ຄວາມສຸກຂອງການໄຖ່
ຄວາມຮັກ ແລະ ອຳນາດຂອງພຣະເຢຊູຄຣິດ ສາມາດຊ່ວຍຊີວິດເຮົາແຕ່ລະຄົນໃຫ້ລອດຈາກຄວາມຜິດພາດ, ຄວາມອ່ອນແອ, ແລະ ບາບຂອງເຮົາ ແລະ ຊ່ວຍເຮົາໃຫ້ກາຍເປັນບາງສິ່ງບາງຢ່າງທີ່ຫລາຍກວ່ານັ້ນ.
ປະມານ 10 ປີກ່ອນ ຂ້າພະເຈົ້າໄດ້ຮູ້ສຶກປະທັບໃຈໃຫ້ແຕ້ມຮູບຂອງພຣະຜູ້ຊ່ວຍໃຫ້ລອດ. ເຖິງແມ່ນວ່າຂ້າພະເຈົ້າເປັນສິລະປະກອນ, ແຕ່ກໍຍັງໄດ້ຮູ້ສຶກມີຄວາມໜັກໃຈຢູ່ດີ. ຂ້າພະເຈົ້າ ຈະແຕ້ມຮູບທີ່ສະທ້ອນເຖິງພຣະວິນຍານຂອງພຣະເຢຊູຄຣິດໄດ້ແນວໃດ? ຂ້າພະເຈົ້າຈະເລີ່ມຕົ້ນຈາກຈຸດໃດ? ແລະ ຂ້າພະເຈົ້າຈະຫາເວລາມາແຕ່ໃສ?
ແມ່ນແຕ່ດ້ວຍຄຳຖາມຂອງຂ້າພະເຈົ້າ, ຂ້າພະເຈົ້າໄດ້ຕັດສິນໃຈເລີ່ມລົງມື ແລະ ໄວ້ວາງໃຈວ່າ ພຣະຜູ້ເປັນເຈົ້າຈະຊ່ວຍຂ້າພະເຈົ້າ. ແຕ່ຂ້າພະເຈົ້າຕ້ອງດຳເນີນຕໍ່ໄປ ແລະ ປ່ອຍ ຄວາມເປັນໄປໄດ້ ໄວ້ທີ່ພຣະອົງ. ຂ້າພະເຈົ້າໄດ້ອະທິຖານ, ໄຕ່ຕອງ, ຄົ້ນຄວ້າ, ແລະ ໄດ້ວາດເປັນຮ່າງ ແລະ ໄດ້ຮັບພອນທີ່ໄດ້ພົບເຫັນແຫລ່ງ ແລະ ຄວາມຊ່ວຍເຫລືອ. ແລະ ຜ້າໃບທີ່ເປັນສີຂາວກໍໄດ້ເລີ່ມກາຍເປັນບາງຢ່າງທີ່ຫລາຍກວ່ານັ້ນ.
ຂັ້ນຕອນນັ້ນບໍ່ໄດ້ເປັນເລື່ອງງ່າຍ. ບາງເທື່ອມັນກໍບໍ່ໄດ້ເປັນດັ່ງທີ່ຂ້າພະເຈົ້າໄດ້ຫວັງໄວ້. ບາງເທື່ອກໍມີຊ່ວງເວລາທີ່ຮອຍທາສີ ຫລື ຄວາມຄິດໄດ້ຖືກດົນໃຈ. ແລະ ຫລາຍໆເທື່ອ, ຂ້າພະເຈົ້າຕ້ອງໄດ້ພະຍາຍາມແລ້ວ ແລະ ພະຍາຍາມອີກ.
ໃນທີ່ສຸດ ເມື່ອຂ້າພະເຈົ້າໄດ້ຄິດວ່າຮູບນັ້ນສຳເລັດ ແລະ ແຫ້ງຄັກແລ້ວ, ຂ້າພະເຈົ້າໄດ້ເລີ່ມເອົາເຄືອບເງົາສີໃສທາໃສ່ເພື່ອປົກປ້ອງມັນຈາກຂີ້ຝຸ່ນ. ເມື່ອຂ້າພະເຈົ້າເຮັດສິ່ງນັ້ນ, ຂ້າພະເຈົ້າໄດ້ສັງເກດເຫັນວ່າຮູບເລີ່ມປ່ຽນແປງ, ເປິເປື້ອນ, ແລະ ລະລາຍ. ຂ້າພະເຈົ້າໄດ້ຮັບຮູ້ທັນທີວ່າ ຂ້າພະເຈົ້າໄດ້ເອົາເຄືອບເງົາທາໃສ່ໄວເກີນໄປ, ວ່າສ່ວນໜຶ່ງຂອງຮູບນັ້ນຍັງປຽກຢູ່.
