ຄວາມຈິງທີ່ຈຳເປັນ—ທີ່ເຮົາຕ້ອງປະຕິບັດຕາມ

ໂດຍ ແອວເດີ ອາດິວສັນ ເດ ເປົາລາ ປາເຣຢາ

ແຫ່ງສາວົກເຈັດສິບ

ພາບທີ່ມາໃຫ້ເຫັນຄັ້ງທຳອິດ ແລະ ສາດສະດາໂຈເຊັບ ສະມິດ ໄດ້ນຳຄວາມຮູ້ ແລະ ຄວາມຈິງທີ່ຈຳເປັນ ສຳລັບຄວາມສຸກຂອງພວກເຮົາໃນຊີວິດນີ້ ແລະ ເພື່ອຄວາມສູງສົ່ງມາໃຫ້ເຮົາ.

ເມື່ອຂ້າພະເຈົ້າມີອາຍຸເຈັດປີ, ຂ້າພະເຈົ້າໄດ້ຖາມແມ່ວ່າ, “ເມື່ອລູກກັບແມ່ຕາຍແລ້ວ ໄປສະຫວັນ, ແມ່ກະຍັງເປັນແມ່ຂອງລູກຢູ່ບໍ? ແມ່ບໍ່ໄດ້ຄິດວ່າລູກຈະຖາມຄຳຖາມແບບນີ້. ແຕ່ແມ່ກໍໄດ້ຕອບຕາມທີ່ແມ່ຮູ້ດີທີ່ສຸດວ່າ, “ບໍ່, ໃນສະຫວັນ ພວກເຮົາຈະເປັນອ້າຍເອື້ອຍນ້ອງກັນ. ແມ່ຈະບໍ່ໄດ້ເປັນແມ່ຂອງລູກ.” ນັ້ນບໍ່ແມ່ນຄຳຕອບທີ່ຕົນຄາດຄິດໄວ້.

ຫລັງຈາກທີ່ເຮົາເວົ້າກັນບໍ່ດົນ, ມີຊາຍໜຸ່ມສອງຄົນມາຢືນຢູ່ປະຕູໜ້າບ້ານຂອງພວກເຮົາ. ມັນເປັນການອັດສະຈັນ ທີ່ພໍ່ຂອງຂ້າພະເຈົ້າໄດ້ໃຫ້ເຂົາເຈົ້າເຂົ້າມາໃນເຮືອນ. ເຂົາເຈົ້າບອກວ່າ ເຂົາເຈົ້າເປັນຜູ້ສອນສາດສະໜາ ຈາກ ສາດສະໜາຈັກຂອງພຣະເຢຊູຄຣິດ ແຫ່ງໄພ່ພົນຍຸກສຸດທ້າຍ.

ພວກເຮົາເອີ້ນເຂົາເຈົ້າວ່າແອວເດີ ເຂົາເຈົ້າໄດ້ເລີ່ມສອນຄອບຄົວພວກເຮົາ. ຂ້າພະເຈົ້າຈື່ດີວ່າ ເມື່ອເຂົາເຈົ້າມາບ້ານພວກເຮົາທຸກເທື່ອ ພວກເຮົາຮູ້ສຶກດີໃຈ ແລະ ຕື່ນເຕັ້ນຫລາຍ. ເຂົາເຈົ້າໄດ້ບອກພວກເຮົາວ່າ ຊາຍໜຸ່ມຄົນໜຶ່ງໄດ້ເຂົ້າໄປໃນປ່າ ແລ້ວທູນຖາມພຣະເຈົ້າວ່າ ສາດສະໜາຈັກໃດ ເປັນສາດສະໜາຈັກທີ່ແທ້ຈິງ ແລະ ລາວໄດ້ເຫັນພຣະເຈົ້າ ແລະ ພຣະເຢຊູຄຣິດ.¹ ພວກແອວເດີໄດ້ສະແດງພາບທີ່ມາໃຫ້ເຫັນໃຫ້ພວກເຮົາເບິ່ງ ແລະ ເມື່ອຂ້າພະເຈົ້າເຫັນ, ຂ້າພະເຈົ້າກໍຮູ້ໄດ້ວ່າ ໂຈເຊັບ ສະມິດ ໄດ້ເຫັນພຣະເຈົ້າ ຜູ້ເປັນພຣະບິດາ ແລະ ໄດ້ເຫັນພຣະເຢຊູຄຣິດແທ້ໆ. ຜູ້ສອນສາດສະໜາໄດ້ເວົ້າວ່າ ຍ້ອນພາບທີ່ມາໃຫ້ເຫັນນີ້, ເຮົາຈຶ່ງໄດ້ມີສາດສະໜາຈັກທີ່ແທ້ຈິງ ຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໃນໂລກອີກ²

