Taimi o Fetufaaiga

Taumafai, Taumafai, Taumafai

Saunia e Elizabeth Ricks

“Ina mulimuli mai ia ia te a’u, ma faia mea ua outou vaavaai mai ai ia te au ua ou faia” (2 Nifae 31:12).

I le tele o tausaga ua mavae na faia ai e tagata ni togalaau mataina lavelave e faafiafiaina ai a latou uo. Na latou salaina laau ina ia faia ai se auala lea e mafai ai e isi ona savavali ma tafafao ma taumafai e saili le auala e agai i fafo. E toatele tagata e fiafia e savalivali i totonu o nei togalaau lavelave. O isi i nisi taimi e fememeai i totonu o auala, ae latou te fiafia pea i le savaliga manaia ma iu lava ina maua le auala e agai ai i fafo. Na manaomia lo latou taumafai, taumafai, taumafai pea. O loo i ai pea togalaau lavelave, ma e fiafia lava tagata asiasi e feuiai ai i totonu.

E pei lava ona sueina e tagata asiasi o latou auala i totonu o togalaau lavelave e ala i le faia o filifiliga i magaala uma o le auala, o i tatou foi taitoatasi e sueina o tatou auala i le olaga. O aso uma tatou te faafeagai ai ma filifiliga. O nisi o filifiliga e le taua. Atonu e le afaina pe afai e te ofuina se ofutino lanumoana pe lanumumu. Ae o le tele o filifiliga e taua. A e faafeagai ma se filifiliga pe ta’u le mea moni pe ta’u se pepelo, e taua le ta’u o le mea moni.

Mo filifiliga taua, e mafai ona e faia le filifiliga sa’o pe a e fesili ia te oe lava, “O le a le mea e faia e Iesu?” A tatou taumafai e pei o Iesu—pe a tatou taumafai, taumafai, taumafai pea—o le a tatou faia le mea sa’o. Na faia e Iesu i taimi uma lava le mea sa’o. E tuputupu ae lo tatou faatuatua pe a tatou mulimuli i Ana faataitaiga.

Gaoioiga

Faaaoga ou tamatamai lima, e lolomi ai se auala i totonu o le togalaau lavelave. Soo se taimi lava e te oo mai ai i se filifiliga, fuafua po o le a le filifiliga e faia e Iesu. Amata i le “Fanau mai,” mulimuli i faataitaiga a Iesu seia e oo i le “Ola e Faavavau.”

Manatu Faaopoopo mo Taimi o Fetufaaiga

1. Faamalamalama atu o le mulimuli i faataitaiga a Iesu o le a fesoasoani ia i tatou e toe foi atu ai i le afioaga o lo tatou Tama Faalelagi. Fesili i tamaiti po o le a le mea e ta’u o le faataitaiga, ma tuuina atu ni faamatalaga faataitai. Mo se faataitaiga, atonu e maua e se faiaoga le tali i se fesili i le matematika e faaali atu ai i tamaiti aoga pe faapefea ona sue tali o isi fesili. O se taitai taaloga soka atonu na te kikiina se polo e faaali atu ai le auala e kiki ai. Faamalamalama atu o le mulimuli i faataitaiga a Iesu e mafai ona fesoasoani ia i tatou e faia ai filifiliga sa’o. Saunia ni faatusa e aoao ai (tagai “Faatusa e Aoao Ai,” O Le Aoao Atu, E Leai Se Isi Valaauga e Sili Ai [1999], 170) o tulaga moni o le olaga. Tuuina atu faatusa e aoao ai se tasi i vasega taitasi, ma tuu atu ia i latou e talanoaina le faafitauli. Fai atu i tamaiti e foia le faafitauli e ala i le fesili ifo, “O le a le mea ou te faia pe afai ou te mulimuli i faataitaiga a Iesu?” Tuu atu i vasega taitasi e lipoti mai auala e mafai ona latou mulimuli ai ia Iesu. Faamalamalama atu ina ia pei o Iesu, e tatau ona tatou taumafai. O le taumafai o le ki lea. Molimau atu o le mulimuli i faataitaiga a Iesu o le a manaomia ai le taumafaiga, ma o le a faafiafiaina ai i tatou.
2. Ia valaaulia le epikopo po o le peresitene o le paranesi (po o se isi sui o le au epikopo po o le au peresitene o le paranesi) e faaali atu i tamaiti se laisene avetaavale. (So o se ituaiga o laisene, e pei o se laisene fagota po o se laisene faaipoipo, e aoga foi.) Tuu atu ia te ia e faamatala tulaga manaomia e tatau ona ia ausia ina ia maua ai lona laisene. Ona tuu atu lea ia te ia na te faaali atu se fasi pepa e sili atu ona taua: o lona pepa faataga o le malumalu. Fai atu ia te ia e faamatala atu i tamaiti nisi o mea e manaomia ona latou faia e maua ai se pepa faataga o le malumalu. Saunia ni nai fasi pepa e tusia ai mataupu faavae o le talalelei e tatau i se tasi ona ola ai ina ia mafai ai ona alu i le malumalu, ma ni laasaga. Mo se faataitaiga, “E te tausia le Upu o le Poto—me’i i ni faasitepu se lua.” Tuu se ata o le malumalu i puipui uma. Tuu atu i ni tamaiti se toafa e amata i le ogatotonu o le potu, ma tuu atu i tamaiti [e toafa] e agai atu i malumalu eseese. (Faamalamalama atu e le o se tauvaga lenei. E te manao i tamaiti uma lava ina ia taunuu atu i le malumalu.) Ia filifili e tamaiti taitoatasi se fasi pepa, faitau le mataupu faavae, ma me’i i le numera o faasitepu o loo ta’u mai ai. A oo atu tamaiti taitasi i le malumalu, fai atu i ai e tilotilo i tua o le ata mo le igoa o se pese. Usu le pese, ma faaauau le taaloga. A uma ona outou usuina pese uma, ia faamalosiau atu i tamaiti ina ia ola agavaa e ulufale atu i le malumalu.