Mai le Uo i le Uso i le Soa
O Valeria Pontelli o Río Gallegos, Santa Cruz, Atenitina, e lei faamoemoe e faaliliuina lana uo. Sa na o le ola lava o ia i ona tulaga faatonuina ma le talitonuga maumaututu. Talu ai ona o ia o se tasi o le Ekalesia, na i ai mea faapitoa na ia faia ma mea foi na te lei faia, ma na iloa uma lava e ana uo. O se tasi o na uo o Paula Alvarez, lea na vaavaaia ma le totoa ia Valeria ma na faagaeetia o ia i le auala faamaoni ma le maumaututu na ola ai o ia i ona talitonuga.
Na i ai se aiga lelei o Paula, ae latou te lei maua le talalelei—i le taimi a o lei avea Valeria ma vaega o o latou olaga. Na manatua e Paula, “E lei ma Valeria i lana molimau na i ai. Na ia iloa o ia lava. Na ia iloa o ia o se afafine o se Tupu mamalu ma faavavau, o se afafine o le Atua.”
O lena malamalamaaga ma le faatuatuaga na faagaeetia ai le tamaloa o le aiga o Paula, o Moises. Na amata ona ia sailiili i le Ekalesia ma feiloai ma faifeautalai. O le aso na ia folafolaina ai o le a papatiso, na faateia teisi ai Paula. Na te lei mafaufauina o le a naunau le tamaloa o lona aiga e faia ni suiga tetele i lona olaga.
Na valaaulia le aiga atoa i le papatisoga, ae na le mautonu Paula pe auai. Na te lei iloaina po o le a se mea e ono tupu ai. Mulimuli ane, na uunaia o ia e lona aiga latou te o i le papatisoga o le tamaloa o lona aiga. Na manatua e Paula, “A o matou molimauina le tofu ifo o le tamaloa o lou aiga i le vai papatisoga, na pai mai le Agaga i lo’u loto. Na loloto le aafiaga, na oo lava ina le mafai ona faafitia. I lena taimi na ou manao foi e tautino atu au lava i le Atua ma faia soo se mea Na te finagalo ai mo au.”
“E mafai ona ou talanoa atu ia te oe?” o le tala lea a Paula, ma toso atu Valeria i autafa. “Na ou lagonaina se mea faapitoa i le papatisoga o le tamaloa o lou aiga,” na ia faamatala filemu atu ai.
Na ta’u atu e Valeria i lana uo na ia lagonaina uunaiga a le Agaga. “Ua ia ta’u atu ia te oe e tatau ona e mulimuli i faataitaiga a le tamaloa o lou aiga.”
“Ae e le mafai ona ou faia na o au,” o le tala lea a Paula.
“Aua e te popole. O le a ou fesoasoani atu ia te oe,” na faamafanafana atu ai lana uo. E lei umi, ae feiloai Paula ma lona aiga atoa ma faifeautalai ma taliaina le valaaulia ina ia papatisoina. Na suia o latou olaga e faavavau.
Na faapea mai Paula, “O tulaga faatauaina e masani ona ou vaai o ola ai la’u uo ua avea nei ma o’u [tulaga faatauaina].” E lei umi lena ae amata loa ona lagonaina e Paula se naunautaiga malosi e faasoa atu i isi le mea ua tuuina atu ia te ia. Ina ua atoa le tausaga talu ona avea o ia ma tagata o le Ekalesia, na ia faatumuina ona pepa o le misiona, feiloai ma ona taitai perisitua, ma maua se valaauga e auauna atu i le Misiona i Chile Santiago East.
Na faapea mai Valeria, “A o ou vaavaai atu i la’u uo o sauniuni e faia lana misiona, na pai mai le Agaga i lo’u loto. Na ou manao e tautino atu a’u lava e auauna atu i le Atua e pei ona ia faia.”
“E mafai ona ou talanoa ia te oe?” O le taimi lea o Valeria lea na tosoina Paula i autafa. “Ua ou faalogoina se mea faapitoa a o e sauniuni mo lau misiona.”
Na ta’u atu e Paula i lana uo le mea lava e tasi na ta’u atu muamua e lana uo ia te ia: “O le Agaga o loo tauina atu ia te oe le mea e tatau ona e faia.”
O fuafuaga a Valeria e le’i aofia ai se misiona. Na lei matua mautinoa e ia pe faapefea ona amata. “E le mafai ona ou faia toatasi,” na ia tau atu ia Paula.
“Aua e te popole. O le a ou fesoasoani atu ia te oe,” na faamafanafana atu ai lana uo.
Mulimuli ane, ina ua tatalaina e Valeria lona valaauga, na faateia o ia e alu i le misiona lava lea e tasi ma lana uo. Na amata le auaunaga a Paula ia Oketopa 2002; na faatasi atu Valeria ma ia ia Fepuari 2003.
I le taimi o a la misiona na vaai soo le tasi i le isi i konafesi ma gaoioiga. Sa faafiafiaina i laua e talanoa ma fefaasoaa’i tala mai a la eria eseese. La te lei moemiti lava o le a tofia i laua e soa ia Novema 2003. Na fuga ae le la faiga uo i se faatasiga o le a tumau e faavavau. Na la o mai mai le avea o se uo i le avea ma uso i le talalelei i le avea ma soa faifeautalai.
Na faapea mai Sister Valeria Pontelli, “O le taimi muamua na ou fefe ina nei avea le galulue faatasi ma vaega e ono faaleagaina ai la maua faigauo, ae na mou ese atu lena fefe i le aso muamua lava. O lenei avanoa e galulue faatasi ai ua na ona faamalosia ai la maua mafutaga, ma o la maua faauooga ua fesoasoani ia i maua i le galuega.”
E lagolagoina foi e isi. O se tasi tamaitai, o le sa le toaga na toe foi mai i le lotu ona o taumafaiga a nei faifeautalai e toalua, na ia faapea mai, “E le mafai ona taofia lou alofa ia i laua aua e mafai ona e vaai atu i le alofa la te lagonaina o le tasi mo le isi faapea ma i latou uma e siomia i laua. O i laua o a’u agelu.”
Na faigata i nei soa e toalua ona faatofa ia Mati 2004, ina ua faamaeaina le misiona a Sister Paula Alvarez. Na popole o ia i le toe foi atu i Atenitina ma mea uma e ono oo mai i le lumanai. O nei faifeautalai e toalua na talanoa e uiga i ona popolega a o la savavali faatasi atu i a laua fuafuaga faatulagaina. “E le mafai ona ou faia toatasi,” o le tala lea a Sister Alvarez.
“Aua e te popole,” na oo mai ai upu masani mai lana soa, o Sister Pontelli. “O le a ou fesoasoani atu ia te oe.”