ພຣະຄຳພີສັກສິດ—ພື້ນຖານແຫ່ງສັດທາ
ເຮົາບໍ່ສາມາດປະເມີນຄວາມສຳຄັນຂອງພຣະຄຳພີຕ່ຳເກີນໄປ ທັງໃນເລື່ອງການປ່ຽນໃຈເຫລື້ອມໃສ ແລະ ການຄົງຢູ່ຢ່າງຊື່ສັດໃນພຣະກິດຕິຄຸນ.
ເມື່ອບໍ່ດົນມານີ້ ແມຣີ ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ເຫັນເສື້ອຍືດທີ່ມີຮູບປຶ້ມ ແລະ ຂໍ້ຄວາມຢູ່ທາງໜ້າທີ່ອ່ານວ່າ, “ປຶ້ມ: ອຸປະກອນມືຖືຕົ້ນສະບັບ.”
ຂ້າພະເຈົ້າໄດ້ຄິດກ່ຽວກັບຂໍ້ຄວາມທີ່ໜ້າສົນໃຈນີ້ ແລະ ເຖິງວິທີທີ່ອຸປະກອນມືຖືທຸກຊະນິດໄດ້ກັບກາຍມີຄວາມສຳຄັນຫລາຍແນວໃດ. ເມື່ອໄຕ່ຕອງຕື່ມອີກ, ຂ້າພະເຈົ້າຮັບຮູ້ວ່າ ບໍ່ມີອຸປະກອນໃດໆ ຫລື ແມ່ນແຕ່ອຸປະກອນທີ່ມີປັນຍາປະດິດ ຈະສາມາດມີຄວາມສຳຄັນຫລາຍເທົ່າກັບການຊີ້ນຳທາງວິນຍານ ທີ່ມາຈາກການເປີດເຜີຍຂອງພຣະເຈົ້າໄດ້.
ບໍ່ວ່າຈະເປັນມືຖື ຫລື ດິຈິຕ້ອນ, ພຣະຄຣິສຕະທຳຄຳພີສັກສິດ ແລະ ພຣະຄຳພີມໍມອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ລ້ວນແຕ່ໃຫ້ຄຳແນະນຳທາງວິນຍານ ແລະ ຄຳສອນຈາກພຣະເຢຊູຄຣິດ, ພຣະຜູ້ຊ່ວຍໃຫ້ລອດຂອງໂລກ. ເຮົາທະນຸຖະໜອມປຶ້ມເຫລົ່ານີ້ສຳລັບບົດບາດອັນເລິກເຊິ່ງຂອງມັນ ໃນການບັນທຶກການຊີ້ນຳຂອງພຣະເຈົ້າຕໍ່ສາດສະດາ ແລະ ຜູ້ຄົນໃນສະໄໝບູຮານ ແລະ ການນຳພາທີ່ປຶ້ມເຫລົ່ານີ້ມອບໃຫ້ກັບຊີວິດສ່ວນຕົວຂອງເຮົາ.
ເມື່ອປະກອບກັບຄຳສອນຂອງສາດສະດາທີ່ມີຊີວິດຢູ່, ພຣະຄຳພີສັກສິດເຫລົ່ານີ້ໃຫ້ການຊີ້ນຳດ້ານຫລັກຄຳສອນສຳລັບເຮົາໃນໂລກປະຈຸບັນ. ພຣະຄຳພີເຫລົ່ານີ້ມີພະລັງຫລາຍທີ່ສຸດ ເມື່ອໃຫ້ຄຳແນະນຳ, ການແກ້ໄຂ, ການປອບໂຍນ, ແລະ ການເຮັດໃຫ້ສະບາຍໃຈຂຶ້ນຕໍ່ບຸກຄົນ ແລະ ຄອບຄົວ ຜູ້ສະແຫວງຫາການຊີ້ນຳຈາກພຣະຜູ້ເປັນເຈົ້າ.
ພຣະຄຳພີ, ປະກອບກັບການດົນໃຈທາງວິນຍານຈາກພຣະວິນຍານບໍລິສຸດ, ສືບຕໍ່ຊ່ວຍອຳນວຍຄວາມສະດວກໃຫ້ແກ່ການປ່ຽນໃຈເຫລື້ອມໃສຂອງຜູ້ທີ່ຫົວໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ ແລະ ປາດຖະໜາທີ່ຈະຕິດຕາມພຣະເຢຊູຄຣິດ. ພຣະຄຳພີຊ່ວຍສ້າງພື້ນຖານທີ່ສາມາດທົນຕໍ່ຄວາມພະຍາຍາມອັນຕໍ່ເນື່ອງຂອງສັດຕູ ທີ່ຈະທຳລາຍສັດທາ.