ຜູ້ສອນສາດສະໜາ ຍັງໄດ້ສອນແຜນແຫ່ງຄວາມສຸກຂອງພຣະເຈົ້າ ແລະ ໄດ້ຕອບຄຳຖາມ ຂອງຄອບຄົວຂອງເຮົາກ່ຽວກັບສາດສະໜານຳອີກ. ເຂົາເຈົ້າໄດ້ສອນວ່າ ຄອບຄົວສາມາດຢູ່ດ້ວຍກັນໃນຖານະພໍ່, ແມ່, ລູກຊາຍ ແລະ ລູກສາວ ໄດ້ແທ້ຫລັງຈາກຊີວິດນີ້.

ຄອບຄົວຂອງພວກເຮົາໄດ້ຮັບບັບຕິສະມາ. ໃນໄລຍະການປ່ຽນແປງນິໄສເກົ່າ, ປະຖິ້ມວັດທະນະທຳດັ້ງເດີມ, ແລະ ກາຍມາເປັນສະມາຊິກທີ່ເຂັ້ມແຂງ ຂອງສາດສະໜາຈັກ ບາງເທື່ອກໍລຳບາກຫລາຍ. ແຕ່ດ້ວຍຄວາມເມດຕາ ແລະ ຄວາມຮັກຂອງພຣະເຈົ້າ ແລະ ດ້ວຍຄວາມຊ່ວຍເຫລືອຈາກຜູ້ນຳ ແລະ ສະມາຊິກຫລາຍຄົນ, ພວກເຮົາຈຶ່ງໄດ້ຜ່ານຜ່າປີທີ່ລຳບາກຕອນຕົ້ນໆໄດ້.

ລ້ານໆຄົນທີ່ໄດ້ເຂົ້າຮ່ວມສາດສະໜາຈັກ ແລະ ຜູ້ທີ່ກຳລັງປ່ຽນໃຈເຫລື້ອມໃສ ແລະ ຜູ້ທີ່ໄດ້ຮັບບັບຕິສະມາ ໃນແຕ່ລະອາທິດ ແມ່ນໄດ້ມີປະຈັກພະຍານກ່ຽວກັບພາບທີ່ມາໃຫ້ເຫັນຄັ້ງທຳອິດ. ພຣະວິນຍານບໍລິສຸດສາມາດຊ່ວຍເຮົາແຕ່ລະຄົນໃຫ້ຈື່ຈຳສິ່ງນັ້ນໄດ້ ຕາບໃດທີ່ພວກເຮົາຍັງດຳລົງຊີວິດ ຕາມຄວາມຈິງຂອງພຣະກິດຕິຄຸນ ຂອງພຣະເຢຊູຄຣິດ.

