ឈ្នះលោកិយ ហើយបានសេចក្តីសម្រាក
ចូរស្វែងរកសេចក្តីសម្រាកពីភាពតានតឹង ភាពមិនច្បាស់លាស់ និងសេចក្តីឈឺចាប់នៃពិភពលោកនេះ ដោយយកឈ្នះលោកិយ តាមរយៈសេចក្តីសញ្ញារបស់បងប្អូនជាមួយព្រះ ។
បងប្អូនប្រុសស្រីជាទីស្រឡាញ់ ខ្ញុំមានអំណរគុណដែលបានជួបបងប្អូននៅព្រឹកដ៏រុងរឿងនាថ្ងៃឈប់សម្រាកនេះ ។ ខ្ញុំគិតអំពីបងប្អូនជានិច្ច ។ ខ្ញុំស្ងើចសរសើរចំពោះរបៀបដែលបងប្អូនចេះជួយយកអាសាគ្នាភ្លាមៗ ពេលឃើញអ្នកដទៃខ្វះខាត ។ ខ្ញុំស្ងើចអស្ចារ្យក្នុងចិត្តចំពោះជំនឿ និងទីបន្ទាល់ដែលបងប្អូន បានបង្ហាញម្តងហើយម្តងទៀត ។ ខ្ញុំទួញយំចំពោះការឈឺចាប់ ការខកចិត្ត និងក្តីបារម្ភរបស់បងប្អូន ។ ខ្ញុំស្រឡាញ់បងប្អូន ។ ខ្ញុំសូមអះអាងថា ព្រះវរបិតាសួគ៌យើង និងព្រះរាជបុត្រាជាទីស្រឡាញ់ទ្រង់គឺព្រះយេស៊ូវគ្រីស្ទ ស្រឡាញ់បងប្អូន ។ ទ្រង់ទាំងទ្វេជ្រាបយ៉ាងច្បាស់ពីកាលៈទេសៈ សេចក្តីល្អ សេចក្តីត្រូវការ និងការអធិស្ឋានទូលសូមជំនួយរបស់បងប្អូន ។ ខ្ញុំសូមអធិស្ឋានម្តងហើយម្តងទៀតដើម្បីឲ្យបងប្អូនទទួលបានអារម្មណ៍នៃសេចក្តីស្រឡាញ់របស់ទ្រង់ចំពោះបងប្អូន ។
ការដកពិសោធសេចក្តីស្រឡាញ់របស់ទ្រង់គឺសំខាន់ណាស់ ពីព្រោះយើងបានជួបនឹងព័ត៌មានរំខានដែលមានមនុស្សទួញសោកជារៀងរាល់ថ្ងៃ ។ មានគ្រាជាច្រើនដែលបងប្អូនអាចនឹងចង់ពាក់ខោអាវដេកយប់ ដេកឱបជង្គង់ រួចហើយសុំឲ្យនរណាម្នាក់ដាស់បងប្អូនឡើង នៅពេលដែលចលាចលទាំងឡាយបានបាត់ទៅ ។
ប៉ុន្ដែបងប្អូនប្រុសស្រីជាទីស្រឡាញ់ មានកិច្ចការអស្ចារ្យជាច្រើននៅចំពោះមុខយើង ។ នៅពេលដ៏ខ្លីខាងមុខនេះ យើងនឹងឃើញការបើកសម្តែង ដ៏មហិមា អំពីព្រះចេស្តារបស់ព្រះអង្គសង្គ្រោះ ដែលលោកិយនេះមិន ធ្លាប់ បានឃើញពីមុនមក ។ នៅចន្លោះពេលឥឡូវនេះ និងពេលដែលទ្រង់យាងមក « ទាំងព្រះចេស្ដា និងសិរីល្អជាខ្លាំង »១ នោះទ្រង់នឹងប្រទានឯកសិទ្ធិ ពរជ័យ និងអព្ភូតហេតុរាប់មិនអស់មកលើមនុស្សស្មោះត្រង់ ។
ទោះបីជាយ៉ាងណាក៏ដោយ បច្ចុប្បន្ននេះយើងកំពុងរស់នៅក្នុងគ្រាមួយដែលស្មុគស្មាញខ្លាំងបំផុត ក្នុងប្រវត្តិសាស្ត្រនៃពិភពលោកនេះ ។ ភាពស្មុគស្មាញ និងឧបសគ្គទាំងនោះបានបន្សល់ទុកនូវអារម្មណ៍ជ្រួលច្របល់ និងនឿយហត់ដល់មនុស្សជាច្រើន ។ ប៉ុន្តែ សូមពិចារណាអំពីបទពិសោធន៍មួយថ្មីៗនេះ ដែលអាចបំភ្លឺអំពីរបៀបដែលបងប្អូន និងខ្ញុំអាចបានសេចក្តីសម្រាក ។
