ດັ່ງນັ້ນ ເຮົາຈຶ່ງສືບຕໍ່ໃຫ້ຄວາມຮັກອັນໝັ້ນຄົງແກ່ເຈົ້າ.”¹ ໃນການກ່າວຢ່າງທີ່ພຣະບິດາຈະກ່າວ, ພຣະອົງກ່າວກັບເຮົາວ່າ ໃຫ້ແນບສະໜິດຢູ່ໃນພຣະອົງ, ແລະ ພຣະອົງຈະແນບສະໜິດຢູ່ໃນເຮົາ; ແລະ ໃຫ້ເຮົາເດີນໄປກັບພຣະອົງ.² ເຮົາໄວ້ວາງໃຈໃນພຣະອົງພຽງພໍທີ່ຈະແນບສະໜິດຢູ່ໃນພຣະອົງ ແລະ ເດີນໄປກັບພຣະອົງຫລືບໍ່?

ເຮົາມາຢູ່ໃນໂລກນີ້ ເພື່ອຮຽນຮູ້ ແລະ ເຕີບໂຕ, ແລະ ການຮຽນຮູ້ ແລະ ການເຕີບໂຕທີ່ສຳຄັນທີ່ສຸດ ຈະມາຈາກຄວາມສຳພັນແຫ່ງພັນທະສັນຍາຂອງເຮົາກັບພຣະບິດາເທິງສະຫວັນ ແລະ ພຣະເຢຊູຄຣິດ. ຈາກຄວາມສຳພັນທີ່ຊື່ສັດຂອງເຮົາກັບພວກພຣະອົງ, ເຮົາຈະໄດ້ຮັບຄວາມຮູ້ເລື່ອງພຣະເຈົ້າ, ຄວາມຮັກ, ພະລັງ, ແລະ ຄວາມສາມາດ ທີ່ຈະຮັບໃຊ້.

“ເຮົາມີໜ້າທີ່ ທີ່ຈະຮຽນຮູ້ທຸກສິ່ງ ທີ່ພຣະເຈົ້າໄດ້ເປີດເຜີຍກ່ຽວກັບພຣະອົງເອງ.”³ ເຮົາຕ້ອງເຂົ້າໃຈວ່າ ພຣະເຈົ້າອົງເປັນພຣະບິດາ ຊີ້ນຳພຣະບຸດຂອງພຣະອົງ, ພຣະເຢຊູຄຣິດ, ໃຫ້ສ້າງແຜ່ນດິນໂລກ ເພື່ອຄວາມເຕີບໂຕຂອງເຮົາ, ວ່າພຣະບິດາເທິງສະຫວັນ ໄດ້ປະທານພຣະບຸດຂອງພຣະອົງ ເພື່ອຈ່າຍຄ່າແຫ່ງຄວາມຍຸດຕິທຳ ສຳລັບຄວາມລອດຂອງເຮົາ, ແລະ ວ່າອຳນາດຖານະປະໂລຫິດຂອງພຣະບິດາ ແລະ ສາດສະໜາຈັກທີ່ແທ້ຈິງຂອງພຣະບຸດຂອງພຣະອົງ ພ້ອມດ້ວຍພິທີການທີ່ຈຳເປັນ ໄດ້ຖືກຟື້ນຟູ ເພື່ອເປັນພອນໃຫ້ເຮົາ. ທ່ານຮູ້ສຶກບໍ ເຖິງຄວາມຮັກອັນເລິກຊຶ້ງ ທີ່ມີຢູ່ໃນການຕຽມຂອງພວກພຣະອົງ ເພື່ອຄວາມສຸກ ແລະ ຄວາມເຕີບໂຕ ຂອງເຮົາ? ເຮົາຕ້ອງຮູ້ຈັກວ່າແຜນແຫ່ງຄວາມລອດຂອງພຣະບິດາເທິງສະຫວັນ ນັ້ນຄື ເຮົາຕ້ອງເຊື່ອຟັງກົດ ແລະ ພິທີການຂອງພຣະກິດຕິຄຸນ ແລະ ຮັບເອົາຊີວິດນິລັນດອນ ແລະ ດັ່ງນັ້ນ ກາຍເປັນເໝືອນດັ່ງທີ່ພຣະເຈົ້າເປັນ.⁴ ນີ້ແມ່ນຄວາມສຸກທີ່ແທ້ຈິງ ແລະ ຍືນຍົງ ທີ່ພຣະບິດາເທິງສະຫວັນ ໄດ້ປະທານໃຫ້ເຮົາ. ບໍ່ມີຄວາມສຸກທີ່ແທ້ຈິງ ແລະ ຍືນຍົງ ອື່ນໃດອີກ.