ພາບທີ່ມາໃຫ້ເຫັນຄັ້ງທຳອິດ ແລະ ສາດສະດາໂຈເຊັບ ສະມິດ ໄດ້ນຳຄວາມຮູ້ເພີ່ມເຕີມ ແລະ ຄວາມຈິງທີ່ຈຳເປັນ ສຳລັບຄວາມສຸກຂອງພວກເຮົາໃນຊີວິດນີ້ ແລະ ເພື່ອຄວາມສູງສົ່ງ ໃນທີ່ປະທັບຂອງພຣະເຈົ້າ ມາໃຫ້ເຮົາ. ຂ້າພະເຈົ້າ ຈະກ່າວເຖິງຄວາມຈິງສາມປະການທີ່ເຮົາໄດ້ຮັບ ແລະ ຕ້ອງປະຕິບັດຕາມ ເພາະວ່າຊາຍໜຸ່ມຜູ້ນັ້ນໄດ້ຄຸເຂົ່າອະທິຖານດ້ວຍຄວາມຈິງໃຈ.

ພຣະເຈົ້າໄດ້ເອີ້ນສາດສະດາທັງຫລາຍມາເປັນຜູ້ນຳ ແລະ ນຳທາງພວກເຮົາ.

ຄວາມຈິງທີ່ຈຳເປັນ ທີ່ເຮົາຮຽນຈາກພາບທີ່ມາໃຫ້ເຫັນຄັ້ງທຳອິດ ແລະ ສາດສະດາ ໂຈເຊັບ ສະມິດ ແມ່ນວ່າພຣະເຈົ້າເອີ້ນ ສາດສະດາ,³ ຜູ້ພະຍາກອນ, ແລະ ຜູ້ເປີດເຜີຍ ເພື່ອສັ່ງສອນ, ນຳທາງ, ເຕືອນ, ແລະ ເປັນຜູ້ນຳພວກເຮົາ.⁴ ຜູ້ຊາຍທີ່ສັກສິດເຫລົ່ານີ້ ເປັນປາກສຽງໃຫ້ແກ່ພຣະເຈົ້າ ຢູ່ເທິງແຜ່ນດິນໂລກ,⁵ ດ້ວຍສິດອຳນາດທີ່ຈະກ່າວ ແລະ ກະທຳ ໃນພຣະນາມຂອງພຣະຜູ້ເປັນເຈົ້າ.⁶ ໂດຍການເຮັດຕາມຄຳສັ່ງສອນຂອງພວກເພິ່ນຢ່າງເຄັ່ງຄັດ, ພວກເຮົາຈະໄດ້ຮັບການປົກປ້ອງ ແລະ ຮັບພອນປະເສີດ ໃນການເດີນທາງຂອງພວກເຮົາ ຢູ່ເທິງໂລກນີ້.

ເມື່ອຂ້າພະເຈົ້າ ສຶກສາຢູ່ມະຫາວິທະຍາໄລ ບຣິກຳ ຢັງ ຕອນເປັນໜຸ່ມ, ຍັງໂສດ, ຈົບຈາກການສອນສາດສະໜາ, ຂ້າພະເຈົ້າໄດ້ໄປກອງປະຊຸມໃຫຍ່ສາມັນ ພາກຖານະປະໂລຫິດ ຢູ່ຕຶກແທເບີແນໂກ ໃນບໍລິເວນພຣະວິຫານ. ສະໄໝນັ້ນແມ່ນປະທານ ເອສະຣາ ແທັບ ເບັນສັນ ເປັນປະທານຂອງສາດສະໜາຈັກ, ເພິ່ນໄດ້ຊຸກຍູ້ໃຫ້ ຜູ້ທີ່ຈົບສອນສາດສະໜາທຸກຄົນ ຖືເອົາເລື່ອງແຕ່ງງານ ເປັນເລື່ອງຈິງຈັງ ແລະ ເຮັດໃຫ້ມັນເປັນລຳດັບ ທີ່ສຳຄັນສຸດໃນຊີວິດຂອງຕົນ⁷ ຫລັງຈາກກອງປະຊຸມນັ້ນ, ຕົນເອງຮູ້ວ່າ ໄດ້ຖືກຮຽກຮ້ອງໃຫ້ກັບໃຈ ແລະ ໃຫ້ເຮັດຕາມຄຳແນະນຳ ຂອງສາດສະດາ.

