ພຣະເຈົ້າຊົງຮູ້ຈັກ ແລະ ຮັກທ່ານ

ໂດຍ ແອວເດີ ອາລັນ ທີ ຟີລິບສ໌

ແຫ່ງສາວົກເຈັດສິບ

ແຜນແຫ່ງຄວາມສຸກຂອງພຣະເຈົ້າ ລ້ວນແຕ່ກ່ຽວກັບທ່ານ. ທ່ານເປັນລູກທີ່ລໍ້າຄ່າຂອງພຣະອົງ ແລະ ມີຄຸນຄ່າຫລາຍ.

ເມື່ອຫົກປີກ່ອນ, ຄອບຄົວຂອງພວກເຮົາກຳລັງເດີນທາງໃນຕອນກາງຄືນຢູ່ນອກເມືອງອ໊ອກສ໌ຝອດ. ດັ່ງທີ່ມັກຈະພົບເຫັນໃນເດັກນ້ອຍໆ, ພວກເຮົາຕ້ອງໄດ້ຢຸດລົດ ສະນັ້ນ ພວກເຮົາຈຶ່ງພົບສະຖານີບໍລິການທີ່ມີຮ້ານຄ້າ ແລະ ຮ້ານອາຫານຫລາຍເປັນແຖວ. ດ້ວຍຄວາມແມ້ນຍຳ, ພວກເຮົາໄດ້ລົງລົດ, ໄປຮັບການບໍລິການ, ແລະ ຂຶ້ນລົດເດີນທາງຕໍ່.

ສິບຫ້ານາທີຕໍ່ມາ, ລູກຊາຍກົກຂອງພວກເຮົາໄດ້ຖາມຄຳຖາມທີ່ສຳຄັນວ່າ: “ແຈສເປີຢູ່ໃສ?” ແຈສເປີມັກຈະນັ່ງຢູ່ຫລັງລົດຄົນດຽວ. ພວກເຮົາເດົາວ່າ ລາວອາດຈະນອນຫລັບ ຫລື ກຳລັງລີ້ ຫລື ກຳລັງແກ້ງພວກເຮົາຢູ່.

ຂະນະທີ່ອ້າຍຂອງລາວກຳລັງກວດເບິ່ງຫລັງລົດດີໆນັ້ນ, ພວກເຮົາກໍພົບວ່າ ລູກຊາຍອາຍຸຫ້າປີຂອງພວກເຮົາບໍ່ໄດ້ຢູ່ທີ່ນັ້ນ. ໃຈຂອງພວກເຮົາເຕັມໄປດ້ວຍຄວາມສະທ້ານຢ້ານກົວ. ຂະນະທີ່ພວກເຮົາກັບໄປສະຖານີບໍລິການນັ້ນ, ພວກເຮົາໄດ້ອ້ອນວອນຕໍ່ພຣະບິດາເທິງສະຫວັນໃຫ້ແຈສເປີຖືກປົກປັກຮັກສາໃຫ້ປອດໄພ. ພວກເຮົາໄດ້ໂທຫາຕຳຫລວດ ແລະ ໄດ້ແຈ້ງເຂົາເຈົ້າກ່ຽວກັບສະຖານະການນັ້ນ.

ເມື່ອພວກເຮົາໄປຮອດຢ່າງວິຕົກກັງວົນ, 40 ກວ່ານາທີຕໍ່ມາ, ພວກເຮົາພົບລົດຕຳຫລວດສອງຄັນຢູ່ບ່ອນຈອດລົດ, ກຳລັງກະພິບໄຟ. ແຈສເປີຢູ່ໃນລົດຕຳຫລວດຄັນໜຶ່ງ, ກຳລັງຫລິ້ນປຸ່ມຢູ່. ຂ້າພະເຈົ້າຈະບໍ່ມີວັນລືມຄວາມຊື່ນຊົມທີ່ພວກເຮົາຮູ້ສຶກ ເມື່ອໄດ້ພົບລາວອີກຄັ້ງ.

