ເຊື່ອມຕໍ່ເຂົ້າກັບພຣະເຢຊູຄຣິດ: ການກາຍເປັນເກືອຂອງແຜ່ນດິນໂລກ

ໂດຍ ແອວເດີ ໂຮເຊ ເອ ເທເຊຣາ

ຈາກຝ່າຍປະທານສາວົກເຈັດສິບ

ເມື່ອເຮົາຍັງຄົງເຊື່ອມຕໍ່ເຂົ້າກັບພຣະຜູ້ເປັນເຈົ້າ, ຊີວິດຂອງເຮົາຈະສະທ້ອນແສງຂອງພຣະອົງຢ່າງເປັນທຳມະຊາດ, ແລະ ເຮົາຈະກາຍເປັນເກືອຂອງແຜ່ນດິນໂລກ.

ພຣະຜູ້ຊ່ວຍໃຫ້ລອດໄດ້ສິດສອນວ່າ ເມື່ອເຮົາ “ຖືກເອີ້ນໃຫ້ມາສູ່ພຣະກິດຕິຄຸນອັນເປັນນິດ [ຂອງພຣະອົງ], ແລະ ເຮັດພັນທະສັນຍາດ້ວຍພັນທະສັນຍາອັນເປັນນິດ, ແລ້ວ [ພວກເຮົາ] ຖືກນັບວ່າເປັນເກືອຂອງແຜ່ນດິນໂລກ.” ເກືອປະກອບດ້ວຍອົງປະກອບສອງຊະນິດທີ່ເຊື່ອມຕໍ່ເຂົ້າກັນ. ເຮົາບໍ່ສາມາດເປັນເກືອໄດ້ດ້ວຍຕົວຂອງເຮົາເອງ; ຖ້າເຮົາຈະເປັນເກືອຂອງແຜ່ນດິນໂລກ, ເຮົາຕ້ອງເຊື່ອມຕໍ່ເຂົ້າກັບພຣະຜູ້ເປັນເຈົ້າ, ແລະ ນັ້ນກໍຄືສິ່ງທີ່ຂ້າພະເຈົ້າເຫັນ ຂະນະທີ່ຂ້າພະເຈົ້າຄຸກຄີກັບສະມາຊິກໃນສາດສະໜາຈັກທົ່ວໂລກ—ຂ້າພະເຈົ້າເຫັນສະມາຊິກທີ່ຊື່ສັດຂອງສາດສະໜາຈັກທີ່ເຊື່ອມຕໍ່ເຂົ້າກັບພຣະຜູ້ເປັນເຈົ້າ, ມຸ່ງໝັ້ນໃນຄວາມພະຍາຍາມຂອງເຂົາເຈົ້າທີ່ຈະຮັບໃຊ້ຄົນອື່ນ ແລະ ເປັນເກືອຂອງແຜ່ນດິນໂລກ.

ການອຸທິດຕົນທີ່ບໍ່ຫວັ່ນໄຫວຂອງທ່ານ ເປັນຕົວຢ່າງທີ່ເປັ່ງປະກາຍ. ການຮັບໃຊ້ຂອງທ່ານມີຄຸນຄ່າ ແລະ ຖືກທະນຸຖະໜອມ.