ໂດຍການເຮັດແນວນັ້ນ ຂ້າພະເຈົ້າໄດ້ລຶບສ່ວນໜຶ່ງຂອງຮູບອອກ ດ້ວຍເຄືອບເງົານັ້ນແທ້ໆ. ຂ້າພະເຈົ້າຕົກໃຈ ແລະ ເສຍໃຈຫລາຍ. ຂ້າພະເຈົ້າໄດ້ຮູ້ສຶກຄືກັບວ່າ ຂ້າພະເຈົ້າໄດ້ທຳລາຍສິ່ງທີ່ພຣະເຈົ້າໄດ້ຊ່ວຍຂ້າພະເຈົ້າເຮັດຂຶ້ນມາ. ຂ້າພະເຈົ້າໄດ້ຮ້ອງໄຫ້ ແລະ ຮູ້ສຶກບໍ່ສະບາຍໃຈ. ໃນຄວາມສິ້ນຫວັງ, ຂ້າພະເຈົ້າກໍໄດ້ເຮັດສິ່ງທີ່ທຸກຄົນເຮັດຕາມປົກກະຕິໃນສະພາບການແບບນີ້: ຂ້າພະເຈົ້າໄດ້ໂທຫາແມ່ຂອງຂ້າພະເຈົ້າ. ເພິ່ນໄດ້ກ່າວແບບສະຫລາດ ແລະ ໃຈເຢັນວ່າ, “ສິ່ງທີ່ເສຍໄປແລ້ວ ແມ່ນເອົາຄືນບໍ່ໄດ້, ແຕ່ໃຫ້ເຮັດໃຫ້ດີທີ່ສຸດເທົ່າທີ່ລູກເຮັດໄດ້ກັບສິ່ງທີ່ລູກມີຢູ່.”
And I Partook [ແລະ ຂ້າພະເຈົ້າຮັບສ່ວນ], ໂດຍ ຄຣິດສະຕິນ ເອັມ ຢີ
ສະນັ້ນ ຂ້າພະເຈົ້າຈຶ່ງໄດ້ອ້ອນວອນທູນຂໍຄວາມຊ່ວຍເຫລືອ ແລະ ໄດ້ທາສີຮູບຕະຫລອດທັງຄືນເພື່ອສ້ອມແປງມັນ. ແລະ ຂ້າພະເຈົ້າຈຳໄດ້ວ່າໄດ້ຫລຽວເບິ່ງຮູບນັ້ນໃນຕອນເຊົ້າ—ມັນເບິ່ງຄືວ່າດີກວ່າແຕ່ກ່ອນ. ສິ່ງນັ້ນເປັນໄປໄດ້ແນວໃດ? ສິ່ງທີ່ຂ້າພະເຈົ້າໄດ້ຄິດວ່າເປັນຄວາມຜິດພາດທີ່ສ້ອມແປງບໍ່ໄດ້ແລ້ວກໍໄດ້ກາຍເປັນໂອກາດສຳລັບພຣະຫັດທີ່ມີເມດຕາຂອງພຣະອົງ ທີ່ຈະສະແດງໃຫ້ປະຈັກ. ພຣະອົງຍັງບໍ່ທັນສຳເລັດຮູບພາບນັ້ນເທື່ອ, ແລະ ພຣະອົງກໍຍັງບໍ່ຢຸດຊ່ວຍເຫລືອຂ້າພະເຈົ້າ. ຫົວໃຈຂອງຂ້າພະເຈົ້າກໍໄດ້ເຕັມໄປດ້ວຍຄວາມຊື່ນຊົມ ແລະ ຄວາມໂລ່ງໃຈ. ຂ້າພະເຈົ້າໄດ້ສັນລະເສີນພຣະຜູ້ເປັນເຈົ້າສຳລັບຄວາມເມດຕາຂອງພຣະອົງ, ສຳລັບການມະຫັດສະຈັນນີ້ ທີ່ບໍ່ພຽງແຕ່ໄດ້ຮັກສາຮູບຂອງຂ້າພະເຈົ້າເອົາໄວ້ ແຕ່ໄດ້ສິດສອນຂ້າພະເຈົ້າຫລາຍຂຶ້ນກ່ຽວກັບຄວາມຮັກ ແລະ ອຳນາດຂອງພຣະອົງທີ່ຈະຊ່ວຍເຮົາແຕ່ລະຄົນໃຫ້ລອດຈາກຄວາມຜິດພາດ, ຄວາມອ່ອນແອ, ແລະ ບາບຂອງເຮົາ ແລະ ຊ່ວຍເຮົາໃຫ້ກາຍເປັນບາງສິ່ງບາງຢ່າງຫລາຍກວ່ານັ້ນ.