ថ្មីៗនេះ អំឡុងពិធីសម្ពោធព្រះវិហារបរិសុទ្ធ វ៉ាស៊ីនតុន ឌីស៊ី មានសមាជិកម្នាក់ក្នុងគណៈកម្មការនោះ បានឃើញការផ្តោះប្តូរគំនិត នៅពេលគាត់បាននាំភ្ញៀវសារព័ត៌មានដ៏ល្បីល្បាញមួយចំនួន ដើរទស្សនាព្រះវិហារបរិសុទ្ធ ។ មានគ្រួសារមានកូនតូចៗមួយបានចូលរួមដោយចៃដន្យក្នុងក្រុមអ្នកសារព័ត៌មាននេះដែរ ។ អ្នកយកព័ត៌មានម្នាក់បន្តសួរអំពី « ការធ្វើដំណើរ » របស់អ្នកមកព្រះវិហារបរិសុទ្ធ ខណៈពួកគេដើរនៅក្នុងព្រះវិហារបរិសុទ្ធនោះ ។ គាត់ចង់ដឹង ប្រសិនបើការធ្វើដំណើរទៅព្រះវិហារបរិសុទ្ធគឺជានិមិត្តរូបនៃឧបសគ្គនានា នៅក្នុងដំណើរជីវិតរបស់បុគ្គលម្នាក់ឬយ៉ាងណា ។
ក្មេងប្រុសម្នាក់ក្នុងគ្រួសារនោះបានចាប់អារម្មណ៍ការសន្ទនានោះ ។ នៅពេលក្រុមអ្នកទស្សនាចូលទៅដល់បន្ទប់អំណោយទានពិសិដ្ឋ ក្មេងប្រុសនោះបានចង្អុលទៅទីអាសនា ជាកន្លែងដែលសមាជិកលុតជង្គង់ដើម្បីចុះសេចក្តីសញ្ញាជាមួយព្រះ ហើយនិយាយថា « អូ៎ កន្លែងនោះស្អាតណាស់ ។ នេះគឺជាកន្លែងមួយដើម្បីឲ្យមនុស្ស សម្រាក ក្នុងដំណើរមកកាន់ព្រះវិហារបរិសុទ្ធរបស់ពួកគេ » ។
ខ្ញុំឆ្ងល់ថា ក្មេងប្រុសនោះបានដឹងទេថា ការអង្កេតរបស់គាត់គឺត្រឹមត្រូវណាស់ ។ គាត់ទំនងជាមិនដឹងអំពីទំនាក់ទំនងផ្ទាល់រវាង ការចុះសេចក្តីសញ្ញានឹងព្រះនៅក្នុងព្រះវិហារបរិសុទ្ធ និងការសន្យាដ៏អស្ចារ្យរបស់ព្រះអង្គសង្គ្រោះនោះទេ ៖
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នា ឈប់សម្រាក ។
ចូរទទួលនឹមខ្ញុំ ហើយរៀននឹងខ្ញុំចុះ … នោះអ្នករាល់គ្នានឹងបាន សេចក្តីសម្រាក ដល់ព្រលឹង ។
ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។២
បងប្អូនប្រុសស្រីជាទីស្រឡាញ់ ខ្ញុំកើតទុក្ខចំពោះអស់អ្នកដែលចាកចេញពីសាសនាចក្រ ដោយសារពួកគេមានអារម្មណ៍ថា ការធ្វើជាសមាជិកតម្រូវឲ្យពួកគេធ្វើអ្វីៗជាច្រើន ។ តាមពិត ពួកគេពុំទាន់បានដឹងទេថា ការចុះ និងការរក្សាសេចក្តីសញ្ញា ធ្វើឲ្យជីវិតកាន់តែមានភាពងាយស្រួលនោះទេ ! បុគ្គលម្នាក់ៗដែលចុះសេចក្តីសញ្ញានៅក្នុងអាងជ្រមុជទឹក និងនៅក្នុងព្រះវិហារបរិសុទ្ធ—ហើយរក្សាសេចក្តីសញ្ញាទាំងនោះ—គឺបានទទួលព្រះចេស្តារបស់ព្រះយេស៊ូវគ្រីស្ទកាន់តែច្រើនឡើង ។ សូមពិចារណាអំពីសេចក្តីពិតដ៏អស្ចារ្យនោះ !