ຊາວໜຸ່ມຂອງພວກເຮົາໄດ້ສະແດງຄວາມກ້າຫານ ແລະ ຄວາມອຸທິດຕົນທີ່ໂດດເດັ່ນ. ພວກເຂົາໄດ້ນ້ອມຮັບວຽກງານປະຫວັດຄອບຄົວຢ່າງກະຕືລືລົ້ນ, ແລະ ການໄປຢ້ຽມຢາມບ້ານຂອງພຣະຜູ້ເປັນເຈົ້າຢູ່ເລື້ອຍໆ ເປັນປະຈັກພະຍານເຖິງການອຸທິດຕົນຂອງພວກເຂົາ. ຄວາມເຕັມໃຈຂອງພວກເຂົາທີ່ຈະອຸທິດເວລາ ແລະ ພະລັງງານເພື່ອຮັບໃຊ້ເຜີຍແຜ່ທົ່ວໂລກສະທ້ອນໃຫ້ເຫັນເຖິງສັດທາອັນເລິກເຊິ່ງ ແລະ ໝັ້ນຄົງ. ພວກເຂົາບໍ່ພຽງແຕ່ເຂົ້າຮ່ວມເທົ່ານັ້ນ ແຕ່ນຳທາງໃນການກາຍເປັນສານຸສິດທີ່ເຊື່ອມຕໍ່ເຂົ້າກັບພຣະເຢຊູູຄຣິດ. ການຮັບໃຊ້ຂອງພວກເຂົາສ່ອງແສງຄວາມສະຫວ່າງ ແລະ ຄວາມຫວັງ, ໂດຍສຳຜັດກັບຫລາຍໆຊີວິດຈົນນັບບໍ່ຖ້ວນ. ສຳລັບພວກເຈົ້າ, ຊາວໜຸ່ມຂອງສາດສະໜາຈັກ, ພວກເຮົາຂໍສະແດງຄວາມຂອບໃຈຢ່າງສຸດຊຶ້ງສຳລັບການຮັບໃຊ້ທີ່ດົນໃຈຂອງພວກເຈົ້າ. ພວກເຈົ້າບໍ່ເປັນພຽງແຕ່ອະນາຄົດຂອງສາດສະໜາຈັກເທົ່ານັ້ນ ແຕ່ເປັນປະຈຸບັນຂອງສາດສະໜາຈັກນຳອີກ. ແລະ ພວກເຈົ້າເປັນເກືອຂອງແຜ່ນດິນໂລກຢ່າງແທ້ຈິງ!

ຂ້າພະເຈົ້າຮັກອົງພຣະເຢຊູຄຣິດເຈົ້າ ແລະ ຮູ້ສຶກໄດ້ຮັບພອນໂດຍໂອກາດໃນການຮັບໃຊ້ຄຽງຂ້າງພວກເຈົ້າໃນສາດສະໜາຈັກຂອງພຣະຜູ້ເປັນເຈົ້າ. ຄວາມເປັນອັນໜຶ່ງດຽວກັນ ແລະ ຄວາມເຂັ້ມແຂງຂອງເຮົາ, ໂດຍມີພື້ນຖານໃນສັດທາທີ່ເຮົາມີຮ່ວມກັນ, ເຮັດໃຫ້ເຮົາໝັ້ນໃຈວ່າ ເຮົາບໍ່ມີວັນໂດດດ່ຽວໃນການເດີນທາງນີ້. ນຳກັນ, ເຮົາສາມາດສືບຕໍ່ສ້າງອານາຈັກຂອງພຣະເຈົ້າ, ທີ່ຢັ່ງຮາກລົງໃນການຮັບໃຊ້, ຄວາມຮັກ, ແລະ ສັດທາທີ່ບໍ່ຫວັ່ນໄຫວ.

ເມື່ອພຣະເຢຊູຄຣິດໄດ້ສິດສອນຢູ່ແຄມທະເລສາບຄາລີເລ, ພຣະອົງມັກຈະໃຊ້ອົງປະກອບໃນຊີວິດປະຈຳວັນທີ່ຜູ້ຟັງຂອງພຣະອົງຄຸ້ນເຄີຍ ເພື່ອຖ່າຍທອດຄວາມຈິງທາງວິນຍານອັນເລິກເຊິ່ງ. ໜຶ່ງໃນອົງປະກອບດັ່ງກ່າວແມ່ນເກືອ. ພຣະເຢຊູໄດ້ປະກາດວ່າ, “[ເຈົ້າທັງຫລາຍ] ເປັນເກືອສຳລັບມວນມະນຸດໂລກ,”ຊຶ່ງເປັນຄຳຖະແຫລງທີ່ເຕັມປ່ຽມໄປດ້ວຍຄວາມໝາຍ ແລະ ຄວາມສຳຄັນ, ໂດຍສະເພາະແມ່ນສຳລັບຜູ້ຄົນໃນສະໄໝຂອງພຣະອົງ ທີ່ເຂົ້າໃຈຄຸນຄ່າໃນຫລາຍແງ່ມຸມຂອງເກືອ.

