O Auala e Saunia ai e Avea ma se Faifeautalai Lelei

Na fesiligia e le mekasini a le Ekalesia ia Elder M. Russell Ballard o le Korama a Aposetolo e Toasefululua, pe faapefea ona saunia le autalavou mo misiona ma o a foi faamanuiaga e oo mai i le auauna atu ai.

Aisea ua talosagaina ai e le Ekalesia alii talavou agavaa uma ina ia auauna atu i se misiona?

Ua le tuuina mai e le Alii se tiutetauave e sili atu lona maoae i Lona nuu nai lo le faasoa atu o le talalelei i fanau a lo tatou Tama Faalelagi. O faifeautalai e aumaia tagata mai le pouliuli o le lalolagi ma taitai atu i latou i le saogalemu ma le malamalama o le talalelei a Iesu Keriso. O le mauaina ma aoao atu ma papatiso ma faamau se tasi e le’i manatu mamafa i le Atua po o Keriso ma Lana taulaga togiola maoae o se tasi lea o auaunaga sili ona maoae e mafai ona faatinoina e se tagata ua umia le perisitua.

Ua tatou iloa le faamoemoega o le olaga. E le iloa e le toatele o le lalolagi. O le matafaioi a alii talavou uma le saunia o ia lava e folafola atu lena savali i le lalolagi. O se galuega manaia.

Ae faapefea tamaitai talavou? O le a lo latou tiutetauave?

O se misiona e matua talafeagai lea mo se tamaitai talavou, pe afai o le mea lena e manao o ia e fai ma o loo agavaa o ia. O le umiaina o le perisitua e aumaia ai ma le tiutetauave mo alii talavou e tauave le savali o le Toefuataiga i le lalolagi. Ua valaauliaina tamaitai talavou e auai i le galuega faafaifeautalai e pei ona talafeagai ma o latou tulaga. Afai ua ia i latou faamoemoega o faaipoipoga, o se valaauga maualuga atu lena. Ae o tamaitai talavou o e ua i se tulaga e auauna atu, e avea i latou ma ni faifeautalai maoae. O i latou o ni faiaoga lelei, e ia i latou le loto malamalama, ma e mafai ona latou fesootai faapitoa lava i tamaitai. Ou te manatu e leai sa tatou misiona i soo se mea lava i le lalolagi e le matua faafiafiaina ai le peresitene o le misiona i le mauaina o ni faifeautalai tamaitai se toatele atu.

E faapefea ona lelei atu sauniuniga a alii ma tamaitai talavou mo se misiona?

O uiga faaalia o le ki lava lea. E tatau i tagata talavou ona vave tautino i latou lava i le manatu o se misiona. O le ala lena, a oo ina matutua i latou ma amata ona feagai ma nisi o faaosoosoga o le lalolagi, o na faaosoosoga o le a itiiti se avanoa e ulufale atu ai i o latou loto ma mafaufau. O le a latou tetee atu i faaosoosoga aua ua latou tulimatai atu i le avea ma se auauna a le Alii. E fesoasoani pe afai latou te ola i se aiga e fiafia e faasoa atu le talalelei. O se agaga faafaifeautalai e faatupuina i totonu o se aiga lea e fefaasoaai ai e matua ma fanau le talalelei i le tasi ma le isi.

O le mea ou te tauina i faifeautalai fou e faapea, e manaomia ona latou matuai malamalama lelei, o le 18 po o le 24 masina latou te i ai ia latou misiona e le ni o latou taimi ia. O le taimi lena a le Alii. O le a latou ofoina atu o latou tomai ma taleni i le taimi atoa e fesoasoani ai i le fausiaina o Lona malo. A mafaufau faapena faifeautalai, o le a leai so latou faaletonu i le mulimuli ai i tulafono a le misiona. Latou te le tetee i fautuaga a le peresitene o le misiona, i taiala o loo i totonu o le Talai La’u Talalelei, ma fautuaga a le Au Pulega Aoao. Latou te taliaina atoatoa lena fautuaga aua latou te le mananao e maumau se minute se tasi o le taimi a le Alii.

