ເປັນຜູ້ຕິດຕາມທີ່ຮັກສັນຕິສຸກຂອງພຣະຄຣິດ

ໂດຍ ແອວເດີ ຄວິນຕິນ ແອວ ຄຸກ

ແຫ່ງກຸ່ມອັກຄະສາວົກສິບສອງ

ຂ້າພະເຈົ້າເປັນພະຍານວ່າ “ຜູ້ຕິດຕາມທີ່ຮັກສັນຕິສຸກຂອງພຣະຄຣິດ” ຈະພົບສັນຕິສຸກສ່ວນຕົວໃນຊີວິດນີ້ ແລະ ການພົບກັນໃໝ່ເທິງສະຫວັນອັນຮຸ່ງໂລດ.

ເຮົາມີຊີວິດຢູ່ໃນວັນເວລາເມື່ອ “ຜູ້ຕິດຕາມທີ່ຮັກສັນຕິສຸກຂອງພຣະຄຣິດ”¹ ປະສົບກັບການທ້າທາຍທີ່ບໍ່ເໝືອນໃຜ. ຜູ້ທີ່ເຊື່ອ, ນະມັດສະການຢ່າງຖ່ອມຕົນ, ແລະ ເປັນພະຍານເຖິງພຣະເຢຊູຄຣິດມັກປະສົບການທົດລອງ, ຄວາມທຸກຍາກ, ແລະ ຄວາມຍາກລຳບາກ.² ພັນລະຍາຂອງຂ້າພະເຈົ້າ, ແມຣີ, ແລະ ຂ້າພະເຈົ້າກໍບໍ່ແຕກຕ່າງ. ສອງສາມປີກ່ອນ, ພວກເຮົາໄດ້ເຫັນເພື່ອນສະໜິດໃນໂຮງຮຽນມັດທະຍົມ, ຄູ່ສອນສາດສະໜາ, ພັນລະຍາອັນລ້ຳຄ່າຂອງເຂົາເຈົ້າບາງຄົນ, ແລະ ອະດີດເພື່ອນຮ່ວມງານຫລາຍຄົນໄດ້ເສຍຊີວິດໄປ, ຫລື, ດັ່ງທີ່ປະທານຣະໂຊ ເອັມ ແນວສັນ ໄດ້ກ່າວ, ໄດ້ຮຽນຈົບໄປອີກຟາກໜຶ່ງຂອງມ່ານແລ້ວ. ພວກເຮົາໄດ້ເຫັນບາງຄົນທີ່ໄດ້ຮັບການລ້ຽງດູດ້ວຍສັດທາ ແລະ ຄວາມເຊື່ອ ໄດ້ກ້າວອອກຈາກເສັ້ນທາງແຫ່ງພັນທະສັນຍາ.

ໜ້າໂສກເສົ້າ, ພວກເຮົາໄດ້ສູນເສຍຫລານຊາຍອາຍຸ 23 ປີ ໃນອຸບັດຕິເຫດທາງລົດທີ່ໜ້າໂສກເສົ້າ. ໝູ່ເພື່ອນ, ສະມາຊິກໃນຄອບຄົວ, ແລະ ເພື່ອນຮ່ວມງານບາງຄົນກໍໄດ້ປະເຊີນກັບບັນຫາດ້ານສຸຂະພາບທີ່ໜັກໜ່ວງເຊັ່ນກັນ.

ເມື່ອໃດກໍຕາມທີ່ການທົດລອງເກີດຂຶ້ນ, ເຮົາໂສກເສົ້າ ແລະ ພະຍາຍາມແບ່ງເບົາພາລະຂອງກັນແລະກັນ.³ ເຮົາຄ່ຳຄວນເຖິງສິ່ງທີ່ຈະບໍ່ສຳເລັດ ແລະ ເພງທີ່ຈະບໍ່ຮ້ອງ.⁴ ສິ່ງບໍ່ດີເກີດຂຶ້ນກັບຄົນດີໃນການເດີນທາງຊ່ວງມະຕະນີ້. ໄຟລຸກລາມຮ້າຍແຮງຢູ່ເມືອງມາອີ ໃນລັດຮາວາຍ, ພາກໃຕ້ຂອງປະເທດຈີເລ, ແລະ ການາດາ ເປັນຕົວຢ່າງຂອງເຫດການທີ່ໜ້າຢ້ານກົວ ທີ່ຄົນດີໆບາງຄັ້ງຕ້ອງປະເຊີນ.

