ຄວາມສາມາດທາງວິນຍານ
ໃນຖານະສານຸສິດທີ່ຊື່ສັດຂອງພຣະເຢຊູຄຣິດ, ທ່ານສາມາດໄດ້ຮັບການດົນໃຈ ແລະ ການເປີດເຜີຍສ່ວນຕົວ ທີ່ສອດຄ່ອງກັບພຣະບັນຍັດຂອງພຣະອົງ, ອັນທີ່ເໝາະສົມສຳລັບທ່ານ.
ຂະນະທີ່ຂ້າພະເຈົ້າກຳລັງກັບຈາກຄ້າຍນອນປ່າຂອງກຸ່ມຍິງໜຸ່ມໃນລະດູແລ້ງຜ່ານມານີ້, ຍິງໜຸ່ມທີ່ໜ້າຮັກຄົນໜຶ່ງໄດ້ຍື່ນເຈ້ຍນ້ອຍໃຫ້ຂ້າພະເຈົ້າ. ໃນນັ້ນ, ນາງໄດ້ຖາມວ່າ, “ຂ້ານ້ອຍຊິຮູ້ໄດ້ແນວໃດ ຕອນທີ່ພຣະເຈົ້າບອກຂ້ານ້ອຍກ່ຽວກັບບາງສິ່ງ?” ຂ້າພະເຈົ້າ ມັກ ຄຳຖາມຂອງນາງ. ຈິດວິນຍານຂອງເຮົາຢາກຕິດຕໍ່ກັບບ້ານແຫ່ງສະຫວັນຂອງເຮົາ. ເຮົາຢາກຮູ້ສຶກສຳຄັນ ແລະ ເປັນປະໂຫຍດ. ແຕ່ບາງເທື່ອເຮົາກໍບໍ່ຮູ້ຈັກວ່າອັນໃດເປັນຄວາມຄິດຂອງເຮົາເອງ ແລະ ອັນໃດເປັນຄວາມປະທັບໃຈຈາກພຣະວິນຍານ. ສາດສະດາ, ໃນສະໄໝບູຮານ ແລະ ໃນສະໄໝໃໝ່, ໄດ້ສິດສອນວ່າ ຖ້າຫາກສິ່ງໃດ “ເຊື້ອເຊີນ ແລະ ຊັກຊວນໃຫ້ເຮັດສິ່ງດີ, ມັນມາຈາກພຣະຄຣິດ.”1
ປະທານຣະໂຊ ເອັມ ແນວສັນ ໄດ້ສະເໜີຄຳເຊື້ອເຊີນທີ່ລຽບງ່າຍ ແລະ ມີພະລັງວ່າ: “ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າ ຂໍ ໃຫ້ທ່ານຈົ່ງຂະຫຍາຍ ຄວາມສາມາດທາງວິນຍານ ຂອງທ່ານ ເພື່ອຈະໄດ້ຮັບການເປີດເຜີຍ. … ໃນການເລືອກທີ່ຈະເຮັດສິ່ງທີ່ເປັນທາງວິນຍານ ທ່ານຈະຊື່ນຊົມກັບຂອງປະທານແຫ່ງພຣະວິນຍານບໍລິສຸດ ແລະ ໄດ້ຍິນສຸລະສຽງຂອງພຣະວິນຍານຫລາຍກວ່າເກົ່າ ແລະ ແຈ່ມແຈ້ງກວ່າເກົ່າ.”2
ຄວາມປາດຖະໜາຂອງຂ້າພະເຈົ້າໃນເຊົ້າມື້ນີ້ ແມ່ນທີ່ຈະກ່າວກັບທ່ານຈາກໃຈ ກ່ຽວກັບສີ່ວິທີ ເພື່ອເພີ່ມຄວາມສາມາດທາງວິນຍານຂອງທ່ານ ທີ່ຈະຮັບເອົາການເປີດເຜີຍ.