រង្វាន់នៃការរក្សាសេចក្តីសញ្ញាជាមួយនឹងព្រះគឺជា ព្រះចេស្តាមកពីស្ថានសួគ៌—ពោលគឺព្រះចេស្តាដែលពង្រឹងយើងកាន់តែខ្លាំង ឲ្យទប់ទល់នឹងការសាកល្បង ការល្បួង និងការឈឺចាប់ទាំងឡាយរបស់យើង ។ ព្រះចេស្តានេះជួយឆ្ការផ្លូវរបស់យើង ។ អស់អ្នកដែលរស់នៅតាមក្រឹត្យវិន័យជាន់ខ្ពស់របស់ព្រះយេស៊ូវគ្រីស្ទ មានសិទ្ធិទទួលបានព្រះចេស្តាកាន់តែខ្លាំងរបស់ទ្រង់ ។ ដូច្នេះ អ្នកដែលរក្សាសេចក្តីសញ្ញាមានសិទ្ធិទទួល សេចក្តីសម្រាកដ៏ពិសេសមួយ ដែលកើតមាន តាមរយៈទំនាក់ទំនងនៃសេចក្តីសញ្ញារបស់ពួកគេជាមួយព្រះ ។
ពីមុនព្រះអង្គសង្គ្រោះដាក់ព្រះអង្គទ្រង់ចូលរងទុក្ខនៅក្នុងសួនច្បារគែតសេម៉ានី និងកាល់វ៉ារី នោះទ្រង់បានប្រកាសដល់ពួកសាវកថា « នៅលោកិយនេះ នោះអ្នករាល់គ្នាមានសេចក្តីវេទនាមែន ប៉ុន្តែត្រូវសង្ឃឹមឡើង ដ្បិតខ្ញុំបាន ឈ្នះលោកិយ ហើយ » ។៣ ក្រោយមក ព្រះយេស៊ូវបានទទូចអង្វរពួកយើងម្នាក់ៗឲ្យធ្វើដូច្នេះដែរ ពេលទ្រង់មានបន្ទូលថា « យើង ចង់ឲ្យ អ្នករាល់គ្នាឈ្នះលើលោកិយ » ។៤
បងប្អូនប្រុសស្រីជាទីស្រឡាញ់ សារលិខិតរបស់ខ្ញុំទៅកាន់បងប្អូនថ្ងៃនេះគឺថា ដោយសារព្រះយេស៊ូវគ្រីស្ទបានឈ្នះលោកិយដ៏ធ្លាក់នេះ ហើយដោយសារទ្រង់បានធួននឹងអំពើបាបយើងម្នាក់ៗ នោះយើងក៏អាចឈ្នះពិភពលោកដែលមានអំពើបាបដ៏ជោគជាំ ដែលអត្មានិយម និងគួរឲ្យនឿយហត់នេះផងដែរ ។
ដោយសារព្រះអង្គសង្គ្រោះបានប្រោសលោះពួកយើងម្នាក់ៗពីភាពទន់ខ្សោយ កំហុស និងអំពើបាប ហើយដោយសារទ្រង់បានដកពិសោធការឈឺចាប់ ការបារម្ភ និងបន្ទុកដែលបងប្អូនធ្លាប់មាន៥ពេលបងប្អូនប្រែចិត្តដ៏ពិត ហើយស្វែងរកជំនួយពីទ្រង់ តាមរយៈដង្វាយធួនដ៏និរន្តររបស់ទ្រង់ នោះ បងប្អូនអាចយកឈ្នះលើពិភពលោកដ៏គ្រោះថ្នាក់បច្ចុប្បន្ននេះបាន ។
