ສ່ວນສິບ: ໄຂປະຕູສະຫວັນ

ໂດຍ ແອວເດີ ນຽວ ແອວ ແອນເດີເຊັນ

ແຫ່ງກຸ່ມອັກຄະສາວົກສິບສອງ

ປະຕູສະຫວັນຈະໄຂອອກໃນຫລາຍໆວິທີທາງ. ຈົ່ງໄວ້ວາງໃຈໃນເວລາຂອງພຣະຜູ້ເປັນເຈົ້າ; ພອນນັ້ນຈະມີມາສະເໝີ.

ໃນຂະນະທີ່ຂ້າພະເຈົ້າໄດ້ຢູ່ອາເມຣິກາໃຕ້ເມື່ອບໍ່ດົນມານີ້, ບຣາເດີ ຣໍເຈີ ປາຣາ ຈາກປະເທດເວເນຊູເອລາ ໄດ້ແບ່ງປັນປະສົບການດັ່ງຕໍ່ໄປນີ້ກັບຂ້າພະເຈົ້າ:

“ໃນປີ 2019 ປະເທດເວເນຊູເອລາ ໄດ້ສັ່ນຄອນໂດຍບັນຫາທີ່ເຮັດໃຫ້ໄຟຟ້າດັບເປັນເວລາຫ້າວັນ.

“ຄວາມວຸ້ນວາຍ ແລະ ອະທິປະໄຕໄດ້ປົກຄອງຖະໜົນຫົນທາງ, ແລະ ຫລາຍໆຄົນທີ່ໝົດຫວັງກໍບໍ່ມີອາຫານພຽງພໍ.

“ບາງຄົນໄດ້ເລີ່ມລັກລອບທຸລະກິດທີ່ຂາຍອາຫານ, ທຳລາຍທຸກສິ່ງທີ່ຢູ່ໃນເສັ້ນທາງຂອງພວກເຂົາ.

“ໃນຖານະເຈົ້າຂອງຮ້ານຂາຍເຂົ້າຈີ່ຮ້ານນ້ອຍໆ, ຂ້ອຍເປັນຫ່ວງທຸລະກິດຂອງພວກເຮົາຫລາຍ. ນຳກັນເປັນຄອບຄົວ, ພວກເຮົາໄດ້ຕັດສິນໃຈແຈກຢາຍອາຫານທັງໝົດທີ່ຢູ່ໃນຮ້ານຂາຍເຂົ້າຈີ່ຂອງພວກເຮົາໃຫ້ແກ່ຜູ້ຄົນທີ່ຂັດສົນ.

“ຜ່ານຄືນທີ່ມືດມົນທີ່ສຸດຄືນໜຶ່ງ ໄດ້ມີການຈະລາຈົນໃນທຸກແຫ່ງຫົນ. ຄວາມກັງວົນຢ່າງດຽວຂອງຂ້ອຍແມ່ນຄວາມປອດໄພຂອງພັນລະຍາ ແລະ ລູກໆທີ່ຮັກຂອງຂ້ອຍ.

“ຕອນຮຸ່ງເຊົ້າ ຂ້ອຍໄດ້ໄປທີ່ຮ້ານຂາຍເຂົ້າຈີ່ຂອງພວກເຮົາ. ໜ້າໂສກເສົ້າທີ່, ທຸລະກິດທີ່ຂາຍອາຫານຢູ່ໃກ້ໆທຸກແຫ່ງຖືກທຳລາຍໂດຍພວກລັກລອບ, ແຕ່ຂ້າພະເຈົ້າປະຫລາດໃຈຫລາຍ, ຮ້ານຂາຍເຂົ້າຈີ່ຂອງພວກເຮົາປອດໄພດີ. ບໍ່ມີຫຍັງຖືກທຳລາຍເລີຍ. ຂ້ອຍໄດ້ຂອບພຣະໄທພຣະບິດາເທິງສະຫວັນຂອງຂ້ອຍ.

“ເມື່ອກັບເຖິງບ້ານ, ຂ້ອຍໄດ້ບອກຄອບຄົວຂອງຂ້ອຍເຖິງພອນ ແລະ ການປົກປ້ອງຂອງພຣະເຈົ້າ.

“ເຂົາເຈົ້າທຸກຄົນກໍກະຕັນຍູຫລາຍ.

“ທ້າວໂຣເຮລີໂອ, ລູກຊາຍກົກຂອງຂ້ອຍ, ອາຍຸພຽງ 12 ປີ, ໄດ້ເວົ້າວ່າ, ‘ພໍ່ເອີ້ຍ!!! ລູກຮູ້ວ່າເປັນຫຍັງຮ້ານຂອງພວກເຮົາຈຶ່ງຖືກປົກປ້ອງ. ພໍ່ ແລະ ແມ່ຈ່າຍເງິນສ່ວນສິບຂອງພໍ່ແມ່ສະເໝີມາ.’”

