Sauniuniga Faalesoifua Maloloina mo Faifeautalai
O sauniuniga faaletino ma le mafaufau e tatau ona amata i le lua tausaga ao lei faataunuuina se galuega faamisiona.
I le 35 tausaga o le avea ai ma se fomai e faia taotoga o le fatu ma le faai, sa ou faatinoina ai le afe o taotoga i le fatu. I le maea ai o taotoga, e masani ona fesili mai gasegase ia te au pe mafai faapefea ona latou taofia le toe faia o nisi taotoga i le lumanai. Ma e tusa foi pe latou te le fesili mai, na ou lagonaina le tatau ona ou tauina atu pea ia i latou. Ou te talanoa atu ia i latou e uiga i le taua o taumafa paleni, mamafa talafeagai, gaoioiga faamalositino, lava o le malolo, ma le faaitiitia o le popole. O i latou o e faatinoina a’u fautuaga sa faamanuiaina i le tele o tausaga o le soifua manuia. O le toatele o i latou na leai se tautinoga e faia fetuunaiga alagatatau o le soifuaga, na toe faia foi nisi taotoga—e masani i se taimi vave nai lo le faatuai.
Amata Atu Nei
O auala o puipuiga e taua foi i le autalavou matutua o e o loo sauniuni mo le faia o ni misiona. O le taimi nei, e tusa ma le 3 pasene o faifeautalai ua vave faamutaina a latou misiona ona o faafitauli o le soifua maloloina faaletino po o le mafaufau. O le aveesea o ni faifeautalai se toa 3 mai le 100 atonu e foliga mai e le o se numera tele. Ae i le tagata lava lea ma lona aiga, e matuai taua lava.
I le sili atu ma se tausaga, ua ou auauna ai i se valaauga lea ou te mataituina ai faafitauli o le soifua maloloina o loo feagai ma faifeautalai. E faavae la i ou aafiaga i lenei tofiga, ou te tuuina atu ai faamatalaga nei e fesoasoani ai i tagata talavou o loo sauniuni e avea ma ni faifeautalai, e faaitiitia ai le avanoa e ono maua ai i nei faafitauli o le soifua maloloina.
O le mea e lelei ai, o le tele o faafitauli o le soifua maloloina o loo feagai ma faifeautalai e mafai ona puipuia e ala i le saunia lelei. Sa saunoa Elder David A. Bednar o le Korama a Aposetolo e Toasefululua e faapea, “O le mea sili ona taua e tasi e mafai ona e faia ia saunia ai mo se valaauga e auauna atu, o le avea lea ma se faifeautalai a o lei taitai ona e alu i se misiona.”1
Ou te fautuaina ia amata sauniuniga faalesoifua maloloina ia le itiiti ifo i le lua tausaga a o lumanai ai le faamoemoe mo le auaunaga faamisiona. O i latou o e faatalitali e saunia i le taimi mulimuli, pe seiloga foi e maua le valaauga e auauna atu, atonu o le a le saunia ma e ono faatuai ai foi a latou misiona.
O sauniuniga faalesoifua maloloina faaletino e masani ona i ai ma se asiasiga masani i se fomai o le soifua maloloina ma se fomai nifo. I nisi tulaga, o sauniuniga faalesoifua maloloina o le mafaufau e ono manaomia ai se iloiloga a se tagata tomai faapitoa i le mafaufau.
Sauniuniga Faalesoifua Maloloina Faaletino
Gaoioiga masani faamalositino (i aso taitasi). O se faifeautalai e tatau ona mafai ona savali i le averesi e ono maila (10 km) i le aso ma vili le uila vilivae i le 12 maila (19 km) i le aso. O faifeau faamisiona faamoemoeina e le o savavali ae ua na o le taavale i le vasega po o le galuega, e ono mafai ona tiga vae ma mafoefoe pe a taunuu atu i le misiona. O i latou e le masani i le tietie uila vilivae o le a faapea foi ona matua “tiga nofoaga” pe a avea le uila ma a latou auala masani o feoaiga. O se faifeautalai e le lava le malosi o le a vaivai i le galuega faamisiona, ma o se faifeautalai e vaivai o le a tele se avanoa e faavaivai ai ma i ai popolega o le soifua maloloina nai lo se faifeautalai e malosi lelei faaletino.
