O Le Tautala i le Gagana a le Agaga
I le avea ai ma faifeautalai i le Misiona o Atenitina Buenos Aires i Saute, na ma maua ai ma la’u soa, o Elder Allred, se kata o igoa e faailoa mai o se aiga mai Rusia. Ina ua ma mauaina le fale, na iloa e le tamaitai o i maua o faifeautalai ma sa valaaulia i maua e feiloai atu i lona aiga.
Na vave ona ma iloa o le aiga o Balva e itiiti lava so latou malamalama i le faaSipaniolo, ma na faigata ia i maua ona malamalama lelei ia i latou. Mai la latou faaSipaniolo taupanupanu, na ma iloa ai e le’i leva ona i ai i latou i Atenitina ae na naunau lava e aoao e uiga i le Ekalesia. Na ma fetuunaia le lesona muamua i le faaSipaniolo faigofie, ma na faaaoga foi e le aiga a latou lomifeifiloi e lua faaRusia-faaSipaniolo a o ma aoao lemu atu la maua savali, ae ma te lei mautinoa po o le a se tele o mea o loo latou matua malamalama i ai.
Ina ua maea ona faatulagaina le aso ma te toe foi atu ai, na ma savavali loa i le fale, ma talatalanoa i le faigata o le tau faamalamalamaina atu o le ma savali. Na ma manatunatu pe o le a mafai faapefea ona sili atu se malamalama o le aiga i isi lesona pe o le a latou le mautonu ma faapea mai ia i maua e aua ma te toe o atu.
Na ma foi atu e asi le aiga o Balva i le aso na sosoo ai po o a mai i latou ma pe ua amata ona latou faitauina le Tusi a Mamona ma tatalo e iloa ai le moni. Na faateia i maua ma le olioli tele, ina ua latou faaali mai ia i maua ma le fiafia se pepa na latou tusia ai i le faaSipaniolo mataupu faavae na ma aoaoina ai i latou. Na latou faasoa mai foi ia i maua mea na latou faitauina i le 3 Nifae 11 e uiga i le asiasiga a le Faaola i le konetineta o Amerika, ma faamautinoa mai ia i maua ua latou malamalama i mea uma na matou talanoaina i le aso muamua ma ua latou matua fiafia e aoao atili.
I ni nai vaiaso na sosoo ai na faamalosia la’u molimau a o molimau atu le Agaga Paia i le aiga o Balva i le moni o le talalelei ma faapupulaina lo latou malamalama i le faaSipaniolo. Na silafia e le Tama Faalelagi manao o o latou loto ma silafia ai le naunautai o a latou tatalo ia iloa le upumoni. Na matou lagonaina faatasi ma le aiga o Balva, ma Elder Allred le olioli o loo faamatalaina i le MFF 50:22: “O lea, o lē talai atu atoa ma lē talia mai, e malamalama le tasi i le isi, e faamanuiaina ma olioli faatasi i laua uma”— e le faapea ona ua matou tautatala i le gagana e tasi ae ona o le gagana lautele o le Agaga Paia.
Na faailoa atu i maua e le aiga o Balva i se isi aiga Rusia, o e na ma maua foi le avanoa e aoao ai. Na osia e aiga e lua feagaiga ma le Tama Faalelagi i le ulu ifo lea i le vai o le papatisoga i se taimi e lei mamao talu ona matou feiloai.
O a’u o se molimau e moni le saunoaga a Peresitene Ezra Taft Benson (1899–1994): “O le uunaiga a le Agaga o le elemene aupito sili lea ona taua i lenei galuega. Afai o le a e faatagaina le Agaga e faalauteleina ou valaauga, o le a mafai ona e galueaiina vavega mo le Alii” (semina a peresitene fou o misiona, 25 Iuni 1986).