ຂະນະທີ່ຄວາມກະຕັນຍູຂອງຂ້າພະເຈົ້າທີ່ມີຕໍ່ພຣະຜູ້ຊ່ວຍໃຫ້ລອດເຕີບໂຕຂຶ້ນເມື່ອພຣະອົງໄດ້ຊ່ວຍຂ້າພະເຈົ້າສ້ອມແປງຮູບທີ່ “ສ້ອມບໍ່ໄດ້ແລ້ວ” ດ້ວຍຄວາມເມດຕາ, ຄວາມຮັກ ແລະ ຄວາມກະຕັນຍູສ່ວນຕົວຂອງຂ້າພະເຈົ້າ ທີ່ມີໃຫ້ແກ່ພຣະຜູ້ຊ່ວຍໃຫ້ລອດກໍໄດ້ເຕີບໂຕຂຶ້ນ ຂະນະທີ່ຂ້າພະເຈົ້າໄດ້ສະແຫວງຫາທີ່ຈະຮ່ວມມືກັບພຣະອົງໃນເລື່ອງຄວາມອ່ອນແອຂອງຂ້າພະເຈົ້າ ແລະ ໄດ້ຮັບການໃຫ້ອະໄພຈາກຄວາມຜິດພາດຂອງຂ້າພະເຈົ້າ. ຂ້າພະເຈົ້າຈະກະຕັນຍູຕໍ່ພຣະຜູ້ຊ່ວຍໃຫ້ລອດຂອງຂ້າພະເຈົ້າຕະຫລອດໄປ ທີ່ຂ້າພະເຈົ້າສາມາດປ່ຽນແປງ ແລະ ຖືກຊຳລະລ້າງ. ພຣະອົງໄດ້ຫົວໃຈຂອງຂ້າພະເຈົ້າແລ້ວ, ແລະ ຂ້າພະເຈົ້າຫວັງຈະເຮັດສິ່ງໃດກໍຕາມທີ່ພຣະອົງປະສົງໃຫ້ຂ້າພະເຈົ້າເຮັດ ແລະ ກາຍເປັນ.
ການກັບໃຈອະນຸຍາດໃຫ້ເຮົາຮູ້ສຶກເຖິງຄວາມຮັກຂອງພຣະເຈົ້າ ແລະ ຮູ້ທີ່ຈະຮັກພຣະອົງໃນວິທີທີ່ເຮົາຈະບໍ່ເຄີຍຮູ້ຜ່ານທາງອື່ນເລີຍ. ກ່ຽວກັບຜູ້ຍິງທີ່ໄດ້ເອົານ້ຳຫອມຫົດສົງພຣະບາດຂອງພຣະຜູ້ຊ່ວຍໃຫ້ລອດ, ພຣະອົງໄດ້ກ່າວວ່າ, “ເພາະນາງຮັກຫລາຍ ຈຶ່ງພິສູດໃຫ້ເຫັນວ່າ ການບາບທັງຫລາຍຂອງນາງໄດ້ຮັບການອະໄພແລ້ວ: ແຕ່ຜູ້ໃດທີ່ໄດ້ຮັບການໃຫ້ອະໄພໜ້ອຍ, ຜູ້ນັ້ນກໍຮັກໜ້ອຍ.” ນາງຮັກພຣະເຢຊູຫລາຍເພາະພຣະອົງໄດ້ໃຫ້ອະໄພນາງຫລາຍ.
ການທີ່ຮູ້ວ່າເຮົາ ສາມາດ ພະຍາຍາມອີກຄັ້ງເຮັດໃຫ້ເຮົາໂລ່ງໃຈ ແລະ ມີຄວາມຫວັງ—ວ່າ, ດັ່ງທີ່ແອວເດີ ເດວິດ ເອ ແບ໊ດນາ ໄດ້ສິດສອນ, ເຮົາສາມາດໄດ້ຮັບການປົດບາບຂອງເຮົາຕໍ່ໄປ ຜ່ານທາງອຳນາດທີ່ຊຳລະໃຫ້ສະອາດຂອງພຣະວິນຍານບໍລິສຸດ ຂະນະທີ່ເຮົາກັບໃຈແທ້ໆ ດ້ວຍຄວາມຈິງໃຈ.
