E Le Taitai Tuai
A o ou auauna atu i se misiona i lo’u nuu o Ekuatoa, o se tasi aso na i ai so’u lagona patino lava o loo i ai se tagata faapitoa o loo faatalitali mo i maua—o se tasi o le a taliaina le talalelei.
A o ma savavali atu ma la’u soa, na ma oo atu i se fale faatauvaa lava. Sa laufofoga fiafia le ataata mai ia te a’u o se tamaitai matua lava, masalo e 80 ona tausaga. Na ou ataata atu foi ia te ia. Na ou sauni ou te savali pea, ae na matua fiafia le tamaitai e vaai mai ia i maua. E i ai se mea na ta’u maia ia te a’u ia ou tu iina.
O le toatele o tagata i lena taulaga itiiti e le mafai ona faitau tusi pe tusitusi, o lea na ou fesili ai ia te ia pe mafai ona ia faitau. O lana tali naunautai o le ioe. Na faafuasei ona faatumulia a’u i le fiafia tele. Na ou lagona o le tagata lea o loo finagalo le Alii ma te aoaoina. Na ou aumaia se Tusi a Mamona mai la’u ato ma faaali atu ia te ia. Na faateia a’u ina ua amata ona ia faitau leotele mai le itulau muamua e aunoa ma se matatioata. Na ou fesili ia te ia pe manao i le tusi, ma na toe tali mai foi ioe. Na susulu mai le fiafia i ona fofoga vaivai—o fofoga ua leva ona sailiili mo se olaga sili atu.
Na amata ona ma aoaoina o ia i le talalelei, ma na molimau atu le Agaga ia te ia i lona moni. Na faatumulia lo’u loto i na lagona alofa.
A o faaiuina le ma lesona, na ou faaali atu ia te ia le mataupu 11 o le 3 Nifae, lea e faamatala ai le asiasiga a Iesu Keriso i Amerika. Na ia tautino mai o le a faitau i ai. Na ia faailoga le itulau ma sogi i le tusi, ma susulu i le olioli e le mafaamatalaina.
Na ma faia isi asiasiga i la ma tagata sailiili fou, ma na matua faafiafiaina i maua ina ua ma iloa ua maea ona ia faitauina mea uma na ma tuuina atu ia te ia. A maea ana galuega i aso uma, ona ia faitauina lea o le Tusi a Mamona e oo lava i le leva o le po. Na amata foi ona auai atu o ia i le lotu, e ui lava e lua itula e savali lemu atu ai o ia i le falelotu. O ona lagona e uiga i le Tusi a Mamona ma Iesu Keriso na vave ma loloto ona tuputupu pea. Ina ua maea ona ia faalogo i lesona uma a faifeautalai, na manao loa o ia e papatiso ma totogi le sefuluai.
O ni faamanuiaga maoae na maua e lenei tina pele! Na saunia lona loto e mulimuli i le Alii, ma na taitaiina i maua e Lona Agaga ia te ia. Na ia aoao mai ia i maua e uiga i le alofa, lototele, ositaulaga, olioli, ma le usiusitai. E sili i mea uma lava na ia aoao mai ia i maua e le taitai tuai ona fai se suiga.