ບຣາເດີ ປາຣາ ໄດ້ສະຫລຸບວ່າ: “ຖ້ອຍຄຳຂອງມາລາກີ ໄດ້ເຂົ້າມາສູ່ຈິດໃຈຂອງຂ້ອຍ. ‘ເຮົາຈະບໍ່ປ່ອຍໃຫ້ຝູງແມງໄມ້ມາທຳລາຍຜົນລະປູກຂອງພວກເຈົ້າ, ແລະຕົ້ນອະງຸ່ນຂອງພວກເຈົ້າກໍຈະມີໝາກຫລາຍ’ [ມາລາກີ 3:11]. ພວກເຮົາໄດ້ຄຸເຂົ່າລົງ ແລະ ດ້ວຍຄວາມກະຕັນຍູ ໄດ້ຂອບພຣະໄທພຣະບິດາເທິງສະຫວັນຂອງພວກເຮົາສຳລັບການອັດສະຈັນຂອງພຣະອົງ.”¹

ຈົ່ງລອງເຮັດຢ່າງນັ້ນກັບເຮົາເບິ່ງ

ທຸກສິ່ງທີ່ເຮົາມີ ແລະ ທຸກສິ່ງທີ່ເຮົາເປັນຢູ່ແມ່ນມາຈາກພຣະເຈົ້າ. ໃນຖານະສານຸສິດຂອງພຣະຄຣິດ, ເຮົາເຕັມໃຈທີ່ຈະແບ່ງປັນກັບຜູ້ຄົນທີ່ຢູ່ອ້ອມຂ້າງເຮົາ.

ກັບທຸກສິ່ງທີ່ພຣະຜູ້ເປັນເຈົ້າປະທານໃຫ້ເຮົາ, ພຣະອົງໄດ້ຂໍໃຫ້ເຮົາສົ່ງຄືນໃຫ້ພຣະອົງ ແລະ ອານາຈັກຂອງພຣະອົງຢູ່ເທິງໂລກ 10 ເປີເຊັນ ຈາກລາຍໄດ້ຂອງເຮົາ. ພຣະອົງໄດ້ສັນຍາກັບເຮົາວ່າ ຖ້າເຮົາຊື່ສັດໃນເລື່ອງສ່ວນສິບຂອງເຮົາ, ພຣະອົງຈະ “ໄຂ … ປະຕູສະຫວັນ, ແລະ ຖອກເທ … ພຣະພອນນາໆຊະນິດ, ຈົນບໍ່ມີຫ້ອງໃສ່.”² ພຣະອົງໄດ້ສັນຍາກັບເຮົາວ່າ ພຣະອົງຈະປົກປ້ອງເຮົາຈາກຄວາມຊົ່ວຮ້າຍ.³ ຄຳສັນຍາເຫລົ່ານີ້ແມ່ນແນ່ນອນ,⁴ ພຣະຜູ້ເປັນເຈົ້າຈຶ່ງປະກາດວ່າ, “ຈົ່ງລອງເຮັດຢ່າງນັ້ນກັບເຮົາເບິ່ງ,”⁵ ຊຶ່ງເປັນວະລີທີ່ຈະບໍ່ພົບເຫັນຢູ່ບ່ອນອື່ນໃດເລີຍໃນພຣະຄຳພີ.

ປະຕູສະຫວັນຈະໄຂອອກໃນຫລາຍໆວິທີທາງ. ບາງວິທີແມ່ນເປັນທາງຝ່າຍໂລກ, ແຕ່ບາງວິທີແມ່ນເປັນທາງຝ່າຍວິນຍານ. ບາງວິທີແມ່ນເຫັນໄດ້ຍາກ ແລະ ມັກຈະຖືກມອງຂ້າມ. ຈົ່ງໄວ້ວາງໃຈໃນເວລາຂອງພຣະຜູ້ເປັນເຈົ້າ; ພອນນັ້ນຈະມີມາສະເໝີ.