ອຳນາດທີ່ໄຖ່ຂອງພຣະເຢຊູຄຣິດ ເປັນໜຶ່ງໃນບັນດາພອນທີ່ຍິ່ງໃຫຍ່ທີ່ສຸດ ທີ່ຖືກສັນຍາໄວ້ຂອງພັນທະສັນຍາຂອງເຮົາ. ໃຫ້ໄຕ່ຕອງກ່ຽວກັບພອນນີ້ ຂະນະທີ່ທ່ານມີສ່ວນຮ່ວມໃນພິທີການສັກສິດ. ປາດສະຈາກພອນນີ້, ເຮົາບໍ່ສາມາດກັບຄືນໄປສູ່ທີ່ປະທັບຂອງພຣະບິດາຜູ້ສະຖິດຢູ່ໃນສະຫວັນຂອງເຮົາ ແລະ ຜູ້ຄົນທີ່ເຮົາຮັກ.
ຂ້າພະເຈົ້າຮູ້ວ່າ ພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຊົງມີລິດທະນຸພາບເພື່ອຊ່ວຍໃຫ້ລອດ. ໃນຖານະພຣະບຸດຂອງພຣະເຈົ້າ, ຜູ້ໄດ້ຊົດໃຊ້ແທນບາບຂອງໂລກ ແລະ ໄດ້ສະລະພຣະຊົນຊີບຂອງພຣະອົງເອງ ແລະ ຮັບມັນຄືນມາອີກຄັ້ງ, ພຣະອົງດຳລົງອຳນາດແຫ່ງການໄຖ່ ແລະ ການຟື້ນຄືນພຣະຊົນ. ພຣະອົງໄດ້ເຮັດໃຫ້ຄວາມເປັນອະມະຕະເປັນໄປໄດ້ສຳລັບທຸກຄົນ ແລະ ຊີວິດນິລັນດອນສຳລັບຜູ້ທີ່ເລືອກພຣະອົງ. ຂ້າພະເຈົ້າຮູ້ວ່າ ຜ່ານທາງການເສຍສະລະຊົດໃຊ້ຂອງພຣະອົງ, ເຮົາສາມາດກັບໃຈ ແລະ ຖືກຊຳລະໃຫ້ສະອາດ ແລະ ຖືກໄຖ່ແທ້ໆ. ມັນເປັນການມະຫັດສະຈັນທີ່ພຣະອົງຮັກທ່ານ ແລະ ຂ້າພະເຈົ້າໃນທຳນອງນີ້.
ພຣະອົງໄດ້ກ່າວວ່າ, “ບັດນີ້ພວກເຈົ້າຍັງຈະບໍ່ຫັນກັບມາຫາເຮົາບໍ, ແລະ ກັບໃຈຈາກບາບຂອງພວກເຈົ້າ ແລະ ປ່ຽນໃຈເຫລື້ອມໃສ, ເພື່ອເຮົາຈະໄດ້ປິ່ນປົວພວກເຈົ້າ?” ພຣະອົງສາມາດປິ່ນປົວ “ບ່ອນຮົກຮ້າງເພພັງ” ຂອງຈິດວິນຍານຂອງທ່ານ—ບ່ອນທີ່ແຫ້ງ, ຫ້າວ, ແລະ ເປົ່າປ່ຽວໂດຍບາບ ແລະ ຄວາມໂສກເສົ້າ—ແລະ ເຮັດໃຫ້ “ຖິ່ນແຫ້ງແລ້ງກັນດານ [ຂອງທ່ານ] ກາຍເປັນດັ່ງສວນເອເດນໄດ້.”
ດັ່ງທີ່ເຮົາບໍ່ເຂົ້າໃຈຄວາມເຈັບປວດ ແລະ ຄວາມຮ້າຍແຮງຂອງຄວາມທຸກທໍລະມານຂອງພຣະຄຣິດໃນເຄັດເຊມາເນ ແລະ ຢູ່ເທິງໄມ້ກາງແຂນສັນໃດ, ເຮົາກໍ “ບໍ່ສາມາດວັດແທກຄວາມກວ້າງໃຫຍ່ ຫລື ເຂົ້າໃຈຄວາມເລິກຂອງການໃຫ້ອະໄພອັນສູງສົ່ງ,” ຄວາມເມດຕາ, ແລະ ຄວາມຮັກ [ຂອງພຣະອົງ] ສັນນັ້ນ.