ຫັດຖະກຳບູຮານຂອງການເກັບກ່ຽວເກືອໃນອາລ໌ກາບ, ພາກພື້ນຕອນໃຕ້ຂອງບ້ານເກີດຂອງຂ້າພະເຈົ້າໃນປະເທດປອກຕຸຍການ, ຢ້ອນກັບໄປຫລາຍພັນປີສູ່ຍຸກຈັກກະພັດໂຣມ. ສິ່ງທີ່ໂດດເດັ່ນກໍຄື, ວິທີການທີ່ຄົນງານເຮັດເກືອ, ຊຶ່ງຮູ້ຈັກກັນວ່າ ມາໂນໂຕສ໌ ປະຕິບັດ, ບໍ່ໄດ້ປ່ຽນແປງຫຍັງຫລາຍເລີຍນັບແຕ່ນັ້ນມາ. ຝີມືທີ່ອຸທິດຕົນເຫລົ່ານີ້ໃຊ້ເຕັກນິກພື້ນເມືອງ, ໂດຍເຮັດວຽກທັງໝົດດ້ວຍມື, ໂດຍຮັກສາມໍລະດົກທີ່ຄົງຢູ່ມາຫລາຍສັດຕະວັດ.

ວິທີການບູຮານນີ້ ເກັບກ່ຽວສິ່ງທີ່ເອີ້ນວ່າ “ດອກເກືອ.” ເພື່ອທີ່ຈະຊື່ນຊົມກັບຂະບວນການອັນຊັບຊ້ອນຂອງການເກັບກ່ຽວດອກເກືອຢ່າງເຕັມທີ່, ມັນສຳຄັນຫລາຍທີ່ຈະເຂົ້າໃຈສະພາບແວດລ້ອມບ່ອນທີ່ມັນໄດ້ຖືກຜະລິດຂຶ້ນເສຍກ່ອນ. ບຶງເກືອແຄມຊາຍຝັ່ງຂອງອາລ໌ກາບ ມີເງື່ອນໄຂທີ່ເໝາະສົມສຳລັບການຜະລິດເກືອ. ນໍ້າທະເລໄດ້ໄຫລໄປຕາມຮ່ອງສູ່ບໍ່ຕື້ນໆ, ທີ່ຮູ້ຈັກກັນວ່າ ອ່າງເກືອ, ບ່ອນທີ່ມັນຈະຖືກປ່ອຍໃຫ້ລະເຫີຍພາຍໃຕ້ແສງແດດທີ່ກ້າ. ຂະນະທີ່ນໍ້າລະເຫີຍ, ດອກເກືອຈະກໍ່ຕົວເປັນເມັດແກ້ວທີ່ເປາະບາງຢູ່ເທິງພື້ນຜິວຂອງອ່າງເກືອ. ເມັດແກ້ວເຫລົ່ານີ້ບໍລິສຸດຢ່າງເຫລືອເຊື່ອ ແລະ ມີເນື້ອທີ່ກອບ ແລະ ເປັນເອກະລັກ. ມາໂນໂຕສ໌ ຈະຄ່ອຍໆຕັກເມັດແກ້ວອອກຈາກໜ້ານໍ້າ ໂດຍໃຊ້ເຄື່ອງມືສະເພາະທາງ, ຊຶ່ງເປັນຂະບວນການທີ່ອາໄສທັກສະ ແລະ ຄວາມແມ້ນຍຳສູງ. ໃນປອກຕຸຍການ, ເກືອທີ່ມີຄຸນນະພາບດີແມ່ນເອີ້ນວ່າ “ຄຣີມເກືອ” ເພາະມັນສາມາດຖືກຕັກອອກຢ່າງເບົາໆ ດັ່ງຄຣີມທີ່ກຳລັງລອຍຂຶ້ນໄປຢູ່ທາງເທິງຂອງນ້ຳນົມ. ເກືອທີ່ເປາະບາງຈະຖືກທະນຸຖະໜອມຍ້ອນຄວາມບໍລິສຸດ ແລະ ລົດຊາດພິເສດ, ເຮັດໃຫ້ມັນເປັນສ່ວນປະສົມທີ່ຕີລາຄາສູງໃນສິລະປະການເຮັດອາຫານ.