ຫລາຍໆຄຳສອນແບບອຸປະມາຂອງພຣະຜູ້ຊ່ວຍໃຫ້ລອດ ສຸມໃສ່ການເຕົ້າໂຮມ, ການຟື້ນຟູ, ຫລື ການພະຍາຍາມຊອກຫາສິ່ງທີ່ຖືກກະຈັດກະຈາຍໄປ ຫລື ເສຍໄປ. ທ່າມກາງສິ່ງເຫລົ່ານີ້ ແມ່ນຄຳອຸປະມາກ່ຽວກັບແກະທີ່ເສຍ, ເງິນຫລຽນທີ່ເສຍ, ແລະ ລູກຊາຍທີ່ເສຍ.¹

ຂະນະທີ່ເຫດການຂອງແຈສເປີໄດ້ລຶ້ມຄືນຢູ່ໃນຫົວຂອງຂ້າພະເຈົ້າຕະຫລອດຫລາຍປີຜ່ານມາ, ຂ້າພະເຈົ້າໄດ້ໄຕ່ຕອງເອກະລັກແຫ່ງສະຫວັນ ແລະ ຄວາມສຳຄັນຂອງລູກໆຂອງພຣະເຈົ້າ, ອຳນາດແຫ່ງການໄຖ່ຂອງພຣະເຢຊູຄຣິດ, ແລະ ຄວາມຮັກທີ່ສົມບູນແບບຂອງພຣະບິດາຜູ້ສະຖິດຢູ່ໃນສະຫວັນ, ຜູ້ຊົງຮູ້ຈັກທ່ານ ແລະ ຂ້າພະເຈົ້າ. ຂ້າພະເຈົ້າຫວັງວ່າຈະເປັນພະຍານເຖິງຄວາມຈິງເຫລົ່ານີ້ໃນມື້ນີ້.

I. ລູກຂອງພຣະເຈົ້າ

ຊີວິດເປັນສິ່ງທ້າທາຍ. ຫລາຍຄົນຮູ້ສຶກຖ້ວມທົ້ນ, ໂດດດ່ຽວ, ດຽວດາຍ, ຫລື ໝົດແຮງ. ເມື່ອສິ່ງຕ່າງໆຫຍຸ້ງຍາກ, ເຮົາອາດຮູ້ສຶກວ່າ ເຮົາໄດ້ຊັດເຊພະເນຈອນ ຫລື ໄດ້ຕົກຢູ່ທາງຫລັງ. ການທີ່ຮູ້ວ່າ ເຮົາທຸກຄົນເປັນລູກຂອງພຣະເຈົ້າ ແລະ ເປັນສະມາຊິກຂອງຄອບຄົວນິລັນດອນຂອງພຣະອົງ ຈະຟື້ນຟູຄວາມຮູ້ສຶກຂອງການເປັນສ່ວນໜຶ່ງ ແລະ ຄວາມສຳນຶກໃນເປົ້າໝາຍ.²

ປະທານ ເອັມ ຣະໂຊ ບາເລີດ ໄດ້ແບ່ງປັນວ່າ: “ມີເອກະລັກໜຶ່ງທີ່ສຳຄັນທີ່ພວກເຮົາທຸກຄົນມີຮ່ວມກັນໃນມື້ນີ້ ແລະ ຕະຫລອດໄປ. … ນັ້ນກໍຄື ທ່ານເປັນບຸດ ແລະ ທິດາຂອງພຣະບິດາເທິງສະຫວັນ ແລະ ເປັນເຊັ່ນນັ້ນຕະຫລອດມາ. … ການເຂົ້າໃຈຄວາມຈິງນີ້—ການເຂົ້າໃຈມັນແທ້ໆ ແລະ ຍອມຮັບມັນ—ຈະປ່ຽນແປງຊີວິດ.”³