ເຮົາອ່ານຢູ່ໃນໄຂ່ມຸກອັນລ້ຳຄ່າທີ່ພຣະຜູ້ເປັນເຈົ້າໄດ້ເປີດເຜີຍຕໍ່ອັບຣາຮາມ ເຖິງທຳມະຊາດນິລັນດອນຂອງວິນຍານ. ອັບຣາຮາມໄດ້ຮຽນຮູ້ເຖິງຊີວິດກ່ອນເກີດຂອງເຮົາ, ການແຕ່ງຕັ້ງລ່ວງໜ້າ, ການສ້າງ, ການເລືອກພຣະຜູ້ໄຖ່, ແລະ ຊີວິດມະຕະ, ຊຶ່ງເປັນສະພາວະທີສອງຂອງມະນຸດ.⁵ ພຣະຜູ້ໄຖ່ໄດ້ປະກາດວ່າ:

“ພວກເຮົາຈະສ້າງແຜ່ນດິນໂລກໜ່ວຍໜຶ່ງທີ່ວິນຍານເຫລົ່ານີ້ຈະໄດ້ອາໄສຢູ່;

“ແລະ ພວກເຮົາຈະພິສູດພວກເຂົາໂດຍວິທີນີ້, ເພື່ອເບິ່ງວ່າພວກເຂົາຈະເຮັດທຸກສິ່ງທັງປວງສິ່ງໃດກໍຕາມທີ່ພຣະຜູ້ເປັນເຈົ້າອົງເປັນພຣະເຈົ້າຂອງພວກເຂົາຈະບັນຊາພວກເຂົາຫລືບໍ່.”⁶

ບັດນີ້ ເຮົາທຸກຄົນຢູ່ທີ່ນີ້ໃນສະພາວະທີສອງຂອງການເດີນທາງສູ່ຄວາມກ້າວໜ້າໄປສູ່ອານາຈັກແຫ່ງລັດສະໝີພາບ ຊຶ່ງເປັນສ່ວນໜຶ່ງໃນແຜນແຫ່ງຄວາມລອດອັນຍິ່ງໃຫຍ່ ແລະ ຄວາມສູງສົ່ງຂອງພຣະເຈົ້າ. ເຮົາໄດ້ຮັບພອນທີ່ມີອຳເພີໃຈ ແລະ ຢູ່ພາຍໃຕ້ການທົດລອງແຫ່ງຄວາມເປັນມະຕະ. ນີ້ເປັນເວລາທີ່ຈັດສັນໄວ້ສຳລັບເຮົາໃນການກະກຽມທີ່ຈະພົບກັບພຣະເຈົ້າ.⁷ ເຮົາໄດ້ຮັບພອນທີ່ໄດ້ຮູ້ຈັກພຣະເຢຊູຄຣິດ ແລະ ບົດບາດຂອງພຣະອົງຢູ່ໃນແຜນ. ເຮົາມີສິດທິພິເສດທີ່ກາຍເປັນສະມາຊິກຂອງສາດສະໜາຈັກທີ່ຖືກຟື້ນຟູຂອງພຣະອົງ—ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ໃນຖານະຜູ້ຕິດຕາມທີ່ຮັກສັນຕິສຸກຂອງພຣະຄຣິດ, ເຮົາພະຍາຍາມທີ່ຈະດຳລົງຊີວິດຕາມພຣະບັນຍັດຂອງພຣະອົງ. ມັນບໍ່ເຄີຍງ່າຍສຳລັບຜູ້ຕິດຕາມຂອງພຣະອົງ. ທັງບໍ່ເຄີຍງ່າຍສຳລັບພຣະຜູ້ຊ່ວຍໃຫ້ລອດ ທີ່ຈະບັນລຸພາລະກິດໃນຊ່ວງມະຕະຂອງພຣະອົງຢ່າງຊື່ສັດ.

ພຣະຄຳພີຊັດເຈນ: ຫລາຍຄົນຈະຍອມຕໍ່ແນວທາງທີ່ວ່າ “ຈົ່ງກິນ, ຈົ່ງດື່ມ, ແລະ ຈົ່ງມ່ວນຊື່ນເຖີດ, ເພາະວ່າມື້ອື່ນນີ້ພວກເຮົາກໍຈະຕາຍແລ້ວ”.⁸ ຜູ້ບໍ່ເຊື່ອຄົນອື່ນໆຖອຍໄປຢູ່ໃນວົງລ້ອມອັນມືດມົນຂອງຜູ້ເຂົ້າຮ່ວມ ທີ່ມີໃຈດຽວກັນຊຶ່ງສະໜັບສະໜູນ “ສິ່ງໃໝ່ໆ”⁹ ແລະ ປັດຊະຍາຂອງມະນຸດ.¹⁰ ພວກເຂົາບໍ່ຮູ້ວ່າຈະຊອກຫາຄວາມຈິງໄດ້ຢູ່ບ່ອນໃດ.¹¹