1. ຕັ້ງໃຈຫາເວລາ ແລະ ສະຖານທີ່ ທີ່ຈະສາມາດໄດ້ຍິນສຸລະສຽງຂອງພຣະເຈົ້າ
ເມື່ອທ່ານໃຊ້ອຳເພີໃຈຂອງທ່ານຈັດເວລາ ເພື່ອເຂົ້າໃກ້ສຸລະສຽງຂອງພຣະເຈົ້າໃນທຸກວັນ, ໂດຍສະເພາະໃນພຣະຄຳພີມໍມອນ, ເມື່ອເວລາຜ່ານໄປ ສຸລະສຽງຂອງພຣະອົງຈະແຈ່ມແຈ້ງ ແລະ ຄຸ້ນເຄີຍຫລາຍຂຶ້ນສຳລັບທ່ານ.
ເພາະ ສິ່ງລົບກວນ ແລະ ສຽງອຶກກະທຶກ ມີເຕັມຢູ່ໃນໂລກ ແລະ ຢູ່ໃນບ້ານເຮືອນ ແລະ ໃນຊີວິດຂອງເຮົາ ຈຶ່ງອາດເປັນເລື່ອງຍາກທີ່ຈະໄດ້ຍິນສຸລະສຽງຂອງພຣະອົງ. ສິ່ງລົບກວນເຫລົ່ານີ້ ສາມາດເຕັມຢູ່ໃນຈິດໃຈຂອງເຮົາ ຈົນວ່າເຮົາບໍ່ມີເວລາສຳລັບການກະຕຸ້ນທີ່ອ່ອນໂຍນຂອງພຣະວິນຍານບໍລິສຸດ.
ສາດສະດາໂຈເຊັບ ສະມິດ ໄດ້ສິດສອນວ່າ ສ່ວນຫລາຍແລ້ວພຣະເຈົ້າຈະເປີດເຜີຍພຣະອົງເອງ “ໃຫ້ເຫັນເປັນສ່ວນຕົວ, ໃນຫ້ອງນອນ, ໃນຖິ່ນແຫ້ງແລ້ງກັນດານ ຫລື ໃນທົ່ງ, ແລະ ໂດຍປົກກະຕິແລ້ວ ຈະບໍ່ມີສຽງອຶກກະທຶກນຶກນອງ.”3
ຊາຕານຢາກແຍກເຮົາຈາກສຸລະສຽງຂອງພຣະເຈົ້າ ໂດຍການກີດກັນເຮົາຈາກບ່ອນທີ່ມິດງຽບ. ຖ້າຫາກພຣະເຈົ້າກ່າວໃນສຸລະສຽງທີ່ແຜ່ວເບົາ, ແລ້ວທ່ານ ແລະ ຂ້າພະເຈົ້າກໍຈຳເປັນຕ້ອງເຂົ້າໃກ້ພຣະອົງຫລາຍກວ່າເກົ່າ. ໃຫ້ຄິດເບິ່ງດູວ່າ ຈະມີຫຍັງເກີດຂຶ້ນ ຖ້າຫາກເຮົາໃຊ້ເວລາຕິດຕໍ່ກັບສະຫວັນ ຫລາຍເທົ່າກັບເວລາທີ່ເຮົາໃຊ້ຕິດຕໍ່ກັບ ວາຍຟາຍ! ຈົ່ງຫາເວລາ ແລະ ຫາສະຖານທີ່ ແລະ ຮັບຟັງສຸລະສຽງຂອງພຣະເຈົ້າ. ແລະ ຮັກສາການນັດພົບນີ້ໃຫ້ຕົງເວລາ, ເພາະມັນສຳຄັນຫລາຍສຳລັບເຮົາ!