ຢ່າເຂົ້າໃຈຜິດ ຫລື ຫລຸດຄຸນຄ່າຄວາມສຳຄັນທີ່ທ່ານມີຕໍ່ພຣະບິດາຂອງທ່ານຜູ້ສະຖິດຢູ່ໃນສະຫວັນຂອງທ່ານ. ທ່ານບໍ່ແມ່ນຜົນຜະລິດໂດຍບັງເອີນຂອງທຳມະຊາດ, ເດັກກຳພ້າຂອງຈັກກະວານ, ຫລື ຜົນຂອງທາດບວກໂດຍບັງເອີນຕາມການເວລາ. ບ່ອນໃດທີ່ມີການອອກແບບ, ກໍມີນັກອອກແບບ.

ຊີວິດຂອງທ່ານມີຄວາມໝາຍ ແລະ ຈຸດປະສົງ. ການຟື້ນຟູພຣະກິດຕິຄຸນຂອງພຣະເຢຊູຄຣິດທີ່ກຳລັງດຳເນີນຢູ່ນີ້ ນຳຄວາມສະຫວ່າງ ແລະ ຄວາມເຂົ້າໃຈກ່ຽວກັບເອກະລັກແຫ່ງສະຫວັນຂອງທ່ານມາໃຫ້. ທ່ານເປັນລູກທີ່ຮັກຂອງພຣະບິດາເທິງສະຫວັນ. ທ່ານເປັນຕົວເອກຂອງຄຳອຸປະມາ ແລະ ຄຳສອນທັງໝົດເຫລົ່ານັ້ນ. ພຣະເຈົ້າຊົງຮັກທ່ານຫລາຍ ຈົນໄດ້ສົ່ງພຣະບຸດຂອງພຣະອົງມາເພື່ອປິ່ນປົວ, ຊ່ວຍກູ້, ແລະ ໄຖ່ເອົາທ່ານ.⁴

ພຣະເຢຊູຄຣິດຮູ້ຈັກທຳມະຊາດແຫ່ງສະຫວັນ ແລະ ຄວາມມີຄ່າຄວນນິລັນດອນຂອງທ່ານແຕ່ລະຄົນ.⁵ ພຣະອົງໄດ້ອະທິບາຍວ່າ ພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້ໃນການຮັກພຣະເຈົ້າ ແລະ ຮັກເພື່ອນບ້ານຂອງເຮົາ ວ່າເປັນຮາກຖານຂອງພຣະບັນຍັດທັງໝົດຂອງພຣະເຈົ້າແນວໃດ.⁶ ໜຶ່ງໃນໜ້າທີ່ຮັບຜິດຊອບແຫ່ງສະຫວັນຂອງເຮົາ ແມ່ນການດູຄົນຂັດສົນ.⁷ ນີ້ຄືເຫດຜົນທີ່ ໃນຖານະສານຸສິດຂອງພຣະເຢຊູຄຣິດ ເຮົາ “ແບກຫາບພາລະຂອງກັນແລະກັນ, … ເປັນທຸກກັບຄົນທີ່ເປັນທຸກ … , ແລະ ຈະປອບໃຈຄົນທີ່ຕ້ອງການຄວາມປອບໃຈ.”⁸

ສາດສະໜາບໍ່ແມ່ນເລື່ອງກ່ຽວກັບຄວາມສຳພັນຂອງເຮົາກັບພຣະເຈົ້າເທົ່ານັ້ນ; ມັນກ່ຽວກັບຄວາມສຳພັນຕໍ່ກັນແລະກັນນຳອີກ. ແອວເດີ ແຈັບຟະຣີ ອາ ຮໍແລນ ໄດ້ອະທິບາຍຄຳວ່າ ສາດສະໜາເປັນພາສາອັງກິດ religion ແມ່ນມາຈາກພາສາລາຕິນ religare, ໝາຍເຖິງ “ຜູກ” ຫລື, ຖ້າແປຕາມຕົວກວ່ານີ້ຈະແມ່ນ, “ຜູກອີກຄັ້ງ.” ສະນັ້ນ, “ສາດສະໜາທີ່ແທ້ຈິງ ແມ່ນສາຍສຳພັນທີ່ຜູກມັດເຮົາເຂົ້າກັບພຣະເຈົ້າ ແລະ ເຂົ້າກັບກັນແລະກັນ.”⁹