ດັ່ງນັ້ນ, ຂ້າພະເຈົ້າຈຶ່ງກັບໄປບ້ານເກີດຂອງຕົນ ທີ່ປະເທດ ບຣາຊິນ ເພື່ອຊອກເມຍ.ກ່ອນຈະເດີນທາງໄປຝຶກງານທີ່ປະເທດບຣາຊິນ ເປັນເວລາສອງເດືອນ, ຂ້າພະເຈົ້າໄດ້ໂທຫາແມ່ ແລະ ໝູ່ເພື່ອນບາງຄົນ ແລະ ກໍໄດ້ລາຍຊື່ຜູ້ສາວປະມານ 10 ຄົນ—ຊຶ່ງຜູ້ໜຶ່ງ ອາດເປັນພັນລະຍາໃນອະນາຄົດ.

ເມື່ອຢູ່ປະເທດບຣາຊິນ ຫລັງຈາກທີ່ໄດ້ໄຕ່ຕອງ ແລະ ອະທິຖານ ຫລາຍພໍສົມຄວນ, ຂ້າພະເຈົ້າໄດ້ພົບ, ໄດ້ໄປທ່ຽວ, ໄດ້ໝັ້ນ ແລະ ຕັ້ງມື້ທີ່ຈະແຕ່ງງານກັບສາວຄົນໜຶ່ງ ໃນຈຳນວນຜູ້ສາວສິບຄົນນັ້ນ. ມັນບໍ່ແມ່ນການທຳລາຍສະຖິຕິສຳລັບນັກຮຽນໃນເມືອງໂພຣໂວ້, ຣັດຢູທາ ທີ່ຈະນັດທ່ຽວ ແລ້ວໝັ້ນ ໄວວາແບບນັ້ນ, ແຕ່ສຳລັບມາດຕະຖານຂອງປະເທດບຣາຊິນແລ້ວ ແມ່ນໄວແທ້ໆ.

ສອງສາມເດືອນຕໍ່ມາ, ຂ້າພະເຈົ້າ ໄດ້ແຕ່ງງານກັບນາງ ອີເລນ. ນາງເປັນຫົວແກ້ວຫົວແຫວນ ແລະ ຄ້ຳຄູນແທ້ໆ.

ຂ້າພະເຈົ້າ ບໍ່ໄດ້ແນະນຳວ່າ ທຸກຄົນຄວນເຮັດລາຍຊື່ແບບນັ້ນ, ແຕ່ຂ້າພະເຈົ້າຂໍແນະນຳ ຢ່າງໜັກແໜ້ນວ່າ—ເມື່ອສາດສະດາ ຜູ້ມີຊີວິດຢູ່ບອກກ່າວ ເຮົາກໍຄວນເຮັດຕາມສະເໝີ.

ສາດສະດາຜູ້ປະຈຸບັນຂອງພຣະເຈົ້າ ແມ່ນປະທານ ທອມມັສ ແອັສ ມອນສັນ, ພວກເຮົາຈະໄດ້ຮັບພອນ ຖ້າຫາກພວກເຮົາເຮັດຕາມຄຳສັ່ງສອນຂອງເພິ່ນຢ່າງຄົບຖ້ວນ.