ເປັນບາງຄັ້ງທ່ານອາດຮູ້ສຶກວ່າມັນເປັນໄປບໍ່ໄດ້ທີ່ຈະຖືກໄຖ່, ວ່າບາງທີທ່ານຖືກຍົກເວັ້ນຈາກຄວາມຮັກຂອງພຣະເຈົ້າ ແລະ ອຳນາດແຫ່ງການຊົດໃຊ້ຂອງພຣະຜູ້ຊ່ວຍໃຫ້ລອດ ເພາະສິ່ງທີ່ທ່ານກຳລັງດີ້ນລົນຢູ່ ຫລື ເພາະສິ່ງທີ່ທ່ານໄດ້ເຮັດໄປແລ້ວ. ແຕ່ຂ້າພະເຈົ້າເປັນພະຍານວ່າ ທ່ານບໍ່ໄດ້ຢູ່ຕ່ຳເກີນກວ່າທີ່ພຣະອາຈານຈະຢື້ເຖິງ. ພຣະຜູ້ຊ່ວຍໃຫ້ລອດໄດ້ “ສະເດັດລົງຕ່ຳກວ່າທຸກສິ່ງ” ແລະ ຢູ່ໃນຕຳແໜ່ງທີ່ສູງສົ່ງເພື່ອຈະຍົກທ່ານຂຶ້ນ ແລະ ຊ່ວຍກູ້ທ່ານຈາກເຫວທີ່ມືດທີ່ສຸດ ແລະ ນຳທ່ານມາສູ່ “ຄວາມສະຫວ່າງອັນມະຫັດສະຈັນຂອງພຣະອົງ.” ຜ່ານທາງຄວາມທຸກທໍລະມານຂອງພຣະອົງ, ພຣະອົງໄດ້ສ້າງເສັ້ນທາງສຳລັບເຮົາແຕ່ລະຄົນ ເພື່ອຈະເອົາຊະນະຄວາມອ່ອນແອ ແລະ ບາບສ່ວນຕົວຂອງເຮົາ. “ພຣະອົງມີອຳນາດ ທັງໝົດ ທີ່ຈະຊ່ວຍ ທຸກຄົນ ທີ່ເຊື່ອໃນພຣະນາມຂອງພຣະອົງ ແລະ ນຳຜົນທີ່ສົມກັບການກັບໃຈອອກມາ.”
ດັ່ງທີ່ຕ້ອງໃຊ້ຄວາມພະຍາຍາມ ແລະ ການອ້ອນວອນຂໍຄວາມຊ່ວຍເຫລືອຈາກສະຫວັນເພື່ອຈະສ້ອມແປງຮູບພາບນັ້ນ, ກໍຕ້ອງອາໄສຄວາມພະຍາຍາມ, ຄວາມຈິງໃຈ, ແລະ ຄວາມຖ່ອມຕົວເພື່ອຈະນຳ “ຜົນທີ່ສົມກັບການກັບໃຈອອກມາ.” ຜົນເຫລົ່ານີ້ແມ່ນລວມທັງການໃຊ້ສັດທາ ແລະ ຄວາມໄວ້ວາງໃຈຂອງເຮົາໃນພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ, ການຖວາຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດແດ່ພຣະເຈົ້າ, ການສາລະພາບ ແລະ ປະຖິ້ມບາບ, ການຊົດເຊີຍສິ່ງທີ່ເສຍຫາຍໃຫ້ດີທີ່ສຸດ ເທົ່າທີ່ເຮົາສາມາດເຮັດໄດ້, ແລະ ການພະຍາຍາມທີ່ຈະດຳລົງຊີວິດຢ່າງຊອບທຳ.
ເພື່ອຈະກັບໃຈ ແລະ ປ່ຽນແປງຢ່າງຈິງໃຈ, ທຳອິດເຮົາຕ້ອງ “ສຳນຶກເຖິງບາບຂອງພວກເຮົາ.” ຄົນເຮົາຈະບໍ່ເຫັນຄວາມຈຳເປັນທີ່ຈະຕ້ອງກິນຢາຈົນກວ່າເຂົາຈະເຂົ້າໃຈວ່າເຂົາເຈັບປ່ວຍ. ອາດຈະມີຊ່ວງເວລາທີ່ເຮົາບໍ່ເຕັມໃຈທີ່ຈະທົບທວນຄວາມຄິດ ແລະ ການກະທຳຂອງຕົວເອງ ແລະ ເຫັນສິ່ງທີ່ຕ້ອງການການປິ່ນປົວ ແລະ ການສ້ອມແປງແທ້ໆ.
ໃນບົດປະພັນຂອງ ຊີ ແອັສ ລຸຍສ໌, ແອສະລານກ່າວຖ້ອຍຄຳເຫລົ່ານີ້ຕໍ່ຜູ້ຊາຍຄົນໜຶ່ງ ທີ່ໄດ້ກໍ່ບັນຫາໃຫ້ຕົວເອງດ້ວຍການກະທຳຂອງຕົນວ່າ: “ໂອ້, [ມະນຸດຊາດເອີຍ], ເຈົ້າຊ່າງປ້ອງກັນຕົວເອງຢ່າງສະຫລາດ [ຈາກ] ທຸກສິ່ງທີ່ອາດເຮັດໃຫ້ເຈົ້າໄດ້ດີ!”