ເຊັ່ນດຽວກັບທີ່ ມາໂນໂຕສ໌ ພະຍາຍາມຢ່າງຍິ່ງເພື່ອໃຫ້ແນ່ໃຈວ່າ ພວກເຂົາເກັບກ່ຽວເກືອທີ່ມີຄຸນນະພາບສູງທີ່ສຸດ, ເຮົາກໍເຊັ່ນດຽວກັນ, ໃນຖານະຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ, ເຮັດໃຫ້ດີທີ່ສຸດຢູ່ສະເໝີ ເພື່ອວ່າຄວາມຮັກ ແລະ ຕົວຢ່າງຂອງເຮົາຈະເປັນການສະທ້ອນອັນບໍລິສຸດເຖິງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ໃຫ້ຫລາຍທີ່ສຸດເທົ່າທີ່ຈະເປັນໄປໄດ້.

ໃນໂລກບູຮານ, ເກືອເປັນຫລາຍກວ່າເຄື່ອງປຸງລົດຊາດເທົ່ານັ້ນ—ມັນເປັນສານກັນບູດທີ່ສຳຄັນຫລາຍ ແລະ ເປັນສັນຍາລັກແຫ່ງຄວາມບໍລິສຸດ ແລະ ພັນທະສັນຍາ. ຄົນທັງຫລາຍຮູ້ວ່າ ເກືອມີຄວາມຈຳເປັນໃນການຖະໜອມອາຫານ ແລະ ເພີ່ມລົດຊາດ. ພວກເຂົາຍັງເຂົ້າໃຈເຖິງຜົນກະທົບອັນຮ້າຍແຮງຂອງການທີ່ເກືອສູນເສຍຄວາມເຄັມ, ຫລື ລົດຊາດຂອງມັນ, ເນື່ອງຈາກການປົນເປື້ອນ ຫລື ເຈືອຈາງ.

ເຊັ່ນດຽວກັບທີ່ເກືອສາມາດສູນເສຍເນື້ອແທ້ຂອງມັນ, ເຮົາກໍສາມາດສູນເສຍພະລັງທາງວິນຍານຂອງເຮົາໄດ້ເຊັ່ນກັນ ຖ້າຫາກສັດທາຂອງເຮົາໃນພຣະເຢຊູຄຣິດ ກາຍເປັນເລື່ອງທຳມະດາ. ພາຍນອກເຮົາອາດເບິ່ງຄືກັນໝົດ, ແຕ່ປາດສະຈາກສັດທາພາຍໃນທີ່ເຂັ້ມແຂງແລ້ວ, ເຮົາກໍສູນເສຍຄວາມສາມາດຂອງເຮົາໃນການສ້າງຄວາມແຕກຕ່າງໃນໂລກ ແລະ ນຳເອົາສິ່ງທີ່ດີທີ່ສຸດໃນຕົວຂອງຄົນທີ່ຢູ່ອ້ອມຂ້າງເຮົາອອກມາ.

ສະນັ້ນ ເຮົາຈະສາມາດສົ່ງພະລັງງານ ແລະ ຄວາມພະຍາຍາມຂອງເຮົາອອກມາເພື່ອສ້າງຄວາມແຕກຕ່າງ ແລະ ເປັນການປ່ຽນແປງທີ່ໂລກຕ້ອງການໃນປະຈຸບັນໄດ້ແນວໃດ? ເຮົາຈະສາມາດຮັກສາຄວາມເປັນສານຸສິດ ແລະ ສືບຕໍ່ທີ່ຈະເປັນອິດທິພົນທາງບວກໄດ້ແນວໃດ?