ເຮົາເສົ້າສະຫລົດໃຈນຳຜູ້ຄົນທີ່ດີ້ນລົນເພື່ອຈະມີສິ່ງຂອງທີ່ຈຳເປັນຕໍ່ຊີວິດ. ເມື່ອບໍ່ດົນມານີ້ ສາດສະໜາຈັກໄດ້ບໍລິຈາກ 54 ລ້ານໂດລາສະຫະລັດ ເພື່ອໃຫ້ການບັນເທົາຕໍ່ເດັກນ້ອຍ ແລະ ບັນດາແມ່ທີ່ຢູ່ໃນຖານະທີ່ສ່ຽງ ຕະຫລອດທົ່ວໂລກ.⁶ ແລະ ດ້ວຍເງິນບໍລິຈາກຖືສິນອົດເຂົ້າແຕ່ລະເດືອນຂອງທ່ານ, ອະທິການທີ່ດີຂອງເຮົາກໍໄດ້ຊ່ວຍຫລາຍໆພັນຄົນແຕ່ລະອາທິດ ຜູ້ທີ່ຕ້ອງການອາຫານຢູ່ທີ່ໂຕະຂອງເຂົາເຈົ້າ, ເສື້ອຜ້າທີ່ຈະນຸ່ງຫົ່ມ, ແລະ ທີ່ພັກອາໄສເປັນເວລາຊົ່ວຄາວ. ທາງແກ້ໄຂທີ່ຖາວອນຢ່າງດຽວຕໍ່ຄວາມທຸກຍາກຂອງໂລກນີ້ແມ່ນ ພຣະກິດຕິຄຸນຂອງພຣະເຢຊູຄຣິດ.⁷

ເລື່ອງຂອງສັດທາ

ອັກຄະສາວົກໂປໂລ ໄດ້ເຕືອນວ່າ ສະຕິປັນຍາຂອງມະນຸດເຂົ້າໃຈເລື່ອງຂອງມະນຸດ ແຕ່ມີຄວາມລຳບາກທີ່ຈະເຂົ້າໃຈເລື່ອງຂອງພຣະເຈົ້າ.⁸ ຊາວໂລກກ່າວເຖິງສ່ວນສິບໃນທຳນອງເງິນ, ແຕ່ກົດສັກສິດຂອງສ່ວນສິບ ຫລັກໆແລ້ວແມ່ນເປັນເລື່ອງຂອງສັດທາຂອງເຮົາ. ການເປັນຄົນຊື່ສັດໃນເລື່ອງສ່ວນສິບຂອງເຮົາຄືວິທີທາງໜຶ່ງທີ່ເຮົາສະແດງຄວາມເຕັມໃຈຂອງເຮົາທີ່ຈະໃຫ້ພຣະຜູ້ເປັນເຈົ້າເປັນທີໜຶ່ງໃນຊີວິດຂອງເຮົາ, ເໜືອຄວາມຫ່ວງໃຍ ແລະ ຄວາມສົນໃຈຂອງເຮົາ. ຂ້າພະເຈົ້າສັນຍາກັບທ່ານວ່າ ຂະນະທີ່ທ່ານໄວ້ວາງໃຈໃນພຣະຜູ້ເປັນເຈົ້າ, ພອນແຫ່ງສະຫວັນຈະຕິດຕາມມາ.

ພຣະເຢຊູໄດ້ກ່າວວ່າ “ສິ່ງທີ່ເປັນຂອງກາຍຊາ ຈົ່ງຄືນໃຫ້ແກ່ກາຍຊາ; ສິ່ງທີ່ເປັນຂອງພຣະເຈົ້າ ຈົ່ງຄືນຖວາຍໃຫ້ແກ່ພຣະເຈົ້າ.”⁹ ພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນແລ້ວໄດ້ຂໍໃຫ້ຊາວນີໄຟຂຽນຄຳສັນຍາຂອງພຣະອົງທີ່ພົບເຫັນຢູ່ໃນມາລາກີ ໄວ້ໃນບັນທຶກຂອງເຂົາເຈົ້າ.¹⁰ ໃນວັນເວລາຂອງເຮົາ, ພຣະຜູ້ເປັນເຈົ້າໄດ້ຢືນຢັນກົດສ່ວນສິບທີ່ສູງສົ່ງຄືນອີກ, ໂດຍປະກາດວ່າ: “ນີ້ຈະເປັນການເລີ່ມຕົ້ນການເກັບສ່ວນສິບຈາກຜູ້ຄົນຂອງເຮົາ. ແລະ [ພວກເຂົາ] ຈະຈ່າຍໜຶ່ງສ່ວນສິບຂອງລາຍໄດ້ທັງໝົດຂອງພວກເຂົາທຸກໆປີ; ແລະ ນີ້ຈະເປັນກົດຖາວອນສຳລັບພວກເຂົາຕະຫລອດການ.”¹¹

