ອົງພຣະເຢຊູຄຣິດເຈົ້າຈະສະເດັດມາອີກຄັ້ງ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ບັດນີ້ເປັນເວລາສຳລັບທ່ານ ແລະ ສຳລັບຂ້າພະເຈົ້າ ທີ່ຈະກຽມພ້ອມສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູທີ່ພຣະຜູ້ເປັນເຈົ້າໄດ້ອວຍພອນຂ້າພະເຈົ້າໃຫ້ກ່າວກັບທ່ານ.

ໃນກອງປະຊຸມໃຫຍ່ນີ້, ພຣະຜູ້ເປັນເຈົ້າໄດ້ກ່າວກັບເຮົາຜ່ານທາງຜູ້ຮັບໃຊ້ຂອງພຣະອົງ. ຂ້າພະເຈົ້າຊຸກຍູ້ທ່ານໃຫ້ສຶກສາຂ່າວສານຂອງພວກເພິ່ນ. ໃຫ້ໃຊ້ມັນເປັນເຄື່ອງຊີ້ວັດວ່າ ອັນໃດຈິງ ແລະ ອັນໃດບໍ່ຈິງ, ລະຫວ່າງຫົກເດືອນຂ້າງໜ້າ.

ການອະນຸລັກ ແລະ ການບູລະນະພຣະວິຫານເຊົາເລັກ, ແລະ ພື້ນທີ່ອື່ນໆໃນບໍລິເວນພຣະວິຫານ, ໄດ້ດຳເນີນການມາເກືອບເຖິງຫ້າປີແລ້ວ. ຄາດຄະເນວ່າວຽກງານນີ້ຈະສຳເລັດໃນທ້າຍປີ 2026. ພວກເຮົາຂໍຂອບໃຈທຸກຄົນທີ່ເຮັດວຽກໃນໂຄງການໃຫຍ່ໂຕນີ້.

ໃນລະຫວ່າງຫົກເດືອນທີ່ຜ່ານມາ, ພວກເຮົາໄດ້ອຸທິດ ຫລື ອຸທິດພຣະວິຫານຄືນໃໝ່ເກົ້າແຫ່ງ ໃນຫ້າປະເທດ. ລະຫວ່າງນີ້ຈົນເຖິງທ້າຍປີ, ພວກເຮົາຈະອຸທິດອີກຫ້າແຫ່ງ.

ມື້ນີ້ ພວກເຮົາຍິນດີທີ່ຈະປະກາດແຜນການກໍ່ສ້າງພຣະວິຫານ 17 ແຫ່ງຕື່ມອີກ. ກະລຸນາຮັບຟັງດ້ວຍຄວາມຄາລະວະ ຂະນະທີ່ຂ້າພະເຈົ້າປະກາດສະຖານທີ່ຕ່າງໆ.

ຮູຈິຕານ ເດ ຊາຣາໂກຊາ, ແມັກຊິໂກ
ຊານຕາອານາ, ແອນຊານວາດໍ
ເມເດຢິນ, ໂກໂລມບີ
ຊານຕີອາໂກ, ໂດມີນີກັນ
ປວຍໂຕມອນ, ຈີເລ
ດັບລິນ, ອຽກລັງ
ມິລານ, ອີຕາລີ
ອາບູຈາ, ນີເຊເລຍ
ກຳປາລາ, ອູກັນດາ
ມາປູໂຕ, ໂມຊຳບິກ
ເຄີດະລີນ, ໄອດາໂຮ
ຄວີນຄຣີກ, ອາຣິໂຊນາ
ເອວປາໂຊ, ເທັກຊັດ
ຮັນສະວຽວ, ອາລາບາມາ
ມິວວໍກີ, ວິສຄອນຊິນ
ຊຳມິດ, ນິວເຈີຊີ
ໄພຣສ໌, ຢູທາ

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານເຫັນເຖິງສິ່ງທີ່ເກີດຂຶ້ນຕໍ່ໜ້າຕໍ່ຕາເຮົາຫລືບໍ່? ຂ້າພະເຈົ້າອະທິຖານວ່າເຮົາຈະບໍ່ພາດຄວາມສະຫງ່າງາມຂອງຊ່ວງເວລານີ້! ພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງແທ້ໆ.