ຖ້ອຍຄຳຂອງສາດສະດາທີ່ຮັກແພງຂອງເຮົາ ຍັງດັງກ້ອງໃນຈິດໃຈຂອງຂ້າພະເຈົ້າ ທີ່ວ່າ: “ພຣະເຈົ້າປະສົງໃຫ້ເຮົາເຮັດວຽກນຳກັນ ແລະ ຊ່ວຍກັນແລະກັນ. ນັ້ນຄືເຫດຜົນທີ່ພຣະອົງໄດ້ສົ່ງເຮົາມາສູ່ໂລກໃນຄອບຄົວ ແລະ ຈັດເຮົາໄວ້ໃນຫວອດ ແລະ ສະເຕກ. ນັ້ນຄືເຫດຜົນທີ່ພຣະອົງຂໍໃຫ້ເຮົາຮັບໃຊ້ ແລະ ປະຕິບັດສາດສະໜາກິດຕໍ່ກັນແລະກັນ. ນັ້ນຄືເຫດຜົນທີ່ພຣະອົງຂໍໃຫ້ເຮົາດຳລົງຊີວິດ ຢູ່ໃນ ໂລກ ແຕ່ບໍ່ໃຫ້ເປັນ ຂອງ ໂລກ.

ເມື່ອຊີວິດຂອງເຮົາເຕັມໄປດ້ວຍຈຸດປະສົງ ແລະ ການຮັບໃຊ້, ເຮົາກໍຫລີກລ້ຽງຄວາມເສີຍເມີຍທາງວິນຍານ; ກົງກັນຂ້າມ, ເມື່ອຊີວິດຂອງເຮົາຂາດຈຸດປະສົງແຫ່ງສະຫວັນ, ການຮັບໃຊ້ທີ່ມີຄວາມໝາຍກັບຄົນອື່ນ, ແລະ ໂອກາດອັນສັກສິດສຳລັບການໄຕ່ຕອງ ແລະ ການສະທ້ອນຄິດ, ເຮົາຈະຄ່ອຍໆຫາຍໃຈບໍ່ອອກເພາະກິດຈະກຳ ແລະ ຜົນປະໂຫຍດຂອງຕົນເອງ, ຈົນສ່ຽງຕໍ່ການສູນເສຍລົດຊາດຂອງເຮົາ. ວິທີແກ້ກໍຄື ສືບຕໍ່ມີສ່ວນຮ່ວມໃນການຮັບໃຊ້—ໂດຍການມີສ່ວນຮ່ວມຢ່າງຮ້ອນໃຈໃນວຽກງານດີ ແລະ ການພັດທະນາຕົນເອງ ແລະ ສັງຄົມທີ່ເຮົາອາໄສຢູ່.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຊ່າງເປັນພອນແທ້ໆທີ່ເຮົາທຸກຄົນໃນມື້ນີ້ເປັນຂອງສາດສະໜາຈັກຂອງພຣະເຢຊູຄຣິດ ແລະ ມີໂອກາດທີ່ຈະຮັບໃຊ້ໃນສາດສະໜາຈັກຂອງພຣະອົງ. ສະພາບການຂອງເຮົາອາດແຕກຕ່າງກັນ, ແຕ່ເຮົາທຸກຄົນສາມາດສ້າງຄວາມແຕກຕ່າງໄດ້.

ຈົ່ງຈົດຈຳ ມາໂນໂຕສ໌, ຄົນງານເຮັດເກືອ; ພວກເຂົາໃຊ້ເຄື່ອງມືທີ່ລຽບງ່າຍໃນການເກັບກ່ຽວເມັດແກ້ວທີ່ດີທີ່ສຸດ, ເກືອທີ່ດີທີ່ສຸດ! ເຮົາກໍສາມາດເຮັດສິ່ງທີ່ລຽບງ່າຍເຊັ່ນກັນທີ່, ດ້ວຍຄວາມພະຍາຍາມທີ່ສະໝໍ່າສະເໝີໃນການກະທຳອັນນ້ອຍໆ ແລະ ມີຄວາມໝາຍ, ສາມາດເຮັດໃຫ້ການເປັນສານຸສິດຂອງເຮົາ ແລະ ການຜູກມັດກັບພຣະເຢຊູຄຣິດເລິກເຊິ່ງຍິ່ງຂຶ້ນ. ນີ້ຄືວິທີທີ່ລຽບງ່າຍແຕ່ເລິກເຊິ່ງທີ່ເຮົາສາມາດພະຍາຍາມທີ່ຈະເປັນເກືອຂອງແຜ່ນດິນໂລກ:

ການເຮັດໃຫ້ບ້ານຂອງພຣະຜູ້ເປັນເຈົ້າເປັນສູນກາງຂອງຄວາມອຸທິດຕົນຂອງເຮົາ. ບັດນີ້ ເມື່ອພຣະວິຫານທັງຫລາຍຢູ່ໃກ້ກວ່າເມື່ອກ່ອນ, ການໃຫ້ຄວາມສຳຄັນກັບການນະມັດສະການເປັນປະຈຳໃນບ້ານຂອງພຣະຜູ້ເປັນເຈົ້າ ຈະຊ່ວຍໃຫ້ເຮົາສຸມໃຈໃສ່ສິ່ງທີ່ສຳຄັນທີ່ສຸດ ແລະ ເຮັດໃຫ້ຊີວິດຂອງເຮົາມຸ່ງເນັ້ນໄປທີ່ພຣະຄຣິດ. ໃນພຣະວິຫານ, ເຮົາພົບຫົວໃຈແຫ່ງສັດທາຂອງເຮົາໃນພຣະເຢຊູຄຣິດ ແລະ ຈິດວິນຍານແຫ່ງຄວາມອຸທິດຕົນແດ່ພຣະອົງ.
ການມີຄວາມຕັ້ງອົກຕັ້ງໃຈໃນຄວາມພະຍາຍາມຂອງເຮົາທີ່ຈະເພີ່ມຄວາມເຂັ້ມແຂງໃຫ້ຄົນອື່ນ ໂດຍການດຳລົງຊີວິດຕາມພຣະກິດຕິຄຸນນຳກັນ. ເຮົາສາມາດເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາຜ່ານທາງຄວາມພະຍາຍາມທີ່ສະໝໍ່າສະເໝີ ແລະ ຕັ້ງໃຈ ເພື່ອນຳຫລັກທຳພຣະກິດຕິຄຸນມາສູ່ຊີວິດຂອງເຮົາ ແລະ ມາສູ່ບ້ານຂອງເຮົາ.
ການເຕັມໃຈທີ່ຈະຍອມຮັບການເອີ້ນ ແລະ ຮັບໃຊ້ໃນສາດສະໜາຈັກ. ການຮັບໃຊ້ໃນບ່ອນຊຸມນຸມໃນທ້ອງຖິ່ນຂອງເຮົາ ຊ່ວຍໃຫ້ເຮົາສະໜັບສະໜູນຊຶ່ງກັນແລະກັນ ແລະ ເຕີບໂຕໄປນຳກັນ. ຂະນະທີ່ການຮັບໃຊ້ອາດບໍ່ສະດວກສະບາຍສະເໝີໄປ, ແຕ່ມັນຈະເປັນລາງວັນສະເໝີ.
ແລະ ສຸດທ້າຍ, ການໃຊ້ເຄື່ອງມືສື່ສານດິຈິຕ້ອນຢ່າງມີຈຸດປະສົງ. ທຸກມື້ນີ້, ເຄື່ອງມືສື່ສານດິຈິຕ້ອນຊ່ວຍໃຫ້ເຮົາເຊື່ອມຕໍ່ຢ່າງທີ່ບໍ່ເຄີຍເປັນມາກ່ອນ. ເຊັ່ນດຽວກັບພວກທ່ານສ່ວນຫລາຍ, ຂ້າພະເຈົ້າໃຊ້ເຄື່ອງມືເຫລົ່ານີ້ໃນການເຊື່ອມຕໍ່ເຂົ້າກັບອ້າຍເອື້ອຍນ້ອງໃນສາດສະໜາຈັກ ແລະ ກັບຄອບຄົວ ແລະ ໝູ່ເພື່ອນຂອງຂ້າພະເຈົ້າ. ຂະນະທີ່ຂ້າພະເຈົ້າເຊື່ອມຕໍ່ເຂົ້າກັບເຂົາເຈົ້າ, ຂ້າພະເຈົ້າຮູ້ສຶກໃກ້ຊິດກັບເຂົາເຈົ້າຫລາຍຂຶ້ນ; ເຮົາສາມາດປະຕິບັດສາດສະໜາກິດຕໍ່ກັນແລະກັນໃນເວລາຂັດສົນ ເມື່ອເຮົາບໍ່ສາມາດໄປເອງໄດ້. ເຄື່ອງມືເຫລົ່ານີ້ເປັນພອນຢ່າງບໍ່ຕ້ອງສົງໄສ, ແຕ່ມັນກໍສາມາດດຶງເຮົາອອກຈາກຄວາມເລິກເຊິ່ງຂອງການປະຕິສຳພັນທີ່ມີຄວາມໝາຍ ແລະ ໃນທີ່ສຸດ ເຮັດໃຫ້ເຮົາຖືກດຶງໄປສູ່ນິໄສທີ່ເຮັດໃຫ້ເຮົາເສຍເວລາໃນກິດຈະກຳທີ່ມີຈຸດປະສົງທີ່ໜ້ອຍລົງ. ການພະຍາຍາມທີ່ຈະເປັນເກືອຂອງແຜ່ນດິນໂລກ ແມ່ນລວມທັງຫລາຍກວ່າການເລື່ອນພາບຢູ່ໜ້າຈໍຫົກນິ້ວ (15 ຊຕມ) ຢ່າງບໍ່ສິ້ນສຸດ.