ຜູ້ປ່ຽນໃຈເຫລື້ອມໃສໃໝ່ໄດ້ຮັບພອນ ແລະ ເປັນເລືອດຫລໍ່ລ້ຽງສາດສະໜາຈັກຕະຫລອດປະຫວັດສາດ. ຕົວຢ່າງໜຶ່ງແມ່ນມີຄ່າສະເພາະສຳລັບຂ້າພະເຈົ້າ. ຕອນຂ້າພະເຈົ້າເປັນອະທິການໜຸ່ມ, ຊິດສະເຕີຜູ້ສອນສາດສະໜາທີ່ດີເລີດສອງຄົນ ກຳລັງສິດສອນຄອບຄົວ ວິວລຽມ ແອັດເວີດ ມັສແມນ. ຜູ້ເປັນພໍ່, ຊຶ່ງເປັນທະນາຍຄວາມທີ່ມີຄວາມສາມາດຫລາຍ, ໄດ້ເປັນທີ່ປຶກສາທົ່ວໄປຂອງບໍລິສັດໃຫຍ່ແຫ່ງໜຶ່ງ. ເຈເນັດ ພັນລະຍາທີ່ອຸທິດຕົນຂອງລາວ ກຳລັງຊ່ວຍຄອບຄົວໃຫ້ດຳລົງຊີວິດທີ່ເໝືອນດັ່ງພຣະຄຣິດຫລາຍຂຶ້ນ.
ລູກຊາຍ ແລະ ລູກສາວທີ່ດີເດັ່ນຂອງເຂົາເຈົ້າ, ທັງສອງຢູ່ໃນໄວ 20 ປີຕົ້ນໆ, ກໍໄດ້ຖືກສິດສອນເຊັ່ນກັນ. ທັງສີ່ຄົນໄດ້ຮັບບົດຮຽນ ແລະ ໄດ້ໄປໂບດ. ຊິດສະເຕີຜູ້ສອນສາດສະໜາໄດ້ເນັ້ນເລື່ອງການອ່ານພຣະຄຳພີມໍມອນ ແລະ ການອະທິຖານຂໍປະຈັກພະຍານເຖິງພຣະຄຳພີສັກສິດນັ້ນ. ເປັນທີ່ໜ້າປະຫລາດ, ຄອບຄົວເຂົາໄດ້ອ່ານພຣະຄຳພີມໍມອນຈົນຈົບດ້ວຍການອະທິຖານ ໃນເວລາອັນສັ້ນໆ.
ຜູ້ສອນສາດສະໜາຂອງສະເຕກ, ຊຶ່ງທັງສອງເຄີຍເປັນປະທານສະມາຄົມສະຕີສົງເຄາະຂອງຫວອດມາກ່ອນ, ໄດ້ພາເຂົາເຈົ້າໄປຮ່ວມກອງປະຊຸມສິນລະລຶກ.
ເມື່ອຄອບຄົວໃກ້ຈະຮັບບັບຕິສະມາ, ເຂົາເຈົ້າໄດ້ຮັບເອກະສານວິພາກວິຈານສາດສະໜາຈັກເປັນຈຳນວນຫລວງຫລາຍ. ນີ້ເປັນຊ່ວງກ່ອນອິນເຕີເນັດ, ແຕ່ເອກະສານເຫລົ່ານັ້ນກໍເຕັມກ່ອງຂະໜາດໃຫຍ່.
ຊິດສະເຕີຜູ້ສອນສາດສະໜາໄດ້ເຊື້ອເຊີນຂ້າພະເຈົ້າ ໃນຖານະອະທິການ ອາຍຸ 34 ປີ ທີ່ຫາກໍຖືກເອີ້ນສູ່ຕຳແໜ່ງ ໃຫ້ຊ່ວຍຕອບຄຳຖາມຕ່າງໆ. ເມື່ອພວກເຮົາເຕົ້າໂຮມກັນຢູ່ໃນຫ້ອງຮັບແຂກຂອງເຂົາເຈົ້າ, ກ່ອງໃຫຍ່ທີ່ເຕັມໄປດ້ວຍແຜ່ນພັບວິພາກວິຈານສາດສະໜາຈັກ ກໍວາງຢູ່ກາງຫ້ອງ. ຂ້າພະເຈົ້າໄດ້ເລີ່ມການມອບໝາຍນີ້ດ້ວຍການອະທິຖານ. ລະຫວ່າງການອະທິຖານເປີດ, ພຣະວິນຍານໄດ້ກະຊິບຕໍ່ຂ້າພະເຈົ້າວ່າ, “ລາວຮູ້ແລ້ວວ່າມັນເປັນຄວາມຈິງ.” ສິ່ງນີ້ສຳຄັນຫລາຍ. ພວກຊິດສະເຕີເຊື່ອວ່າຄົນອື່ນໆໃນຄອບຄົວມີປະຈັກພະຍານຢູ່ແລ້ວ. ເຂົາເຈົ້າບໍ່ແນ່ໃຈກ່ຽວກັບຜູ້ເປັນພໍ່.