ວິທີທີ່ເຮົາປະຕິບັດຕໍ່ກັນແລະກັນມີຄວາມສຳຄັນຫລາຍ. ປະທານ ຣະໂຊ ເອັມ ແນວສັນ ສິດສອນວ່າ, “ຂ່າວສານຂອງພຣະຜູ້ຊ່ວຍໃຫ້ລອດແມ່ນແຈ່ມແຈ້ງ: ສານຸສິດ ທີ່ແທ້ຈິງ ຂອງພຣະອົງຈະເສີມສ້າງ, ຍົກລະດັບ, ໃຫ້ກຳລັງໃຈ, ຊັກຊວນ, ແລະ ດົນໃຈ.”¹⁰ ນີ້ແມ່ນສຳຄັນຍິ່ງກວ່າ ເມື່ອເພື່ອນຮ່ວມເດີນທາງຂອງເຮົາຮູ້ສຶກຫລົງທາງ, ໂດດດ່ຽວ, ຖືກລືມ, ຫລື ຖືກກຳຈັດອອກ.

ເຮົາບໍ່ຈຳເປັນຕ້ອງເບິ່ງໄກເພື່ອຊອກຫາຄົນທີ່ກຳລັງດີ້ນລົນ. ເຮົາສາມາດເລີ່ມຕົ້ນໂດຍການຊ່ວຍເຫລືອໃຜບາງຄົນໃນຄອບຄົວຂອງເຮົາ, ໃນບ່ອນຊຸມນຸມ, ຫລື ໃນຊຸມຊົນທ້ອງຖິ່ນ. ເຮົາຍັງສາມາດສະແຫວງຫາທີ່ຈະບັນເທົາທຸກຂອງຄົນ 700 ລ້ານຄົນ ທີ່ກຳລັງໃຊ້ຊີວິດໃນຄວາມທຸກຍາກທີ່ສຸດ¹¹ ຫລື 100 ລ້ານຄົນທີ່ຖືກບັງຄັບໃຫ້ພັດຖິ່ນ ເນື່ອງຈາກການຂົ່ມເຫັງ, ຄວາມຂັດແຍ້ງ, ແລະ ຄວາມຮຸນແຮງທີ່ອີງໃສ່ຕົວຕົນ.¹² ພຣະເຢຊູຄຣິດເປັນຕົວຢ່າງທີ່ດີພ້ອມຂອງການດູແລຄົນຂັດສົນ—ຄົນທີ່ອຶດຫິວ, ຄົນແປກໜ້າ, ຄົນເຈັບປ່ວຍ, ຄົນຍາກຈົນ, ຄົນທີ່ຖືກຄຸມຂັງ. ວຽກງານຂອງພຣະອົງ ແມ່ນວຽກງານຂອງເຮົາ.