2. ລົງມືເຮັດໂດຍທີ່ບໍ່ຊັກຊ້າ
ເມື່ອທ່ານໄດ້ຮັບການກະຕຸ້ນ ແລະ ກະທຳຕາມດ້ວຍຄວາມຕັ້ງໃຈ, ແລ້ວພຣະຜູ້ເປັນເຈົ້າຈະສາມາດໃຊ້ທ່ານ. ເມື່ອທ່ານເຮັດຫລາຍຂຶ້ນເທົ່າໃດ, ທ່ານຈະຄຸ້ນເຄີຍກັບສຸລະສຽງຂອງພຣະວິນຍານຫລາຍຂຶ້ນເທົ່ານັ້ນ. ທ່ານຈະຮູ້ຈັກການນຳພາຂອງພຣະເຈົ້າຫລາຍຂຶ້ນ ແລະ ພຣະອົງຈະ “ເຕັມພຣະໄທ … ທີ່ຈະເປີດເຜີຍພຣະດຳລັດ ແລະ ພຣະປະສົງຂອງພຣະອົງ”4 ຖ້າຫາກທ່ານຊັກຊ້າ, ທ່ານອາດລືມການກະຕຸ້ນ ຫລື ພາດໂອກາດທີ່ຈະຊ່ວຍເຫລືອບາງຄົນແທນພຣະເຈົ້າ.
3. ຂໍພາລະຈາກພຣະຜູ້ເປັນເຈົ້າ
ຄຳອະທິຖານທີ່ພຣະບິດາເທິງສະຫວັນມັກຕອບໄວແມ່ນ ຄຳອ້ອນວອນຂໍໃຫ້ເຫັນບາງຄົນທີ່ຕ້ອງການຄວາມຊ່ວຍເຫລືອຂອງເຮົາ. ປະທານເຮັນຣີ ບີ ໄອຣິງ ໄດ້ສິດສອນເຮົາ ໃຫ້ສະແຫວງຫາການເປີດເຜີຍ ໂດຍການທູນຂໍໃຫ້ພຣະເຈົ້າຊ່ວຍເຮົາໃຫ້ຮູ້ຈັກຜູ້ທີ່ເຮົາຄວນຊ່ວຍເຫລືອແທນພຣະອົງ. “ຖ້າຫາກເຮົາທູນຂໍເຊັ່ນນັ້ນ, ແລ້ວພຣະວິນຍານບໍລິສຸດຈະມາ ແລະ ທ່ານຈະຮູ້ສຶກໄດ້ຮັບການດົນໃຈກ່ຽວກັບສິ່ງທີ່ທ່ານສາມາດເຮັດເພື່ອຄົນອື່ນ. ເມື່ອທ່ານໄປເຮັດສິ່ງເຫລົ່ານັ້ນ, ກໍໝາຍຄວາມວ່າ ທ່ານໄປແລ່ນວຽກໃຫ້ພຣະຜູ້ເປັນເຈົ້າ, ເມື່ອທ່ານແລ່ນວຽກໃຫ້ພຣະຜູ້ເປັນເຈົ້າ, ທ່ານຈະເໝາະສົມສຳລັບຂອງປະທານແຫ່ງພຣະວິນຍານບໍລິສຸດ.”5
ທ່ານສາມາດອະທິຖານ ແລະ ຂໍພາລະຈາກພຣະຜູ້ເປັນເຈົ້າໄດ້. ເມື່ອທ່ານເຮັດ, ພຣະອົງຈະສາມາດໃຊ້ຄວາມຊຳນານທີ່ທຳມະດາຂອງທ່ານ ເພື່ອບັນລຸວຽກງານທີ່ໜ້າອັດສະຈັນໃຈຂອງພຣະອົງ.
ພໍ່ຕູ້ຂອງຂ້າພະເຈົ້າ, ຟຣິສ໌ ຮອລ໌ມາ ລັນເກຼນ, ໄດ້ອົບພະຍົບຈາກປະເທດສະວີເດັນ ຕອນເພິ່ນມີອາຍຸ 19 ປີ. ເພິ່ນໄດ້ມາເຖິງສະຫະລັດອາເມຣິກາຄົນດຽວ ພ້ອມກັບກະເປົາເດີນທາງໜ່ວຍໜຶ່ງ ແລະ ການສຶກສາຈົບຊັ້ນປໍຫົກ. ໂດຍທີ່ບໍ່ສາມາດເວົ້າພາສາອັງກິດ, ພໍ່ຕູ້ຈຶ່ງໄດ້ເດີນທາງໄປລັດ ອໍເຣກອນ ແລະ ໄດ້ທຳງານຢູ່ໂຮງເລື່ອຍແຫ່ງໜຶ່ງ, ແລະ ຫລັງຈາກນັ້ນ ເພິ່ນພ້ອມດ້ວຍແມ່ຕູ້, ແລະ ແມ່ຂອງຂ້າພະເຈົ້າ, ໄດ້ເຂົ້າຮ່ວມສາດສະໜາຈັກ. ເພິ່ນບໍ່ເຄີຍເປັນຜູ້ຄວບຄຸມຫວອດ, ແຕ່ໄດ້ເປັນຄູສອນປະຈຳບ້ານທີ່ຊື່ສັດ, ໄດ້ພາຫລາຍກວ່າ 50 ຄອບຄົວ ມາເຂັ້ມແຂງໃນສາດສະໜາຈັກ. ເພິ່ນເຮັດໄດ້ແນວໃດ?
