Uo i le Uo
Uo Faifeautalai
“Alu e talai atu lana Talalelei i le fanauga a tagata” (Mose 8:19).
Na ou ola a’e ma auai faamaoni ma lo’u aiga i le Ekalesia Katoliko. Na matou auai i le lotu ma gaoioiga faalelotu i taimi uma, ma na matou tatalo o se aiga i afiafi uma i le fale. I lo’u olaga faatama, na fesoasoani a’u uo faalelotu ia te a’u e faia ni filifiliga lelei.
Ina ua iva o’u tausaga, na avea a’u ma tama faitaulaga. O tama faitaulaga i le Ekalesia Katoliko e fesoasoani i le patele i tapuaiga i le lotu i le Aso Sa, e taua o Misasa. O o’u uso ma le toatele o a’u uo na matou auauna faatasi—o se avanoa maualuga lea mo i matou. Matou te tutuina moliga’o i le fata faitaulaga, ma tatala ma le faaeteete ofutalaloa o le patele, ma tuu le tusi paia i talaane o le fata faitaulaga. I le taimi o le sauniga matou te fesoasoani e tufa le falaoa o le Komunio, e talitutusa ma le faamanatuga.
Ina ia avea ma tama faitaulaga, matou te taulotoina upu o le Misasa i le faaLatina. Na matou auai foi i vasega faalelotu i vaiaso uma. I taumafanafana uma matou te auai atu ma a’u uo ma o’u uso ma o’u tuafafine i le aoga Tusi Paia e tusa o le 20 maila (32 km) mai le matou fale. Na pisi o’u matua i la matou faatoaga sana i le taumafanafana. Na ono mafai ona la faaaogaina la matou fesoasoani i na vaiaso, ae na la manatu e taua lo matou mauaina o lenei avanoa e aoao ai e uiga i le Atua ma faatasi ai ma uo lelei. O le faatuatua o le patele ma taupou sa o e na faiaoga ia i matou na faagaeetiaina ai a’u. Na ou filifili ai loa o le a ou faia le mea e finagalo le Atua ou te faia.
I o’u tausaga aoga i le aoga ogatotonu ma le aoga maualuga, o le toatele o a’u uo na filifili e fai mea ia na aoao ai a’u e le sa’o, e pei o le inu pia ma le ulaula. Na ou pisi ou te galue i le faatoaga, taalo i taaloga, auai i tala faaleaoga, ma auai i gaoioiga i la’u lotu. Na ou lagona lo’u faamanuiaina i le i ai o uo lelei o e na taumafai foi e filifili le mea tonu.
Ina ua ou auai i le kolisi na amata ona ou aoao e uiga i le Ekalesia a Iesu Keriso o le Au Paia o Aso e Gata Ai, o uo lelei foi na faia se eseesega mo a’u. Ou te manatua lelei la’u asiasiga muamua i se uarota a le AAG, lea na potopoto i se falefaafiafia laitiiti i le lotoifale. O le taimi lava na ou laa ese ai ma le taavale, na lolofi mai ai a’u uo mai le kolisi ia te au. “E ese le manaia o le vaai atu ia te oe!” o a latou tala ia. “Ua matou fiafia lava ua mafai ona e sau!” Ou te lei faatalofa muamua lava i ni mau tagata se toatele faapea i lo’u olaga. “E fiafia lava i lou faatasi mai,” na fai mai ai tagata ou te lei feiloai lava i ai muamua. “Toe sau foi.” O loo ou ootia pea i le alofa o lena uarota ia te a’u, o se tagata ese.
O mea uma lava na tutupu ia te a’u i lena aso na ese lava le lagona. O le sauniga tapuai na ou iloaina i le avea o se tama faitaulaga na matua fuafuaina ma matua filemu lava. O le sauniga tapuai a le Au Paia o Aso e Gata Ai na matua ese lava—e matua tele le faaaumea a o le’i faia le sauniga, e matua tele manatu fou e mafaufau i ai ma mea fou e faamasani i ai. A o ou nofo i le falefaafiafia, sa tele ni au fesili ma ni masalosaloga. Ae o le mafanafana ma le faauo o tagata o le Ekalesia na fesoasoani ia ou lagona le toafilemu. Ma, a o ou suesueina le talalelei, o le molimau a le Agaga Paia na fesoasoani i lo’u manao ou te papatiso.
Ou te faafetai mo upumoni toefuataiina lea e na O Le Ekalesia a Iesu Keriso o le Au Paia o Aso e Gata Ai o loo maua ai. Ma ou te faafetai mo uo o e na fesoasoani ia te a’u ia mauaina na upumoni.
I le avea ai ma fanau o e auai i le Ekalesia a Iesu Keriso, ua faamanuiaina outou e iloa le tele o mea e uiga i lo tatou Tama Faalelagi ma Lona Alo. O le a tupu lo outou faatuatua a o outou auai i le ekalesia, tatalo, ma suesue tusitusiga paia na o oe pe faatasi foi ma lou aiga.
A o e faia filifiliga lelei mo lou lava olaga, faamolemole aapa atu i isi o e e le’i auai i le Ekalesia po o ē atonu e le auai i le lotu i taimi uma. Talia lelei i latou i le Peraimeri. Ia mata ataata. Nofo i talaane o se tasi e fou. Fesili i mea e fiafia ai isi, ma ia tautala ma le agalelei i taimi uma. O le alofa e te faasoaina atu o le a fesoasoani ia i latou o loo siomia oe e faia filifiliga lelei ma iloa ai le Faaola o Iesu Keriso ma aoaoga o Lana talalelei toefuataiina.