ການທ້າທາຍຂອງເຮົາ ສາມາດດຶງເຮົາອອກໄປຈາກເສັ້ນທາງແຫ່ງຄວາມສຸກ. ເຮົາສາມາດສູນເສຍຄວາມໄວ້ວາງໃຈ ທີ່ເຮົາມີຕໍ່ພຣະເຈົ້າໄປໄດ້ ຖ້າຫາກການທົດລອງພາເຮົາໄປຫາສິ່ງກີດກັນ ແທນທີ່ຈະສົ່ງເຮົາໄປຫາບ່ອນທີ່ໃຫ້ຄຸເຂົ່າລົງ.

ຄຳກອນສອງແຖວຕໍ່ໄປນີ້ ຂໍໃຫ້ເຮົາສຳຫລວດເບິ່ງລຳດັບຄວາມສຳຄັນ:

ບາງສິ່ງສຳຄັນ; ບາງສິ່ງກໍບໍ່ສຳຄັນ.

ສອງສາມຢ່າງຍຶດໝັ້ນ, ແຕ່ສ່ວນຫລາຍຜັນແປ.⁵

ເອື້ອຍນ້ອງທັງຫລາຍ, ແມ່ນຫຍັງທີ່ສຳຄັນຕໍ່ທ່ານ? ແມ່ນຫຍັງທີ່ຍືນຍົງສຳລັບທ່ານ? ຄຸນຄ່າທີ່ສຳຄັນ ແລະ ມີຄ່າຫລາຍຕໍ່ພຣະບິດາ ແມ່ນວ່າເຮົາຮຽນຮູ້ເຖິງພຣະອົງ, ຖ່ອມຕົວ, ແລະ ເຕີບໂຕ ໃນການເຊື່ອຟັງຕໍ່ພຣະອົງ ຜ່ານທາງປະສົບການຢູ່ໃນໂລກ. ພຣະອົງປະສົງໃຫ້ເຮົາປ່ຽນຄວາມເຫັນແກ່ຕົວ ເປັນການຮັບໃຊ້, ປ່ຽນຄວາມຢ້ານກົວເປັນສັດທາ. ສິ່ງສຳຄັນທີ່ຍືນຍົງເຫລົ່ານີ້ ອາດເປັນການທົດສອບທີ່ຍາກຫລາຍສຳລັບເຮົາ.

ແມ່ນ ເວລານີ້, ກັບຂອບເຂດແຫ່ງຄວາມເປັນມະຕະຂອງເຮົາ, ທີ່ພຣະບິດາເທິງສະຫວັນຂໍໃຫ້ເຮົາຮັກ ເມື່ອການຮັກເປັນສິ່ງຍາກທີ່ຈະເຮັດ, ໃຫ້ຮັບໃຊ້ ເມື່ອການຮັບໃຊ້ເປັນສິ່ງບໍ່ສະດວກ, ໃຫ້ອະໄພ ເມື່ອການໃຫ້ອະໄພ ອາດເກີນກວ່າຈະສາມາດເຮັດໄດ້. ຈະເຮັດໄດ້ແນວໃດ? ເຮົາຈະເຮັດມັນໄດ້ແນວໃດ? ເຮົາເອື້ອມຂຶ້ນຫາພຣະບິດາເທິງສະຫວັນຢ່າງພາກພຽນ ເພື່ອຂໍຄວາມຊ່ວຍເຫລືອ, ໃນພຣະນາມຂອງພຣະບຸດຂອງພຣະອົງ, ແລະ ເຮັດຕາມວິທີຂອງພຣະອົງ ແທນທີ່ຈະເຮັດດ້ວຍຄວາມທະນົງໃຈຂອງເຮົາເອງ.