ເປັນຫຍັງພວກເຮົາຈຶ່ງສ້າງພຣະວິຫານດ້ວຍຄວາມໄວທີ່ບໍ່ເຄີຍມີມາກ່ອນ? ເປັນຫຍັງ? ຍ້ອນພຣະຜູ້ເປັນເຈົ້າໄດ້ສັ່ງເຮົາໃຫ້ເຮັດເຊັ່ນນັ້ນ. ພອນຂອງພຣະວິຫານຊ່ວຍເຕົ້າໂຮມອິດສະຣາເອນຢູ່ທັງສອງຟາກມ່ານ. ພອນເຫລົ່ານີ້ກໍຊ່ວຍກຽມຜູ້ຄົນທີ່ຈະຊ່ວຍກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ!

ການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ.

ດັ່ງທີ່ສາດສະດາເອຊາຢາໄດ້ທຳນາຍໄວ້, ແລະ ດັ່ງທີ່ໄດ້ອະນຸສອນໄວ້ໃນໜັງສືຂອງ ຮັນແດວ ພຣະເມຊີອາ, ເມື່ອພຣະເຢຊູຄຣິດສະເດັດກັບມາ, “ສະຫງ່າລາສີຂອງ [ພຣະຜູ້ເປັນເຈົ້າ] ກໍຈະປະກົດແຈ້ງ, ທຸກປະຊາຊາດກໍຈະໄດ້ເຫັນພຣະສະຫງ່າລາສີນັ້ນ.”

ໃນວັນນັ້ນ “ພຣະອົງຈະເປັນຜູ້ປົກຄອງພວກເຮົາ, ພຣະນາມຂອງພຣະອົງຈະຖືກເອີ້ນວ່າ ຜູ້ປະເສີດ, ຜູ້ປຶກສາ, ພຣະເຈົ້າຜູ້ຊົງລິດທານຸພາບ, ພຣະບິດາຜູ້ເປັນນິດ, ອົງສັນຕິລາດ.”

ພຣະເຢຊູຄຣິດຈະປົກຄອງທັງເຢຣູຊາເລັມເກົ່າ ແລະ ເຢຣູຊາເລັມໃໝ່ທີ່ “ຖືກສ້າງຂຶ້ນໃນທະວີບອາເມຣິກາ.” ຈາກສູນກາງໃຫຍ່ສອງແຫ່ງເຫລົ່ານີ້, ພຣະອົງຈະຊີ້ນຳວຽກງານຂອງສາດສະໜາຈັກຂອງພຣະອົງ.

ໃນວັນນັ້ນ ພຣະຜູ້ເປັນເຈົ້າຈະຖືກຮູ້ຈັກວ່າເປັນ “ພຣະມະຫາກະສັດເໜືອກະສັດທັງປວງ ແລະ ຊົງເປັນພຣະຜູ້ເປັນເຈົ້າເໜືອເຈົ້ານາຍທັງປວງ.” ຜູ້ທີ່ຢູ່ກັບພຣະອົງ ຈະເປັນ “ຜູ້ທີ່ພຣະອົງໄດ້ຊົງເອີ້ນເອົາ ແລະ ຊົງເລືອກໄວ້ ກັບທັງເປັນຜູ້ຊື່ສັດ.”

ອ້າຍເອື້ອຍນ້ອງທັງຫລາຍ, ບັດນີ້ເປັນເວລາສຳລັບທ່ານ ແລະ ສຳລັບຂ້າພະເຈົ້າ ທີ່ຈະກຽມພ້ອມສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ບັດນີ້ເປັນເວລາທີ່ເຮົາຈະເຮັດໃຫ້ການເປັນສານຸສິດຂອງເຮົາມີຄວາມສຳຄັນອັນດັບສູງສຸດ. ໃນໂລກທີ່ເຕັມໄປດ້ວຍສິ່ງລົບກວນຢ່າງຫລວງຫລາຍ, ເຮົາຈະເຮັດສິ່ງນີ້ໄດ້ແນວໃດ?