ຜູ້ຕິດຕາມທີ່ຮັກສັນຕິສຸກຂອງພຣະຄຣິດບໍ່ໄດ້ເດີນຕາມທາງໃດເຫລົ່ານັ້ນ. ເຮົາເປັນສະມາຊິກທີ່ມີຄວາມອົບອຸ່ນ ແລະ ມີສ່ວນພົວພັນໃນຊຸມຊົນທີ່ເຮົາອາໄສຢູ່. ເຮົາຮັກ, ແບ່ງປັນ, ແລະ ເຊື້ອເຊີນລູກໆທຸກຄົນຂອງພຣະເຈົ້າໃຫ້ຕິດຕາມຄຳສອນຂອງພຣະຄຣິດ.¹² ເຮົາເຮັດຕາມຄຳແນະນຳຂອງສາດສະດາທີ່ຮັກແພງຂອງເຮົາ, ປະທານແນວສັນ: ເຮົາເລືອກບົດບາດຂອງຜູ້ສ້າງສັນຕິສຸກ, ຕອນນີ້ ແລະ ຕະຫລອດໄປ.¹³ ແນວທາງທີ່ດົນໃຈນີ້ສອດຄ່ອງກັບທັງພຣະຄຳພີ ແລະ ການຊີ້ນຳຂອງສາດສະດາ.

ໃນປີ 1829 ສາດສະໜາຈັກທີ່ຖືກຟື້ນຟູຍັງບໍ່ໄດ້ຖືກຈັດຕັ້ງຂຶ້ນເທື່ອ, ທັງພຣະຄຳພີມໍມອນກໍຍັງບໍ່ໄດ້ຖືກຈັດພິມເທື່ອ. ຜູ້ຄົນກຸ່ມນ້ອຍທີ່ດີ້ນລົນ, ຊຶ່ງກະຕຸ້ນໂດຍພຣະວິນຍານຂອງພຣະເຈົ້າ, ໄດ້ຕິດຕາມສາດສະດາໂຈເຊັບ ສະມິດ. ພຣະຜູ້ເປັນເຈົ້າໄດ້ເປີດເຜີຍຄຳແນະນຳຕໍ່ໂຈເຊັບໃນຊ່ວງເວລາທີ່ລຳບາກວ່າ: “ສະນັ້ນ, ຢ່າຢ້ານກົວ, ຝູງແກະນ້ອຍເອີຍ; ຈົ່ງເຮັດຄວາມດີ; ໃຫ້ແຜ່ນດິນໂລກ ແລະ ນະລົກລວມກັນຕໍ່ຕ້ານເຈົ້າ, ແຕ່ຖ້າຫາກເຈົ້າຖືກສ້າງຂຶ້ນເທິງດານຫີນຂອງເຮົາ, ແລ້ວມັນຈະເອົາຊະນະເຈົ້າບໍ່ໄດ້.”¹⁴ ພຣະອົງກໍໄດ້ແນະນຳພວກເພິ່ນວ່າ:

“ໃຫ້ຫວັງເພິ່ງພຣະອົງໃນຄວາມນຶກຄິດທຸກຢ່າງ; ບໍ່ໃຫ້ສົງໄສ, ບໍ່ໃຫ້ຢ້ານກົວ.

“… ຈົ່ງຊື່ສັດ, ຈົ່ງຮັກສາບັນຍັດຂອງເຮົາ, ແລະ ເຈົ້າຈະໄດ້ຮັບອານາຈັກສະຫວັນເປັນມູນມໍລະດົກ.”¹⁵

ຢ່າງແຈ້ງຊັດ, ຈຸດໝາຍປາຍທາງແຫ່ງສະຫວັນຂອງເຮົາບໍ່ໄດ້ປ່ຽນແປງເມື່ອເຮົາປະສົບກັບຄວາມຍາກລຳບາກ. ໃນເຮັບເຣີ ເຮົາຖືກແນະນຳວ່າ “ມີໃຈກ້າເຂົ້າໄປເຖິງພຣະທີ່ນັ່ງແຫ່ງພຣະຄຸນ ເພື່ອພວກເຮົາຈະໄດ້ຮັບພຣະເມດຕາ ແລະ ພົບພຣະຄຸນທີ່ຈະຊ່ວຍເຮົາໃນເວລາທີ່ຕ້ອງການ.”¹⁶ ພຣະເຢຊູຄຣິດເປັນ “ຕົ້ນກຳເນີດແຫ່ງ [ຄວາມລອດນິລັນດອນ].”¹⁷