ໃນບ່ອນໃດແດ່ທີ່ທ່ານ ແລະ ຂ້າພະເຈົ້າອາດປ້ອງກັນຕົວເຮົາເອງຈາກສິ່ງທີ່ອາດເຮັດໃຫ້ເຮົາໄດ້ດີ?
ຂໍຈົ່ງຢ່າປ້ອງກັນຕົວເຮົາເອງຈາກສິ່ງດີໆ ທີ່ພຣະເຈົ້າປາດຖະໜາຈະອວຍພອນເຮົາ. ຈາກຄວາມຮັກ ແລະ ຄວາມເມດຕາ ທີ່ພຣະອົງປາດຖະໜາຈະໃຫ້ເຮົາຮູ້ສຶກ. ຈາກຄວາມສະຫວ່າງ ແລະ ຄວາມຮູ້ ທີ່ພຣະອົງປາດຖະໜາຈະປະທານໃຫ້ເຮົາ. ຈາກການປິ່ນປົວທີ່ພຣະອົງຮູ້ວ່າ ເຮົາກໍຕ້ອງການມັນຫລາຍແທ້ໆ. ຈາກຄວາມສຳພັນແຫ່ງພັນທະສັນຍາອັນເລິກເຊິ່ງຫລາຍຂຶ້ນ ທີ່ພຣະອົງປະສົງໃຫ້ແກ່ບຸດ ແລະ ທິດາຂອງພຣະອົງທຸກຄົນ.
ຂ້າພະເຈົ້າອະທິຖານວ່າ ເຮົາຈະວາງ “ອາວຸດແຫ່ງສົງຄາມ” ໃດໆລົງໄວ້ ທີ່ເຮົາໄດ້ຈັບຂຶ້ນມາໂດຍມີສະຕິ ຫລື ບໍ່ມີສະຕິກໍຕາມ ເພື່ອຈະປ້ອງກັນຕົວເຮົາເອງຈາກພອນແຫ່ງຄວາມຮັກຂອງພຣະເຈົ້າ. ອາວຸດແຫ່ງຄວາມທະນົງຕົວ, ຄວາມເຫັນແກ່ຕົວ, ຄວາມຢ້ານກົວ, ຄວາມກຽດຊັງ, ຄວາມຂຸ່ນເຄືອງ, ຄວາມພໍໃຈ, ການຕັດສິນທີ່ບໍ່ຊອບທຳ, ຄວາມອິດສາ—ສິ່ງໃດກໍຕາມທີ່ຈະກີດກັນເຮົາຈາກການຮັກພຣະເຈົ້າດ້ວຍ ສຸດ ຫົວໃຈຂອງເຮົາ ແລະ ການຮັກສາພັນທະສັນຍາຂອງເຮົາ ທັງໝົດ ກັບພຣະອົງ.
ຂະນະທີ່ເຮົາດຳລົງຊີວິດຕາມພັນທະສັນຍາຂອງເຮົາ, ພຣະຜູ້ເປັນເຈົ້າສາມາດປະທານຄວາມຊ່ວຍເຫລືອ ແລະ ພະລັງທີ່ເຮົາຕ້ອງການ ທັງເພື່ອຈະຮັບຮູ້ ແລະ ເອົາຊະນະຄວາມອ່ອນແອຂອງເຮົາ, ລວມທັງກາຝາກທາງວິນຍານຂອງຄວາມທະນົງຕົວ. ສາດສະດາຂອງເຮົາໄດ້ກ່າວວ່າ:
“ການກັບໃຈທຸກວັນ ເປັນເສັ້ນທາງທີ່ນຳໄປສູ່ຄວາມບໍລິສຸດ, ແລະ ຄວາມບໍລິສຸດນຳພະລັງມາໃຫ້.”
“ແລະ ໂອ້, ເຮົາຈະຕ້ອງການອຳນາດຂອງພຣະອົງຫລາຍເທົ່າໃດ ໃນວັນຂ້າງໜ້າ.”
