O Se Aso i le Olaga o se Faifeautalai

Saunia e Adam C. Olson

Mekasini a le Ekalesia

Mulimuli mai ma tilotilo i sina vaaiga o faamanuiaga ma faigata o le olaga faafaifeautalai.

“Ei, ala i luga,” o le tala lea a se tasi, ma eueu oe. Ma lou fiamoe, ua e tilotilo i le uati i talaane o lou moega. Ua ta le 6:30 i le taeao? O le a le mea ua tupu? Faatali, e le o lau uati lena. Ma e le o lou moega lea. O fea o e i ai?

“Ei,” e faapea atu ai le leo, “o oe lava na e manao e te mulimuli mai ia i maua. Ua oo i le taimi e amata ai le aso.”

A o e tilotilo ae i le faifeautalai o loo tu i luga ae o lou moega, ona e manatua ai lea o le mea o loo tupu. Na ofoina atu e mekasini a le Ekalesia ia te oe le avanoa e te mulimuli ai i se soa faifeautalai mo se aso, ma na e oso fiafia i le avanoa e vaai ai pe faapefea moni lava le olaga faafaifeautalai.

E te lei iloaina o le a vave faapea ona amata.

“Malo, O a’u o Elder Jesse Ward, mai i Iuta,” o le tala lea a le faifeautalai umi a o e nofo ae i luga. “Afio mai i Sepania. O la’u soa lea, o Elder Pierrick Triplet.”

O Elder Triplet e sau mai Farani, ma e le na o le faaSipaniolo o loo ia aoaoina, e faapena foi le faaPeretania. E ui i le luitau o le tatau ona aoaoina gagana e lua i le taimi e tasi, ae e faafetai lava ia Elder Triplet i le i ai i se misiona.

“O a’u o se tagata liliu mai,” o lana tala lea. “Ua i ai ni suiga maoae i lo’u olaga, ma ou te manao foi ina ia maua e isi. O se misiona e mafai ona avea ma galuega faigata, ae o le vaai atu ua suia e se tasi lona olaga e matua aoga lava.”

Ua e faalogo toto’a nei ia i laua. Na masani ona e faalogo e faapea o se misiona e mafai ona avea o ni tausaga se lua e sili ona manaia o lou olaga. O le aso ua maua ai le avanoa e te iloa ai pe aisea.

6:41 a.m. A maea ona faaaluina se taimi e tatalo ai, e faaaluina e faifeautalai se taimi e faamalositino ai. Una’i-i-luga, nofo-i-luga, e oo lava i sina siisii mea mamafa laitiiti o ni faiga masani ia mo Elder Ward. E sosoo mai le ti o le taeao pe a maea ona taele ma faamama le soesa. O le siliō [cereal] malulu e sili ona fiafia i ai.

8:07 a.m. E faaaluina se taimi umi e faifeautalai e suesue taitoatasi ma suesue faalesoa ina ia la maua le upu a o lei folafolaina atu (tagai MFF 11:21). A maea ona suesueina le gagana ma le suesuega faaletagata lava ia o tusitusiga paia, ona sosoo lea ma le taimi mo le suesuega faalesoa e faaaoga ai le Talai La’u Talalelei.

9:55 a.m. E faaaluina e faifeautalai se taimi tele i le faia o fuafuaga, i le amataga o le aso, i le aso atoa, ma i le faaiuga o le aso. La te talanoa e le gata i mea o le a laua faia ae faapea foi i mea e manaomia e tagata sailiili taitoatasi.

O le aso o loo talanoa ai faifeautalai e uiga i se alii mai Farani, o se tagata sailiili o le a la valaauliaina e papatiso.

“O loo popole o ia,” o le tala lea a Elder Triplet. “Na te le o lagonaina faapea ua agavaa.”

“Ta talanoa e uiga i le salamo ma pe faapefea ona le toe manatuaina e le Atua ia agasala,” o le fautuaga lea a Elder Ward ina ua maea ona mafaufau i ai le soa. “Aisea e te le aoao atu ai i le faaFarani ina ia mautinoa ai ua malamalama o ia?”