បងប្អូនអាចយកឈ្នះលើគ្រោះកាចនៃលោកិយដែលធ្វើឲ្យយើងនឿយហត់ខាងវិញ្ញាណ និងខាងសតិអារម្មណ៍នេះរួមទាំងអំនួត កំហឹង អសីលធម៌ ការស្អប់ ភាពលោភលន់ ការច្រណែនឈ្នានីស និងការភ័យខ្លាច ។ ទោះបីជាមានការបង្វែរអារម្មណ៍ និងការមួលបង្កាច់ដែលវិលវល់នៅជុំវិញយើងយ៉ាងណាក្តី ក៏បងប្អូនអាចទទួលបាន សេចក្តីសម្រាក ពិតប្រាកដបានដែរ—មានន័យថាការធូរស្បើយ និងភាពសុខសាន្ត—ទោះបីនៅកណ្តាលបញ្ហាដ៏ទោមនស្សបំផុតរបស់បងប្អូនក្ដី ។
សេចក្តីពិតដ៏សំខាន់នេះជំរុញឲ្យមានសំណួរជាមូលដ្ឋានគ្រឹះចំនួនបី ៖
ទីមួយ តើការឈ្នះលោកិយមានន័យដូចម្តេច ?
ទីពីរ តើយើងធ្វើវាដោយរបៀបណា ?
និងទីបី តើការឈ្នះលោកិយផ្តល់ពរជ័យដល់ជីវិតរបស់យើងយ៉ាងដូចម្តេច ?
តើការឈ្នះលោកិយមានន័យដូចម្តេច ? វាមានន័យថា ការយកឈ្នះលើការល្បួងដែលនាំឲ្យខ្វល់ខ្វាយច្រើនចំពោះរបស់ផងលោកិយ ជាងការណ៍ទាំងឡាយនៃព្រះនោះ ។ វាមានន័យថា ទុកចិត្តលើគោលលទ្ធិនៃព្រះគ្រីស្ទ ជាងលើទស្សនៈរបស់មនុស្ស ។ វាមានន័យថា ការអររីករាយនៅក្នុងសេចក្តីពិត ទប់ទល់ការបោកបញ្ឆោត ហើយប្រែជា « អ្នកដើរតាមព្រះគ្រីស្ទដោយរាបសា » ។៦ វាមានន័យថា ការជ្រើសរើសមិនធ្វើអ្វីដែលបណ្តាញព្រះវិញ្ញាណបរិសុទ្ធ ។ វាមានន័យថា ស្ម័គ្រចិត្តដើម្បី « បោះបង់ចោល » អំពើបាបដែលយើងចូលចិត្ត ។៧
ឥឡូវការឈ្នះលោកិយវាពុំមែនមានន័យថា ការប្រែជាល្អឥតខ្ចោះនៅក្នុងជីវិតនេះ ឬថា បញ្ហារបស់បងប្អូនត្រូវរលាយបាត់អស់នោះទេ—ព្រោះវានឹងមិនរលាយបាត់ទៅទេ ។ ហើយវាក៏ ពុំមែន មានន័យថា បងប្អូនលែងធ្វើខុសទៀតនោះដែរ ។ ប៉ុន្តែការឈ្នះលោកិយមានន័យថា ការទប់ទល់នឹងអំពើបាបរបស់បងប្អូននឹងមានខ្លាំងឡើង ។ ដួងចិត្តរបស់បងប្អូននឹងបន្ទន់ នៅពេលសេចក្តីជំនឿរបស់បងប្អូនលើព្រះយេស៊ូវគ្រីស្ទកើនឡើង ។៨ ការឈ្នះលោកិយមានន័យថា ការស្រឡាញ់ព្រះ និងព្រះរាជបុត្រាសំណព្វទ្រង់ចម្រើនខ្លាំងឡើង លើសអស់ទាំងការស្រឡាញ់នរណាម្នាក់ ឬអ្វីផ្សេងៗទៀត ។