ຂ້າພະເຈົ້າມັກຄຳຂອງມໍມອນ, ອ້າງໂດຍໂມໂຣໄນ ລູກຊາຍຂອງເພິ່ນ, ກ່າວຊົມເຊີຍ “ຜູ້ຕິດຕາມທີ່ຮັກສັນຕິສຸກຂອງພຣະຄຣິດ … ເພາະການເດີນດ້ວຍສັນຕິສຸກຂອງທ່ານກັບລູກຫລານມະນຸດ.”¹⁸

ສຳລັບພວກເຮົາໃນສາດສະໜາຈັກທີ່ພະຍາຍາມເປັນຜູ້ຕິດຕາມທີ່ຮັກສັນຕິສຸກຂອງພຣະຄຣິດ, ມື້ທີ່ສົດໃສລໍຖ້າເຮົາຢູ່ ເມື່ອເຮົາສຸມໃຈໃສ່ພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ການທົດລອງເປັນສ່ວນໜຶ່ງຂອງຄວາມເປັນມະຕະ ແລະ ເກີດຂຶ້ນໃນຊີວິດຂອງທຸກຄົນ ຕະຫລອດທົ່ວໂລກ. ສິ່ງນີ້ແມ່ນລວມທັງການຂັດແຍ້ງທີ່ຍິ່ງໃຫຍ່ລະຫວ່າງປະເທດ ແລະ ບຸກຄົນ.

ຜູ້ນຳຂອງສາດສະໜາຈັກຖືກຖາມເລື້ອຍໆວ່າ, “ເປັນຫຍັງພຣະເຈົ້າທີ່ທ່ຽງທຳຈຶ່ງຍອມໃຫ້ເລື່ອງບໍ່ດີເກີດຂຶ້ນ, ໂດຍສະເພາະກັບຄົນດີ? ແລະ “ເປັນຫຍັງຄົນທີ່ຊອບທຳ ແລະ ຢູ່ໃນການຮັບໃຊ້ຂອງພຣະຜູ້ເປັນເຈົ້າ ຈຶ່ງບໍ່ໄດ້ຖືກປ້ອງກັນຈາກຄວາມໂສກເສົ້າເຊັ່ນນັ້ນ?”

ເຮົາບໍ່ຮູ້ຄຳຕອບທັງໝົດ; ເຖິງຢ່າງໃດກໍຕາມ, ເຮົາຮູ້ຫລັກທຳສຳຄັນທີ່ຊ່ວຍໃຫ້ເຮົາປະເຊີນກັບການທົດລອງ, ຄວາມທຸກຍາກ, ແລະ ຄວາມຍາກລຳບາກ ດ້ວຍສັດທາ ແລະ ຄວາມໝັ້ນໃຈໃນອະນາຄົດທີ່ສົດໃສ ທີ່ລໍຖ້າເຮົາແຕ່ລະຄົນ. ບໍ່ມີຕົວຢ່າງໃດໃນພຣະຄຳພີກ່ຽວກັບການຜ່ານຜ່າຄວາມທຸກຍາກດີໄປກວ່າພຣະຄຳຂອງພຣະຜູ້ເປັນເຈົ້າ ທີ່ມອບໃຫ້ກັບໂຈເຊັບ ສະມິດ, ຂະນະທີ່ເພິ່ນຖືກຄຸມຂັງຢູ່ໃນຄຸກລີເບີຕີ.

ສ່ວນໜຶ່ງພຣະຜູ້ເປັນເຈົ້າໄດ້ປະກາດວ່າ:

“ຖ້າຫາກປາກນະລົກຈະເປີດກວ້າງງັບເອົາເຈົ້າ, ເຈົ້າຈົ່ງຮູ້ໄວ້ເຖີດ, ລູກຂອງພໍ່, ວ່າສິ່ງທັງໝົດເຫລົ່ານີ້ຈະເປັນປະສົບການໃຫ້ແກ່ເຈົ້າ, ແລະ ຈະເກີດຂຶ້ນເພື່ອຄວາມດີຂອງເຈົ້າ.