ການນະມັດສະການໃນພຣະວິຫານເປັນປະຈຳຈະຊ່ວຍເຮົາໄດ້. ໃນບ້ານຂອງພຣະຜູ້ເປັນເຈົ້າ, ເຮົາສຸມໃຈໃສ່ທີ່ພຣະເຢຊູຄຣິດ. ເຮົາຮຽນຮູ້ກ່ຽວກັບພຣະອົງ. ເຮົາເຮັດພັນທະສັນຍາທີ່ຈະຕິດຕາມພຣະອົງ. ເຮົາມາຮູ້ຈັກພຣະອົງ. ເມື່ອເຮົາຮັກສາພັນທະສັນຍາພຣະວິຫານຂອງເຮົາ, ເຮົາຈະສາມາດເຂົ້າເຖິງອຳນາດແຫ່ງການເສີມກຳລັງຂອງພຣະຜູ້ເປັນເຈົ້າໄດ້ຫລາຍຂຶ້ນ. ໃນພຣະວິຫານ, ເຮົາໄດ້ຮັບການປົກປ້ອງຈາກການໂຈມຕີຂອງໂລກ. ເຮົາປະສົບກັບຄວາມຮັກອັນບໍລິສຸດຂອງພຣະເຢຊູຄຣິດ ແລະ ພຣະບິດາເທິງສະຫວັນຂອງເຮົາຢ່າງອຸດົມສົມບູນ! ເຮົາຮູ້ສຶກສະຫງົບສຸກ ແລະ ໝັ້ນໃຈທາງວິນຍານ, ຊຶ່ງກົງກັນຂ້າມກັບຄວາມວຸ້ນວາຍຂອງໂລກ.

ນີ້ແມ່ນຄຳສັນຍາຂອງຂ້າພະເຈົ້າຕໍ່ທ່ານ: ຜູ້ສະແຫວງຫາພຣະເຢຊູຄຣິດຢ່າງຈິງໃຈ ຈະພົບພຣະອົງໃນພຣະວິຫານ. ທ່ານຈະຮູ້ສຶກເຖິງຄວາມເມດຕາຂອງພຣະອົງ. ທ່ານຈະພົບຄຳຕອບຕໍ່ຄຳຖາມທີ່ໜ້າສົງໄສທີ່ສຸດຂອງທ່ານ. ທ່ານຈະເຂົ້າໃຈຄວາມຊື່ນຊົມໃນພຣະກິດຕິຄຸນຂອງພຣະອົງໄດ້ດີຂຶ້ນ.

ຂ້າພະເຈົ້າໄດ້ຮຽນຮູ້ວ່າ ຄຳຖາມທີ່ສຳຄັນທີ່ສຸດ ທີ່ເຮົາທຸກຄົນຕ້ອງຕອບຄື: ເຮົາຈະມອບຊີວິດຂອງເຮົາໃຫ້ໃຜ ແລະ ເພື່ອຫຍັງ?

ການຕັດສິນໃຈຂອງຂ້າພະເຈົ້າທີ່ຈະຕິດຕາມພຣະເຢຊູຄຣິດ ເປັນການຕັດສິນໃຈທີ່ສຳຄັນທີ່ສຸດ ທີ່ຂ້າພະເຈົ້າເຄີຍເຮັດ. ໃນຊ່ວງທີ່ຮຽນແພດ, ຂ້າພະເຈົ້າໄດ້ຮັບປະຈັກພະຍານເຖິງຄວາມເປັນພຣະເຈົ້າຂອງພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ. ນັບແຕ່ນັ້ນມາ ພຣະຜູ້ຊ່ວຍໃຫ້ລອດຂອງເຮົາໄດ້ເປັນຫີນສີລາທີ່ຂ້າພະເຈົ້າໄດ້ສ້າງຊີວິດຂອງຂ້າພະເຈົ້າໄວ້ເທິງນັ້ນ. ການເລືອກນັ້ນໄດ້ສ້າງຄວາມແຕກຕ່າງທັງໝົດ! ການຕັດສິນໃຈນັ້ນໄດ້ເຮັດໃຫ້ການຕັດສິນໃຈອື່ນໆງ່າຍຂຶ້ນ. ການຕັດສິນໃຈນັ້ນໄດ້ໃຫ້ຈຸດປະສົງ ແລະ ທິດທາງແກ່ຂ້າພະເຈົ້າ. ມັນຍັງໄດ້ຊ່ວຍຂ້າພະເຈົ້າຜ່ານຜ່າມໍລະສຸມຊີວິດນຳອີກ. ຂ້າພະເຈົ້າຂໍແບ່ງປັນສອງຕົວຢ່າງ.