បន្ទាប់មក តើយើងឈ្នះលោកិយដោយរបៀបណា ? ស្តេចបេនយ៉ាមីនបានបង្រៀនពីរបៀបដល់យើង ។ ទ្រង់បានមានបន្ទូលថា « មនុស្សខាងសាច់ឈាមគឺជាសត្រូវដល់ព្រះ » ហើយនឹងនៅយ៉ាងនេះជារៀងដរាបតទៅ « លើកលែងតែគេព្រមធ្វើតាមសេចក្ដីទូន្មាននៃព្រះវិញ្ញាណបរិសុទ្ធ ហើយសម្រាតភាពខាងសាច់ឈាមចេញ ហើយក្លាយទៅជាអ្នកបរិសុទ្ធវិញ តាមរយៈដង្វាយធួននៃព្រះគ្រីស្ទដ៏ជាព្រះអម្ចាស់ » ។៩ រាល់ពេលដែលបងប្អូនស្វែងរក និងធ្វើតាមការបំផុសគំនិតពីព្រះវិញ្ញាណ រាល់ពេលដែលបងប្អូនធ្វើអ្វីល្អៗ—អ្វីដែល « មនុស្សខាងសាច់ឈាម » មិនធ្វើ—នោះបងប្អូនកំពុងឈ្នះលោកិយនេះហើយ ។
ការឈ្នះលោកិយពុំមែនជាព្រឹត្តិការណ៍មួយដែលកើតឡើងក្នុងពេលមួយថ្ងៃពីរថ្ងៃនោះទេ ។ វាកើតឡើងពេញមួយជីវិត នៅពេលយើងឱបក្រសោបគោលលទ្ធិនៃព្រះគ្រីស្ទខ្ជាប់ខ្ជួន ។ យើងបណ្តុះសេចក្តីជំនឿលើព្រះយេស៊ូវគ្រីស្ទ តាមរយៈការប្រែចិត្តជាប្រចាំ និងការរក្សាសេចក្តីសញ្ញាដែលប្រទានអំណាចដល់យើង ។ យើងបន្តនៅលើផ្លូវនៃសេចក្តីសញ្ញា ហើយទទួលពរជ័យឲ្យរឹងមាំខាងវិញ្ញាណ មានវិវរណៈផ្ទាល់ខ្លួន ចម្រើនសេចក្តីជំនឿ និងការងារបម្រើនៃពួកទេវតា ។ ការរស់នៅតាមគោលលទ្ធិនៃព្រះគ្រីស្ទអាចបង្កើតជាវដ្ដប្រកបដោយអានុភាព និងគុណធម៌ និងបង្កើតជាសន្ទុះខាងវិញ្ញាណនៅក្នុងជីវិតរបស់យើង ។១០
នៅពេលយើងព្យាយាមរស់នៅតាមក្រឹត្យវិន័យកាន់តែខ្ពស់របស់ព្រះយេស៊ូវគ្រីស្ទ នោះដួងចិត្ត និងធម្មជាតិជាមនុស្សរបស់យើងនឹងចាប់ផ្តើមផ្លាស់ប្តូរ ។ ព្រះអង្គសង្គ្រោះ លើក យើងឡើងផុតពីឥទ្ធិពលនៃពិភពលោកដ៏ធ្លាក់នេះ ដោយប្រទានពរដល់យើងឲ្យមានសេចក្តីសប្បុរស ភាពរាបសា ចិត្តល្អ ចេះលត់ដំខ្លួន មានភាពសុខសាន្ត និង សេចក្តីសម្រាក ។