ພຣະຜູ້ເປັນເຈົ້າໄດ້ຊີ້ນຳຢ່າງຊັດເຈນວ່າ ສ່ວນສິບຄວນຈະຖືກເບີກຈ່າຍແນວໃດ, ໂດຍກ່າວວ່າ, “ຈົ່ງນຳໜຶ່ງສ່ວນສິບເຕັມຈຳນວນມາທີ່ວິຫານຂອງເຮົາ,”¹² ຊຶ່ງໝາຍເຖິງ ການນຳໜຶ່ງສ່ວນສິບມາທີ່ອານາຈັກທີ່ຟື້ນຟູຂອງພຣະອົງ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.¹³ ພຣະອົງໄດ້ຊີ້ນຳວ່າ ການໃຊ້ຈ່າຍສ່ວນສິບສັກສິດເຫລົ່ານີ້ຈະຖືກພິຈາລະນາດ້ວຍການອະທິຖານ ໂດຍສະພາຂອງຝ່າຍປະທານສູງສຸດ, ກຸ່ມອັກຄະສາວົກສິບສອງ, ຝ່າຍອະທິການຄວບຄຸມ, “ແລະ ໂດຍສຽງຂອງເຮົາເອງເຖິງພວກເຂົາ, ພຣະຜູ້ເປັນເຈົ້າໄດ້ກ່າວ.”¹⁴

ເງິນທຶນສັກສິດຂອງພຣະຜູ້ເປັນເຈົ້າ

ເງິນທຶນສັກສິດເຫລົ່ານີ້ບໍ່ໄດ້ເປັນຂອງຜູ້ນຳຂອງສາດສະໜາຈັກ. ມັນເປັນຂອງພຣະຜູ້ເປັນເຈົ້າ. ຜູ້ຮັບໃຊ້ຂອງພຣະອົງກໍຮັບຮູ້ດີເຖິງທຳມະຊາດທີ່ສັກສິດຂອງການເປັນຜູ້ພິທັກຮັກສາຂອງພວກເພິ່ນ.

ປະທານກໍດອນ ບີ ຮິງລີ ໄດ້ເລົ່າເຖິງປະສົບການໃນໄວເດັກຂອງເພິ່ນວ່າ: “ຕອນຂ້າພະເຈົ້າຍັງນ້ອຍ ຂ້າພະເຈົ້າໄດ້ຖາມພໍ່ຂອງຂ້າພະເຈົ້າ … ກ່ຽວກັບການໃຊ້ຈ່າຍເງິນທຶນຂອງສາດສະໜາຈັກ. ເພິ່ນໄດ້ເຕືອນຂ້າພະເຈົ້າວ່າ ການຈ່າຍສ່ວນສິບ ແລະ ເງິນບໍລິຈາກຂອງຂ້າພະເຈົ້ານັ້ນເປັນພັນທະທີ່ພຣະເຈົ້າໄດ້ປະທານໃຫ້. ເມື່ອຂ້າພະເຈົ້າເຮັດດັ່ງນັ້ນ, [ພໍ່ຂອງຂ້າພະເຈົ້າໄດ້ກ່າວ,] ສິ່ງທີ່ຂ້າພະເຈົ້າໃຫ້ໄປແລ້ວຈະບໍ່ເປັນຂອງຂ້າພະເຈົ້າອີກຕໍ່ໄປ. ມັນເປັນຂອງພຣະຜູ້ເປັນເຈົ້າ ຜູ້ຊຶ່ງຂ້າພະເຈົ້າອຸທິດຖວາຍມັນໃຫ້.” ພໍ່ຂອງເພິ່ນໄດ້ກ່າວຕື່ມວ່າ: “ສິ່ງທີ່ເຈົ້າໜ້າທີ່ຂອງສາດສະໜາຈັກກະທຳໄປກັບສ່ວນສິບນັ້ນບໍ່ຈຳເປັນຕ້ອງເຮັດໃຫ້ [ລູກກັງວົນເລີຍ, ກໍດອນ ເອີຍ]. ພວກເພິ່ນຕ້ອງຮັບຜິດຊອບຕໍ່ພຣະຜູ້ເປັນເຈົ້າ, ພຣະອົງຈະຮຽກຮ້ອງຄຳອະທິບາຍຈາກການກະທຳຂອງພວກເພິ່ນ.”¹⁵

ເຮົາຮູ້ສຶກເຖິງຄວາມໜັກໜ່ວງຫລາຍແທ້ໆຂອງການ “ຮັບຜິດຊອບຕໍ່ພຣະຜູ້ເປັນເຈົ້າ.”

