Savali a Faiaoga Asiasi

Avea ma Tufugaaao o le Atua e ala i le Faalogo atu ma Mulimuli i Uunaiga a le Agaga

Faitau ma filifili ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

E faapefea Ona Ou Lagonaina Uunaiga a le Agaga?

MFF 8:2: “O le a ou faaali atu ia te oe i lou mafaufau ma lou loto i le Agaga Paia, e oo atu ia te oe ma o le a tumau i lou loto.”

Elder Robert D. Hales o le Korama a le Au Aposetolo e Toasefululua: “O le Agaga o le Atua … e filemu e pei o se musumusu, e oo mai o se mafaufauga i o tatou mafaufau po o se lagona i o tatou loto… . Filifili e tuu oe i se tulaga e maua ai ni aafiaga ma le Agaga o le Atua e ala i le tatalo, suesueina o tusitusiga paia, i sauniga lotu, i lou aiga, ma fegalegaleaiga atoatoa ma lelei faatasi ma isi” (“E Filifili Mo I Tatou Lava: O Le Meaalofa ma Faamanuiaga o le Saolotoga,” Liahona, Me 2006, 6–7).

Peresitene Boyd K. Packer, Sui Peresitene o le Korama a Aposetolo e Toasefululua: “Ia tuu fesili faigata i le pito i tua o outou mafaufau ma ia faaauau pea o outou olaga. Ia mafaufau loloto ma tatalo le leoa ma faifaipea e uiga i ai. Atonu o le a le oo mai le tali e pei o le emo o se uila. Atonu e oo mai o se musumusuga itiiti iinei ma si mea iina, o ‘lea fuaiupu ma lea fuaiupu, o lea mataupu ma lea mataupu’ (MFF 98:12). O nisi tali e oo mai mai le faitauina o tusitusiga paia, o nisi e mai le faalogologo i failauga. Ma, i nisi foi taimi, pe a fai e taua, o nisi o le a oo mai o ni musumusuga tuusa’o ma le mamana” (“Prayers and Answers,” Ensign, Nov. 1979, 21).

Elder Henry B. Eyring o le Korama a Aposetolo e Toasefululua: “Tusi i lalo a outou uunaiga loloto po o manatu tou te lagona na oo mai mai le Atua… . Mafaufau ma le totoa pe o le upumoni na e mauaina e manaomia se faatinoga. O le usiusitai i poloaiga tatou te agavaa ai mo isi faaaliga o le upumoni ma le malamalama” (“A Life Founded in Light and Truth,” Ensign, Iulai 2001, 13).

E Mafai Faapefea ona Faalauteleina Au e le Agaga ina ia Avea ma Tufugaaao o le Alii?

Eliza R. Snow (1804–87), sa avea ma peresitene aoao o le Aualofa: “Pe a faatumulia outou i le Agaga o le Atua, … e faamalieina ma faatumuina e lena [Agaga] manaoga uma o le loto o le tagata, ma faatumuina lagona gaogao uma. Pe a faatumulia a’u i lena agaga e faamalieina lo’u agaga… . O le a tuuina atu e le Agaga o le Atua aoaoga i o outou mafaufau, ma o le a outou tuuina atu i isi… . Ia manatua o outou o le Au Paia a le Atua; ma o loo i ai ni a outou galuega taua e faatinoina i Siona” (Woman’s Exponent, Set. 15, 1873, 62).

Elder M. Russell Ballard o le Korama a Aposetolo e Toasefululua: “O tamaitai … o e mafai ona faalogo i le siufofoga o le Alii, ma tali atu i na uunaiga, e avea ma meafaigaluega anagata i Ona aao… . Aua lava nei outou masalomia le matua taua o a outou faatosinaga i le tausiga o le aiga ma le fesoasoani atu i le tuputupu ae malosi faaleagaga o le Ekalesia” (“O Tamaitai o le Amiotonu,” Liahona, Tes. 2002, 42).

Bonnie D. Parkin, peresitene aoao o le Aualofa: “Afai tatou te ola i le Agaga, afai o tatou saili i le Alii ma Lana taitaiga, afai o tatou taumafai e toe foi atu i lo tatou Tama i le Lagi, o le a oo mai na taimi matagofie. Ma o le a tatou faatauaina, aua ua avea i tatou ma tufugaaao o le Atua” (“O Taimi Taua,” Liahona, Nov. 2005, 108).