ຢ່າງທຳອິດ, ເມື່ອ ແດນແຊວ ພັນລະຍາຂອງຂ້າພະເຈົ້າໄດ້ເສຍຊີວິດໂດຍບໍ່ຄາດຄິດ, ຂ້າພະເຈົ້າບໍ່ສາມາດຕິດຕໍ່ຫາລູກຄົນໃດຂອງພວກເຮົາໄດ້ເລີຍ. ຂ້າພະເຈົ້າຢູ່ທີ່ນັ້ນຄົນດຽວ, ເສຍໃຈ, ແລະ ຮ້ອງຫາຄວາມຊ່ວຍເຫລືອ. ດ້ວຍຄວາມກະຕັນຍູ, ຜ່ານທາງພຣະວິນຍານຂອງພຣະອົງ, ພຣະຜູ້ເປັນເຈົ້າໄດ້ສິດສອນຂ້າພະເຈົ້າວ່າ ເປັນຫຍັງແດນແຊວທີ່ຮັກຂອງຂ້າພະເຈົ້າຈຶ່ງຖືກພາກັບບ້ານ. ດ້ວຍຄວາມເຂົ້າໃຈນັ້ນ, ຂ້າພະເຈົ້າຈຶ່ງໄດ້ຮັບການປອບໂຍນ. ເມື່ອເວລາຜ່ານໄປ, ຂ້າພະເຈົ້າກໍສາມາດຮັບມືກັບຄວາມໂສກເສົ້າໄດ້ດີຂຶ້ນ. ຕໍ່ມາ, ຂ້າພະເຈົ້າໄດ້ແຕ່ງງານກັບ ເວັນດີ ພັນລະຍາທີ່ຮັກຂອງຂ້າພະເຈົ້າ. ນາງເປັນສ່ວນສຳຄັນໃນຕົວຢ່າງທີສອງຂອງຂ້າພະເຈົ້າ.

ຕອນເວັນດີ ແລະ ຂ້າພະເຈົ້າໄປປະຕິບັດໜ້າທີ່ມອບໝາຍໃນດິນແດນທີ່ຫ່າງໄກ, ໂຈນທີ່ມີອາວຸດໄດ້ເອົາປືນຈີ້ຫົວຂອງຂ້າພະເຈົ້າ ແລະ ດຶງໄກປືນ. ແຕ່ປືນບໍ່ລັ່ນ. ຕະຫລອດປະສົບການນັ້ນ, ຊີວິດຂອງພວກເຮົາທັງສອງໄດ້ຢູ່ໃນອັນຕະລາຍ. ແຕ່ເວັນດີ ແລະ ຂ້າພະເຈົ້າໄດ້ຮູ້ສຶກສະຫງົບທີ່ບໍ່ອາດຈະປະຕິເສດໄດ້. ນັ້ນຄືຄວາມສະຫງົບທີ່ “ເກີນຄວາມເຂົ້າໃຈ.”

ອ້າຍເອື້ອຍນ້ອງທັງຫລາຍ, ພຣະຜູ້ເປັນເຈົ້າຈະປອບໂຍນທ່ານເຊັ່ນກັນ! ພຣະອົງຈະເສີມກຳລັງໃຫ້ກັບທ່ານ. ພຣະອົງຈະອວຍພອນທ່ານດ້ວຍຄວາມສະຫງົບສຸກ, ແມ່ນແຕ່ທ່າມກາງຄວາມວຸ້ນວາຍ.

ກະລຸນາຟັງຄຳສັນຍາຂອງພຣະເຢຊູຄຣິດທີ່ມີຕໍ່ທ່ານ ທີ່ວ່າ: “ເຮົາຈະຢູ່ທາງເບື້ອງຂວາມືພວກເຈົ້າ ແລະ ທາງຊ້າຍພວກເຈົ້າ, ແລະ ວິນຍານຂອງເຮົາຈະຢູ່ໃນໃຈຂອງພວກເຈົ້າ, ແລະ ທູດຂອງເຮົາຈະອ້ອມຮອບພວກເຈົ້າໄວ້, ເພື່ອຄ້ຳຊູພວກເຈົ້າ.”