ແອວເດີ ແກຣິດ ດັບເບິນຢູ ກອງ ສິດສອນວ່າ “ການເດີນທາງຂອງເຮົາທີ່ຈະກັບໄປຫາພຣະເຈົ້າສ່ວນຫລາຍແລ້ວຈະພົບເຫັນຢູ່ໃນຄວາມສຳພັນຂອງເຮົາກັບຄົນອື່ນ.”¹³ ດັ່ງເຊັ່ນ, ຫວອດຂອງພວກເຮົາຄວນເປັນບ່ອນຫລົບໄພສຳລັບລູກຂອງພຣະເຈົ້າທຸກຄົນ. ເຮົາກຳລັງໄປໂບດຢ່າງເສີຍໆ ຫລື ກຳລັງສ້າງຊຸມຊົນຢ່າງກະຕືລືລົ້ນ ທີ່ມີຈຸດປະສົງເພື່ອນະມັດສະການ, ລະນຶກເຖິງພຣະຄຣິດ, ແລະ ປະຕິບັດສາດສະໜາກິດຕໍ່ກັນແລະກັນ?¹⁴ ເຮົາສາມາດເອົາໃຈໃສ່ຕໍ່ຄຳແນະນຳຂອງປະທານແນວສັນໃນການຕັດສິນໃຫ້ໜ້ອຍລົງ, ຮັກໃຫ້ຫລາຍຂຶ້ນ, ແລະ ສົ່ງຕໍ່ຄວາມຮັກອັນບໍລິສຸດຂອງພຣະເຢຊູຄຣິດຜ່ານຖ້ອຍຄຳ ແລະ ການກະທຳຂອງເຮົາ.¹⁵

II. ອຳນາດແຫ່ງການໄຖ່ຂອງພຣະເຢຊູຄຣິດ

ການຊົດໃຊ້ຂອງພຣະເຢຊູຄຣິດ ແມ່ນການສະແດງອອກອັນສູງສຸດເຖິງຄວາມຮັກຂອງພຣະບິດາເທິງສະຫວັນຂອງເຮົາຕໍ່ລູກໆຂອງພຣະອົງ.¹⁶ ຄຳວ່າ ການຊົດໃຊ້ ບັນຍາຍເຖິງສະພາບແວດລ້ອມ “ເປັນໜຶ່ງດຽວ” ຂອງຜູ້ທີ່ເຮັດໃຫ້ຫ່າງເຫີນ ຫລື ແຍກອອກ.

ພາລະກິດຂອງພຣະຜູ້ຊ່ວຍໃຫ້ລອດຂອງເຮົາ ແມ່ນການຈັດກຽມທັງທາງກັບຄືນໄປຫາພຣະບິດາເທິງສະຫວັນ ແລະ ຄວາມບັນເທົາທຸກໃນການເດີນທາງ. ພຣະຜູ້ຊ່ວຍໃຫ້ລອດຊົງຮູ້ຜ່ານທາງປະສົບການຂອງພຣະອົງເຖິງວິທີທີ່ຈະຊ່ວຍເຫລືອເຮົາຜ່ານທາງການທ້າທາຍຕ່າງໆຂອງຊີວິດ.¹⁷ ແນ່ນອນໂດຍບໍ່ມີຂໍ້ສົງໄສ, ພຣະຄຣິດຊົງເປັນຜູ້ຊ່ວຍກູ້ ແລະ ຜູ້ປິ່ນປົວຈິດວິນຍານຂອງເຮົາ.

ເມື່ອເຮົາໃຊ້ສັດທາ: ພຣະອົງຈະຊ່ວຍເຮົາມຸ້ງໜ້າຜ່ານຜ່າຄວາມຍາກລຳບາກ. ພຣະອົງສືບຕໍ່ຍື່ນຄຳເຊື້ອເຊີນທີ່ມີຄວາມຮັກ ແລະ ຄວາມເມດຕາຂອງພຣະອົງ ທີ່ວ່າ:

“ບັນດາຜູ້ທີ່ເຮັດການໜັກໜ່ວງ ແລະ ແບກພາລະໜັກ ຈົ່ງມາຫາເຮົາ ແລະ ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.