ຫລັງຈາກພໍ່ຕູ້ໄດ້ເສຍຊີວິດໄປ, ຂ້າພະເຈົ້າໄດ້ເປີດເບິ່ງກັບເອກະສານຂອງເພິ່ນ ແລະ ໄດ້ເຫັນຈົດໝາຍສະບັບໜຶ່ງຈາກຜູ້ຊາຍຄົນໜຶ່ງ ທີ່ໄດ້ກັບມາໂບດ ເພາະຄວາມຮັກຂອງພໍ່ຕູ້. ຈົດໝາຍບອກວ່າ, “ເຄັດລັບຂອງ ບຣາເດີ ຟຣິສ໌, ຂ້ອຍເຊື່ອວ່າ ເປັນເພາະເພິ່ນໄດ້ໄປແລ່ນວຽກໃຫ້ພຣະບິດາເທິງສະຫວັນຕະຫລອດເວລາ.”
ຈົດໝາຍສະບັບນັ້ນແມ່ນມາຈາກ ບຣາເດີ ເວນ ຊີມະນິສ. ພໍ່ຕູ້ໄດ້ໄປຢ້ຽມຢາມລາວ ແລະ ໄດ້ຮູ້ຈັກທຸກຄົນໃນຄອບຄົວຂອງລາວ. ເມື່ອເວລາຜ່ານໄປ, ພໍ່ຕູ້ໄດ້ບອກເຂົາເຈົ້າວ່າ ເຂົາເຈົ້າສຳຄັນຫລາຍ, ແລະ ເພິ່ນໄດ້ເຊື້ອເຊີນເຂົາເຈົ້າໄປໂບດ. ແຕ່ເຊົ້າວັນອາທິດມື້ນັ້ນ, ບຣາເດີ ຊີມະນິສ ໄດ້ຕື່ນນອນກັບຄວາມຄິດຊອກຫາວິທີ—ລາວ ຢາກແປງຫລັງຄາເຮືອນ ແລະ ຝົນກໍຈະຕົກໃນອາທິດນັ້ນ. ລາວໄດ້ຕັດສິນໃຈໄປໂບດ, ຈັບມືຖາມສະບາຍດີພໍ່ຕູ້, ແລະ ແລ້ວກັບບ້ານໄປແປງຫລັງຄາຕໍ່. ຄອບຄົວຂອງລາວໄດ້ຢູ່ກອງປະຊຸມສິນລະລຶກປາດສະຈາກລາວ.