ພຣະຜູ້ຊ່ວຍໃຫ້ລອດມີຄວາມສາມາດຊ່ວຍເຫລືອທ່ານໄດ້ຢ່າງບໍ່ມີຂີດຈຳກັດ. ການທົນທຸກທໍລະມານທີ່ບໍ່ອາດເຂົ້າໃຈໄດ້ຂອງພຣະອົງໃນເຄັດເຊມາເນ ແລະ ທີ່ພູກະໂຫລກຫົວແມ່ນເພື່ອທ່ານ! ການຊົດໃຊ້ອັນບໍ່ມີຂອບເຂດຂອງພຣະອົງແມ່ນເພື່ອທ່ານ!

ຂ້າພະເຈົ້າຊຸກຍູ້ທ່ານໃຫ້ອຸທິດເວລາແຕ່ລະອາທິດ—ຕະຫລອດຊີວິດຂອງທ່ານ—ເພື່ອເພີ່ມຄວາມເຂົ້າໃຈເລື່ອງການຊົດໃຊ້ຂອງພຣະເຢຊູຄຣິດ. ໃຈຂອງຂ້າພະເຈົ້າເຈັບປວດແທນຜູ້ທີ່ຈົມຢູ່ກັບບາບ ແລະ ບໍ່ຮູ້ວ່າຈະອອກໄປໄດ້ແນວໃດ. ຂ້າພະເຈົ້າຮ້ອງໄຫ້ແທນຜູ້ທີ່ຕໍ່ສູ້ດີ້ນລົນທາງວິນຍານ ຫລື ແບກພາລະໜັກໜ່ວງຄົນດຽວ ເພາະພວກເຂົາບໍ່ເຂົ້າໃຈວ່າ ພຣະເຢຊູຄຣິດໄດ້ເຮັດຫຍັງເພື່ອພວກເຂົາ.

ພຣະເຢຊູຄຣິດໄດ້ຮັບເອົາບາບ ຂອງທ່ານ, ຄວາມເຈັບປວດ ຂອງທ່ານ, ຄວາມເຈັບປວດໃຈ ຂອງທ່ານ, ແລະ ຄວາມອ່ອນແອ ຂອງທ່ານ. ທ່ານບໍ່ຈຳເປັນຕ້ອງແບກຮັບສິ່ງເຫລົ່ານີ້ພຽງລຳພັງ! ພຣະອົງຈະໃຫ້ອະໄພທ່ານເມື່ອທ່ານກັບໃຈ. ພຣະອົງຈະອວຍພອນທ່ານດ້ວຍສິ່ງທີ່ທ່ານຕ້ອງການ. ພຣະອົງຈະປິ່ນປົວຈິດວິນຍານທີ່ບາດເຈັບຂອງທ່ານ. ເມື່ອທ່ານທຽມແອກກັບພຣະອົງ, ພາລະຂອງທ່ານຈະເບົາບາງລົງ. ຖ້າຫາກທ່ານຈະເຮັດ ແລະ ຮັກສາພັນທະສັນຍາທີ່ຈະຕິດຕາມພຣະເຢຊູຄຣິດ, ທ່ານຈະພົບວ່າຊ່ວງເວລາທີ່ເຈັບປວດໃນຊີວິດຂອງທ່ານ ເປັນພຽງຊົ່ວຄາວ. ຄວາມທຸກຂອງທ່ານຈະ “ຖືກກືນເຂົ້າໄປໃນຄວາມສຸກຂອງພຣະຄຣິດ.”