“ຈົ່ງເອົາແອກຂອງເຮົາແບກໄວ້ແລ້ວຮຽນຮູ້ຈາກເຮົາ; … ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.”¹⁸

ຄຳປຽບທຽບຂອງແອກນັ້ນຊົງພະລັງ. ດັ່ງທີ່ ປະທານຮາວເວີດ ດັບເບິນຢູ ຮັນເທີ ໄດ້ອະທິບາຍວ່າ: “ແອກແມ່ນອຸປະກອນ … ທີ່ໃຫ້ ‘ກຳລັງ’ ຂອງສັດໂຕທີສອງ ຖືກເຊື່ອມໂຍງ ແລະ ຄວບຄູ່ກັບຄວາມພະຍາຍາມຂອງສັດໂຕທີໜຶ່ງ, ໂດຍແບ່ງປັນ ແລະ ຫລຸດຜ່ອນວຽກໜັກທີ່ຕ້ອງເຮັດ. ພາລະທີ່ຖ້ວມທົ້ນ ຫລື ບາງທີກໍເປັນໄປບໍ່ໄດ້ສຳລັບຄົນໆໜຶ່ງທີ່ຈະແບກ ສາມາດຖືກແບກຫາບໄດ້ຢ່າງເທົ່າທຽມ ແລະ ສະດວກສະບາຍໂດຍຄົນສອງຄົນທີ່ຖືກຜູກມັດເຂົ້າໃນແອກດຽວກັນ.”¹⁹

ປະທານແນວສັນໄດ້ສິດສອນວ່າ: “ທ່ານເຂົ້າມາຫາພຣະຄຣິດເພື່ອທຽມແອກກັບພຣະອົງ ແລະ ກັບອຳນາດຂອງພຣະອົງ, ເພື່ອວ່າທ່ານຈະບໍ່ແບກພາລະຂອງຊີວິດຢູ່ຄົນດຽວ. ທ່ານກຳລັງແບກພາລະຂອງຊີວິດທີ່ທຽມໄວ້ກັບພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງໂລກ.”²⁰

ເຮົາຈະທຽມແອກ ຫລື ຜູກຕົວເອງໄວ້ກັບພຣະຜູ້ຊ່ວຍໃຫ້ລອດໄດ້ແນວໃດ? ແອວເດີ ເດວິດ ເອ ແບ໊ດນາ ອະທິບາຍວ່າ:

“ການເຮັດ ແລະ ການຮັກສາພັນທະສັນຍາ ແມ່ນການທີ່ເຮົາທຽມແອກ ແລະ ເປັນໜຶ່ງກັບອົງພຣະເຢຊູຄຣິດເຈົ້າ. ຕາມຈິງແລ້ວ, ພຣະຜູ້ຊ່ວຍໃຫ້ລອດກຳລັງເຊື້ອເຊີນເຮົາໃຫ້ເພິ່ງອາໄສພຣະອົງ ແລະ ອອກແຮງງານຮ່ວມກັບພຣະອົງ. …

“ເຮົາບໍ່ໄດ້ຢູ່ດ້ວຍຕົວຄົນດຽວ ແລະ ບໍ່ຈຳເປັນຕ້ອງຢູ່ຢ່າງໂດດດ່ຽວ.”²¹

ສຳລັບຜູ້ໃດກໍຕາມທີ່ມີພາລະ, ຫລົງທາງ, ສັບສົນ: ທ່ານບໍ່ຈຳເປັນຕ້ອງເຮັດສິ່ງນີ້ຄົນດຽວ.²² ຜ່ານການຊົດໃຊ້ຂອງພຣະຄຣິດ ແລະ ພິທີການຂອງພຣະອົງ, ທ່ານສາມາດທຽມແອກ ຫລື ຖືກຜູກມັດເຂົ້າກັບພຣະອົງ. ພຣະອົງຈະເພີ່ມຄວາມເຂັ້ມແຂງ ແລະ ໃຫ້ການປິ່ນປົວທີ່ທ່ານຕ້ອງການ ເພື່ອປະເຊີນກັບການເດີນທາງຂ້າງໜ້າ. ພຣະອົງຊົງເປັນບ່ອນລີ້ໄພຈາກລົມພະຍຸ.²³