O a nisi mea e mafai ona faia e faifeautalai faamoemoeina e saunia ai?

E tatau ona malamalama faifeautalai i mataupu faavae, ma e tatau ona latou iloa le ala e faasoa atu ai. E le mafai ona e aoaoina atu se mea e te le iloa. A iloa e faifeautalai le talalelei ma le auala e aoao atu ai, latou te le mananao e faia se isi lava mea. Latou te iloa e mafai ona latou aoaoina soo se tasi, i soo se mea, i soo se taimi, i soo se tulaga, e faaaoga ai a latou lava upu e o faatasi ma le mana o le Agaga. E ia i latou le mautinoa ia i latou lava ma le malosiaga mai totonu. E i ai se mana maoae i lena ituaiga o sauniuniga.

O le mafuaaga lenei, ou te fautuaina ai alii ma tamaitai talavou uma ina ia faamasani i le Talai La’u Talalelei. Ua i ai i tagata talavou le tiute o le faamalamalamaina o i latou lava, ia malamalama i latou lava i aoaoga faavae o le Toefuataiga. O lena sauniuniga e taua ona vaega uma mo tamaitai faapea foi ma alii. E tusa lava pe faaipoipo se tamaitai talavou pe auauna atu i se misiona, e tatau lava ona galue le talalelei i lona olaga.

E tatau i le autalavou ona faamasani i mea e tutupu i totonu o le galuega faafaifeautalai. O le a latou iloa e fesoasoani, pe afai e mafai, le fesoasoani i faifeautalai ma iloa pe faapei le galuega.

Ou te fautuaina foi ia suesue ma mulimuli le autalavou i taiala o loo i le Mo Le Malosi o le Autalavou. E tatau i faifeautalai ona ola mama ma saunia faaleagaga. Afai latou te ola i mataupu faavae o loo i le Mo Le Malosi o le Autalavou, o le a latou saunia faaleagaga e avea ma ni faifeautalai maoae.

Ae faapefea sauniuniga faaletino, tautupe, ma le faalelagona?

E tatau i faifeautalai ona faalagolago le tagata ia te ia lava. E tatau i tagata talavou ona aoao e tausia e le tagata ia lava, ae le o le faalagolago tele i o latou tina po o tama.

E tatau ona latou mafaia ona taulimaina tulaga manaomia faaletino o le galuega faafaifeautalai. E tatau i tagata talavou ona faatapulaaina lo latou mamafa ma ia malolosi faaletino. O le fuafuaga i aso taitasi a le faifeautalai ua tuuina i ai ma se polokalama faamalositino e 30 minute i le aso. O le paleni o le malosi faaletino e faamalosia ai foi le agavaa faalemafaufau.

E tatau i faifeautalai faamoemoeina ona aoao ia galulue. E tatau ona i ai ni a latou galuega ma faaputu tupe mo a latou misiona. O peresitene o misiona uma lava o le a lagolagoina lo’u faapea atu o le faifeautalai na galue ma faaputu tupe ma fesoasoani e totogi ai se vaega po o lana misiona atoa o se faifeautalai lena ua sili atu ona saunia. O le galue ma le faaputu o tupe mo se misiona e faatupuina ai le naunautai mo le auauna atu ma tuuina atu ai i se alii talavou po o se tamaitai talavou le agaga galue lelei. Po o le a lava nisi tulaga o le galuega faafaifeautalai, o le galue lava!

O le galulue agai i se misiona ma le avea ma tausimea i o latou lava olaga e fesoasoani foi i alii ma tamaitai talavou i o latou tulaga faalelagona. Latou te iloa i totonu ia i latou lava e mafai ona faamanuiaina i latou e tusa lava po o fea e auina atu i ai i latou ma po o a foi tulaga. Latou te iloa ua lava lo latou malosi e taulimaina ai soo se mea i se lalolagi ua faasolo ina itiiti le fiafia i mea a le Atua. Tatou te manaomia ni faifeautalai e i ai lena ituaiga mautinoa faaletagata lava ia.

