Pe ana Ou Iloaina i lo’u 19 …

Saunia e Roger Terry

le mea ua ou iloa nei, semanu e ese lou faiga o nisi o mea i le avea ai o se faifeautalai.

Na ou auauna atu i Siamani i matu mai le 1975 i le 1977. E moni lava o tausaga nei e lua e sili ona ou manatuaina o lo’u olaga, ae aumaia foi e lea manatua nisi manatu faaopoopo. I le vaai atu i le toe tepa i tua o se meaalofa matagofie, ou te ofoina atu ai ni fautuaga se fa e ono fesoasoani ia te outou o e o loo sauni e faamisiona.

1. O le a ou avea ma a’u matafaioi taua lona lua le alofa i la’u soa.

Na o mai a’u soa i foliga eseese ma fuaitino eseese faatasi ai ma meaalofa faapitoa ma uiga faaletagata lava ia. O nisi na vave ona avea ma uo ma tumau ai mo tausaga e tele. O isi e lei tele ni mea na matou tutusa ai nai lo le talai ma le aoao atu. E tasi pe lua, ou te ma e ta’u atu, na leai ni o’u lagona lelei i ai. O le mea moni, o nisi taimi na oo ai lava ina i ai ni tulaga matua le lelei.

Ae faatasi ai ma nei soa taitasi, na i ai se vaega e tasi na ma lotogatasi ai: na ma taufai ositaulagaina o ma taimi, tupe, ma le malosi e faasalalau ai le talalelei a Iesu Keriso. Pe ana faapea e mafai ona ou toe faia, ou te matua taumafai malosi e avea ma uo sili i soa uma lava, e le afaina pe tutusa lelei pe leai o ma uiga faaletagata lava ia po o mea e fiafia i ai. Ou te faamalosiauina o ia ma taumafai e faasosolo atu i ai le agaga naunautai e aunoa ma ni manatu faitio.

Afai o le alofa i la’u soa o le a avea ma a’u matafaioi taua lona lua, o le a le mea e muamua, atonu o le a e fesili ai? O le usiusitai. O le alofa i lau soa e le o lona uiga le tatau ona e mulimuli ia te ia i le solia o poloaiga po o tulafono a le misiona. O le mea e lelei ai, e leai ma se isi o a’u soa na le usiusitai. E toaitiiti na lei maua se agaga naunautai e pei ona mafai lava ona i ai, ae o le mea na sili atu ona latou manaomia nai lo faitioga ma le viga i ai, o se tasi lea e talia ma faamalosia i latou.

2. Ou te vaavaai mo vavega. O le mea moni, ou te faamoemoe i ai.

Ou te manatua lou nofonofo ai i totonu o le fale o le misiona i le faaiuga o la’u misiona, i se lotu molimau faatasi ma isi uso faifeautalai e 13 alii ma se tamaitai e toatasi, o e na sauni foi e malaga atu i aiga. Ou te le manatuaina lau tala na fai. Ou te le manatuaina tala na fai a isi alii faifeautalai. Ae o le a le mafai lava ona galo ia te a’u le molimau a Sister Thorpe. Na ia faamatala mai e faapea, i le faatalanoaga ma lona peresitene o le siteki i le 18 masina talu ai na ia faaalia ai se naunautaiga faalilolilo: “Ou te fia vaai i ni vavega i la’u misiona,” na ia ta’uina atu ia te ia. Ona, toetoe lava a faatoese atu, na ia fesili ai ia te ia pe se mea sese le saili mo ni vavega. Na ia faamautinoa atu e le sese. Ina ua maea ona faamatala mai lenei talanoaga ia i matou, na ia molimau mai, “Ua ou vaai i vavega i la’u misiona.”

Na faafuasei ona ou malamalama na ou vaai foi i vavega, ae ou te le i sailia pe na faamoemoeina foi. Na ou tuu lava i latou e tutupu. O lo’u le sailia o i latou ma faamoemoe ia i latou, atonu na ou taofia ai sina vaega tele. O vavega e oo mai i le faatuatua, ma o le faatuatua e i ai sana vaega e faia i le faamoemoe i ni mea faapitoa e tutupu ma le matua galue i ai ina ia faataunuuina.

Pe ana faapea ou te alu atu e auauna atu i le aso, ou te faia la’u vaega, ae o le a ou faamoemoe foi i le Alii e faia Lana vaega i la’u galuega i le avea ai ma Ana auauna. O Ia o le matai faapitoa o vavega, lea atonu tatou te faauigaina o mea e mafai ona Ia faia mo i tatou ia e le mafai ona tatou faia mo i tatou lava. Ua ou talitonu e sili atu Lona naunautaiga e faatino vavega nai lo lo tatou naunautai e talia vavega. O le aoao atu e ala i le Agaga atonu o le auala sili lea ona aoga e mafai ona tatalaina ai e se faifeautalai le faitotoa mo vavega. E valaauliaina ai uunaiga tuusao a le Alii i le olaga o se tagata sailiili.