O faifeautalai faamoemoeina e mafai ona saunia mo le faigata o le olaga faafaifeautalai e ala i le faatulagaina o se mamanu masani o gaoioiga faamalositino—o le savali, tamoe, po o le tietie uila mo se itula i aso uma. O i latou ua avea le taalo i taaloga faaeletonika po o le auina atu o feau telesi i telefoni feaveai ma faamalositino autu, e tusa o le fa masina faatoa oo ai i se tulaga o le malosi lea e mafai ai ona faatagaina i latou e oo i le fiafia o le faamalositino.
Lava le moe. E ui e eseese manaoga o le moe, o le autalavou matutua uma e manaomia le moe mo le fitu i le valu itula i le aso. O le mea lelei lava, e tatau ona latou momoe i le 10:30 i le vaeluapo ma feala i luga i le 6:30 i le 8:00 i le taeao. O le ala ai seia oo i le 2:00 po o le 3:00 i le vaveao ma moe seia oo i le 10:00 i le taeao, o le a tuua ai se tagata ma se lagona lē lava i taimi uma ma manao ai e moe seia oo i le aoauli. O le ala ai i le po atoa mo le suesue mo suega, taalo i taaloga vitio i le tele o le po, po o le faigaluega i le sifi o le vaveao e mafai ona avea ma se tulaga le lelei ona e toe faatulagaina ai le taimi masani o le tino. O faifeautalai e ola i se olaga faatulagaina. E momoe i latou i le 10:30 i le afiafi, ae ala i le 6:30 i le taeao i aso taitasi. O lenei faatulagaga o le a faigata, sei vagana e faia e faifeautalai faamoemoeina se faatulagaga talitutusa a o le’i taitai oo mai le valaauga e auauna atu ai.
Masani e tausami i meaai maloloina. Nai lo le ola ai i meaai suamalie ma lololo, e tatau i le autalavou ona aoao ia fiafia i taumafa e i ai porotini ma meaai e i ai ‘alava, e pei o anogase o manu, iokati (yogurt), fualaau faisua, ma fualaau aina. O le inuina foi o le sili atu ma le 12 aunese o vai suamalie i le aso ua ova tele.
E manaomia e le Matagaluega o Faifeau Faamisiona ia faifeautalai ina ia fetaui le mamafa o le tagata ma lona maualuga, ia le maualuga atu i le 37. O le mea moni lava o lenei tulaga ua i ai lea i le tuaoi o le puta tele ma le soona puta tele. E tatau i faifeautalai faamoemoeina ona taumafai ia tausia lo latou mamafa i le vaega e tatau ai, e faapea ona aloese ai mai faafitauli faalesoifua maloloina e faatatau i le puta. O le paee tele foi mai le mamafa e tatau ona i ai, e mafai foi ona i ai ni taunuuga ogaoga faalesoifua maloloina.
Tomai e saunia taumafa. E mafai ona fesoasoani matua i o latou atalii ma afafine e aoao le sauniaina o ni meaai maloloina faigofie. Ou te faamamafa atu le upu “faigofie” aua o faifeautalai e masani ona kukaina meaai i se falai po o se mataafi kesi e tasi ae le o se ogaumu. O faifeautalai faamoemoeina uma e tatau ona iloa vaega amata o le kukaina ma le taulimaina ma le mama o meaai. Talu ai e seasea ona i ai ni masini fufulu ipu i nofoaga e nonofo ai faifeautalai, o le mea lea e taua ai foi le iloa ona faamama ipu pe a uma ona aai, i le vai vevela ma le fasimoli.
Tumama o le tagata lava ia. O le tumama o le tagata lava ia ma uiga masani lelei o foliga ma lavalava, e taua tele i le manuia o faifeautalai. O vaaiga tausaafia muamua e umi lava [ona manatuaina]. O lima mama e fesoasoani foi i faifeautalai e tumau ai le soifua maloloina lelei ma taofia ai le sosolo atu o ni faamai pipisi.
Faafitauli o le pa’u. O le patupatu o foliga ona o fuafua o se faafitauli taatele i tupulaga talavou. O i latou e i ai faafitauli tuga o le patupatu o foliga ona o fuafua, e tatau ona saili se fesoasoani faafomai ao lei taitai ona ulu atu i le MTC. O nisi o vailaau mo patupatu o foliga ona o fuafua e manaomia ai le vaaia mo se taimi ma e le faaaogaina i totonu o le misiona.
