O Meaalofa e Aumaia i le Aiga mai le Misiona

Saunia e Peresitene Gordon B. Hinckley

I ni nai tausaga ua mavae na ou i ai i se malaevaalele ma sa ou feiloai ai i ni faifeautalai ua foi mai le misiona. Na i ai iina o latou aiga. Na latou o atu e aumai a latou ato, ma sa ou fai atu i se tasi o i latou, “O a nei mau mea ua e aumaia?” Na ia faapea mai, “O meaalofa ua ou aumaia mo lo’u aiga.” Ma o lena ua aumaia ai ia te a’u le autu ou te fia talanoa i ai: “O Meaalofa e Aumaia i le Aiga mai le Misiona.”

1. O se malamalama ma le alofa mo le Atua lo tatou Tama Faavavau ma Lona Alo Pele, o le Alii o Iesu Keriso.

“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3). E leai se meaalofa e sili atu e oo mai i se tasi i lenei lalolagi nai lo se tautinoga maumaututu ma le mautinoa e faapea, o loo soifua le Atua, lo tatou Tama Faavavau, ma o Iesu o le Keriso. Ou te talitonu i lena mea. Ou te manatu e matuai taua tele lava.

2. O se malamalama ma le fiafia i tusitusiga paia, o le afioga a le Alii.

I le avea ai ma se faifeautalai, ou te faitau ai i afiafi taitasi ae ou te lei moe ni nai mataupu o le Tusi a Mamona, ma o iina na oo mai ai i lo’u loto se tautinoga maumaututu, lea e le’i toe alu ese lava: e faapea o le afioga lenei a le Atua, na toefuataiina mai i le lalolagi i le mana o le Silisili Ese, na faaliliuina i le meaalofa ma le mana o le Atua i le faatalitonuina o Iutaia ma tagata o Nuuese o Iesu o le Keriso. Ou te faafetai i le Alii mo le molimau ua ou maua i le moni o le afioga a le Atua e pei ona i ai i totonu o nei tusi paia ua faaalia mai. Ma ou te faamoemoe o faifeautalai uma o le a tuua lana misiona na galue ai ma se tautinoga maumaututu i lona loto e moni nei mea.

3. O se alofa faateleina mo matua.

Ua ou auai i le faitau fiaselau o fonotaga a faifeautalai i le tele o tausaga. Ou te fiafia lava e faalogo i faifeautalai o tautalagia lo latou alolofa mo le Alii, ae ou te fiafia foi e faalogo atu ia i latou o tautalagia ma le agaga talisapaia ma le alofa e uiga i o latou matua. O alii o e na le popole ma manatu faatauvaa, e tulai ma loimata ma faafetai i le Alii mo o latou tama ma tina. I aso nei, o se faamanuiaga le faalogoina o se alii talavou malosi o tulai ma tautala atu ma ni lagona taua e faatatau i lona tama ma lona tima, ma tau mai mea na semanu na te le tautalagia lava muamua i lona olaga atoa. E tatau i alii ma tamaitai uma lava ona foi mai i le fale ma se alofa faateleina mo matua.

4. O se alofa i tagata latou te galulue ai.

Ou te alofa i tagata Peretania. E le mafai e se tasi ona faitioina tagata Peretania i lo’u mafaufau aua sa ou galue faatasi ma i latou, sa ou nofo faatasi ma i latou, sa ou i ai i o latou aiga i talaane o a latou afi mafanafana, na ou malamalama i o latou loto, ma ou iloa ai ona alofa ia i latou.

Ua mafai ona ou alofa i tagata o Asia. Sa ou nofo ai mo le 11 tausaga faatasi ma i latou, ma ou te alofa ia i latou. Ia te a’u, ou te alofa ia i latou e pei lava ona ou alofa i soo se isi lava ona o aafiaga na ou maua o se faifeautalai, e pei ona i ai, faatasi ma i latou.

O loo i ai se tulaga faaletonu pe afai e le foi mai se faifeautalai ma se alofa maoae mo tagata sa ia galue ai.