“ບຸດມະນຸດໄດ້ລົງຕ່ຳກວ່າທຸກສິ່ງເຫລົ່ານັ້ນທັງໝົດ. ເຈົ້າຍິ່ງໃຫຍ່ກວ່າພຣະອົງບໍ?

“… ຢ່າຢ້ານກົວສິ່ງທີ່ມະນຸດສາມາດເຮັດໄດ້, ເພາະພຣະເຈົ້າຈະຢູ່ກັບເຈົ້າຕະຫລອດການ ແລະ ຕະຫລອດໄປ.¹⁹

ເຫັນໄດ້ຢ່າງຊັດເຈນວ່າ ເຮົາມີພຣະບິດາຜູ້ສະຖິດຢູ່ໃນສະຫວັນຜູ້ຮູ້ຈັກ ແລະ ຮັກເຮົາເປັນສ່ວນຕົວ ແລະ ເຂົ້າໃຈຄວາມທຸກທໍລະມານຂອງເຮົາຢ່າງສົມບູນ. ພຣະບຸດຂອງພຣະອົງ, ພຣະເຢຊູຄຣິດ, ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.

ປະທານຣະໂຊ ເອັມ ແນວສັນ ແລະ ປະທານເອັມ ຣະໂຊ ບາເລີດ ທັງສອງທ່ານໄດ້ເນັ້ນເຖິງຄວາມສຳຄັນຂອງສະບັບພິມໃໝ່ຄັ້ງທີສອງຂອງປຶ້ມ ຈົ່ງສັ່ງສອນພຣະກິດຕິຄຸນຂອງເຮົາ.²⁰ ຂ້າພະເຈົ້າກໍຕື່ນເຕັ້ນຄືກັນກັບພວກເພິ່ນ. ສະບັບໃໝ່ນີ້, ຂະຫຍາຍພຣະຄຳພີສັກສິດ, ປະກາດຢ່າງມີພະລັງວ່າ:

“ໃນການເສຍສະລະຊົດໃຊ້ຂອງພຣະອົງ, ພຣະເຢຊູຄຣິດໄດ້ຮັບເອົາຄວາມເຈັບປວດ, ຄວາມທຸກຍາກ, ແລະ ຄວາມອ່ອນແອຂອງເຮົາ. ດ້ວຍເຫດນີ້, ພຣະອົງຈຶ່ງຈະຮູ້ຈັກ ‘ຕາມທາງຂອງເນື້ອໜັງວ່າ ຈະຊ່ວຍເຫລືອຜູ້ຄົນຂອງພຣະອົງຕາມຄວາມບົກພ່ອງຂອງພວກເຂົາໄດ້ແນວໃດ’ (ແອວມາ 7:12; ເບິ່ງ ຂໍ້ທີ 11 ນຳອີກ). ພຣະອົງເຊື້ອເຊີນວ່າ, ‘ຈົ່ງມາຫາເຮົາ,’ ແລະ ເມື່ອເຮົາເຮັດ, ພຣະອົງຈະໃຫ້ຄວາມພັກຜ່ອນ, ຄວາມຫວັງ, ຄວາມເຂັ້ມແຂງ, ທັດສະນະ, ແລະ ການປິ່ນປົວແກ່ເຮົາ (ມັດທາຍ 11:28; ເບິ່ງ ຂໍ້ທີ 29–30 ນຳອີກ).

“ເມື່ອເຮົາເພິ່ງອາໄສພຣະເຢຊູຄຣິດ ແລະ ການຊົດໃຊ້ຂອງພຣະອົງ, ພຣະອົງສາມາດຊ່ວຍເຮົາໃຫ້ອົດທົນກັບການທົດລອງ, ຄວາມເຈັບປ່ວຍ, ແລະ ຄວາມເຈັບປວດ. ເຮົາສາມາດເຕັມໄປດ້ວຍຄວາມສຸກ, ຄວາມສະຫງົບ, ແລະ ການປອບໂຍນ. ທຸກສິ່ງທຸກຢ່າງທີ່ບໍ່ຍຸດຕິທຳໃນຊີວິດສາມາດຖືກແກ້ໄຂໃຫ້ຖືກຕ້ອງໄດ້ ຜ່ານທາງການຊົດໃຊ້ຂອງພຣະເຢຊູຄຣິດ.”²¹

ເຮົາສາມາດເປັນຜູ້ຕິດຕາມທີ່ຮັກສັນຕິສຸກຂອງພຣະຄຣິດຢ່າງຊື່ນຊົມໄດ້.