ມັນບໍ່ໄວເກີນໄປ ຫລື ສາຍເກີນໄປທີ່ທ່ານຈະເປັນສາວົກຜູ້ອຸທິດຕົນຂອງພຣະເຢຊູຄຣິດ. ແລ້ວທ່ານຈະປະສົບກັບພອນຢ່າງເຕັມປ່ຽມຂອງການຊົດໃຊ້ຂອງພຣະອົງ. ທ່ານກໍຈະມີປະສິດທິພາບຫລາຍຂຶ້ນ ໃນການຊ່ວຍເຕົ້າໂຮມອິດສະຣາເອນນຳອີກ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃນວັນຂ້າງໜ້າ, ພຣະເຢຊູຄຣິດຈະສະເດັດກັບມາຍັງໂລກ ໃນຖານະພຣະເມຊີອາແຫ່ງພັນປີ. ດັ່ງນັ້ນໃນມື້ນີ້ ຂ້າພະເຈົ້າຂໍຮຽກຮ້ອງໃຫ້ທ່ານອຸທິດຊີວິດຂອງທ່ານໃຫ້ກັບພຣະເຢຊູຄຣິດຄືນໃໝ່. ຂ້າພະເຈົ້າຮຽກຮ້ອງໃຫ້ທ່ານຊ່ວຍຮວບຮວມອິດສະຣາເອນທີ່ກະຈັດກະຈາຍ ແລະ ກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ. ຂ້າພະເຈົ້າຮຽກຮ້ອງໃຫ້ທ່ານເວົ້າເຖິງພຣະຄຣິດ, ເປັນພະຍານເຖິງພຣະຄຣິດ, ມີສັດທາໃນພຣະຄຣິດ, ແລະ ປິຕິຍິນດີໃນພຣະຄຣິດ!

ຈົ່ງມາຫາພຣະຄຣິດ ແລະ “ຖວາຍທັງຈິດວິນຍານຂອງພວກທ່ານ” ແດ່ພຣະອົງ. ນີ້ຄືເຄັດລັບຂອງຊີວິດທີ່ເຕັມໄປດ້ວຍຄວາມຊື່ນຊົມ!

ສິ່ງທີ່ດີທີ່ສຸດຍັງມາບໍ່ເຖິງເທື່ອ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເພາະພຣະຜູ້ຊ່ວຍໃຫ້ລອດຈະສະເດັດມາອີກຄັ້ງ! ສິ່ງທີ່ດີທີ່ສຸດຍັງບໍ່ມາເຖິງເທື່ອ ເພາະພຣະຜູ້ເປັນເຈົ້າ ກຳລັງເລັ່ງວຽກງານຂອງພຣະອົງ. ສິ່ງທີ່ດີທີ່ສຸດຍັງບໍ່ມາເຖິງເທື່ອ ຂະນະທີ່ເຮົາຫັນຫົວໃຈ ແລະ ຊີວິດຂອງເຮົາມາຫາພຣະເຢຊູຄຣິດ.

ຂ້າພະເຈົ້າເປັນພະຍານຢ່າງໜັກແໜ້ນວ່າ ພຣະເຢຊູຄຣິດເປັນພຣະບຸດຂອງພຣະເຈົ້າ. ຂ້າພະເຈົ້າເປັນສານຸສິດຂອງພຣະອົງ. ຂ້າພະເຈົ້າໄດ້ຮັບກຽດທີ່ໄດ້ເປັນຜູ້ຮັບໃຊ້ຂອງພຣະອົງ. ເມື່ອພຣະອົງສະເດັດມາຄັ້ງທີສອງ, “ລັດສະໝີພາບຂອງພຣະຜູ້ເປັນເຈົ້າຈະຖືກເປີດເຜີຍ, ແລະ ເນື້ອໜັງທັງປວງຈະໄດ້ເຫັນພ້ອມກັນ.” ມື້ນັ້ນຈະເຕັມໄປດ້ວຍຄວາມຊື່ນຊົມສຳລັບຄົນຊອບທຳ!

ຜ່ານທາງອຳນາດຂອງຂໍກະແຈຂອງຖານະປະໂລຫິດສັກສິດທີ່ຂ້າພະເຈົ້າດຳລົງຢູ່, ຂ້າພະເຈົ້າປະກາດຄວາມຈິງນີ້ຕໍ່ທ່ານ ແລະ ຕໍ່ໂລກທັງໝົດ! ໃນພຣະນາມຂອງພຣະເຢຊູຄຣິດ, ອາແມນ.