O Le Agaga Muamua o Agaga e Afe
Na ma auauna atu ma la’u soa i le Misiona o Iapani Fukuoka, ma na ma galulue i se eria e taua o Kasuga, e tu latalata i le Kumamoto Station. O tagata o e na nonofo i lenei eria na matua le talitonu e uiga i mataupu faalelotu. Ae i le iloa ai o lenei mea, na saunoa mai ai le matou peresitene o le misiona, “E faitau afe tagata o loo i Kumamoto o e ua saunia e le Alii. Faamolemole saili i latou.”
I se tasi aso timu lava na ma filifili ai e taumafai e saili Noboru Yamagata, o se tagata lotu le toaga ma te lei feiloai lava i ai. I le ma agai atu i lona fale, na ma iloa atu ai se faaaliga na faitauina: “E sa talaiga faalelotu”— o se lapataiga taatele lea i le aganuu a Iapani. Ae o le usitaia o uunaiga a le Agaga, na ma tuitui ai i le faitotoa.
Na tatala mai le faitotoa e le tina o Uso Yamagata ma tau mai ia i maua o lana tama o loo malaga ese ma le taulaga. Na ia faapea mai e fiafia o ia i soo se isi e fesootai ma lana tama, e tusa ai ma le aganuu a aiga Iapani, ma sa ia valaauliaina i maua e o atu i totonu. Ae ui lava i ona uiga faaalia talimalo, na i ona foliga se vaaiga taufaamata’u.
A o ma nonofo i lalo, na ia lapatai mai, “Ou te le fia faalogo i se mataupu faalelotu.” Ona amata loa lea ona talanoa e uiga ia te ia ma faailoa mai le malosi o ona lagona e uiga i mataupu taua faapitoa i lona olaga.
Na ma tete’i ina ua ia talanoa e uiga i le faatuatua, alofa, ma Faaamuia, ma na ma avea lena avanoa e tau atu ai ia te ia o nei mataupu faavae e taua foi ia i maua. Na ma faamatala atu le faaaliga mamalu lea na oo mai ona o le faatuatua o Iosefa Samita, ma na ma faamatala atu le taua o le Tusi a Mamona i le Toefuataiga o le talalelei.
Na manaia le vaaia o le suiga na oo ia Mrs.Yamagata a o ia faalogologo i le ma savali. Na maligi ona loimata a o ma molimau atu i le paia o Iesu Keriso ma le Toefuataiga o le talalelei e ala ia Iosefa Samita. Na ia tali mai, “O Iosefa Samita o se tagata manuia.”
Ina ua ma faamavae, na susulu ona foliga ma tiotio ona fofoga i le fiafia. Sa ia faapea mai, “Faafetai lava mo le oo mai i lenei aso. Atonu na taitai mai oulua e la’u tama ia te a’u.” Na matou faatalofa, ma tala ula mai, “O le a le fufuluina lo’u lima i le aso!”
A o ma savavali atu i le fale na ma iloa o lenei tamaitai o se tasi lea o tagata na saunoa mai ai lo matou peresitene o le misiona ua saunia e talia le talalelei. Na manino lava, na saunia e le Agaga lona loto mo la maua savali, ma na ma iloa o ia o le agaga muamua o agaga e afe e tatau ona matou sailia.