ແຜນຂອງລາວກໍໄດ້ເລື່ອງຢູ່ ຈົນກະທັ້ງລາວໄດ້ຍິນສຽງຄົນປີນຂັ້ນໄດ, ຂຶ້ນມາຫລັງຄາເຮືອນ. ລາວເວົ້າວ່າ: “ຂ້ອຍຫລຽວເບິ່ງ, … ຂ້ອຍໄດ້ເຫັນ ບຣາເດີ ຟຣິສ໌ ຢືນຢູ່ຫົວຂັ້ນໄດ. ລາວໄດ້ຍິ້ມໃສ່ຂ້ອຍ. ທຳອິດ, ຂ້ອຍກໍສີອາຍໆ ແລະ ຮູ້ສຶກຄືກັນກັບເດັກນ້ອຍທີ່ລັກໜີຈາກຫ້ອງຮຽນ. ແລ້ວ … ກໍຮູ້ສຶກໃຈຮ້າຍ. [ແຕ່ ບຣາເດີ ຟຣິສ໌] ໄດ້ຖອດເສື້ອຊຸດຂອງລາວອອກ ແລະ ຫ້ອຍມັນໄວ້ຢູ່ຫົວຂັ້ນໄດ. ຂະນະທີ່ລາວກຳລັງກໍ້ແຂນເສື້ອສີຂາວຂອງລາວຂຶ້ນ, ລາວໄດ້ຫັນມາຫາຂ້ອຍ ແລ້ວເວົ້າວ່າ, ‘ບຣາເດີ ຊີມະນິສ, ເຈົ້າມີຄ້ອນຕີອີກອັນໜຶ່ງບໍ? ວຽກງານນີ້ຄົງສຳຄັນຫລາຍຂະໜາດ ຖ້າບໍ່ດັ່ງນັ້ນເຈົ້າຄົງບໍ່ປະຄອບຄົວຂອງເຈົ້າມາດອກ, ແລະ ຖ້າຫາກວ່າມັນສຳຄັນຫລາຍຂະໜາດນັ້ນ, ຂ້ອຍກໍຢາກຊ່ວຍເຈົ້າ.’ ຂະນະທີ່ຂ້ອຍຈ້ອງຕາລາວ, ຂ້ອຍເຫັນພຽງແຕ່ຄວາມເມດຕາ ແລະ ຄວາມຮັກເໝືອນຢ່າງພຣະຄຣິດ. ຂ້ອຍໄດ້ເຊົາໃຈຮ້າຍ. … ຂ້ອຍກໍວາງເຄື່ອງມືລົງໄວ້ໃນວັນອາທິດມື້ນັ້ນ ແລະ ໄດ້ກັບໄປໂບດນຳເພື່ອນທີ່ດີຂອງຂ້ອຍ.”
ພໍ່ຕູ້ໄດ້ຮັບເອົາພາລະຈາກພຣະຜູ້ເປັນເຈົ້າ, ແລະ ເພິ່ນຮູ້ວ່າ ເພິ່ນຕ້ອງໄປຊອກຫາແກະໂຕທີ່ເສຍໄປ. ຄືກັນກັບຕອນທີ່ພວກຜູ້ຊາຍສີ່ຄົນ ໄດ້ຫາມເພື່ອນຂອງເຂົາເຈົ້າທີ່ເປັນເປ້ຍ ຂຶ້ນໄປເທິງຫລັງຄາ ແລະ ໄດ້ຢ່ອນລາວລົງໄປ ເພື່ອໃຫ້ພຣະເຢຊູປິ່ນປົວ,6 ພາລະຂອງພໍ່ຕູ້ກໍຄືກັນ ໄດ້ພາພໍ່ຕູ້ຂຶ້ນໄປເທິງຫລັງຄາ. ພຣະຜູ້ເປັນເຈົ້າຈະສົ່ງການເປີດເຜີຍມາໃຫ້ຜູ້ທີ່ສະແຫວງຫາທີ່ຈະຊ່ວຍເຫລືອຄົນອື່ນ.
