Na O mai Faatasi Tagata o le Ekalesia ina ua maea le Mafuie sa Lavea ai Atumotu o Hawaii
O le mafuie e 6.7 le malosi lea sa aafia ai Atumotu o Hawaii i le vaveao o le Aso Sa, 15 Oketopa, 2006, na mafua ai ona faaleagaina ni vaega laiti o le Malumalu o Kona Hawaii ma nisi o falelotu, e tusa ai ma muai iloiloga.
O le mafuie, lea na lulu i le tusa o le 7:07 i le taeao i le taimi Hawaii, sa i ai lona mata autu i le 10 maila (16 km) i matu-matu i sisifo o Kailua-Kona i le Motu Tele o Hawaii ma sa lagonaina i motu uma, ma mafua ai le pe o le eletise i Oahu. I le Motu Tele, sa pe le eletise mo ni nai itula, ma na faaleagaina ai auala, alalaupapa, ma le tele o isi fale.
E tusa ai ma le saunoaga a Elder Eric B. Shumway, o le Fitugafulu Eria ma o le peresitene o le BYU–Hawaii, o le Malumalu a Kona Hawaii, o loo i Kailua-Kona, sa faaleagaina nisi o moli tautau ma isi mea laiti, ae sa toe tatala le malumalu mo galuega i le lua o aso mulimuli ane. E leai se tagata o le Ekalesia po o faifeautalai na afaina, ae o falelotu uma i le Motu Tele sa i ai ni nai mea sa faaleagaina, o le toe faaopoopo mai lea a Elder Shumway.
Na taua e Elder Shumway o fuafuaga mo faalavelave faafuasei sa vave ona faatinoina ina ua maea le mafuie. “E maeu le manaia o le vaai atu i tagata o le Ekalesia o o mai faatasi,” na ia faapea mai ai.
Fai mai Aley K. Auna Jr., o le Peresitene o le Siteki a Kona Hawaii, sa matua faagaeetia o ia i le tali mai a taitai perisitua ma tagata o le siteki i fuafuaga mo faalavelave faafuasei a le siteki, lea na aofia ai se fuafuaga mo se mafuie e tusa lona malosi ma le 6.5 pe maualuga atu. Fai mai a ia, sa vave ona “faafesootai ma faamautinoaina ua saogalemu” tagata uma o siteki.
I le taimi o lenei lipoti, na faamalamalama mai e Peresitene Auna, o iloiloga o le saogalemu o falelotu o le siteki o loo faaauauina pea, ma taua ai o le falelotu o le Uarota a Kohala, o loo i le nofoaga e latalata i le totonugalemu o le mafuie, o loo i ai ni ta’eta’ei i puipui ma moli ua faaleagaina. O nisi mea sa faaleagaina tele na aafia ai le falelotu o le Uarota a Keei ina ua mafuli se ipu o le satelite mai lona tulaga ma sa faaleagaina ai le pito o le fale o faifeautalai o loo i le lotoa. Ma le isi, na toulu i lalo nisi o faalo faamoe o totonu o le falelotu.
I Oahu, sa leai ni mea na faaleagaina na lipotia i le Malumalu i Laie Hawaii, ma sei vagana ai le pe o le eletise, e leai ni mea na faaleagaina ua lipotia mai le BYU–Hawaii po o le Polynesian Cultural Center o loo sosoo ane ai.
Sii mai le Church News, 21 Oketopa, 2006.