ឥឡូវ បងប្អូនអាចគិតថា រឿងនេះស្តាប់ទៅវាដូចជាកិច្ចការលំបាកខាងវិញ្ញាណជាង សេចក្តីសម្រាក ប៉ុន្តែនេះគឺជាសេចក្តីពិតដ៏ធំមហិមាគឺថា ៖ ខណៈដែលពិភពលោកនេះទទូចចង់បាន អំណាច ទ្រព្យសម្បត្តិ ប្រជាប្រិយភាព និងតម្រេកខាងសាច់ឈាមនាំឲ្យមានសុភមង្គល នោះវាពុំមែនជាការពិតទេ ! វាពុំអាចទេ ! វាពុំបង្កើតអ្វីឡើយលើកលែងតែជំនួសដោយ « ស្ថានភាពដ៏មានពរ និងរីករាយ » នៃអស់អ្នកណាដែល « កាន់តាមព្រះបញ្ញត្តិទាំងឡាយនៃព្រះ » តែប៉ុណ្ណោះ ។១១
សេចក្តីពិតគឺថា វា កាន់តែនឿយហត់ខ្លាំង ឡើងដើម្បីស្វែងរកសុភមង្គលនៅកន្លែងដែលបងប្អូន មិន អាចរកវាឃើញ ! ទោះបីជាយ៉ាងណាក៏ដោយ នៅពេលបងប្អូនទឹមនឹមជាមួយព្រះយេស៊ូវគ្រីស្ទ ហើយធ្វើកិច្ចការខាងវិញ្ញាណ ដែលតម្រូវឲ្យធ្វើដើម្បីឈ្នះលោកិយ នោះទ្រង់ ហើយមានតែទ្រង់ប៉ុណ្ណោះ ដែលមានព្រះចេស្តាលើកបងប្អូនឡើងចេញពីឥទ្ធិពលនៃពិភពលោកនេះ ។
ឥឡូវនេះ តើការឈ្នះលោកិយផ្តល់ពរជ័យដល់ជីវិតរបស់យើងយ៉ាងដូចម្តេច ? ចម្លើយគឺច្បាស់លាស់ថា ៖ ការចូលទៅក្នុងទំនាក់ទំនងនៃសេចក្តីសញ្ញាជាមួយព្រះ ចងភ្ជាប់យើងទៅនឹងទ្រង់ តាមរបៀបមួយដែលធ្វើឲ្យ អ្វីៗគ្រប់យ៉ាងអំពីជីវិតមានកាន់តែភាពងាយស្រួល ។ សូមកុំយល់ច្រឡំសម្ដីខ្ញុំឲ្យសោះ ៖ ខ្ញុំ ពុំមែន និយាយថា ការចុះសេចក្តីសញ្ញាធ្វើឲ្យជីវិតមាន ភាពងាយស្រួល នោះទេ ។ តាមពិត បងប្អូនត្រូវរំពឹងថានឹងមានការផ្ទុយទៅវិញទេ មារសត្រូវមិនចង់ឲ្យបងប្អូនរកឃើញព្រះចេស្តានៃព្រះយេស៊ូវគ្រីស្ទឡើយ ។ ប៉ុន្តែការដាក់នឹមជាមួយព្រះអង្គសង្គ្រោះមានន័យថា បងប្អូនមានសិទ្ធិទទួលព្រះចេស្តាដើម្បីពង្រឹង និងប្រោសលោះរបស់ទ្រង់
ខ្ញុំសូមបញ្ជាក់ឡើងវិញអំពីការបង្រៀនដ៏ជ្រាលជ្រៅរបស់ប្រធាន អ៊ែសរ៉ា ថាហ្វ ប៊ែនសឹន ៖ « បុរសស្ត្រីដែលបង្វែរជីវិតរបស់ខ្លួនទៅរកព្រះ នឹងរកឃើញថាទ្រង់អាចធ្វើឲ្យជីវិតរបស់ពួកគេទទួលប្រយោជន៍ច្រើន ជាងដែលពួកគេធ្វើដោយខ្លួនឯង ។ ទ្រង់នឹងធ្វើឲ្យពួកគេកាន់តែមានអំណរ បង្កើនទស្សនវិស័យ បំភ្លឺគំនិត … លើកស្ទួយវិញ្ញាណ ចម្រើនពរជ័យ បង្កើនឱកាស លួងលោមព្រលឹង ប្រទានមិត្តភក្តិ និងចាក់ស្រោចភាពសុខសាន្តដល់ពួកគេ » ។១២