ແຜນແຫ່ງຄວາມສຸກຂອງພຣະບິດາຂອງເຮົາສຳລັບລູກໆຂອງພຣະອົງບໍ່ພຽງແຕ່ລວມທັງຊີວິດກ່ອນເກີດ ແລະ ຊີວິດມະຕະເທົ່ານັ້ນ, ແຕ່ຍັງລວມຄວາມເປັນໄປໄດ້ສຳລັບຊີວິດນິລັນດອນນຳອີກ, ຊຶ່ງລວມທັງການພົບກັນໃໝ່ອັນຍິ່ງໃຫຍ່ ແລະ ຮຸ່ງໂລດກັບຄົນທີ່ເຮົາໄດ້ສູນເສຍໄປ. ຄວາມຜິດທັງໝົດຈະຖືກແກ້ໄຂ, ແລະ ເຮົາຈະເຫັນດ້ວຍຄວາມຊັດເຈນທີ່ສົມບູນແບບ ແລະ ທັດສະນະ ແລະ ຄວາມເຂົ້າໃຈທີ່ບໍ່ຜິດພາດ.

ຜູ້ນຳຂອງສາດສະໜາຈັກໄດ້ປຽບທຽບທັດສະນະນີ້ກັບຄົນໜຶ່ງທີ່ກຳລັງຍ່າງເຂົ້າໄປເບິ່ງການສະແດງໃນສາກທີສາມ.²² ຜູ້ທີ່ປາດສະຈາກຄວາມຮູ້ກ່ຽວກັບແຜນຂອງພຣະບິດາ ຈະບໍ່ສາມາດເຂົ້າໃຈສິ່ງທີ່ໄດ້ເກີດຂຶ້ນໃນສາກທຳອິດ ຫລື ການເປັນຢູ່ກ່ອນເກີດ ແລະ ຈຸດປະສົງທີ່ໄດ້ສະຖາປະນາຂຶ້ນຢູ່ທີ່ນັ້ນ; ທັງເຂົາເຈົ້າຈະບໍ່ເຂົ້າໃຈຄວາມແຈ່ມແຈ້ງ ແລະ ການແກ້ໄຂທີ່ເກີດຂຶ້ນໃນສາກທີສາມ, ຊຶ່ງເປັນການສຳເລັດອັນຮຸ່ງໂລດຂອງແຜນຂອງພຣະບິດາ.

ຫລາຍຄົນບໍ່ຮູ້ຄຸນຄ່າວ່າ ພາຍໃຕ້ແຜນດ້ວຍຄວາມຮັກ ແລະ ກວ້າງຂວາງຂອງພຣະອົງ ຜູ້ທີ່ປະກົດວ່າເປັນຄົນດ້ອຍໂອກາດ, ບໍ່ມີຄວາມຜິດຂອງຕົນ, ຈະບໍ່ໄດ້ຮັບຜົນກະທົບໃນທີ່ສຸດ.²³

ພຣະຄຳພີຊັດເຈນ ທີ່ວ່າ: ຜູ້ຕິດຕາມທີ່ຮັກສັນຕິສຸກຂອງພຣະຄຣິດ ທີ່ຊອບທຳ, ຕິດຕາມພຣະຜູ້ຊ່ວຍໃຫ້ລອດ, ແລະ ຮັກສາພຣະບັນຍັດຂອງພຣະອົງຈະໄດ້ຮັບພອນ. ພຣະຄຳພີທີ່ສຳຄັນຂໍ້ໜຶ່ງສຳລັບຜູ້ທີ່ຊອບທຳ, ໂດຍບໍ່ຄຳນຶງວ່າສະຖານະການໃນຊີວິດຂອງເຂົາເຈົ້າຈະເປັນແບບໃດ, ແມ່ນສ່ວນໜຶ່ງໃນຄຳປາໄສຂອງກະສັດເບັນຢາມິນຕໍ່ຜູ້ຄົນຂອງເພິ່ນ. ເພິ່ນສັນຍາວ່າ ຜູ້ທີ່ຮັກສາພຣະບັນຍັດຢ່າງຊື່ສັດຈະໄດ້ຮັບພອນໃນທຸກສິ່ງ ໃນຊີວິດນີ້ ແລະ “ຖືກຮັບເຂົ້າສູ່ສະຫວັນ … [ແລະ] ຢູ່ກັບພຣະເຈົ້າໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”²⁴

