Faamatalaga

O Le Mekasini e Aumaia le Filemu ma le Lotogatasi

Matou te faafetai tele mo le Liahona. Ua matou matauina e aumaia ai le filemu i o matou agaga ma le lotogatasi i mafutaga faaleaiga. Matou te faaaogaina o se tusitala aua matou te fiafia e faitau tala moni ia matou fanau i taimi o le a momoe ai. O se faamanuiaga maoae le i ai o savali faigofie o le talalelei toefuataiina ua mafai ona maua i lenei mekasini manaia.

Aiga o Cazorla, Sepania

Molimau o le Faatuatua

Ou te faafetai i le Tama Faalelagi mo lenei mekasini ofoofogia, o le Liahona. E ala i lenei tusi ua tatou maua ai molimau o le faatuatua mai le lalolagi atoa. O lenei fesootaiga mai o tatou uso ma tuafafine i le lalolagi atoa e faamalosia ai i tatou faaleagaga.

Ilka Odierno, Pasila

Tausia Faapelepele o le Faaipoipoga

Ou te fia faafetai atu ia te outou mo le lomiaina o lauga o le konafesi aoao i le kopi o Me 2006, ae maise lava le savali a Elder Russell M. Nelson, “Faafaileleina o Faaipoipoga.” Na ma faaipoipo ma Aleth i le tausaga ua tea i le Malumalu o Manila Filipaina. Ua faamanuiaina i maua, ae ma te feagai foi ma lu’itau ia e oo i ulugalii uma. O le savali a Elder Nelson ua faamanatu mai ai ia i maua le matagofie ma le paia o le faaipoipoga. Na ia aoao mai ia i maua auala e faamalosia ai le ma faaipoipoga, faapelepele i ai, ma tausia ia faavavau. Na matuai fetaui lelei lana savali. Ou te faafetai mo Aposetolo ua valaauina e le Alii mo o tatou aso.

Alberto Reuben C. Reyes, Filipaina

Faamalosia ai Lo’u Malamalamaaga

Ou te fia faaali atu la’u faafetai mo i latou o e o loo mafai ona aumaia le Liahona, faapea foi ma i latou o e faasoa mai a latou tala patino. E faapitoa lava ona ou faafetai i le Tala Faamamai o le Talalelei mai ia Peresitene Hugh B. Brown, “O Le Talaaga o se Perofeta” (Iuni 2006). Ua faamalosia e lona aafiaga lo’u malamalamaaga o le talalelei a Iesu Keriso ua toefuataiina i o tatou aso ma o Lana Ekalesia lenei, ua faatulagaina i lalo o Lana taitaiga e ala mai i le Perofeta o Iosefa Samita.

Herwin A. Pado, Filipaina

Faamoemoe, Lototele, ma le Malosi Faaleagaga

Ua 73 o’u tausaga, ou te alofa tele i lo tatou perofeta ma le au Pulega Aoao uma ma taitai o le Ekalesia i le lotoifale faapea ma o’u uso ma tuafafine uma lava i lenei lalolagi. Ou te faafetai faapitoa ia te outou o e tuuina atu outou lava i le sauniaina o savali matagofie o le Liahona, ia o loo auina mai ia i matou i masina taitasi. Latou te aumaia ia i matou le faamoemoe, lototele, ma le malosi faaleagaga e fetaiai ai ma fesouaiga o le olaga.

Otília Pereira, Potukale

O se Faamafanafanaga

E le pei o se isi lava mekasini, e aoaoina a’u e le Liahona. O tala e musuia ai a’u e faia pea mea lelei. O nisi taimi o le faitauina o le Liahona e faamafanafanaina ai a’u pe a matua ootia lo’u loto ma ou faanoanoa tele. E fesoasoani ia te a’u e foia ai tofotofoga ma faaosoosoga, ma faamautuina ma faatumauina a’u i le tausia o poloaiga a le Atua.

Beeny Mayang, Filipaina