Ae faapefea le aoaoina o se gagana lona lua?

O le tele lava o aoga maualuluga e manaomia ai le aoaoina o se gagana lona lua, ma e tatau i tamaiti aoga ona matua galulue malosi ia faia lena mea. Ia, atonu latou te aoaoina le faaSipaniolo ae auina atu i [latou] i Taiwan, ae e le afaina lena. O le uiga pulea e maua mai i le aoaoina o auala e aoao ai, e taua atu. O le aoaoina o se gagana lona lua, o le a faigofie ai ona latou aoaoina le gagana a tagata o le misiona e tofia i ai i latou.

E faapefea ona iloiloina lena valaau?

Muamua, e faatalanoa e le epikopo po o le peresitene o le paranesi le alii po o le tamaitai talavou ona tuuina atu lea o le fautuaga. Ona faatalanoa lea o le tagata e le peresitene o le siteki po o le misiona. O le tele lava o talosaga a faifeautalai e auina atu i masini eletonika i le laumua o le Ekalesia. E auina atu faatasi ai ma se ata i le talosaga. A taunuu atu le talosaga, ona silasila lea o se sui o le Korama a le Au Aposetolo e Toasefululua i le ata ma iloiloina ma le totoa ia uiga o le faifeautalai faamoemoeina e pei ona faamaonia i mea ua tusia e o latou taitai perisitua, i togi o le tagata talavou i le aoga, ma se naunautaiga faaalia e aoaoina se gagana. E silasila foi le Aposetolo i tulaga manaomia o misiona uma e 344 i le lalolagi atoa ona maua lea o se lagona loloto faaleagaga o le nofoaga e tatau ona auauna atu ai le faifeautalai. O nei mea uma e faia i lalo o le taitaiga a le Peresitene o le Ekalesia, ma o le valaauga e sau mai ia te ia.

Aisea e valaauina ai nisi faifeautalai e auauna atu i o latou lava atunuu?

Ou te folafola atu ia te outou o valaauga o se taunuuga o faaaliga. E auauna atu faifeautalai i nofoaga e finagalo le Alii latou te auauna atu ai. Tatou te manaomia ni faifeautalai lelei, ma agavaa i misiona uma. Mo se faataitaiga, faapea la o loo i ai se alii talavou, o se taitai i le aoga, o loo nofo i Virginia i le Iunaite Setete. Ua ia tatalaina lona valaauga ma te’i ai i lona iloa e auina atu o ia i le Aai i Sate Leki. Ae e le umi ona i ai o ia iina ae ona iloa tonu lava le mafuaaga na valaauina ai o ia e le Alii e auauna atu iina.

O le a sau fautuaga i tagata talavou o e ono lagona, po o le a lava le mafuaaga, e le o ia i latou le tulaga manaomia e auauna atu ai i se misiona?

O le 2002 na tatou siitia ai le fuafaatatau mo le auaunaga faafaifeautalai. O lona uiga o tulaga manaomia e avea ai ma se faifeautalai agavaa e tatau ona malamalama ma vave ona ola ai tagata talavou. E tatau ona latou aloese mai agasala a le lalolagi. E moni, e mafai ona salamo ma o se faamauiaga maoae foi. Ae o i latou o e agasala e tatau ona faamaoni ma atoatoa lo latou salamo, ma atonu e umi se taimi o lena laasaga. Atonu foi e ono manaomia ai le faamaoniga a le Au Peresitene Sili ona faatoa mafai lea ona latou auauna atu. O le siitiaina o le fuafaatatau e le tuueseina ai se tasi; e na ona manaomia ai o le—salamo maeaea—ma o nisi taimi e matua faigata lava. Ou te aioi atu i le autalavou, aua nei [outou] faia lena tulaga! Aua nei outou oo i na tulaga.Tau lava o le tumau i le agavaa e auauna atu.