ເຮົາຮັບຮູ້ວ່າ ເຮົາເກືອບທຸກຄົນເຄີຍປະສົບກັບພະຍຸທາງຮ່າງກາຍ ແລະ ທາງວິນຍານໃນຊີວິດຂອງເຮົາ, ບາງຄັ້ງກໍເສຍຫາຍຮ້າຍແຮງ. ພຣະບິດາຜູ້ສະຖິດຢູ່ໃນສະຫວັນທີ່ຊົງຮັກ ແລະ ພຣະບຸດຂອງພຣະອົງ, ພຣະເຢຊູຄຣິດ, ຜູ້ຊຶ່ງເປັນພຣະປະມຸກຂອງສາດສະໜາຈັກທີ່ຖືກຟື້ນຟູຂອງພຣະອົງ, ໄດ້ປະທານພຣະຄຳພີ ແລະ ສາດສະດາໃຫ້ເຮົາ ເພື່ອກະກຽມເຮົາ, ເຕືອນເຮົາກ່ຽວກັບອັນຕະລາຍ, ແລະ ໃຫ້ຄຳແນະນຳແກ່ເຮົາ ເພື່ອກະກຽມເຮົາ ແລະ ປົກປ້ອງເຮົາ. ການຊີ້ນຳບາງຢ່າງຮຽກຮ້ອງການປະຕິບັດທັນທີ, ແລະ ບາງຢ່າງໃຫ້ການປົກປ້ອງເປັນເວລາຫລາຍປີ ໃນອະນາຄົດ. ຄຳນຳຂອງພຣະຜູ້ເປັນເຈົ້າຕໍ່ ຄຳສອນ ແລະ ພັນທະສັນຍາ, ພາກທີ 1, ຕັກເຕືອນເຮົາໃຫ້ “ເອົາໃຈໃສ່ຕໍ່ຖ້ອຍຄຳຂອງສາດສະດາ.”²⁵

ພາກທີ 1 ຍັງເຕືອນເຮົາອີກວ່າ, “ຈົ່ງຕຽມ, ຈົ່ງຕຽມສຳລັບສິ່ງທີ່ຈະມາເຖິງ, ເພາະພຣະຜູ້ເປັນເຈົ້າໃກ້ຈະມາແລ້ວ.”²⁶ ພຣະຜູ້ເປັນເຈົ້າໃຫ້ໂອກາດແກ່ຜູ້ຄົນຂອງພຣະອົງ ເພື່ອກະກຽມສຳລັບການທ້າທາຍທີ່ເຂົາເຈົ້າຈະປະເຊີນ.

ພຣະຜູ້ເປັນເຈົ້າໄດ້ປະທານການເປີດເຜີຍທີ່ມີພະລັງໃຫ້ແກ່ປະທານບຣິກຳ ຢັງ ໃນວັນທີ 14 ເດືອນມັງກອນ, 1847, ທີ່ວິນເຕີ ຄວດເຕີສ໌.²⁷ ການເປີດເຜີຍນີ້ເປັນຕົວຢ່າງຍອດຍ້ຽມເຖິງພຣະຜູ້ເປັນເຈົ້າທີ່ກະກຽມຜູ້ຄົນສຳລັບສິ່ງທີ່ຈະມາເຖິງ. ໄພ່ພົນທີ່ຊື່ສັດໄດ້ເລີ່ມຕົ້ນການອົບພະຍົບຂອງເຂົາເຈົ້າໄປຫາບ່ອນທີ່ປອດໄພຢູ່ຮ່ອມພູເຊົາເລັກ. ເຂົາເຈົ້າໄດ້ສ້າງພຣະວິຫານນາວູຢ່າງສຳເລັດຜົນ ແລະ ໄດ້ຮັບພິທີການຊ່ວຍໃຫ້ລອດທີ່ສັກສິດ. ເຂົາເຈົ້າໄດ້ຖືກຂັບໄລ່ອອກຈາກລັດມີເຊີຣີ, ແລະ ຜູ້ຂົ່ມເຫັງເຂົາເຈົ້າໄດ້ໄລ່ເຂົາເຈົ້າອອກຈາກເມືອງນາວູ ໃນລະດູໜາວທີ່ຮ້າຍແຮງ. ການເປີດເຜີຍຕໍ່ບຣິກຳ ຢັງ ໄດ້ໃຫ້ຄຳແນະນຳທີ່ເປັນປະໂຫຍດກ່ຽວກັບວິທີກະກຽມສຳລັບການອົບພະຍົບ. ພຣະຜູ້ເປັນເຈົ້າໄດ້ເນັ້ນໜັກເປັນພິເສດກ່ຽວກັບການດູແລຄົນຍາກຈົນ, ແມ່ໝ້າຍ, ລູກກຳພ້າ, ແລະ ຄອບຄົວຂອງຜູ້ທີ່ຮັບໃຊ້ໃນກອງທັບມໍມອນ ຂະນະທີ່ກຸ່ມໃຫຍ່ຂອງໄພ່ພົນເລີ່ມຕົ້ນການເດີນທາງທີ່ອັນຕະລາຍຂອງເຂົາເຈົ້າ.