O le mea mulimuli lava a faifeautalai e fai a o lei o ese atu o le tatalo—toe tatalo foi. O se tasi lenei o tatalo e tele o le a la faia i le aso. O le galuega faafaifeautalai e manaomia ai le tele o le fesoasoaniga faalelagi. Ona ulufafo atu lea ma le faitotoa ma faatopetope atu i le fale faatali pasi.

11:09 a.m. E talanoa faifeautalai i soo se tasi i soo se mea i soo se taimi e uiga i le talalelei, aua la te leiloaina lava po o ai o le a fiafia [i le talalelei]. A o faatalitali mo le pasi, na talanoa faifeautalai i se alii talavou ma tuuina atu ia te ia se tamaitusi o loo i ai a la numera telefoni.

11:21 a.m. E 10 minute e alu ai le pasi ma sina savali puupuu, ae taunuu loa faifeautalai i se falelotu e lisi i le taimi lava ua taunuu ai foi le la tagata sailiili. Na amata lelei lava le talanoaga, ae o popolega o le tagata sailiili na avea ai le lesona e 45 minute lea na la fuafuaina ma se lesona na sili atu i le itula.

“O se lesona sili lena ona faigata ua ou oo i ai,” o le tala lea a Elder Triplet mulimuli ane. “E fiafia o ia i le Ekalesia. E manatu o ia e moni. Ua manao o ia e totogi lana sefuluai. Ae e le talitonu o ia e tatau ona toe papatisoina o ia. Na fai lava si ona faafinau teisi.”

“O ia o se alii maoae,” o le tala lea a Elder Ward, ma lulu lona ulu. “Atonu o le a saunia o ia e talanoa e uiga i le papatisoga i le isi taimi e sosoo ai.”

2:06 p.m. Na tulioso faifeautalai i luga o se isi pasi, o le taimi lea e agai i El Casco, o le nofoaga lauiloa o Toledo, Sepania. Sa la afe i se pisinisi a se tagata sailiili e valaaulia o ia i se gaoioiga i lena po.

“E mafai ona e sese vave lava iinei pe afai e te le o mafaufau lelei,” o le tala lea a Elder Ward e faatatau i le felavasaiga o auala o loo laina ai fale e foliga mai o loo faamalumalu ae i luga o tagata e savavali i lalo ifo.

2:24 p.m. A o feuiai i nei auala vaiti, ua tutu faifeautalai e ofo atu se fesoasoani i se tamaitai o loo tauaveina se avega mamafa. Ua la faaaluina sina taimi e faamatala atu ai po o ai i laua ma le mea o loo la faia, ae e le fia iloa e le tamaitai.

2:47 p.m. O le taimi malolo i Sepania, ona pue lea o se pasi e faifeautalai e toe foi atu i lo la fale mautotogi, po o le piso, mo se taumafataga o le aoauli. “E tapunia mea uma lava i le va o le 2:00 ma le 4:00 i le afiafi,” o le faamalamalamaga lea a Elder Ward. “O nisi tagata e feita pe a e tuitui atu i o latou faitotoa.”

“O le chorizo lea, po o se sosisi,” o le tala lea a Elder Triplet ma tuitui le taumafataga. “O le meaai masani. E tele lava ina ma aai i saimini ma chorizo aua e taugofie ma faigofie ona kuka.”

“O le misiona o se sauniuniga lelei tele lea mo le faaipoipoga,” o le tala ata lea a Elder Ward a o ia faia lana vaiinu Kool-Aid. “E tatau ona e aoao ia fealofani, kuka, faamama [le fale], fai le tagamea, paketi, ma tausi oe lava.”

4:24 p.m. Toe foi atu i El Casco, ua feiloai faifeautalai ma se fesoasoani i le au peresitene o le misiona e faatatau i taumafaiga mo le faatoagaina mai o loo faia i le taimi nei.

“O se eria sili lenei,” o le tala lea a Elder Ward, o le na faamalamalama mai o le auai i le Ekalesia ua sau mai le 15 e oo atu i le 80 tagata i vaiaso taitasi aua na faia e se tasi aiga le faataitaiga o le faaaumea.

4:59 p.m. Na iu ina i ai sina taimi avanoa itiiti e le’i fuafuaina e faifeautalai, ae ua masani faifeautalai i le fetuunaiga faatopetope o a laua fuafuaga. O la la’ua fuafuaga faaleoleo o le faia lea o sina talai tuitui [i faitotoa o aiga].