ສ່ວນສິບ ແລະ ເງິນບໍລິຈາກທີ່ເພື່ອແຜ່ຂອງທ່ານ

ຈາກສ່ວນສິບ ແລະ ເງິນບໍລິຈາກທີ່ເພື່ອແຜ່ທີ່ທ່ານໄດ້ອຸທິດຖວາຍແດ່ພຣະຜູ້ເປັນເຈົ້າ, ປີແລ້ວນີ້ ຫລາຍກວ່າໜຶ່ງພັນລ້ານໂດລາສະຫະລັດ ຖືກນຳໃຊ້ເພື່ອເປັນພອນໃຫ້ແກ່ຄົນຂັດສົນ.¹⁶

ໃນຄວາມຮັບຜິດຊອບທີ່ຍິ່ງໃຫຍ່ຂອງເຮົາ ທີ່ຈະນຳພຣະກິດຕິຄຸນທີ່ຖືກຟື້ນຟູໄປສູ່ຕະຫລອດທົ່ວໂລກ, ເຮົາມີຜູ້ສອນສາດສະໜາຫລາຍກວ່າ 71,000 ຄົນ ທີ່ຮັບໃຊ້ຢູ່ໃນຈຳນວນເຂດເຜີຍແຜ່ 414 ແຫ່ງ.¹⁷ ເປັນເພາະສ່ວນສິບ ແລະ ເງິນບໍລິຈາກຂອງທ່ານ, ຜູ້ສອນສາດສະໜາທັງຫລາຍ, ບໍ່ວ່າສະພາບທາງການເງິນຂອງຄອບຄົວຂອງເຂົາເຈົ້າຈະເປັນແບບໃດກໍຕາມ, ກໍສາມາດຮັບໃຊ້ໄດ້.

ພຣະວິຫານຫລາຍແຫ່ງກໍຖືກສ້າງຂຶ້ນຕະຫລອດທົ່ວໂລກ ໃນຈຳນວນທີ່ບໍ່ເຄີຍມີມາກ່ອນ. ໃນປະຈຸບັນນີ້, ມີພຣະວິຫານ 177 ແຫ່ງເປີດບໍລິການ, 59 ແຫ່ງກຳລັງຢູ່ໃນຂັ້ນຕອນກໍ່ສ້າງ ຫລື ສ້ອມແປງ, ແລະ 79 ແຫ່ງຢູ່ໃນຂັ້ນຕອນວາງແຜນ ແລະ ອອກແບບ.¹⁸ ສ່ວນສິບຂອງທ່ານກຳລັງອະນຸຍາດໃຫ້ພອນຂອງພຣະວິຫານໄປຢູ່ໃນສະຖານທີ່ ທີ່ພຽງແຕ່ພຣະຜູ້ເປັນເຈົ້າເທົ່ານັ້ນສາມາດເຫັນໄດ້ລ່ວງໜ້າ.

ມີຫລາຍກວ່າ 30,000 ກຸ່ມຊຸມນຸມຊົນຢູ່ທີ່ຕຶກໂບດ ແລະ ສະຖານທີ່ຫລາຍພັນແຫ່ງໃນ 195 ປະເທດ ແລະ ອານາເຂດ.¹⁹ ເປັນເພາະສ່ວນສິບທີ່ຊື່ສັດຂອງທ່ານ, ສາດສະໜາຈັກຈຶ່ງຖືກສະຖາປະນາຂຶ້ນໃນເຂດແດນທີ່ຫ່າງໄກຫລາຍແຫ່ງທີ່ທ່ານອາດຈະບໍ່ໄດ້ໄປຢ້ຽມຢາມ ໃນບັນດາໄພ່ພົນຜູ້ຊອບທຳທີ່ທ່ານອາດຈະບໍ່ຮູ້ຈັກເລີຍ.

ໃນປະຈຸບັນນີ້ ສາດສະໜາຈັກອຸປະຖຳສະຖາບັນແຫ່ງການຮຽນຮູ້ລະດັບສູງຢູ່ຫ້າແຫ່ງ.²⁰ ສະຖານທີ່ເຫລົ່ານີ້ໃຫ້ບໍລິການແກ່ນັກສຶກສາຫລາຍກວ່າ 145,000 ຄົນ. ຫ້ອງຮຽນໜຶ່ງແສນ ແລະ ສິບພັນຫ້ອງກຳລັງຖືກສິດສອນແຕ່ລະອາທິດຢູ່ໃນຫ້ອງຮຽນສາດສະໜາ ແລະ ສະຖາບັນ.²¹

ພອນເຫລົ່ານີ້ ແລະ ອີກຫລາຍໆຢ່າງທີ່ຈະມາເຖິງ ສ່ວນຫລາຍແລ້ວຈະມາຈາກຄົນໜຸ່ມ ແລະ ຜູ້ສູງອາຍຸໃນທຸກສະຖານະການທາງດ້ານເສດຖະກິດ ຜູ້ທີ່ຈ່າຍສ່ວນສິບຢ່າງຊື່ສັດ.