Ia, atonu o loo i ai nisi tagata talavou o e manatu ifo ua le mama pe le agavaa i latou lava e auauna atu e ui lava i mea ua latou faalogo i ai mai o latou epikopo po o peresitene o paranesi. Ae o le mea moni lenei: o loo i ai i taitai perisitua ki o le faamaoniga. Afai e faailoa mai e taitai perisitua ua agavaa se tagata ma ua valaauina o ia, ona tatau lea ia te ia ona faaaoga le faatuatua i lena valaauga ma auauna atu ai i le Alii ma le mautinoa atoa ua mama ma agavaa o ia.

E faapefea ona maua e se faifeautalai le mana faaleagaga o loo ia manaomia ina ia manuia ai [lana galuega]?

O le taimi muamua lava faatoa taunuu mai ai faifeautalai i le galuega, e masani ona latou le maua le talitonu o le tagata ia te ia lava. Ona matou tuu faatasi lea o i latou ma ni soa lelei, ma e aoaoina i latou e na soa lelei i le faiga o le galuega faafaifeautalai. I ni nai masina ua faatumuina i latou i le Agaga. E faatumulia i latou i le olioli lea e maua mai le aumaia o agaga ia Keriso. Latou te malamalama o loo latou fesoasoani i le Tama Faalelagi ma le Faaola i le galuega taua o le faaolataga. A oo ina latou iloaina lena tulaga, e avea i latou ma ni faifeautalai sili ona faamanuiaina.

O lenei faamamanaina e oo mai i lo latou usiusitai, faamaoni, galue malosi, ma le naunautai. Afai latou te le usiusitai, afai latou te le galulue malosi ma faia le mea sili latou te iloa i aso uma, o le a latou le maua le aafiaga e tasi e pei o i latou o e faasusuluina le agaga o le talalelei.

Tou te silafia, e tele taimi ou te fesili ai i tagata fou liliu mai po o anafea na latou iloa ai mo le uluai taimi e moni le Ekalesia. E le o se mea fou lo latou faapea mai, “Na ou iloaina e moni le Ekalesia ina ua aoaoina au e alii po o tamaitai faifeautalai ma lagona ai le mana o la latou talitonuga ma vaaia ai le susulu o o latou foliga.” Afai e te le galue ma le malosi ma le naunautai, o le a le tutusa le agaga; o le a le faamamanaina lau auaunaga faafaifeautalai e pei ona tatau ona i ai pe afai e te [galue malosi ma le naunautai].

O a faamanuiaga e oo mai ia i latou o e auauna atu i misiona?

O faifeautalai faamaoni o e faia le mea sili latou te mafaia, latou te aoaoina lesona taua pe sili atu foi ona taua nai lo se isi lava mea e mafai ona latou aoaoina mai aoaoga i le iunivesite. O le a ou tuuina atu se faataitaiga. E aoaoina e faifeautalai auala e fesootai atu ai i tagata, auala e talanoa ai i tagata, auala e fesoasoani ai i tagata. Pe o le a avea i latou ma ni fomai, loia, faioloa, po o se isi lava mea, o le mafai ona fesootai atu i tagata e mafai ona avea ma eseesega i le va o le faamanuiaina pe leai foi i lena galuega.

O se faamanuiaga maoae lona lua o le mautu lea o faifeautalai i aoaoga faavae o le moni o le Togiola. O le a oo atu ia i latou se alofa ma le faamaoni i le Alii o Iesu Keriso lea o le a matua faamanuiaina ai i latou ma o latou aiga i le olaga nei ma faaauau ai i le faavavau. O aafiaga faaleaoaoga e sili ona mamana e mafai ona tatou maua pe a tatou aoaoina se isi tagata. Ma o le mea lena e faia e faifeautalai. Latou te tofatuina i totonu ia i latou aoaoga faavae; latou te tofatuina i totonu ia i latou le moni o le Togiola. Ma o lenei mea o le a faamanuiaina ai i latou i o latou tiute faale-Ekalesia uma i le lumanai.