ຂ້າພະເຈົ້າໄດ້ເຫັນຄວາມທະນົງໃຈຂອງຕົວເອງ ເມື່ອປະທານເອສະຣາ ແທັບ ເບັນສັນ ໄດ້ກ່າວ ກ່ຽວກັບການຊຳລະຂ້າງໃນໃຫ້ສະອາດ.⁶ ຂ້າພະເຈົ້າໄດ້ວາດພາບເຫັນຕົວເອງເປັນຄື ໂຖນ້ຳອັນໜຶ່ງ. ຂ້າພະເຈົ້າຈະຂັດສີຄວາມທະນົງໃຈທີ່ຕິດຢູ່ໃນໂຖນ້ຳ ອອກໄດ້ແນວໃດ? ການຝືນໃຈຕົນເອງ ໃຫ້ມີຄວາມຖ່ອມຕົວ ແລະ ການພະຍາຍາມເຮັດໃຫ້ຕົວເອງຮັກຄົນອື່ນ ເປັນສິ່ງທີ່ບໍ່ຈິງໃຈ ແລະ ຕື້ນໆ, ແລະ ກໍບໍ່ໄດ້ຜົນ. ບາບ ແລະ ຄວາມທະນົງຕົວຂອງເຮົາ ຈະກໍ່ໃຫ້ເກີດ ຮອຍແຕກລ້າວ—ຫລື ຊ່ອງວ່າງ—ລະຫວ່າງເຮົາ ແລະ ແຫລ່ງແຫ່ງຄວາມຮັກທັງໝົດ, ນັ້ນຄື ພຣະບິດາເທິງສະຫວັນ.

ການຊົດໃຊ້ຂອງພຣະຜູ້ຊ່ວຍໃຫ້ລອດເທົ່ານັ້ນທີ່ ສາມາດຊຳລະລ້າງເຮົາ ຈາກບາບຂອງເຮົາ ແລະ ປິດຊ່ອງວ່າງ ຫລື ຮອຍແຕກລ້າວນັ້ນ.

ເຮົາຢາກໃຫ້ພຣະບິດາເທິງສະຫວັນໂອບກອດເຮົາດ້ວຍຄວາມຮັກ ແລະ ການຊີ້ນຳ, ແລະ ສະນັ້ນ ເຮົາຈຶ່ງເອົາໃຈໃສ່ຕໍ່ພຣະປະສົງຂອງພຣະອົງກ່ອນ ແລະ ດ້ວຍໃຈທີ່ສຳນຶກຜິດ ອ້ອນວອນຂໍໃຫ້ພຣະຄຣິດ ຖອກເທນ້ຳລົງມາ ລ້າງສ່ວຍໂຖນ້ຳຂອງເຮົາ. ທຳອິດ ນ້ຳອາດໄຫລລົງມາເທື່ອລະຢົດ, ແຕ່ເມື່ອເຮົາສະແຫວງຫາ, ທູນຂໍ, ແລະ ເຊື່ອຟັງ, ມັນຈະຫລັ່ງໄຫລລົງມາຢ່າງຫລວງຫລາຍ. ນ້ຳທີ່ປະກອບດ້ວຍຊີວິດ ຈະເລີ່ມຕົ້ນເຮັດໃຫ້ເຮົາເຕັມ, ຈົນເຖິງປາກໂຖ ດ້ວຍຄວາມຮັກຂອງພຣະອົງ, ແລ້ວເຮົາສາມາດຖອກນ້ຳແຫ່ງຈິດວິນຍານຂອງເຮົາ ເພື່ອແບ່ງປັນໃຫ້ແກ່ຄົນອື່ນ ຜູ້ຢາກໄດ້ຮັບການປິ່ນປົວ, ຄວາມຫວັງ, ແລະ ການເປັນພາກສ່ວນ. ເມື່ອຂ້າງໃນຂອງໂຖນ້ຳຂອງເຮົາສະອາດແລ້ວ, ຄວາມສຳພັນແຫ່ງມະຕະຂອງເຮົາ ຈະເລີ່ມຕົ້ນດີຂຶ້ນ.