ຄືກັນກັບຮູບພາບຂອງຂ້າພະເຈົ້າ, ພຣະຜູ້ເປັນເຈົ້າກໍຍັງບໍ່ຢຸດຊ່ວຍເຫລືອເຮົາເມື່ອເຮົາເຮັດຜິດ, ທັງພຣະອົງຈະບໍ່ໜີໄປເມື່ອເຮົາຫວັ່ນໄຫວ. ຄວາມຕ້ອງການຂອງເຮົາສຳລັບການປິ່ນປົວ ແລະ ຄວາມຊ່ວຍເຫລືອນັ້ນບໍ່ໄດ້ເປັນພາລະໜັກຕໍ່ພຣະອົງ, ແຕ່ເປັນເຫດຜົນທີ່ພຣະອົງໄດ້ສະເດັດມາ. ພຣະຜູ້ຊ່ວຍໃຫ້ລອດເອງ ໄດ້ກ່າວວ່າ:
“ຈົ່ງເບິ່ງ, ເຮົາໄດ້ມາສູ່ໂລກເພື່ອນຳເອົາການໄຖ່ມາສູ່ໂລກ, ເພື່ອຊ່ວຍໂລກໃຫ້ລອດຈາກບາບ.”
“ແຂນແຫ່ງຄວາມເມດຕາສົງສານຂອງເຮົາໄດ້ເດ່ອອກມາຫາພວກເຈົ້າແລ້ວ, ແລະ ຜູ້ໃດກໍຕາມທີ່ຈະເຂົ້າມາຫາເຮົາ, ເຮົາຈະຮັບເອົາໄວ້; ແລະ ຄົນທີ່ມາຫາເຮົາຈະເປັນສຸກ.”
ສະນັ້ນ ຈົ່ງມາເຖີດ—ຈົ່ງມາ ທ່ານຜູ້ທີ່ອ່ອນເພຍ, ເມື່ອຍລ້າ ແລະ ເສົ້າເສຍໃຈ; ຈົ່ງມາ ແລະ ປະວຽກງານຂອງທ່ານໄວ້ ແລະ ພົບການພັກຜ່ອນໃນພຣະອົງ ຜູ້ທີ່ຮັກທ່ານຫລາຍທີ່ສຸດ. ຈົ່ງເອົາແອກຂອງພຣະອົງແບກໄວ້, ເພາະວ່າພຣະອົງເປັນຜູ້ໃຈອ່ອນສຸພາບ ແລະ ຖ່ອມລົງ.
ພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຂອງເຮົາເຫັນທ່ານ. ພວກພຣະອົງຮູ້ຈັກຫົວໃຈຂອງທ່ານ. ພວກພຣະອົງເປັນຫ່ວງກ່ຽວກັບສິ່ງທີ່ທ່ານເປັນຫ່ວງ, ລວມທັງຜູ້ຄົນທີ່ທ່ານຮັກ.
ພຣະຜູ້ຊ່ວຍໃຫ້ລອດສາມາດໄຖ່ສິ່ງທີ່ສູນຫາຍໄປ, ລວມທັງຄວາມສຳພັນທີ່ເພພັງ ແລະ ແຕກຫັກ. ພຣະອົງໄດ້ຈັດວິທີທາງສຳລັບທຸກສິ່ງທີ່ຕົກຫລົ່ນໃຫ້ຖືກໄຖ່—ເພື່ອເປົ່າລົມຫາຍໃຈເຂົ້າໄປໃນສິ່ງທີ່ຮູ້ສຶກວ່າຕາຍ ແລະ ສິ້ນຫວັງ.
ຖ້າຫາກທ່ານກຳລັງດີ້ນລົນກັບສະພາບການທີ່ທ່ານຄິດວ່າທ່ານຄວນເອົາຊະນະໄດ້ແລ້ວ, ຢ່າຍອມແພ້. ຈົ່ງອົດທົນກັບຕົວທ່ານເອງ, ຮັກສາພັນທະສັນຍາຂອງທ່ານ, ກັບໃຈເລື້ອຍໆ, ສະແຫວງຫາຄວາມຊ່ວຍເຫລືອຈາກຜູ້ນຳຂອງທ່ານ ຖ້າຈຳເປັນ, ແລະ ໄປທີ່ບ້ານຂອງພຣະຜູ້ເປັນເຈົ້າຢ່າງສະໝ່ຳສະເໝີເທົ່າທີ່ທ່ານສາມາດເຮັດໄດ້. ຈົ່ງຮັບຟັງ ແລະ ເອົາໃຈໃສ່ຕໍ່ການກະຕຸ້ນທີ່ພຣະອົງສົ່ງມາໃຫ້ທ່ານ. ພຣະອົງຈະບໍ່ປະຖິ້ມຄວາມສຳພັນແຫ່ງພັນທະສັນຍາຂອງພຣະອົງກັບທ່ານ.