ຂ້າພະເຈົ້າໄດ້ຮີບແຈ້ງໃຫ້ລາວຮູ້ວ່າພຣະວິນຍານໄດ້ກະຕຸ້ນໃຫ້ຂ້າພະເຈົ້າຮູ້ວ່າ ລາວມີປະຈັກພະຍານແລ້ວ. “ນັ້ນເປັນຄວາມຈິງບໍ?” ລາວໄດ້ຫລຽວເບິ່ງຂ້າພະເຈົ້າຢ່າງຕັ້ງໃຈ ແລະ ກ່າວວ່າ ພຣະວິນຍານໄດ້ຢືນຢັນຄວາມຈິງຂອງພຣະຄຳພີມໍມອນ ແລະ ສາດສະໜາຈັກຕໍ່ລາວ.
ແລ້ວຂ້າພະເຈົ້າໄດ້ຖາມວ່າ ຈຳເປັນຫລືບໍ່ທີ່ຈະຕ້ອງທົບທວນແຜ່ນພັບເຫລົ່ານັ້ນ, ຖ້າຫາກເຂົາເຈົ້າໄດ້ຮັບການຢືນຢັນທາງວິນຍານແລ້ວ.
ຜູ້ເປັນພໍ່ໄດ້ຕອບວ່າ ບໍ່ຈຳເປັນ. ທຸກຄົນໃນຄອບຄົວກໍເຫັນດ້ວຍກັບຄຳຕອບຂອງລາວ.
ລາວເວົ້າວ່າລາວມີຄຳຖາມສຳຄັນຢູ່ໜຶ່ງຂໍ້: ເຫດຜົນໜຶ່ງທີ່ເຂົາເຈົ້າໄດ້ຮັບເອກະສານຢ່າງຫລວງຫລາຍທີ່ຕໍ່ຕ້ານສາດສະໜາຈັກ ກໍຄືວ່າເຂົາເຈົ້າເປັນສະມາຊິກຂອງສາດສະໜາອື່ນ. ນອກຈາກນີ້, ລາວຍັງໄດ້ໃຫ້ຄຳໝັ້ນສັນຍາວ່າຈະຊ່ວຍສ້າງຕຶກໂບດຫລັງໃໝ່ໃຫ້ສາດສະໜານັ້ນ. ລາວໄດ້ບອກຂ້າພະເຈົ້າວ່າ ຊິດສະເຕີຜູ້ສອນສາດສະໜາໄດ້ສິດສອນລາວກ່ຽວກັບຄວາມສຳຄັນຂອງສ່ວນສິບ, ຊຶ່ງລາວໄດ້ຍອມຮັບດ້ວຍຄວາມກະຕັນຍູ, ແຕ່ລາວສົງໄສວ່າ ມັນຈະຜິດບໍທີ່ຈະຮັກສາຄຳໝັ້ນສັນຍາທີ່ລາວໄດ້ເຮັດໄວ້ກ່ອນໜ້ານີ້. ຂ້າພະເຈົ້າໄດ້ຮັບຮອງກັບລາວວ່າ ການເຮັດຕາມຄຳໝັ້ນສັນຍາຈະທັງເປັນໜ້ານັບຖື ແລະ ເໝາະສົມ.
ມັສແມນກັບລູກຊາຍ, ລູກໄພ້, ແລະ ລູກສາວຂອງເຂົາເຈົ້າ.