ພະລັງທາງວິນຍານຂອງກົດສ່ວນສິບທີ່ສູງສົ່ງບໍ່ໄດ້ຖືກວັດແທກໂດຍຈຳນວນເງິນທີ່ຖືກປະກອບສ່ວນ, ເພາະທັງຜູ້ຄົນທີ່ຮັ່ງມີ ແລະ ຜູ້ທີ່ຍາກຈົນກໍຖືກບັນຊາໂດຍພຣະຜູ້ເປັນເຈົ້າ ໃຫ້ປະກອບສ່ວນ 10 ເປີເຊັນ ຈາກລາຍຮັບຂອງເຂົາເຈົ້າ.²² ພະລັງນັ້ນ ມາຈາກການວາງຄວາມໄວ້ວາງໃຈຂອງເຮົາໃນພຣະຜູ້ເປັນເຈົ້າ.²³

ຄວາມອຸດົມສົມບູນທີ່ເພີ່ມຂຶ້ນຂອງສາດສະໜາຈັກທີ່ຖືກຖ່າຍທອດຜ່ານທາງສ່ວນສິບທີ່ເພື່ອແຜ່ຂອງທ່ານກໍໄດ້ເສີມສ້າງທຶນສະຫງວນຂອງສາດສະໜາຈັກ, ໃຫ້ໂອກາດທີ່ຈະເຮັດໃຫ້ວຽກງານຂອງພຣະຜູ້ເປັນເຈົ້າກ້າວໄປໜ້າ ໄປໄກເກີນກວ່າສິ່ງໃດໆທີ່ເຮົາຍັງບໍ່ເຄີຍໄດ້ປະສົບມາກ່ອນ. ທຸກສິ່ງຢ່າງເປັນທີ່ຮູ້ຈັກໂດຍພຣະຜູ້ເປັນເຈົ້າ, ແລະ ເມື່ອເວລາຜ່ານໄປ, ເຮົາຈະເຫັນຈຸດປະສົງສັກສິດຂອງພຣະອົງບັນລຸຜົນສຳເລັດ.²⁴

ພອນຕ່າງໆຈະມີມາໃນຫລາກຫລາຍວິທີທາງ

ພອນຂອງສ່ວນສິບຈະມີມາໃນຫລາກຫລາຍວິທີທາງ. ໃນປີ 1998 ຂ້າພະເຈົ້າໄດ້ໄປຮ່ວມກອງປະຊຸມໃຫຍ່ຂອງສາດສະໜາຈັກກັບ ແອວເດີ ເຮັນຣີ ບີ ໄອຣິງ ໃນຕອນນັ້ນ ຢູ່ໃນເຂດລັດຢູທາ ທີ່ໃນຕອນນີ້ເປັນທີ່ຮູ້ຈັກກັນວ່າ Silicon Slopes (ຄ້ອຍຊີລິຄອນ), ເປັນຊຸມຊົນນະວັດຕະກຳທາງດ້ານເທັກໂນໂລຈີທີ່ຫລາກຫລາຍ. ມັນເປັນເວລາແຫ່ງຄວາມຈະເລີນຮຸ່ງເຮືອງ, ແລະ ແອວເດີ ໄອຣິງ ໄດ້ເຕືອນບັນດາໄພ່ພົນກ່ຽວກັບການປຽບທຽບສິ່ງທີ່ເຂົາເຈົ້າມີກັບຄົນອື່ນ ແລະ ການຢາກໄດ້ຫລາຍຕື່ມອີກ. ຂ້າພະເຈົ້າຈະຈົດຈຳຄຳສັນຍາຂອງເພິ່ນຕະຫລອດໄປ ທີ່ວ່າ ຂະນະທີ່ເຂົາເຈົ້າຈ່າຍສ່ວນສິບຢ່າງຊື່ສັດ, ຄວາມປາດຖະໜາຂອງເຂົາເຈົ້າທີ່ຢາກມີວັດຖຸຊັບສິນກໍຈະມີໜ້ອຍລົງ. ພາຍໃນສອງປີ, ລາຄາຂອງການລົງທຶນທາງດ້ານເທັກໂນໂລຈີກໍໄດ້ຫລຸດລົງຢ່າງໄວວາ. ຫລາຍຄົນໄດ້ຕົກງານ, ແລະ ຫລາຍບໍລິສັດໄດ້ດີ້ນລົນລະຫວ່າງຊ່ວງເວລາທີ່ປັບຕົວທາງດ້ານການເງິນນີ້. ຜູ້ທີ່ໄດ້ເຮັດຕາມຄຳແນະນຳຂອງປະທານໄອຣິງ ກໍໄດ້ຮັບພອນ.

