Taulima o Faauooga
“E alofa le uo i aso uma lava” (Faataoto 17:17).
E faavae i luga o se tala moni
Na ou feiloai ia Megan ina ua siitia lo’u aiga i lo matou fale fou. Na nofo o ia i lea auala, ma na ma i ai uma i le vasega Peraimeri a Sister Crawford. Na avea i maua ma uo ma e tele ina ma taaalo faatasi. Na ou vaavaai lelei ia Megan, ma taumafai e manatua pe faapefea ona ia faamatalaina se tala ula pe faapefea ona ia teuina lona ulu pe faapefea ona faigofie lona talanoa atu i isi tamaiti. Na ou mafaufau o Megan ua atoatoa. O a’u ou te matamuli. Na ou fia pei o Megan.
I se tasi aso na ou valaau atu ia Megan pe fia taalo. E lei fai maia e ia se tala i le amataga.
“O Caitlin lea ua iinei,” na iu ina fai mai ai o ia.
Sa i ai foi Caitlin i le ma vasega Peraimeri. Na ou faatali ia Megan e valaaulia mai a’u ou te alu atu, ae e lei fai mai o ia. Na leai se leo i lana pito o le laina.
“Oi. Ua lelei,” na ou tali tautoai atu ai. Na tuu i lalo e Megan le telefoni e aunoa ma se isi tala.
I le Aso Sa lena i le Peraimeri, na fesili mai Sister Crawford ia i matou, “O le a le uiga o le avea ma se uo lelei?”
Na ou ataata atu ia Megan, ae na te le’i iloa mai a’u. Na liliu o ia i le isi itu ma musumusu atu ia Caitlin. Na faafuasei ona ata leotele Caitlin.
“Faamolemole filemu, tamaitai,” o le tala lea a Sister Crawford. Na taofi le la femusuai, ae na tetete o la tauau i le toē. Na liliu mai Sister Crawford ia te a’u. “Angie, o le a se mea e te manatu e iloa ai se uo lelei?”
“Ia, o se tasi e lelei ma fiafia e te lua taaalo ma—”
Na toē tetele Megan ma Caitlin. Na vevela o’u foliga, ma na ou tilotilo i le fola. Pe o la e toē ea ia te a’u?
Na faauu foliga o Sister Crawford ia i laua, ona ataata mai lea ia te a’u. “E sa’o lena, Angie,” o lana tala lea. Na tilotilo solo o ia i le vasega. “E faapefea ona avea oe ma se uo lelei?”
Na sii le lima o Atamu. “E mafai ona tatou fesoasoani i tagata,” o lana tali lea.
Na luelue le ulu o Sister Crawford. “O se uo lelei e manao e fesoasoani ma auauna atu i isi. Na aoao mai e Iesu Keriso lena mea a o soifua o Ia i le lalolagi. Na Ia aoao mai foi i tatou e tatau ona tatou agalelei i tagata uma.”
Na ou tilotilo atu ia Megan ma ataata atu ia te ia. E lei ataata mai o ia. Na ou lagonaina le faanoanoa i totonu. Pe ua le toe fiafia ea Megan ia te a’u?
I le faaiuga o le lesona, na sii i luga e Sister Crawford se tamai ato. “Na ou aumaia se mea mo outou,” o lana tala lea. Na tago o ia i totonu o le ato ma faaali mai ia i matou ni manoa felanulanuai na nonoa faatasi i tamai lio. “O nei mea o taulima o faauooga. E tuu i lou lima, ma soo se taimi lava e te vaai ai i ai e mafai ona e manatua ina ia avea oe ma se uo lelei.”
Atonu o le a fesoasoani taulima o faauooga! Atonu o le a maua e i maua ma Megan ni taulima e tutusa. A o faasolo atu le ato i le vasega, na ou faalagolago atu ia Megan. “O le a le lanu o le a e avea?” o la’u fesili atu lea ia te ia.
Na faamimigi tauau o Megan. “Masalo o le lanusamasama.”
“E faapena foi a’u,” o la’u tala lea.
Na filifili e Caitlin le taulima lanumoana. Ona ia pasi lea o le ato ia Megan. Na iloilo e Megan ni nai taulima, ona toso foi lea o se taulima lanumoana. Na ou pulatoa atu ia te ia. Lanumoana? Na faavave ona ia tuuina mai ia te a’u le ato. Na ou pulatoa i ai, ma lo’u le iloa po o le a le mea o le a fai. Sa na o taulima lanusamasama na totoe. Na ou tosoina lemu ae le tasi i fafo.