4. ເຊື່ອ ແລະ ໄວ້ວາງໃຈ
ເມື່ອບໍ່ດົນມານີ້, ຂ້າພະເຈົ້າໄດ້ອ່ານກ່ຽວກັບຜູ້ສອນສາດສະໜາທີ່ດີເດັ່ນຄົນໜຶ່ງ ຢູ່ໃນພຣະຄຳພີ ຜູ້ໄດ້ຮັບເອົາພາລະຈາກພຣະຜູ້ເປັນເຈົ້າ. ອາໂຣນໄດ້ສິດສອນກະສັດຂອງຊາວເລມັນ, ຜູ້ສົງໃສວ່າເປັນຫຍັງອຳໂມນ ອ້າຍຂອງອາໂຣນ ຈຶ່ງບໍ່ມາສິດສອນເພິ່ນຄືກັນ. “ແລະ ອາໂຣນກ່າວກັບກະສັດວ່າ: ຈົ່ງເບິ່ງ, ພຣະວິນຍານຂອງພຣະຜູ້ເປັນເຈົ້າໄດ້ເອີ້ນລາວໃຫ້ ໄປທາງອື່ນ.”7
ພຣະວິນຍານໄດ້ກ່າວກັບຂ້າພະເຈົ້າຢູ່ໃນໃຈວ່າ: ເຮົາແຕ່ລະຄົນມີພາລະກິດທີ່ຈະປະຕິບັດ, ແລະ ບາງເວລາພຣະວິນຍານຈະເອີ້ນເຮົາໃຫ້ “ໄປທາງອື່ນ.” ມັນມີຫລາຍວິທີທາງທີ່ຈະເສີມສ້າງອານາຈັກຂອງພຣະເຈົ້າ ໃນຖານະສານຸສິດທີ່ເຮັດ ແລະ ຮັກສາພັນທະສັນຍາຂອງພຣະເຢຊູຄຣິດ. ໃນຖານະສານຸສິດທີ່ຊື່ສັດຂອງພຣະອົງ, ທ່ານສາມາດໄດ້ຮັບການດົນໃຈ ແລະ ການເປີດເຜີຍສ່ວນຕົວ, ທີ່ສອດຄ່ອງກັບພຣະບັນຍັດຂອງພຣະອົງ, ອັນທີ່ເໝາະສົມສຳລັບທ່ານ. ທ່ານມີພາລະກິດ ແລະ ບົດບາດພິເສດ ທີ່ຈະເຮັດໃນຊີວິດນີ້ ແລະ ຈະໄດ້ຮັບການນຳພາພິເສດ ເພື່ອເຮັດມັນໃຫ້ສຳເລັດ.
ນີໄຟ, ນ້ອງຊາຍຂອງຢາເຣັດ, ແລະ ແມ່ນແຕ່ໂມເຊ ທັງໝົດໄດ້ຂ້າມນ້ຳອັນກວ້າງໃຫຍ່—ແລະ ຕ່າງຄົນກໍໄດ້ເຮັດໃນວິທີທາງທີ່ແຕກຕ່າງກັນ. ນີໄຟໄດ້ເຮັດວຽກ “ດ້ວຍຝີມືອັນແປກປະຫລາດ.”8 ນ້ອງຊາຍຂອງຢາເຣັດໄດ້ສ້າງເຮືອທີ່ “ແໜ້ນໜາຄືກັນກັບຊາມ.”9 ແລະ ໂມເຊ “ໄດ້ຍ່າງໄປໃນທະເລເທິງພື້ນດິນແຫ້ງ.”10
ພວກເພິ່ນແຕ່ລະຄົນໄດ້ຮັບການຊີ້ນຳສ່ວນຕົວ, ທີ່ເໝາະສົມກັບພວກເພິ່ນ, ແລະ ຕ່າງຄົນກໍໄວ້ວາງໃຈ ແລະ ເຮັດຕາມ. ພຣະຜູ້ເປັນເຈົ້າສົນໃຈກັບຜູ້ທີ່ເຊື່ອຟັງ ແລະ, ຕາມຄຳຂອງນີໄຟ, ຈະ “ຕຽມທາງໄວ້ໃຫ້ [ເຮົາ ເພື່ອ] ຈະໄດ້ສຳເລັດໃນສິ່ງທີ່ພຣະອົງບັນຊາ.”11 ໃຫ້ເຮົາສັງເກດເບິ່ງ ນີໄຟກ່າວວ່າ, “ທາງ ທົ່ວໆໄປ”—ບໍ່ແມ່ນ “ທາງ ໃດໜຶ່ງໂດຍສະເພາະ.”
ເຮົາໄດ້ພາດ ຫລື ບໍ່ຍອມຮັບເອົາພາລະຈາກພຣະຜູ້ເປັນເຈົ້າບໍ ເພາະພຣະອົງໄດ້ກະກຽມ “ທາງ” ທີ່ແຕກຕ່າງໄປຈາກທີ່ເຮົາຄາດຄິດ?