ຄຳສັນຍາຂອງເພິ່ນໄດ້ເຕືອນໃຈຂ້າພະເຈົ້າເຖິງປະສົບການອີກຢ່າງໜຶ່ງ. ຂ້າພະເຈົ້າໄດ້ພົບ ນາງຊາເລັດ ລິມີ ອາຍຸ 12 ປີ ໃກ້ເມືອງກາກະຊອນ, ປະເທດຝຣັ່ງ, ໃນປີ 1990 ໃນຂະນະທີ່ຮັບໃຊ້ເປັນປະທານເຜີຍແຜ່. ຄອບຄົວລິມີ ເປັນຄອບຄົວທີ່ຊື່ສັດ ທີ່ອາໄສຢູ່ໃນຫ້ອງແຖວແຫ່ງໜຶ່ງກັບລູກໆແປດຄົນ. ເຂົາເຈົ້າມີຮູບຂອງພຣະຜູ້ຊ່ວຍໃຫ້ລອດ ແລະ ສາດສະດາຢູ່ເທິງຝາ. ໃນການສຳພາດສຳລັບປິຕຸພອນຂອງນາງ, ຂ້າພະເຈົ້າໄດ້ຖາມ ນາງຊາເລັດ ຖ້າຫາກວ່ານາງໄດ້ຈ່າຍສ່ວນສິບຢ່າງຊື່ສັດ. ນາງໄດ້ຕອບວ່າ, “ໂດຍ, ປະທານແອນເດີເຊັນ. ແມ່ຂອງຂ້ານ້ອຍໄດ້ສິດສອນຂ້ານ້ອຍວ່າ ມີພອນທັງທາງຝ່າຍໂລກ ແລະ ຝ່າຍວິນຍານ ທີ່ມາຈາກການຈ່າຍສ່ວນສິບຂອງພວກເຮົາ. ແມ່ຂອງຂ້ານ້ອຍໄດ້ສິດສອນຂ້ານ້ອຍວ່າ ຖ້າຫາກພວກເຮົາຈ່າຍສ່ວນສິບສະເໝີໄປ, ແລ້ວພວກເຮົາຈະບໍ່ຂາດແຄນຫຍັງອີກ. ແລະ ປະທານແອນເດີເຊັນ, ພວກເຮົາກໍບໍ່ຂາດແຄນຫຍັງເລີຍ.”

ໃນການອະນຸຍາດໃຫ້ຂ້າພະເຈົ້າແບ່ງປັນເລື່ອງລາວຂອງນາງ, ຊາເລັດ, ດຽວນີ້ 45 ປີ ແລະ ໄດ້ຜະນຶກຢູ່ໃນພຣະວິຫານ, ໄດ້ໃຫ້ຄວາມຄິດເຫັນວ່າ: “ປະຈັກພະຍານຂອງຂ້ານ້ອຍເລື່ອງສ່ວນສິບເປັນຈິງຫລາຍໃນເວລານັ້ນ, ແລະ ມັນກໍແຮງກ້າຫລາຍກວ່າເກົ່າໃນເວລານີ້. ຂ້ານ້ອຍມີຄວາມກະຕັນຍູຢ່າງເລິກເຊິ່ງສຳລັບພຣະບັນຍັດຂໍ້ນີ້. ຕາບໃດທີ່ຂ້ານ້ອຍດຳລົງຊີວິດຕາມພຣະບັນຍັດ, ຂ້ານ້ອຍຈະໄດ້ຮັບພອນຢ່າງລົ້ນເຫລືອຕໍ່ໄປ.”²⁵

ໃນມື້ໜຶ່ງ ເຮົາແຕ່ລະຄົນກໍຈະໄດ້ສິ້ນສຸດການເດີນທາງຂອງເຮົາຢູ່ເທິງໂລກ. ເມື່ອຊາວຫ້າປີກ່ອນ, ພຽງແຕ່ສອງສາມວັນກ່ອນ ມາຕາ ວິວລຽມສ໌, ແມ່ຂອງພັນລະຍາຂອງຂ້າພະເຈົ້າໄດ້ເສຍຊີວິດຈາກໂຣກມະເລັງ, ເພິ່ນໄດ້ຮັບເຊັກເງິນຈຳນວນນ້ອຍໜຶ່ງໃນໄປສະນີ. ເພິ່ນໄດ້ຖາມຫາປຶ້ມເຊັກຂອງເພິ່ນທັນທີຈາກພັນລະຍາຂອງຂ້າພະເຈົ້າ, ແຄຕີ, ເພື່ອຈະຈ່າຍສ່ວນສິບຂອງເພິ່ນ. ເພາະແມ່ຂອງລາວອ່ອນເພຍຫລາຍຈົນຈະຂຽນຫຍັງບໍ່ໄດ້ແລ້ວ, ແຄຕີ ຈຶ່ງໄດ້ຖາມຖ້າວ່າລາວຈະຂຽນເຊັກໃຫ້ແມ່ລາວໄດ້ບໍ. ແມ່ຂອງລາວໄດ້ຕອບວ່າ, “ບໍ່ດອກ, ແຄຕີ. ແມ່ຢາກຂຽນເອງ.” ແລະ ແລ້ວເພິ່ນໄດ້ກ່າວຕື່ມງຽບໆວ່າ “ແມ່ຢາກເປັນຄົນດີຕໍ່ທີ່ປະທັບຂອງພຣະຜູ້ເປັນເຈົ້າ.” ສິ່ງສຸດທ້າຍຢ່າງໜຶ່ງທີ່ແຄຕີ ໄດ້ເຮັດເພື່ອແມ່ຂອງລາວແມ່ນ ໄດ້ຍື່ນຊອງສ່ວນສິບຂອງແມ່ຂອງລາວໃຫ້ອະທິການຂອງເພິ່ນ.