ຄວາມຮູ້ກ່ຽວກັບລັກສະນະທີ່ແທ້ຈິງຂອງພຣະເຈົ້າ

ຄວາມຈິງອີກຢ່າງໜຶ່ງ ທີ່ພວກເຮົາໄດ້ຮຽນຮູ້ແມ່ນມາຈາກພາບທີ່ມາໃຫ້ເຫັນຄັ້ງທຳອິດ ແລະ ສາດສະດາ ໂຈເຊັບ ສະມິດ ແມ່ນລັກສະນະທີ່ແທ້ຈິງຂອງພຣະເຈົ້າ. ຄິດເບິ່ງດູວ່າ ພວກເຮົາໂຊກດີຂະໜາດໃດ ທີ່ຮູ້ວ່າພຣະເຈົ້າມີພຣະກາຍທີ່ມີເນື້ອໜັງ ແລະ ກະດູກ ແລະ ມີລັກສະນະເໝືອນເຮົາ,⁸ ເພື່ອໃຫ້ເຮົາສາມາດນະມັດສະການພຣະເຈົ້າ ຜູ້ຊົງເປັນຈິງ, ຜູ້ຊຶ່ງເຮົາສາມາດເຂົ້າໃຈໄດ້, ແລະ ໄດ້ສະແດງຕົວ ແລະ ເປີດເຜີຍພຣະອົງ ແລະ ພຣະບຸດຂອງພຣະອົງ ແກ່ສາດສະດາທັງຫລາຍ—ທັງສາດສະດາໃນສະໄໝບູຮານ ແລະ ສາດສະດາໃນປະຈຸບັນ.⁹ ພຣະອົງເປັນພຣະເຈົ້າ ທີ່ຮັບຟັງ ແລະ ຕອບຄຳອະທິຖານຂອງເຮົາ;¹⁰ ຊຶ່ງພຣະອົງຫລຽວເບິ່ງເຮົາຈາກສະຫວັນ¹¹ ແລະ ຄອຍຫ່ວງໃຍກັບຄວາມທຸກສຸກທາງວິນຍານ ແລະ ທາງຮ່າງກາຍຂອງເຮົາສະເໝີມາ; ພຣະເຈົ້າອະນຸຍາດໃຫ້ເຮົາເຮັດຕາມອຳເພີໃຈ ໃນການຕັດສິນໃຈທີ່ຈະເຮັດຕາມພຣະອົງ ແລະ ເຊື່ອຟັງພຣະບັນຍັດຂອງພຣະອົງ ໂດຍບໍ່ມີການບັງຄັບເຮົາ;¹² ພຣະອົງປະທານພອນ ແລະ ປ່ອຍໃຫ້ເຮົາປະເຊີນ ກັບຄວາມລຳບາກຕ່າງໆ ເພື່ອເຮົາຈະໄດ້ພັດທະນາຕົນ ແລະ ກາຍເປັນເໝືອນດັ່ງພຣະອົງ.

ພຣະອົງເປັນພຣະເຈົ້າທີ່ເມດຕາ ຜູ້ຊຶ່ງປະທານແຜນໃຫ້ເຮົາ ເພື່ອເຮົາຈະມີຄວາມສຸກໃນຊີວິດນີ້ ແລະ ໃນນິລັນດອນ.

ພຣະເຢຊູເປັນພຣະຜູ້ຊ່ວຍໃຫ້ລອດຂອງເຮົາ

ຈາກພາບທີ່ມາໃຫ້ເຫັນຄັ້ງທຳອິດ ແລະ ຈາກສາດສະດາ ໂຈເຊັບ ສະມິດ, ເຮົາໄດ້ຮັບຄວາມຮູ້ເຖິງຄວາມຈິງ ແລະ ພາລະກິດທີ່ສັກສິດຂອງອົງພຣະເຢຊູຄຣິດເຈົ້າ, ຜູ້ຊຶ່ງເປັນສີລາເອກ ຂອງສາດສະໜາຂອງເຮົາ.