5. O se agaga talisapaia o le galue malosi.

E tatau i faifeautalai uma ona ia iloa o le galue, galue, galue o le ki lea i le faataunuuina o mea uma, o le ki i le manuia i le olaga. E leai se mea e suitulaga i le galue, ma le nofo i luga i le taeao ma amata ona galue, ma faaauau pea ona galue ina ia faamaeaina le galuega. Ou te le iloaina se aseta e sili atu mo mea o le a oo mai o le olaga nai lo le mafai ona pulea e le tagata ia lava ina ia galue.

6. O le faamautinoaga e faapea, e mafai ona maua e i tatou uma musumusuga a le Agaga Paia pe a tatou ola ai mo le mauaina.

O le i ai o musumusuga—o i tatou taitoatasi, pe afai tatou te ola ia maua, afai tatou te saunia i ai, e mafai ona mauaina. Ou te fiafia i nei upu maoae o faaaliga, o nei upu o folafolaga: “O le a tuuina atu e le Atua ia te outou le malamalama i lona Agaga Sa, ioe, i le mea alofa le matalatalaina a le Agaga Paia” (MFF 121:26). Oka se meaalofa taua e aumai i le aiga—o le faamautinoaga, o le moni afai tatou te ola ai ina ia tatou mauaina, o le a avanoa mo i tatou lena meaalofa lea e oo mai i le mana o le Agaga Paia.

7. O se malamalamaaga i le taua o le galulue faatasi.

E leai se tasi e mafai ona faia toatasi lenei galuega. Tatou te galulue i ni soa. “E mautu upu uma i le mau a le toalua po o le toatolu” (2 Korinito 13:1). Tatou te galulue faatasi. E leai se avanoa mo tagata le taupulea i totonu o le misiona. O a tatou taumafaiga e tele lava o taumafaiga fai faatasi, ma o se mea ofoofogia le aoao ai e galulue faatasi ma isi tagata.

8. O le taua o le mama o le tagata lava ia.

Ou te manatu e leai se mea sili atu e faatatau i le faamaoni i le lumanai e mafai ona aoaoina e se faifeautalai nai lo le taua o le mama o le tagata lava ia. Ou te manatu e itiiti lava ni nai upu e sili atu nai lo le folafolaga o loo tuuina mai i lalo o le musumusuga a le Alii e pei ona faatuina mai e le Perofeta o Iosefa Samita: “Ia teuteuina ou manatu i le mama e le aunoa.” O le poloaiga lena. Ona oo mai lea o le folafolaga: “Ona malosi ai lea o lou faatuatua fai ifo i luma o le Atua” (MFF 121:45). O le folafolaga lena ia i latou o e savavali i le mama.

9. O le faatuatua e galue ai.

“Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala … ia mafai ai i latou ona fai le mea ua ia poloaiina ai i latou” (1 Nifae 3:7).

Tatou te talosagaina mea faigata mai faifeautalai. E matua faigata lava mo tagata talavou matamumuli ma le mautonu ona faia mea tatou te talosagaina i latou e faia i nisi o taimi. Ae o se mea ofoofogia lo latou taumafai [e faia]. Ua ia i latou le faatuatua e faia ai, le faatuatua e galue ai, le faatuatua e agai ai i luma ma faia se taumafaiga. Ma o se meaalofa ofoofogia lena e aumaia i le aiga.

10. O le lotomaualalo e tatalo ai.

Ia iloa o loo i ai se mana e sili atu nai lo lo tatou [malosi], ma e tusa lava po o le a le lelei o se tagata, e le lava lona lelei, e tusa lava po o le a lona atamai, e le lava lona atamai, e tusa lava po o le a lona malosi, e le lava lona malosi mo mea uma o le a faafeagai ma ia i le olaga, ma o loo i ai se punavai o le mana lea e mafai ona alu atu ai ma le mautinoa o le a faafofogaina o ia ma o le a i ai se tali.

O meaalofa nei e 10 ou te faamoemoe o le a aumaia e alii ma tamaitai faifeautalai—e le o mea ilaila e tele, e le o pepe taalo e tele, e le o ni solovae po o fulufulu manu po o ofu po o ipu se tele, ae o nei mea taua, tumau, ma matagofie. Ia faamanuia outou e le Atua ina ia taofimau ai i le faatuatua, ma a o faia faapea, ia fiafia ai ma le olioli tele i lena galuega ua valaauina outou e faia.

Mai se lauga na tuuina atu i se semina mo peresitene fou o misiona i le aso 24 o Iuni 1983.