3. O le a poto atu ma malosi atu la’u galue.

Na foliga mai o le tautinoga a lo’u taitai itu muamua o le “Ia galue mataalia atu, ae le o le [galue] malosi atu.” Ou te le lagolagoina le afa lona lua o lenei tautinoga, ae ana faapea e mafai ona ou toe faia, ou te mautinoa lava lo’u taumafai e galue mataalia atu. O lou taitai itu na fai si limalima ma si faamanuiaina foi. Mo se faataitaiga, na ia faatulagaina se au volipolo a le autalavou i lana paranesi, ma sa latou valaauliaina a latou uo e taaalo. O se auala malie ma le faigofie e fesoasoani ai i le autalavou e avea ai ma faifeautalai. Na maua ni avanoa e aoao atu ai ma fai ai ni liliuga mai lenei auala filemu e faasoa atu ai le talalelei.

Atonu na ou matua maumaututu ma taofiofi mamau i la’u lava faauigaina o le tulaga e tatau ona i ai le galuega a le Alii. Ou te manatu ia te a’u lava o se tagata paie pe afai ou te le tuitui i faitotoa i le aso atoa pe aoaoina na tagata sailiili faamaoni. Ae o le galuega a le Alii e le seiloga e faigata ona faatoa ta’u lea o se galuega. Pe ana faapea o a’u o se faifeautalai i le aso, ou te taumafai, i lalo o le taitaiga a le peresitene o le misiona, ia sili atu lo’u limalima i le sailia o tagata e aoao.

4. O le a ou le avea le teena ma le faatoilaloina e faavaivaia a’u.

I la’u misiona, o le teena ma le faatoilaloina na avea ma vaega o aso uma o o matou olaga e pei o le ai ma le manava. Na faigofie ona manatu o le a teenaina ma manatu ai o le a leai foi se lagona fiafia o tagata sailiili i la matou savali. Ae o vaiaso e lima i se tasi o aai patino na aoaoina ai au i se lesona taua. O se aai na leai se isi na matua faamanuiaina mai ai. Ae na galo i se tasi ona ta’u mai i la’u soa po o a’u. Sa matuai lelei le faiga o le ma galuega. Sa ma galulue malosi. Ma sa ma maua le fiafia. Sa ma feiloai i le toatele o tagata o e na fia faalogologo i le ma savali. Na i ai sa maua vasega toatele o tagata sailiili i Aso Sa taitasi i lenei paranesi toagaogao. Na tutupu vavega i olaga o tagata. Ma na ma lagona ua na ona ma valuvaluina o le laualuga o lenei aai auro.

Aisea na matua faamanuiaina ai i maua iina? Ou te talitonu na faamanuiaina maua e le Alii ona o o ma uiga faaalia. Na ma fiafia lava ma la’u soa ma te galulue faatasi. Sa ma lotogatasi. Sa ma galulue malosi. Sa ma talitonu faamaoni o le aai o se nofoaga eli auro o loo faatalitali mo le lagaina i luga o ona oa. O uiga faaalia e telē le sootaga ma le faatuatua. O le faatuatua e fesootai sa’o lava i le faamanuiaina. Ma o le faatuatua e pipisi.

O le mea e leaga ai, na tuai ona ou malamalama i lenei lesona. Na le mafai ona ou faia le fesootaiga o fua o a tatou galuega ma le auala tatou te galulue ai. O le taunuuga, sa le mafai ona ou faatatauina ma le manuia lenei mataupu faavae i au eria e lua na sosoo ai.

Atonu e tele isi mea o le a ese ona ou faia pe ana ou maua le avanoa e toe faia atoa ai la’u misiona, ae o nei manatu e fa e tulaga ese lava i lo’u mafaufau. Afai e te vaavaai ma le totoa i nei manatu, o le a e iloa ai o se vaega lea o tulaga o le agavaa ua otootoina e le Alii lava Ia mo Ana auauna: “Ma o le faatuatua, faamoemoe, agaalofa, ma le alofa, ma le manatu tasi i le mamalu o le Atua e faaatoatoa ai o ia mo le galuega. A ia manatua le faatuatua, loto mama, poto, le gaoia, onosai, alofa faauso, amioatua, agaalofa, loto maulalo, filiga” (MFF 4:5–6).