Na toē Megan ma Caitlin ma tuu faatasi o la lima, ma tilotilo fiafia i a laua taulima lanumoana tutusa. Na ou faalogo atu ua alu a’e se mea patupatu i lo’u faai. Na tiga o’u mata i loimata. Na u o’u nifo ina ia aua ai nei o’u tagi. O le a ou le tagi i luma o i laua.
* * * *
Na ou faapalasi atu i lima o Tina i le taimi lava na ou taunuu ai i le fale mai le lotu. “O le a le mea ua tupu, la’u pele?” Na fesili mai ai Tina a ua amata ona ou tagi. Ma o’u loimata na ou faamatala atu ai ia te ia le mea na tupu. Na nofo o ia i ou tafatafa i luga o lo’u moega ma fusi mau ia te a’u. “Faamalie atu, Angie,” o lana tala lea.
“Pe le toe manao ea Megan e avea ma a’u uo?” o la’u fesili lea.
Na seluselu e Tina lo’u lauulu. “O nisi taimi tatou te le iloa pe aisea e faia ai e tagata nisi o mea,” o lana tala lea. “Faamalie atu i lena mea na tupu.”
“Na fai mai Sister Crawford ananei e tatau ona tatou taumafai e agalelei i tagata uma, e pei o Iesu. Ae ou te le fia agalelei ia Megan.”
“Ou te iloa,” o le tala lea a Tina. “Ae ou te lagolagoina foi Sister Crawford. Atonu e faigata, ae e tatau lava ona tatou taumafai e agalelei atu e tusa lava pe faatiga e se tasi o tatou lagona. Na aoao mai i tatou e Iesu e faamagalo atu i isi.”
“E faapefea ona ou faia lena mea?” o la’u fesili lea. Na ou mafaufau i le auala na toē ai Megan ma Caitlin, ma na ou toe lagonaina foi lena lagona faanoanoa.
Na tusi le lima o Tina i se faatagata o se teine o loo tootuli e tatalo na ou tuuina i luga o la’u laulau. “Soo se taimi lava e faatiga ai e se tasi o’u lagona, ou te tatalo atu i le Tama Faalelagi e fesoasoani mai ia te a’u e faamagalo lena tagata. Ou te tatalo atu ia te Ia e faamalulu lo’u loto ma le loto o le isi tagata.”
“E aoga la?” o la’u fesili lea.
Na ataata Tina ma sogi mai i lo’u ulu. “E lelei lava i taimi uma la’u faalogo pe a ou talanoa atu i le Tama Faalelagi,” o lana tala lea.
Ina ua fai la’u tatalo i lena po na ou faafetai i le Tama Faalelagi mo le faauooga na ma faia ma Megan. Ona ou tatalo atu loa lea ia te Ia e fesoasoani mai ia te a’u e faamagalo o ia. Na moeiini mau o’u mata ma ou matua mafaufau. “Faamolemole fesoasoani ia ma toe uo ma Megan,” o la’u tatalo lea.
Na ou tatalo mo na mea mo nai aso na sosoo ai. I le Aso Toonai na ou faalue ai i le matou faaluega ae ou vaai atu loa ia Megan o savali mai i le auala. Na taofi lau faaluega. Na ma tau fai tilotilo le tasi i le isi ae leai ni tala na faia. Mulimuli ane na aapa mai Megan ma tuu se mea i lo’u lima.
“O le mea lea mo oe,” o lana tala lea. Na tatala lo’u lima ma ou vaaia ai se taulima o faauooga lanumoana.
“E te fia taalo?” o le fesili lea a Megan. “E sau Caitlin i lo’u fale. O le a faataitai o i tatou o purinisese, a o Noodle o le a avea ma masiofo.”
O Noodle o le pusi tusitusi faaefuefu a Megan. Na ou ata, ma ou mafaufau ia Noodle o fai sona pale. Na ou faalogoina le vaega gaogao i lo’u fatafata ua faasolo ina laitiiti. “Ioe, ou te fiafia ou te alu atu i lou fale,” o la’u tala lea. “Faafetai.”
Na ou ataata atu ia te ia, ma o le taimi lea na ataata mai foi Megan.
“O outou uma lava taitoatasi e mafai ona avea ma se uo i se tasi, e tusa lava pe na o le ataata… . Ia faaali atu i ou foliga le susulu o loo i totonu o lou loto.”
Peresitene James E. Faust, Fesoasoani Lua i le Au Peresitene Sili, “O Lou Malamalama—o se Tagavai i Atunuu Uma,” Liahona, Me 2006, 113.