ທັງຄອບຄົວໄດ້ຮັບບັບຕິສະມາ. ໜຶ່ງປີຕໍ່ມາ ເຂົາເຈົ້າໄດ້ຜະນຶກເຂົ້າກັນເປັນຄອບຄົວ ໃນພຣະວິຫານ ໂອກແລນ ຄາລິຟໍເນຍ. ຂ້າພະເຈົ້າຮູ້ສຶກເປັນກຽດທີ່ໄດ້ຢູ່ທີ່ນັ້ນ. ລູກຊາຍໄດ້ຮຽນຈົບໂຮງຮຽນກົດໝາຍ, ໄດ້ສອບເສັງຜ່ານ ພາທະນາຍຄວາມລັດຄາລິຟໍເນຍ, ແລະ ໄດ້ໄປເຜີຍແຜ່ຢ່າງຊື່ສັດຢູ່ປະເທດຍີ່ປຸ່ນທັນທີ. ຂ້າພະເຈົ້າໄດ້ເຝົ້າເບິ່ງຕະຫລອດຫລາຍປີທີ່ຜ່ານມາ ວ່າຄົນລຸ້ນຕໍ່ໆໄປຍັງຊື່ສັດຕໍ່ພຣະກິດຕິຄຸນຫລືບໍ່. ຂ້າພະເຈົ້າໄດ້ຮັບສິດທິພິເສດເປັນຜູ້ປະກອບການຜະນຶກຂອງຫລານສາວຄົນໜຶ່ງ.
ການປ່ຽນໃຈເຫລື້ອມໃສທີ່ເກີດຂຶ້ນໃນສະໄໝຂອງເຮົາ ກໍໜ້າອັດສະຈັນໃຈເທົ່າໆກັນ. ເດືອນມິຖຸນາຜ່ານມານີ້ ແອນດີ ຣີດ, ຄູຝຶກຟຸດບອລ ຂອງ ແຄນຊັສ ຊີທີ ຊີບສ໌, ແລະ ຂ້າພະເຈົ້າ, ພ້ອມດ້ວຍຄົນອື່ນໆ ທີ່ເປັນຕົວແທນໃຫ້ແກ່ສາດສະໜາຂອງພວກເຮົາ ແລະ ສາດສະໜາອື່ນໆ, ໄດ້ກ່າວປາໄສໃນງານລວມສາດສະໜາ ທີ່ໂບດ ຣີເວີຊາຍ ໃນເມືອງນິວຢອກ. ຄູຣີດໄດ້ເນັ້ນຍ້ຳເຖິງໂອກາດທີສອງ ແລະ ການຕອບຮັບຄຳເຊີນ ແລະ ໂອກາດ, ຊຶ່ງເປັນແກ່ນແທ້ຂອງພຣະກິດຕິຄຸນຂອງພຣະເຢຊູຄຣິດ. ໃນຕອນເຊົ້າມື້ຕໍ່ມາ, ພ້ອມດ້ວຍພັນລະຍາຂອງພວກເຮົາ, ແທມມີ ຣີດ ແລະ ແມຣີ, ພວກເຮົາໄດ້ໄປຮ່ວມກອງປະຊຸມສິນລະລຶກຢູ່ທີ່ ຫວອດແມນແຮັດຕັນ ທີສອງ. ມັນເປັນພິທີທາງວິນຍານແທ້ໆ. ມີຜູ້ປ່ຽນໃຈເຫລື້ອມໃສໃໝ່ຫລາຍຄົນຢູ່ໃນບ່ອນຊຸມນຸມ. ສະມາຊິກຫ້າຄົນທີ່ຫາກໍຮັບບັບຕິສະມາ, ເປັນຜູ້ຊາຍໃຫຍ່ສີ່ຄົນ ແລະ ຊາຍໜຸ່ມໜຶ່ງຄົນ, ຢູ່ໃນບັນດາສະມາຊິກຖານະປະໂລຫິດແຫ່ງອາໂຣນທີ່ຢາຍສິນລະລຶກ. ຂ້າພະເຈົ້າດີໃຈທີ່ຈະລາຍງານວ່າ ມີສະມາຊິກໃໝ່ທີ່ຄ້າຍຄືກັນນີ້ ເກີດຂຶ້ນຢູ່ທົ່ວສາດສະໜາຈັກ.
ພວກເຮົາກະຕັນຍູສຳລັບການເພີ່ມທະວີຢ່າງເຫັນໄດ້ຊັດຂອງຜູ້ທີ່ຕອບຮັບຄຳເຊີນອັນສັກສິດ, ປ່ຽນແປງຊີວິດຂອງເຂົາເຈົ້າ, ແລະ ຮັບເອົາໂອກາດທີ່ຈະຕິດຕາມພຣະເຢຊູຄຣິດ. ເຂົາເຈົ້າໄດ້ເຂົ້າສູ່ເສັ້ນທາງແຫ່ງພັນທະສັນຍາ ຜ່ານທາງສັດທາ, ການກັບໃຈ, ການບັບຕິສະມາ, ແລະ ການຢືນຢັນ ດັ່ງທີ່ສິດສອນໃນພຣະຄຣິສຕະທຳຄຳພີສັກສິດ ແລະ ໃນພຣະຄຳພີມໍມອນ.