Soifua maloloina o oloa. O le puipuia o le ki lea i oloa maloloina lelei. O le uiga o lenei mea o se masani lea e fufulu nifo a le itiiti ifo o le taeao ma le po, o le faaaogaina i aso taitasi o filo mo le tausia o oloa, ma le asiasi pea i lau fomai nifo. Soo se tulaga manaomia mo le faaleleia o oloa e tatau ona maea ao lei auina atu le talosaga mo le faifeautalai. O togafitiga mo le faasaosaoina o oloa—lea e masani ona alu ai le lua tausaga pe sili atu—e tatau ona faamaeaina ao lei taunuu atu i le MTC.
Tulaga o gasegase tumau. O le ulu tiga e taatele, o faafitauli faigata o le soifua maloloina e ono faateleina le tuga i le taimi o le auaunaga faamisiona, ma e ono faigata ona iloiloina ma togafitia i totonu o le galuega. Mai lea taimi i lea taimi o faafitauli i le manava ma le alaai e mafai foi ona avea o ni gasegase tumau i le taimi o le auaunaga faamisiona. O faafitauli o le fatu ma faafitauli o le faigata ona manava e pei o le sela, e tatau ona iloiloina maeaea ao lei amataina le auaunaga faamisiona. Faatasi ai ma togafitiga talafeagai, o le tele lava o faafitauli o le soifua maloloina e oo ina faaleleia, ma mafai ai ona faia le auaunaga faamisiona, pe afai e faaauauina togafitiga i le taimi o le misiona.
O faafitauli o ponaivi ma sooga e mafua mai manuaga e ono manaomia ai taotoga. O tulaga o taotoga i ponaivi ma uaua o le tino, e oo lava i taotoga e faia i le faata, e masani lava ona umi se taimi faatoa toe malosi mai. O faifeautalai faamoemoeina e tatau ona mauaina se tausiga tatau ai o ponaivi ma uaua o le tino mo se taimi ao lei taitai (fa i le ono masina) ona ulufale atu i le galuega faamisiona. O se alii po o se tamaitai talavou e taunuu atu i le MTC ma ni tootoo i le lua o vaiaso talu ona uma se taotoga i tulivae, o le a le mafai ona savali i le mamao e manaomia i totonu o le misiona.
Tui. O i latou o loo sauniuni mo le auauna atu i le misiona e tatau ona maea ona faia tui uma e masani ona faia i taimi tatau ai o o latou tausaga. Ao lei taitai ona amataina a latou auaunaga faamisiona, e tatau foi ona latou maua nisi tui faapitoa e manaomia mo le atunuu faapitoa o le a latou auauna atu ai.
O le tulaga lelei o le faia o tui e matuai sili atu i lo le avanoa laitiiti o le mauaina o le puipuiga. O tui e tuuina atu ai i le tagata le malosi e tetee ai i faamai i vaitaimi eseese. O le faatumauina o le le aafia, e ono manaomia ai se tui malosi.
Sauniuniga Faalesoifua Maloloina o le Mafaufau
O tagata uma lava e i ai le taimi o le faanoanoa, popole, ma le faavaivai. O se mea masani lenei tulaga, ae maise lava i taimi o le maliu ma le faavauvau. Ae peitai, soo se lagona faigata lava e faalavelave i tulaga masani o mea e faia i aso taitasi, e manaomia le foia ao lei amataina le auaunaga faamisiona.
Soo se agasala e lei foia e mafai ona aafia ai le soifua maloloina o le mafaufau ma le faaletino o le tagata. O nei tulaga e tatau ona foia e ala i le salamo atoatoa ao feiloai ai faifeautalai sauniuni ma o latou epikopo ao lei mauaina se valaauga. Ae o le taimi lava e maea ai lea tulaga, atonu e i ai lava nisi vaega e manaomia ona togafitia.
Lagona le mautonu. O i latou o e mafatia i lagona tumau po o lagona e tupu pea lava pea o le faavaivai, faanoanoa, popole, po o le fefe e tatau ona iloiloina e se fomai po o se fautua o le soifua maloloina o le mafaufau. O lagona fesuisuiai, ae maise lava pe a aafia ai le faalii ma le ita, e tatau foi ona iloiloina. O togafitiga, e aofia ai le fautuaina ma/po o vai ma fualaau, e masani ona faaitiitia pe faatoafilemuina ai lagona le mautonu, ma mafai ai ona faataunuu auaunaga faamisiona.
