Lotu Faatamaoaigaina o Aiga, Auaiga, ma le Tagata Lava Ia

I lotu faatamaoaigaina faalekuata, e mafai ai e uso o le Aualofa ona “lagonaina o i latou o ni itutino a o latou auai i gaoioiga e fausia ai le malosi faaleagaga, atiina ae ai tomai patino, faamalosia ai le aiga ma le auaiga, ma faatinoina ai le alofa mama e ala i galuega auauna atu,” ua saunoa mai ai Sister Parkin. “I nei fonotaga e faamalolosia ai sootaga faaletamaitai, e faaaumeaina ai tagata fou ma e le toaaga mai, ma e anoanoai avanoa faafaifeautalai e maua ai.”

O loo i lalo ia faataitaiga o mea ua faia e siteki ma uarota mo a latou lotu faatamaoaigaina o aiga, auaiga, ma le tagata lava ia.

O se tasi uarota na faamanatuina le faavaeina o le Aualofa i se polokalama na latou taua o le “Usoga Faaletamaitai, o se Ie lalaga o le Alofa.” Na faavaeina lea i le lauga na tuuina mai e Peresitene James E. Faust, Fesoasoani Lua i le Au Peresitene Sili, i le sauniga aoao a le Aualofa ia Setema 2002.¹ Ina ua maea le taumafataga, na faasoa atu e ni uso se toavalu o latou aafiaga ma manatu i le uiga o le Aualofa ia i latou o se nofoaga mo aoaoga, faia o faauooga e faavavau, fiafia ai i le usoga faaletamaitai, ma le ofoina atu o auaunaga.

O le lotu faatamaoaigaina a se tasi siteki na tulimatai atu i le fausiaina o le faatuatua ia Iesu Keriso ma le fetufaaiga o molimau. Na tusia e Stephanie Wilkey, o le peresitene o le Aualofa a le siteki: “Na musuia i matou e faavaeina le lotu faatamaoaigaina o aiga, auaiga, ma le tagata lava ia i se tasi o mataupu faavae o le alofa mama: o le agalelei. Na alu i ai uma le faatuatua na ia i matou ina ia matou mulimuli i uunaiga na matou maua o se au peresitene ina ia faataunuuina ai lenei manatu. Na faatalitonuina a’u e o’u fesoasoani o le a o mai uso ma o le a latou tutulai ma talanoa mai ia i matou i mea o le loto. Ioe, na latou o mai! E toeitiiti 350 uso na fetaomi mai i le falelotu i se afiafi matagi ma timuga. Na latou tutulai ma sasaa mai o latou lagona loloto ma le mamana o le tasi i le isi i molimau matagofie o le faaaogaina o le mataupu faavae o le agalelei i o latou olaga. A o tuua e uso le falelotu ina ua mavae le itula ma le afa, na latou faaali mai i upu ma loimata na latou lagonaina le alofa o le Alii ma na latou matua faafetai ona sa latou o mai.”

I se tasi siteki, na iloa ai e le peresitene o le Aualofa o Mickie Neslen o le saogalemu tautupe e fesoasoani e faamalosia ai aiga. Na latou saunia ma le au peresitene o le siteki se lotu faatamaoaigaina o aiga, auaiga, ma le tagata lava ia, lea na malaga ai mai lea uarota i lea uarota. Na amataina i se lesona faaleagaga i mataupu tautupe. Mulimuli ane, na valaaulia uso ina ia faia tulaga e aoao ai se lima e fai ai aoaoga tai 15 minute e uso e i ai le tomai faapitoa:

“Paketiina” na faaalia ai ni auala eseese e faamaumau ma pulea ai tupe e faaaoga ai api, teutusi, po o polokalama faakomepiuta.
“Manatu mo le Faasaoina o Tupe” na i ai ni auala faigofie e faasaoina ai tupe i aso taitasi.
“Tupe mo Tamaiti” na faaalia ai auala eseese e aoao atu ai tulaga tautupe i fanau, e aofia ai taaloga e taaalo faatasi uma ai.
“Saunia mo le Lumanai” na toe iloiloina ai faamatalaga e uiga i inisiua mo tulaga o manaoga faapitoa, nofoaga e tausi ai tagata matutua, nofoaga tausi mai, ma isi mataupu mo polokalama litaea.
“O le Tau o le Aitalafu” na faailoa mai ai le matautia o le aitalafu ma auala e aloese ai.

O nei lotu faatamaoaigaina na fesoasoani e aoao ma faamalolosi ai uso i ni auala taua se tele.