ການເສຍສະລະບາງສິ່ງໃນລາຍການສ່ວນຕົວຂອງເຮົາ ທີ່ຈະຕ້ອງເຮັດໃນແຕ່ລະວັນ ແມ່ນຮຽກຮ້ອງການຈັດຫາເວລາໃຫ້ແກ່ແຜນນິລັນດອນຂອງພຣະເຈົ້າ. ພຣະຜູ້ຊ່ວຍໃຫ້ລອດ, ຜູ້ກ່າວແທນພຣະບິດາ, ໄດ້ຂໍໃຫ້ເຮົາເຂົ້າໃກ້ພຣະອົງ ແລະ ພຣະອົງຈະເຂົ້າໃກ້ເຮົາ.⁷ ການເຂົ້າໃກ້ພຣະບິດາ ໝາຍເຖິງການຮຽນຮູ້ເຖິງຄວາມເປັນຈິງຂອງພຣະອົງ ຜ່ານພຣະຄຳພີ, ເຮັດຕາມຄຳແນະນຳຂອງສາດສະດາ, ແລະ ພະຍາຍາມທີ່ຈະເຮັດຕາມພຣະປະສົງຂອງພຣະອົງເປັນຢ່າງດີ.

ເຮົາເຂົ້າໃຈບໍວ່າ ພຣະຄຣິດມີອຳນາດທີ່ຈະຊ່ວຍເຮົາໃຫ້ມີຄວາມສຳພັນກັບພຣະບິດາ ແລະ ກັບຄົນອື່ນໆ ດ້ວຍຄວາມຮັກໄດ້? ໂດຍອຳນາດຂອງພຣະວິນຍານບໍລິສຸດ, ພຣະອົງສາມາດປະທານຄວາມຮູ້ເລື່ອງຄວາມສຳພັນແກ່ເຮົາໄດ້.

ຄູຊັ້ນປະຖົມໄວຄົນໜຶ່ງ ໄດ້ບອກຂ້າພະເຈົ້າກ່ຽວກັບປະສົບການທີ່ມີພະລັງຫລາຍ ທີ່ເກີດຂຶ້ນໃນຫ້ອງຮຽນເດັກອາຍຸ 11 ປີ ຂອງລາວ. ຄົນໜຶ່ງໃນນັ້ນ, ຊຶ່ງຂ້າພະເຈົ້າຈະເອີ້ນລາວວ່າ ຈິມມີ ເປັນຄົນບໍ່ເຂົ້າກັບໃຜ. ວັນອາທິດມື້ໜຶ່ງ, ຄູສອນຂອງລາວ ໄດ້ຮັບການດົນໃຈ ບໍ່ໃຫ້ສອນບົດຮຽນ ແຕ່ໃຫ້ບອກວ່າ ເປັນຫຍັງລາວຈຶ່ງຮັກທ້າວຈິມມີ. ລາວໄດ້ກ່າວເຖິງຄວາມກະຕັນຍູ ແລະ ຄວາມເຊື່ອຂອງລາວ ໃນຊາຍໜຸ່ມຄົນນີ້. ແລ້ວ ຄູສອນໄດ້ຂໍໃຫ້ຄົນໃນຫ້ອງຮຽນບອກບາງສິ່ງທີ່ພວກເຂົາສຳນຶກບຸນຄຸນຕໍ່ທ້າວຈິມມີ. ເມື່ອຄົນໃນຫ້ອງຮຽນແຕ່ລະຄົນ ໄດ້ບອກທ້າວຈິມມິມ ວ່າເປັນຫຍັງລາວຈຶ່ງພິເສດສຳລັບພວກເຂົາ, ທ້າວຈິມມີ ໄດ້ກົ້ມຫົວລົງ ແລະ ນ້ຳຕາເລີ່ມໄຫລອອກມາ. ຄູສອນ ແລະ ຫ້ອງຮຽນນີ້ ໄດ້ສ້ອມແປງຫົວໃຈອັນເປົ່າປ່ຽວຂອງທ້າວຈິມມີ. ຄວາມຮັກອັນເລັກໜ້ອຍ, ການສະແດງອອກດ້ວຍຄວາມຈິງໃຈ, ສາມາດໃຫ້ຄວາມຫວັງ ແລະ ຄຸນຄ່າແກ່ຄົນອື່ນໄດ້. ຂ້າພະເຈົ້າເອີ້ນສິ່ງນີ້ວ່າ “ການສ້ອມແປງຮອຍແຕກລ້າວ ຫລື ຊ່ອງວ່າງ.”