O le isi faamanuiaga maoae o le, a o aapa atu faifeautalai e laveaiina ma toso mai i le malamalama o le talalelei aiga o e o loo feofeoai pea i le pouliuli, latou te vaaia ai tulaga latou te le mananao e tupu i o latou lava olaga. O aafiaga e faamaninoina ai mo i latou tulaga faatauaina latou te mananao e ola ai, le ituaiga aiga latou te mananao i ai, le auala latou te mananao e aoao ai a latou fanau, ma sini latou te manaomia ina ia mafai ona latou maua ai faamanuiaga folafolaina o le malumalu. O se misiona o le aoga sili atu ona maoae i le lalolagi.

Tou te silafia, ua faafia ona saunoa mai Peresitene Gordon B. Hinckley, o lana misiona o le faavae lea o lona olaga auauna atu. Na te faafetaia lana misiona mo le tuuina o ia i le auala na aumaia ai o ia e taitaia le Ekalesia. Ou te manatu o le a outou ioeina o loo ia faia lea i se auala mataina.

Ua tatou i ai i se taimi i le talafaasolopito o le Ekalesia ua tatau ai i alii ma tamaitai talavou i le lalolagi atoa ona tutulai ma auauna atu o ni faifeautalai. E le mafai ona latou manatu ifo ua lava tagata talavou i le Iunaite Setete e faia mea uma ua manaomia e le Alii. Ua Ia manaomia le autalavou i soo se mea ua faatuina ai le Ekalesia ina ia sauniuni i latou lava e aumai agaga ia te Ia. A o latou faia lea, o le a latou faamanuiaina le lalolagi atoa ma aumaia faamanuiaga o le lagi ia i latou lava ma o latou aiga i le olaga lenei ma le faavavau.

Ae Faapefea Pe Afai E Le Mafai Ona E Auauna Atu Faamisiona?

O alii ma tamaitai talavou e ogaoga tulaga le atoatoa faalemafaufau, faalelagona, po o tulaga e faatapulaaina faaletino ua faatagaina e le auai i le auaunaga faafaifeautalai. E le tatau ona latou lagona le tausalaina i lena mea. E tutusa lava lo latou taua ma le faapitoa i le Ekalesia e pei lava e mafai ona latou o atu i le misiona.

Ae e ui e le mafai ona latou auauna atu faamisiona, ae mafai ona latou faaaogaina avanoa uma e saili ma fesoasoani ai i tagata ina ia auai i le Ekalesia. E mafai ona avea i latou ma faifeautalai o tagata o le ekalesia i le kolisi, i le galuega, ma o latou vaiaai. E tatau ona latou agai i luma, ia maua ni olaga manuia ma tumu i aafiaga mananaia, ma fesoasoani e fausia le malo i soo se mea latou te i ai. E le o Aposetolo uma o loo auauna atu i le aso na mafai ona auauna atu faamisiona i lo latou talavou, o nisi ona na manaomia i latou e auauna atu i le militeli. Ae na latou faia uma lava galuega faafaifeautalai. Sa latou aumaia uma lava ni tagata i totonu o le Ekalesia.

Ua uunaia taitai Perisitua ina ia fesoasoani i alii ma tamaitai talavou faamaoni ma amiotonu uma ia auauna atu. Mo se faataitaiga, e mafai ona latou fesoasoani i le epikopo o ni faifeautalai a le uarota. E mafai ona latou galulue i se faleteuoloa a le epikopo. Afai latou te nonofo latalata i se malumalu, e mafai ona latou auauna atu i le tele o auala iina. E manaomia tau lava o le mafaufau o taitai Perisitua i ni auala ma agai loa i luma.

Elder M. Russell Ballard o le Korama a le Au Aposetolo e Toasefululua.