III. ຄວາມຮັກຂອງພຣະບິດາເທິງສະຫວັນ

ຂໍບອກໃຫ້ຮູ້ໄວ້ວ່າ, ແຈສເປີເປັນຄົນມີໄຫວພິກ, ໜ້າຮັກ, ສະຫລາດ, ແລະ ຂີ້ດື້. ແຕ່ສິ່ງສຳຄັນຂອງເລື່ອງລາວນີ້ກໍຄື ລາວເປັນຂອງຂ້າພະເຈົ້າ. ລາວເປັນລູກຊາຍຂອງຂ້າພະເຈົ້າ, ແລະ ຂ້າພະເຈົ້າຮັກລາວຫລາຍກວ່າທີ່ລາວຈະຮູ້. ຖ້າພໍ່ທີ່ບໍ່ດີພ້ອມຝ່າຍໂລກຮູ້ສຶກເຊັ່ນນີ້ກັບລູກຂອງຕົນ, ທ່ານສາມາດຈິນຕະນາການໄດ້ບໍ່ວ່າ ພຣະບິດາເທິງສະຫວັນຜູ້ຊົງດີພ້ອມ, ມີລັດສະໝີພາບ, ແລະ ມີຄວາມຮັກ ຈະຮູ້ສຶກກັບທ່ານແນວໃດ?

ເຖິງໝູ່ເພື່ອນທີ່ຮັກແພງຄົນລຸ້ນໃໝ່ຂອງຂ້າພະເຈົ້າ, ລຸ້ນ Gen Z ແລະ ລຸ້ນ Gen Alpha: ກະລຸນາຮູ້ໄວ້ວ່າ ສັດທາຮຽກຮ້ອງໃຫ້ມີການປະຕິບັດ.²⁴ ເຮົາມີຊີວິດຢູ່ໃນຍຸກທີ່ຫລາຍຄົນມີແຕ່ “ເຫັນກ່ອນແລ້ວຈຶ່ງເຊື່ອ.” ສັດທາສາມາດເປັນສິ່ງທີ່ທ້າທາຍ ແລະ ຮຽກຮ້ອງການເລືອກ. ແຕ່ຄຳອະທິຖານໄດ້ຮັບຄຳຕອບ.²⁵ ແລະ ຄຳຕອບສາມາດຮູ້ສຶກໄດ້.²⁶ ສິ່ງທີ່ແທ້ຈິງທີ່ສຸດບາງຢ່າງໃນຊີວິດແມ່ນບໍ່ສາມາດເຫັນໄດ້; ແຕ່ມັນສາມາດຮູ້ສຶກ, ຮູ້ຈັກ, ແລະ ປະສົບໄດ້. ມັນກໍເປັນສິ່ງທີ່ແທ້ຈິງເຊັ່ນກັນ.

ພຣະເຢຊູຄຣິດຕ້ອງການໃຫ້ທ່ານຮູ້ຈັກ ແລະ ມີຄວາມສຳພັນກັບພຣະບິດາຜູ້ສະຖິດຢູ່ໃນສະຫວັນຂອງທ່ານ.²⁷ ພຣະອົງໄດ້ສິດສອນວ່າ, “ມີພໍ່ຄົນໃດແດ່ໃນບັນດາພວກເຈົ້າ, ທີ່ມີລູກຊາຍ, ແລະ ໃຫ້ລາວຢືນຢູ່ນອກເຮືອນ, ແລະ ເວົ້າວ່າ, ພໍ່ເອີຍ, ຈົ່ງເປີດປະຕູໃຫ້ລູກແດ່ ເພື່ອວ່າລູກຈະໄດ້ເຂົ້າໄປ ແລະ ກິນເຂົ້ານຳພໍ່, ແລ້ວພໍ່ຈະບໍ່ເວົ້າວ່າ, ເຂົ້າມາ, ລູກເອີຍ; ເພາະສິ່ງທີ່ພໍ່ມີກໍເປັນຂອງລູກ, ແລະ ສິ່ງທີ່ລູກມີກໍເປັນຂອງພໍ່?”²⁸ ທ່ານສາມາດນຶກເຖິງສະພາບທີ່ສ່ວນຕົວ ແລະ ມີຄວາມຮັກຍິ່ງຂຶ້ນຂອງພຣະເຈົ້າພຣະບິດາຜູ້ສະຖິດນິລັນດອນບໍ່?