ບາງທີຊີວິດຂອງເຮົາຢູ່ໃນໂລກກ່ອນເກີດທີ່ເຮົາຮັກ ໄດ້ເຮັດໃຫ້ເຮົາຢາກຮູ້ຄວາມຈິງ, ຢາກມີຄວາມຮັກທີ່ຍືນຍົງ ຢູ່ໃນໂລກນີ້.ເຮົາໄດ້ຖືກສ້າງຂຶ້ນໃນສະຫວັນ ເພື່ອໃຫ້ຄວາມຮັກ ແລະ ໄດ້ຮັບຄວາມຮັກ, ແລະ ຄວາມຮັກທີ່ເລິກຊຶ້ງທີ່ສຸດ ມາຈາກຕອນທີ່ເຮົາໄດ້ເປັນໜຶ່ງກັບພຣະເຈົ້າ. ພຣະຄຳພີມໍມອນເຊື້ອເຊີນເຮົາໃຫ້ “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ.”⁸

ເອຊາຢາໄດ້ກ່າວກັບຜູ້ຄົນທີ່ດຳລົງຊີວິດຢ່າງຊື່ສັດ ຕາມກົດແຫ່ງການຖືສິນອົດເຂົ້າ ແລະ ດັ່ງນັ້ນ ພວກເຂົາຈຶ່ງກາຍ ເປັນຜູ້ສ້ອມແປງຮອຍແຕກລ້າວ ຂອງລູກຫລານຂອງພວກເຂົາເອງ. ເຂົາເຈົ້າເປັນບຸກຄົນທີ່ເອຊາຢາສັນຍາວ່າ ຈະ “ສ້າງສິ່ງທີ່ຮົກຮ້າງເພພັງຂຶ້ນໃໝ່.”⁹ ໃນວິທີທີ່ເໝືອນກັນນັ້ນ, ພຣະຜູ້ຊ່ວຍໃຫ້ລອດ ໄດ້ສ້ອມແປງຮອຍແຕກລ້າວ, ຫລື ໄລຍະ ໄກ, ລະຫວ່າງເຮົາກັບພຣະບິດາເທິງສະຫວັນ. ຜ່ານການເສຍສະລະຊົດໃຊ້ທີ່ຍິ່ງໃຫຍ່ຂອງພຣະອົງ, ພຣະອົງໄດ້ເປີດທາງໃຫ້ເຮົາ ທີ່ຈະໄດ້ຮັບເອົາຄວາມຮັກ ແລະ ພະລັງຂອງພຣະເຈົ້າ ແລະ ຈາກນັ້ນເຮົາຈຶ່ງຈະສາມາດສ້ອມແປງ “ສິ່ງທີ່ຮົກຮ້າງເພພັງ” ໃນຊີວິດສ່ວນຕົວຂອງເຮົາ. ການປິ່ນປົວຄວາມຮູ້ສຶກທາງຈິດໃຈທີ່ຫ່າງເຫີນລະຫວ່າງກັນແລະກັນ ຈະຮຽກຮ້ອງການຍອມຮັບເອົາຄວາມຮັກຂອງພຣະບິດາ, ພ້ອມທັງການເສຍສະລະຄວາມເຫັນແກ່ຕົວໂດຍທຳມະຊາດ ແລະ ຄວາມມັກຢ້ານຂອງເຮົາ.