ເຮົາບໍ່ສາມາດປະເມີນຄວາມສຳຄັນຂອງພຣະຄຳພີຕ່ຳເກີນໄປ ທັງໃນເລື່ອງການປ່ຽນໃຈເຫລື້ອມໃສ ແລະ ການຄົງຢູ່ຢ່າງຊື່ສັດໃນພຣະກິດຕິຄຸນ. ສາດສະດາໃນສະໄໝບູຮານ ທີ່ບັນຍາຍຢູ່ໃນພຣະຄຳພີມໍມອນຮູ້ກ່ຽວກັບພາລະກິດຂອງພຣະເຢຊູຄຣິດ ແລະ ໄດ້ສິດສອນພຣະກິດຕິຄຸນຂອງພຣະອົງ. ພຣະຄຳພີມໍມອນຊ່ວຍໃຫ້ເຮົາຫຍັບເຂົ້າໃກ້ພຣະເຈົ້າຫລາຍຂຶ້ນ ເມື່ອເຮົາຮຽນຮູ້, ເຂົ້າໃຈ, ແລະ ນຳໃຊ້ຄຳສອນຂອງພຣະຄຳພີ. ສາດສະດາໂຈເຊັບ ສະມິດ ໄດ້ສິດສອນວ່າ “ຊາຍ [ຫລື ຍິງ] ຈະໄດ້ເຂົ້າໃກ້ພຣະເຈົ້າຫລາຍຂຶ້ນ ໂດຍການປະຕິບັດຕາມຄຳສັ່ງສອນ [ຂອງໜັງສືນີ້], ຫລາຍກວ່າປະຕິບັດຕາມໜັງສືເຫລັ້ມອື່ນໆ.”
ເພື່ອໃຫ້ຮູ້ວ່າພຣະຄຳພີມໍມອນເປັນພຣະຄຳຂອງພຣະເຈົ້າ, ເຮົາຕ້ອງອ່ານ, ໄຕ່ຕອງ, ແລະ ອະທິຖານກ່ຽວກັບມັນ ແລະ ແລ້ວກະທຳຕາມຄຳສັ່ງສອນຂອງມັນ. ສາດສະດາໂມໂຣໄນໄດ້ສັນຍາວ່າ ພຣະເຈົ້າຈະເປີດເຜີຍຄວາມຈິງຂອງໜັງສືນີ້ຕໍ່ເຮົາ ເມື່ອເຮົາອະທິຖານດ້ວຍໃຈຈິງ, ດ້ວຍເຈດຕະນາອັນແທ້ຈິງ, ແລະ ດ້ວຍສັດທາໃນພຣະຄຣິດ. ການສຶກສາພຣະຄຳພີມໍມອນແມ່ນສຳຄັນຕໍ່ການປ່ຽນໃຈເຫລື້ອມໃສທີ່ຍືນຍົງ.
ເມື່ອເຮົາພິຈາລະນາຄວາມສຳພັນລະຫວ່າງພຣະຄຣິສຕະທຳຄຳພີ ແລະ ພຣະຄຳພີມໍມອນ ໃນຖານະອຸປະກອນມືຖື, ເຮົາອາດຖາມຄຳຖາມ. ເຈົ້າຄິດວ່າໜັງສືທັງສອງເຫລັ້ມນີ້ຈະເປັນປະໂຫຍດ ແລະ ເສີມກັນແນວໃດ ຖ້າຫາກພຣະຜູ້ເປັນເຈົ້າປະກາດວ່າ ໜັງສືທັງສອງເຫລັ້ມນີ້ຈະລວມເຂົ້າກັນ ແລະ “ກາຍເປັນໜັງສືເຫລັ້ມດຽວໃນມືຂອງເຈົ້າ”? ນັ້ນແມ່ນສິ່ງທີ່ພຣະຜູ້ເປັນເຈົ້າໄດ້ປະກາດກ່ຽວກັບ “ໄມ້ທ່ອນທີ່ແທນຢູດາຍ,” ພຣະຄຣິສຕະທຳຄຳພີ, ແລະ “ໄມ້ທ່ອນທີ່ແທນ [ໂຢເຊັບ],” ພຣະຄຳພີມໍມອນ.
ໃນຫລາຍແງ່ມຸມ, ພຣະຄຳພີມໍມອນໃຫ້ຄຳສອນຂັ້ນພື້ນຖານທີ່ເສີມ ແລະ ສ້າງໃສ່ເທິງພຣະຄຣິສຕະທຳຄຳພີ. ຄຳສອນເລື່ອງການຊົດໃຊ້ຂອງພຣະເຢຊູຄຣິດເປັນຕົວຢ່າງທີ່ເລິກເຊິ່ງ.