Tulaga o manatu e le masani ai. O le faatupulaia o le popole ma le tausalaina e mafai ona matuai faaleagaina ai le agavaa o se faifeautalai e auauna ai. O le fia atoatoa, o se manao lofituina ina ia atoatoa, e mafai foi ona avea o se tulaga faavaivai o le maloloina o le mafaufau. O manatu tiga e tutupu pea lava pea ma uiga fai soo e pei o le faafia ona fufuluina o lima o faailoga ia o mafaufauga tumau o lagona le mautonu. O le fetufaai ai ma se fomai po o se tagata faapitoa o le soifua maloloina o le mafaufau, e masani ona togafitia lelei ai nei tulaga o manatu e le masani ai.
Faafitauli i le aoaoina. Talu ai o le mafai ona aoaoina ma aoao atu o le autu lea o le galuega faamisiona, o faafitauli i le aoaoina e pei o le faaletonu o le taulai [i se mea] (ADD) e mafai ona faaleagaina ai le faamanuiaina o le faifeautalai. Ae peitai, o le iloiloina ma le togafitia o uiga aoaoina le mautonu e ono mafai ona faaleleia atili ai le agavaa. O nisi o faaletonu i le aoaoina e ono le talafeagai ma le olaga faafaifeautalai. O matua ma faifeautalai faamoemoeina e tatau ona talanoa i le agaga tatalo ma o latou epikopo ma tagata tomai faapitoa, e uiga i le mafai ona auauna atu i se misiona talai.
Faafitauli i le taumafa. Talu ai ona e mafai e tagata ona faaaogaina meaai e faamalieina ai i latou ma faamatuu atu ai lagona o le faavaivai po o le popole, o lea e mafai ai ona avea le taumafa ma se aafiaga e oo atu ai i le tino puta. I le isi itu, o le malosi o uunaiga faalauaitele ina ia paee po o le faaitiitia o le mamafa e mafai ona oo atu i le matuai paee tele (anorexia nervosa po o le bulimia), o nei tulaga uma e mafua ai faaletonu tuga faalesoifua maloloina. O nei faaletonu e le mafai ona foia i latou lava i taimi o le misiona. Talu ai e faigata tele ona togafitia, e ono le mafai ai ona talafeagai ma le auaunaga faamisiona.
Ma’i Manatu i le Aiga. E ui o le ma’i manatu laitiiti o se tulaga masani o le aafiaga o le misiona, o le tuua o matua ma uso ma tuafafine e mafai ona avea ma mafuaaga o le popole malosi ma afaina ai le tulaga o le moe po o le taumafa. O le vave ona lusi o le mamafa o se mea e masani ai faifeautalai e i ai le popole tele pe a vavamamao ma aiga. Ina ia puipuia ia faafitauli, e tatau i faifeautalai faamoemoeina ona maua le mafanafana i le alu ese ai ma le aiga. O ni malaga i tolauapiga faaumiumi po o le nofo ai i se aoga nofo tumau e mafai ona iloa ai ni faailoga o le popole tele i le vavamamao [ma aiga]. O i latou e i ai faafitauli e tutupu pe a o ese mai aiga e tatau ona sailia togafitiga ma se fomai po o se tagata tomai faapitoa i le soifua maloloina o le mafaufau.
Tomai lautele. O le galuega faafaifeautalai e aafia ai fonotaga ma talanoaga ma tagata o soo se vaitausaga ma le tautala ai i luma o faapotopotoga. E tatau i faifeautalai faamoemoeina ona toa i le talanoa ai i tagata matutua. E tatau ona latou faataitai le faaaloalo ma le tausaafia, i le faaaogaina o amio tatau ai i luga o laulau, ma faaalia isi uiga tausaafia o le vafealoaloai. E manaomia foi e faifeautalai ona o atu i tagata ese ma amata se talatalanoaga. O le mea lea, e tatau ai i faifeautalai faamoemoeina ona aoao ia to’a i le amataina o fesootaiga ma talanoaga ma tagata i fafo atu o a latou faapotopotoga masani o aiga ma uo. E tatau foi ona latou nofouta i eseesega o aganuu i le lalolagi.