ເພາະວ່າຄວາມຕາຍຖືກນຳເຂົ້າມາສູ່ໂລກ, ຕາບໃດທີ່ເຮົາມີຊີວິດຢູ່ ເຮົາກໍຈະຕາຍໃນວັນໃດວັນໜຶ່ງແນ່ນອນ. ຜົນທີ່ຕາມມາຢ່າງໜຶ່ງຂອງການຕາຍ ແມ່ນການສູນເສຍຮ່າງກາຍໂດຍຖາວອນ; ເຮົາຈະບໍ່ສາມາດເອົາມັນກັບມາໄດ້ອີກ. ນອກຈາກນີ້ແລ້ວ, ເຮົາຈະບໍ່ມີວັນກັບຄືນໄປຫາທີ່ປະທັບຂອງພຣະເຈົ້າໄດ້ ເພາະວ່າເຮົາທຸກຄົນເຮັດບາບ ຕອນເຮົາຢູ່ໃນໂລກ.

ທ່ານນຶກອອກໄດ້ບໍວ່າ ຜົນທີ່ຕາມມາຈະເປັນແນວໃດ ຖ້າທ່ານຖືກກີດກັນຈາກທີ່ປະທັບຂອງພຣະເຈົ້າ ແລະ ບໍ່ມີວັນທີ່ຈະມີຮ່າງກາຍເລີຍ?

ເຮົາຈຳເປັນຕ້ອງມີພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ ເພື່ອຊ່ວຍກູ້ເຮົາຈາກຄວາມຕາຍ ແລະ ການບາບ. ພາຍໃຕ້ການຊີ້ນຳຂອງພຣະບິດາເທິງສະຫວັນ, ພຣະເຢຊູຄຣິດໄດ້ສະເດັດມາສູ່ໂລກ, ໄດ້ຮັບເອົາຄວາມທຸກທໍລະມານ, ສິ້ນພຣະຊົນເທິງໄມ້ກາງແຂນ, ແລະ ຟື້ນຄືນພຣະຊົນ ເພື່ອໃຫ້ເຮົາສາມາດຟື້ນຄືນຊີວິດໄດ້ເໝືອນກັນ, ແລະ ດ້ວຍການກັບໃຈຢ່າງແທ້ຈິງ ແລະ ການເຮັດ ແລະ ຮັກສາພັນທະສັນຍາ, ເຮົາຈະສາມາດໄປເຖິງທີ່ປະທັບຂອງພຣະຜູ້ເປັນເຈົ້າໄດ້ອີກ.

ຢາໂຄບໄດ້ອະທິບາຍວ່າ, “ໂອ້ ພຣະກະລຸນາທິຄຸນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ ຜູ້ໄດ້ຕຽມທາງເພື່ອການໜີຂອງພວກເຮົາ ໃຫ້ພົ້ນຈາກເງື້ອມມືຂອງມານຮ້າຍທີ່ເປັນຕາຢ້ານຜູ້ນັ້ນ; ແທ້ຈິງແລ້ວ, ມານຮ້າຍຜູ້ນັ້ນແມ່ນຄວາມຕາຍ ແລະ ນະລົກ ຊຶ່ງຂ້າພະເຈົ້າເອີ້ນວ່າ ຄວາມຕາຍທາງຮ່າງກາຍ ແລະ ຄວາມຕາຍທາງວິນຍານນຳອີກ.”¹³

ພຣະເຢຊູ ເປັນພຣະເມຊີອາ ທີ່ໄດ້ສັນຍາໄວ້, ເປັນຜູ້ອອກກົດ, ເປັນຜູ້ສັກສິດແຫ່ງອິດສະຣາເອນ, ເປັນພຣະຜູ້ຊ່ວຍໃຫ້ລອດ, ພຣະຜູ້ໄຖ່, ອົງກະສັດ, ແລະ ເປັນໝົດທຸກຢ່າງສຳລັບເຮົາ.

ຂໍໃຫ້ເຮົາຈົ່ງສືບຕໍ່ເຮັດຕາມຄວາມຈິງທີ່ຈຳເປັນ ແລະ ຄວາມຮູ້ເຫລົ່ານີ້, ເຊື່ອຟັງພຣະເຈົ້າ ແລະ ພຣະບຸດອົງດຽວຂອງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.