5:42 p.m. I El Casco, lea e matua toatele tagata o e nonofo i ni fale e maualuluga ae i le alatele, o le tuitui i faitotoa o lona uiga masani o le faia lea o ni talanoaga ma tagata i luga o le faasee o o latou fale. Ma e oo lava i se nofoaga lauiloa i turisi, e tatau lava i se faifeautalai ona mataalia mo ni taifau.

Ua i ai sina faamanuiaina o faifeautalai: “Ua ma mauaina ni tagata maoae,” o le tala lea a Elder Ward. “Na i ai ni autalavou mai Paraguay. Na latou valaauliaina i maua e toe o atu taeao.” Ma ni nai toilalo: “Na faia sa matou talanoaga ma se alii mo le afa itula,” o le tala lea a Elder Triplet. “Na pei lava o le talanoa atu i se puipui.”

7:45 p.m. Ina ua mavae ni femalagaiga i ni pasi se lua, ona taunuu lea o alii faifeautalai i le gaoioiga na latou fuafuaina ma tamaitai faifeautalai o e o loo galulue i le aai lava lea e tasi, o Sister Kathleen Bonifay ma Sister Brittany Hofman.

E le’i o atu tagata na latou faamoemoe e o atu. “E faapena lava le mea e tupu i nisi taimi,” o le tala lea a Elder Ward. Ae ina ua uma sina savaliga puupuu na mafai e faifeautalai ona faapotopoto mai ni nai tagata sailiili e nonofo latalata ane. Ina ua uma se viiga ma se vitio, na mafai lava ona e lagonaina le uunaiga a le Agaga Paia a o tuuina atu molimau a faifeautalai e uiga i le Tusi a Mamona o se tasi molimau ia Iesu Keriso. Sa faamanuiaina le gaoioiga.

“E tausia oe e le Alii pe a e tuuina atu i ai au fuafuaga silisili ma au taumafaiga silisili,” o le tala lea a Sister Bonifay.

9:13 p.m. Ina ua maea le sopo atu i le fale faatali pasi, ua taunuu atu alii ma tamaitai faifeautalai i o latou fale mautotogi, lea latou te valaau ai i o latou taitai, toe iloilo gaoioiga o le aso ma a latou fuafuaga fuafua mamao, ma faia fuafuaga mo le aso e sosoo ai.

“Ia, o mea ia matou te faia,” o le tala atu lea a Elder Ward ia te oe. “E leai lava se suiga tele.”

Ua ata Elder Triplet. “Ma te le liu lava ananafi, ma le aso, e oo lava i le faavavau.”

Na le i ogatasi mea uma e pei ona fuafuaina e faifeautalai, ae na lelei lava le aso. Na la faia ni fesootaiga lelei, faataunuuina se gaoioiga mamana, tuuina atu molimau ia Keriso, ma faia le mea sili e mulimuli ai i musumusuga a le Agaga Paia.

“Ua ou faalogo i tagata o faapea mai o tausaga e lua nei e sili ona manaia i o latou olaga,” o le tala lea a Elder Triplet. “O le lua tausaga e maoae, ae e le faapea la o aso e 730 silisili ia o lo’u olaga. E i ai lava isi aso ou te manatu e le toe uma. Ae ou te fiafia lava i le avea ai o se faifeautalai.”

E lagolagoina foi e Elder Ward. E le mautonu ona lagona e uiga i le tuua o le misiona. “Sa ou faapea lava o le a ou matua fiafia ou te alu i le fale,” o lana tala lea. “Ae ua ese la’u vaai i le olaga i le taimi lenei. Ou te fiafia i lo’u olaga. O a’u o se faifeautalai. O loo ou talanoa i tagata e uiga ia Keriso i aso uma. O le tuua ai o le galuega o le a lelei toe leaga foi.”

Ua e fiafia i le maua ai o sina tofo i le galuega faafaifeautalai. E moni lava o se galuega matua faagaeetia, ae o le galuega faafaifeautalai e tigaina. Ia ua oo i le taimi e fai ai se malologa ma saunia oe lava mo lou aso o se faifeautalai. E vave lava ona oo mai nai lo le mea ua e manatu ai.