Manatu Faaopoopo mo le Taimi o Fetufaaiga, Mati 2007

O manatu faaopoopo nei e mafai e taitai o le Peraimeri ona faaaoga faatasi ma le Taimi o Fetufaaiga na lomia i le Liahona o Mati 2007. Mo le lesona, faatonuga, ma gaoioiga ia e o faatasi ma manatu nei, tagai, “Taumafai, Taumafai, Taumafai” i itulau U4 ma le U5 o le vaega mo tamaiti i lenei lomiga.

Aumai se lomifefiloi, ni Tusi Paia, ma se tusipese. Tau i tamaiti o le a latou faaaogaina ia tusi e suesue ai tusitusiga paia. Ia faamatala atu, a tatou suesue moni i tusitusiga paia, e sili atu mea tatou te faia nai lo le na o le faitau i ai. Fai i tamaiti e sue i le Iakopo 1:5. Vaevae le Peraimeri i vaega, ma tuu atu i vaega taitasi se tofiga. Tuu atu i le isi vaega se lomifefiloi, ma fai i ai e sue [uiga] o upu faigata e pei o le tele mai ma le toe tautaua. Tuu atu i le isi vaega e sue i le Talafaasolopito—Iosefa Samita 2:11 e sue ai auala ua taua tele ai le Iakopo 1:5. Tuu atu i se vaega e faaaoga le faasino upu o loo i le tusipese, e sue ai se viiga e faatatau i le Iakopo 1:5. Tuu atu i vaega taitasi e lipoti mai i mea ua latou aoaoina, ina ia malamalama lelei ai i lenei mau taua. Sa faitau e Iosefa Samita lenei mau, ma na musuia ai o ia e tatalo. Tau atu i tamaiti e tali mai foi le Tama Faalelagi i a tatou tatalo.

Afai e mafai, ia faamatala atu e uiga i se taimi na e maua ai se tali e ala i le tatalo ma le suesueina o tusitusiga paia. Molimau atu e uiga i faamanuiaga e faapea ona oo mai e ala i le tatalo ma le suesueina o tusitusiga paia.
Faaali atu se kalena, ma fai atu i tamaiti po o le fea o aso o le aso Sapati. Tau atu ia i latou, a o le’i Toetu mai Iesu, o le aso Sapati o le aso lona fitu, e pei ona tau mai i le Kenese 2:2–3. Ia faamalamalama atu, e toalua tamaiti matutua o le a faamatala atili e uiga i le Sapati. O le vaiaso a o lumanai [le Aso Sa], ia fai atu i se tasi o tamaitiiti e saunia se otootoga o le “Talafaasolopito o le Sapati” ma le isi e saunia se otootoga o le “O Le Aso o le Alii” mai le mataupu e 24 o le tusi lesona a le Aoga Sa o le Mataupu o le Talalelei.

Ia valaaulia tamaiti e fesoasoani atu ia te oe e fai se lisi o auala e tausi ai le aso Sapati ia paia. O le lisi ua faanumeraina o loo i le mataupu e 24 o le Mataupu o le Talalelei o se punaoa sili ona lelei. Ia taulai atu i mea e tatau ona tatou faia nai lo mea e le tatau ona tatou faia.

Usu se pese po o se viiga e faatatau i le Sapati. Ia faaali atu se ata o Iesu Keriso. Ia faailoa atu lou alofa mo le Faaola ma lou fiafia ua tatou maua se aso faapitoa i vaiaso taitasi e manatua ai le Alii, suesue ai i Lana talalelei, aai i le faamanatuga, malolo ai mai a tatou galuega, ma isi lava mea. Molimau atu e uiga i Lona paia.
Aoaoina o le pese: “O Loo Ou Taumafai e Avea e Pei o Iesu” (Tusipese a Tamaiti, 40–41; Liahona, Ape. 1990, U6–U7). Ia faaali atu le ata e o faatasi ma le pese. (Afai e mafai, faatele le ata ina ia mafai ona iloa gofie atu e tagata uma.) Fai atu i tamaiti e vaai faalemafaufau pe aisea atonu ua tagi ai le teineitiiti laitiiti. Fesili atu pe o le a le mea a le tamaitiiti o loo fai, ma faamata o ai foi o ia. Ia fautua atu atonu o le tama o le tuagane matua lea o le teineitiiti. Usu le pese “O Loo Ou Taumafai e Avea e Pei o Iesu.” Ia faamatala atu o Iesu na te faamafanafana ia i tatou, aoao i tatou, ma alofa ia i tatou, e pei lava o le tuagane matua o loo i le ata. Aoao atu le fuaiupu e ala i le fai atu i tamaiti e patipati i tamatamailima (e lua tamatamailima o le isi lima e popo i luga o le alofilima o le isi lima) le fati o le fuaiupu muamua a o e usuina. Faailoa atu le toe itiiti tutusa ma le laina lona lua. Tuu atu ia i latou ina ia tou pepese faatasi i laina amata mo ni nai taimi. Usu le vaega lona lua o le fuaiupu. Ia valaaulia i latou e sue le Ioane 13:34 ma faatusatusa upu o le mau i upu o le tali. Usu le tali a o vaavaai tamaiti i le mau. Ia faamatala atu, a o tatou alolofa atu le tasi i le isi, ua tatou tausia se poloaiga taua aua “ua aoao mai o Iesu.” A uma ona usu le tali mo ni nai taimi, faataitai le usuina mai lava i le fuaiupu e oo i le tali. Ia uunaia tamaiti ina ia avea e pei o le tamaitiiti o loo i le ata e ala i le alolofa i o latou aiga, uo ma tuaoi. A latou alolofa atu e pei ona alofa mai Iesu, o le a latou mulimuli atu i Lana faataitaiga. Ia molimau atu e uiga i le taua o le mulimuli i le Faaola.