ໃນຄ່ຳຄືນໜຶ່ງທີ່ໜ້າຊົງຈຳ, ຍາດພີ່ນ້ອງຄົນໜຶ່ງ ກັບຂ້າພະເຈົ້າ ໄດ້ໂຕ້ຖຽງກັນເລື່ອງການເມືອງ. ນາງບໍ່ເຫັນດ້ວຍກັບຄວາມຄິດຄວາມເຫັນຂອງຂ້າພະເຈົ້າ, ແລະ ໄດ້ເວົ້າຕ້ານຢ່າງຮຸນແຮງ ຈົນຄົນອື່ນໃນຄອບຄົວໄດ້ຍິນ. ຂ້າພະເຈົ້າໄດ້ຮູ້ສຶກວ່າຕົວເອງໂງ່ ແລະ ບໍ່ຮູ້ຫຍັງ—ແລະ ຂ້າພະເຈົ້າອາດເປັນແນວນັ້ນແທ້ໆ. ຄືນນັ້ນ ໃນຂະນະທີ່ຂ້າພະເຈົ້າຄຸເຂົ່າອະທິຖານ, ຂ້າພະເຈົ້າໄດ້ຟ້າວອະທິບາຍຕໍ່ພຣະບິດາເທິງສະຫວັນທັນທີ ເຖິງຍາດຜູ້ນີ້ ທີ່ເຂົ້າໃຈຍາກ! ຂ້າພະເຈົ້າໄດ້ເວົ້າຢ່າງຍືດຍາວ. ບາງທີຂ້າພະເຈົ້າໄດ້ຢຸດໜ້ອຍໜຶ່ງຕອນຈົ່ມ ແລະ ພຣະວິນຍານບໍລິສຸດ ໄດ້ມີໂອກາດກະຕຸ້ນຂ້າພະເຈົ້າ, ເພາະ, ຂ້າພະເຈົ້າຕົກໃຈ, ເມື່ອໄດ້ຍິນຄຳເວົ້າຂອງຕົວເອງວ່າ, “ບາງທີ ພຣະອົງຢາກໃຫ້ຂ້ານ້ອຍຮັກນາງ ແມ່ນບໍ.” ຮັກນາງ? ຂ້າພະເຈົ້າໄດ້ອະທິຖານຕໍ່, ເວົ້າວ່າ, “ຂ້ານ້ອຍຊິຮັກນາງໄດ້ແນວໃດ? ຂ້ານ້ອຍບໍ່ມັກນາງຊ້ຳ. ຫົວໃຈຂອງຂ້ານ້ອຍເຈັບປວດ, ຄວາມຮູ້ສຶກຂອງຂ້ານ້ອຍບວມຊ້ຳ. ຂ້ານ້ອຍເຮັດບໍ່ໄດ້.”

ແລ້ວ, ດ້ວຍຄວາມຊ່ວຍເຫລືອຈາກພຣະວິນຍານ, ຂ້າພະເຈົ້າມີແນວຄິດໃໝ່ ເມື່ອຂ້າພະເຈົ້າໄດ້ກ່າວວ່າ, “ແຕ່ພຣະອົງຮັກນາງ, ພຣະບິດາເທິງສະຫວັນ. ຂໍໃຫ້ພຣະອົງຈົ່ງແບ່ງປັນຄວາມຮັກສ່ວນໜຶ່ງທີ່ພຣະອົງມີຕໍ່ນາງ ໃຫ້ຂ້ານ້ອຍແດ່ທ້ອນ—ເພື່ອວ່າຂ້ານ້ອຍຈະສາມາດຮັກນາງໄດ້ຄືກັນ?” ຄວາມຮູ້ສຶກທີ່ແຂງກະດ້າງຂອງຂ້າພະເຈົ້າໄດ້ອ່ອນລົງ, ເລີ່ມປ່ຽນໃຈ, ແລະ ຂ້າພະເຈົ້າໄດ້ເລີ່ມຕົ້ນເຫັນຍາດຄົນນີ້ໃນທາງທີ່ແຕກຕ່າງ. ຂ້າພະເຈົ້າໄດ້ເລີ່ມຕົ້ນເຫັນຄຸນຄ່າທີ່ແທ້ຈິງຂອງນາງ ດັ່ງທີ່ພຣະບິດາເທິງສະຫວັນໄດ້ເຫັນ. ເອຊາຢາ ຂຽນວ່າ, “ພຣະຜູ້ເປັນເຈົ້າໃຊ້ຜ້າພັນບາດ ແລະ ປິ່ນປົວແຜ ຊຶ່ງພຣະອົງໄດ້ເຮັດໃຫ້ເກີດຂຶ້ນໃນປະຊາຊົນຂອງພຣະອົງ.”¹⁰

ເມື່ອເວລາຜ່ານໄປ ຊ່ອງວ່າງລະຫວ່າງພວກເຮົາກໍຫຍັບເຂົ້າໃກ້ກັນຄືນ. ແຕ່ເຖິງແມ່ນວ່າ ຖ້າຫາກນາງບໍ່ຍອມຮັບເອົາໃຈທີ່ປ່ຽນແປງຂອງຂ້າພະເຈົ້າ, ແຕ່ຂ້າພະເຈົ້າກໍໄດ້ຮຽນຮູ້ວ່າ ຖ້າຫາກເຮົາອ້ອນວອນຂໍຄວາມຊ່ວຍເຫລືອຈາກພຣະບິດາເທິງສະຫວັນ, ພຣະອົງຈະຊ່ວຍເຮົາໃຫ້ຮັກ ແມ່ນແຕ່ຄົນທີ່ເຮົາຄິດວ່າ ເຮົາບໍ່ສາມາດຮັກໄດ້. ການຊົດໃຊ້ຂອງພຣະຜູ້ຊ່ວຍໃຫ້ລອດ ເປັນທໍ່ ທີ່ໃຫ້ຄວາມໃຈບຸນ ໄຫລລົງມາຈາກພຣະບິດາຂອງເຮົາ ໃນສະຫວັນ. ເຮົາຕ້ອງເລືອກທີ່ຈະ ແນບສະໜິດຢູ່ໃນຄວາມຮັກນີ້ ກ່ອນຈະມີຄວາມໃຈບຸນສຳລັບທຸກຄົນ.