ເມື່ອເຮົາເຮັດໃຫ້ບ້ານຂອງພຣະຜູ້ເປັນເຈົ້າເປັນສູນກາງໃນຊີວິດຂອງເຮົາ, ເພີ່ມຄວາມເຂັ້ມແຂງໃຫ້ກັບຄົນອື່ນຢ່າງຕັ້ງໃຈ ໂດຍການດຳລົງຊີວິດຕາມພຣະກິດຕິຄຸນ, ຍອມຮັບການເອີ້ນໃຫ້ຮັບໃຊ້, ແລະ ໃຊ້ເຄື່ອງມືດິຈິຕ້ອນດ້ວຍຈຸດປະສົງ, ເຮົາຈະສາມາດຮັກສາພະລັງທາງວິນຍານໄວ້ໄດ້. ດັ່ງທີ່ເກືອໃນຮູບແບບທີ່ບໍລິສຸດທີ່ສຸດ ມີພະລັງທີ່ຈະເພີ່ມລົດຊາດ ແລະ ຖະໜອມຮັກສາ, ສັດທາຂອງເຮົາໃນພຣະເຢຊູຄຣິດກໍເຊັ່ນກັນ ເມື່ອມັນຖືກບຳລຸງລ້ຽງ ແລະ ປົກປ້ອງໂດຍການອຸທິດຕົນຂອງເຮົາຕໍ່ການຮັບໃຊ້ ແລະ ຄວາມຮັກທີ່ເໝືອນດັ່ງພຣະຄຣິດ.

ເມື່ອເຮົາຍັງຄົງເຊື່ອມຕໍ່ເຂົ້າກັບພຣະຜູ້ເປັນເຈົ້າ, ຊີວິດຂອງເຮົາຈະສະທ້ອນແສງຂອງພຣະອົງຢ່າງເປັນທຳມະຊາດ, ແລະ ເຮົາຈະກາຍເປັນເກືອຂອງແຜ່ນດິນໂລກ. ໃນຄວາມພະຍາຍາມນີ້, ເຮົາຈະບໍ່ພຽງແຕ່ເຮັດໃຫ້ຊີວິດຂອງເຮົາດີຂຶ້ນເທົ່ານັ້ນ ແຕ່ຍັງຈະເພີ່ມຄວາມເຂັ້ມແຂງໃຫ້ແກ່ຄອບຄົວຂອງເຮົາ ແລະ ຊຸມຊົນຂອງເຮົານຳອີກ. ຂໍໃຫ້ເຮົາພະຍາຍາມທີ່ຈະຮັກສາການເຊື່ອມຕໍ່ນີ້ກັບພຣະຜູ້ເປັນເຈົ້າ, ບໍ່ມີວັນສູນເສຍລົດຊາດຂອງເຮົາ ແລະ ເປັນເມັດແກ້ວເກືອທີ່ນ້ອຍໆທີ່ພຣະຜູ້ເປັນເຈົ້າຊົງຢາກໃຫ້ເຮົາເປັນ. ໃນພຣະນາມຂອງພຣະເຢຊູຄຣິດ, ອາແມນ.