ວຽກງານສຳຄັນຂອງພຣະເຈົ້າ

ອ້າຍເອື້ອຍນ້ອງຂອງຂ້າພະເຈົ້າທັງຫລາຍ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ “ອອກຈາກຄວາມມືດ,” ແລ້ວ²⁶ ນຳພອນຢ່າງອັດສະຈັນໃຈໄປສູ່ຕະຫລອດທົ່ວໂລກ. ຈະມີຜູ້ຄົນທີ່ຊຸກຍູ້ໃຫ້ເຮົາກ້າວໄປໜ້າ ແລະ ຜູ້ຄົນທີ່ບໍ່ສະໜັບສະໜູນເຮົາ. ຂ້າພະເຈົ້າໄດ້ຄິດເຖິງຖ້ອຍຄຳຂອງ ຄາມາລີເອັນ ຜູ້ສະຫລາດ, ຜູ້ທີ່, ເມື່ອໄດ້ຍິນການອັດສະຈັນຈາກອັກຄະສາວົກເປໂຕ ແລະ ໂຢຮັນແລ້ວ, ໄດ້ເຕືອນສະພາໃນເຢຣູຊາເລັມວ່າ:

“ຈົ່ງປ່ອຍ [ພວກຜູ້ຊາຍເຫລົ່ານີ້] ໄປສາ: ຖ້າ … ກິດຈະການຂອງພວກເຂົາມາຈາກມະນຸດ, ມັນກໍຈະເສື່ອມສູນໄປເອງ:

“ແຕ່ຖ້າສິ່ງນັ້ນມາຈາກພຣະເຈົ້າ, ພວກເຈົ້າກໍຈະທຳລາຍພວກເຂົາບໍ່ໄດ້; ພວກເຈົ້າ … ຈະກັບກາຍມາເປັນຜູ້ຕໍ່ສູ້ພຣະເຈົ້າ.”²⁷

ທ່ານ ແລະ ຂ້າພະເຈົ້າເປັນພາກສ່ວນຂອງວຽກງານທີ່ສຳຄັນຂອງພຣະເຈົ້າຢູ່ເທິງໂລກ. ມັນຈະບໍ່ເສື່ອມສູນໄປ ແຕ່ມັນຈະສືບຕໍ່ກ້າວໄປໜ້າຕະຫລອດທົ່ວໂລກ, ກະກຽມຫົນທາງສຳລັບການສະເດັດກັບຄືນມາຂອງພຣະຜູ້ຊ່ວຍໃຫ້ລອດ. ຂ້າພະເຈົ້າເປັນພະຍານເຖິງຖ້ອຍຄຳຂອງ ປະທານຣະໂຊ ເອັມ ແນວສັນ ວ່າ: “ໃນວັນຂ້າງໜ້າ, ເຮົາຈະເຫັນການສະແດງໃຫ້ປະຈັກອັນຍິ່ງ ໃຫຍ່ທີ່ສຸດ ຂອງອຳນາດຂອງພຣະຜູ້ຊ່ວຍໃຫ້ລອດ ທີ່ໂລກ ເຄີຍ ເຫັນມາກ່ອນ. ລະຫວ່າງເວລານີ້ ແລະ ເວລາທີ່ພຣະອົງສະເດັດກັບມາ … , ພຣະອົງຈະປະທານສິດທິພິເສດ, ພອນ, ແລະ ການອັດສະຈັນ ຈົນນັບບໍ່ຖ້ວນໃຫ້ແກ່ຜູ້ທີ່ຊື່ສັດ.”²⁸

ນີ້ແມ່ນພະຍານຂອງຂ້າພະເຈົ້າ. ພຣະເຢຊູຄືພຣະຄຣິດ. ນີ້ແມ່ນວຽກງານທີ່ສັກສິດຂອງພຣະອົງ. ພຣະອົງຈະສະເດັດກັບມາອີກຄັ້ງ. ໃນພຣະນາມຂອງພຣະເຢຊູຄຣິດ, ອາແມນ.