ມີຄວາມສຳພັນທີ່ຫຍຸ້ງຍາກ ແລະ ຊັບຊ້ອນໃນຊີວິດຂອງຂ້າພະເຈົ້າ ທີ່ຂ້າພະເຈົ້າໄດ້ດີ້ນລົນ ແລະ ໄດ້ສະແຫວງຫາທີ່ຈະປັບປຸງຢ່າງຈິງໃຈ. ບາງເທື່ອ, ຂ້າພະເຈົ້າໄດ້ຮູ້ສຶກຄືກັບວ່າຂ້າພະເຈົ້າໄດ້ລົ້ມເຫລວຫລາຍກວ່າທີ່ໄດ້ສຳເລັດ. ຂ້າພະເຈົ້າໄດ້ຄິດວ່າ, “ເຮົາບໍ່ໄດ້ແກ້ໄຂຫຍັງເທື່ອແລ້ວນີ້ບໍ? ເຮົາບໍ່ໄດ້ເອົາຊະນະຄວາມອ່ອນແອຂອງເຮົາແທ້ບໍ? ເມື່ອເວລາຜ່ານໄປ ຂ້າພະເຈົ້າໄດ້ຮຽນຮູ້ວ່າ ຂ້າພະເຈົ້າບໍ່ໄດ້ບົກພ່ອງ; ແຕ່, ສ່ວນຫລາຍແລ້ວຍັງມີຫລາຍສິ່ງທີ່ຕ້ອງແກ້ໄຂ ແລະ ຍັງຕ້ອງການການປິ່ນປົວອີກຫລາຍ.
ແອວເດີ ດີ ທອດ ຄຣິສໂຕເຟີສັນ ໄດ້ສິດສອນວ່າ: “ແນ່ນອນວ່າພຣະຜູ້ເປັນເຈົ້າຈະອວຍພອນຄົນທີ່ປາດຖະໜາຢາກມາຫາການພິພາກສາຢ່າງມີຄ່າຄວນ, ຄົນທີ່ຕັ້ງໃຈອອກແຮງງານໄປແຕ່ລະວັນ ເພື່ຶອປ່ຽນຄວາມອ່ອນແອໃຫ້ກັບກາຍເປັນຄວາມເຂັ້ມແຂງ. ການກັບໃຈທີ່ແທ້ຈິງ, ການປ່ຽນແປງທີ່ແທ້ຈິງອາດຮຽກຮ້ອງຄວາມພະຍາຍາມຄືນອີກ, ມີແຕ່ບາງສິ່ງທີ່ເຮັດໃຫ້ບໍລິສຸດ ແລະ ສັກສິດໃນຄວາມພະຍາຍາມນັ້ນ. ການໃຫ້ອະໄພທີ່ສູງສົ່ງ ແລະ ການປິ່ນປົວມາເຖິງແບບທຳມະຊາດສູ່ຄົນເຊັ່ນນັ້ນ.”
ແຕ່ລະວັນກໍເປັນວັນໃໝ່ທີ່ເຕັມໄປດ້ວຍຄວາມຫວັງ ແລະ ຄວາມເປັນໄປໄດ້ ເພາະຍ້ອນພຣະເຢຊູຄຣິດ. ແຕ່ລະວັນທ່ານ ແລະ ຂ້າພະເຈົ້າສາມາດມາຮູ້ຈັກ, ດັ່ງທີ່ ມານດາເອວາໄດ້ປະກາດວ່າ, “ຄວາມສຸກຂອງການໄຖ່,” ຄວາມສຸກຂອງການຖືກເຮັດໃຫ້ຫາຍດີ, ຄວາມສຸກຂອງຄວາມຮູ້ສຶກເຖິງຄວາມຮັກທີ່ບໍ່ລົ້ມເຫລວຂອງພຣະເຈົ້າ.
ຂ້າພະເຈົ້າຮູ້ວ່າ ພຣະບິດາຜູ້ສະຖິດຢູ່ໃນສະຫວັນ ແລະ ພຣະຜູ້ຊ່ວຍໃຫ້ລອດຂອງເຮົາຮັກທ່ານ. ພຣະເຢຊູຄຣິດ ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງມວນມະນຸດທັງປວງ. ພຣະອົງຊົງພຣະຊົນຢູ່. ຜ່ານທາງການເສຍສະລະຊົດໃຊ້ຂອງພຣະອົງ, ສາຍຮັດແຫ່ງບາບ ແລະ ຄວາມຕາຍຖືກເຮັດໃຫ້ຂາດອອກ ຕະຫລອດການ ເພື່ອວ່າເຮົາອາດເປັນ ອິດສະລະ ທີ່ຈະເລືອກການປິ່ນປົວ, ການໄຖ່, ແລະ ຊີວິດນິລັນດອນກັບຜູ້ຄົນທີ່ເຮົາຮັກ. ແລະ ຂ້າພະເຈົ້າເປັນພະຍານເຖິງສິ່ງເຫລົ່ານີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.