ឯកសិទ្ធិដែលពុំអាចប្រៀបផ្ទឹមបានទាំងនេះ កើតមានដល់អស់អ្នកដែលស្វែងរកការគាំទ្រពីស្ថានសួគ៌ ដើម្បីជួយពួកគេឈ្នះលោកិយនេះ ។ នៅទីបញ្ចប់ ខ្ញុំសូមអញ្ជើញសមាជិកទូទាំងសាសនាចក្រឲ្យទទួលយកការទទួលខុសត្រូវដូចគ្នា ដែលខ្ញុំបានផ្តល់ឲ្យពួកយុវមជ្ឈិមវ័យរបស់យើង កាលពីខែឧសភាកន្លងទៅនេះ ។ កាលនោះខ្ញុំជំរុញពួកគេ—ហើយឥឡូវនេះខ្ញុំ អង្វរករដល់បងប្អូន—ឲ្យទទួលខុសត្រូវលើទីបន្ទាល់ផ្ទាល់ខ្លួនរបស់បងប្អូន អំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ សូមខិតខំដើម្បីមានទីបន្ទាល់នោះ ។ សូមចិញ្ចឹមបីបាច់វា ដើម្បីឲ្យវាលូតលាស់ ។ សូមពង្រឹងវាដោយសេចក្ដីពិត ។ សូមកុំបំពុលទីបន្ទាល់ដោយទស្សនវិជ្ជាខុសឆ្គងរបស់បុរស និងស្រ្តីដែលមិនជឿឡើយ ។ ពេលបងប្អូនបន្តពង្រឹងទីបន្ទាល់អំពីព្រះយេស៊ូវគ្រីស្ទជាអាទិភាពដ៏ខ្ពស់បំផុតរបស់បងប្អូន នោះសូមចាំមើលអព្ភូតហេតុដែលនឹងកើតមាននៅក្នុងជីវិតរបស់បងប្អូន ។១៣
ការអង្វររបស់ខ្ញុំចំពោះបងប្អូននាព្រឹកនេះគឺ ចូរស្វែងរក សេចក្តីសម្រាក ពីភាពតានតឹង ភាពមិនច្បាស់លាស់ និងសេចក្តីឈឺចាប់នៃពិភពលោកនេះ ដោយ ការឈ្នះ លោកិយ តាមរយៈសេចក្តីសញ្ញារបស់បងប្អូនជាមួយព្រះ ។ ចូរអនុញ្ញាតឲ្យទ្រង់ដឹងតាមរយៈការអធិស្ឋាន និងសកម្មភាពរបស់បងប្អូន ថា បងប្អូនពិតជាចង់ឈ្នះលោកិយនេះមែន ។ ចូរទូលសូមទ្រង់ឲ្យបំភ្លឺគំនិត ហើយប្រទានជំនួយដែលបងប្អូនត្រូវការ ។ សូមកត់ត្រាគំនិតដែលផុសឡើងដល់បងប្អូន នៅពេលបងប្អូនអធិស្ឋានជារៀងរាល់ថ្ងៃ បន្ទាប់មកសូមធ្វើតាមការបំផុតគំនិតនោះទាំងស្រុងដោយឧស្សាហ៍ព្យាយាម ។ ចូរចំណាយពេលកាន់តែច្រើននៅក្នុងព្រះវិហារបរិសុទ្ធ និងព្យាយាមយល់របៀបដែលព្រះវិហារបរិសុទ្ធបង្រៀនបងប្អូន ឲ្យឈ្នះលើពិភពលោកដ៏ធ្លាក់នេះ ។១៤