ພຣະຄຣິສຕະທຳຄຳພີໃຫ້ເລື່ອງລາວທີ່ຖືກຕ້ອງກ່ຽວກັບການປະຕິບັດສາດສະໜາກິດຢູ່ໃນມະຕະຂອງພຣະເຢຊູຄຣິດ, ລວມທັງການສິ້ນພຣະຊົນ ແລະ ການຟື້ນຄືນພຣະຊົນຂອງພຣະອົງ. ພຣະຄຳພີມໍມອນແມ່ນແຈ່ມແຈ້ງກວ່າກ່ຽວກັບການຊົດໃຊ້ຂອງພຣະເຢຊູຄຣິດ, ສິ່ງທີ່ສາດສະດາໄດ້ອະທິບາຍຢ່າງລະອຽດກ່ອນການສິ້ນພຣະຊົນຂອງພຣະອົງ.
ຫົວຂໍ້ຂອງ ແອວມາ ບົດທີ 42 ສະທ້ອນເຖິງຄວາມສຳຄັນໃນຫລັກຄຳສອນຂອງການຊົດໃຊ້ຂອງພຣະເຢຊູຄຣິດ.
ພຣະຄຳພີອ່ານວ່າ: “ຊີວິດທີ່ເປັນມະຕະເປັນເວລາແຫ່ງການທົດລອງເພື່ອໃຫ້ມະນຸດສາມາດກັບໃຈ ແລະ ຮັບໃຊ້ພຣະເຈົ້າ—ການຕົກໄດ້ນຳເອົາຄວາມຕາຍທາງໂລກ ແລະ ທາງວິນຍານມາຫາມະນຸດທຸກຄົນ—ການໄຖ່ມາເຖິງຜ່ານທາງການກັບໃຈ—ພຣະເຈົ້າເອງໄດ້ຊົດໃຊ້ແທນບາບຂອງໂລກ—ຄວາມເມດຕາແມ່ນສຳລັບຜູ້ທີ່ກັບໃຈ—ສ່ວນຄົນອື່ນໆແມ່ນຂຶ້ນກັບຄວາມຍຸດຕິທຳຂອງພຣະເຈົ້າ—ຄວາມເມດຕາເກີດຂຶ້ນເພາະການຊົດໃຊ້—ຜູ້ທີ່ກັບໃຈຢ່າງແທ້ຈິງເທົ່ານັ້ນທີ່ຈະລອດ.”
ປະທານຣະໂຊ ເອັມ ແນວສັນ ໄດ້ກ່າວວ່າ: “ຂ້າພະເຈົ້າສັນຍາວ່າ ເມື່ອທ່ານສຶກສາພຣະຄຳພີມໍມອນດ້ວຍການອະທິຖານ ທຸກວັນ, ທ່ານຈະສາມາດຕັດສິນໃຈໄດ້ດີກວ່າເກົ່າ—ໃນທຸກວັນ.” ເພິ່ນຍັງສັນຍາອີກວ່າ ຖ້າຫາກ “ທ່ານສຶກສາພຣະຄຳພີມໍມອນທຸກວັນ, ທ່ານຈະມີພູມຕ້ານທານສິ່ງຊົ່ວຮ້າຍໃນປະຈຸບັນ.”