ນອກຈາກຈະໃຫ້ຄຳແນະນຳອື່ນໆໃນການດຳລົງຊີວິດຢ່າງຊອບທຳແລ້ວ, ພຣະຜູ້ເປັນເຈົ້າໄດ້ເນັ້ນຫລັກທຳສອງຂໍ້ທີ່ຍັງໃຊ້ໄດ້ຢູ່ໃນທຸກວັນນີ້.

ຂໍ້ທີໜຶ່ງ, ພຣະອົງໄດ້ຊຸກຍູ້ເຂົາເຈົ້າໃຫ້ “ສັນລະເສີນພຣະຜູ້ເປັນເຈົ້າດ້ວຍການຮ້ອງເພງ, ດ້ວຍດົນຕີ, ດ້ວຍການເຕັ້ນລຳ, ແລະ ດ້ວຍຄຳອະທິຖານທີ່ເປັນຄວາມສັນລະເສີນ ແລະ ຄວາມຂອບພຣະໄທ.”²⁸

ຂໍ້ທີສອງ, ພຣະຜູ້ເປັນເຈົ້າແນະນຳ ຖ້າຫາກເຂົາເຈົ້າ “ເສົ້າສະຫລົດໃຈ, ຈົ່ງເອີ້ນຫາພຣະຜູ້ເປັນເຈົ້າອົງເປັນພຣະເຈົ້າຂອງພວກເຈົ້າດ້ວຍການອ້ອນວອນ, ເພື່ອວ່າຈິດວິນຍານຂອງພວກເຈົ້າຈະຊື່ນຊົມ.”²⁹

ຄຳຕັກເຕືອນທັງສອງຂໍ້ນີ້ ເປັນຄຳແນະນຳສຳລັບສະໄໝຂອງເຮົາເອງ. ຊີວິດທີ່ເຕັມໄປດ້ວຍການສັນລະເສີນ, ດົນຕີ, ແລະ ຄວາມຂອບພຣະໄທ ເປັນພອນພິເສດ. ການມີຄວາມຊື່ນຊົມ ແລະ ເພິ່ງອາໄສຄວາມຊ່ວຍເຫລືອຈາກສະຫວັນ ຜ່ານທາງການອະທິຖານເປັນວິທີທີ່ມີພະລັງ ໃນການເປັນຜູ້ຕິດຕາມທີ່ຮັກສັນຕິສຸກຂອງພຣະຄຣິດ. ການພະຍາຍາມເບີກບານສະເໝີ ຈະຊ່ວຍຫລີກລ້ຽງຈາກຄວາມຫົດຫູ່ໃນວິນຍານ.

ປະໂຫຍກສຸດທ້າຍຂອງເພງສວດທີ່ເຂົ້າໃຈງ່າຍ ຖ່າຍທອດຄຳຕອບສຸດທ້າຍໃນຮູບແບບທີ່ສວຍງາມວ່າ: “ໂລກບໍ່ມີຄວາມໂສກເສົ້າໃດທີ່ສະຫວັນບໍ່ສາມາດປິ່ນປົວ.”³⁰

ໃນຖານະອັກຄະສາວົກຂອງອົງພຣະເຢຊູຄຣິດເຈົ້າ, ຂ້າພະເຈົ້າເປັນພະຍານວ່າ “ຜູ້ຕິດຕາມທີ່ຮັກສັນຕິສຸກຂອງພຣະຄຣິດ” ຈະພົບສັນຕິສຸກສ່ວນຕົວໃນຊີວິດນີ້ ແລະ ການພົບກັນໃໝ່ເທິງສະຫວັນອັນຮຸ່ງໂລດ. ຂ້າພະເຈົ້າເປັນພະຍານອັນແນ່ນອນເຖິງຄວາມເປັນພຣະເຈົ້າຂອງພຣະຜູ້ຊ່ວຍໃຫ້ລອດ ແລະ ເຖິງຄວາມເປັນຈິງຂອງການຊົດໃຊ້ຂອງພຣະອົງ. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.