ដូចខ្ញុំបានលើកឡើងពីមុន ការប្រមូលផ្ដុំអ៊ីស្រាអែលគឺជាកិច្ចការដ៏សំខាន់ បំផុត ដែលកំពុងតែកើតឡើងនៅលើផែនដីសព្វថ្ងៃនេះ ។ ធាតុដ៏សំខាន់មួយនៃការប្រមូលផ្តុំនេះ គឺការរៀបចំមនុស្សដែលមានសមត្ថភាព ដែលត្រៀមខ្លួន និងដែលស័ក្តិសម ដើម្បីទទួលព្រះអម្ចាស់ ពេលទ្រង់យាងមកម្តងទៀត ជាបុគ្គលដែលជ្រើសរើសព្រះយេស៊ូវគ្រីស្ទជាងរើសយកពិភពលោកដ៏ធ្លាក់នេះ ជាបុគ្គលដែលរីករាយនៅក្នុងសិទ្ធិជ្រើសរើសរបស់ពួកគេ ដើម្បីរស់នៅតាមក្រឹត្យវិន័យកាន់តែខ្ពស់ និងកាន់តែបរិសុទ្ធនៃព្រះយេស៊ូវគ្រីស្ទ ។
បងប្អូនប្រុសស្រីជាទីស្រឡាញ់ ខ្ញុំសូមអំពាវនាវដល់បងប្អូនឲ្យប្រែជាមនុស្សសុចរិតបែបនេះ ។ ចូរមានអំណរគុណ និងគោរពសេចក្តីសញ្ញារបស់បងប្អូនលើសអស់ការតាំងចិត្តដទៃទៀតទាំងអស់ ។ នៅពេលបងប្អូនទុកឲ្យព្រះឈ្នះក្នុងជីវិត នោះខ្ញុំសូមសន្យាថា បងប្អូននឹងកាន់តែមានភាពសុខសាន្ត ទំនុកចិត្ត អំណរ ហើយប្រាកដណាស់គឺ សេចក្តីសម្រាក ។
ដោយអំណាចនៃភាពជាសាវកដ៏បរិសុទ្ធដែលបានប្រទានមកខ្ញុំ នោះខ្ញុំសូមប្រសិទ្ធពរដល់បងប្អូននៅក្នុងការព្យាយាមឈ្នះលោកិយនេះ ។ ខ្ញុំសូមប្រសិទ្ធពរឲ្យបងប្អូនបង្កើនសេចក្ដីជំនឿទៅលើព្រះយេស៊ូវគ្រីស្ទ ហើយរៀនពឹងផ្អែកលើព្រះចេស្តារបស់ទ្រង់កាន់តែខ្លាំងឡើង ។ ខ្ញុំសូមប្រសិទ្ធពរឲ្យបងប្អូនអាចញែកដឹងសេចក្តីពិតពីគំហុសឆ្គង ។ ខ្ញុំសូមប្រសិទ្ធពរឲ្យបងប្អូនយកចិត្តទុកដាក់កាន់តែខ្លាំងលើការណ៍ទាំងឡាយនៃព្រះ ជាងអ្វីៗដែលជារបស់លោកិយនេះ ។ ខ្ញុំសូមប្រសិទ្ធពរឲ្យបងប្អូនមើលឃើញតម្រូវការនៃអស់អ្នកដែលនៅជុំវិញបងប្អូន ហើយពង្រឹងដល់មនុស្សដែលបងប្អូនស្រឡាញ់ ។ ដោយសារព្រះយេស៊ូវបានឈ្នះលោកិយនេះ នោះបងប្អូនក៏អាចឈ្នះលោកិយនេះបានផងដែរ ។ ខ្ញុំសូមថ្លែងទីបន្ទាល់ដូច្នោះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