ດັ່ງທີ່ຂ້າພະເຈົ້າໄດ້ກ່າວມານັ້ນ, ຂ້າພະເຈົ້າປະທັບໃຈກັບແນວຄິດຂອງອຸປະກອນມືຖືຕົ້ນສະບັບ—ປຶ້ມ. ເຖິງຢ່າງໃດກໍຕາມ, ຂ້າພະເຈົ້າຮັບຮູ້ຄວາມສຳຄັນອັນເຫລືອເຊື່ອຂອງອິນເຕີເນັດໃນໂລກທຸກວັນນີ້. ອຸປະກອນມືຖືທີ່ທັນສະໄໝເຄື່ອງໜຶ່ງສາມາດໃຫ້ຂໍ້ມູນທີ່ປະຫວັດສາດຕື່ມໃສ່ຫ້ອງສະໝຸດຂະໜາດໃຫຍ່ໄດ້. ພວກເຮົາມີຄວາມກະຕັນຍູທີ່ໄດ້ມີຊີວິດຢູ່ຊ່ວງເວລາເຊັ່ນນີ້. ຂ້າພະເຈົ້າມີຄວາມກະຕັນຍູເປັນພິເສດທີ່ມັນອະນຸຍາດໃຫ້ປຶ້ມສັກສິດ ແລະ ອຸປະກອນຂອງສາດສະໜາຈັກສາມາດເຂົ້າເຖິງໄດ້ໃນຮູບແບບດິຈິຕ້ອນ. ອິນເຕເນັດເປັນເຄື່ອງມືທີ່ມີພະລັງຫລາຍສຳລັບການສຶກສາພຣະກິດຕິຄຸນ. ໃນປະຈຸບັນ, ຜູ້ຄົນຢ່າງຫລວງຫລາຍແບ່ງປັນຂໍ້ພຣະຄຳພີກັບໝູ່ເພື່ອນ ໂດຍໃຊ້ເທັກໂນໂລຈີ. ແອັບພຣະຄຳພີມໍມອນ, ຍົກຕົວຢ່າງ, ເປັນວິທີທີ່ດີເລີດໃນການແນະນຳໝູ່ເພື່ອນໃຫ້ຮູ້ຈັກພຣະຄຳພີມໍມອນ ແລະ ສາມາດແບ່ງປັນໄດ້ຢ່າງງ່າຍດາຍ ໃນແບບປົກກະຕິ ແລະ ທຳມະຊາດ ບໍ່ວ່າທ່ານຈະຢູ່ໃສກໍຕາມ.
ເຖິງແມ່ນອິນເຕີເນັດໃຫ້ພອນຢ່າງຫລວງຫລາຍ, ແຕ່ໜ້າເສຍດາຍ, ເຊັ່ນດຽວກັບປຶ້ມທີ່ຂຽນວິພາກວິຈານສາດສະໜາຈັກ ທີ່ຂ້າພະເຈົ້າໄດ້ບັນຍາຍກ່ອນໜ້ານີ້, ມັນຍັງຖືກນຳໃຊ້ເພື່ອສ້າງຄວາມສົງໄສ ແລະ ທຳລາຍສັດທາໃນຫລັກທຳພຣະກິດຕິຄຸນອັນລ້ຳຄ່ານຳອີກ. ມັນສາມາດເປັນສ່ວນໜຶ່ງຂອງ “ຄວາມຊົ່ວຮ້າຍຂອງຍຸກສະໄໝ” ທີ່ປະທານແນວສັນໄດ້ກ່າວເຖິງ.
ຜູ້ປໍລະປັກ ແລະ ຜູ້ທີ່ຊ່ວຍເຫລືອມັນ, ໂດຍເຈດຕະນາ ຫລື ໂດຍບໍ່ໄດ້ຕັ້ງໃຈ, ໄດ້ສ້າງກ່ອງຂະໜາດໃຫຍ່ເທົ່າກັນນັ້ນຢູ່ໃນອິນເຕີເນັດ ທີ່ເຕັມໄປດ້ວຍຂໍ້ຄວາມທີ່ວິພາກວິຈານສາດສະໜາຈັກ ທີ່ຂ້າພະເຈົ້າໄດ້ບັນຍາຍກ່ອນໜ້ານີ້, ໂດຍມີຈຸດປະສົງທີ່ຈະດຶງທ່ານອອກຈາກຄວາມຈິງຂອງພຣະເຈົ້າ.
ບັນຫາທີ່ເກີດຂຶ້ນເພື່ອສ້າງຄວາມສົງໄສໃນຊ່ວງຫລາຍປີຜ່ານມາ ມີຄວາມຄ້າຍຄືກັນຢ່າງໜ້າອັດສະຈັນ. ສິ່ງນີ້ເປັນຄວາມຈິງໂດຍສະເພາະເມື່ອທ່ານປຽບທຽບສະໄໝຂອງເຮົາໃສ່ກັບຊຸມປີ 1960, ຕອນຂ້າພະເຈົ້າອາຍຸ 20 ປີ.
ພຣະຄຳພີສິດສອນເຮົາໃຫ້ໃຊ້ວິຈາລະນະຍານ ແລະ ສະຫລາດໃນທຸກສິ່ງ. ອິນເຕີເນັດສາມາດໃຊ້ໄດ້ໃນທາງບວກ ຫລື ໃນທາງທຳລາຍກໍໄດ້.