ເມື່ອເຮົາມອບໃຈຂອງເຮົາໃຫ້ແກ່ພຣະບິດາ ແລະ ພຣະບຸດ, ເຮົາໄດ້ປ່ຽນແປງໂລກຂອງເຮົາ—ແມ່ນແຕ່ ຖ້າຫາກສະພາບການອ້ອມຮອບເຮົາ ບໍ່ປ່ຽນແປງກໍຕາມ. ເຮົາເຂົ້າໃກ້ຊິດພຣະບິດາເທິງສະຫວັນ ແລະ ຮູ້ສຶກວ່າ ພຣະອົງຮັບຮູ້ຄວາມພະຍາຍາມຂອງເຮົາ ທີ່ຈະເປັນສານຸສິດທີ່ແທ້ຈິງຂອງພຣະຄຣິດ. ຄວາມສາມາດເບິ່ງອອກ, ຄວາມໝັ້ນໃຈ, ແລະ ສັດທາຂອງເຮົາ ຈະເພີ່ມທະວີຂຶ້ນ.

ມໍມອນບອກເຮົາໃຫ້ອະທິຖານດ້ວຍສຸດພະລັງແຫ່ງໃຈ ສຳລັບຄວາມຮັກນີ້ ແລະ ມັນຈະຖືກມອບໃຫ້ເຮົາຈາກແຫລ່ງຂອງມັນ—ນັ້ນຄື ພຣະບິດາເທິງສະຫວັນ.¹¹ ພຽງແຕ່ເມື່ອນັ້ນເອງ ທີ່ເຮົາຈະກາຍເປັນຜູ້ສ້ອມແປງຮອຍແຕກລ້າວໄດ້ ໃນຄວາມສຳພັນຢູ່ໃນໂລກນີ້.

ຄວາມຮັກທີ່ບໍ່ມີທີ່ສຸດຂອງພຣະບິດາຂອງເຮົາ ຈະຫລັ່ງໄຫລມາຫາເຮົາ, ເພື່ອນຳເຮົາກັບໄປສູ່ລັດສະໝີພາບ ແລະ ຄວາມສຸກຂອງພຣະອົງ. ພຣະອົງໄດ້ປະທານພຣະບຸດອົງດຽວທີ່ຖືກຳເນີດຂອງພຣະອົງ, ພຣະເຢຊູຄຣິດ, ເພື່ອສ້ອມແປງຮອຍແຕກລ້າວ ທີ່ເປັນຊ່ອງວ່າງອັນກວ້າງໄກ ລະຫວ່າງເຮົາກັບພຣະອົງ. ການກັບຄືນຫາພຣະບິດາຢູ່ໃນສະຫວັນ ເປັນແກ່ນສານຂອງຄວາມຮັກອັນເປັນນິດ ແລະ ເປັນຈຸດປະສົງນິລັນດອນ. ເຮົາຕ້ອງຕິດຕໍ່ກັບພຣະອົງ ໃນເວລານີ້ ເພື່ອຈະໄດ້ຮູ້ວ່າ ອັນໃດສຳຄັນແທ້ໆ, ທີ່ຈະຮັກດັ່ງທີ່ພຣະອົງຮັກ ແລະ ທີ່ຈະເຕີບໂຕໃຫ້ເປັນເໝືອນດັ່ງພຣະອົງ. ຂ້າພະເຈົ້າເປັນພະຍານວ່າ ຄວາມສຳພັນລະຫວ່າງເຮົາກັບພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ ແມ່ນສຳຄັນຊົ່ວນິລັນດອນ ຕໍ່ພວກພຣະອົງ ແລະ ຕໍ່ເຮົາ. ໃນພຣະນາມຂອງພຣະເຢຊູຄຣິດ, ອາແມນ.