ພໍ່ຕູ້ຂອງຂ້າພະເຈົ້າໄດ້ຖືກພາໄປຫາສະຖານທີ່ຜິດປົກກະຕິ—ນຸ່ງຊຸດຈົບດີ, ຢູ່ເທິງຫລັງຄາ, ໃນວັນອາທິດ. ຈົ່ງໄວ້ວາງໃຈໃນພຣະເຈົ້າໃຫ້ນຳພາທ່ານ, ແມ່ນແຕ່ຖ້າຫາກທາງນັ້ນເບິ່ງຄືວ່າແຕກຕ່າງຈາກທີ່ທ່ານຄາດຄິດ ຫລື ແຕກຕ່າງຈາກຄົນອື່ນ.
ໄພ່ພົນຍຸກສຸດທ້າຍຈະແຕກຕ່າງກັນ, ແຕ່ “ທຸກຄົນເທົ່າທຽມກັນໝົດສຳລັບພຣະເຈົ້າ”—“ດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ,” ເປັນໂສດ ແລະ ແຕ່ງງານແລ້ວ, ຮັ່ງມີ ແລະ ຍາກຈົນ, ໜຸ່ມ ແລະ ເຖົ້າ, ເປັນສະມາຊິກແຕ່ເກີດ ແລະ ຫາກໍປ່ຽນໃຈເຫລື້ອມໃສ.12 ບໍ່ວ່າທ່ານຈະເປັນຈັ່ງໃດ ຫລື ປະເຊີນກັບສິ່ງໃດຢູ່, ທ່ານກໍຖືກເຊື້ອເຊີນໃຫ້ມາຮ່ວມໂຕະຂອງພຣະຜູ້ເປັນເຈົ້າ.13
ເມື່ອການສະແຫວງຫາ ແລະ ການເຮັດຕາມພຣະປະສົງຂອງພຣະບິດາ ກາຍເປັນແບບແຜນປົກກະຕິປະຈຳວັນຂອງທ່ານ, ແລ້ວທ່ານຈະຖືກພາໄປສູ່ການປ່ຽນແປງ ແລະ ການກັບໃຈຢ່າງແນ່ນອນ.
ໂຄງການໃໝ່ຂອງສາດສະໜາຈັກສຳລັບເດັກນ້ອຍ ແລະ ຊາວໜຸ່ມ ໄດ້ຖືກສ້າງຂຶ້ນເທິງພື້ນຖານຂອງການຮຽນຮູ້ ທີ່ຈະສະແຫວງຫາການເປີດເຜີຍ, ການຄົ້ນຫາສິ່ງທີ່ພຣະຜູ້ເປັນເຈົ້າມີໃຫ້ທ່ານເຮັດ, ແລະ ແລ້ວກະທຳຕາມການຊີ້ນຳນັ້ນ. ເຮົາແຕ່ລະຄົນ, ບໍ່ວ່າຈະຢູ່ໃນໄວໃດ ຫລື ຢູ່ໃນສະຖານະການໃດ, ກໍສາມາດພະຍາຍາມ ສະແຫວງຫາ, ຮັບ, ແລະ ກະທຳໄດ້. ເມື່ອທ່ານເຮັດຕາມແບບແຜນນິລັນດອນນີ້ ທີ່ຖືກແຕ່ງຕັ້ງໄວ້ສຳລັບວັນເວລາຂອງເຮົາ, ແລ້ວທ່ານຈະເຂົ້າໃກ້ພຣະເຢຊູຄຣິດຫລາຍກວ່າເກົ່າ—ເຂົ້າໃກ້ຄວາມຮັກ, ຄວາມສະຫວ່າງ, ຄວາມສະຫງົບສຸກ, ແລະ ອຳນາດຂອງການປິ່ນປົວ ແລະ ຄວາມສາມາດຂອງພຣະອົງຫລາຍກວ່າເກົ່າ. ແລະ ທ່ານຈະມີຄວາມສາມາດທາງວິນຍານຫລາຍກວ່າເກົ່າ ທີ່ຈະກາຍເປັນເຄື່ອງມືປະຈຳວັນ ໃນພຣະຫັດຂອງພຣະອົງ ເພື່ອບັນລຸວຽກງານທີ່ຍິ່ງໃຫຍ່ຂອງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.