ທັງສະມາຊິກເກົ່າ ແລະ ຜູ້ທີ່ຫາກໍສຶກສາພຣະກິດຕິຄຸນ ຕ້ອງມີເຈດຕະນາກ່ຽວກັບສິ່ງທີ່ເຂົາເຈົ້າເບິ່ງ. ຢ່າເບິ່ງເນື້ອຫາທີ່ຜິດສິນທຳ, ບໍ່ຊື່ສັດ, ຫລື ບໍ່ຊອບທຳ. ຖ້າທ່ານເຮັດ, ສູດການຄິດໄລ່ສາມາດນຳພາທ່ານລົງໄປສູ່ເສັ້ນທາງທີ່ທຳລາຍ ແລະ ບັ່ນທອນຄວາມກ້າວໜ້ານິລັນດອນຂອງທ່ານ. ທ່ານອາດຖືກກະທຳໃນທາງບວກ ຫລື ລົບກໍໄດ້. ໃຫ້ສະແຫວງຫາຄວາມຊອບທຳ ແລະ ຫລີກລ້ຽງຈາກຮູກະຕ່າຍທາງອິນເຕີເນັດທີ່ມືດມົວ ແລະ ການເລື່ອນເບິ່ງແບບຫາຍຍະນະ [Doomscrolling]. ໃຫ້ເຕີມເຕັມຊີວິດຂອງທ່ານດ້ວຍຄວາມຄິດທາງບວກ ແລະ ຊອບທຳ; ມີຄວາມສຸກ; ມີຄວາມສະໜຸກສະໜານ ແຕ່ໃຫ້ຫລີກລ້ຽງຄວາມໂງ່ຈ້າ. ມັນມີຄວາມແຕກຕ່າງ. ຫລັກແຫ່ງຄວາມເຊື່ອຂໍ້ທີສິບສາມ ເປັນແນວທາງທີ່ຍອດຍ້ຽມ. ເໜືອສິ່ງອື່ນໃດ, ຈົ່ງຝັງຕົວເອງເປັນປະຈຳຢູ່ໃນພຣະຄຳພີມໍມອນ, ຊຶ່ງຈະດຶງເອົາພຣະວິນຍານເຂົ້າມາສູ່ຊີວິດຂອງທ່ານ ແລະ ຊ່ວຍໃຫ້ທ່ານເຫັນຄວາມຈິງຈາກຄວາມຜິດ.
ຄຳແນະນຳຂອງຂ້າພະເຈົ້າສຳລັບຜູ້ທີ່ອອກໄປຈາກເສັ້ນທາງແຫ່ງພັນທະສັນຍາ ແມ່ນໃຫ້ກັບຄືນໄປຫາພຣະຄຳພີສັກສິດ, ການຊີ້ນຳຂອງສາດສະດາ, ການປະຕິບັດສາດສະໜາໃນບ້ານ, ແລະ ດົນຕີແຫ່ງສັດທາ. ຈິດວິນຍານແຕ່ລະດວງມີຄ່າຕໍ່ພຣະຜູ້ເປັນເຈົ້າ. ພວກເຮົາຕ້ອງການທ່ານ! ພຣະຜູ້ເປັນເຈົ້າຕ້ອງການທ່ານ, ແລະ ທ່ານຕ້ອງການພຣະອົງ! ທ່ານຈະໄດ້ຮັບການຕ້ອນຮັບສະເໝີ. ໃນໄລຍະການຮັບໃຊ້ສາດສະໜາຈັກເປັນເວລາຫລາຍປີຂອງຂ້າພະເຈົ້າ, ຂ້າພະເຈົ້າໄດ້ທະນຸຖະໜອມຜູ້ຄົນທີ່ປະເສີດ ທີ່ໄດ້ກັບຄືນສູ່ເສັ້ນທາງແຫ່ງພັນທະສັນຍາ ແລະ ແລ້ວຮັບໃຊ້ ແລະ ເປັນພອນໃຫ້ແກ່ທຸກຄົນທີ່ເຂົາເຈົ້າຮັກ ຫລື ກັບຜູ້ທີ່ເຂົາເຈົ້າຕິດຕໍ່ດ້ວຍ.
ພຣະຄຳພີສັກສິດ ແລະ ສາດສະດາທີ່ມີຊີວິດຢູ່ ເປັນວິທີທີ່ສຳຄັນທີ່ພຣະບິດາເທິງສະຫວັນທີ່ຊົງຮັກ ເຮັດໃຫ້ແຜນແຫ່ງຄວາມສຸກຂອງພຣະອົງມີໃຫ້ກັບລູກໆທຸກຄົນຂອງພຣະອົງ.
ຂ້າພະເຈົ້າເປັນພະຍານທີ່ແນ່ນອນເຖິງຄວາມເປັນພຣະເຈົ້າຂອງພຣະເຢຊູຄຣິດ ແລະ ຄວາມຈິງຂອງການຊົດໃຊ້ຂອງພຣະອົງ, ໃນພຣະນາມຂອງພຣະເຢຊູຄຣິດ, ອາແມນ.