Galuega. O le galuega faamisiona o le tulaga tonu lava lena, o le galue. E leai lava se mea faigofie e uiga i le galuega faamisiona, o le mea lea e tatau ai i le autalavou ona atiina ae le mafai e galue ai ma le faatuatuaina. O se galuega masani e aoaoina ai ia uiga e pei o le oo atu i le galuega i le taimi, aua nei misia galuega ma le le fuafuaina, faia lelei o galuega atofaina, vaai nisi galuega e faia pe a maea galuega atofaina, ma aua le vave alu i le fale. O se galuega e fesoasoani foi i le au talavou ia malamalama i le taua o le tupe. Pe a mafai, o faifeautalai faamoemoeina e tatau ona fuafua e totogiina le tele o le tau o le misiona e mafai ai, nai lo le faalagolago i matua po o foai mai isi. O le fesoasoani i le totogiina o a latou lava misiona o le a fesoasoani ai i faifeautalai faamoemoeina e aoao e ola i le utiuti o le alauni a faifeautalai.
O Isi Avanoa mo le Misiona
I le taimi o sauniuniga e auauna atu, atonu e oo ai faifeautalai faamoemoeina i ni tulaga faigata faaletino po o lagona. E tatau i faifeautalai faamoemoeina ma o latou matua ona faamaoni atoatoa i le faaalia uma o tulaga o le soifua maloloina ma ni togafitiga i luga o le pepa talosaga e fautuaina atu ai se faifeautalai.
Ae paga lea, o nisi faafitauli o le soifua maloloina e aumaia ai nisi faigata ogaoga i le faia ai o se galuega faifeautalai faamisiona. Na saunoa mai le Au Peresitene Sili: “Ua faapea ona i ai ni tagata taitoatasi agavaa o e e mananao ina ia auauna atu ae ua le agavaa mo luitau faaletino, faalemafaufau, po o le faalelagona o se misiona. Ua matou talosagaina peresitene o siteki ma epikopo ina ia faailoa atu le alofa ma le talisapaia i nei tagata taitoatasi ma ia tuusaunoaina aloaia mai i latou mai galuega faifeautalai faamisiona.”2 I tulaga faapena, o misiona auauna atu e mafai ona avea o se faamanuiaga sili, e faatagaina ai ia tagata e nonofo i o latou aiga ma maua togafitiga tatau ai ao soifua ma tuputupu ae ai i le galuega a le Alii. E mafai e matua, epikopo, ma peresitene o siteki ona fesoasoani i le faamalosiauina ma le faatulagaina o avanoa talafeagai.
O avanoa mo misiona auauna atu e mafai foi ona maua i le Uepisaite a le Ekalesia www.lds.org. Filifili “Other Resources,” sosoo ai ma le “Mission and Service Opportunities.” O le faaauauina o aoaoga maualuluga po o aoaoga faatino ina ia sili atu le taulimaina o manua tumau o le isi lea filifiliga lelei.
Ua Iinei e Fesoasoani Atu
A lelei ona tapena mamao e faifeautalai faamoemoeina i latou lava i le tuuina atu o a latou talosaga mo le fautuaina atu, e mafai ona latou iloa ma foia ni faafitauli o le soifua maloloina, faaleleia lo latou malosi faaletino, ma saunia lelei faalemafaufau ma faalelagona e onosaia ai le olaga faigata e manaomia mai faifeautalai. O le a faapea ona tele se tulaga e faamaeaina ai se misiona faamanuiaina, e saoloto mai ni faafitauli ogaoga o le soifua maloloina.
Ae paga lea, o nisi faifeautalai ua le fuafuaina le maua i gasegase po o le manunua ao auauna atu. E silia ma le 50 i latou e atamamai faapitoa tau i le soifua maloloina o loo auauna atu o ni faifeautalai faamisiona i le lalolagi, ma le 200 faaopoopo o volenitia o loo tautua i le laumua o le Ekalesia—o i latou uma e mo le lagolagoina o soifua maloloina o faifeautalai. I le talanoa ai i lenei vaegaau laitiiti o e atamamai faapitoa i le soifua maloloina, o le a matou i ai iina e fesoasoani atu i soo se faifeautalai e gasegase pe faamanualia. Ma matou te tatalo i aso uma ina ia tumau le ola maloloina ma saogalemu a tatou faifeautalai mai mea tiga ao latou auauna atu i le Alii ma Ana fanau.