ທ່ານເປັນລູກຂອງພຣະອົງ. ຖ້າທ່ານຮູ້ສຶກຫລົງທາງ, ຖ້າທ່ານມີຄຳຖາມ ຫລື ຂາດສະຕິປັນຍາ, ຖ້າທ່ານກຳລັງດີ້ນລົນກັບສະຖານະການຂອງທ່ານ ຫລື ກຳລັງຕໍ່ສູ້ກັບຄວາມບໍ່ສອດຄ່ອງກັນທາງວິນຍານ, ຈົ່ງຫັນໄປຫາພຣະອົງ. ອະທິຖານຫາພຣະອົງເພື່ອຂໍຄວາມປອບໂຍນ, ຄວາມຮັກ, ຄຳຕອບ, ແລະ ການຊີ້ນຳ. ບໍ່ວ່າທ່ານຈະຕ້ອງການຫຍັງ ແລະ ບໍ່ວ່າທ່ານຈະຢູ່ໃສກໍຕາມ, ຂໍໃຫ້ທ່ານທຸ້ມເທໃຈຂອງທ່ານໃຫ້ແກ່ພຣະບິດາເທິງສະຫວັນຂອງທ່ານ. ສຳລັບບາງຄົນແລ້ວ, ທ່ານອາດຢາກເຮັດຕາມຄຳເຊື້ອເຊີນຂອງປະທານແນວສັນ ແລະ ທູນຖາມ “ວ່າພຣະອົງຊົງຢູ່ທີ່ນັ້ນແທ້ບໍ່—ວ່າ ພຣະອົງຮູ້ຈັກທ່ານຫລືບໍ່. ທູນຖາມວ່າ ພຣະອົງຮູ້ສຶກແນວໃດກ່ຽວກັບທ່ານ. ແລະ ແລ້ວໃຫ້ຮັບຟັງ.”²⁹

ອ້າຍເອື້ອຍນ້ອງທີ່ຮັກແພງທັງຫລາຍ:

ຈົ່ງຮູ້ຈັກພຣະບິດາຂອງທ່ານຜູ້ສະຖິດຢູ່ໃນສະຫວັນ. ພຣະອົງດີພ້ອມ ແລະ ມີຄວາມຮັກ.
ຈົ່ງຮູ້ວ່າ ພຣະເຢຊູຄຣິດແມ່ນໃຜ.³⁰ ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ຜູກມັດຕົວທ່ານ ແລະ ຄົນທີ່ທ່ານຮັກກັບພຣະອົງ.
ແລະ ຈົ່ງຮູ້ວ່າຕົວເອງແມ່ນໃຜ. ຮູ້ຈັກເອກະລັກແຫ່ງສະຫວັນທີ່ແທ້ຈິງຂອງທ່ານ. ແຜນແຫ່ງຄວາມສຸກຂອງພຣະເຈົ້າ ລ້ວນແຕ່ກ່ຽວກັບທ່ານ. ທ່ານເປັນລູກທີ່ລໍ້າຄ່າຂອງພຣະອົງ ແລະ ມີຄຸນຄ່າຫລາຍ. ພຣະອົງຊົງຮູ້ຈັກ ແລະ ຮັກທ່ານ.

ຂ້າພະເຈົ້າເປັນພະຍານເຖິງຄວາມຈິງທີ່ລຽບງ່າຍ ແຕ່ເປັນຮາກຖານເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.